LONGO DIA 43
LUNGIMBO 90 Encourageons-nous les uns les autres
Itshi Yajiya Gutukuatesa Gula Tualeba Muila?
“Kambenu gujiya ndaga jiagasue.”—1 TES. 5:21.
NDAGA JIDI MU LONGO EDI
Mu longo edi tuza mumona ndaga wajiya gutshita gula ushigo mutshigina egi Yehowa wana gudisagesa mukunda nu aye. Tuza nji mumona ndaga yajiya gugukuatesa gula udi gudisagesa luholo watombele ha gukombelela Yehowa.
1-2. a) Mihu itshi akombeledi a Yehowa ajiya gudihula? b) Itshi tuza muzuelela mu longo edi?
MUKUT’ETU agasue ikhale tudi mavuala nga athu a gukola, matangua ako tuana khala nu badute.a Ha gufezegesa, tangiza gale egi mulongeshi mumoshi wa muvuala udi gudihula gula Yehowa wana gudisagesa mukunda nu muene. Ndaga yene yajiya gumutuma ha gudihula gula wajiya gubatijiwa. Ngando tangiza gale egi, phangi mumoshi wa yala watombele guhaga mudimo wa Yehowa ha fundo dia thomo mu monyo wenji hakhalele muene muvuala ha fundo dia gukamba gukhala nu mbongo jiavula. Henyaha wabua muthu wagukola, gashigo mutagenesa nzala jia enya fami yenji, ndaga yene yajiya gumutuma ha gudihula gula wazudile desizio diabonga hakhalele muene muvuala. Tuajiya nji guzuelela phangi wa mukhetu wagukola munu gashigo luko nu ngolo. Wajiya guleba muila handaga gashigo luko mukalagala ndaga gifua luholo luakhalele muene mukalagala thomo. Wadihudile gale mihu gifua: ‘Yehowa wana gudisagesa mukunda nu ame ba? Ndaga jiagasue ngakalegele mukunda nu Yehowa jiakhalele diago nu ndando ba? Ngajiya gutshita luko ndaga jiko mukunda nu Yehowa ba?’
2 Gula tushigo mutshita yagasue ha guheta mvutu gu mihu eyi, gutshigina guetu gudi Yehowa guajiya guleba. Mu longo edi tuza mutadila luholo Biblia yajiya gutukuatesa gula tushigo diago mutshigina egi Yehowa wana gudisagesa mukunda nu esue, gula badesizio tuazudile akhalelego abonga nga ndo gula Yehowa wajiya luko gutukalegela.
ITSHI YAJIYA GUGUKUATESA GULA UDI GUDISAGESA?
3. Ndaga itshi tuajiya gutshita gula tudi nu badute?
3 Gula tudi nu badute, gutanga Mbimbi ya Nzambi guajiya gutukuatesa ha guheta mvutu gu mihu yetu. Gula tuatshita ngenyi, ‘mbatukolesa gutshigina’ guetu gudi Yehowa mbatukolesa nji ufuta wetu nu muene.—1 Kol. 16:13.
4. Luholo lutshi tuajiya ‘gukamba gujiya ndaga jiagasue’? (1 Tesalonike 5:21)
4 Tanga 1 Tesalonike 5:21. Tujimbilago egi Biblia idi gututoga ha gukamba “gujiya ndaga jiagasue.” Luholo lutshi tuajiya guyikagala? Gula tushigo mutshigina ndaga imoshi ngenyi, tuajiya gukamba gujiya itshi Biblia yana zuela mukunda nu ndaga yene. Tutadilenu gifezegeselo gia muvuala mumoshi wakhalele gudihula gula wakhalele diago nu ndando gu meso a Yehowa. Wakhalele naye gubemba gukamba mvutu gu muhu wene ba? Ndo, wakhalele naye ‘gukamba gujiya ndaga jiagasue’ yakotelesa egi gulonguga Biblia hagujiya matangi a Yehowa mukunda nu ndaga yene.
5. Luholo lutshi tuajiya guheta mvutu ya Yehowa gu mihu yetu?
5 Tangua tuana tanga Biblia, yana khala gifua tudi mutegelela Yehowa. Uvi gula tudi mutshigina guheta mvutu ya Yehowa gu mihu yetu, tushigo naye gusuga phamba ha gutanga Biblia. Tudi naye gutanga verse jia Biblia jidi muhana mvutu mu ndaga jidi gutusagesa. Tuajiya gukalegela ikadigilo ya gudisha inyi ulondegi wa Yehowa wana gutuhana ha gutshita ba recherche gu ndaga yene. (Ish. 2:3-6) Tudi naye gutshita gisambu gudi Yehowa ha gutukuatesa ha guheta mvutu gu ndaga idi gutusagesa. Gungima, tuajiya gukamba malongo a Biblia adi gudivua nu ndaga tudi mutagana nayo. Tuajiya nji guheta gubonga guavula gula tudi mutanga ifezegeselo idi mu Biblia ya athu ataganele nu ndaga jia luholo lumoshi nu esue.
6. Luholo lutshi gudibungisa gua mu hungu guana gutukuatesa ha gukatula badute?
6 Tuana “tegelela” nji Yehowa mu gudibungisa gua mu hungu. Gula tudi muya mu gudibungisa gua mu hungu phoso nu phoso, tuajiya guvua ndaga imoshi mu diskur nga mu komantere yahanyi phangi mumoshi yajiya gutukuatesa ha gukatula badute. (Ish. 27:17) Henyaha tutadilenu ndaga yajiya gutukuatesa ha guheta mvutu gu mihu yana gutusagesa.
YEHOWA WANA GUDISAGESA MUKUNDA NU AYE BA?
7. Muhu utshi athu ako ajiya gudihula?
7 Wadihudile gale egi: ‘Yehowa wana gungumona ba?’ Gula udi mumona egi ushigo nu ndando, wajiya gutangiza egi idi lamba gudi aye ha gubua futa dia muthu wafugile ima yagasue. Yajiya gukhala egi Fumu Davidi wadivile nji ngenyi. Wadihudile muavula tangua diakotelesele muene egi Yehowa wana gudisagesa mukunda nu athu. Wazuelele egi: ‘O Yehowa, muthu udi nanyi hagula udisagese mukunda nu muene? Mun’a muthu udi nanyi hagula umuwunguluge?’ (Ngi. 144:3) Fundo ditshi wajiya guheta mvutu gu mihu eyi?
8. Ha gutadila 1 Samuele 16:6, 7, 10-12, ndaga itshi Yehowa wana tala gudi athu?
8 Biblia yana gutulongesa egi Yehowa wana mona athu anyi athu ako ana mona egi ashigo nu ndando. Ha gufezegesa, Yehowa watumine profete Samuele ha gumba mun’a Yese mumoshi maji hagula mu masugu adi muza abue fumu gu Isalele. Yese watamegele an’enji a mala 7 ha gutagana nu Samuele uvi gatamegelego mun’enji wa galengeb Davidi. Uvi Yehowa watombele Davidi. (Tanga 1 Samuele 16:6, 7, 10-12.) Yehowa wamonele mutshima wa Davidi, wajiyile egi wakhalele gumuzumba muavula.
9. Ndaga itshi yajiya gugutshiginyisa egi Yehowa wana gudisagesa mukunda nu aye? (Tala nji gifuanesa.)
9 Tangiza gale luholo Yehowa wagumonesele gale egi wana gugumona. Wana guguhana malongo abonga ajiya gugukuatesa gu ndaga udi mutagana nayo. (Ngi. 32:8) Wajiya guguhana malongo ene gula ganago gugujiya ba? (Ngi. 139:1) Gula udi mukalegela malongo a Yehowa nu gumona luholo malongo ene adi gugukuatesa, mbawutshigina diago egi Yehowa wana gudisagesa mukunda nu aye. (1 Gudi. 28:9; Makal. 17:26, 27) Yehowa wana mona ikhesa yagasue wana kalagala ha gumukombelela nu ha gumutumagela. Wana mona nji makalegelo aye abonga, udi mutshigina egi ubue futa dienji. (Yel. 17:10) Mbawusuanguluga muavuala gula watshigina gubua futa dienji.—1 Yone 4:19.
‘Gula wakamba Yehowa, muene mbawubemba egi umumone.’—1 Gudi. 28:9 (Tala paragrafe 9)c
ITSHI WAJIYA GUTSHITA GULA UDI MUTANGIZA EGI BADESIZIO WAZUDILE AKHALELEGO ABONGA?
10. Mihu itshi tuajiya gudihula gula tudi mutangiza badesizio tuazudile mu masugu abalega?
10 Matangua ako, athu ako ajiya gudihula gula azudile badesizio abonga mu masugu abalega. Yajiya gukhala egi, abembele midimo yabonga inyi yakhalele guahana mbongo jiavula ha gudihana muavula mu mudimo wa Yehowa. Yajiya gukhala egi abembele gale midimo yene sendese mualeha. Yajiya gukhala nji egi ana mona athu ako adi mujiya anyi azudile badesizio a gudisha nu awo luholo adi mumonega gifua adi nu makuta avula nu lujingu luabonga. Ndaga yene yajiya guatuma ha gudihula egi: ‘Desizio ngazudile dia gukalegela Yehowa diakhalele diabonga ba? Nga ndo, ngakhalele naye gutshita mudimo hagula mangino ngukhale nu makuta avula ba?’
11. Ndaga itshi yakhalele musagesa muthu wasonegele mukanda wa Ngimbo mukhapho 73?
11 Gula aye nji wadihudile gale mihu ya luholo elu, tala luholo muthu wasonegele mukanda wa Ngimbo mukhapho 73 wakhalele gudivua. Wakhalele mumona athu anyi akhalelego mukombelela Yehowa nu sante yabonga nu umonyi nu lujingu luabonga. (Ngi. 73:3-5, 12) Tangua diamonele muene egi ndaga jia monyo wawo jiakhalele muyila muabonga, yamutumine ha gutangiza egi gukombelela Yehowa guakhalelego desizio diabonga. Matangi ene ‘akhalele gumusagesa lusugu luamudidi’ nu gumulebesa muila. (Ngi. 73:13, 14) Itshi yamukuatesele ha gubinga matangi ene?
12. Ha gutadila Ngimbo 73:16-18, ndaga itshi yakuatesele muyimbi wa ngimbo ha guheta guhuima mu matangi?
12 Tanga Ngimbo 73:16-18. Muyimbi wa ngimbo wayile ha fundo di guhuima, fundo dia gijila dinyi Yehowa walondele. Fundo diene diakhalele mukatshi dia fundo dinyi athu akhalele mukombelela Yehowa, guene guakhalele muene mutangiza muabonga. Wakotelesele egi ikhale lujingu lua athu ene luakhalele luabonga, uvi akhalelego nu felela mukunda nu masugu adi muza. Uvi galanduilego guleba muila, wakotelesele nji egi gusha Yehowa ha fundo dia thomo guakhalele desizio diabonga. Gutangiza ngenyi guamutumine ha guzula desizio dia gulandula gukombelela Yehowa.—Ngi. 73:23-28.
13. Itshi yajiya gugukuatesa gula udi gudibela mukunda nu badesizio ako wazudile? (Tala nji gifuanesa.)
13 Aye nji wajiya guheta guhuima gua luholo elu mu ukuateshi wa Mbimbi ya Nzambi. Luholo lutshi? Tangiza ima yabonga udi nayo, gifua luholo Yehowa wana guguzumba nu ujimbilago egi athu anyi anago gumukombelela ana hetago ukuateshi wenji. Athu ene ajiya gusha mutshima mu ima adi nayo handaga ashigo nu felela mukunda nu masugu adi muza. Uvi aye udi nu ima yavula yabonga Yehowa wana guguhana sendese mangino, mu masugu adi muza mbawuguhana monyo wa ivo nu ivo. (Ngi. 145:16) Tangiza luko ndaga eyi: Wajilego gujiya diago ndaga yakhalele naye gugubuila gula nga wabuilego Temue wa Yehowa. Uvi udi naye gujiya egi gula wana zula badesizio handaga wana zumba Nzambi nu athu ako, mbawulandula gukhala nu gusuanguluga.
Khala mutangigiza ishimbigo Yehowa mbawuguhana mu masugu adi muza (Tala paragrafe 13)d
ITSHI WAJIYA GUTSHITA GULA UDI MUTANGIZA EGI YEHOWA GAJIYILEGO GUGUKALEGELA LUKO?
14. Ndaga jitshi jiana tuma athu ako ha gutuna gudishila mutshima? Ndaga jiene jiajiya guatuma ha gudihula muhu utshi?
14 Akombeledi a Yehowa ako ajiyilego gutshita muavula mu mudimo wenji handaga abua athu a gukola, adi nu ukhashi mu muila nga ndo ashigo luko nu luholo lua gumukalegela gifua luholo akhalele guyitshita thomo. Hene, ajiya gudivua gifua ashigo nu ndando gu meso a Yehowa. Ndaga yene yajiya guatuma ha gudihula egi: ‘Yehowa wajiya gungukalegela luko ba?’
15. Mu ndaga jitshi muthu wasonegele mukanda wa Ngimbo 71 wakhalele musha mutshima?
15 Muthu wasonegele mukanda wa Ngimbo 71 wakhalele nji gudisagesa handaga muene nji walebele muila. Wakombelele egi: ‘Ungubembigo tangua ngolo jianguhua.’ (Ngi. 71:9, 18) Uvi muyimbi wa ngimbo muene walanduila gusha mutshima egi Yehowa mbawumukuatesa. Wakotelesele nji egi Yehowa wana suanguluga nu athu anyi ana tshita yagasue ha gumukombelela mu gudivua nu ndaga jia monyo wawo.—Ngi. 37:23-25.
16. Mu luholo lutshi athu a gukola ana landula gukhala nu ndando gudi Yehowa? (Ngimbo 92:12-15)
16 Gula udi muthu wagukola khala guditadila gifua luholo Yehowa wana gugutadila. Wajiya gugukuatesa ha gumukombelela nu gujinginyina guagasue ikhale ushigo luko nu ngolo mu muila. (Tanga Ngimbo 92:12-15.) Ha fundo dia gudisagesa mukunda nu ndaga jinyi wajiyilego gukalagala mangino, tshita ndaga jinyi wajiya gutshita. Ha gufezegesa, gutshigina guaye nu luholo wana monesela athu ako gisemo guajiya guakuatesa. Wajiya guawambela luholo Yehowa wagukuatesele mu ivo yabalega, wajiya nji guawambela mafelela a Biblia anyi mbaatagenesewa mu masugu adi muza. Ujimbilago egi isambu wana kalagala mukunda nu athu ako yana khala nu ndando yavula. (1 Phet. 3:12) Ikhale malamba a luholo lutshi udi mutagana nawo, uvi jiya egi mukut’etu agasue tudi nu gima gia guhana Yehowa nu athu ako.
17. Mukunda natshi tudi naye gubemba khadilo dia gudifuanesa nu athu ako?
17 Gula udi mutangiza egi ushigo luko nu luholo lua gukalagala ndaga jiavula mu mudimo wa Yehowa, khala musha mutshima egi Yehowa wana zula nu ndando ndaga wana kalagala. Ishigo ndaga yabonga gula udi mufuanesa ndaga wana kalagala nu jinyi athu ako adi mukalagala. Mukunda natshi ushigo naye gutshita ngenyi? Handaga Yehowa ganago gugufuanesa nu athu ako. (Gal. 6:4) Ha gufezegesa, Madiya wahanele Yesu mulondo wa mananashi a ndando yavula. (Yone 12:3-5) Uvi mukhetu wa gafunda wambile mbongo mbadi jia utadi wa ndando yazonda. (Luka 21:1-4) Uvi Yesu wamonele egi mukut’awo agasue akhalele nu gutshigina guakola. Yesu walanduile diago gifezegeselo gia Sh’enji. Hene wajiya gusha mutshima egi ndaga yagasue wana kalagala mukunda nu gutshigina nu guzumba guaye gudi Yehowa, yana gumusuanguluisa, ikhale ndaga yene idi yakoma nga yazonda.
18. Itshi yajiya gutukuatesa ha gubinga badute? (Tala nji galuanda, “Mbimbi ya Nzambi Yajiya Gugukuatesa ha Gubinga Badute.”)
18 Gifua luholo tuayimonyi, matangua ako tuajiya gukhala nu badute, uvi Mbimbi ya Nzambi idi yatagana ha gushila mutshima, yajiya gutukuatesa ha gubinga matangi ene. Hene tshita ngolo ha guheta mvutu gu mihu yaye, ngenyi mbawuheta gikhesa ha fundo dia guleba muila. Yehowa wana gugujiya muabonga diago. Wana jiya ndaga jiagasue wana kalagala nu udi gugulaya egi mbawugushimbiga. Sha mutshima egi Yehowa wana zumba nu wana gudisagesa mukunda nu mukombeledi wenji wagasue munu wana gumukombelela nu mutshima umoshi.
LUNGIMBO 111 Ndaga Jiana Tusuanguluisa
a UKOTELESHI WA MBIMBI: Mu longo edi, tudi muzuelela badute tuajiya gukhala nawo ana gututuma ha gutangiza egi Yehowa ganago gutuzula nu ndando nga mukunda nu badesizio tuazudile mu masugu abalega. Badute awa ashigo ene Biblia yana zuelela ha gumonesa egi muthu gashigo nu gutshigina gudi Yehowa nu mu mafelela ana gutulaya muene.
b Ikhale Biblia ishigo gutuwambela gula Davidi wakhalele nu ivo guvula gutshi tangua Yehowa wamutombele, yajiya gukhala egi wakhalele muvuala.—Tala Inzo Yaleha ya Mutaledi ya 1 Septembre 2011 diyiji 29 par. 2 ya français.
c UKOTELESHI WA IFUANESA: Phangi mumoshi wa muvuala, udi mukamba utuameji wa Yehowa mu njila ya Biblia.
d UKOTELESHI WA GIFUANESA: Phangi mumoshi wa yala, udi mutshita mudimo wa guwevua fenetre ha guheta mbongo jia gukuatesa fami yenji, uvi udi mutangigiza phaladiso.