LONGO DIA 39
LUNGIMBO 54 “Tala Njila”
Athu Adi nu “Mitshima Yatagana” Mbaatshigina Lukuma Luabonga
“Athu agasue anyi akhalele nu mitshima yatagana ha guheta monyo wa mayilago abuile alandudi.”—MAKAL. 13:48.
MU GUHIHIA
Gutoga athu ha gulonguga nawo Biblia nu guatamega ha guza mu mu gudibungisa gua mu hungu guakhala nu ndando.
1. Itshi athu ana tshita tangua ana tegelela lukuma luabonga? (Makal. 13:47, 48; 16:14, 15)
MU SIEKLE ya thomo tangua athu avula avuile lukuma luabonga, asuangulugile nu atshinyile nji gubua aklisto. (Tanga Makalegelo 13:47, 48; 16:14, 15.) Mangino nji, athu ako ana suanguluga tangua ana guvua lukuma luabonga mu mbala ya thomo. Nu ene athu ana tuna gututegelela mu mbala ya thomo ajiya gusombegesa matangi awo nu gutshigina gukombelela Yehowa. Itshi tuajiya gutshita gula tuaheta athu adi nu “mitshima yatagana” mu mudimo wa gulongesa?
2. Mu luholo lutshi mudimo wetu wa gulongesa udi gifua mudimo wa mahia?
2 Tuajiya gufuanesa mudimo wetu wa gulongesa nu mudimo wa mahia. Gula mabundu a mutshi umoshi akola gutuama dia mabundu ako, mukunyi wa mbuto wana katula mabundu ene, uvi wana landula gumbila mutshi wene meya ha gukuatesa mabundu asadi ha gukola muabonga. Luholo lumoshi nji, gula tuaheta muthu watshigina gututegelela, tuana gumukuatesa ha gubua mulandudi wa Klisto. Uvi mu tangua diene dimoshi, gula tuaheta athu ashigo hehi ha gulonguga giamatshidia, tuana tshita yagasue ha guakuatesa ha gujiya gubonga ajiya guheta gula alonguga Biblia. (Yone 4:35, 36) Gukamba gujiya gula athu adi hehi ha gututegelela nga ndo guajiya gutukuatesa ha gujiya luholo luabonga lua guakuatesa. Mu longo edi, tuza mumona ndaga tuajiya gutshita gula athu atshigina guta maga nu esue mu mbala ya thomo. Tuza nji mumona luholo tuajiya gukuatesa athu ene ha gulandula gukula mu nyuma.
LUHOLO TUAJIYA GUKUATESA ATHU ADI MUTSHIGINA GUJIYA GIAMATSHIDIA
3. Itshi tudi naye gutshita gula tuaheta athu adi musuanguluga nu lukuma luabonga? (1 Kolinto 9:26)
3 Tangua tuana heta athu adi musuanguluga nu lukuma luabonga, tuana tshigina guakuatesa ha gujiya Yehowa nu gukuata n’enji ufuta. Gishina giene, mu mbala ya thomo tudi muta nawo maga, tudi naye guatoga ha gusendesa gulonguga nawo Biblia nu guatamega ha guza mu gudibungisa gua mu hungu.—Tanga 1 Kolinto 9:26.
4. Hana gifezegeselo gidi mumonesa luholo muvuala mumoshi watshiginyile gulonguga Biblia mbala imoshi.
4 Toga muthu ha gusendesa gulonguga n’enji Biblia. Athu ako tuana guta nawo maga ana tshigina gulonguga Biblia mbala imoshi. Ha gufezegesa, lusugu lumoshi, muvuala mumoshi wa mukhetu wa gu Canada wasuenele hehi nu présentoir mobile nu wazudile gamukanda Heta Monyo wa Ivo nu Ivo! yakhalele mu lusugu lua nguana. Phangi wa mukhetu wakhalele mulongesa nu présentoir mobile yene wamuwambelele egi gula watshigina wajiya nji gulonguga Biblia ya ofele mu njila ya gamukanda gene. Muvuala muene watshiginyile nu wahanele phangi muene nimero yenji ya telefone. Mu ngueze ya lusugu luene, muvuala muene watumidile phangi muene wa mukhetu mesaje, wamuwambelele egi ajiya gusendesa gulonguga Biblia. Phangi wa mukhetu wamuhudile gula ajiya gulonguga mu lusugu lua samano, uvi muvuala muene wamuvutudile egi: “Wamona gutshi gula tuasendesa hamene? Mbangushigo mukhala nu mudimo.” Alongugile mu lusugu lua thano. Muvuala muene wayile mu gudibungisa mu lusugu lualanduile, walanduile nji gukula mu nyuma.
5. Itshi yajiya gutukuatesa ha gujiya luholo luabonga lua gutoga muthu ha gusendesa gulonguga n’enji Biblia? (Tala nji ifuanesa.)
5 Uvi tushigo naye gutangiza egi athu agasue tudi mutagana nawo mu mudimo wa gulongesa, mbaatshigina gulonguga Biblia mbala imoshi gifua muatshitshile muvuala owu wa mukhetu. Athu ako ajiya guzula tangua diavula gutuama dia gusendesa gulonguga Biblia. Tuajiya gusendesa thomo guta maga nu muthu mu mene jidi gumusuanguluisa. Gula tudi gumutadila mu luholo luabonga nu tuadisha ha fundo dienji, tuajiya gusendesa gulonguga n’enji Biblia gungima dia tangua diazonda. Itshi tuajiya guzuela tangua tudi mutshigina gutoga muthu ha gulonguga n’enji Biblia? Tutadilenu ndaga jiana zuela aphangi a mala nu a akhetu anyi ana jiya muabonga luholo lua gusendesa gulonguga Biblia nu athu.
Itshi tuajiya guwambela athu a luholo elu ha guatuma ha gutshigina gulonguga Biblia nu esue? (Tala paragrafe 5)a
6. Itshi tuajiya guwambela muthu gula tudi mutshigina gulandula guta n’enji maga?
6 Alongeshi nu avundji a njila ahudiwe muhu watadila luholo lua gusendesa gulonguga Biblia nu athu, azuelele egi mu ifutshi iko ishigo ndaga yabonga ha gukalegela mbimbi gifua “gulonguga,” “gulonguga Biblia,” nga “gugulongesa” tangua udi mutshigina gutoga muthu ha gulonguga n’enji Biblia. Azuelele egi yakhala ndaga yabonga ha gukalegela mbimbi gifua “guta maga,” “guzuelela,” nga “gukamba gujiya Biblia.” Gula udi mutshigina gulandula guta maga nu muthu muene, wajiya gumuwambela egi: “Yakhala ndaga ya gudihula diago ha gumona luholo Biblia yana hana mvutu gu mihu tuana gudihula mu monyo wetu” nga ndo “Biblia yana zuelelago phamba ndaga jiatadila Nzambi; uvi yana gutukuatesa nji mu maluholo ako avula.” Wajiya nji gumuwambela egi: “Tuanago guzula matangua avula; wajiya gulonguga ndaga imoshi ya ndando mu minuta 10 nga 15.” Wajiya gumuwambela ndaga jiene jiagasue uvi gukalegela ndo mbimbi gifua “gudimona luko” nga “phoso nu phoso,” handaga yajiya gumutuma ha gutangiza egi udi gumushinjiga ha gulandula gudimona n’enji.
7. Tangua ditshi athu ako ajiyile giamatshidia mu mbala ya thomo? (1 Kolinto 14:23-25)
7 Mutamege ha guza mu gudibungisa. Yajiya gukhala egi, mu masugu a mupostolo Phaula, athu ako ajiyile giamatshidia hayile ene mu gudibungisa mu mbala ya thomo. (Tanga 1 Kolinto 14:23-25.) Ndaga yene yana khala nji ngenyi mangino. Athu avula ana gukula mu nyuma muphushi tangua diana sendesa ene guza mu gudibungisa gua mu hungu. Tangua ditshi udi naye guatamega? Mu longo dia 10 dia mukanda Heta Monyo wa Ivo nu Ivo!, guana khala nu fundo diana toga muthu ha guza mu gudibungisa; uvi ushigo naye gunengena uu nu tangua mbamuheta mu longo diene ha gutamega muthu. Mu mbala ya thomo udi muta n’enji maga, wajiya gumutamega ha guza mu gudibungisa guana kalegewa mu phoso nga mu lusugu lua lubingo; wajiya gumuwambela muto wa lumene wa diskur diza mukalegewa nga gumuwambela ndaga imoshi idi mu longo dia Inzo Yaleha ya Mutaledi muza mulonguga.
8. Ndaga jitshi tuajiya guwambela muthu tangua tudi gumutamega ha guza mu gudibungisa? (Yeshaya 54:13)
8 Tangua udi mutamega muthu, muwambele luholo gudibungisa guetu guana khala gua gudisha nu gua ikombelelo iko. Ha gufezegesa, mukhetu mumoshi wayile mu gudibungisa gua mu hungu mu mbala ya thomo; mu tangua dia gulonguga Inzo Yaleha ya Mutaledi, wahudile phangi wa mukhetu wakhalele gumulongesa Biblia egi: “Mutuameji owu udi mujiya majina a athu agasue ba?” Phangi muene wamuvutudile egi mukut’etu agasue tuana kalagala ngolo ha gujiya majina a aphangi a mu hungu dietu gifua luholo tuana jiya majina a enya fami yetu. Gungima mukhetu muene wazuelele egi athu avula a mu gikombelelo giawo anago gujiya majina a athu ako. Tuajiya nji guwambela muthu ndaga jiko jiana tshita egi gudibungisa guetu gukhale gua gudisha nu ikombelelo iko. (Tanga Yeshaya 54:13.) Tuana guya mu gudibungisa ha gukombelela Yehowa, ha gujiya ndaga jiavula jiamutadila nu ha gudihana gikhesa. (Heb. 2:12; 10:24, 25) Gishina giene, gudibungisa guetu guana kalegewa mu luholo luabonga ha gutukuatesa ha gulonguga ndaga jiko nu guana khalago nu cérémonie jiko. (1 Kol. 14:40) Jinzo jietu jia Ufumu nji jiana londewa mu luholo luabonga ha gukuatesa athu ha gulandula gudibungisa muabonga. Tuanago guzuelela ndaga jia politike mu gudibungisa guetu handaga tuanago gudinginyisa mu ndaga jiene; tuanago nji guya guene ha guzuelela matangi etu mu ndaga imoshi ngenyi. Tuajiya nji gudiangela gutalesa muthu muene video Ndaga tshi jiana balega mu Inzo ya Ufumu? gutuama egi aze mu gudibungisa. Gutshita ngenyi mbagumukuatesa ha gujiya luholo ndaga jiana kalegewa mu gudibungisa.
9-10. Tangua tudi mutamega muthu ha guza mu gudibungisa, itshi tuajiya gumuwambela hagula gavuigo woma ha guza? (Tala nji gifuanesa.)
9 Athu ako ana tuna ha guza mu gudibungisa handaga ana guvua woma egi mbatuatoga ha gubua Matemue a Yehowa. Hene, wambela muthu udi mutamega egi tuana khala nu gusuanguluga ha guyamba athu ahe-ahe nu tuanago guashinjiga ha gubua Matemue nga ha guzuela mu gudibungisa. Tuana yamba nji athu ana guza mu fami, ikhale adi nu ana azonda. Mu gudibungisa guetu, tuanago gulongesa ana ha fundo diawo, mvuaji ha fundo diawo. Uvi nu mvuaji nu ana ana landula gudibungisa hamoshi. Ndaga yene yana kuatesa mvuaji ha gujiya fundo didi an’awo nu ndaga adi gualongesa. (Mikh. 31:12) Tuanago gukungula makuta. Uvi tuana landula longo diatuhanele Yesu egi: “Muahetele ya khenda, hanenu nji ya khenda.” (Mat. 10:8) Wajiya nji guwambela muthu udi mutamega egi ishigo nu ndando ha gusudiga milele ya ndando yakola ha guza mu gudibungisa. Nzambi wana tala mu mitshima uvi gu phala ndo.—1 Sam. 16:7.
10 Gula muthu muene waza mu gudibungisa, muyambe muabonga. Mukuatese ha gudijiya nu akulu ako nu aphangi ako a mu hungu. Gula wadivua egi amuyamba muabonga, mbawukhala nu gusuanguluga ha guza luko mu gudibungisa. Tangua mudi mu gudibungisa, gula muthu muene gashigo nu Biblia, landulenu n’enji mu Biblia yaye, mukuatese nji ha gukotelesa diskur didi mukalegewa nga luholo gulonguga gua Biblia gudi mukalegewa.
Gula muthu wasendesa guya mu gudibungisa, mbayimukuatesa ha gukolesa ufuta wenji nu Yehowa (Tala paragrafe 9-10)
LUHOLO TUAJIYA GUKUATESA MUTHU GULA TUASENDESA GULONGUGA N’ENJI BIBLIA
11. Luholo lutshi wajiya gumonesa egi udi munemesa tangua nu programe ya muthu udi mulongesa Biblia?
11 Itshi tushigo naye gujimbila tangua tudi mulonguga Biblia nu muthu gumbo dienji? Nemesa tangua dienji nu programe yenji. Ha gufezegesa, gula muadivua ha gudimona n’enji, nemesa tangua muadivui ikhale athu a mu fundo wana khala ana khalago nu khadilo dia gunemesa tangua. Mbayikhala nji ndaga yabonga gula muazudilego tangua diavula mu gulonguga guenu gua thomo. Aphangi ako alongugile gale Biblia nu athu avula ana zuela egi idi ndaga yabonga ha gumanesela gulonguga guenu mu tangua diabonga ikhale muthu muene udi mutshigina gujiya ndaga jiavula. Ukhadigo nji muzuela muavula. Bemba muthu udi mulongesa azuelele matangi enji.—Ish. 10:19.
12. Tangua udi musendesa gulongesa muthu Biblia, felela ditshi udi naye gukhala nadio?
12 Tangua udi musendesa gulongesa muthu Biblia, felela diaye didi naye gukhala dia gumukuatesa ha gujiya Yehowa nu Yesu nu ha guazumba muavula. Wajiya gutshita ngenyi gula udi gumuwambela ndaga jiana zuela Biblia ha fundo dia gumuwambela matangi aye nga ndaga wana jiya mu Biblia. (Makal. 10:25, 26) Mupostolo Phaula watubembele gifezegeselo giabonga; hakhalele muene mulongesa athu, wakhalele muzuelela muavula ndaga jiatadila Yesu munu Yehowa watumile ha gutukuatesa ha gumujiya nu gumuzumba. (1 Kol. 2:1, 2) Phaula wamonesele nji egi idi nu ndando ha gukuatesa alandudi ahe-ahe ha gukudisa makalegelo abonga ajiya gufuanesewa nu wolo, utadi wa siliva nu maseso a ndando. (1 Kol. 3:11-15) Makalegelo ene adi gutshigina, ndunge, gutema nu guvuila Yehowa woma. (Ngi. 19:9, 10; Ish. 3:13-15; 1 Phet. 1:7) Wajiya gulandula bametode a gulongesa a Phaula gula udi mukuatesa athu wana longesa Biblia ha gukolesa gutshigina guawo nu ufuta wawo nu Tata wawo wa mu dilu.—2 Kol. 1:24.
13. Luholo lutshi wajiya gumonesa khadilo dia guhuiminyina nu matangi abonga tangua udi mukuatesa muthu wana longesa Biblia? (2 Kolinto 10:4, 5) (Tala nji gifuanesa.)
13 Wajiya gulandula luholo lua gulongesa lua Yesu gula udi nu khadilo dia guhuiminyina nu udi nu matangi abonga. Ukhadigo muhula muthu udi mulongesa mihu yajiya gumutuma ha guvua musonyi. Gula gudi nu ndaga iko ashigo mukotelesa muabonga, ishigo nu ndando ha gulandula gulonguga ndaga yene. Uvi muajiya guyibemba, mulonguga ndaga iko, ngenyi mbamuyivutugila gungima. Ha fundo dia gumushinjiga ha gutshigina ndaga imoshi ngenyi udi gumulongesa, mubembele tangua dia gutangigiza nu dia gusombegesa matangi enji. (Yone 16:12; Kol. 2:6, 7) Biblia yana fuanesa malongo a mambo tuana tshigina gukuatesa athu ha gubemba nu phango jiakola jia seso. (Tanga 2 Kolinto 10:4, 5) Yajiya gukhala lamba gudi muthu udi mulongesa Biblia ha gubemba ndaga jiana tshigina muene. Hene, udi naye gumukuatesa ha gutunga luphango lua maseso luhe-luhe, yakotelesa egi udi naye gumukuatesa ha gushila Yehowa mutshima. Ngenyi, mbayikhala yaleba gudi muene ha gubemba ndaga jiana tshigina muene mangololo.—Ngi. 91:9.
Bembela muthu wana longesa Biblia tangua dia gutangigiza ndaga jidi mulonguga muene nu dia gusombegesa matangi enji (Tala paragrafe 13)
LUHOLO TUAJIYA GUKUATESA ATHU ANA GUZA MU GUDIBUNGISA GUETU
14. Luholo lutshi tudi naye gukalegela athu ana guza mu gudibungisa guetu ndaga?
14 Yehowa wana tshigina egi tukalegela athu agasue ndaga nu guzumba nu gisemo giagasue ikhale akatuga gui, adi enya giphuta nga zuelelo ditshi, adi enya umonyi nga phutu. (Yak. 2:1-4, 9) Luholo lutshi tuajiya gumonesa athu ana guza mu gudibungisa egi tuana guazumba?
15-16. Luholo lutshi tuajiya gukuatesa athu ana guza mu gudibungisa guetu ha gudivua muabonga?
15 Athu ako ajiya guza mu gudibungisa guetu handaga adi mutshigina gumona luholo ndaga jiana kalegewa nga ndo handaga muthu mumoshi wa mu dimbo diko waatogi ha guya. Hene, gula wamona athu a luholo elu mu gudibungisa, ta nawo maga. Ayambe nu gusuanguluga guagasue uvi wakalegelago ndaga jiajiya guatuma ha guvua musonyi. Atoge ha gukhala nawo ha fundo dimoshi. Kalegela nawo Biblia yaye nu mikanda yaye iko, nga ndo wajiya guahana mikanda yawo. Kamba nji maluholo ako wajiya guakuatesa ha gudivua muabonga. Yala mumoshi wayile mu gudibungisa wawambelele phangi wa yala wamuyambele egi udi muvua musonyi handaga gasudigilego milele yabonga gifua athu ako. Phangi muene wamukuatesele ha gudivua muabonga; wamuwambelele egi ikhale Matemue a Yehowa ana sudiga muabonga ha guya mu gudibungisa, uvi ana khalago a gudisha nu athu ako. Gungima, yala muene wakudile mu nyuma nu wabatijiwe, uvi uu nu mangino wana landula guwunguluga ndaga yamuwambelele phangi muene. Ndaga ushigo naye gujimbila yenyeyi: Tangua udi muta maga nu athu gutuama nga gungima dia gudibungisa, amonese egi udi musuanguluga nawo uvi udinginyisago mu ndaga jiawo nga guahula mihu yajiya guahana musonyi.—1 Phet. 4:15.
16 Ndaga iko tuajiya gukalagala ha gukuatesa athu adi muza mu gudibungisa guetu ha gudivua muabonga idi gukhala nu ginemua mu maga tudi muta nawo, mu mvutu tudi muhana mu gudibungisa nga mu bakomantere tudi muhana mu itshinyi iko ya mu gudibungisa guetu yana zuelela athu ashigo Matemue a Yehowa nga ndaga jiana tshigina ene. Tukhadigo nji mukalegela mbimbi jiajiya guasagesa nga guatuma ha gutuna guza luko. (Tito 2:8; 3:2) Ha gufezegesa, tushigo naye gusegulula ndaga jia gikombelelo giawo. (2 Kol. 6:3) Aphangi ana tshita badiskur ene adi naye gumonesa gutema guavula mu ndaga adi muzuela. Adi naye gujiya egi mukatshi dia athu adi guategelela gudi nji nu athu ashigo Matemue a Yehowa, gishina giene adi naye guhana ukoteleshi wa mbimbi jiko nga ndaga jiko jinyi athu ako ashigo mujiya.
17. Felela dietu diana khala itshi gula tuaheta athu adi nu “mitshima yatagana” mu mudimo wa gulongesa?
17 Luholo masugu adi muya nu gubalega, mudimo wetu wa gulongesa udi naye gukalegewa muphushi; tudi naye nji gulandula gukamba athu adi nu “mitshima yatagana ha guheta monyo wa mayilago.” (Makal. 13:48) Gula tuaaheta, tudi naye guatoga ha gulonguga nawo Biblia nu guatamega ha guza mu gudibungisa guetu. Gula tuatshita ngenyi, mbatuakuatesa ha gusendesa guwenda mu njila “idi mubata gu monyo.”—Mat. 7:14.
LUNGIMBO 64 Joyeux dans la moisson
a UKOTELESHI WA GIFUANESA: Aphangi a mala mbadi aya gumbo dia yala mumoshi wakhalele suta, yala muene udi wagukhala gutuama dia inzo yenji; aphangi mbadi a akhetu adi muta maga azonda nu mama mumoshi udi nu midimo yavula ya gutshita.