Taem Hope And Love Kam Back
OLKETA dadi and mami, teacher, and pipol wea deal withim young wan, luksavvy hao olketa seleva or young pipol or eni man no savvy changim world. Samfala paoa nao work wea olsem tidal wave, and no eniwan savvy stopem. Nomata olsem, staka samting nao iumi savvy duim for mekem young pipol kamap moa hapi, moa healthy, and stap stret.
From way for stopem firstaem hem winim way for fixim bihaen, dadi and mami should ting careful abaot hao living and olketa important samting long laef savvy affectim tingting and fasin bilong pikinini bilong tufala. For garem feeling bilong love and care insaed long famili savvy givim best help for protectim pikinini from way for spoelem seleva. Wanfala barava important need bilong olketa young wan hem for garem man wea bae listen long olketa. Sapos dadi and mami bae no listen, maet man wea no fitim nao bae duim.
Wanem nao datwan meanim for dadi and mami tuday? Mas garem taem for pikinini bilong iu taem olketa needim—taem olketa young. Long staka famili diswan hem no easy. Olketa mas barava faet hard for laef, wea meanim dadi and mami evriwan mas work. Olketa wea willing and fit for sakrifaes lelebet for garem moa taem withim pikinini staka taem lukim boy and girl bilong olketa garem gud living. But, olsem iumi storyim finis, samtaem nomata dadi and mami trae hard long diswan, olketa big problem savvy kasem pikinini.
Olketa Fren and Full-Grown Man Savvy Help
War, rape, and way for spoelem olketa young wan meanim olketa wea really care for young pipol mas barava work hard for helpem olketa. Olketa young wan wea bin kasem olketa problem olsem maet no savvy acceptim gud help wea olketa kasem. Hem maet needim bigfala taem and strong. Bae hem no stret and no showimaot love for luk small long olketa or rejectim olketa. Waswe, iumi savvy garem moa taem and feeling and showimaot kaen fasin and love long olketa wea stap long danger?
No dadi and mami nomoa, but olketa fren and brata and sista tu need for barava luksavvy long saen wea feeling hem change. (Lukim box “Needim Gudfala Help,” page 8.) Sapos olketa saen stap, mas kwiktaem listen long hem. Sapos fitim, trae for meanim gud olketa, taem iu askim olketa kwestin long kaen way for showim olketa iu barava tru fren bilong olketa. Olketa fren and relative wea olketa trustim maet savvy helpem dadi and mami long olketa hard taem olsem; but, hem tru, olketa mas careful for no tekovarem work bilong dadi and mami. Staka taem olketa young wan wea tingting for suisaed barava needim love—love bilong dadi and mami.
Wanfala barava best present eniwan savvy givim long olketa young wan hem strong hope for hapi future, reason for go ahed for laef. Staka young wan luksavvy long tru samting wea Bible promisim abaotem gudfala world system wea bae klosap kam.
Sev From Klosap Suisaed
From Japan, wanfala young wan wea tu-three taem tingting for suisaed say olsem: “Staka taem nao mi ting strong tumas for tekem datfala road. Taem mi small yet, samwan wea mi trustim hem spoelem mi long saed long sex. . . . Long bifor, mi raetem staka leta wea say ‘mi want for dae.’ Distaem mi wanfala Witness Bilong Jehovah, and distaem mi stap olsem wanfala man for talem gud nius full-taem, but disfala tingting still kam back samfala taem. . . . But Jehovah letem mi laef, and luk olsem hem go ahed for say long mi, ‘Stap laef.’”
Wanfala 15-year girl from Russia story olsem: “Taem mi eit year, mi start for feel olsem no eniwan needim mi. Dadi and mami bilong mi no garem taem for story withim mi, and mi trae for stretem problem bilong miseleva nomoa. Mi olsem stap seleva nomoa. Mi raoa olowe withim olketa relative bilong mi. Then tingting for suisaed kasem mind bilong mi. Mi barava hapi taem mi meetim Olketa Witness Bilong Jehovah!”
And from Australia iumi kasem olketa gudfala toktok hia from Cathy, wea just ovarem 30 year, wea showimaot hao way for lus-hope savvy change for really hope: “Mi tingting abaot enikaen way for endim laef bilong mi and go-go mi trae for suisaed. Mi laek for goaot from disfala world, wea fulap withim pain, kros and empty feeling. Weak daon long feeling mekem mi hard for kamaot from samting wea luk olsem hem ‘kasholem’ mi. So, suisaed nomoa luk olsem ansa long datfala taem.
“Taem mi first herem hao earth bae kamap olsem paradaes, withim peace, and hapi laef for evriwan, mi barava wantem. But hem olsem wanfala dream wea hard for tru. But, go-go mi start for meanim hao Jehovah luk long laef and hao iumi evriwan important long eye bilong hem. Mi start for sure wanfala hope hem stap for future. Go-go, mi faendem nao way for aot from disfala samting wea olsem ‘kasholem’ mi. And, for kamaot from datwan hem nating easy. Samtaem weak feeling bae winim mi, and mi barava feel konfius. But, way for ting strong raonem Jehovah God mekem mi barava klos long hem and feel sef. Mi thankiu long Jehovah for evri samting hem duim for mi.”
Nomoa Dae Bilong Young Pipol
From study long Bible, wanfala young wan savvy luksavvy hao barava gud samting stap front long iumi—samting wea Kristian aposol Paul kolem “really laef.” Hem kaonselem young man Timothy: “Givim order long olketa wea rich for . . . putim hope bilong olketa, no long richfala samting wea bae finis, but long God, wea givim iumi evri samting for mekem iumi hapi; for duim gudfala samting, for rich long olketa gudfala work, . . . for hipimap for olketa seleva wanfala gudfala faondeson for future, mekem olketa savvy hold strong long disfala really laef.”—1 Timothy 6:17-19.
Kaonsel bilong Paul hia, hem really meanim, iumi should garem taem for nara pipol, helpem olketa for garem strong hope for future. “Really laef” hem samting wea Jehovah promisim insaed niu world bilong “niufala heven and niufala earth.”—2 Peter 3:13.
Staka young wan wea insaed long danger bifor, luksavvy distaem hao nogud drug and olabaot living hem wanfala long road wea lead go long dae nomoa, wea suisaed hem olsem shortkat. Olketa luksavvy hao disfala world, withim olketa war, hate, raf fasin, and wea no garem love, bae klosap finis. Olketa luksavvy no eni man savvy stretem disfala world. Olketa believe strong long heart bilong olketa hao only really hope bilong man hem Kingdom bilong God, bikos hem bae mekem niu world wea no young wan nomoa, but evriwan wea obey long God bae nating need for dae—nomoa, no want for dae tu.—Revelation 21:1-4.
[Box long page 8]
Needim Gudfala Help
The American Medical Association Encyclopedia of Medicine talem hao “winim 90 percent bilong suisaed kamap from mentol problem.” Hem talem hao insaed diswan hem barava sorry feeling (olsem 15 percent), mentol problem (olsem 10 percent), depend long alcohol (olsem 7 percent), no savvy mix withim nara pipol (olsem 5 percent), and samfala narakaen sik long mind and feeling (no kasem 5 percent). Hem say olsem: “Mas tinghevi long evri man wea trae for suisaed. Twenti go kasem 30 percent long olketa wea trae for suisaed traem staka taem insaed wan year.” Dr. Jan Fawcett raet olsem: “Winim 50 percent bilong suisaed [long United States] happen long olketa wea nating kasem eni medical help.” And wanfala nara raeting moa say olsem: “Barava important part long treatment hem for kwiktaem kasem help from wanfala doctor bilong mind for stretem problem.”