Really Ansa​—Fit for Kasem?

CRIMINAL fasin hem luk olsem hem normal samting long living distaem. Nomata pipol volunteer for helpem community and olketa police waka hard, world kamap moa danger for stap insaed. Eni wei for stretem stap?

Bible talem hao bigfala change bae kamap. Diswan bae no kamap thru long hard waka bilong olketa gavman bilong man. Nomata olketa ruler laek duim gud samting, olketa no fit for duim evriting. Olketa no garem paoa and samting olketa needim for aotem main samting wea kosim criminal fasin or for mekem sef living wea for olowe.

Change wea Bible storyim bae kamap thru long samting wea Creator bilong iumi duim. Olsem Wan wea Wakem universe, hem garem paoa and right for duim wanem man no fit for duim. Bible storyim hem olsem “Datwan wea mekem olketa bigman kamap samting nating, wea mekem olketa judge bilong earth olsem samting wea nating stap nomoa . . . , and hem iusim bigfala paoa tu.” (Isaiah 40:23-26) Olketa wanem change nao God promis for mekem, and hao nao olketa samting hia givim iumi trufala hope for wanfala world wea moabeta?

Psalm 37:10 talem iumi promis bilong God: “Lelebet taem nomoa, and wicked wan bae finis; and iu bae luk aotem ples bilong hem, bat [wicked wan] bae no stap.” Purpose bilong God hem for aotem wicked pipol wea no savve kamap gud and wea no laek for change. Bat, hem bae no distroem evri pipol. For pipol wea willing for garem kwaet fasin, hambol, and apim peace, man wea raetem psalm hem promis: “Hope long Jehovah and keepim wei bilong hem, and hem bae blessim iu for kasem earth. Taem wicked pipol finis evribit, iu bae lukim.” Taem God aotem wicked pipol, olketa wea stap bae enjoyim “bigfala peace”—wanfala world wea free from evrikaen criminal fasin.—Psalm 37:11, 34.

Mind and Heart Need for Change

For distroem wicked pipol and sevem gud pipol hem no inaf for stretem evribit problem bilong criminal fasin. Criminal fasin hem planti taem kamap from rong wei for trainim heart and mind. Bat, hem wanfala wei wea gavman bilong God hem winim eni nara gavman. Gavman bilong God bae givim gudfala instruction and education wea trainim pipol mekem olketa lovem raeteous fasin. Isaiah 54:13 hem sei: “Evri son bilong iu bae kamap pipol wea Jehovah teachim, and peace bilong olketa son bilong iu bae kamap big.”

Bigfala wei for satisfae bae kamap! Long tokpiksa wei Bible storyim change wea kamap long pipol wea bifor maet garem fasin olsem animal. Hem sei: “Wolf bae stap witim pikinini sheep, and leopard seleva bae leidaon witim pikinini goat, and pikinini buluka and young lion and olketa animal wea kaikai gud bae stap tugeta.” Why? “From earth bae fulap witim savve bilong Jehovah olsem wata hem kavarem sea.” (Isaiah 11:6, 9) Nomata olsem, iu and famili bilong iu no need for weit for lukim olketa change olsem long future. Hao nao olsem?

Iu Savve Kasem Gud Samting Distaem

Distaem, samfala pipol stap wea go ahed for change for redy for datfala world wea free from criminal fasin. Olketa go ahed for changem fasin, for garem fasin wea God laekem pipol wea bae stap insaed niufala world bilong hem for mas garem. (2 Peter 3:13) Olketa duim diswan long wei for followim olketa Bible principle long laef bilong olketa. Lukim naesfala wei Bible storyim diswan: “Iufala mas kamap niu long paoa wea muvim mind bilong iufala, and werem niufala fasin wea God wakem fitim will bilong Hem long trufala raeteous fasin and loyal fasin.”—Ephesians 4:23, 24.

Colossians 3:12-14 hem storyim moa olketa gudfala fasin wea staka pipol wea garem honest heart go ahed for mekem grow distaem. Hem sei: “Olsem olketa wea God chusim, wea holy and wea hem lovem, iufala mas werem fasin for kea, kaenfala fasin, hambol tingting, kwaet fasin, and long-safaring. Go ahed for patient witim each other and willing for forgivim each other sapos eniwan garem reason for komplen againstim narawan. Olsem Jehovah hem willing for forgivim iufala, iufala mas duim olsem tu. Bat, witim evri samting hia, iufala mas werem love, from hem nao perfect wei for keepim wan mind.”

Waswe, iu laek for kasem help for garem niufala Christian fasin? Staka million pipol raonem world go ahed for duim diswan witim help bilong Olketa Jehovah’s Witness. Long olketa meeting wea evritaem kamap long olketa Kingdom Hall, and long olketa big convention, nomata pipol wea bifor bin raf criminal olketa lane finis for garem peaceful fasin.a Sapos iu laek for kasem gud samting from kaen nambawan Bible education program olsem, feel free for raet go long olketa wea pablisim disfala magasin. Olketa bae hapi for helpem iu for joinim pipol wea distaem redyim olketa seleva for stap insaed world bilong God wea free from criminal fasin.

[Footnotes]

[Piksa long page 10]

Planti million distaem go ahed for kasem education for laef insaed world wea free from criminal fasin