Lukluk Long World
Lus Bat Planti Taem Faendem
The New York Times reportim hao long year 2002 pipol faendem and givim long Tokyo, Japan, Metropolitan Police Lost and Found Center selen wea kasem $23 million. Long selen hia, olketa givim bak 72 percent long olketa wea ownim. Long bigfala haos for keepim olketa samting hia, hem garem nara staka handred thousand samting olsem olketa mobile phone, olketa key, olketa eyeglass, olketa toy, olketa samting saed long sports, and—main wan nao—olketa ambrela, 330,000 olketa tekem kam long datfala haos long 2002. The Times sei: “Olketa pikinini lanem from taem olketa smol yet hao sapos olketa faendem samting olketa mas tekem go long police.” Samting olsem tu handred go kasem thri handred pipol kam long there evriday for tekem samting olketa lusim. Samfala samting olsem olketa stik bilong man wea leg bilong hem nogud and olketa wheelchair mekem olketa sapraes lelebet. Hitoshi Shitara man wea waka longtaem long there sei: “Mi just tingim nomoa wanem nao happen long olketa wea ownim olketa samting hia.”
Olketa Catholic Priest and Savve Bilong Olketa Saed Long Bible
“Hao big nao savve bilong olketa priest saed long Bible?” Hem nao kwestin wea Andrea Fontana wanfala priest and director for Turin Diocesan Office for Catechism hem askem. Taem hem raet long Italian Catholic niuspepa Avvenire, Fontana sei hem tingim datfala kwestin from “wanfala member long church laek for savve sapos diocese garem olketa course for studyim Bible.” Long church bilong datfala member, “olketa nating storyim olketa Holy Scripture.” Fontana raet olsem for ansarem datfala member: “Hem tru tumas, bihaen olketa priest kasem training, sorre samting nao, tu-thri nomoa go ahed for studyim Bible. . . . Only chance for olketa wea gogo olowe long church for herem olketa Bible verse hem long olketa sermon long Sunday.” Datfala member talem hao “hem study witim Olketa Jehovah’s Witness for lanem moa samting.”
Wanfala “Mamaeti” Animal Long Sea
The Daily Telegraph bilong Australia reportim diswan: “Olketa fisherman pullim wanfala squid klosap long saedsea long Antarctica wea barava spesol and wea savve killim man dae. Eye bilong hem big olsem pleit and hem garem olketa sharp huk wea hem iusim for kasholem kaikai bilong hem.” Steve O’Shea wanfala marine biologist long New Zealand sei: “Mi lukim finis samfala squid wea big narawe, bat diswan barava ova tumas.” Disfala squid wea olketa kolem mamaeti squid (Mesonychoteuthis hamiltoni), hem 150 kilogram bat hem no kasem full size bilong hem yet. “Disfala animal hem barava raf tumas,” hem nao samting wea American marine biologist Kat Bolstad hem talem. “Sapos iu foldaon klosap long hem insaed sea bae hem killim iu dae.” Olsem Reuters nius hem talem, “datfala mamaeti squid, body bilong hem savve shaen insaed olketa deep wata mekem hem savve lukim kaikai bilong hem witim olketa barava big eye bilong hem—wea big winim eni animal. . . . Eitfala hand and tufala finger bilong hem wea garem 25 teeth wea olsem olketa huk—hem stap deep insaed masol and wea fit for tan raon 360 degree—and hem garem olketa nara samting tu wea olketa kolem sucker wea hem iusim for hol taet long fish mekem hem no ranawe.”