Young Pipol wea No Fraet for Storyim Biliv Bilong Olketa
STAKA young pipol stap midolwan long Olketa Jehovah’s Witness. Olketa lovem God and traem best for garem living wea followim olketa standard bilong hem insaed Bible. Olketa young wan hia no shame for storyim biliv bilong olketa long olketa nara pikinini long skul. Lukim samfala example hia.
◼ Taem Holly long class six, olketa kasem assignment for raetem wanfala essay long disfala kwestin “Hao nao bae iu stretem problem bilong terrorism bat no thru long wei for faet?” Holly iusim disfala chance for raet abaotem hope wea hem garem for future wea kam from Bible. Hem sei from taem bifor kam “man hem bossim man and spoelem hem.” (Ecclesiastes 8:9) Then hem point go long only trufala hope for olketa man—Kingdom bilong God. Hem raet olsem: “From Jesus nao hem King bilong datfala Kingdom, evri problem, wea wanfala nao hem terrorism, bae finis.” Holly storyim go moa wei wea Jesus bae duim samting wea no eni man wea rul long earth savve duim. Hem sei: “Taem Jesus stap long earth, hem showimaot wanem kaen fasin hem bae garem taem hem rul. Hem showimaot love, and hem kea for pipol. Hem iusim paoa wea hem garem for healim olketa wea sik and mekem olketa wea dae for laef bak. No eni gavman bilong man savve mekem olketa wea dae for laef bak. Bat Kingdom bilong God bae duim datwan.” Holly finisim essay bilong hem witim disfala toktok, “God nomoa savve stretem disfala problem, no olketa man.”
Long botom bilong datfala essay, teacher hem raet olsem: “Turu nao Holly! Story bilong iu narawe. Iu duim gud tumas.” Teacher hem tinghae tu long olketa Bible scripture wea Holly iusim. Datwan mekem chance kamap for Holly story long teacher abaotem Theocratic Ministry Skul, wanfala program wea Olketa Jehovah’s Witness duim evri week for lanem wei for toktok and teach. Teacher bilong hem hapi for tekem wanfala copy bilong textbuk wea olketa iusim long datfala Ministry Skul.
◼ Jessica tu storyim biliv bilong hem taem hem raetem olketa skul essay. Hem sei: “Mi raetem thrifala essay saed long wanem mi bilivim. Wanfala hem abaotem Olketa Jehovah’s Witness and right wea olketa garem saed long religion. Teacher hia putim datwan long library mekem olketa wea laek savve readim. No longtaem go nomoa mi raetem wanfala essay abaotem taem wea mi baptaes and hao datwan hem barava important day long laef bilong mi. Olketa student savve pasim raon olketa copy long each other, so olketa classmate bilong mi readim story bilong mi. Wanfala girl sei: ‘Barava naes story. Mi hapi for savve long olketa responsibility saed long wei for olsem wanfala Jehovah’s Witness. Gud tumas for herem baptism bilong iu!’ Nara girl sei: ‘Story bilong iu set wan stret! Mi hapi from faith bilong iu strong fogud!’ Wanfala boy raet olsem: ‘Iu barava garem gudfala tingting. Gud tumas.’”
◼ Taem Melissa hem 11 year, hem garem spesol chance for storyim biliv bilong hem. “Nurse long skul bilong mifala kam for story abaotem immune system long science class bilong mi. Gogo story hia kasem blood transfusion. Bihaen long datfala class mi storyim wanfala video bilong iumi abaotem blood long science teacher bilong mi. Long next day mi tekem kam long skul and teacher bilong mi tekem go long haos bilong hem and lukim witim famili bilong hem. Long day bihaen hem tekem kam datfala video long skul and showim long tufala class, wanfala nao bilong mifala. Then hem talem gudfala toktok abaotem Olketa Jehovah’s Witness taem hem sei long class hao sapos iumi no stap, bae hard for man isi for kasem olketa difren kaen treatment wea no iusim blood transfusion. Taem hem givim bak datfala video, hem ask, ‘Waswe, mi savve tekem wanfala copy for putim long skul library?’ Mi givim hem wanfala copy. Hem hapi tumas and mi tu!”
Holly, Jessica, and Melissa olketa insaed sekson bilong staka young Witness bilong Jehovah wea followim advaes bilong Bible for rememberim Creator bilong olketa. (Ecclesiastes 12:1) Waswe, iu tu duim datwan? Sapos olsem, for sure iu mekem heart bilong Jehovah hapi.—Proverbs 27:11; Hebrews 6:10.
Taem iufala young pipol storyim biliv bilong iufala long olketa skulmate and teacher, diswan givim strongfala witness abaotem Jehovah God and olketa purpose bilong hem. Hem strongim tu faith bilong iu, and mekem iu garem feeling for luksavve hao hem barava bigfala privilege for stap midolwan olketa servant bilong Jehovah. (Jeremiah 9:24) For witness long skul hem protectim iu tu. Jessica sei olsem abaotem datwan: “Wanfala gud samting wea kamaot from wei for story abaotem wanem mi bilivim hem wei wea olketa student no trae for putim hevi long mi for duim samting wea no fitim wanem Bible talem.”
[Piksa long page 20]
Holly
[Piksa long page 20, 21]
Jessica
[Piksa long page 21]
Melissa