Tingting Bilong Bible

Wanem Nao Waka Bilong Hed Bilong Famili?

BIBLE sei, “hed bilong woman hem man.” (1 Corinthians 11:3; Ephesians 5:23) Bat planti wea sei olketa respectim Bible talem hao disfala principle wea sei hasband nao hem hed, hem no fitim taem bilong iumi and hem danger samting. Wanfala hasband and waef sei: “Disfala teaching saed long wei wea olketa woman mas ‘willing for stap anda’ [long hasband bilong olketa], savve lead go long wei for spoelem woman saed long body and feeling, sapos hasband followim long wei wea ova tumas.” Sorre tumas, wei wea hed bilong famili no duim waka bilong hem long stretfala wei kamap long staka ples. Wanfala woman for raet sei: “Wei for killim waef hem normal samting long planti kantri, olketa singsing, samfala toktok and toktok wea kamap long taem bilong wedding olketa mekhae long right bilong hasband.”

Samfala talem hao disfala principle for hed long famili nao lead go for olketa raf fasin hia. Waswe, teaching bilong Bible abaotem hed bilong famili hem daonem olketa woman and mekem raf fasin kamap insaed famili? Wanem nao really waka bilong hed bilong famili?a

Wei for Hed No Minim Man Mas Raf

Hed bilong famili wea Bible storyim hem showimaot love, wea barava difren long raf fasin. Wei wea man no laek followim law bilong God hem lead go long wei wea olketa man savve planti taem showimaot raf fasin and bossim olketa woman. (Genesis 3:16) Start from taem Adam and Eve lusim garden bilong Eden, olketa man staka taem iusim paoa bilong olketa long rong wei taem olketa spoelem narawan, wea insaed diswan hem olketa woman and pikinini.

Bat, datwan nating insaed long purpose bilong God. Jehovah heitim olketa wea iusim paoa bilong olketa long rong wei. Hem tok strong againstim olketa Israelite man wea “brekem trust” bilong waef bilong olketa. (Malachi 2:13-16) And tu, God sei hem “barava heitim eniwan wea lovem raf fasin.” (Psalm 11:5) So olketa wea killim and deal witim waef bilong olketa long nogud wei, no fit for sei Bible agree witim raf fasin bilong olketa.

Hao Nao Man Savve Hed Long Stretfala Wei

Wei for hed hem wanfala important arrangement wea God iusim for mekem evriting go ahed gud long full universe. Evriwan garem samwan wea olketa mas stap anda long hem, God seleva nomoa no garem hed. Olketa man mas stap anda Christ, olketa pikinini mas stap anda parents, and evri Christian mas stap anda olketa gavman. Jesus tu mas stap anda God.—Romans 13:1; 1 Corinthians 11:3; 15:28; Ephesians 6:1.

Wei for stap anda wanfala leader mekem community followim gudfala wei and stap gud. Olsem tu, wei for stap anda hed bilong famili hem important for mekem famili strong, hapi and garem peace. Sapos famili no garem hasband or dadi diswan no minim no eni hed hem stap. Long olketa famili olsem, mami nao kamap hed bilong famili. Taem famili no garem parents, firstborn pikinini or nara relative nao savve duim waka olsem hed bilong famili. Evriwan insaed famili savve kasem gud samting taem olketa showimaot stretfala respect long datwan wea lead.

So, important samting nao hem for no rejectim principle for garem hed, bat, lane for followim and minim long stretfala wei. Aposol Paul encouragem olketa Christian hasband for hed long famili bilong olketa “olsem Christ tu hem hed bilong kongregeson.” (Ephesians 5:21-23) Paul mekhae long wei wea Christ hem deal witim kongregeson olsem perfect example. Wanem example nao Christ showimaot?

Olsem Messiah and man wea bae king long future, Jesus garem paoa from God and hem garem savve and minim laef winim olketa disaepol bilong hem, nomata olsem hem showimaot love, feeling, and fasin for kea. No enitaem hem raf, no willing for change, or ova tumas. Hem iusim paoa bilong hem long balance wei and nating show-off and sei hem nao Son bilong God. Jesus hem hambol. From diswan, ‘yoke bilong hem kaenfala and lod bilong hem no hevi.’ (Matthew 11:28-30) So hem isi for pipol savve story long hem and hem willing for herem narawan. For tok stret, Paul sei Jesus lovem tumas kongregeson gogo hem “givim laef bilong hem for kongregeson.”—Ephesians 5:25.

Hao Nao Man Savve Followim Jesus Olsem Hed?

Hao nao hed bilong famili savve followim olketa fasin bilong Christ? Wanfala hed wea duim gud waka bilong hem bae tingim wanem famili bilong hem needim saed long body and spiritual samting. Hem willing for iusim taem bilong hem for lukluk long need bilong full famili and olketa member wanwan. Samting wea marit partner and pikinini bilong hem needim hem important winim wanem hemseleva needim.b (1 Corinthians 10:24; Philippians 2:4) Taem hasband followim olketa Bible principle and teaching insaed laef bilong hem evriday, bae waef and pikinini respectim and sapotim hem. Bae famili win for feisim eni problem sapos hasband showimaot love olsem hed bilong famili. Sapos wei wea hasband hem hed bilong famili hem fitim Bible, diswan bae mekem famili hapi and bae givim glory and praise long God.

Wanfala hed bilong famili wea wise hem hambol. Taem fitim, bae hem willing for tok sorre, nomata maet hem hard for talem hao hem nao rong. Bible sei man savve kasem salvation taem “planti story tugeta.” (Proverbs 24:6) Tru nao, hambol fasin tu bae muvim hed bilong famili for herem and willing for askem tingting bilong waef and pikinini sapos hem fitim. Taem wanfala Christian hed followim Jesus bae hem mek sure famili garem hapi and sef living and diswan bae givim honor and glory long Datwan wea Startim olketa famili, Jehovah God.—Ephesians 3:14, 15.

[Olketa Footnote]

[Piksa long page 22]

Wanfala hasband wea willing bae herem tingting bilong waef and pikinini bilong hem