Wanem Nao Vitiligo?
From man wea raet for Wekap! long South Africa
◼ Sibongile samfala taem tok fani abaotem problem long skin bilong hem. Hem smile taem hem sei, “Mi blak taem mi born, gogo mi white, distaem mi no savve nao.” Hem garem vitiligo.
Taem skin no garem olketa cell for mekem kala, diswan nao kosim vitiligo wea nara nem bilong hem leukoderma. Bikos long diswan olketa white mark kamap long skin. Samfala pipol savve garem wanfala mark nomoa long body. Bat, long olketa narawan kwiktaem nomoa hem kavarem full body. For samfala narawan moa, hem isisi spred insaed staka year. Man wea garem vitiligo no savve spredim go long narawan and tu, man no savve feel sik sapos hem kasem.
Vitiligo showaot klia tumas long dark-skin pipol olsem Sibongile. Bat hem affectim pipol long smolfala or bigfala wei. Record showimaot smolfala sekson bilong pipol nomoa garem. Vitiligo savve kasem olketa man and woman nomata wanem kala skin. No eniwan savve wanem nao kosim diswan.
Staka wei for treatim hem stap, nomata pipol no savve long barava wei for finisim vitiligo. Olsem example, vitiligo showaot moa klia taem sun bonem healthy skin bilong laet skin pipol and skin hia hem kamap moa dark. Sapos man protectim skin bilong hem from sun, diswan no savve happen. Spesol mek-ap savve haedem vitiligo long dark skin pipol. Samfala kamap gud from repigmentation. For disfala treatment man iusim spesol machine and tekem medicine for staka month. Taem olketa tekem disfala treatment, samfala kasem bak kala long skin bilong olketa olsem bifor vitiligo affectim olketa. Olketa narawan chusim depigmentation. Main samting wea disfala treatment duim hem for aotem olketa cell wea stap yet for mekem kala, thru long wei wea man tekem medicine.
Pipol savve kasem hevi saed long feeling sapos hem affectim feis bilong olketa. Sibongile sei olsem: “No longtaem go nomoa tufala pikinini lukim mi and singaot big and ranawe. Olketa nara pipol ting mi garem sik wea savve kasem olketa or samwan mekem kastom long mi. From diswan olketa hol bak for story witim mi. Mi laekem pipol for savve hao olketa no need for fraetem eniwan wea garem diswan. Olketa no savve kasem vitiligo thru long wei for tasim man or thru long air.”
Sibongile no letem disfala samting for stopem hem for duim Bible teaching waka wea hem lovem tumas from hem wanfala Jehovah’s Witness. Waka hia hem for visitim pipol long haos bilong olketa and story witim olketa. Hem sei: “Mi hapi nomoa long lukluk bilong mi. Mi feel olraet nomoa abaotem hu nao mi, and mi weitim taem wea mi bae kasem bak kala long skin wea mi born witim long Paradaes earth wea Jehovah God promisim.”—Revelation 21:3-5.
[Piksa long page 16]
Long 1967, taem mi no kasem yet vitiligo