Kingdom Nius No. 36

Niu Millennium—Wanem Nao Future Garem for Iu?

Niu Millennium—Start Bilong Wanfala Niu Taem?

LONG midolnaet bilong December 31, 1999, mek-20 century hem end.a Hem wanfala century wea lukim planti trabol. Bat hem lukim tu start bilong olketa niu technology, bigfala change saed long medicine, information kamap narawe, and wanfala world economy wea grow fast. So planti pipol welkamim niu millennium olsem saen bilong hope and change. Waswe, maet iumi lukim end bilong war, poor living, pollution bilong environment, and sik?

Planti hope olsem. Bat waswe, niu millennium bae really givim change wea bae helpem iu—olketa change wea bae mekem laef kamap sef and gudfala for iu and famili bilong iu? Tingim samting wea savve kamaot from tu-thri problem nomoa wea iumi feisim.

Pollution

Olketa richfala kantri go ahed for “kosim bigfala problem long environment wea affectim full world and bigfala pollution and spoelem olketa laef long earth.” Sapos kaen wei olsem go ahed, “natural environment bae hem barava safa.”—“Global Environment Outlook—2000,” United Nations Environment Programme.

Olketa Sik

“Bifor year 2020, seven insaed evri tenfala pipol long poor kantri bae dae long sik wea no isi for spread, datwan hem tufala taem moa big winim namba tuday.”—“The Global Burden of Disease,” Harvard University Press, 1996.

Samfala expert talemse hao “bifor 2010, 66 million pipol bae dae insaed long 23 kantri wea garem barava staka [AIDS] sik.”—“Confronting AIDS: Evidence From the Developing World,” wanfala report bilong European Commission and World Bank.

Poor Living

“Klosap 1.3 billion pipol laef long selen wea smol winim wan dollar [S.I.$5.00] long wanfala day, and klosap 1 billion nao kanduit kasem main kaikai wea olketa needim.”—“Human Development Report 1999,” United Nations Development Programme.

War

“Trabol long tu-thri ples maet kamap ova tumas. Bikos long wei wea ethnic, tribe, and religion [hem divaed ], . . . olketa trabol hia bae kamap . . . main kaen raoa insaed next 25 year . . . , wea bae killim dae staka handred thousand pipol evri year.”—“New World Coming: American Security in the 21st Century,” U.S. Commission Long National Security/21st Century.

So bigfala hapi and celebration bilong niu millennium hem haedem trufala samting hao pollution, sik, poor living, and war hem big winim enitaem bifor. Rut bilong olketa problem hia hem greedy fasin, nomoa trust, and selfish fasin—olketa fasin wea research bilong science, technology, or politik no savve finisim.

Millennium wea Bae Blessim Man

Wantaem, wanfala man for raet long bifor hem sei: “Wei bilong man hem no bilong hem. Hem no bilong man wea wakabaot for disaedem gogo bilong hem.” (Jeremiah 10:23) Man no garem savve and raet for rulim disfala earth. Wan wea wakem iumi, Jehovah God, hemseleva nomoa garem raet and savve for stretem olketa problem bilong man.—Romans 11:33-36; Revelation 4:11.

Bat what taem? Hao? Iumi lukim planti pruv hao iumi klosap long end bilong “olketa last day.” Openem Bible bilong iu, plis, and readim 2 Timothy 3:1-5. Hem barava talem klia olketa fasin wea pipol bae showimaot long olketa “nogud taem” hia. Matthew 24:3-14 and Luke 21:10, 11 tu storyim “olketa last day.” Long there tufala story raonem olketa physical samting wea happen bihaen 1914, olsem world war, nogud sik, and short long kaikai evriwea.

Klosap nao “olketa last day” bae finis. Daniel 2:44 hem sei: “God bilong heven bae startim wanfala kingdom wea bae nating savve finis. . . . Hem bae smasem and finisim evri kingdom hia [long earth], and hemseleva nao bae stap olowe.” So datwan talemaot hao God bae wakem wanfala Kingdom, or gavman, for rulim earth. Revelation 20:4 talemse disfala gavman bae rul for wan thousand year—wanfala millennium! Tingim samfala long olketa wei wea laef bae kamap gud for evriwan insaed datfala nambawan Millennium:

Economics. “Olketa bae buildim haos and stap insaed; and olketa bae plantim plantation and kaikaim frut bilong hem. Olketa bae no buildim and narafala man nao stap insaed; olketa bae no plantim and narawan nao kaikaim.”—Isaiah 65:21, 22.

Health. “Long datfala taem, eye bilong olketa wea blind bae open, and ear bilong olketa wea earpas bae no sat moa. Long datfala taem, man wea cripple bae klaemap olsem wanfala deer, and tongue bilong man wea no savve toktok bae singaot witim hapi.” “And no eniwan bae sei: ‘Mi sik.’”—Isaiah 33:24; 35:5, 6.

Environment. God bae “finisim olketa wea spoelem earth.” —Revelation 11:18.

Wei for Stap Witim Narawan. “Olketa bae no spoelem eniwan or spoelem eni samting long holy maunten bilong mi; from earth bae fulap witim savve bilong Jehovah.”—Isaiah 11:9.

Planti million pipol garem faith long olketa promis hia bilong Bible and so olketa garem gudfala tingting abaotem future. From diswan, olketa kamap moa fit for deal witim olketa hevi and problem bilong laef. Hao nao Bible savve kamap strongfala gaed long laef bilong iu?

Savve wea Lead Long Laef!

Samtaem iumi sapraes tumas long science and technology! Nomata olsem, no evri man nao kamap sef and hapi from savve bilong man. Only savve wea fit for duim diswan nao Bible storyim long John 17:3, wea sei: “Diswan nao minim laef olowe, for olketa kasem savve abaotem iu, only trufala God, and abaotem dat wan wea iu sendem kam, Jesus Christ.”

Iumi faendem kaen savve olsem insaed olketa page bilong Bible. Nomata planti nao talem strongfala toktok abaotem datfala holy buk, tu-thri nomoa studyim gud. Waswe long iu? Hem tru, man need for barava trae hard for readim Bible. Bat bae iu barava satisfae. Bible hem only buk wea “kam from God and gud for teachim, for kaonselem, for stretem evri samting, for givim discipline long raeteous fasin.”—2 Timothy 3:16.

So, hao nao iu savve start for kasem savve abaotem Bible? Waswe iu no acceptim help bilong Olketa Jehovah’s Witness? Olketa givim help long planti million pipol long haos bilong pipol seleva, and no askem selen for diswan. For helpem iu long diswan, olketa iusim olketa difren Bible buk, olsem Wanem Nao God Mas Kasem From Iumi? Hem ­givim kliafala ansa long planti kwestin wea iu maet garem abaotem Bible, olsem: Hu nao God? Wanem nao purpose bilong God for earth? Wanem nao Kingdom bilong God? Hao nao Bible savve mekem famili laef bilong iu kamap moabeta?

Sapos iu laekem wanfala Jehovah’s Witness for kasem iu long haos bilong iu, plis raet long spes long daon. Olketa bae hapi for givim iu moa information abaotem nambawan Millennium Rul bilong Kingdom bilong God!

□ Mi laek for kasem disfala brochure Wanem Nao God Mas Kasem From Iumi? Talem wanem languis iu laekem․

□ Plis kam lukim mi for wanfala free hom Bible study

[Footnote]