Story Thru Long Leta
OLKETA leta mekem living and fasin bilong planti million pipol kamap moabeta. Klosap evri buk long olketa Christian Greek Scripture hem wanfala leta. Iumi savve raetem olketa leta for strongim olketa niu wan, story witim olketa fren, encouragem olketa brata and sista wea acceptim olketa spesol responsibility, strongim olketa wea feisim hard taem, and sendem important information for waka bilong kongregeson.—1 Thess. 1:1-7; 5:27; 2 Pet. 3:1, 2.
Wei for raetem leta hem gudfala wei for givim witness. Long samfala ples, planti pipol stap insaed olketa hae security building or hotel wea iumi hard for go insaed. Samfala no savve stap olowe long haos, so taem iumi preach from haos tu haos, iumi no meetim olketa. Olketa narawan stap seleva long ples wea farawe.
Samfala taem, sik, big rain, or curfew maet stopem iu for go preaching. Maet iu savve raetem wanfala leta for talem moa samting abaotem Bible long wanfala relative or samwan wea iumi meetim finis? Waswe, Bible student bilong iu muv go long difren ples? Wanfala leta from iu maet samting hem barava needim for keepim interest bilong hem long truth. Or maet iu savve sharem samfala important spiritual information long olketa wea no longtaem go nomoa marit, garem pikinini, or wea samwan olketa lovem hem dae.
Givim Witness Thru Long Leta
Taem iu raetem leta for givim witness long samwan wea iu no savve long hem, firstaem introducem iuseleva. Maet iu talem hao iu duim wanfala volunteer waka wea go ahed raonem full world. Sapos hem fitim, talem hao iu wanfala Jehovah’s Witness. Talem hem why nao iu raetem leta winim wei for visitim hem. Wei wea iu raet mas olsem iu barava lukim hem and story long hem. Nomata olsem, for fitim kaonsel for “careful olsem snek bat no garem blame olsem kurukuru,” tingting gud abaotem haomas samting nao iu shud talem abaotem iuseleva.—Matt. 10:16.
Raetem tu samting wea bae iu talem long hem sapos iu savve visitim hem. Maet iu savve lelebet changem wanfala introduction from Hao for Startim and Go Ahed for Story Abaotem Bible or iusim wanfala idea from wanfala Kingdom Ministry Bilong Iumi wea iu kasem no longtaem go nomoa. Iu savve talem wanfala kwestin and encouragem datfala man for ting raonem. Samfala pablisa explainim hao iumi garem wanfala free program for ansarem olketa Bible kwestin and then talem samfala chapter title from wanfala Bible study buk bilong iumi. Wanfala example leta for givim witness hem stap long page 73. Diswan savve givim iu samfala idea, bat hem gud for iusim samfala difren subject. Sapos nomoa, gogo maet pipol kasem nara leta wea semsem olsem wan wea olketa kasem finis.
Samfala pipol bae hol bak for readim wanfala longfala leta from wanfala stranger. So hem bae wise for no mekem leta bilong iu long tumas. Long bilong leta shud fitim, nogud datfala man hem lukim hem long tumas and no readim. Hem gud tu for sendem wanfala invitation pepa for olketa meeting long Kingdom Hall. Iu savve sendem tu wanfala tract, wanfala brochure, or wanfala Wastaoa or Wekap! and minim hao hem savve kasem olketa hia evritaem sapos hem laekem. Or iu savve askem hem sapos hem laekem samwan for visitim hem for storyim moa datfala subject.
Lukluk Bilong Leta
Lukim disfala example leta. Lukluk long olketa samting hia: (1) Hem organize gud, no olabaot. (2) Nomata man lusim envelope, hem bae garem nem and address bilong man wea sendem. (3) Long wei wea simpol and talem stret, firstfala paragraf talem purpose bilong datfala leta. (4) Each main point hem long olketa separate paragraf. (5) For fitim goal bilong hem, disfala leta hem no free tumas, or olsem bisnis leta.
Long wanfala leta wea secretary bilong kongregeson maet sendem long branch office, hem bae talem nem bilong kongregeson, nem and address bilong hemseleva, and date. Nem and address bilong man or organization wea leta bae go long hem, bae insaed long leta tu. Next samting bae toktok wea fitim for sei hello. Long samfala languis, olketa leta finis witim wanfala toktok olsem “Very truly yours” or “Sincerely” and anda long datwan man wea raetem bae saen. Disfala saen mas long handraeting bilong hemseleva.
Long evri leta, mek sure iu iusim stretfala spelling, grammer, punctuation, and for hem luk naes. For duim olsem bae mekem man tinghae long leta bilong iu and datfala message insaed.
Evritaem raetem address bilong iu long envelope. Sapos iu feel olsem hem bae no wise for givim address bilong iu taem iu witness long olketa stranger, askem olketa elder sapos olketa bae letem iu for iusim address bilong Kingdom Hall. Iu mas nating iusim address bilong Watch Tower Society for diswan, from hem bae mekem man tingse leta kam from office bilong Society and bae mekem evriwan konfius. Sapos iu sendem literature witim datfala leta bat no raetem return address, man bae tingse Society nao sendem.
Mek sure iu putim inaf stamp long leta bilong iu, especially sapos iu sendem witim literature tu. Sapos iu no putim inaf stamp, post office bae askem datfala man nao for peim kost, and hem bae affectim wei wea datfala man ting long message bilong iu. Remember hao long planti kantri, taem iu putim wanfala magasin or brochure witim leta, hem bae needim moa stamp winim wei for sendem leta nomoa.
Wei for Raet wea Fitim
Bihaen iu finisim leta bilong iu, readim moa for mek sure long hem. Hem here hao? Waswe, hem kaen and tingim feeling? Insaed long olketa fasin wea iumi trae for showimaot long narawan hem love and kaenfala fasin. (Gal. 5:22, 23) Sapos leta hia no encouragem man, changem samfala toktok.
Leta savve go long ples wea iu no savve go long hem. Dastawe diswan hem wanfala important tul for ministry bilong iumi. From leta bilong iu showimaot samting abaotem iu and wanem hem important long iu, ting abaotem wanem nao hem talem, lukluk bilong hem, hem bae here hao. Hem maet provaedem wanem man needim for startim, strongim, and encouragem hem go followim datfala road bilong laef.