Wei for No Fraet

PLANTI taem wanfala speaker hem fraet taem hem givim tok, especially sapos hem no givim tok evritaem. Wanfala pablisa maet fraet lelebet taem hem go long first tu-thri haos long field ministry. Taem hem kasem assignment for kamap profet, Jeremiah hem ansa: “Mi no savve hao for toktok, from mi wanfala boy nomoa.” (Jer. 1:5, 6) Jehovah helpem Jeremiah, and hem bae helpem iu tu. Gogo, bae iu no fraet.

Wanfala speaker wea no fraet savve kontrolem feeling bilong hem. Disfala wei for kontrolem feeling hem showaot long body bilong hem. Wei wea hem standap or sidaon hem natural and fitim. Wei wea hem muvim hand bilong hem garem mining. Voice bilong hem stedy and showimaot feeling.

Nomata maet iu garem wei for fraet, iu savve kamap moabeta. Hao? Bae iumi lukluk why nao wanfala speaker hem fraet. Maet physical samting nao kosim datwan.

Taem iu feisim wanfala challenge and iu want for winim bat no sure sapos iu bae winim, iu feel wari. From diswan, brain talem body for wakem moa adrenaline. Diswan maet mekem heart pump moa fast, changem wei wea iu breathe, mekem iu swet moa, or maet mekem olketa hand, knee or voice seksek. Long wei olsem body bilong iu hem trae helpem iu for deal witim samting wea happen long wei for mekem iu garem moa strong. Challenge nao hem for iusim datfala strong for tingting gud and showimaot interest taem iu givim tok.

Hao for Daonem Feeling for Wari. No forget hem wei bilong iumi man for feel lelebet wari. Bat, for winim fraet, iu need for daonem datfala feeling for wari and deal witim long kwaet wei. Hao nao iu savve duim diswan?

Prepare evribit. Iusim taem for preparem tok bilong iu. Mek sure iu barava minim subject bilong iu. Sapos hem tok wea iu nao savve chusim olketa point for storyim, tingting gud long wanem nao audience bilong iu savve finis abaotem datfala subject and wanem nao goal bilong iu. For duim olsem bae helpem iu for chusim best information. Sapos firstaem iu traem hem hard lelebet, story witim wanfala speaker wea savve. Hem savve helpem iu for minim and lukluk gud long datfala information and long audience. Taem iu feel sure iu garem information wea bae helpem audience and hem klia long mind bilong iu, wei wea iu barava want for sharem bae winim feeling for wari abaotem wei for givim datfala tok.

Preparem gud introduction bilong iu. Savve gud long start bilong tok bilong iu. Taem tok bilong iu go ahed, maet feeling for seksek hem katdaon.

Iumi savve iusim olketa idea hia taem iumi prepare for field ministry tu. No tingim subject wea iu bae storyim nomoa bat tu kaen pipol wea iu bae witness long olketa. Planim introduction long gudfala wei. Kasem gud samting from savve bilong olketa pablisa wea mature.

Maet iu tingse iu bae no fraet sapos iu iusim manuscript taem iu givim tok long wanfala grup. For tok stret, diswan maet mekem feeling for wari hem moa worse evritaem iu givim wanfala tok. Hem tru samfala speaker iusim staka note, and samfala narawan iusim shortfala note nomoa. Bat samting wea bae helpem iu for no tingim iuseleva and for daonem feeling for wari, hem no olketa word long pepa, bat strong biliv long heart bilong iu hao samting wea iu redyim for audience hem barava gudfala.

Practicem big tok bilong iu. Kaen practice olsem bae mekem iu feel sure iu savve talem samting wea iu tingim. Taem iu practice, hem bae moa isi for rememberim olketa point taem iu givim tok bilong iu. Taem iu practice, duim olsem iu really givim tok. Lukim audience long mind bilong iu. Sidaon long tebol or standap, olsem wei wea iu bae duim taem iu givim datfala tok.

Prea long Jehovah for help. Waswe, bae hem ansarem prea olsem? “Iumi garem disfala wei for trustim hem, hao, nomata wanem samting iumi askem wea fitim will bilong hem, hem herem iumi.” (1 John 5:14) Sapos iu barava want for honorim hem and helpem pipol for kasem gud samting from Word bilong hem, God bae ansarem prea bilong iu. Datfala promis savve strongim iu for fulfillim assignment bilong iu. And tu, taem iu mekem grow olketa frut bilong spirit—love, hapi, peace, kwaet fasin, and fasin for kontrolem seleva—iu bae kasem datfala wei for tingting wea iu needim for deal witim samting wea happen and no fraet.—Gal. 5:22, 23.

Kasem moa savve. Taem iu olowe share long field service, feeling for fraet bae katdaon. Taem iu olowe givim koment long olketa meeting long kongregeson, bae hem moa isi for iu story front long nara pipol. Taem iu givim staka tok long kongregeson, feeling for wari wea iu kasem bifor evri tok maet katdaon. Waswe, iu laek for garem moa chance for givim olketa tok? Sapos olsem, volunteer long skul for changem narawan wea no fit for duim assignment bilong hem.

Bihaen iu duim finis evri samting antap, bae hem helpem iu for lukluk gud long olketa problem wea saen bilong man wea fraet. For luksavve long olketa problem and lane hao for deal witim olketa bae helpem iu for no fraet taem iu story. Olketa problem maet saed long physical or voice.

Olketa Physical Problem. Wei wea iu fraet or nomoa, hem showaot long body bilong iu and wei wea iu iusim hand bilong iu. Tingim firstaem tufala hand bilong iu. For holem hand bihaen long baksaed, stiff saed long body, or for hol strong long speaker stand; hand wea olowe go insaed long poket and aot moa, wei for plei witim nektie, tasim feis, nose, eyeglass; plei witim hanwas, wanfala pencil, ring or olketa note; no duim akson witim hand long —evri samting hia showaot man hem fraet.

Wei wea man hem feel fraet maet showaot tu long wei for muvim leg evritaem, muvim body from saed tu saed, standap stret fogud, or bend, mekem lips wet olowe, and for breathe fast.

Sapos iu trae hard iu savve kontrolem olketa saen hia wea showaot man hem fraet tumas. Waka long wanfala nomoa firstaem. Luksavve long problem wea iu garem, and tingim firstaem wanem nao iu need for duim for stopem problem hia for kamap. Sapos iu trae hard olsem, bae iu showimaot iu no fraet.

Olketa Problem Long Voice. Voice wea barava hae or seksek maet showimaot man hem fraet. Maet iu kof evritaem or toktok fast tumas. Iu savve winim olketa problem and wei olsem thru long hard waka for kontrolem voice.

Sapos iu feel fraet, stop lelebet and breathe deep tu-thri taem bifor iu go long platform. Trae for mekem full body feel relax. Winim wei for tingim hao iu fraet, ting strong long why nao iu want for sharem olketa samting wea iu preparem witim audience. Bifor iu start for story, lukluk long audience, chusim wanfala kaenfala feis, and smile. Story slow long introduction bilong iu, and then tingim nomoa tok bilong iu.

Wanem for Expectim. No expectim evri feeling for fraet for finis nao. Planti speaker wea givim olketa tok long platform for planti year finis feel fraet taem olketa stap front long wanfala audience. Bat, olketa lane for kontrolem feeling for fraet.

Sapos iu barava trae hard for lusim olketa saen wea showaot iu fraet, audience bae tingse iu wanfala speaker wea no fraet. Iu maet feel fraet yet, bat olketa maet nating luksavve long datwan.

No forget, datfala adrenaline wea kosim olketa problem wea showaot iu fraet hem givim moa strong long iu tu. Iusim datwan for story witim feeling.

Iu no need for weit go kasem taem iu long platform for practicem evri samting hia. Lane for no fraet and for kontrolem iuseleva and for story witim feeling wea fitim long evriday living. For duim olsem bae barava helpem iu for no fraet long platform and long field ministry, wea hem barava important.