Iusim Information wea Olketa Markem

BIBLE markem Christian kongregeson olsem body bilong man. Evri part hem important, bat “olketa part no garem sem waka.” For fitim datwan, iumi shud duim gud eni privilege wea iumi kasem. Diswan minim iumi mas minim gud and duim best bilong iumi long evri tok assignment wea iumi kasem and no ting smol long samfala subject from iumi tingse nara subject hem moa interesting. (Rom. 12:4-8) Datfala faithful and wise slave sekson garem responsibility for provaedem spiritual kaikai “long barava taem.” (Matt. 24:45) Taem iumi iusim savve bilong iumi for givim tok followim olketa instruction wea iumi kasem, iumi showaot iumi tinghae long datfala arrangement. Diswan help for mekem waka bilong kongregeson hem go ahed smooth.

Wanem Samting for Iusim. Taem iu kasem tok assignment long skul, mek sure iu iusim datfala subject and no difren samting. Klosap evritaem, olketa bae markem reference information for iu iusim. Sapos datfala assignment no markem wanem information for iusim, iu savve chusim samfala information seleva. Bat, taem iu preparem tok bilong iu, mek sure full tok hem abaotem subject wea olketa assignim long iu. Taem iu disaedem wanem information for iusim, tingim tu audience bilong iu.

Studyim gud datfala reference information, ting raonem olketa scripture insaed long hem. Then tingim best wei for iusim for helpem audience. Chusim tu or maet thrifala point from datfala information for iusim olsem olketa main point long tok bilong iu. Long sem wei, chusim from information long assignment olketa scripture wea iu plan for readim and storyim.

Haomas information nao iu mas storyim? Samting wea iu fit for storyim long gudfala wei nomoa. No spoelem gudfala wei for teach from iu iusim tumas information. Sapos samfala part long datfala information no fitim goal bilong tok bilong iu, iusim nomoa olketa part wea bae helpem iu kasem datfala goal. Chusim olketa best point for teachim and helpem audience. Goal bilong iu for disfala point kaonsel hem, no haomas information iu savve storyim, bat for iusim information wea olketa markem for faondeson bilong tok bilong iu.

Tok bilong iu hem no olsem wanfala review bilong datfala information. Iu mas plan for explainim samfala point, givim moa information abaotem olketa, iusim olketa tokpiksa, and then maet iu givim example long hao for iusim. Iu shud iusim samfala nara idea for storyim go moa olketa important point wea stap long information insaed tok assignment, no for changem datfala information.

Gogo olketa brata wea kasem olketa mark olsem olketa teacher maet kasem invitation for givim instruction long Service Meeting. Olketa minim hao olketa mas iusim gud information wea olketa markem for datwan and no changem for narafala samting. Long sem wei, olketa brata wea givim olketa pablik tok kasem aotlaen for followim. Speaker hem free lelebet for disaed hao for storyim datfala information, bat aotlaen talem klia olketa main point for story raonem, olketa pruv for iusim, and olketa scripture wea olsem faondeson bilong datfala tok. For lane hao for teach from information wea olketa markem hem important part bilong training for kasem olketa nara tok assignment.

Disfala training savve helpem iu tu for conductim olketa hom Bible study wea muv ahed. Iu bae lane for tingim evritaem datfala study information winim wei for go difren and storyim olketa nara samting wea maet interesting bat no important for minim datfala subject. Bat, sapos iu barava minim purpose bilong disfala leson, bae iu no ova tumas for followim nomoa datfala study information gogo iu fail for explainim samting wea student need for savve long hem.