Bible Buk Namba 12​—2 Kings

Man wea Raetem: Jeremiah

Ples Hem Raetem: Jerusalem and Egypt

Taem Hem Finis Raetem: c. 580 B.C.E.

Taem Hem Storyim:  920–580 B.C.E.

1. Wanem nao olketa history wea olketa talem long Tu Kings, and hem for mekhae long wanem?

BUK bilong Tu Kings hem go ahed for showimaot raf taem bilong tufala kingdom bilong Israel and Judah. Elisha hem changem Elijah and hem kasem blessing bilong tufala part bilong spirit bilong Elijah, and hem duim 16-fala mirakol, taem iumi markem witim 8-fala bilong Elijah. Hem go ahed for talemaot profesi abaot bigfala trabol for apostate Israel, wea Jehu nomoa hem showimaot strong for Jehovah for lelebet taem. Olketa king bilong Israel go ahed for duim barava wicked fasin, go kasem taem kingdom long north foldaon long hand bilong Assyria long 740 B.C.E. Long kingdom long south bilong Judah, samfala gudfala king stap, olketa nao Jehoshaphat, Jehoash, Hezekiah, and Josiah, wea stopem wei for apostate for lelebet taem, bat gogo, Nebuchadnezzar hem bringim judgment bilong Jehovah taem hem finisim Jerusalem, temple bilong hem, and land bilong Judah long 607 B.C.E. So olketa profesi bilong Jehovah fulfill nao, and diswan mekhae long word bilong hem!

2. Wanem nao iumi savve sei abaotem man wea raetem Tu Kings and wei wea hem fit for stap insaed Bible, and hem story abaot wanem taem?

² From long firstaem Tu Kings hem wan buk witim Wan Kings, wanem olketa talem finis abaot wei wea Jeremiah nao raetem hem fitim Tu Kings tu, olsem pruv bilong wei wea disfala buk hem fit for stap insaed Bible and wei wea hem stret evribit. Hem finis raetem buk hia long 580 B.C.E. and hem storyim taem wea Ahaziah bilong Israel start for rul long samting olsem 920 B.C.E. and hem finis long mek-37 year bilong taem wea Jehoiachin hem stap olsem prisoner, long 580 B.C.E.—1:1; 25:27.

3. Wanem important samting nao wei for studyim oldfala samting showimaot wea saportim Tu Kings?

³ Wei for studyim oldfala samting saportim record bilong Tu Kings, and givim pruv moa long wei wea hem tru. Olsem example, datfala Moabite Stone wea planti pipol savve long hem, garem raeting long hem wea hem story bilong king Mesha bilong Moab abaotem war midolwan long Moab and Israel. (3:4, 5) And narawan tu hem blakfala ston bilong Shalmaneser III bilong Assyria, wea stap distaem long British Museum, long London, wea talemaot nem bilong king Jehu bilong Israel. And olketa raeting bilong king Tiglath-pileser III (Pul) bilong Assyria, wea talemaot nem bilong samfala king bilong Israel and Judah, witim Menahem, Ahaz, and Pekah.—15:19, 20; 16:5-8.a

4. Wanem nao pruvim wei wea Tu Kings hem wanfala important part bilong olketa Scripture wea kam from God?

⁴ Narafala klia pruv wea showimaot disfala buk hem stret evribit hem wei wea hem honest evribit for talemaot olketa judgment bilong Jehovah long pipol bilong hem. Iumi luksavve long strongfala paoa bilong profesi abaotem judgment bilong Jehovah long Deuteronomy 28:15–29:28, taem kingdom bilong Israel hem finis evribit firstaem and then bihaen, kingdom bilong Judah. Taem tufala kingdom hia finis evribit, “bigfala kros bilong Jehovah againstim datfala land showaot taem hem bringim evri trabol wea olketa raetem long disfala buk.” (Deut. 29:27; 2 Ki. 17:18; 25:1, 9-11) Narafala samting wea olketa recordim long Tu Kings hem kamap klia long olketa nara Scripture. Long Luke 4:24-27, bihaen Jesus tok abaot Elijah and datfala widow woman bilong Zarephath, hem tok abaot Elisha and Naaman for showimaot why nao olketa long ples bilong hem no acceptim hem olsem wanfala profet. From evri samting hia, iumi lukim wei wea Wan and Tu Kings barava important part bilong olketa Holy Scripture.

WEI WEA HEM HELPEM IUMI

33. Olketa wanem nambawan example nao stap long Tu Kings for iumi followim?

³³ Nomata hem story abaotem nogud samting wea happen long olketa kingdom bilong Israel and Judah, Tu Kings showimaot planti example bilong olketa blessing bilong Jehovah long olketa man wea showimaot love for hem and olketa stretfala principle bilong hem. Olsem datfala widow woman bilong Zarephath bifor hem, datfala Shunammite woman kasem planti blessing from fasin for welkam wea hem showimaot long profet bilong God. (4:8-17, 32-37) Wei wea Jehovah hem fit for evritaem provaed, showaot taem Elisha feedim wan handred man from 20-fala bred, olsem Jesus tu duim semkaen mirakol bihaen. (2 Ki. 4:42-44; Matt. 14:16-21; Mark 8:1-9) Tingim hao Jehonadab kasem blessing taem hem kasem invitation for go insaed chariot bilong Jehu for lukim olketa worshiper bilong Baal finis evribit. And why nao olsem? Bikos hem duim gudfala samting for kamaot for welkamim strongfala Jehu. (2 Ki. 10:15, 16) And tu, nambawan example bilong Hezekiah and Josiah stap tu, long wei wea tufala hambol and showimaot proper respect for nem bilong Jehovah and Law bilong hem. (19:14-19; 22:11-13) Olketa nao nambawan example for iumi followim.

34. Wanem nao Tu Kings teachim iumi abaotem respect for olketa official servant and abaotem wei for guilty long blood?

³⁴ Jehovah no letem wei for no showimaot respect for olketa official servant bilong hem. Taem olketa noti pikinini mekfani long Elisha olsem profet bilong Jehovah, Hem kwiktaem pei bak. (2:23, 24) Nara samting moa, Jehovah respectim blood bilong man wea no garem blame. Hevi judgment kam antap long haos bilong Ahab no bikos long Baal worship nomoa, bat from wei for spillim blood tu. Dastawe, olketa markem Jehu for peim bak “blood bilong evri servant bilong Jehovah long hand bilong Jezebel.” Taem Jehoram kasem judgment, Jehu rememberim toktok wea Jehovah talem hao datwan hem bikos long “blood bilong Naboth and blood bilong olketa son bilong hem.” (9:7, 26) Olsem tu, wei wea Manasseh guilty long blood mekem Judah for kasem judgment. For addim moa long sin bilong hem long giaman worship, Manasseh ‘fulimap Jerusalem witim blood from wansaed go kasem narasaed.’ Nomata Manasseh hem repent from nogud wei bilong hem bihaen, wei for guilty long blood hem still stap. (2 Chron. 33:12, 13) Nomata gudfala rul bilong Josiah, and wei wea hem finisim evri wei for worshipim idol, no savve aotem wei wea datfala community guilty long blood from rul bilong Manasseh. Samfala year bihaen, taem Jehovah start for bringim judgment againstim Jerusalem, hem talemaot hao datwan hem bikos Manasseh hem “fulimap Jerusalem witim blood wea no guilty, and Jehovah no willing for forgivim.” (2 Ki. 21:16; 24:4) Long sem wei, Jesus talemaot hao Jerusalem bilong first century C.E. mas finis, bikos olketa priest bilong hem nao hem olketa son bilong olketa wea killim dae olketa profet, ‘mekem evri raeteous blood wea olketa kapsaetem long earth bae kam antap long olketa.’ (Matt. 23:29-36) God hem warnim world hao hem bae pei bak for blood bilong olketa man wea no garem eni blame wea olketa kapsaetem, especially blood bilong olketa “wea olketa killim dae finis from word bilong God.”—Rev. 6:9, 10.

35. (a) Hao nao olketa showimaot Elijah, Elisha, and Isaiah olsem olketa trufala profet? (b) Long saed long Elijah, wanem nao Peter hem sei abaotem profesi?

³⁵ Wei wea Jehovah fulfillim evribit olketa judgment profesi bilong hem showaot tu long Tu Kings. Iumi lukluk gud long thrifala main profet, Elijah, Elisha, and Isaiah. Olketa profesi bilong each wan garem olketa interesting fulfillment. (2 Ki. 9:36, 37; 10:10, 17; 3:14, 18, 24; 13:18, 19, 25; 19:20, 32-36; 20:16, 17; 24:13) Wei wea Elijah hem stap witim profet Moses and datfala Bigfala Profet, Jesus Christ, long datfala taem wea hem change and kasem glory long maunten, strongim wei wea hem wanfala trufala profet. (Matt. 17:1-5) Taem hem story abaotem nambawan samting wea happen long dat taem, Peter hem sei: “Dastawe iumi garem profesi toktok wea kamap moa sure; and hem gud tumas iufala tingting strong long datwan olsem wanfala lamp wea shaen long dark ples, go kasem taem hem daylaet and wanfala daystar hem kamap, insaed long heart bilong iufala.”—2 Pet. 1:19.

36. Why nao Jehovah showim mercy long pipol bilong hem, and hao nao trust bilong iumi long Kingdom bilong datfala Seed kamap strong?

³⁶ Datfala samting wea happen wea olketa raetem long Tu Kings showimaot klia hao judgment bilong Jehovah againstim evriwan wea followim false religion and evriwan wea min for killim dae man wea no garem blame, hem for finis evribit. Nomata olsem, Jehovah showimaot favor and mercy long pipol bilong hem “for saed bilong covenant bilong hem witim Abraham, Isaac and Jacob.” (2 Ki. 13:23) Hem keepim olketa “for saed bilong David, servant bilong hem.” (8:19) Hem bae showimaot mercy olsem long olketa wea tan go long hem long distaem. Taem iumi reviewim Bible record and olketa promis, witim wei for strongim trust, iumi luk forward long Kingdom bilong “son bilong David,” Jesus Christ datfala promis Seed, wea wei for killim dae man and nogud fasin bae nomoa nao!—Matt. 1:1; Isa. 2:4; Ps. 145:20.

[Footnote]

[Olketa Study Kwestin]