Chapter Eleven
“Go Ahed for Luk Aotem Firstaem Kingdom”
1. (a) Why nao Jesus encouragem olketa wea lisin long hem for luk aotem firstaem Kingdom? (b) Wanem kwestin nao iumi shud askem iumiseleva?
WINIM 1,900 year go finis long wanfala tok wea Jesus givim long Galilee, hem encouragem olketa wea lisin long hem olsem: “Go ahed for luk aotem firstaem kingdom [bilong God] and raeteous fasin bilong hem.” Why nao hem sei Kingdom hem important olsem? Waswe, taem for Christ kasem paoa long Kingdom hem planti handred year yet long future? Yes, bat thru long datfala Messiah Kingdom Jehovah bae vindicatem sovereign rul bilong hem and fulfillim nambawan purpose bilong hem for earth. Eniwan wea barava tinghae long olketa important samting hia bae putim Kingdom olsem first samting long laef bilong hem. Sapos datwan hem fitim first century, hem barava fitim disfala taem wea Christ hem sidaon finis long throne olsem King! So kwestin nao hem, Waswe, living bilong mi showaot mi luk aotem firstaem Kingdom bilong God?—Matthew 6:33.
2. Wanem nao olketa samting wea planti pipol barava laek for aftarem?
2 Distaem, planti million pipol raonem world luk aotem firstaem datfala Kingdom. Olketa showimaot olketa saportim rul bilong datfala Kingdom long wei for duim will bilong Jehovah olsem main samting long laef bilong olketa, from olketa dedicatem olketa seleva long hem. Long narasaed, bigfala haf long olketa pipol interest for aftarem olketa samting bilong evriday living. Pipol aftarem selen and olketa material samting and hapi wea olketa savve baem. Or olketa savve iusim evri strong for aftarem laef waka bilong olketa. Living bilong olketa showaot olketa aftarem samting bilong seleva nomoa, material samting, and hapitaem. Olketa wea sei olketa biliv long God putim hem olsem mek-tu samting long laef.—Matthew 6:31, 32.
3. (a) Wanem kaen riches nao Jesus encouragem olketa disaepol bilong hem for aftarem, and why nao olsem? (b) Why nao no eni need stap for wari tumas abaotem olketa material samting?
3 Bat, Jesus givim disfala kaonsel long olketa disaepol bilong hem: “No go ahed for hipimap for iufala seleva olketa riches long earth,” from no eni samting hia savve stap for olowe. Bat hem sei: “Winim datwan, hipimap for iufala seleva olketa riches long heven” long wei for servem Jehovah. Jesus encouragem olketa follower bilong hem for keepim eye bilong olketa “simpol” long wei for strong for duim will bilong God. “Iufala kanduit slave for God and for Riches,” hem talem olketa. Bat waswe long olketa material need—kaikai, kaleko, and ples for stap? Jesus sei: “No go ahed for wari.” Hem storyim olketa bird wea God nao feedim olketa. Jesus encouragem olketa follower bilong hem for lane from olketa flaoa—God mekem olketa werem kaleko. Waswe, Jehovah ting moa hae long olketa servant bilong hem wea garem savve winim olketa samting hia? Jesus hem sei: “So, go ahed for luk aotem firstaem kingdom and raeteous fasin bilong hem, and iufala bae kasem olketa narafala samting hia [wea iufala needim].” (Matthew 6:19-34) Waswe, olketa samting wea iu duim showaot iu biliv long datwan?
No Letem Eni Samting Blokem Truth Bilong Kingdom
4. Sapos man hem tinghae tumas long olketa material samting, wanem nao maet kamaot from datwan?
4 Hem stret for ting for kasem inaf samting wea man seleva and famili needim long material saed. Bat, sapos man warim tumas olketa material samting, barava nogud samting savve kamaot from datwan. Nomata hem sei hem biliv long Kingdom, sapos insaed heart bilong hem hem putim olketa nara samting firstaem, diswan bae blokem truth bilong Kingdom. (Matthew 13:18-22) Olsem example, long wantaem, wanfala rich young ruler hem askem Jesus: “Wanem nao mi mas duim for kasem laef olowe?” Hem garem gud fasin and deal witim nara pipol long gudfala wei, bat hem lovem tumas olketa material samting bilong hem. Hem no savve let go long olketa samting hia for mekem hem kamap wanfala follower bilong Christ. So hem lusim chance wea savve leadim hem for stap witim Christ insaed Kingdom long heven. Long datfala taem Jesus sei: “Hem bae hard tumas for olketa wea garem selen for go insaed long kingdom bilong God!”—Mark 10:17-23.
5. (a) Paul encouragem Timothy for satisfae long wanem samting, and why nao olsem? (b) Hao nao Satan iusim “fasin for lovem selen” olsem wanfala trap wea savve distroem man?
5 Planti year bihaen, aposol Paul raet go long Timothy, wea stap long Ephesus, wanfala taon wea planti bisnis go ahed gud. Paul talem hem for tingim moa: “Iumi no tekem kam eni samting insaed long world, and iumi bae no savve tekem eni samting go aot. So, sapos iumi garem kaikai and ples for stap, iumi mas satisfae witim olketa samting hia.” Wei for waka for provaedem “kaikai and ples for stap” for iumiseleva and famili hem stret samting. Bat Paul givim disfala warning: “Olketa wea want tumas for kamap rich bae foldaon insaed test and trap and wei for barava wantem olketa samting wea krangge and kosim pain, wea gogo barava spoelem man.” Satan hem kleva tumas. Long firstaem hem maet switim man long olketa sisimol wei. Bihaen, diswan maet wei for pullim hem wea moa big, maet wei for kasem bigfala or beta waka witim moa selen bat hem need for iusim taem wea hem markem for olketa spiritual samting for duim datwan. Sapos iumi no keakea, “fasin for lovem selen” savve blokem olketa samting bilong Kingdom wea moa important. Paul sei olsem abaotem diswan: “From samfala trae for kasem datfala love olketa lusim faith finis and givim planti pain long olketa seleva.”—1 Timothy 6:7-10.
6. (a) For missim wei for letem material samting trapim iumi, wanem nao iumi mas duim? (b) Wanem trust nao iumi savve garem nomata long world distaem saed long selen hem no mas gud?
6 Witim trufala love for Christian brata bilong hem, Paul encouragem Timothy olsem: “Ranawe from olketa samting hia” and, “Faetem nambawan faet bilong faith.” (1 Timothy 6:11, 12) Iumi need for waka hard for no letem living wea aftarem material samting, wea olketa long world aftarem, kasholem iumi tu. Bat sapos iumi waka hard followim faith bilong iumi, Jehovah bae nating lusim iumi. Nomata evri samting kostim tumas selen and wei for no garem waka hem kamap big, hem bae mek sure iumi garem wanem iumi really needim. Paul raet olsem: “Living bilong iufala mas kamap free from wei for lovem selen, taem iufala satisfae long samting wea stap distaem. From [God] hem talem finis: ‘Mi bae nating lusim iu and bae nating forgetim iu.’ Mekem iumi kamap strong and sei: ‘Jehovah hem helpem mi; Bae mi no fraet. Wanem nao man savve duim long mi?’” (Hebrews 13:5, 6) And King David raet olsem: “Long bifor, mi wanfala young man, and distaem mi kamap olo nao, bat mi nating lukim eniwan wea raeteous hem no garem eni samting, or pikinini bilong hem luk aotem bred.”—Psalm 37:25.
Olketa First Disaepol Givim Example
7. Wanem instruction nao Jesus givim long olketa disaepol saed long preaching, and why nao diswan hem fitim?
7 Bihaen Jesus givim gudfala training long olketa aposol bilong hem, hem sendem olketa go aot long Israel for preachim gud nius and sei: “Kingdom bilong heven hem kam klosap.” Datwan hem nambawan message! Jesus Christ, datfala Messiah King, stap witim olketa. From olketa aposol givim olketa seleva for servem God, Jesus encouragem olketa for garem trust long wei wea God bae lukaftarem olketa. So hem sei: “No karem eni samting for datfala gogo, no tekem stik for wakabaot or basket kaikai, and no tekem tu bred or silver selen; and no garem tufala kaleko. Bat taem iufala go insaed long wanfala haos, stap long there and go aot from there.” (Matthew 10:5-10; Luke 9:1-6) Jehovah bae mek sure olketa nara Israelite bae givim samting wea olketa hia needim, wea hem kastom bilong olketa for welkamim olketa stranger.
8. (a) No longtaem bifor hem dae, why nao Jesus talem difren instruction saed long preaching waka? (b) Wanem nao mas go ahed for olsem first samting long living bilong olketa follower bilong Jesus?
8 Bihaen, just bifor hem dae, Jesus talem olketa disaepol bilong hem hao long future bae olketa duim waka long pipol and ples wea difren. From wei wea pipol bae againstim waka bilong olketa, bae olketa long Israel no welkamim olketa tumas. And tu, klosap nao olketa bae tekem message bilong Kingdom go long kantri bilong olketa Gentile. Distaem olketa mas tekem “paos” and “basket kaikai.” Nomata olsem, olketa mas go ahed for firstaem luk aotem Kingdom bilong Jehovah and raeteous fasin bilong hem, olketa sure God bae blessim hard waka bilong olketa for kasem kaikai and ples for stap.—Luke 22:35-37.
9. Hao nao Paul putim firstaem Kingdom long laef bilong hem taem hem lukaftarem olketa physical need bilong hem, and wanem kaonsel nao hem givim abaotem diswan?
9 Aposol Paul hem nambawan example bilong man wea followim kaonsel bilong Jesus. Paul mekem ministry olsem main samting long laef bilong hem. (Acts 20:24, 25) Taem hem go long wanfala area for preach, hemseleva lukaftarem olketa material need bilong hem, samtaem long wei for wakem olketa tent. Hem no expectim nara pipol for lukaftarem hem. (Acts 18:1-4; 1 Thessalonians 2:9) Nomata olsem, hem hapi for acceptim wei wea nara pipol welkamim hem and givim present taem olketa showimaot love long diskaen wei. (Acts 16:15, 34; Philippians 4:15-17) Paul encouragem olketa Christian, for no duim preaching waka long wei wea mekem olketa missim responsibility saed long famili, bat for balancem evri difren responsibility. Hem kaonselem olketa for waka, for lovem famili bilong olketa, and for sharem samting witim nara pipol. (Ephesians 4:28; 2 Thessalonians 3:7-12) Hem encouragem olketa for trust long God, no long olketa material samting, and for iusim living bilong olketa long wei wea showimaot olketa barava minim wanem nao hem moa important. For fitim olketa teaching bilong Jesus, datwan minim for luk aotem firstaem Kingdom bilong God and raeteous fasin bilong hem.—Philippians 1:9-11.
Keepim Kingdom Firstaem Long Laef Bilong Iu
10. Wanem nao hem minim for luk aotem firstaem Kingdom?
10 Haomas taem nao iumi wanwan iusim for sharem gud nius bilong Kingdom witim nara pipol? Datwan depend long living bilong iumi and hao deep nao iumi tinghae long diswan. Tingim hao Jesus no sei, ‘Luk aotem Kingdom taem iu no garem eni nara samting for duim.’ From hem savve long wei wea Kingdom hem important tumas, hem talemaot will bilong Dadi bilong hem taem hem sei: “Go ahed for luk aotem kingdom bilong hem.” (Luke 12:31) Nomata planti long iumi need for waka for kasem olketa samting wea iumiseleva and famili needim, sapos iumi garem faith, Kingdom waka wea God givim long iumi bae main samting long living bilong iumi. Long semtaem, bae iumi lukaftarem olketa famili responsibility bilong iumi.—1 Timothy 5:8.
11. (a) Hao nao Jesus showimaot no evriwan bae fit for duim sem samting for talemaot message bilong Kingdom? (b) Wanem nao olketa samting wea affectim haomas samting man savve duim?
11 Samfala long iumi fit for iusim moa taem winim olketa narawan for preachim gud nius bilong Kingdom. Bat long parabol bilong hem abaotem olketa difren kaen graon, Jesus showim hao evriwan wea heart bilong olketa olsem gudfala graon bae garem frut. Haomas frut? Living bilong olketa man wanwan hem difren. Olketa samting olsem age, health, and famili responsibility tu affectim diswan. Bat sapos man hem barava tinghae long diswan, hem savve duim planti samting.—Matthew 13:23.
12. Wanem nao olketa gudfala goal wea hem gud tumas for olketa young wan tingim?
12 Hem gud for garem olketa goal wea bae helpem iumi for mekem share bilong iumi insaed long Kingdom ministry kamap moa big. Olketa young wan shud ting strong abaotem nambawan example bilong young Christian Timothy. (Philippians 2:19-22) Waswe, eni samting moabeta winim wei for olketa go insaed long full-taem ministry taem olketa finis skul? Olketa wea grow ap finis bae kasem gud samting tu sapos olketa markem olketa gudfala spiritual goal.
13. (a) Hu nao disaedem wanem iumiseleva savve duim insaed Kingdom waka? (b) Sapos iumi barava luk aotem firstaem Kingdom, wanem nao iumi pruvim?
13 Winim wei for tok daonem olketa wea maet ting olketa shud duim moa samting, faith shud muvim iumi for kamap moabeta mekem iumi savve servem God evribit long wei wea fitim living bilong iumiseleva. (Romans 14:10-12; Galatians 6:4, 5) Olsem samting wea happen long Job hem showim, Satan sei main samting iumi laekem nao hem olketa material samting and gudfala living, and reason why iumi servem God hem for kasem samting for iumiseleva. Bat sapos iumi barava luk aotem firstaem Kingdom, iumi share for pruvim wei wea Devil hem man for barava laea. Iumi pruvim hao samting wea kam firstaem long living bilong iumi hem wei for servem God. So, long toktok and fasin, iumi pruvim deep love bilong iumi for Jehovah, wei wea iumi loyal for saportim sovereign rul bilong hem, and love wea iumi garem for nara pipol.—Job 1:9-11; 2:4, 5; Proverbs 27:11.
14. (a) Why nao hem gud for garem wanfala schedule for field ministry? (b) Hao big nao share bilong planti Witness insaed long field ministry?
14 Wanfala schedule savve helpem iumi for duim moa samting. Jehovah seleva garem wanfala “appointed taem” for duim purpose bilong hem. (Exodus 9:5; Mark 1:15) Sapos fitim, hem gud for share insaed long field ministry long wanfala or moa taem evri week. Planti handred thousand Jehovah’s Witness raonem world join insaed auxiliary pioneer waka, and olketa iusim tufala hour evriday for preachim gud nius. Planti handred thousand narawan serve olsem regular pioneer, iusim samting olsem tu and haf hour evriday for talemaot Kingdom message. Olketa spesol pioneer and missionary iusim moa taem insaed long Kingdom service. Iumi savve luk aotem tu olketa difren chance for sharem hope bilong Kingdom long eniwan wea willing for lisin. (John 4:7-15) Iumi shud barava want for share long full wei long datfala waka fitim living bilong iumi, from Jesus hem sei: “Olketa bae talemaot disfala gud nius bilong kingdom evriwea long earth for givim witness long evri nation; and then end bae kam.”—Matthew 24:14; Ephesians 5:15-17.
15. Why nao iu ting kaonsel long 1 Corinthians 15:58 hem fitim saed long ministry bilong iumi?
15 Witim wan mind, long evri part bilong earth, nomata wanem kantri olketa stap insaed, Olketa Jehovah’s Witness share insaed disfala privilege bilong service. Olketa followim disfala Bible kaonsel wea kam from God: “Stand strong, no seksek, evritaem garem planti samting for duim insaed long waka bilong Lord, from iufala savve waka bilong iufala hem no hard waka nating long saed long Lord.”—1 Corinthians 15:58.
Review
• Taem Jesus sei for go ahed for “luk aotem firstaem Kingdom,” hem showimaot wanem nao shud kamap mek-tu samting?
• Iumi shud ting hao abaotem wei for lukaftarem olketa samting wea iumiseleva and famili needim long physical wei? Hao nao God bae helpem iumi?
• Wanem nao samfala wei iumi savve share insaed Kingdom service?
[Piksa long page 107]
Long evri kantri, Olketa Jehovah’s Witness distaem preachim gud nius, bifor end hem kam