Bible Buk Namba 63​—2 John

Man wea Raetem: Aposol John

Ples Hem Raetem: Ephesus, or klosap long there

Taem Hem Finis Raetem: c. 98 C.E.

MEK-TU leta bilong John hem short—fitim wan pis pepa nomoa—bat hem fulap witim mining. Hem for wanfala “chosen woman and long olketa pikinini bilong hem.” From “Kyria” (Greek toktok for “woman”) hem wanfala really nem long datfala taem, samfala savveman long Bible sei John hem raetem leta for disfala woman. Long narasaed, samfala tingse John hem raetem for wanfala Christian kongregeson, wea hem kolem “chosen woman.” Maet hem duim diswan for mekem pipol wea persecutim hem konfius. Sapos olsem, tok hello long “sista” wea stap long last verse bilong John hem minim pipol long narafala kongregeson. So, mek-tu leta hem no for evriwan bat luk olsem hem raetem for wanfala man or wanfala kongregeson.—Vs. 1.

² No eni reason stap for daotem John nao raetem disfala leta. Disfala man for raet kolem hemseleva wanfala “older man.” Hem barava fitim John no from hem olo nomoa, bat from hem wanfala “post” tu (Gal. 2:9) and lastfala aposol wea laef yet, hem really wanfala “older man” long Christian kongregeson. Plande savve long hem, so no eni need stap for story tumas abaotem hem for pipol wea readim leta hia. Wei wea hem raet hem klosap sem stael witim firstfala leta bilong hem and Gospel bilong John. Olsem firstfala leta, disfala mek-tu leta hem raetem long Ephesus or klosap long there, long 98 C.E. McClintock and Strong’s Cyclopedia sei olsem abaotem Mek-tu and Mek-thri John: “From tufala klosap semsem, iumi savve sei hao tufala leta hia John raetem lelebet taem nomoa bihaen hem raetem mek-wan leta from Ephesus. Tufala storyim difren point long fasin wea olketa principle stap long mek-wan leta bilong John.”a For sapotim wei wea hem tru, Irenaeus, and Clement bilong Alexandria long mek-tu century, storyim disfala leta.b And tu, Muratorian Fragment hem tok abaotem olketa leta bilong John.

³ Olsem Mek-wan John, reason for disfala leta hem bikos olketa giaman teacher againstim faith bilong olketa Christian. John laek warnim olketa mekem olketa luksavve and stap klia long olketa, taem olketa gohed for wakabaot insaed long truth, witim love for each wan.

WEI WEA HEM HELPEM IUMI

⁵ Luk olsem long taem bilong John, olsem distaem, samfala no satisfae witim isi, simpol teaching bilong Christ. Olketa laekem samting moa, samting wea mekem olketa hapi, samting wea apim olketa and mekem olketa stap semsem witim olketa bigman long world, and for kasem disfala selfish samting olketa willing for spoelem and divaedem datfala Christian kongregeson. John hem tinghae long wei wea Christian kongregeson stap long love and long olketa stretfala teaching wea wan mind witim Father and datfala Son. Iumi mas tinghae long wan mind insaed kongregeson distaem tu, and for no kaban or tok hello long eniwan wea storyim eni teaching wea no kam thru long Bible. For gohed and wakabaot fitim olketa komandment bilong God, and long hapi wea stap taem iumi kaban witim olketa tru Christian, iumi bae barava savve hao “bae iumi kasem kaenfala fasin wea man no fit for kasem, mercy and peace from God wea Father and from Jesus Christ, Son bilong Father, witim truth and love.” (Vs. 3) Mek-tu leta bilong John barava strongim disfala wan mind long olketa Christian.

[Olketa Footnote]