Bible Buk Namba 64—3 John
Man wea Raetem: Aposol John
Ples Hem Raetem: Ephesus, or klosap long there
Taem Hem Finis Raetem: c. 98 C.E.
JOHN raetem disfala leta for Gaius, wanfala faithful Christian wea John lovem tumas. Disfala nem Gaius hem wanfala nem wea plande garem long kongregeson bifor. Hem stap fofala taem long nara part long Christian Greek Scripture, wea tok abaotem thrifala or maet fofala difren man. (Acts 19:29; 20:4; Rom. 16:23; 1 Cor. 1:14) No eni information stap for showimaot klia hu nao disfala really Gaius wea John storyim. Information nomoa wea stap hem showimaot hao Gaius hem part bilong Christian kongregeson, hem wanfala spesol fren bilong John, and disfala leta for hemseleva nomoa, dastawe disfala word “iu” hem minim wanfala man.
2 From stael bilong tok hello long start and end bilong disfala leta hem semsem olsem Mek-tu John and man wea raetem talem moa hao hem wanfala “older man,” no eni daot stap hao aposol John hem raetem disfala leta. (2 John 1) From samting insaed leta and languis bilong hem showimaot hem raetem long Ephesus or klosap, long 98 C.E., olsem nara tufala leta bilong hem. From leta hia hem short, olketa man for raet bifor no talem eni samting abaotem hem, bat hem stap long olketa buk bifor bilong Bible, witim Mek-tu John.
3 Long leta bilong hem, John showimaot hem tinghae long kaenfala fasin bilong Gaius wea hem showimaot long olketa traveling brata, and hem storyim samfala trabol wea kamap witim bighed Diotrephes. Luk olsem Demetrius wea insaed disfala leta hem tekem leta for Gaius, so maet John sendem hem go and dastawe hem needim samfala help long gogo bilong hem, wea leta bae helpem hem. Iumi no savve eni samting abaotem Diotrephes and Demetrius olsem Gaius, only samting wea iumi readim long hia. Bat, disfala leta showim iumi interesting part bilong klos wei wea olketa firstfala Christian stap olsem wanfala bigfala famili. Insaed diswan tu, hem kastom for showim kaeness long olketa wea gogo “for saed long datfala nem,” nomata olketa no savve gud long each wan.—Vs. 7.
WEI WEA HEM HELPEM IUMI
5 Aposol John showimaot hem nambawan overseer saed long strong for protectim kongregeson againstim olketa nogud paoa. Love and kaenfala fasin wea stap long kongregeson hem gud tumas, and hem waka bilong olketa for keepim disfala hapi spirit, so olketa brata and “olketa stranger” (pipol wea olketa Christian no savve long olketa bifor) wea kam stap witim olketa savve serve tugeta olsem “olketa wea waka tugeta long truth.” (Vss. 5, 8) Bat, Diotrephes hem bighed, samting wea Jehovah heitim, and hem no showimaot respect long theocratic paoa, and tu, hem storyim nogud samting abaotem aposol John. (Prov. 6:16, 17) Hem trae for blokem wei wea kongregeson showimaot kaenfala Christian fasin. Dastawe John hem tok againstim disfala nogud samting and sapotim trufala Christian love long kongregeson. Distaem tu, iumi mas strong for garem hambol fasin, wakabaot long truth, and showimaot love and kaenfala fasin olsem God, wea followim principle wea John talem: “Man wea duim gudfala samting kam from God. Man wea duim nogud samting nating lukim God.”—3 John 11.