Bible Buk Namba 65​—Jude

Man wea Raetem: Jude

Ples Hem Raetem: Palestine (?)

Taem Hem Finis Raetem: c. 65 C.E.

OLKETA Christian brata bilong Jude insaed danger! Start long taem wea Christ Jesus hem dae and resurrect, olketa nogud pipol kam insaed long Christian kongregeson. Disfala enemy kam insaed long kongregeson for spoelem faith bilong olketa, olsem aposol Paul warnim olketa 14 year bifor. (2 Thess. 2:3) Hao nao olketa brata kasem warning and gard againstim disfala danger samting? Leta bilong Jude, wea strong long toktok, provaedem ansa. Jude talemaot tingting bilong hem long kliafala wei long verse 3 and 4: ‘Mi lukim need for raet long iufala bikos samfala man kam insaed, olketa man wea no followim God, wea mekem kaenfala fasin wea man no fit for kasem kamap wanfala excuse for duim olobaot fasin.’ Faondeson bilong stretfala teaching and fasin kasem test. Jude hem faet for olketa brata bilong hem, mekem olketa tu, maet faet strong for disfala faith.

² Bat hu nao Jude? Firstfala toktok hem showim hao “Jude, wanfala slave bilong Jesus Christ, bat brata bilong James, for olketa wea olketa kolem” hem raetem disfala leta. Waswe Jude, or Judas, hem wanfala aposol, from 2-fala long 12-fala first aposol bilong Jesus garem nem Judas? (Luke 6:16) Jude hem no talem hem wanfala aposol, bat hem storyim olketa aposol olsem “olketa,” bat hem no putim hemseleva insaed datfala grup. (Jude 17, 18) And tu, hem kolem hemseleva wanfala “brata bilong James,” wea minim man wea raetem leta bilong James, wea hem haf brata bilong Jesus. (Vs. 1) Olsem wanfala “post” long kongregeson long Jerusalem, evriwan savve long disfala James, dastawe Jude hem saed witim James. Diswan tu mekem Jude olsem haf brata bilong Jesus, and olketa talem olsem. (Gal. 1:19; 2:9; Matt. 13:55; Mark 6:3) Bat, Jude hem no mekius long disfala wei wea hem haf brata bilong Jesus, bat long hambol wei hem strongim wei for fren long spiritual wei olsem “wanfala slave bilong Jesus Christ.”—1 Cor. 7:22; 2 Cor. 5:16; Matt. 20:27.

³ Disfala Bible buk hem tru and for sapotim diswan, disfala Muratorian Fragment, bilong mek-tu century C.E., storyim diswan. And tu, Clement bilong Alexandria (mek-tu century C.E.) acceptim diswan olsem part bilong Bible. Abaotem diswan Origen hem sei “hem tu-thri sentence nomoa, bat fulap witim gudfala toktok wea kam from God.”a Tertullian tu talem hao hem tru. No eni daot stap, disfala leta hem mas part bilong Bible.

⁴ Jude hem raet long olketa “wea olketa kolem,” bat no talem eni kongregeson or man, so leta bilong hem for evri Christian. Nomata hem no talem, luk olsem hem raetem leta long Palestine. Hem no isi for savve gud long really date wea hem raetem. Bat, hem long taem wea Christian kongregeson muv ahed, bikos Jude hem storyim “toktok wea olketa aposol bilong Lord bilong iumi, Jesus Christ, talem bifor” and hem talem toktok from 2 Peter 3:3. (Jude 17, 18) And tu, Jude and mek-tu chapter bilong Tu Peter klosap semsem. Diswan showimaot hem raetem leta hia semtaem olsem Peter, from tufala barava tingim disfala danger samting long kongregeson long datfala taem. So, 65 C.E. hem date wea olketa markem. Samting wea sapotim disfala date hem wei wea Jude no storyim Cestius Gallus wea stopem faet bilong olketa Jew long 66 C.E., and tu hem no storyim wei wea Jerusalem finis long 70 C.E. Insaed long leta bilong Jude hem storyim klia samfala judgment bilong God againstim olketa man wea sin, and sapos Jerusalem foldaon finis, hem bae strongim disfala story bilong judgment againstim olketa from Jesus talem profesi abaotem disfala samting finis.—Jude 5-7; Luke 19:41-44.

WEI WEA HEM HELPEM IUMI

⁸ Jude hem savve Bible hem gud for givim warning, help, encouragement, instruction, and kaonselem “olketa wea mi lovem.” For showimaot olketa barava nogud sin bilong pipol wea no lovem God, Jude hem iusim olketa nambawan tokpiksa from olketa Hebrew Scripture, olsem olketa Israelite wea no lisin, olketa angel wea sin, and pipol bilong Sodom and Gomorrah, wea showimaot panis bilong olketa wea sin olsem. Hem markem nogud man witim olketa krangge animal, and hem sei olketa bae followim wei bilong Cain, mistek bilong Balaam, and for dae olsem Korah from nogud toktok. And tu, hem iusim gudfala tokpiksa from “datfala buk bilong nature.” Stretfala leta bilong Jude hem kamap part bilong “evri Scripture,” for studyim witim narafala part bilong Bible, wea strongim stretfala fasin ‘insaed olketa last day.’—Jude 17, 18, 5-7, 11-13; Num. 14:35-37; Gen. 6:4; 18:20, 21; 19:4, 5, 24, 25; 4:4, 5, 8; Num. 22:2-7, 21; 31:8; 16:1-7, 31-35.

⁹ Olketa test and persecution from pipol aotsaed nating stopem wei wea Christian Wei muv ahed, bat olketa brata stap long danger from olketa nogud samting insaed long Christian Wei. Olketa rok stap haed long daon for spoelem full kongregeson. Jude hem savve disfala danger hem moa worse, dastawe hem tok strong long wei for “faet hard for disfala faith.” Leta bilong Jude hem fitim distaem tu. Iumi needim sem warning. Iumi mas gardim faith and faet for hem tu, aotem dirty fasin, and for helpem olketa wea daot witim mercy and “pullim olketa aot from fire,” sapos iumi savve duim. For keepim faithful fasin, win long spiritual wei, and trufala worship, olketa Christian distaem mas gohed for buildimap olketa seleva long holy faith. Olketa mas followim stretfala principle and kam klosap long God thru long prea. And tu, olketa need for garem stretfala tingting abaotem olketa wea kasem “glory,” respectim paoa wea God givim insaed long Christian kongregeson.—Jude 3, 23, 8.

¹⁰ “Man wea olsem animal, wea no garem spiritual fasin,” no savve go insaed Kingdom bilong God and savve bringim danger samting long narafala pipol wea gohed for trae kasem laef olowe. (Jude 19; Gal. 5:19-21) Kongregeson mas kasem warning abaotem olketa, and mas aotem olketa! Dastawe, “mercy and peace and love” kamap moa big long olketa wea hem lovem, and olketa bae keepim olketa seleva long love bilong God, ‘taem olketa weitim mercy bilong Lord bilong olketa, Jesus Christ, and tingim laef olowe.’ God Wea Sevem iumi bae putim olketa wea bae kasem Kingdom olsem “klin front long glory bilong hem witim bigfala hapi.” Tru nao olketa joinim Jude and givim “glory, strong and paoa” long Hem thru long Jesus Christ.—Jude 2, 21, 24, 25.

[Footnote]