CHAPTER 7
Olketa Meeting wea Encouragem Iumi for “Showimaot Love and Duim Gud Samting”
FOR staka handred year, pipol blo Jehovah organize for hipap tugeta. Lo Israel bifor, evri male go lo Jerusalem for thrifala big festival. (Deut. 16:16) Lo first century, olketa Christian hipap evritaem and staka taem olketa duim datwan lo haos blo samwan. (Philem. 1, 2) Distaem iumi enjoyim olketa meeting, assembly, and convention. Why nao olketa servant blo God hipap tugeta? Main reason hem bikos hem important part lo worship blo iumi.—Ps. 95:6; Col. 3:16.
2 Olketa meeting helpem tu olketa wea attend. Lo evri mek-seven Festival blo Olketa Smol Leaf Haos, diswan nao wat olketa Israelite mas duim: “Kolem kam pipol hia tugeta, olketa man, olketa woman, olketa pikinini, and olketa foreigner wea stap insaed olketa taon blo iufala mekem olketa savve lisin and lane abaotem Jehovah, God blo iufala, and fraet lo hem and followim gud evri toktok wea stap insaed disfala Law.” (Deut. 31:12) Hem klia, important reason for hipap tugeta hem for ‘Jehovah teachim iumi.’ (Isaiah 54:13) Lo meeting, iumi garem chance for savve lo each other and kasem encouragement taem iumi associate tugeta.
OLKETA KONGREGESON MEETING
3 Afta Pentecost 33 C.E. olketa disaepol gohed hipap tugeta for lisin lo teaching blo olketa aposol and “evriday olketa hipap tugeta long temple.” (Acts 2:42, 46) Afta datwan, taem olketa Christian hipap tugeta for worship, olketa savve readim Bible and olketa leta wea olketa aposol and olketa nara disaepol raetem. (1 Cor. 1:1, 2; Col. 4:16; 1 Thess. 1:1; Jas. 1:1) Kongregeson savve prea tugeta tu. (Acts 4:24-29; 20:36) Samfala taem olketa missionary savve storyim experience blo olketa. (Acts 11:5-18; 14:27, 28) Olketa storyim important teaching lo Bible and hao olketa profesi fulfill. Olketa givim tok abaotem hao for worship and wei wea wanfala Christian shud garem. Evriwan kasem encouragement for strong for talemaot gud nius.—Rome 10:9, 10; 1 Cor. 11:23-26; 15:58; Eph. 5:1-33.
Lo olketa last day distaem wea no isi, iumi needim moa encouragement from wei for hipap tugeta evritaem
4 Olketa Christian meeting distaem hem semsem witim olketa meeting lo taem blo olketa aposol. Iumi followim wat Hebrew 10:24, 25 talem: “Iumi mas barava tingim narawan . . . , no misstim wei for hipap tugeta olsem samfala savve duim, bat encouragem narawan and gohed for duim datwan moa taem iufala lukim datfala day hem kakam klosap.” Lo olketa last day distaem wea no isi, iumi needim moa encouragement from wei for hipap tugeta evritaem mekem iumi gohed strong lo spiritual wei. (Rome 1:11, 12) Iumi olketa Christian stap witim pipol wea garem nogud wei. Iumi rejectim wat pipol lo world laekem. (Phil. 2:15, 16; Titus 2:12-14) Tru tumas, no eni ples moa hem gud winim for associate witim pipol blo Jehovah. (Ps. 84:10) And no eni samting hem gud winim for studyim and storyim toktok blo God. Tingim olketa meeting iumi garem wea mekem iumi kasem gud samting.
WEEKEND MEETING
5 First part blo weekend meeting hem wanfala Bible tok wea hem for pablik, samfala hem firstaem blo olketa for attendim meeting. Pablik tok barava helpem spiritual saed blo olketa wea just kam lo meeting and olketa pablisa lo kongregeson.—Acts 18:4; 19:9, 10.
6 Christ Jesus, olketa aposol and pipol wea stap witim olketa, duim pablik meeting lo sem wei wea olketa kongregeson blo Olketa Jehovah’s Witness duim distaem. Jesus nao hem nambawan man for givim tok lo disfala earth. Olketa sei olsem abaotem hem: “Ei, taem disfala man hem toktok, no eniwan hem fitim hem nao.” (John 7:46) Hao Jesus story mekem pipol wea lisin barava sapraes from hem garem savve and paoa (Matt. 7:28, 29) Olketa wea letem toktok blo hem for kasem heart blo olketa nomoa kasem gud samting. (Matt. 13:16, 17) Olketa aposol followim example blo hem. Lo Acts 2:14-36, iumi read abaotem tok blo Peter lo Pentecost 33 C.E. Datwan mekem staka thousand for followim wat olketa herem. Bihaen, samfala biliv afta olketa lisin lo tok blo Paul lo Athens.—Acts 17:22-34.
7 Distaem tu staka million pipol kasem gud samting from pablik tok wea kamap lo olketa kongregeson evri week and lo olketa assembly and convention. Olketa tok hia helpem iumi for savve lo olketa Bible teaching and encouragem iumi for strong for duim Kingdom waka. Taem iumi invaetem olketa wea interest and olketa narawan, iumi helpem olketa for minim olketa main Bible teaching.
8 Pablik tok storyim olketa difren subject. Olketa tok hia storyim olketa difren Bible teaching and profesi, Bible principle and advaes abaotem famili laef and marit, olketa problem wea affectim olketa young wan, and wei wea olketa Christian shud garem. Samfala tok storyim olketa nambawan creation blo Jehovah. Olketa nara tok storyim olketa example lo Bible abaotem faith, wei for no fraet, and for faithful, and wat iumi savve lanem from example blo olketa.
9 For kasem gud samting from olketa pablik tok, hem important for lisin gud, faendem olketa scripture wea speaker talem, and luk followim taem hem readim and explainim. (Luke 8:18) If iumi duim olsem, iumi bae disaed strong for followim wat iumi lanem.—1 Thess. 5:21.
10 If staka brata stap for givim tok, kongregeson bae garem tok evri week. Staka taem olketa brata from difren kongregeson nao kam for givim tok. Nomata staka brata no stap for givim tok, olketa shud trae for givim olketa pablik tok.
11 Mek-tu part blo weekend meeting hem Wastaoa Study, wea hem kwestin and ansa part blo olketa article lo Wastaoa study edition. Thru lo Wastaoa, Jehovah provaedem spiritual kaikai for iumi lo barava taem.
12 Olketa article wea iumi studyim evritaem storyim hao for followim olketa Bible principle. Hem helpem olketa Christian for no garem “tingting bilong pipol long disfala world” and olketa wei wea no klin. (1 Cor. 2:12) Wastaoa helpem iumi for garem stret savve abaotem olketa Bible teaching and hao olketa profesi fulfill, datwan mekem iumi savve lo olketa niu mining blo truth. (Ps. 97:11; Prov. 4:18) Taem iumi attendim Wastaoa Study and givim koment, hem helpem iumi for hapi lo hope blo iumi lo raeteous niu world blo Jehovah. (Rome 12:12; 2 Pet. 3:13) For associate witim olketa brata and sista helpem iumi for garem olketa wei blo spirit and strongim wei wea iumi laek sevem Jehovah. (Gal. 5:22, 23) Hem helpem iumi for no givap lo olketa hard taem and buildim “gudfala faondeson for future” mekem iumi “hol strong lo datfala tru laef.”—1 Tim. 6:19; 1 Pet. 1:6, 7.
13 Wat nao iumi savve duim for kasem gud samting from spiritual kaikai hia? Iumi shud prepare firstaem, nomata iumi seleva or witim famili, chekim evri scripture, and koment lo own toktok blo iumi lo taem blo meeting. Diswan bae mekem truth kasem heart blo iumi, and olketa narawan bae kasem gud samting taem olketa herem iumi storyim faith blo iumi. Taem iumi lisin gud lo koment blo narawan, iumi bae kasem gud samting from study each week.
MIDOL WEEK MEETING
14 Evri week kongregeson meet lo Kingdom Hall for program wea olketa kolem lo Christian Laef and Ministry blo Iumi. Meeting hia garem thrifala part for helpem iumi “fit” for duim waka blo God. (2 Cor. 3:5, 6) Schedule and olketa samting for storyim hem stap lo Christian Laef and Ministry blo Iumi—Meeting Buk. Laef and Ministry Meeting Buk garem tu idea for iusim lo ministry.
15 First part blo meeting hem Gud Samting From Bible, wea bae helpem iumi for minim baekgraon blo olketa story lo Bible and for lane hao for followim. Part hia garem wanfala tok, Bible reading, and wanfala kwestin and ansa part wea base lo Bible reading for datfala week. Olketa piksa, video and worksheet for helpem iumi minim olketa story hia hem stap tu lo Laef and Ministry Meeting Buk. Disfala wei for studyim olketa deep samting lo Bible helpem iumi lo laef and for teach gud, mekem iumi “barava fit, and redi for duim evri gudfala waka.”—2 Tim. 3:16, 17.
16 Mek-tu part blo meeting, Duim Gud Ministry blo Iu, givim iumi chance for practice for ministry and for impruv lo hao for preach and teach. Hem garem olketa student assignment and olketa video wea showim idea for ministry. Disfala part helpem iumi for savve wat for talem mekem iumi “savve hao for story lo man wea taed witim gudfala toktok.”—Isa. 50:4.
17 Mek-thri part, Laef blo Christian, storyim hao iumi savve followim olketa Bible principle evriday. (Ps. 119:105) Main part lo meeting hia hem Kongregeson Bible Study. Olsem Wastaoa Study, Kongregeson Bible Study hem kwestin and ansa part.
18 Taem iumi kasem wanfala niu Laef and Ministry Meeting Buk, overseer blo Laef and Ministry Meeting, or assistant blo hem bae lukluk gud lo hem and mekem wanfala schedule. Each week, wanfala elder wea savve hao for teach and body of elders appruvim bae chairman lo meeting. Hem bae mek sure meeting hem start and finis lo taem and for talem thankiu and givim kaonsel lo olketa student wea duim assignment.
19 Taem iumi prepare evritaem, attendim, and tekpart lo Laef and Ministry Meeting, iumi bae savve lo olketa Scripture, minim olketa Bible principle, no fraet for preach, and savve gud hao for mek disaepol. Olketa wea attendim meeting and no baptaes yet kasem gud samting tu from wei for associate tugeta and olketa spiritual samting wea iumi storyim lo meeting. For helpem iumi prepare for disfala meeting and olketa nara meeting, iumi savve mekius lo Watchtower Library, JW Library®, Watchtower ONLINE LIBRARY™ (if hem stap lo languis blo iu), and library wea stap lo Kingdom Hall. Library lo Kingdom Hall garem olketa pablikeson blo Olketa Jehovah’s Witness, Research Index for Olketa Jehovah’s Witness, and olketa nara difren Bible transleison, concordance, dictionary, and olketa nara buk for duim research. Eniwan savve iusim library hia bifor or afta meeting.
MEETING FOR FIELD SERVICE
20 Samfala taem lo week and lo weekend, samfala grup lo olketa pablisa savve meet for field service. Staka taem olketa savve meet lo haos blo wanfala pablisa or lo eni ples wea fitim. Olketa savve meet lo Kingdom Hall tu. For garem olketa smol grup lo olketa difren ples lo territory savve mekem hem isi for olketa pablisa go lo ples for meet for preaching and lo territory. Olketa pablisa savve kwiktaem for organize and no delay for go lo territory. Grup overseer savve lukaftarem gud tu olketa lo grup blo hem. Nomata hem gud for olketa grup meet lo olketa difren ples, samfala taem situation savve kamap wea mekem olketa grup for meet tugeta. For example, if tu-thri pablisa nomoa joinim ministry lo midol week, bae hem gud for evri grup meet tugeta lo Kingdom Hall or lo eni ples wea fitim. Datwan bae mekem pablisa for garem samwan for waka witim. Kongregeson maet faendem hem gud for meet lo Kingdom Hall lo olketa pablik holiday. Or kongregeson savve chus for combine for meet for field service afta Wastaoa Study.
21 If olketa grup meet separate, grup overseer nao bae conductim meeting for field service. Samfala taem, grup overseer savve assignim assistant blo hem or nara brata wea qualify for leadim grup. Conductor shud prepare gud for storyim samting wea bae helpem iumi lo field ministry. Afta olketa divaedem olketa pablisa and talem territory, wanfala lo grup bae prea. Grup bae go for duim datfala territory. Olketa meeting hia shud gohed for faev tu seven minutes bat hem shud short moa if olketa meet afta kongregeson meeting. Olketa shud givim encouragement, idea, and direction for olketa wea go lo preaching. Olketa niu wan or olketa narawan wea maet needim help savve waka witim olketa experience pablisa for kasem training.
MEETING ARRANGEMENT FOR NIU OR SMOL KONGREGESON
22 From staka moa kamap disaepol, namba blo kongregeson hem increase. Staka taem circuit overseer nao bae givim application for wanfala niu kongregeson. Bat lo samfala situation, hem gud for olketa smol grup joinim eni kongregeson wea stap klosap.
23 Samfala taem, olketa smol kongregeson garem olketa sista nomoa. Taem olsem, sista wea prea or conductim meeting mas kavarem hed blo hem for followim wat Bible talem. (1 Cor. 11:3-16) Staka taem hem bae sidaon and feis go lo grup. Olketa sista no givim tok lo olketa meeting. Bat olketa savve readim and storyim olketa pablikeson wea organization provaedem, or for hem interesting, olketa maet discussim tugeta or duim wanfala demonstration. Branch office bae markem wanfala sista for lukaftarem olketa leta from branch and for conductim olketa meeting. Then taem samfala brata qualify for duim datwan, olketa nao bae lukaftarem olketa waka hia.
OLKETA CIRCUIT ASSEMBLY
24 Each year, arrangement stap for olketa kongregeson lo sem circuit hipap tugeta for tufala wan day circuit assembly. Olketa program olsem mekem olketa wea attend garem chance for “showimaot love” taem olketa associate tugeta. (2 Cor. 6:11-13) Organization blo Jehovah tingim need blo olketa brata and sista taem olketa redyim theme and olketa part lo olketa program hia. Olketa givim information hia thru lo olketa tok, demonstration, video wea olketa actim, and olketa interview. Diswan strongim olketa wea attend. Olketa assembly hia givim chance for olketa niu disaepol for baptaes for showim olketa dedicate lo Jehovah.
OLKETA REGIONAL CONVENTION
25 Wantaem each year, hem garem wanfala big hipap. Diswan hem regional convention wea gohed for thrifala day and olketa kongregeson from difren circuit nao attend. Olketa branch wea no lukaftarem staka kongregeson faendem hem gud for evri kongregeson lo datfala branch territory hipap lo wan ples nomoa. Lo samfala kantri, arrangement for olketa hipap hia hem depend lo situation or direction from organization. Samfala taem, international or spesol convention savve kamap lo samfala kantri and staka thousand Witness from olketa difren kantri nao savve attend. Kasem distaem, staka lanem gud nius abaotem Kingdom bikos lo samting wea olketa lukim lo olketa big hipap blo Olketa Jehovah’s Witness.
26 For pipol wea dedicate lo Jehovah, convention hem taem wea olketa hapi for worship tugeta and kasem olketa niu wei for minim olketa Bible truth. Lo samfala convention, olketa releasem olketa niu pablikeson for study seleva, studyim lo kongregeson, or for iusim lo ministry. Baptism savve kamap tu lo olketa convention. Olketa convention hem important for strongim iumi lo spiritual wei. Diswan pruvim pipol blo Jehovah part lo wanfala famili evriwea lo world wea showim olketa nao disaepol blo Jesus Christ.—John 13:35.
27 Taem iumi attendim olketa kongregeson meeting and assembly and convention blo pipol blo Jehovah, datwan strongim iumi for duim wat Jehovah laekem. Hem protectim iumi tu from olketa samting lo world wea savve spoelem faith blo iumi. Olketa hipap hia givim glory and praise lo Jehovah. (Ps. 35:18; Prov. 14:28) Iumi thankiu lo Jehovah from hem provaedem olketa spiritual program olsem for strongim pipol wea dedicate lo hem lo taem blo end.
EVENING KAIKAI BLO LORD
28 Wantaem evri year lo anniversary lo dae blo Jesus Christ, evri kongregeson blo Olketa Jehovah’s Witness evriwea lo world duim Memorial blo dae blo Christ, or Evening Kaikai blo Lord. (1 Cor. 11:20, 23, 24) Lo olketa meeting wea kamap evri year, diswan hem barava important meeting for pipol blo Jehovah. Iumi kasem komand to duim Memorial.—Luke 22:19.
29 Day blo Memorial hem semsem olsem day blo Pasova wea Bible storyim. (Ex. 12:2, 6; Matt. 26:17, 20, 26) Pasova hem celebration wea olketa Israelite duim evri year for tingim taem wea olketa free from Egypt lo 1513 B.C.E. Lo datfala taem Jehovah markem mek-14th day lo first month blo olketa, olsem date wea olketa kaikaim Pasova sheepsheep and free from Egypt. (Ex. 12:1-51) For savve lo date hia, olketa savve kaontem 13-fala day from taem blo niu moon klosap lo spring season wea day and naet blo hem long semsem, wea olketa lo Jerusalem savve lukim. Staka taem Memorial savve kamap lo first full moon bihaen datfala season.
30 Matthew 26:26-28 sei Jesus laekem iumi for duim Memorial. Hem no samting wea join witim spiritism bat hem kaikai wea garem mining and olketa wea bae rul witim Jesus Christ lo Kingdom nao kaikaim. (Luke 22:28-30) Olketa nara Christian wea dedicate and wea interest kasem encouragement tu for attendim disfala Evening Kaikai blo Lord nomata olketa no kaikaim. Taem olketa attend hem showim olketa tinghae lo wei wea Jehovah God iusim Son blo hem, Jesus Christ, for mekem iumi kasem gud samting. Bifor Memorial wanfala spesol tok bae kamap for helpem pipol luk forward for disfala program and mekem olketa wea interest for studyim Bible.
31 Olketa Jehovah’s Witness hapi and luk forward for taem wea olketa bae hipap tugeta lo olketa meeting, wea iumi savve “tingim narawan mekem iumi savve encouragem olketa for showimaot love and duim olketa gudfala samting.” (Heb. 10:24) Wakaman wea faithful and wise redi evritaem for provaedem olketa meeting hia wea fitim spiritual need blo iumi. Evri pipol blo Jehovah and olketa wea interest kasem encouragement for attendim meeting evritaem. Taem pipol blo Jehovah showim olketa barava tinghae lo olketa samting wea Jehovah provaedem thru lo organization blo hem, datwan mekem olketa for wan mind. And important samting, iumi praisem and givim glory lo Jehovah.—Ps. 111:1.