Olketa Ministerial Servant Duim Important Waka

APOSOL Paul raet go lo kongregeson lo Philippi, and hem sei: “Mi Paul witim Timothy, wea mitufala wakaman bilong Christ Jesus, raet kam long iufala olketa holy wan wea wan mind witim Christ Jesus, and long olketa elder and ministerial servant wea stap long Philippi.” (Phil. 1:1) Lukim hem storyim tu olketa ministerial servant lo leta blo hem. Lo datfala taem olketa man hia duim important waka for helpem olketa elder lo kongregeson. Distaem hem olsem tu. Olketa Ministerial servant duim staka waka for helpem olketa elder and datwan mekem kongregeson for organize.

² Hao, iu savve lo olketa ministerial servant lo kongregeson blo iu? Hao, iu luksavve lo waka wea olketa duim for helpem iu and kongregeson? Jehovah tinghae lo hard waka blo olketa man hia. Paul sei: “Olketa man wea duim gud waka bilong olketa garem gudfala nem and olketa barava free for story long narawan abaotem faith bilong olketa long Christ Jesus.”​—1 Tim. 3:13.

REQUIREMENT FROM BIBLE FOR OLKETA MINISTERIAL SERVANT

³ Olketa ministerial servant mas followim olketa standard lo Bible lo laef blo olketa, mas willing for duim waka, and mas duim gud assignment blo olketa. Iumi savve lo datwan taem iumi tingim wat Paul talem lo leta blo hem for Timothy abaotem qualification wea olketa mas kasem: “Olketa ministerial servant mas garem mature tingting, tok tru evritaem, no drinkim tumas wine, and no greedy for kasem samting for olketa seleva. Olketa mas garem gudfala konsens and followim olketa tru teaching, wea datwan hem wanfala holy secret bilong God. Testim olketa man olsem firstaem for lukim sapos olketa fit, and sapos no eniwan accusim olketa long eni samting, then olketa savve ministerial servant nao. Olketa ministerial servant mas garem wanfala waef nomoa and lukaftarem gud olketa pikinini and evriwan wea stap long haos.” (1 Tim. 3:8-10, 12) Taem olketa ministerial servant followim olketa standard hia, datwan mekem pipol for no accusim kongregeson.

⁴ Olketa ministerial servant strong for duim ministry evri month nomata olketa young or olo. Olketa followim example blo Jesus for strong lo ministry. Wei for duim olsem showim Jehovah barava laek for sevem olketa man.​—Isa. 9:7.

⁵ Olketa ministerial servant showim gud example tu lo hao olketa dressap, toktok, and wei blo olketa. Olketa garem gudfala tingting wea datwan mekem olketa narawan respectim olketa. And tu, olketa barava tinghae lo frenship blo olketa witim Jehovah and privilege wea olketa garem lo kongregeson.​—Titus 2:2, 6-8.

⁶ Olketa testim olketa man olsem “for lukim sapos olketa fit.” Nomata bifor olketa kasem appointment, olketa duim samting wea showim olketa fit for duim datfala waka. Olketa showim olketa putim Kingdom first lo laef blo olketa and reach aot for eni privilege wea olketa bae kasem lo kongregeson. Tru nao, olketa showim gud example for olketa narawan lo kongregeson.​—1 Tim. 3:10.

WAKA BLO OLKETA

⁷ Olketa ministerial servant duim staka difren waka for helpem olketa brata and sista and datwan helpem olketa elder for garem moa taem for duim teaching and shepherding. Taem body of elders givim assignment lo olketa ministerial servant, olketa lukluk lo wat each wan fit for duim and need blo kongregeson.

⁸ Tingim samfala lo olketa waka hia: Wanfala ministerial servant maet kasem assignment for lukaftarem literature mekem iumiseleva iusim and for field ministry. Samfala kasem assignment for keepim accounts blo kongregeson or territory record. Olketa narawan kasem assignment for lukaftarem microphone, operatim saond equipment, attendant, and helpem olketa elder lo olketa nara samting. Staka waka stap for lukaftarem Kingdom Hall and klinim evritaem, so staka taem olketa savve askem olketa ministerial servant for help for lukaftarem olketa waka hia.

⁹ Lo samfala kongregeson, olketa garem inaf ministerial servant for duim olketa difren waka hia. Bat lo samfala ples maet wanfala ministerial servant mas lukaftarem tu-thri waka. Samfala taem, winim wanfala ministerial servant maet lukaftarem wanfala waka. If no inaf ministerial servant stap for lukaftarem olketa waka hia, body of elders savve arrange for samfala brata wea baptaes finis and wea showim gud example for duim olketa waka hia. Datwan bae helpem olketa for garem experience and gogo olketa bae qualify for kasem appointment olsem ministerial servant. If olketa brata no stap, olketa elder bae askem wanfala sista wea showim gud example for help for duim samfala lo olketa waka hia nomata hem bae no kasem appointment for ministerial servant. Samwan wea showim gud example hem samwan wea garem gudfala wei and fren gud witim Jehovah and olketa narawan savve followim example blo hem. Hem showim gud example lo wei for attendim meeting evritaem, share lo ministry, stap gud witim famili, chusim gud entertainment, hao hem dressap and olketa nara samting.

¹⁰ Lo olketa kongregeson wea no garem staka elder, olketa savve askem ministerial servant wea fit for reviewim olketa kwestin abaotem olketa main Bible teaching witim olketa wea bae baptaes. Olketa kwestin hia stap lo Appendix “Part 1: Wanem Olketa Christian Bilivim.” From “Part 2: Laef blo Christian” storyim olketa samting abaotem laef blo each wan, wanfala elder nao shud duim disfala sekson.

¹¹ Samfala taem body of elders maet faendem hem gud for changem assignment blo wanfala ministerial servant for duim nara waka. Bat hem barava gud for olketa brata hia duim sem assignment for lelebet longtaem mekem olketa savve gud hao for duim.

¹² Lo samfala kongregeson, olketa ministerial servant wea “evriwan lukim wei wea [olketa] gohed kamap strongfala Christian” kasem assignment for duim samfala moa responsibility. (1 Tim. 4:15) If no inaf elder stap, wanfala ministerial servant maet kasem assignment for waka olsem assistant grup overseer or samfala taem waka olsem grup servant anda lo direction blo olketa elder. Olketa ministerial servant savve kasem assignment for lukaftarem samfala part lo Laef and Ministry Meeting, olsem for conductim Kongregeson Bible Study taem need kamap and givim olketa pablik tok. Olketa ministerial servant savve duim tu olketa nara waka taem need kamap bat olketa mas kasem olketa requirement for duim datfala assignment. (1 Pet. 4:10) Olketa ministerial servant shud willing for helpem olketa elder.

¹³ Nomata waka blo olketa hem difren from waka wea olketa elder duim, hem part lo holy service blo olketa for God and hem important bikos datwan mekem evri samting lo kongregeson gohed gud. Gogo, if olketa ministerial servant duim gud waka blo olketa and qualify for waka olsem shepherd and for teach, olketa savve kasem recommendation for elder.

¹⁴ If iu wanfala brata wea teenager or just baptaes, hao iu reach aot for qualify for ministerial servant? (1 Tim. 3:1) From staka pipol kam insaed truth evri year, iumi needim olketa spiritual man wea qualify for lukaftarem olketa waka lo kongregeson. Iu savve reach aot taem iu willing for helpem olketa narawan. Wanfala wei for duim diswan hem for ting raonem gud example blo Jesus. (Matt. 20:28; John 4:6, 7; 13:4, 5) Taem iu experiencem hapi from iu helpem olketa narawan, iu bae laek for gohed duim datwan. (Acts 20:35) So volunteer for helpem olketa narawan, help for duim maintenance lo Kingdom Hall, or volunteer for duim wanfala student assignment lo Laef and Ministry Meeting. For reach aot hem includim tu for garem olketa gudfala wei wea Christian shud garem taem man garem gud schedule for duim study seleva. (Ps. 1:1, 2; Gal. 5:22, 23) And tu wanfala brata wea reach aot, showim hem willing for duim waka and faithful taem hem kasem assignment lo kongregeson.​—1 Cor. 4:2.

¹⁵ Olketa ministerial servant kasem appointment from holy spirit for kongregeson kasem gud samting. Evriwan lo kongregeson showim olketa tinghae lo hard waka blo olketa ministerial servant lo wei for waka tugeta witim olketa taem olketa duim assignment blo olketa. Lo wei olsem, kongregeson bae showim olketa tinghae lo wat Jehovah provaedem for mekem pipol blo hem organize.​—Gal. 6:10.