CHAPTER 11
Why Nao Staka Nogud Samting Kasem Iumi?
1, 2. Wanem nao samfala kwestin wea staka pipol tingting abaotem?
EVRIDAY iumi herem nius abaotem olketa nogud samting wea happen raonem world. Olsem example, wanfala tsunami distroem wanfala vilij. Wanfala man tekem gun and sutsut insaed wanfala church wea fulap witim pipol, samfala long olketa garekil, and samfala dae. Cancer kasem wanfala woman and hem dae from faevfala pikinini bilong hem.
2 From disaster and olketa nogud samting olsem happen, staka pipol laek for savve, Why nao kaen samting olsem happen? Why nao pipol heitim tumas olketa narawan? Why nao olketa nogud samting kasem pipol? Maet iu tu tingting abaotem olketa kwestin olsem.
3, 4. (a) Wanem nao samfala kwestin wea Habakkuk askem? (b) Wanem nao Jehovah talem long hem?
3 Bible storyim olketa man wea faithful long God tu askem olketa kwestin olsem. Olsem example, profet Habakkuk askem Jehovah: “?Waswe nao yu letem mi fo lukim olketa ravis samting ya? ?Hao nao yu save letem olketa ravis samting i gohed fo hapen olsem, bat no duim nomoa enisamting fo stopem? Evriwea raonem mi, pipol i gohed fo kilim man dae, an gohed fo spoelem evrisamting. Long evri ples, pipol i gohed fo raoa, an gohed fo faet.”—Habakuk 1:3.
4 Long Habakuk 2:2, 3, hem storyim ansa bilong God for olketa kwestin hia and promis bilong Jehovah for stretem datwan. Jehovah lovem tumas iumi olketa man. Bible sei: “Hem tingim iufala.” (1 Peter 5:7) Sapos iumi heitim olketa nogud samting wea happen, masbi Jehovah tu barava heitim olketa nogud samting hia. (Aesaea 55:8, 9) So distaem bae iumi storyim disfala kwestin, Why nao staka nogud samting kasem iumi olketa man?
WHY NAO STAKA NOGUD SAMTING KASEM IUMI?
5. Wanem nao staka bigman long religion talem abaotem olketa nogud samting wea happen, and wanem nao Bible talem?
5 Staka taem, olketa pastor, priest, and olketa nara bigman long religion sei hem will bilong God for olketa nogud samting kasem pipol. Samfala pipol sei God disaedem finis evri samting wea happen long wanfala man, insaed diswan hem olketa nogud samting tu, and iumi hard for minim why hem disaed olsem. Olketa narawan sei evriwan wea dae, nomata olketa pikinini tu, olketa dae mekem olketa savve stap witim God long heven. Bat datwan hem no tru. Jehovah no mekem olketa nogud samting for happen. Bible sei: “God hu hemi garem evri paoa, hemi no save duim eni ravis samting!”—Job 34:10.
6. Why nao staka pipol blamem God for evri nogud samting wea happen long world?
6 Staka pipol blamem God for evri nogud samting wea happen long world bikos olketa tingse God nao rulim world. Bat long Chapter 3 iumi lanem Satan nao hem rulim world.
7, 8. Why nao staka nogud samting happen raonem world?
7 Bible sei “full world hem stap long paoa bilong Satan.” (1 John 5:19) Satan wea rulim disfala world hem barava raf and no kea long eniwan. Hem “laea long evriwan long earth.” (Revelation 12:9) Staka pipol followim wei bilong hem. Hem nao wanfala reason why pipol raonem world savve laea tumas, barava heitim narawan, and raf fogud.
8 Olketa nara reason tu stap. Taem Adam and Eve bighed againstim God, tufala sin and evri pikinini bilong tufala tu born witim sin. And bikos evriwan garem sin, olketa savve duim samting wea savve spoelem narawan. Staka taem pipol laek for winim olketa narawan. Olketa savve faetem narawan, go faet long war, and laek for kontrolem nara pipol. (Eklesiastes 4:1; 8:9) Samfala taem pipol kasem nogud samting bikos “trabol bae hemi kasem yumi long taem wea yumi no tingim.” (Eklesiastes 9:12) Olketa accident and nogud samting savve seknomoa happen long pipol.
9. Wanem nao mekem iumi savve Jehovah garem gudfala reason for letem olketa nogud samting for happen?
9 No enitaem Jehovah mekem nogud samting for kasem eniwan. Hem no stret for iumi sei God nao bihaenem olketa war, crime, and wei for spoelem nara pipol. God no mekem olketa disaster olsem earthquake, cyclone, and flood for kasem pipol. Bat maet iu garem tingting olsem, ‘From Jehovah nao garem bigfala paoa winim eniwan long disfala universe, why nao hem no stopem olketa nogud samting olsem for happen?’ Iumi savve God hem lovem iumi tumas, so masbi hem garem gudfala reason for letem olketa nogud samting hia for gohed.—1 John 4:8.
WHY NAO GOD LETEM OLKETA NOGUD SAMTING FOR HAPPEN?
10. Wanem nogud samting nao Satan talem abaotem Jehovah?
10 Devil hem laea long Adam and Eve long garden bilong Eden. Satan sei God hem wanfala nogud Ruler. Hem sei God no laekem Adam and Eve for kasem gud samting. Satan laekem tufala for tingse hem nao bae gudfala ruler winim Jehovah, and tufala no needim God.—Jenesis 3:2-5. Lukim Endnote 27.
11. Wanem important kwestin nao iumi mas kasem ansa for hem?
11 Adam and Eve disobeyim Jehovah and againstim hem. Tufala tingse tufala garem raet for disaedem seleva wanem hem stret and wanem hem no stret. So wanem nao Jehovah bae duim for pruvim tingting wea tufala garem hem no stret, and Hem nao savve long best samting for iumi olketa man?
12, 13. (a) Why nao Jehovah no finisim Adam and Eve long semtaem wea tufala againstim hem? (b) Why nao Jehovah letem Satan for rulim world, and for olketa man rulim olketa seleva?
12 Jehovah no finisim Adam and Eve long semtaem wea tufala againstim hem. Bat hem letem tufala for bornem olketa pikinini. Then Jehovah givim chance long olketa pikinini bilong Adam and Eve for chusim hu nao olketa laek for sapotim rul bilong hem. Plan bilong Jehovah hem for evri perfect pipol nao stap long earth, and hem nao samting wea bae happen nomata Devil trae for duim eni samting for stopem datwan.—Jenesis 1:28; Aesaea 55:10, 11.
13 Satan hem sei Jehovah no garem raet for rul front long staka handred million angel. (Job 38:7; Revelation 5:11) So Jehovah givim taem long Satan for pruvim sapos wanem hem talem hem tru or nomoa. Jehovah givim taem long olketa man tu for garem olketa difren kaen gavman insaed world wea Satan rulim, for pruvim sapos olketa fit for rulim olketa seleva or olketa needim God.
14. Evri samting wea happen long world pruvim wanem?
14 Olketa man rul for staka thousand year finis bat olketa no fit for rulim olketa seleva. Evri samting wea happen long world pruvim Satan hem laea. Iumi olketa man barava needim God for rulim iumi. Profet Jeremiah hem talem tru samting, taem hem sei: “Jehovah, mi luksavve man no garem savve for disaedem stretfala samting long laef bilong hemseleva. Man no fit for lead bat hem needim iu nao for leadim hem.”—Jeremiah 10:23, NW.
WHY NAO JEHOVAH WEIT LONGTAEM TUMAS?
15, 16. (a) Why nao Jehovah letem olketa nogud samting gohed for longtaem tumas? (b) Why nao Jehovah no stretem olketa nogud samting wea kamaot from rul bilong Satan?
15 Why nao Jehovah letem olketa nogud samting gohed for longtaem tumas? Why nao hem no stopem olketa nogud samting for happen? Hem tek longtaem for pruvim Satan hem no fit for rul. Olketa man traem enikaen difren gavman, bat olketa no fit for rulim olketa seleva. Nomata olketa man garem bigfala savve saed long science and technology, staka samting wea happen no followim justice, staka pipol olketa poor, crime hem big tumas, and war hem gohed long staka ples. Evri samting hia kamap worse winim enitaem bifor. Diswan showimaot iumi olketa man no fit for rulim iumiseleva bat iumi needim God.
16 Nomata olsem, Jehovah no stretem olketa nogud samting wea kamaot from rul bilong Satan. Sapos God duim datwan, hem olsem God sapotim rul bilong Satan. And tu, bae olketa man tingse olketa fit for rulim olketa seleva, wea hem nao samting wea Satan talem. Bat datwan hem no tru, and Jehovah bae no duim eni samting for sapotim laea samting wea Satan talem. Jehovah no savve laea.—Hebrew 6:18.
17, 18. Wanem nao Jehovah bae duim for stretem evri nogud samting wea kamaot from rul bilong Satan?
17 Waswe, Jehovah savve stretem evri nogud samting wea kamaot from rul bilong Satan and olketa man? Yes, Jehovah savve duim. No eni samting hem hard long hem. Jehovah savve long taem wea evriwan bae luksavve wanem Satan talem, hem no tru. Then bae hem finisim evri nogud samting wea happen, and mekem earth kamap paradaes, wea datwan nao firstfala plan bilong hem. Evriwan wea stap “insaed long grev” bae laef bak. (John 5:28, 29) Pipol bae no sik or dae moa. Jehovah bae iusim Jesus for finisim evri nogud samting wea kamaot from rul bilong Satan. Jesus bae “finisim evri samting wea Devil hem duim.” (1 John 3:8) Iumi hapi tumas from Jehovah hem patient witim iumi mekem iumi garem chance for savve long hem, and for iumi disaedem sapos iumi bae sapotim rul bilong hem or nomoa. (Readim 2 Peter 3:9, 10.) Nomata olketa nogud samting kasem iumi, Jehovah bae helpem iumi for no givap.—John 4:23; readim 1 Corinth 10:13.
18 Jehovah no forcem iumi for sapotim rul bilong hem. Hem wakem iumi olketa man witim wei for disaedem samting seleva. Bae iumi storyim wanem iumi savve duim for disaedem stretfala samting.
WASWE, BAE IU DISAEDEM STRETFALA SAMTING?
19. Wanem spesol samting nao iumi olketa man savve duim wea difren from olketa animal, and why nao iumi shud tinghae long datwan?
19 Jehovah wakem iumi olketa man witim wei for disaedem samting seleva. Datwan mekem iumi barava difren from olketa animal. Iumi savve disaedem sapos iumi bae obeyim Jehovah or nomoa. (Provebs 30:24) And iumi no olsem olketa machine tu wea waka nomoa taem man kontrolem. Iumi free for disaed for duim samting wea stret or samting wea no stret, hu nao olketa fren bilong iumi, and wanem nao iumi laek for duim long laef bilong iumi. Jehovah laekem iumi for enjoyim laef.
20, 21. Wanem nao best samting wea iu savve disaed for duim distaem?
20 Jehovah laekem iumi for lovem hem. (Matthew 22:37, 38) Hem olsem wanfala dadi wea hapi tumas taem hem herem pikinini bilong hem sei, “Mi lovem iu dadi” from heart bilong hem, and no bikos samwan nao forcem hem for talem. Jehovah letem iumiseleva nao for disaedem sapos iumi bae worshipim hem or nomoa. Satan, Adam, and Eve disaed for no worshipim Jehovah. Wanem nao bae iu disaed for duim?
21 Bae hem gud tumas sapos iu disaed for worshipim Jehovah. Staka million pipol disaed finis for mekem God hapi and no followim Satan. (Provebs 27:11) Wanem nao iu mas duim distaem mekem iu stap long niu world bilong God bihaen hem finisim evri nogud samting? Bae iumi storyim datfala kwestin long nextfala chapter.