December

Aposol Peter raetem datfala toktok for encouragem olketa Christian for no givap nomata olketa kasem olketa hard taem. Taem iumi ting raonem example bilong olketa narawan wea no givap, datwan encouragem iumi. Iumi lanem wanem iumi mas duim for gohed faithful and iumi sure Jehovah bae blessim iumi sapos iumi no givap. (Jas. 5:11) Maet pipol againstim iu or iu kasem persecution. Or iu wanfala elder or circuit overseer wea garem olketa bigfala responsibility. Sapos olsem, example bilong Paul savve helpem iu. Paul kasem nogud persecution, and evriday hem wari tumas abaotem olketa kongregeson. (2 Cor. 11:23-29) Bat Paul no givap, and example bilong hem encouragem olketa narawan. (2 Cor. 1:6) Sapos iu gohed faithful and no givap, datwan bae encouragem olketa narawan tu. w16.04 2:11, 14

Pipol evriwea long world savve iumi Olketa Jehovah’s Witness nao pipol for duim preaching waka. Samfala laek for herem message wea iumi talemaot bat olketa narawan les for herem. Maet iu meetim samfala pipol long ministry wea sei olketa no agree long olketa teaching bilong iumi bat olketa respectim iumi from waka wea iumi duim. Jesus sei long olketa last day, olketa disaepol bilong hem bae talemaot gud nius abaotem Kingdom long evri ples long world. (Matt. 24:14) Staka religion sei olketa nao preachim datfala message wea Jesus story abaotem. Bat wanem olketa duim nomoa olketa tekem sermon long church, long TV, or long Internet, or talem testimony abaotem hao olketa acceptim Jesus long laef bilong olketa. Olketa narawan tingse olketa preach taem olketa helpem poor pipol or duim volunteer waka olsem doctor, nurse, or teacher. Bat waswe, hem nao kaen waka wea Jesus story abaotem? w16.05 2:1, 2

Olketa gavman bilong man againstim Kingdom bilong God wea start for rul long 1914. Klosap nao Kingdom bilong God bae finisim evri gavman long earth. (Ps. 2:2, 7-9) God letem olketa gavman for rul bikos gavman savve helpem pipol long kantri for stap gud and garem peace. Bikos long diswan, iumi free for preachim gud nius long staka kantri. (Rome 13:3, 4) God sei tu for iumi prea for olketa bigman long gavman mekem iumi free for gohed worshipim Hem. (1 Tim. 2:1, 2) Taem eniwan againstim iumi, iumi savve askem olketa bigman long gavman for helpem iumi. Hem nao wanem aposol Paul duim. Bible sei Satan nao hem kontrolem olketa gavman bilong man, bat hem no sei Satan kontrolem olketa man wanwan insaed long gavman. (Luke 4:5, 6) So iumi shud no sei Satan nao kontrolem eni bigman long gavman. Bible sei iumi shud “no tok spoelem eniwan.”—Titus 3:1, 2. w16.04 4:5, 6

Hao nao bae iumi savve samting wea Jehovah bae hapi long hem? Taem iumi mas mekem eni disison wea Bible no talem eni law abaotem, iumi mas luksavve long wanem Jehovah laekem iumi for duim. Hao nao bae iumi duim datwan? Iumi mas prea long hem, and letem holy spirit bilong hem for leadim iumi. Jesus evritaem luksavve long wanem Jehovah laekem hem for duim. Olsem example, tufala taem nao Jesus prea long Jehovah and duim mirakol for feedim staka pipol wea hangre. (Matt. 14:17-20; 15:34-37) Bat taem Jesus stap long wilderness and hem hangre and Satan talem hem for mekem ston for kamap bred, Jesus no duim datwan. (Matt. 4:2-4) From Jesus savve gud long Dadi bilong hem, hem savve Jehovah bae no laekem hem for iusim holy spirit for kasem samting for hemseleva. Jesus depend long Dadi bilong hem for leadim hem and givim hem kaikai wea hem needim. w16.05 3:7, 8

Olketa man wea raetem Bible raetem samfala verse for wanfala man or wanfala grup. So bifor iumi readim Bible, iumi shud askem Jehovah for helpem iumi mekem iumi no satem tingting bilong iumi, and for iumi minim wanem hem laekem iumi for lanem. (Ezra 7:10; Jas. 1:5) Taem iu readim Bible, iusim lelebet taem for ting raonem olketa kwestin hia: ‘Wanem nao mi lanem abaotem Jehovah from diswan? Hao nao mi savve iusim disfala information long laef bilong mi? Hao nao mi savve iusim disfala information for helpem olketa narawan?’ Taem iumi ting raonem olketa kwestin hia, bae iumi kasem gudfala samting from Bible reading bilong iumi. Tingim wanfala example. Bible storyim olketa spiritual mark wea olketa elder mas kasem. (1 Tim. 3:2-7) From staka long iumi no elder, maet iumi tingse olketa verse hia no fitim iumi. Bat sapos iumi ting raonem olketa verse hia, bae iumi luksavve iumi evriwan savve kasem gudfala samting from olketa. w16.05 5:7, 8

Taem olketa Jew wea kamap prisoner long Babylon bifor olketa go insaed long datfala taon, olketa lukim staka idol long there, and hem ples wea pipol worshipim olketa demon. Nomata olsem, olketa Jew wea faithful, olsem Daniel and thrifala fren bilong hem, olketa no followim wei bilong pipol long Babylon. (Dan. 1:6, 8, 12; 3:16-18) Daniel and olketa fren bilong hem gohed for worshipim Jehovah nomoa. For klosap full laef bilong Daniel, hem stap witim pipol wea wei bilong olketa hem nogud. Nomata olsem, Daniel gohed faithful, dastawe angel bilong God sei hem “man wea barava spesol.” (Dan. 10:11, 19) Long bifor, man for wakem samting long clay savve pressim clay insaed long wanfala mold mekem clay hia garem sheip wea hem laekem. Olketa wea worshipim Jehovah luksavve hem nao Ruler bilong universe, and hem garem paoa for mekem olketa nation duim eni samting wea hem laekem. (Jer. 18:6) God garem paoa for duim sem samting long iumi tu. Bat hem no forcem iumi for duim wanem hem laekem. Hem laekem iumi for willing for duim wanem hem askem iumi. w16.06 2:1, 2

Satan laekem iumi for tingse sapos iumi garem staka samting nao bae iumi savve hapi. So hem iusim disfala world and olketa samting wea ‘eye bilong iumi laekem’ for trae switim iumi for evritaem laekem samfala samting moa. (1 John 2:15-17; Gen. 3:6; Prov. 27:20) Staka taem iumi lukim and herem pipol advertisem olketa niu samting for switim iumi for peim. Waswe, iu enitaem peim samting long stoa from hem luk naes long iu or iu lukim olketa advertisem, bat bihaen iu luksavve iu nating needim nomoa datfala samting? Taem iumi peim olketa samting olsem wea iumi no needim, datwan putim hevi long iumi. Olsem example, maet olketa samting hia savve mekem iumi for no garem inaf taem for studyim Bible, preparem and attendim olketa meeting, and for go evritaem long ministry. Tingim samting wea aposol John talem. Hem sei: “World bae finis and evri samting wea pipol long world laekem bae finis tu.” w16.07 1:3, 4

Long Christian kongregeson long first century, olketa garem olketa Jew, pipol bilong Greece, Rome, and olketa narafala ples. Culture and samting wea olketa laekem and no laekem hem difren. Bikos long datwan, hem no isi for samfala followim olketa teaching bilong Christ, or for lusim wanem olketa duim bifor. So Paul laekem olketa Christian hia for no forgetim hao olketa worshipim wanfala God nomoa, wea hem nao Jehovah. Waswe long olketa kongregeson long taem bilong iumi? Profet Isaiah sei “long olketa last day,” pipol from evri kantri bae worshipim Jehovah tugeta. Bae olketa sei: “Hem bae teachim iumi long olketa wei bilong hem and iumi bae wakabaot long stretfala road bilong hem.” (Isa. 2:2, 3) Iumi hapi tumas from iumi lukim datfala profesi hem kamap tru distaem! Olketa brata and sista bilong iumi kam from difren kantri, story long difren languis, and garem difren culture. Bat iumi evriwan wan mind for worshipim Jehovah. w16.06 3:15, 16

Iumi sure olketa nambawan samting nao Jehovah redyim for olketa anointed Christian taem olketa rul witim Christ long heven. (Luke 22:28-30; Phil. 3:20, 21; 1 John 3:2) Olketa nao bae datfala “niu Jerusalem” wea bae maritim Christ. (Rev. 3:12; 17:14; 21:2, 9, 10) Olketa bae waka witim Jesus for “healim pipol long evri kantri long world.” Olketa bae helpem olketa man for kamap free from sin and dae, and for kamap perfect. (Rev. 22:1, 2, 17) Wanfala nambawan samting wea Jehovah bae duim wea showimaot hem kaen tumas nao hem bae mekem olketa wea dae finis for laef bak. (Job 14:13-15; John 5:28, 29) Hu nao olketa wea bae laef bak? Olketa faithful man and woman wea dae bifor Christ hem dae, and olketa “nara sheepsheep” wea faithful and dae long olketa last day. Evri faithful wan hia bae laef bak and gohed moa for worshipim Jehovah.—John 10:16. w16.07 4:13-15

Wanem nao bae helpem iumi for “gohed redi” for day bilong Jehovah? Iumi mas barava laek for duim stret samting. Bat for laekem datwan nomoa hem no inaf. Tu-thri day bifor Jesus dae, hem talem olketa disaepol for mas gohed prea long Jehovah for helpem olketa. (Luke 21:36) For iumi gohed wekap long disfala taem, iumi tu mas evritaem prea long Jehovah. (1 Pet. 4:7) Jesus sei end bae kam long “taem wea iufala nating tingim.” (Matt. 24:44) So iumi mas evritaem redi. Distaem hem no taem for aftarem olketa samting wea pipol long world bilong Satan sei bae mekem iumi hapi. Olketa samting hia nating mekem man hapi nomoa. Insaed long Bible, Jehovah and Jesus helpem iumi for savve wanem nao klosap for happen and wanem iumi savve duim for gohed for lukaot. So iumi mas gohed faithful for worshipim Jehovah and for Kingdom hem first samting long laef bilong iumi. Iumi mas luksavve long wanem taem nao iumi stap long hem and mining bilong evri samting wea happen, mekem iumi redi taem end hem kam. (Rev. 22:20) Sapos iumi duim olsem bae iumi sev long datfala taem! w16.07 2:15-17

Hasband and waef savve garem gudfala marit sapos tufala “willing for forgivim” tufala. From tufala no perfect, tufala evriwan savve mekem olketa mistek. Taem datwan happen, tufala savve lane from mistek bilong tufala, gohed forgivim narawan, and showimaot love wea followim olketa Bible principle, wea datwan nao hem “mekem [tufala] for wan mind.” (Col. 3:14) Hasband and waef savve showimaot diskaen love taem tufala patient, kaen, and no “tingim olowe nogud samting wea narawan duim.” (1 Cor. 13:4, 5) Taem tufala no agree long eni samting, tufala shud trae for stretem datwan kwiktaem bifor sun hem go daon. (Eph. 4:26, 27) Hasband and waef wea hambol bae traem best for sei long narawan, “Mi sorre nao mi mekem iu feel nogud.” Taem tufala duim olsem, datwan savve helpem tufala for stretem eni problem wea kamap and mekem tufala fren gud tugeta. w16.08 2:6

Jesus barava waka hard for talemaot gud nius abaotem Kingdom. Hem iusim staka taem for trainim olketa disaepol bilong hem tu. Hem lanem olketa hao for teachim olketa narawan and hao for lukaftarem pipol bilong God. Olketa disaepol lane for kamap olketa man for lukaftarem olketa sheepsheep. (Matt. 10:5-7) Nomata Philip hem busy for duim preaching waka, hem trainim tu olketa gele bilong hem for duim datfala waka. (Acts 21:8, 9) Why nao iumi tu mas trainim olketa narawan? Evriwea long world, staka wea no baptaes yet stap long olketa kongregeson. Iumi mas teachim olketa niu wan hia. Iumi mas helpem olketa for luksavve why hem important for olketa seleva mas readim and studyim Bible. And olketa mas lane tu for duim preaching waka and for teachim pipol. Olketa brata wea just baptaes mas kasem training mekem gogo olketa savve kamap ministerial servant and elder. Iumi evriwan long kongregeson savve duim samting for helpem olketa niu wan. w16.08 4:1, 2

Taem iumi waka tugeta witim olketa brata and sista datwan strongim wei wea iumi wan mind. Iumi fren gud tu witim each other and iumi barava sure iumi klosap nao for kasem olketa blessing anda long rul bilong Kingdom. Taem iumi strongim olketa wea wikdaon, iumi helpem olketa for gohed strong nomata olketa kasem hard taem and for gohed garem hope for future. (Isa. 35:4) Datwan strongim iumiseleva tu and helpem iumi for tingim hope bilong iumi for future. Taem iumi tingim wanem Jehovah duim for helpem and protectim pipol bilong hem long bifor, datwan strongim faith and trust bilong iumi long hem. So taem iu garem olketa problem and iu wari, no letem olketa samting hia for mekem iu wikdaon! (Zeph. 3:16) Sapos iu prea long Jehovah for helpem iu, hem bae strongim iu and helpem iu for kasem olketa blessing bilong Kingdom.—Ps. 73:23, 24. w16.09 1:16-18

Taem pipol bilong God disaedem wanem kaleko for werem, olketa shud tingim toktok wea stap long text for tuday. Kaleko wea iumi werem hem depend long weather, ples wea iumi stap, and living bilong iumi. Nomata olsem, olketa standard bilong Jehovah hem no change. (Mal. 3:6) Sapos iumi stap long ples wea weather hem hot, maet iumi laek for werem kaleko wea mekem iumi no feel hot tumas, bat iumi shud werem kaleko wea fitim and wea showimaot respect. Olketa brata and sista bilong iumi bae hapi sapos iumi no werem kaleko wea taet tumas or wea big tumas. (Job 31:1) And tu, taem iumi swim long sea or long nara ples, kaleko wea iumi werem shud showimaot respect. (Prov. 11:2, 20) Nomata pipol long world werem kaleko for swim wea showim body bilong olketa, iumi laek for werem kaleko wea mekhae long God bilong iumi, Jehovah. w16.09 3:11, 12

Staka taem Jesus savve askem kwestin long olketa disaepol for savve wanem nao olketa bilivim. Iu savve followim example bilong Jesus. Taem iu story witim pikinini or duim samting tugeta witim hem, askem kwestin long hem mekem hem savve talem tingting and feeling bilong hem. Sapos pikinini no sure long wanfala samting wea Bible storyim, patient witim hem. Helpem hem for savve long ansa for olketa kwestin bilong hem. Hem barava gud for pikinini askem kwestin bikos datwan showimaot hem laek for savve long samting. Jesus tu askem olketa kwestin taem hem pikinini. (Luke 2:46) Fren gud witim pikinini bilong iu. No tingse pikinini garem faith long Jehovah bikos hem go witim iu long preaching and long olketa meeting. Hao nao bae iu savve long tingting bilong pikinini abaotem Jehovah and Bible? Story gud witim hem mekem iu luksavve long eni test wea hem kasem. Story abaotem Jehovah long pikinini taem iutufala duim olketa samting evriday. Prea for pikinini taem iu prea witim hem, and taem iu prea seleva. w16.09 5:3-5

Staka Jehovah’s Witness distaem wea busy for preachim gud nius olketa mekem disfala profesi kamap tru, wea sei: “Pipol bilong evri kantri, tribe, and languis” bae herem gud nius. (Rev. 14:6) Waswe, iu wanfala long olketa wea lanem difren languis? Waswe, iu wanfala missionary or iu wanfala wea muv long nara kantri wea needim samfala pablisa moa? Or waswe, iu wanfala wea joinim difren languis grup long ples wea iu stap? Iumi evriwan wea worshipim God luksavve hem barava important for iumi and famili bilong iumi for gohed strong long spiritual wei. Nomata olsem, from iumi busy tumas hem no isi for faendem taem for studyim olketa deep samting long Bible. Bat for olketa wea joinim kongregeson wea iusim difren languis olketa mas deal witim olketa nara hard samting tu. Olketa lanem niu languis, and tu, olketa mas evritaem studyim olketa deep samting long Bible mekem olketa savve gohed strong long spiritual wei.—1 Cor. 2:10. w16.10 2:1-3

Staka brata and sista gohed hapi and faithful long Jehovah nomata pipol persecutim olketa. Staka long olketa hia stap long prison long Eritrea, Singapore, and South Korea bikos olketa no joinim army. No evriwan wea worshipim Jehovah stap long prison, or pipol raf long olketa. Bat staka olketa safa bikos olketa poor, natural disaster kasem olketa, or war hem gohed long kantri wea olketa stap long hem. Samfala moa followim example bilong Abraham, Isaac, Jacob, and Moses wea no laek for kasem bignem or riches bikos olketa faithful long Jehovah. Wanem nao helpem olketa brata and sista hia for hapi and gohed faithful? Olketa lovem Jehovah and bilivim wanem hem promisim bae kamap tru. Olketa savve Jehovah bae givim reward long olketa wea faithful long hem for laef olowe long niu world wea evri samting bae raeteous.—Ps 37:5, 7, 9, 29. w16.10 3:15, 16

Taem profet Jeremiah fraet and wikdaon, Jehovah sei bae hem helpem hem. (Jer. 1:6-10) Jehovah sendem wanfala angel for strongim olo profet Daniel. Datfala angel sei Daniel “man wea barava spesol.” (Dan. 10:8, 11, 18, 19) Iumi tu savve encouragem olketa brata and sista, olketa pioneer, and olketa olo wea distaem olketa no strong for duim staka samting. Nomata Jehovah and Jesus stap tugeta long heven for staka year, Jehovah savve hem mas gohed for encouragem Son bilong hem taem hem stap long earth. Tufala taem nao Jesus herem Dadi bilong hem story kam long hem from heven. Jehovah sei: “Diswan nao Son bilong mi wea mi lovem and wea mi hapi long hem.” (Matt. 3:17; 17:5) Masbi taem Jesus herem Dadi bilong hem sei hem lovem and hapi long hem datwan barava strongim hem. Long naet bifor Jesus dae, hem barava wari tumas. Long datfala taem tu Jehovah sendem wanfala angel for strongim and comfortim hem.—Luke 22:43. w16.11 1:7, 8

Samfala taem hem no isi for kontrolem feeling bilong iumi. Maet iumi sorre or kros taem samwan hem tok spoelem iumi or treatim iumi nogud bikos long culture bilong iumi, skin kala bilong iumi, or lukluk bilong iumi. And maet iumi barava feel nogud tumas sapos wanfala brata or sista duim olsem long iumi. Long Bible, Jehovah talem iumi for kontrolem kros bilong iumi. Hem sei: “No kwiktaem for feel nogud long narawan.” Iumi savve misstim staka problem sapos iumi followim datfala advaes! (Prov. 16:32) Bible talem iumi tu for forgivim olketa narawan. Jesus sei sapos iumi no forgivim olketa narawan, Jehovah bae no forgivim iumi tu. (Matt. 6:14, 15) Waswe, iu faendem hem hard for patient and for forgivim olketa narawan? Sapos iumi no kontrolem feeling bilong iumi, maet iumi gohed kros long samwan and maet gogo iumi heitim hem nao. Or maet samting wea iumi talem or duim hem mekem samfala insaed kongregeson tu for heitim hem.—Lev. 19:17, 18. w16.11 3:4-6

Long 1870, long United States, Charles Russell and tu-thri narawan start for studyim gud Bible. Firstaem, Brata Russell laek for faendemaot wanem religion nao teachim truth insaed long Bible. Hem comparem wanem Bible talem witim olketa teaching bilong staka religion wea sei olketa Christian, and witim teaching bilong olketa religion wea no Christian. Taem hem duim datwan, hem start for luksavve no eniwan long olketa religion hia barava followim wanem Bible talem. Wantaem hem go story tu witim olketa bigman bilong church. Brata Russell tingim maet bae olketa acceptim olketa truth wea hem and olketa narawan faendem insaed Bible, and teachim olketa truth hia long church bilong olketa. Bat olketa bigman bilong religion hia no laekem datwan. Gogo, olketa Bible Student hia luksavve hem no fitim for olketa worshipim God witim eniwan wea insaed long false religion. w16.11 4:14

Iumi no duim adultery, no drunk, and olketa nara bigfala sin. Nomata olsem, iumi no laek for duim eni samting wea Jehovah no hapi long hem. (1 Cor. 6:9-11) Olsem example, iumi no durong, bat waswe, iumi enjoyim olketa hapitaem wea no klin? Or iumi no drunk, bat waswe, iumi drinkim alcohol gogo iumi klosap drunk? Maet hem no barava isi for winim olketa test hia, bat iumi fit for win. Goal bilong iumi hem for followim wanem Paul talem. Hem sei: “No letem sin gohed for rul olsem king long body bilong iufala mekem iufala no duim nomoa olketa samting wea body laekem.”—Rome 6:12; 7:18-20. w16.12 1:16, 19-21

Jesus promisim iumi bae Dadi bilong iumi long heven givim iumi holy spirit taem iumi askem Hem. (Luke 11:10-13) Holy spirit bilong God helpem iumi for garem olketa gudfala wei bilong God. (Col. 3:10) Taem iumi gohed for showimaot olketa gudfala wei hia, bae iumi fren gud witim olketa narawan, and stap klia long olketa samting wea savve mekem iumi wari. For iu “stap anda long God” and for iu “putim evri wari bilong [iu] long hand bilong hem,” iu mas hambol. (1 Pet. 5:6, 7) Sapos iu hambol, Jehovah bae sapotim iu and lukaftarem iu. Taem iu luksavve wanem iu fit for duim and wanem iu no fit for duim, bae iu no depend long iuseleva. Bae iu no wari tumas bikos bae iu depend long God.—Mic. 6:8. w16.12 3:7, 12

Noah no letem wei wea hem no fit for stretem samfala samting for mekem hem givap. Noah hem faithful for talemaot message bilong Jehovah long pipol. Masbi disfala waka for preach nao strongim faith bilong hem. Nara samting tu, hem wakem datfala ark wea Jehovah talem hem for duim. (Heb. 11:7) Olsem Noah, iumi “evritaem busy long waka bilong Lord.” (1 Cor. 15:58) Olsem example, maet iumi savve help for buildim and lukaftarem olketa Kingdom Hall and Assembly Hall. And tu, maet iumi savve volunteer long olketa assembly and convention, or waka long branch office, or long wanfala remote transleison office. Barava important samting nao hem for iumi busy for duim preaching waka, wea datwan savve strongim hope bilong iumi for future. Tru nao, wei for duim datfala preaching waka hem strongim and helpem iumi for no givap!—1 Cor. 9:24. w17.01 1:8, 9

Iumi mas respectim tu wei wea olketa narawan free for disaedem samting long laef bilong olketa seleva. Why nao olsem? From iumi evriwan free for disaed seleva, disison wea wanfala Christian mekem bae hem no semsem olsem nara Christian. Example nao hem olketa disison wea iumi mekem saed long worship bilong iumi and wei bilong iumi. Taem iumi luksavve each Christian mas givim ansa long God for samting wea hem disaedem, bae iumi respectim wei wea hem free for disaed seleva long olketa nara samting wea no important tumas (1 Cor. 10:32, 33) Jehovah nao givim iumi disfala present for free for disaedem samting seleva, wea diswan mekem iumi free. (2 Cor. 3:17) Iumi tinghae long disfala present bikos datwan helpem iumi for mekem olketa disison wea showimaot long Jehovah iumi barava lovem hem. Iumi laek for mekem olketa gudfala disison wea mekhae long hem, and iumi laek for respectim raet bilong olketa narawan for disaedem samting seleva. w17.01 2:15, 17, 18

Iumi bae no tokplas abaotem iumiseleva or trae for mekem olketa narawan tinghae long iumi. (1 Pet. 3:3, 4; Jer. 9:23, 24) Toktok and wei bilong iumi savve showimaot wanem kaen man nao iumi. Olsem example, maet iumi trae for mekem olketa narawan for tinghae long iumi bikos long wanem iumi duim, savve bilong iumi, or iumi savve gud long samwan wea garem bigfala privilege long organization bilong Jehovah. Or maet hao iumi storyim wanfala samting hem here olsem iumiseleva nomoa duim datwan, nomata olketa narawan tu helpem iumi. Bat tingim example bilong Jesus. Hem no show-off long bigfala savve wea hem garem bat hem evritaem talem toktok wea kam from olketa Holy Raeting. Hem no laekem pipol for mekhae long hem. Hem evritaem laekem pipol for mekhae long Jehovah. w17.01 4:12

Datfala law hem isi nomoa for Adam and Eve minim. And bae hem no hard for tufala obeyim bikos staka nara naesfala kaikai hem stap tu long datfala garden. Satan iusim wanfala snek for laea long Eve mekem hem no obeyim Dadi bilong hem, Jehovah. (Gen. 3:1-5; Rev. 12:9) Satan laekem Adam and Eve for kwestinim why Jehovah stopem tufala for no kaikai “from evri tree long garden.” Hem olsem Satan sei long tufala: ‘So hao, iutufala no free for duim eni samting wea iutufala laekem?’ Then Satan laea long Eve and sei: “Bae iu no dae.” Then hem switim Eve for no obeyim God and sei: “God hem savve long day wea iu kaikaim datwan eye bilong iu bae open.” Satan hem mekem Eve for tingse Jehovah no laekem tufala for kaikaim datfala frut bikos sapos tufala kaikaim bae tufala garem spesol savve. So hem talem disfala laea promis: “Iu bae olsem God. Iu bae savve long wanem nao hem gud and wanem nao hem nogud.” w17.02 1:8, 9

Isaiah sei disfala man bae “kamap leader and bae hem rul ovarem olketa kantri.” (Isa. 55:4) And Daniel raet abaotem “Messiah datfala Leader.” (Dan. 9:25) Gogo, Jesus Christ talemaot hem nao datfala “Leader” bilong pipol bilong God. (Matt. 23:10) Olketa disaepol bilong Jesus barava willing for followim hem, and olketa luksavve Jehovah nao chusim hem. (John 6:68, 69) Wanem nao mekem olketa barava sure Jesus Christ nao man wea Jehovah bae iusim for leadim pipol bilong hem? Taem Jesus hem baptaes, John lukim “skae hem open, and hem lukim holy spirit wea olsem wanfala kurukuru kam daon antap long hem.” (Mark 1:10-12) Taem Jesus duim ministry bilong hem long earth, holy spirit bilong God helpem hem for teachim pipol and duim olketa mirakol. (Acts 10:38) Nara samting tu, holy spirit bilong God helpem Jesus for showimaot love, for hem hapi, and garem strongfala faith. (John 15:9; Heb. 12:2) No eni nara leader hem duim olketa samting hia. Tru nao, Jehovah nao chusim Jesus for kamap Leader. w17.02 3:15, 16

Long Pentecost 33 C.E. olketa aposol start for leadim Christian kongregeson. Bible sei, “Peter standap witim elevenfala aposol” and story long wanfala big sekson abaotem olketa tru teaching wea savve sevem laef bilong olketa. (Acts 2:14, 15) Staka long olketa hia kamap olketa Christian. Bihaen datwan, olketa niu Christian hia “gohed lane from olketa aposol.” (Acts 2:42) Olketa aposol lukaftarem selen bilong kongregeson tu. (Acts 4:34, 35) And olketa teachim pipol bilong God and prea for olketa tu. Olketa sei: “Mifala bae gohed for prea and talemaot message bilong God.” (Acts 6:4) And olketa sendem olketa mature Christian for preach long olketa niu territory. (Acts 8:14, 15) Gogo, olketa nara elder helpem olketa aposol for lead long kongregeson. Evri anointed Christian hia insaed governing body wea givim instruction long olketa kongregeson.—Acts 15:2. w17.02 4:4

Staka pipol followim wei bilong disfala world bilong Satan. Olketa savve mekhae long samfala man or woman long wei wea no fitim. Maet hao olketa werem kaleko, and wei bilong olketa hem followim olketa bigman long politik, bigman long religion, sports man, pipol wea act long movie, and olketa nara famous pipol. From olketa duim olsem, olketa mekhae long olketa hia gogo olketa ting long olketa olsem olketa god. Olketa tru Christian savve hem no stret for mekhae long eniwan long wei olsem. Jesus nomoa showimaot nambawan example for iumi followim. (1 Pet. 2:21) Iumi mas evritaem tingim hao “evriwan sin and no savve showimaot olketa nambawan wei bilong God.” (Rome 3:23) Hem no fitim for worshipim eni man. Taem iumi mekhae long eni man long wei wea hem ova tumas, Jehovah hem no hapi long datwan. w17.03 1:6-8

Hao nao bae iumi savve sapos iumi worshipim Jehovah long full heart bilong iumi or nomoa? Hem gud for tingim olketa kwestin hia: ‘Waswe, bae mi obeyim Jehovah nomata long taem wea hem no isi? Waswe, mi disaed strong for no duim eni samting wea bae affectim kongregeson?’ Olsem example, waswe sapos samwan long famili or wanfala fren hem duim sin and hem no repent gogo hem disfellowship? Waswe, bae iu disaed strong for no associate witim hem? Wanem nao bae iu duim? Olsem Asa, samfala taem maet pipol againstim iumi and hem no isi for deal witim datwan. Maet olketa skulfren or olketa teacher tok spoelem iumi bikos iumi wanfala Jehovah’s Witness. Maet pipol wea iumi waka witim mekfani long iumi bikos iumi no waka ovataem, or bikos iumi savve askem day off for duim olketa spiritual samting. Taem kaen samting olsem happen long iumi, hem gud for iumi trustim God olsem Asa hem duim. (2 Chron. 14:11) Gohed for duim stret samting. Hem gud for tingim diswan, God hem strongim Asa and hem bae strongim iu tu. w17.03 3:6-8

Bible sei iumi shud no kwiktaem for disaed taem iumi mekem wanfala important disison. Iumi shud ting raonem gud datwan mekem iumi savve disaed long wisefala wei. (1 Thess. 5:21) Olsem example, bifor hed long famili hem disaedem eni samting for famili duim, firstaem, hem shud duim research insaed Bible and olketa Bible pablikeson. Hem gud tu for hem herem tingting bilong olketa long famili bilong hem. Tingim Abraham, God talem hem for lisin long waef bilong hem. (Gen. 21:9-12) Olketa elder tu shud markem taem for duim research. Taem olketa kasem wanfala niu direction wea showim olketa mas changem disison wea olketa bin mekem, olketa shud no hol bak for duim datwan. Long taem wea fitim, olketa elder wea hambol and no ova tumas shud willing for changem tingting and disison wea olketa mekem finis. And hem gud for iumi followim example bilong olketa. Datwan bae helpem evriwan long kongregeson for stap gud and garem wan mind.—Acts 6:1-4. w17.03 2:16