November

Satan sei olketa man worshipim Jehovah nomoa bikos olketa kasem gud samting from hem. (Job 2:4, 5) Waswe, tingting bilong Satan hem change distaem? Nomoa. Taem Jesus torowem Satan go aot from heven, Satan gohed yet for accusim olketa wea faithful for worshipim God. (Rev. 12:10) Hem laekem tumas for iumi no sapotim rul bilong God and stop for worshipim God. Taem iu kasem hard taem, piksarem diswan long mind bilong iu: Satan and olketa demon bilong hem long wansaed, and olketa gohed lukluk long iu and sei bae iu givap. Long narasaed hem Jehovah, Jesus Christ wea King, olketa anointed wea stap long heven, and staka thousand angel. Olketa tu lukluk long iu, bat olketa laek helpem iu for no givap and gohed faithful long Jehovah! So iumi barava laek for followim toktok wea stap long text for tuday. w16.04 2:8, 9

Sapos iu stretem problem witim narawan, “iu helpem hem nao for duim stret samting moa.” Bat sapos iu story witim brata bilong iu tu-thri taem, and iutufala no savve stretem datfala problem, then iu shud storyim datfala problem long olketa elder. Staka taem olketa Christian wea garem problem witim each other no need for duim mek-thri samting wea Jesus talem long Matthew 18:15-17. Datwan hem gud tumas, bikos diswan showimaot man wea duim rong samting hem luksavve long datwan and hem stretem datwan. So hem no need for disfellowship, and brata wea feel nogud shud forgivim hem and tufala savve stap gud moa. So kaonsel bilong Jesus showimaot iumi no need for kwiktaem go storyim long olketa elder eni problem wea iumi garem witim narawan. Bat iumi savve storyim datfala problem long olketa elder only sapos iumi duim finis nara tufala samting wea Jesus storyim, and sapos iumi savve pruvim datfala brata or sista hem duim rong samting. w16.05 1:15, 16

From iumi no sapotim olketa gavman bilong man, iumi no hol bak for sei Kingdom bilong God nomoa bae stretem evri problem bilong olketa man. Olketa false religion nao join insaed politik, and diswan hem mekem pipol no stap gud tugeta. Bat from iumi no teksaed, iumi wan mind witim olketa brata and sista bilong iumi evriwea long world. (1 Pet. 2:17) Taem disfala world bilong Satan hem gogo for finis, maet bae iumi kasem test long diswan. World distaem hem fulap witim pipol wea “no willing for agree” and “bighed,” wea mekem pipol divaed, and diswan bae kamap moa worse. (2 Tim. 3:3, 4) Long samfala kantri, olketa brata bilong iumi kasem test for no teksaed wea olketa no expectim, bikos samfala change kamap saed long politik. Dastawe iumi mas redyim iumiseleva distaem mekem iumi no teksaed nomata iumi kasem eni hard test long future. w16.04 4:3, 4

Samfala pipol tingse olketa savve duim eni samting olketa laekem. Bat iumi laek for evritaem duim samting wea mekem Jehovah hapi. So bifor iumi mekem wanfala disison, iumi mas ting raonem wanem Bible talem and followim datwan. Olsem example, Bible talem iumi tingting bilong God abaotem blood, so iumi followim wanem hem talem. (Gen. 9:4; Acts 15:28, 29) Iumi savve prea long Jehovah for helpem iumi mekem olketa disison wea bae mekem hem hapi. Olketa disison wea iumi mekem savve affectim iumi. Sapos iumi mekem gudfala disison, datwan savve helpem iumi for fren gud witim Jehovah. Sapos iumi mekem nogud disison, datwan savve spoelem wei wea iumi fren witim God. Wanem iumi disaedem savve affectim tu nara pipol. Iumi no laek for duim eni samting wea bae mekem olketa brata and sista bilong iumi feel nogud or wea bae mekem faith bilong olketa wik. And tu, iumi no laek for mekem olketa brata and sista long kongregeson for no stap gud tugeta. Dastawe wanem iumi disaedem hem barava important.—Rome 14:19. w16.05 3:4, 5

Jehovah hapi long iumi taem iumi ‘iusim gud taem bilong iumi’ for readim and studyim Bible and olketa pablikeson bilong iumi. (Eph. 5:15, 16) Nomata olsem, iumi mas careful long wanfala samting. Wanem nao datwan? Sapos iumi no careful, maet iumi tingse samfala part bilong Bible or samfala pablikeson bilong iumi hem no fitim iumi. Olsem example, waswe sapos iumi tingse wanfala samting wea iumi readim long Bible hem fitim olketa narawan and no iumi? Waswe, iumi readim datwan kwiktaem or iumi no readim nomoa? Sapos olsem, maet iumi no kasem important information wea savve helpem iumi. Iumi mas no forget, evri spiritual kaikai wea iumi kasem hem kam from Jehovah. w16.05 5:5, 6

Jehovah iusim kongregeson and olketa elder tu for helpem iumi duim stret samting. Olsem example, sapos olketa elder luksavve iumi start for go rong, olketa bae trae for helpem iumi. Nomata olsem, olketa bae no givim kaonsel followim tingting bilong olketa seleva. Bat olketa bae askem Jehovah for helpem olketa garem wisdom and wei for luksavve. Then, olketa bae duim research long Bible and olketa Bible pablikeson for faendem information wea bae helpem iumi. Taem iumi luksavve long olketa wei wea Jehovah trainim iumi, datwan savve helpem iumi for stap gud witim olketa brata and sista bilong iumi. And tu, bae iumi garem gudfala tingting abaotem pipol long territory and olketa Bible study bilong iumi. Jehovah hem helpem pipol wea willing for change. Hem no forcem olketa for change, bat hem showim olketa wanem hem laekem olketa for duim. Then olketa nao bae disaed sapos olketa laek for changem wei bilong olketa. w16.06 1:13, 14

Aposol John warnim iumi for no lovem olketa samting long world, wea hem nao for man “laekem nogud samting wea body and eye bilong hem laekem, witim tu wei for man show-off witim samting wea hem garem,” kaen man olsem “no lovem Dadi long heven.” (1 John 2:15, 16) So iumi mas lukluk gud long iumiseleva nogud nao iumi lovem olketa samting long world. Maet iumi luksavve iumi start for laekem olketa nogud hapitaem, associate witim pipol long world, or iumi laek followim stael kaleko and lukluk bilong olketa. Or maet iumi aftarem hae education bikos iumi laek for kasem olketa “bigfala samting.” Niu world hem klosap tumas for kam. So iumi mas no forgetim datfala important toktok wea Moses talem long Deuteronomy 6:4! Sapos iumi luksavve and barava sure “wanfala Jehovah nomoa hem stap,” bae iumi worshipim hem nomoa and duim wanem hem laekem.—Heb. 12:28, 29. w16.06 3:14

Iumi needim tu-thri samting nomoa for iumi gohed laef. Olsem example, iumi needim kaikai, kaleko, and ples for stap. Bat olketa samting wea maet iumi laekem olketa staka tumas. And staka pipol no luksavve olketa no really needim nomoa olketa samting wea olketa laekem. Maet samting wea man long poor kantri laekem hem barava difren from samting wea man long rich kantri hem laekem. Long olketa poor kantri, pipol laek for garem mobile phone, TV, or kapa haos. Long olketa rich kantri, pipol laekem staka expensive kaleko, go kaikai long expensive restaurant, or for go holiday long nara kantri. Bat nomata wea nao iumi stap or haomas selen iumi garem, maet gogo iumi laekem tumas staka samting wea iumi no needim or wea iumi no fit for peim.—Heb. 13:5. w16.07 1:1-3

Staka pipol distaem sei olketa no needim God. (Matt. 5:3) Olketa iusim taem and strong bilong olketa for kasem staka material samting. (1 John 2:16) Iumi no laek for followim tingting bilong pipol long world bat iumi laekem spirit bilong God nao for leadim iumi. Jehovah iusim spirit bilong hem for helpem iumi minim olketa samting wea klosap for happen. (1 Cor. 2:12) Bat iumi mas careful bikos olketa samting wea iumi duim evriday tu savve stopem iumi for gohed lukaot. (Luke 21:34, 35) Maet pipol tok spoelem iumi and sei iumi krangge for bilivim iumi stap long olketa last day bilong disfala world. (2 Pet. 3:3-7) Bat iumi no laekem datwan for mekem iumi wikdaon. Iumi barava sure end hem klosap for kam. Sapos iumi laekem spirit bilong God nao for leadim iumi, iumi mas attendim olketa meeting evritaem witim olketa brata and sista bilong iumi. w16.07 2:13, 14

Staka pipol prea bikos datwan mekem olketa feel gud, bat olketa no bilivim God hem herem prea bilong olketa. Iumi mas helpem olketa for luksavve Jehovah savve “herem prea” bilong olketa man. Jesus sei long olketa disaepol bilong hem: “Bae mi duim eni samting wea iufala askem long nem bilong mi.” (John 14:14) Datwan minim iumi savve prea for “eni samting” wea followim tingting bilong Jehovah. John sei: “Samting wea iumi barava sure long hem, hem olsem: Eni samting wea iumi askem wea followim tingting bilong God, God hem herem iumi.” (1 John 5:14) Hem barava gud for helpem pipol luksavve prea hem no for mekem man feel gud nomoa, bat hem wei for iumi kam front long “throne bilong [Jehovah] wea hem kaen tumas” and story witim hem! (Heb. 4:16) Taem iumi teachim pipol for prea long God long stretfala wei, and for askem samting followim tingting bilong hem, iumi helpem olketa for kamap fren bilong Jehovah and for kasem comfort taem olketa kasem hard taem.—Ps. 4:1; 145:18. w16.07 4:11, 12

Iumi wea lovem Jehovah and wea faithful long hem barava laek for story abaotem hem long olketa narawan. Bat waswe sapos iu sik or iu olo, and iu no fit for spendem staka taem long preaching waka? Iu mas tingim diswan: Long evritaem wea iu story long olketa narawan, olsem olketa nurse or doctor, iu praisem Jehovah nao. Sapos iu stap long prison bikos iu worshipim Jehovah, iu still fit for story long olketa narawan abaotem Jehovah, and datwan mekem heart bilong Jehovah barava hapi. (Prov. 27:11) And sapos iuseleva nomoa long famili bilong iu wea worshipim Jehovah, hem barava hapi tumas long iu tu. (1 Pet. 3:1-4) Nomata iu kasem hard taem, iu fit for praisem Jehovah, gohed fren gud witim hem, and duim moa samting for hem. Jehovah bae blessim iu taem iu story long pipol abaotem olketa nambawan promis bilong God. w16.08 3:19, 20

Wei wea Jehovah markem hasband for hed long waef hem no minim hem gud winim waef bilong hem. Disfala arrangement bilong hedship hem helpem waef for duim important waka wea Jehovah markem for olketa waef. Jehovah sei: “Hem nogud for man stap seleva. Mi bae wakem wanfala for helpem hem wea barava fitim hem.” (Gen. 2:18) Waef shud helpem hasband bilong hem for kamap gudfala hed long famili. And hasband mas followim example bilong Jesus, wea hem “hed bilong kongregeson” for showimaot love. Taem hasband duim olsem, waef bae feel sef and bae hem hapi for sapotim and respectim hem. Olketa Christian distaem followim example bilong Jesus for lovem each other olsem Jesus lovem olketa disaepol bilong hem. (John 13:34, 35; 15:12, 13; Eph. 5:25) Love wea hasband and waef garem for each other mas barava strong mekem nomata sapos eni samting happen, tufala bae willing for dae for tufala. w16.08 2:3, 4

Gudfala toktok wea iumi talem savve encouragem olketa narawan and helpem olketa for gohed worshipim Jehovah. And tu, olketa gudfala koment wea iumi givim long olketa meeting savve encouragem olketa brata and sista. Jehovah helpem Nehemiah and olketa Jew for buildim bak wall bilong Jerusalem, and olketa finisim diswan insaed 52 day nomoa! (Neh. 2:18, ftn; 6:15, 16) Nehemiah no lukluk nomoa taem olketa narawan duim datfala waka olsem wanfala boss. Hem waka witim olketa for buildim bak wall bilong Jerusalem. (Neh. 5:16) Staka elder followim example bilong Nehemiah taem olketa waka long olketa construction project or klinim and fixim olketa Kingdom Hall. And tu, olketa duim shepherding kol long olketa brata and sista and waka witim olketa long ministry.—Isa. 35:3, 4. w16.09 1:15, 16

Pipol bilong God traem best for followim disfala kaonsel long Bible, wea sei: “Killim dae feeling bilong iufala for laek durong, for duim samting wea no klin, for ova tumas for laekem sex, for laekem tumas for duim nogud samting.” (Col. 3:2, 5) Bifor samfala brata and sista kam insaed long truth, laef bilong olketa hem olobaot and maet olketa stragol yet witim feeling for laek duim olketa nogud samting. Sapos iumi no keakea, kaleko wea iumi werem bae mekem hem barava hard long olketa for followim kaonsel long Bible for againstim datfala feeling. (1 Cor. 6:9, 10) Iumi no laek for spoelem tingting bilong olketa brata and sista bilong iumi wea stragol long diswan. Kaleko wea iumi werem long olketa meeting or long olketa narataem wea iumi stap witim olketa brata and sista bilong iumi hem savve helpem kongregeson for stap klin. Nomata iumiseleva savve chusim kaleko wea iumi laek for werem, iumi no laek for werem kaleko wea bae mekem narawan garem nogud tingting, talem nogud toktok, and duim eni samting wea God no hapi long hem.—1 Pet. 1:15, 16. w16.09 3:9, 10

Wanfala dadi and mami long France sei: “From mitufala garem faith long Jehovah, datwan no minim olketa pikinini bilong mitufala tu bae garem faith. Faith hem no samting wea man born witim. Bae hem tek taem for olketa pikinini for garem faith.” Wanfala brata long Australia sei: “Hem bigfala waka for helpem pikinini bilong iu for garem faith.” Hem sei tu: “Maet iu tingse iu ansarem gud nao kwestin bilong pikinini, bat long narataem moa hem askem datfala sem kwestin! Pikinini savve laek tumas for savve long samting, so nomata hem hapi long wanem iu talem firstaem bae hem laek for savve moa abaotem datwan long narataem.” Staka dadi and mami luksavve taem age bilong pikinini hem gogo ap, olketa mas explainim moa olketa samting wea pikinini laek for savve abaotem. And olketa luksavve olketa mas traem olketa difren wei for teachim pikinini bilong olketa for lovem Jehovah. Waswe, iu savve daotem sapos iu fit for teachim pikinini for lovem Jehovah, and for gohed worshipim Jehovah taem hem growap? Dadi and mami needim samwan for helpem tufala long diswan. (Jer. 10:23) Olketa mas depend long Jehovah for helpem olketa. w16.09 5:1, 2

Olketa wea muv long difren ples bae traem best for minim culture bilong ples wea olketa muv long hem. Ruth showimaot gudfala example long diswan. First samting, hem respectim olketa kastom bilong ples wea hem go stap long hem. Hem ask firstaem bifor hem go kolektem leftova kaikai long garden. (Ruth 2:7) Hem no ting datwan hem raet bilong hem, or olketa narawan shud givim hem samting. Mek-tu samting, hem talem olketa narawan hem tinghae long wei wea olketa kaen long hem. (Ruth 2:13) Taem olketa wea muv from nara ples duim sem samting, olketa brata and sista long kongregeson and nara pipol bae respectim olketa. Iumi hapi bikos Jehovah openem wei for pipol from evri difren kaen ples for herem gud nius. Maet hem no isi for samfala studyim Bible or go long olketa meeting long kantri bilong olketa. Bat from olketa kam long kongregeson bilong iumi, iumi shud helpem olketa mekem olketa feel welkam. w16.10 1:17-19

Staka million pipol bilong God followim example bilong Jesus. Olketa ting raonem olketa promis bilong God and datwan helpem olketa for gohed faithful taem olketa kasem hard taem. Tingim Rudolf Graichen, wea born long Germany long 1925. Taem hem smol boy, dadi and mami bilong hem garem olketa piksa long wall long haos. Hem sei: “Wanfala piksa hem showim wild dog and baby sheepsheep, baby goat and leopard, baby buluka and lion stap hapi tugeta, and wanfala smol boy nao lukaftarem olketa.” (Isa. 11:6-9) Diswan helpem Rudolf for strongim faith bilong hem long paradaes. From hem duim olsem, hem gohed faithful long Jehovah nomata olketa bilong Nazi Gestapo (police) and Communist Stasi (police) bilong East Germany barava spoelem hem. Rudolf kasem staka nara hard taem tu. Mami bilong hem dae from sik wea olketa kolem long typhus long Ravensbrück raf prison. Dadi bilong hem saenem wanfala pepa for sei hem no wanfala Jehovah’s Witness nao. w16.10 3:12-14

Pipol bilong Jehovah barava tinghae long Bible bikos olketa savve hem buk wea kam from God. Olketa advaes wea stap long Bible savve helpem iumi for stap klia long olketa problem and savve stretem iumi taem iumi duim samting wea no stret. So waswe, iumi followim wanem Bible talem? Tingim Euodia and Syntyche, tufala anointed Christian long first century. Maet samting wea tufala sista hia duim mekem olketa narawan long kongregeson feel nogud tu. Aposol Paul encouragem tufala for stretem datfala problem. Bible no talem wanem nao happen bihaen, bat maet tufala followim kaonsel bilong aposol Paul and gohed hapi for duim waka bilong Jehovah. (Phil. 4:2, 3) Maet samfala taem iumi tu garem problem witim wanfala brata or sista long kongregeson. Bat sapos iumi followim wanem Bible talem, iumi savve stretem kaen problem olsem, and maet bae iumi no garem problem olsem tu. And sapos iumi obeyim wanem Bible talem, iumi showimaot iumi barava tinghae long disfala buk wea kam from Jehovah.—Ps. 27:11. w16.11 3:1-3

Iumi evriwan needim encouragement. Hem barava important for dadi and mami encouragem pikinini bilong olketa. Wanfala teacher wea nem bilong hem Timothy Evans sei olketa pikinini “needim narawan for encouragem olketa olsem wei wea wanfala plant needim wata for hem grow gud.” Hem sei tu: “Taem dadi and mami encouragem pikinini, datwan mekem hem feel gud and hem savve tufala tinghae long hem.” Bat from iumi stap long “olketa last day,” staka pipol tingim olketa seleva nomoa and “no garem love insaed long famili.” (2 Tim. 3:1-5) Satan savve sapos iumi feel wikdaon, datwan savve spoelem spiritual saed bilong iumi. Hem trae for mekem Job wikdaon taem hem mekem Job for kasem staka nogud samting. Bat datfala nogud plan bilong Satan no mekem Job wikdaon. (Job 2:3; 22:3; 27:5) Iumi tu savve againstim Satan, taem iumi gohed encouragem olketa insaed long famili bilong iumi and olketa brata and sista long kongregeson. Diswan bae mekem evriwan hapi and fren gud witim Jehovah. w16.11 1:4, 6

Long start bilong mek-16 century, samfala man wea no fraet transleitim Bible long olketa languis wea staka pipol isi for minim. From olketa savve sapos pipol readim Bible long languis bilong olketa seleva, bae olketa start for garem samfala kwestin olsem: ‘Wea insaed long Bible nao hem storyim purgatory? Wea insaed long Bible nao hem sei man mas peim priest mekem hem duim mass for man wea dae finis? Wea insaed long Bible nao hem story abaotem olketa pope and bigman long church?’ Olketa killim dae olketa man and woman wea no acceptim olketa teaching hia. Olketa bigman bilong religion laek stopem pipol for no readim Bible and for no askem olketa kwestin, and hem nao samting wea happen. Bat samfala wea no fraet olketa no letem Bigfala Babylon for kontrolem olketa. Olketa faendem olketa tru teaching insaed long Bible, and olketa laek for lanem moa samting! w16.11 4:13

For Jehovah hapi long iumi, iumi mas honest. (Eph. 4:25) Iumi no laek for olsem Satan, wea hem “dadi bilong wei for laea.” And iumi tingim tu, Ananias and waef bilong hem tufala dae from tufala laea. So iumi no laea. (John 8:44; Acts 5:1-11) Bat wei for honest hem no minim for no laea nomoa. Sapos iumi tinghae long wei wea God hem kaen tumas, iumi mas honest long olketa nara samting tu. Man wea laea hem talem samting wea no tru. Bat Jehovah showimaot samfala nara samting tu hem insaed long wei for no honest. Olsem example, Jehovah sei long olketa Israelite: “Iufala mas no steal, iufala mas no trikim narawan, and iufala mas no konim narawan.” Why nao Jehovah talem diswan long olketa? Hem sei: “Iufala mas holy, bikos mi God bilong iufala Jehovah, mi nao mi holy.” (Lev. 19:2, 11) Nomata maet iumi no laea long narawan, bat sapos iumi no talem full story and hem bilivim samting wea no tru, datwan minim iumi no honest nao. w16.12 1:17, 18

Insaed Bible iumi read abaotem wei wea Jesus story long pipol. Pipol savve laekem tumas for lisin long hem bikos toktok bilong hem comfortim and strongim olketa, especially olketa wea wik and olketa wea sorre. (Matt. 11:28-30) Jesus hem barava tingim feeling bilong olketa narawan. (Mark 6:30-32) Datfala promis bilong Jesus for helpem olketa aposol bilong hem wea gogo witim hem, hem for iumi distaem tu. Datwan no minim iumi mas stap witim Jesus mekem hem savve helpem iumi. From hem King bilong iumi long heven, Jesus gohed for duim samting wea showimaot hem lovem iumi. So taem iu wari, iu savve hem bae helpem iu long taem wea iu barava needim hem. Jesus givim hope and strongim iumi, and datwan helpem iumi for no wari.—Heb. 2:17, 18; 4:16. w16.12 3:4, 6

Noah stap long world wea “fulap witim pipol wea raf” and wea duim olketa barava nogud samting. (Gen. 6:4, 9-12) Noah hem faithful for talemaot warning bilong Jehovah long pipol, bat hem no savve forcem pipol for followim datwan. And hem no fit for mekem datfala flood kam kwiktaem tu. Noah mas trustim wei wea Jehovah bae duim wanem hem promisim for finisim datfala nogud world, and hem sure God bae duim datwan long taem wea hem markem. (Gen. 6:17) Iumi tu stap long disfala world wea barava nogud, and iumi savve Jehovah promis for finisim. (1 John 2:17) Bat long distaem, iumi no savve forcem pipol for acceptim datfala “gud nius abaotem Kingdom” wea iumi storyim long olketa. And iumi no fit for mekem datfala “bigfala trabol” kam kwiktaem tu. (Matt. 24:14, 21) Olsem Noah, iumi mas garem strongfala faith, and trustim wei wea klosap nao God bae finisim disfala nogud world. (Ps. 37:10, 11) Iumi sure Jehovah bae no letem disfala nogud world for gohed bat hem bae finisim long taem wea hem markem and hem bae no leit.—Hab. 2:3. w17.01 1:5-7

Wei wea iumi free for disaed seleva hem wanfala spesol present wea Jehovah givim long iumi. So masbi Jehovah barava feel nogud taem hem lukim pipol iusim datfala present long rongfala wei and chusim nogud samting or iusim datwan for spoelem nara pipol. Bible sei long “olketa last day” pipol bae “no savve tinghae.” (2 Tim. 3:1, 2) So hao nao bae iumi showimaot iumi tinghae long datfala nambawan present wea Jehovah givim long iumi? And wanem nao iumi savve duim for no iusim long rongfala wei? Iumi evriwan free for chusim olketa fren bilong iumi, kaleko wea iumi werem, and hapitaem. Bat maet iumi savve iusim datwan olsem excuse for duim olketa samting wea God no laekem and for followim wei bilong pipol long world. (1 Pet. 2:16) Iumi shud no iusim wei wea iumi free for disaed seleva olsem chance for duim samting wea no stret, bat iumi shud iusim datwan for duim olketa samting wea bae “givim glory long God.”—Gal. 5:13; 1 Cor. 10:31. w17.01 2:12-14

Sapos iumi kasem samfala responsibility moa or iumi kasem niu assignment, iumi laek for followim example bilong Nehemiah for gohed hambol. Iumi no laek for depend long savve bilong iumiseleva. Hao nao samwan savve start for depend long hemseleva? Example nao, maet wanfala elder duim waka bilong kongregeson bat hem no prea long Jehovah for helpem hem. Or maet wanfala brata or sista disaedem wanfala samting finis bifor hem prea long Jehovah for blessim datfala disison. Bat man wea hambol bae no depend long hemseleva taem hem duim wanfala waka nomata hem duim datwan staka taem finis. Hem mas evritaem tingim, Jehovah hem garem bigfala savve winim hem. (Prov. 3:5, 6) Long world distaem, staka pipol selfish and trae for winim olketa narawan. Bat pipol bilong Jehovah no olsem. Iumi no tingse iumi winim olketa narawan long famili or long kongregeson taem iumi kasem olketa bigfala responsibility. Bat iumi waka tugeta witim olketa brata and sista bilong iumi bikos iumi savve Jehovah nao givim iumi datfala waka.—1 Tim. 3:15. w17.01 4:7, 8

Plan bilong Jehovah hem for olketa man laef olowe long earth. (Gen. 1:28; Ps. 37:29) Jehovah hem kaen tumas, and hem givim Adam and Eve staka gudfala samting mekem tufala savve enjoyim laef. (Jas. 1:17) Jehovah wakem tufala for savve disaed seleva, for savve ting raonem samting, for showimaot love, and for fren gud witim olketa narawan. Jehovah story long Adam and talem hem wanem hem mas duim and wanem hem mas no duim. Jehovah teachim Adam for lukaftarem hemseleva, olketa animal, and ples wea hem stap. (Gen. 2:15-17, 19, 20) Jehovah wakem Adam and Eve long wei wea tufala savve teistim, tasim, lukim, herem, and smelem olketa gudfala samting wea hem wakem for tufala. Diswan savve mekem tufala fit for enjoyim laef insaed naesfala ples wea tufala stap. Adam and Eve garem staka gudfala waka for duim. And tufala savve gohed for lane and faendemaot staka niu samting for olowe. Jehovah wakem Adam and Eve mekem tufala fit for garem olketa perfect pikinini. Earth bae kamap hom bilong olketa, and olketa bae stap for olowe long hem. w17.02 1:6, 7

Hao nao toktok bilong God leadim olketa king? Tingim example bilong King Josiah. Bihaen olketa faendem wanfala copy bilong Law bilong Moses, secretary bilong Josiah start for readim datfala law long hem. Bihaen datwan, Josiah distroem evri idol long Israel and arrangem wanfala bigfala Pasova celebration. (2 Ki. 22:11; 23:1-23) Josiah and olketa nara faithful man wea leadim pipol bilong God followim toktok bilong God. Datwan mekem olketa no hol bak for stretem tingting bilong olketa Israelite and diswan helpem pipol hia for duim wanem God laekem. Bat no evri king wea rulim pipol bilong God nao followim instruction bilong God. So Jehovah disciplinem samfala long olketa or hem aotem olketa from datfala waka. (1 Sam. 13:13, 14) Gogo, Jehovah markem wanfala wea bae leadim pipol bilong Hem wea winim evri narawan. w17.02 3:11, 12, 14

God wakem iumi olketa man ‘for olsem hem.’ (Gen. 1:27) Diswan minim staka pipol fit for garem samfala wei bilong God. Olsem example, iumi olketa man savve showimaot love, kaen long narawan, and sorre long pipol. And tu, God hem givim iumi wanfala konsens. Datfala konsens helpem iumi for luksavve long samting wea stret and no stret, and sapos iumi honest or nomoa. (Rome 2:14, 15) Staka pipol laekem olketa samting wea klin and wea luk naes, and olketa laek for stap gud witim olketa narawan. Iumi no sapraes long diswan, bikos Jehovah hem God wea laekem evri samting for followim order and hem laekem peace. From God wakem olketa man for showimaot olketa wei bilong hem, olketa fit for kasem respect. Iumi savve iumi shud respectim olketa narawan, bat iumi need for luksavve long wanem wei nao hem fitim for showimaot respect long olketa and long wanem taem. w17.03 1:5, 6

Jehovah hem no olsem olketa man, bikos nomata hem kros, hem evritaem mekem olketa wise disison. Jehovah hem no ova tumas, hem hambol, and hem barava kaen. Taem Jehovah lukim olketa long Nineveh change and stop for duim olketa nogud samting, Jehovah changem disison bilong hem. Samfala taem maet samting kamap wea mekem iumi ting raonem moa disison wea iumi mekem finis. Long bifor, Jehovah changem samting wea hem disaedem finis. (1 Ki. 21:20, 21, 27-29; 2 Ki. 20:1-5) Iumi savve changem disison wea iumi mekem finis sapos iumi kasem samfala niu information abaotem datwan. Tingim example bilong King David, hem herem wanfala laea story abaotem Mephibosheth, granson bilong Saul, and hem mekem wanfala disison followim datwan. Bihaen, taem David herem tru story, hem changem disison wea hem bin mekem.—2 Sam. 16:3, 4; 19:24-29. w17.03 2:14, 15

Taem iumi mas mekem wanfala disison, first samting iumi mas tingim nao hem olketa Bible principle wea savve helpem iumi, and hao for followim olketa principle hia. Tingim disfala example abaotem wanfala sista wea hasband bilong hem no Witness. Sista hia plan for go aot long ministry long wanfala day. (Acts 4:20) Bat long datfala day, hasband bilong hem no laekem hem for go long preaching. Hem sei bikos tufala bin busy, hem laek for spendem taem witim waef bilong hem. So datfala sista hem ting raonem olketa scripture wea savve helpem hem for mekem gudfala disison. Hem savve hem mas obeyim God and komand bilong Jesus for teachim pipol for kamap disaepol. (Matt. 28:19, 20; Acts 5:29) Bat hem tingim tu waef mas stap anda long hasband bilong hem, and olketa wea worshipim Jehovah mas no ova tumas. (Eph. 5:22-24) Waswe, hasband bilong hem talem diswan for stopem hem for no duim preaching waka nao, or hem just laek for spendem lelebet taem witim hem long datfala day? Iumi wea worshipim Jehovah laek for mekem olketa gudfala disison wea bae mekem hem hapi. w17.03 4:17