December

Wanfala nambawan wei bilong Jesus hem nao wei wea hem minim olketa hard taem wea iumi man wea no perfect savve kasem. Taem Jesus stap long earth hem ‘hapi witim olketa wea hapi and hem krae witim olketa wea krae.’ (Rome 12:15) Olsem example, taem 70 disaepol bilong hem kam bak from preaching olketa hapi bikos long gud samting wea olketa kasem, and Jesus fulap witim holy spirit and hapi tumas witim olketa. (Luke 10:17-21) Bat, taem hem lukim olketa wea lovem Lazarus wea dae olketa sorre, Jesus tu “barava sorre tumas.” (John 11:33) Wanem nao mekem disfala perfect man showimaot mercy and sorre long olketa man wea sin? Main samting, hem bikos Jesus lovem pipol. Hem ‘barava hapi tumas long olketa pipol.’ (Provebs 8:31) Datfala love for pipol muvim hem for savve gud long hao iumi man ting long samting. Aposol John storyim hao Jesus savve gud long wei bilong olketa man.—John 2:25. w19.03 20 ¶1-2

Satan attakim Job, stealim evri riches bilong hem, killim dae olketa wakaman, and mekem pipol ting daonem hem. Hem attakim and killim dae tenfala pikinini bilong hem. Then Satan attakim body bilong Job, hem mekem Job garem boela long full body bilong hem. From waef bilong Job barava wari and sorre, hem talem Job for givap, tok spoelem God, and dae. Job seleva tu laek dae, nomata olsem, hem gohed faithful. Then Satan traem nara idea for attakim Job. Hem iusim thrifala fren bilong Job. Olketa visitim Job for staka day, bat olketa nating comfortim hem. Olketa talem toktok wea showimaot olketa nating tingim hem and tok daonem hem. Olketa sei God nao kosim olketa nogud samting hia for happen, and God nating tinghae nomoa long wei wea hem faithful. And olketa sei luk olsem Job hem nogud man dastawe hem fit for kasem olketa nogud samting hia.—Job 1:13-22; 2:7-11; 15:4, 5; 22:3-6; 25:4-6. w19.02 4 ¶7-8

Samfala kaen wei for fraet savve helpem iumi. Olsem example, iumi mas fraet for duim eni samting wea bae mekem Jehovah no hapi. Sapos Adam and Eve garem kaen wei for fraet olsem, bae tufala no disobeyim Jehovah. Bat tufala chus for disobey. Taem tufala duim datwan, ‘eye bilong tufala open’ wea minim tufala luksavve tufala sin nao. Tufala givim sin and dae long olketa pikinini bilong tufala. Bikos tufala luksavve tufala sin, tufala feel shame from tufala naked so tufala soengim leaf for kavarem body bilong tufala. (Jenesis 3:7, 21) Nomata iumi mas fraet for duim eni samting wea bae mekem Jehovah no hapi, iumi shud no fraetem dae. Jehovah openem wei for iumi kasem laef olowe. Sapos iumi duim sin and barava repent, Jehovah bae forgivim iumi. Hem bae forgivim iumi bikos long faith wea iumi showimaot long ransom sakrifaes bilong Son bilong hem. Wanfala important wei wea iumi showimaot iumi garem faith hem for dedicate long God and baptaes.—1 Pet. 3:21. w19.03 5-6 ¶12-13

Olketa Israelite garem staka reason for showimaot olketa tinghae long Jehovah. Hem mekem olketa kamap free taem hem mekem Tenfala Trabol kasem olketa bilong Egypt. Then God sevem olketa long Red Sea taem hem distroem full army bilong Egypt. Olketa Israelite tinghae and barava thankiu so olketa singim wanfala song for praisem Jehovah. Bat waswe, olketa gohed for tinghae long hem? Taem olketa Israelite feisim olketa niu challenge, olketa kwiktaem nomoa forgetim gud samting wea Jehovah duim for olketa. Then olketa showimaot olketa nating tinghae nomoa. (Sams 106:7) Wanem nao olketa duim? Olketa start for komplen againstim Moses and Aaron, wea minim olketa komplen againstim Jehovah. (Eksodas 16:2, 8) Jehovah feel nogud long wei wea pipol bilong hem no showimaot olketa tinghae. Bihaen, hem talemaot hao full genereson bilong olketa Israelite hia bae dae long wilderness, Joshua and Caleb nomoa bae go insaed Promis Land.—Nambas 14:22-24. w19.02 17 ¶12-13

Jesus no laek for mekhae long hemseleva long wei for mekem staka spesol samting for pipol rememberim dae bilong hem. Bat, hem talem olketa disaepol bilong hem hao wanfala taem long year olketa shud rememberim hem long wei for duim wanfala simpol Memorial. (John 13:15; 1 Cor. 11:23-25) Datfala simpol kaikai wea barava fitim, showimaot Jesus no praod. Iumi barava hapi bikos wei for hambol hem wanfala nambawan wei bilong King bilong iumi long heven. (Phil. 2:5-8) Hao nao iumi savve followim wei wea Jesus hambol? Hem nao for iumi tingim olketa narawan winim iumiseleva. (Phil. 2:3, 4) Tingim bak last naet wea Jesus stap long disfala earth. Jesus savve klosap nao bae hem safa and dae, nomata olsem, hem tingim olketa faithful aposol bilong hem wea bae sorre bihaen hem. So hem spendem last naet witim olketa for teachim, encouragem, and strongim olketa. (John 14:25-31) Jesus hambol taem hem showimaot hem tingim olketa narawan winim hemseleva. Datwan hem nambawan example for iumi! w19.01 21 ¶5-6

Waswe, heart bilong iu savve pampam evritaem iu ting for apim hand bilong iu for koment? Sapos olsem, ino iuseleva nomoa feel olsem. Tru samting nao, staka long iumi feel fraet lelebet taem iumi koment. For tok stret, kaen wei for fraet olsem maet hem wanfala gud saen. Hem showimaot iu hambol and ting long olketa narawan olsem olketa winim iu. Jehovah lovem wei for hambol. (Sams 138:6; Phil. 2:3) Bat Jehovah laekem tu for iu praisem hem and encouragem olketa brata and sista long olketa meeting. (1 Thess. 5:11) Hem lovem iu and hem bae helpem iu for no fraet. Tingim samfala Bible scripture wea savve helpem iumi. Bible sei iumi evriwan savve mistek staka taem long toktok bilong iumi and hao iumi savve talem datwan. (Jas. 3:2) Jehovah no expectim iumi for perfect and olketa brata and sista tu olsem. (Sams 103:12-14) Olketa hia spiritual famili bilong iumi and olketa lovem iumi. (Mark 10:29, 30; John 13:35) Olketa minim tu hao samfala taem iumi no talem nao samting wea iumi ting for talem. w19.01 8 ¶3; 10-11 ¶10-11

Hem no evritaem isi for duim datwan. Bat datwan hem no minim hem hard for iu duim nao. Jehovah laekem iu for enjoyim laef wea iu satisfae and hapi. Sapos God helpem iu, iu savve win, no just long taem wea iu young nomoa bat for full laef bilong iu. For helpem iumi minim diswan, tingim wanem iumi savve lanem taem olketa Israelite go tekovarem Promis Land. Taem olketa Israelite klosap kasem Promis Land, God no talem olketa for mas savve gud hao for faet or for kasem training for faet long war. (Diutronomi 28:1, 2) Bat, hem talem olketa hao olketa need for obeyim olketa komand bilong hem and trustim hem. (Josua 1:7-9) Long tingting bilong olketa man, datfala advaes barava no mek sense! Bat datwan hem best advaes, bikos Jehovah nao mekem pipol bilong hem for winim olketa Canaanite staka taem. (Josua 24:11-13) Tru nao, for obeyim God, man mas garem faith, and datfala faith evritaem mekem man kasem gud samting. Datwan kamap tru bifor, and hem tru distaem tu. w18.12 25 ¶3-4

Samfala distaem olketa stambol bikos olketa no minim samfala change wea kamap saed long wei for minim wanfala Bible verse. Olketa narawan maet followim olketa laea teaching bilong olketa apostate or olketa wea talem olketa laea abaotem iumi. Diswan hem samfala long olketa reason wea mekem samfala disaed for lusim Jehovah and kongregeson. (Heb. 3:12-14) Bat hem bae gud sapos olketa trustim Jesus olsem aposol Peter. Olketa narawan isisi lusim truth, and maet no luksavve nomoa long datwan. Man wea isisi lusim truth, hem olsem wanfala kanu wea isisi go farawe from shore. Bible warnim iumi for mas careful mekem iumi no “isisi go difren.” (Heb. 2:1) Staka taem, man wea isisi go difren from truth hem no min for duim datwan. Bat hem letem wei wea hem fren witim Jehovah hem kamap wik, and gogo maet hem no fren nao witim Jehovah. Wanem nao iumi savve duim mekem iumi no olsem? w18.11 9 ¶5-6

Waswe, iu barava laek for kasem moa training mekem iu duim gud waka bilong Jehovah? Sapos olsem, maet iu fit for attendim datfala Skul for Olketa Kingdom Evangelizer. Disfala skul trainim olketa brata and sista wea duim full-taem service for duim moa samting long ministry. Olketa wea apply for attendim disfala skul mas willing for acceptim eni assignment taem olketa graduate. Waswe, iu willing for attendim disfala skul mekem iu fit for duim moa samting for Jehovah? (1 Cor. 9:23) From iumi pipol bilong Jehovah, iumi willing for give, wea minim iumi garem gudfala fasin, iumi kaen, and iumi showimaot love. Iumi tingim each other evriday. Taem iumi duim datwan, iumi bae hapi and garem peace. (Gal. 5:22, 23) Nomata wanem samting iu feisim long laef, iu savve hapi taem iu followim example bilong Jehovah for willing for give and taem iu gohed waka tugeta witim hem!—Provebs 3:9, 10. w18.08 27 ¶16-18

Maet samwan ask olsem, ‘Waswe, eni reason stap for wanfala Christian divorce and marit moa?’ Jesus storyim tingting bilong hem abaotem divorce taem hem sei: “Eniwan wea lusim waef bilong hem and maritim narawan bae spoelem waef bilong hem bikos datwan hem adultery. And sapos wanfala woman hem lusim hasband bilong hem and maritim narawan, datwan hem adultery tu.” (Mark 10:11, 12; Luke 16:18) Jesus showimaot klia hem tinghae long marit and laekem olketa narawan for duim olsem tu. Sapos wanfala man divorcem faithful waef bilong hem, or wanfala woman divorcem faithful hasband bilong hem bikos long eni samting nomoa and hem maritim narawan, datwan hem adultery. Diswan hem bikos wei for divorcem marit partner hem no really finisim marit. Long eye bilong God tufala still wanfala body nomoa. And tu, Jesus sei man wea divorcem waef bilong hem wea innocent bae mekem waef bilong hem for duim adultery. Why nao olsem? Bikos long datfala taem, maet wanfala woman wea hasband divorcem hem maet feel olsem hem mas marit moa mekem hem garem samwan for sapotim hem saed long selen. Kaen marit olsem hem adultery. w18.12 11 ¶8-9

Wei wea Habakkuk story long Jehovah mekem hem garem peace long mind. Datwan mekem hem for disaed strong for weitim Jehovah for duim samting. Habakkuk talem moa samting wea hem disaedem taem hem sei: “Bae mi gohed fo stap kuaet, an weit nomoa fo datfala taem.” (Habakuk 3:16) Wanem nao iumi savve lanem from disison bilong Habakkuk? First samting, iumi mas no stop for prea long Jehovah nomata iumi kasem hard taem. Mek-tu, iumi need for lisin long wanem Jehovah talem insaed Bible and thru long organization bilong hem. Mek-thri, iumi shud patient for weitim Jehovah and barava trustim hao long taem wea hem markem, hem bae finisim wei wea iumi safa. Olsem Habakkuk, sapos iumi gohed for storyim evri samting long Jehovah, lisin long wanem hem talem, and weitim hem for duim samting, iumi bae garem peace long mind and datwan bae helpem iumi for no givap. Hope wea iumi garem bae strongim iumi for patient, and datwan bae helpem iumi for hapi nomata iumi feisim staka hard samting. Datfala hope helpem iumi for trustim hao Dadi bilong iumi long heven bae duim samting.—Rome 12:12. w18.11 15-16 ¶11-12

Wanem nao tingting bilong God abaotem wei for mekem man stambol? Jesus sei: “Man wea mekem wanfala disaepol for lusim faith bilong hem [or stambol], bae hem barava worse winim sapos olketa taengem wanfala big ston raonem nek bilong hem and torowem long sea.” (Mark 9:42) Disfala toktok showimaot klia hao wei for mekem narawan stambol hem barava serious samting! From Jesus barava followim wei bilong Dadi bilong hem, iumi sure Jehovah tu barava feel nogud taem man hem no kea sapos samting wea hem duim mekem narawan wea followim Jesus for stambol. (John 14:9) Waswe, iumi garem sem tingting olsem Jehovah and Jesus? Waswe, iumi mekem tingting bilong iumi for kamap olsem tingting bilong tufala? Samting wea iumi duim showimaot wanem? Olsem example, waswe sapos iumi laek werem wanfala kaen kaleko or lukluk wea maet mekem samfala long kongregeson for feel nogud, or mekem samwan garem feeling for laek duim sex? Waswe, love bilong iumi for olketa brata and sista bae mekem iumi for no chusim datkaen stael? w18.11 25 ¶9-10

Why nao hem important tumas for each wan long iumi faithful? Iu need for faithful bikos Satan tok spoelem Jehovah, and hem tok spoelem iu tu. Datfala bighed angel spoelem nem bilong Jehovah taem hem sei God hem nogud, selfish, and hem Ruler wea savve laea. Sorre nao, Adam and Eve saed witim Satan for againstim Jehovah. (Jenesis 3:1-6) Tufala garem staka chance taem tufala long Eden for strongim love bilong tufala for Jehovah. Bat taem Satan tok spoelem God, tufala showimaot tufala no lovem God long full heart. Nara kwestin kamap tu: Waswe, eni man savve gohed faithful long Jehovah bikos olketa lovem hem? Waswe, olketa man fit for faithful? Datfala kwestin kamap klia long taem bilong Job. (Job 1:8-11) Olsem iumi, hem tu no perfect and hem mekem olketa mistek. Bat, Jehovah lovem hem bikos hem barava faithful. w19.02 3-4 ¶6-7

Taem datfala bisnisman faendem wanfala pearl wea hem naes tumas winim olketa narawan, semtaem nomoa hem salem evri samting wea hem garem for baem datwan. Datfala pearl piksarem truth abaotem Kingdom bilong God. Samting wea Jesus storyim showimaot truth hem barava important tumas long olketa wea lukaotem datwan. (Matt. 13:45, 46) Taem iumi start for lane abaotem truth, wea hem nao truth abaotem Kingdom bilong God, and evri nambawan truth wea stap insaed Bible, iumi tu willing for let go long eni samting mekem iumi savve kasem datwan. Sapos iumi gohed for tinghae long truth, iumi bae no lusim. (Prov. 23:23, NW) Bat sorre tumas, samfala pipol bilong God no gohed tinghae long truth and gogo olketa lusim. Iumi no laek for duim datwan! Iumi need for followim advaes insaed long Bible for “gohed followim olketa tru teaching.” (3 John 2-4) Datwan minim truth mas first samting long laef and iumi showimaot datwan long wanem iumi duim. w18.11 9 ¶3

Datfala angel komandim olketa Israelite for march raonem Jericho wantaem insaed sixfala day and long mek-seven day olketa bae march raonem for sevenfala taem. Samfala soldia maet ting olsem: ‘Mifala weistim taem for wanem nomoa ia!’ Bat Leader bilong olketa Israelite, wea no eniwan savve lukim, hem barava savve gud long wanem hem duim. Samting wea happen hem strongim faith bilong olketa Israelite, and tu, hem mekem olketa no need for faet againstim olketa strongfala soldia bilong Jericho. (Josua 6:2-5) Wanem nao iumi savve lanem from disfala story? Samfala taem maet iumi no barava minim gud why nao organization duim samfala samting. Olsem example, maet firstaem iumi kwestinim why iumi iusim tablet and mobile long ministry, meeting, and for duim study seleva. Maet iumi luksavve long gud samting wea iumi savve kasem from datwan, sapos iumi iusim. Taem iumi lukim gud samting wea kamaot from olketa change hia nomata maet firstaem iumi daot lelebet, datwan bae strongim faith bilong iumi and wei wea iumi wan mind witim olketa brata and sista bilong iumi. w18.10 23 ¶8-9

From staka Jew garem semkaen tingting abaotem Messiah olsem olketa disaepol bilong Jesus, maet datwan mekem pipol long Galilee for laekem Jesus for kamap king bilong olketa. Olketa tingse Jesus nao fit for kamap leader bilong olketa from hem savve tumas hao for story, healim olketa wea sik, and provaedem tu kaikai for olketa wea hangre. Bihaen Jesus feedim samting olsem 5,000 man, hem luksavve long wanem olketa laek for duim. Bible sei: “From Jesus savve bae olketa kam holem hem for mekem hem king, hem go bak seleva moa long datfala maunten.” (John 6:10-15) Long next day, tingting wea olketa garem for mekem hem kamap king maet hem katdaon lelebet. Then Jesus explainim hao hem no kam for provaedem olketa material need bilong olketa, bat hem kam for teachim olketa abaotem Kingdom bilong God. Hem sei: “Iufala mas no waka for kaikai wea savve rotten, bat iufala mas waka for kaikai wea no savve rotten and wea mekem man laef olowe.”—John 6:25-27. w18.06 4 ¶4-5

From Jesus lovem pipol, hem sorre long olketa. Hem minim feeling bilong pipol wea no strong and wikdaon olsem longfala grass wea bend and lamp wea klosap for dae. Dastawe, hem kaen, tingim, and patient witim pipol. (Mark 10:14) Hem tru, iumi no savve minim and teachim pipol olsem Jesus! Bat iumi tu savve kaen and tingim pipol long territory. Iumi savve duim datwan taem iumi tingim wei wea iumi story long olketa, wanem taem for visitim olketa, and hao long iumi bae story witim olketa. Distaem staka million pipol “garekil and stap olobaot” bikos long wei wea olketa bisnis, bigman long gavman, and bigman long religion no tingim and ravem olketa. (Matt. 9:36) From datwan, staka pipol no trustim eniwan and no garem hope. Dastawe hem important for iusim naesfala toktok and story long kaenfala wei! Tru nao, staka pipol acceptim message wea iumi talemaot no bikos long savve bilong iumi abaotem Bible, or wei wea iumi savve explainim gud nomoa, bat bikos long wei wea iumi respectim and barava interest long olketa. w18.09 31-32 ¶13-14

Hao nao iumi showimaot iumi luksavve iumi needim God? Iumi savve duim datwan taem iumi gohed kaikaim spiritual kaikai, obeyim God, and mekem worship bilong iumi for God kamap main samting long laef. Sapos iumi duim olketa samting hia, iumi bae mekem grow wei for hapi. Datwan bae strongim faith bilong iumi hao olketa promis bilong God for future bae kamap tru. (Titus 2:13) Wei for fren gud witim Jehovah hem important samting wea iumi mas duim for kasem trufala hapi. Aposol Paul sei: “Iufala mas evritaem hapi bikos long Lord [Jehovah]. Mi talem moa, Iufala mas hapi!” (Phil. 4:4) For iumi fren gud witim Jehovah, iumi need for kasem wisdom from hem. (Prov. 3:13, 18) Bat for gohed hapi, hem important for iumi readim Bible and followim wanem iumi lanem. Jesus storyim hao hem important for iumi followim wanem iumi lanem taem hem sei: “From iufala savve long olketa samting hia, bae iufala hapi sapos iufala duim.” (John 13:17; Jas. 1:25) Datwan nao important samting wea savve helpem iumi fren gud witim God and for gohed hapi. w18.09 18 ¶4-6

Epaphras barava savve gud long olketa brata and sista, and barava lovem olketa. Nomata hem stap witim Paul long prison, hem no forgetim spiritual saed bilong olketa narawan. (Philem. 23) Hem showimaot hem no tingim hemseleva, bat hem duim samting for helpem olketa taem hem prea for olketa brata and sista. Wei for prea olsem hem garem paoa, especially taem iumi talem nem bilong olketa insaed prea bilong iumi. (2 Cor. 1:11; Jas. 5:16) Tingim olketa wea iu savve talem nem bilong olketa taem iu prea. Olsem Epaphras, staka brata and sista prea for olketa long kongregeson and olketa famili wea kasem hard taem or maet olketa wea mas mekem important disison or wea need for againstim temptation. And tu, iumi savve prea for olketa wea lusim samwan long dae. And olketa wea just kasem natural disaster or war, and wea stap long kantri wea garem problem saed long selen. Tru nao, staka brata and sista needim iumi for prea for olketa and olketa savve kasem gud samting from datwan. w18.09 5-6 ¶12-13

Paul no minim wei for givim material samting nomoa, bat hem minim tu wei for givim encouragement, advaes, and for helpem olketa narawan. (Acts 20:31-35) Samting wea Paul talem and duim, hem teachim iumi for willing for givim taem, strong, love bilong iumi, and for iumi tingim olketa narawan. Olketa wea duim research abaotem wei bilong iumi man, olketa tu faendaot hao wei for give savve mekem man hapi. Wanfala article storyim hao “pipol sei olketa barava hapi bihaen olketa duim gud samting for olketa narawan.” Olketa wea duim research sei wei for helpem narawan savve mekem man for garem olketa goal long laef and mekem laef interesting. Samfala savveman savve talem pipol for duim waka for helpem narawan mekem olketa healthy and hapi. Iumi no sapraes long samting wea olketa hia talem bikos Creator bilong iumi Jehovah, hem talem finis wei for give savve mekem iumi for hapi.—2 Tim. 3:16, 17. w18.08 22 ¶17-18

Profesi bilong Isaiah abaotem Jesus Christ encouragem iumi and givim iumi hope. Isaiah sei Jesus bae hem “no jajem man jes long wanem hemi herem an lukim, bat bae hemi jajem kot blong olketa pua pipol long stretfala wei.” (Aesaea 11:3, 4) Why nao diswan encouragem iumi? Bikos iumi stap long world wea staka pipol favorim narawan and ting daonem narawan. Iumi barava needim Judge olsem Jesus wea no judge followim samting wea hem lukim nomoa! Evriday iumi savve garem olketa difren tingting abaotem narawan. Bat, from iumi no perfect, maet iumi no fit for judgem samting long perfect wei olsem Jesus. Hem isi nomoa for letem samting wea eye lukim for affectim iumi. Nomata olsem, taem Jesus stap long earth, hem talem iumi for mas no judgem man from “samting wea iufala lukim,” bat for judgem man “followim stret samting.” So Jesus laekem iumi for no judgem narawan followim samting wea iumi lukim nomoa. w18.08 8 ¶1-2

Hem tru, iumi no savve herem Jehovah toktok kam from heven, bat hem story long iumi thru long Bible. Insaed Bible iumi savve kasem olketa instruction bilong hem. And tu, spirit bilong Jehovah muvim “datfala wakaman wea faithful and wise” for gohed provaedem spiritual kaikai for pipol bilong hem distaem. (Luke 12:42) Iumi kasem staka spiritual kaikai long olketa website bilong iumi and olketa pablikeson wea olketa printim. And tu, olketa video and audio recording. Toktok hia wea Jehovah talem, wea stap insaed Bible, mekem iumi sure Jehovah garem full kontrol and bae hem stretem evri nogud samting wea kamap bikos long Satan and nogud world bilong hem. Iumi disaed strong for evritaem herem wanem Jehovah talem. Sapos iumi duim datwan, bae iumi winim eni problem wea iumi feisim distaem and eni hard taem wea bae kamap long future. Bible sei olsem: “Iufala mas no givap, mekem bihaen iufala duim wanem God hem laekem, bae iufala kasem samting wea hem promisim.”—Heb. 10:36. w19.03 13 ¶17-18

From Moses bin leadim Israel for longtaem finis, Joshua maet ting olsem, ‘Waswe, pipol bilong God bae acceptim mi for kamap leader bilong olketa tu?’ (Diutronomi 34:8, 10-12) Wanfala buk explainim Josua 1:1, 2 olsem: Taem wea hem barava danger and hard tumas for wanfala kantri, hem nao taem wanfala leader changem narafala leader. Diswan happen bifor and nomata distaem tu. Hem fitim for Joshua wari abaotem datwan. Bat hem trustim Jehovah and kwiktaem followim instruction bilong hem. (Josua 1:9-11) God blessim Joshua from hem trustim hem. Bible storyim hao Jehovah nao leadim Joshua and olketa Israelite, bat hem iusim wanfala angel for duim diswan. Luk olsem disfala angel nao datfala Word, wea hem firstborn Son bilong God. (Eksodas 23:20-23; John 1:1) Jehovah helpem nation bilong Israel for change for followim datfala niu leader, Joshua. w18.10 22-23 ¶1-4

Jehovah savve long olketa wea willing for worshipim hem, and hem raetem nem bilong olketa insaed buk bilong hem for rememberim olketa man. For nem bilong iumi gohed stap insaed datfala buk bilong Jehovah for rememberim man, iumi mas duim samting. Malachi sei iumi mas ‘tinghevi long hem,’ wea minim iumi mas worshipim Jehovah and tinghae long nem bilong hem. Sapos iumi worshipim or mekhae long man or eni nara samting, bae Jehovah aotem nem bilong iumi from datfala buk bilong laef. (Eksodas 32:33; Sams 69:28) So hem no inaf for iumi promis for duim wanem Jehovah laekem and for baptaes. Tufala samting hia iumi duim wantaem nomoa, bat wei wea iumi worshipim Jehovah hem mas samting wea iumi duim evriday long laef bilong iumi. So evriday iumi mas gohed for showimaot iumi obeyim hem and iumi mas duim datwan for full laef bilong iumi.—1 Pet. 4:1, 2. w18.07 23-24 ¶7-9

Diswan no minim from iumi insaed truth for staka year finis iumi mature Christian nao, bat iumi need for waka hard for kamap mature. Iumi need for gohed mekem grow savve bilong iumi and wei for minim samting. So iumi need for readim Bible evriday. (Sams 1:1-3) Taem iu readim Bible evriday, iu bae savve gud long olketa law and principle bilong Jehovah and bae iumi minim gud toktok bilong God. Main important law wea Christian followim hem nao law bilong love. Jesus sei olsem long olketa disaepol bilong hem: “Sapos iufala lovem iufala evriwan, pipol bae savve iufala olketa disaepol bilong mi.” (John 13:35) James, haf brata bilong Jesus, hem sei love hem “datfala law bilong king.” (Jas. 2:8) Paul sei: “Man wea lovem narawan hem barava followim law.” (Rome 13:10) Iumi shud no sapraes long hao love hem barava important, bikos Bible sei “God hem love.”—1 John 4:8. w18.06 19 ¶14-15

Nomata olketa Israelite bighed againstim Jehovah, Moses nao barava kros tumas. Wei wea hem no kontrolem hemseleva mekem hem no tingim samting wea bae kamaot from toktok bilong hem. Moses letem samting wea olketa narawan duim for mekem hem no gohed luk long Jehovah. Long firstaem, Moses duim stret samting taem pipol komplen abaotem wata. (Eksodas 7:6) Bat gogo, maet hem taed and feel wikdaon bikos for staka year hem deal witim olketa Israelite wea bighed. Maet Moses tingim nomoa feeling bilong hemseleva winim wei for hem mekhae long Jehovah. Sapos wanfala faithful profet olsem Moses, hem luk difren from Jehovah and hem sin, sem samting savve happen long iumi tu. Olsem Moses, iumi klosap for go insaed niu world wea Jehovah promisim. (2 Pet. 3:13) No eniwan long iumi laek misstim datfala spesol privilege. Bat for go insaed niu world, iumi need for gohed luk long Jehovah and evritaem duim wanem hem laekem.—1 John 2:17. w18.07 15 ¶14-16

Satan hard for forcem pipol for duim samting wea olketa no laek for duim. (Jas. 1:14) Staka pipol no luksavve olketa duim samting wea Satan laekem. Bat bihaen olketa lanem truth, olketa mas disaed sapos olketa bae saedem Jehovah or Satan. (Acts 3:17; 17:30) Sapos iumi disaed strong for duim wanem God laekem, Satan bae hard for duim eni samting for spoelem wei wea iumi faithful long Jehovah. (Job 2:3) Samfala nara samting tu Satan and olketa demon no fit for duim long iumi. Olsem example, no eni scripture storyim hao Satan and olketa demon fit for savve long samting wea stap long mind and heart bilong olketa man. Jehovah and Jesus nomoa savve duim datwan. (Fas Samuel 16:7; Mark 2:8) Sapos iumi traem best for talem and duim samting wea God laekem, iumi sure Jehovah bae no letem Devil for duim eni samting wea bae barava spoelem iumi. (Sams 34:7) Iumi need for savve long enemy bilong iumi, bat iumi shud no fraetem hem. Nomata iumi no perfect Jehovah savve helpem iumi for winim Satan. Sapos iumi againstim Devil bae hem ranawe from iumi.—Jas. 4:7; 1 Pet. 5:9. w18.05 26 ¶15-17

Tingim sapos samwan plan for go long wanfala important hipap wea bae kamap long nara taon wea stap farawe lelebet. For go long there, hem need for go long bas. Hem go long ples for faendem bas bat staka bas long there. Hem need for go long bas wea go long datfala ples. Tingim sapos hem tekem bas wea go long difren ples, datwan bae mekem hem go long rong ples. Olketa young wan distaem feisim kaen samting olsem tu taem olketa mas disaedem staka samting long laef wea maet mekem olketa konfius. Bat sapos iufala young wan savve wanem nao iu laek duim long laef bilong iu datwan bae helpem iu for mekem olketa disison long laef. Waswe, bae iu iusim laef bilong iu for duim samting wea Jehovah laekem? Diswan minim for followim advaes bilong Jehovah taem iu mekem olketa disison long laef, olsem saed long education, waka, wei for marit and garem pikinini. And hem minim tu for garem olketa spiritual goal. Taem olketa young wan iusim laef bilong olketa for duim samting wea Jehovah laekem, datwan bae mekem olketa kasem staka blessing long laef. w18.04 25 ¶1-3

Jephthah duim wanem hem promisim and sendem gele bilong hem long Shiloh for waka long tabernacle for full laef bilong hem. (Jajis 11:30-35) Masbi diswan hard for Jephthah, bat hem barava hard go moa for gele bilong hem wea willing for followim wanem dadi bilong hem disaedem. (Jajis 11:36, 37) Diswan minim hem bae no marit or garem pikinini, and from datwan laen bilong dadi bilong hem finis nao. Hem barava needim eniwan for comfortim and encouragem hem. Bible sei: “Olketa garem wanfala kastom wea evri yia olketa gele blong Israel i save goaot fo fofala de fo tingim dota blong Jefta, disfala man blong Gilead.” (Jajis 11:39, 40) Distaem tu hem gud for iumi praisem and encouragem olketa singol wan wea iusim laef bilong olketa for “duim waka bilong Lord.”—1 Cor. 7:32-35. w18.04 17 ¶10-11

Staka angel joinim Satan for againstim Jehovah. Bifor datfala Flood, Satan switim samfala angel hia for durong witim olketa young gele long earth. Bible storyim diswan taem hem iusim datfala tokpiksa abaotem datfala bigfala snek wea pullim smol haf long olketa star for go daon long earth. (Jenesis 6:1-4; Rev. 12:3, 4) Taem olketa angel hia lusim famili bilong God long heven, olketa letem Satan for kontrolem olketa nao. Iumi shud no tingse olketa bighed angel hia no organize gud. Satan laek for garem wanfala Kingdom olsem Jehovah, so hem mekem wanfala gavman wea hem nao king insaed. Hem organizem tu olketa demon, hem givim paoa long olketa, and olketa kamap ruler bilong disfala world. (Eph. 6:12) Satan iusim organization bilong hem for kontrolem evri gavman bilong man long earth. w18.05 23 ¶5-6

Samfala taem God showimaot love for iumi olsem wanfala dadi wea stretem pikinini bilong hem. David tinghae long wei wea God stretem hem. Hem ting raonem tingting bilong God and hem mekem tingting bilong hem for kamap olsem tingting bilong God, and hem letem datwan for changem wei bilong hem. Taem iu duim sem samting, iu tu bae barava lovem God and barava laek for obeyim hem. And tu, iu bae kamap strong long spiritual wei. Wanfala sista wea nem bilong hem Christin, hem sei: “Taem mi duim research and ting raonem wanem mi readim, mi feel olsem Jehovah raetem datwan for mi!” Tru nao, wei for garem spiritual tingting savve mekem iu barava wise and mekem iu garem wei for luksavve, wea datwan savve helpem iu for ting long disfala world and future bilong world long sem wei wea God ting long datwan. Why nao God givim iu kaen savve and wei for minim samting olsem? Hem laekem iu for savve long samting wea important long laef, for mekem olketa wise disison, and for no fraet taem iu luk forward for samting wea bae kamap long future!—Aesaea 26:3. w18.12 26 ¶9-10