December

Sapos iumi no kontrolem toktok blo iumi, datwan savve kosim staka problem. Olsem example, sapos iu meetim samwan from kantri wea olketa banim waka blo iumi, waswe, bae iu askem hem for storyim waka blo iumi lo datfala kantri? Hem tru, maet iu ask bikos iu laek for savve abaotem olketa. Iumi lovem olketa brata and sista and laek for savve wanem nao happen lo olketa. And tu, iumi laek prea and storyim lo Jehovah wat nao happen. Nomata olsem, lo kaen situation olsem iumi shud kontrolem toktok blo iumi. Sapos iumi putim pressure lo samwan for hem storyim information wea olketa narawan shud no savve, datwan showimaot iumi no lovem datfala brata or sista, and olketa narawan wea trustim hem for no talemaot datfala information abaotem waka blo olketa. Tru nao, no eniwan lo iumi laek for addim go moa hard taem wea olketa brata and sista blo iumi kasem lo kantri wea olketa banim waka blo iumi. And tu, no eni brata or sista wea serve lo olketa kantri olsem bae laek storyim hao olketa Witness lo there duim ministry or olketa nara spiritual samting. w20.03 21 ¶11-12

God no laekem olketa man for dae. Bat for Adam and Eve laef olowe, tufala mas obeyim Jehovah. Jehovah givim disfala simpol komand long tufala: “Wanfala tri nomoa hemi stap wea i tambu fo yu kaikaim frut blong hem. Hem nao tri ya wea frut blong hem save givim yu save long olketa wei wea i gud an olketa wei wea i nogud. Tri ya, sapos yu kaikaim frut blong hem, bae yu dae nao long sem de wea yu kaikaim.” (Jenesis 2:16, 17) Bihaen datwan, Satan start for kosim problem. Hem iusim wanfala snek for talem olketa toktok wea stap long text bilong iumi tuday. Sorre nao, Eve bilivim laea wea hem talem and hem kaikaim datfala frut. Bihaen, hasband bilong hem tu kaikaim datfala frut. (Jenesis 3:6) From datwan, sin and dae kasem evri man long earth. (Rome 5:12) Olsem God talem, gogo Adam and Eve dae nao. Bat Satan no stop for laea abaotem dae. Bihaen, hem startim moa olketa nara laea. Wanfala long olketa laea hia, hem teaching abaotem hao taem man dae, body nomoa bae finis bat nara part long datfala man bae gohed for laef long ples wea olketa spirit savve stap. Hem talem datfala laea long staka difren wei, and hem laea long staka pipol start kam long bifor kam kasem distaem.—1 Tim. 4:1. w19.04 14-15 ¶3-4

From tingting bilong olketa pikinini no mature yet, olketa no savve hao for ting raonem samting or luksavve hao for stap klia long danger. So hem isi tumas for samwan wea laek for abusim pikinini for laea long hem. Olketa savve talem olketa laea wea teachim pikinini for bilivim olketa samting wea nating tru. Olsem wei for sei, “Iu nao mekem mi duim diswan,” or, “No storyim bikos diswan hem wanfala secret,” or, “Sapos iu talem bae no eniwan bilivim iu,” and tu, maet olketa sei wei for wanfala adult and pikinini duim samting saed long sex hem normal wei for showimaot love. Olketa laea olsem savve barava spoelem mind bilong pikinini and maet hem tek longtaem bifor hem minim olketa kaen tingting olsem hem no tru. Taem pikinini olsem growap maet hem ting long hemseleva olsem hem iusles, nogud, and hem no fit for eniwan lovem and comfortim hem. So iumi luksavve hao sexual abuse savve barava affectim olketa pikinini for staka year. Iumi stap long olketa last day. Pipol bae no garem stretfala tingting, and “wei bilong olketa nogud man and olketa man for laea bae worse moa.”—2 Tim. 3:1-5, 13. w19.05 15 ¶7-8

Hao nao Jesus teach? Wanfala wei Jesus teachim pipol hem thru long wanem hem talem. Toktok bilong hem garem paoa bikos hem teachim truth abaotem God, hem storyim plan bilong God for olketa man, and showim hao Kingdom bilong God nomoa savve finisim evri nogud samting wea mekem pipol safa. (Luke 24:19) Jesus teachim pipol thru long wanem hem duim. Evri samting wea hem duim hem example for olketa disaepol followim. (John 13:15) Wanem taem nao Jesus teach? Hem teach taem hem duim ministry bilong hem long earth. (Matt. 4:23) And tu, bihaen hem resurrect hem gohed for teachim olketa disaepol. Olsem example, hem story witim samting olsem 500 disaepol and givim komand for ‘teachim pipol for kamap disaepol bilong hem.’ (Matt. 28:19, 20; 1 Cor. 15:6) From Jesus hem hed bilong kongregeson, hem gohed for teachim olketa disaepol bilong hem nomata hem go bak long heven. Olsem example, long 96 C.E., Christ talem aposol John for encouragem and givim kaonsel long olketa anointed Christian.—Col. 1:18; Rev. 1:1. w19.05 3 ¶4-5

Distaem, staka pipol mas waka hard for kasem selen wea olketa needim. Staka long olketa brata and sista bilong iumi mas waka for staka hour mekem olketa kasem inaf selen for lukaftarem famili saed long kaikai, kaleko, and ples for stap. Staka narawan mas iusim staka hour for travel evriday for go and kam bak from waka. Staka mas duim olketa hevi waka. Kasem evening, olketa brata and sista bilong iumi taed nao. So long taem olsem, man bae no feel laek for duim study seleva. Bat nomata olsem, iumi mas mek sure iumi garem taem for study, wea minim for barava studyim gud Bible and olketa nara pablikeson. Diswan barava important bikos wei wea iumi fren witim Jehovah and for iumi kasem laef olowe hem depend long datwan! (1 Tim. 4:15) Samfala mas wekap early long morning and duim study taem haos hem kwaet and mind hem fresh. Olketa narawan markem taem wea kwaet long end long day for study and ting raonem Bible and olketa pablikeson bilong iumi. w19.05 26 ¶1-2

Olketa change olsem no savve kamap seleva, and hem savve tek longtaem. Iumi maet need for waka hard lo diswan for staka year. (2 Pet. 1:5) Iumi mas barava traem best for changem mind and heart blo iumi. First samting wea iumi need for duim hem for prea. Iumi mas prea olsem man wea raetem psalm wea sei: “God, plis yu mekem tingting blong mi fo hemi klin finis. Plis yu mekem mi fo kamap niu an stap strong olowe.” (Sams 51:10) Iumi mas luksavve iumi need for changem datfala strong tingting wea kontrolem wei blo iumi and askem Jehovah for helpem iumi. Mek-tu important samting wea iumi savve duim hem for ting raonem wanem iumi lanem lo Bible. Evriday taem iumi readim Bible, hem gud for iusim samfala taem for ting raonem samting wea iumi readim, or ting raonem wanem nao olketa tingting and feeling wea iumiseleva need for changem. (Sams 119:59; Heb. 4:12; Jas. 1:25) Iumi mas lukluk gud lo iumiseleva for faendaot nogud iumi garem eni fasin wea showimaot iumi laek for followim olketa idea or tingting blo man. Iumi mas honest for luksavve lo olketa wik point blo iumiseleva and waka hard for aotem datwan. w19.06 8 ¶1; 10 ¶10-11; 12 ¶12

Taem iu mekem disison, iu mas markem taem for duim wanem iu disaedem and no changem datwan. No tingse wanfala best taem hem stap for duim samting, datfala taem wea iu tingim maet bae hem no kamap. (Eklesiastes 11:4) Mas careful for no letem olketa samting wea no important for tekem taem and strong blo iu from wei for duim olketa samting wea moa important. (Phil. 1:10) Sapos hem fitim, markem taem for duim olketa samting lo taem wea no eniwan bae disturbim iu. Letem olketa narawan savve iu bae busy lo datfala taem. Maet hem gud for offem phone blo iu or chekim olketa e-mail or social media bihaen. Gud samting wea kamaot from disison blo iu, hem olsem taem iu arrive lo ples wea iu laek for go lo hem. Sapos iu barava laek for kasem datfala ples, iu bae gohed for go nomata road hem blok and iu need for followim difren road moa. Lo sem wei tu, sapos iumi tingim gud samting wea bae kamaot from wanem iumi disaedem, iumi bae no kwiktaem givap taem iumi feisim samfala samting wea maet stopem or changem disison blo iumi.—Gal. 6:9. w19.11 30 ¶17-18

Wanem nao main reason why iu disaed for baptaes? From wei wea iu studyim gud Bible, iu lanem staka samting abaotem Jehovah, olketa wei blo hem and hao hem duim samting. From olketa samting iu lanem abaotem hem kasem heart blo iu, datwan muvim iu for barava lovem hem. Love blo iu for Jehovah nao mas main reason why iu disaed for baptaes. Nara reason why iu disaed for baptaes, hem bikos iu acceptim olketa tru samting wea Bible teachim. Tingim wanem Jesus talem taem hem givim datfala komand for teachim pipol for kamap disaepol. (Matt. 28:19, 20) Olsem Jesus talem, olketa wea laek for kamap disaepol mas baptaes lo “nem bilong Dadi and bilong Son and bilong holy spirit.” Wanem nao diswan minim? Iu mas barava bilivim witim full heart blo iu olketa tru samting wea Bible teachim abaotem Jehovah, Son blo hem Jesus, and holy spirit. Olketa tru teaching hia garem bigfala paoa and savve barava kasem heart blo iu. w20.03 9 ¶8-9

Jehovah sendem olketa angel, no for warnim Lot nomoa bat for helpem hem for ranawe from nogud samting wea bae kasem Sodom. (Jenesis 19:12-14, 17) Olsem tu, iumi maet need for warnim brata blo iumi sapos iumi luksavve hem start for duim samting wea bae mekem hem kasem trabol. Nomata sapos hem no kwiktaem for followim kaonsel wea hem kasem from Bible, iumi need for patient. Iumi savve olsem tufala angel wea helpem Lot. Winim wei for givap and no laek helpem brata blo iumi, iumi shud trae faendem eni wei for helpem hem. (1 John 3:18) Olsem taem iumi holem hand blo samwan for helpem hem, maet iumi need for duim samting for helpem brata blo iumi for followim olketa gudfala advaes wea hem kasem. Hem isi for Jehovah tingim nomoa olketa mistek blo Lot, bat hem no duim olsem. Jehovah muvim aposol Peter for talem hao Lot hem wanfala raeteous man. (Sams 130:1-3) Waswe, iumi ting lo olketa brata blo iumi olsem hao Jehovah ting lo Lot? Sapos iumi ting lo olketa gud samting abaotem olketa brata and sista blo iumi, datwan bae helpem iumi for patient witim olketa. Taem olsem, bae hem moa isi for olketa acceptim help wea iumi laek givim. w19.06 21 ¶6-7

Sapos gavman lo ples iu stap banim waka blo iumi, maet iu ting for muv lo nara kantri wea iu free for worshipim Jehovah. Diswan hem disison blo iuseleva and no eniwan savve disaedem datwan for iu. For helpem iu disaed, hem gud for ting raonem wanem olketa Christian lo first century duim taem olketa kasem persecution. Olketa disaepol lo Jerusalem muv lo olketa nara ples olsem Judea and Samaria and go kasem olketa farawe ples olsem Phoenicia, Cyprus, and Antioch tu. (Matt. 10:23; Acts 8:1; 11:19) Bat bihaen narataem wea persecution kasem olketa Christian lo first century, aposol Paul disaed for no muv go lo nara ples wea olketa no againstim preaching waka. (Acts 14:19-23) Wanem nao iumi savve lanem from olketa story hia? Each hed blo famili mas mekem disison sapos olketa laek for muv lo nara ples. Bifor hem disaed, hem shud prea and barava ting raonem situation blo famili blo hem and wanem nao gud and nogud samting wea savve kamap from wei for muv. Iumi shud no judgem eniwan abaotem disison blo olketa. w19.07 10 ¶8-9

Jesus talem iumi for “go and teachim pipol long evri kantri for kamap disaepol.” (Matt. 28:19) Iumi laek for teachim Bible student abaotem wanem Jesus laekem olketa disaepol blo hem for duim, and tu, iumi need for helpem hem for savve hao for followim wanem hem lanem. Taem hem stragol for followim olketa Bible principle, iumi mas patient for helpem hem. Samfala kwiktaem for changem tingting and wei blo olketa insaed tu-thri month nomoa, bat samfala savve tek longtaem. Wanfala missionary lo Peru, garem wanfala experience wea showimaot why hem gud for patient. Missionary hia sei: “Mi studyim tufala buk witim Bible student blo mi Raúl. Bat hem still feisim samfala challenge lo laef blo hem. Hem and waef savve raoa olowe, hem savve tok swear, and olketa pikinini faendem hem hard for respectim hem. Hem evritaem kam lo meeting, so mi gohed for visitim hem and helpem hem and famili blo hem. Gogo, winim thrifala year bihaen, hem fit for baptaes.” w19.07 15 ¶3; 19 ¶15-17

Tingim hao aposol Paul gohed for traem best blo hem. Hem prisoner lo wanfala haos lo Rome. So hem no free for go preach. Nomata olsem, hem busy for preach lo olketa wea visitim hem and raetem leta lo olketa kongregeson wea stap farawe. Paul luksavve hem mas olsem Christ and barava waka hard go kasem end. Dastawe hem comparem laef blo wanfala Christian witim wanfala resis. (1 Cor. 9:24-27) Lo wanfala resis, man wea ranran tingim nomoa for kasem end and hem no laekem eni samting for disturbim hem. Olsem example, samfala resis savve go thru lo taon wea garem olketa stoa and nara samting wea savve disturbim man. Iu tingse man wea ran bae stop and lukluk firstaem lo olketa samting wea olketa advertisem? Nomoa nao, bikos hem laek for win! Lo resis for kasem laef, iumi tu mas stap klia lo olketa samting wea savve disturbim iumi. Sapos iumi tingim nomoa goal blo iumi, then iumi bae traem best olsem Paul, mekem iumi winim datfala prize! w19.08 3 ¶4, 7

Taem iumi followim olketa standard blo God lo laef blo iumi, olketa relative maet faendem hem hard for acceptim wanem iumi duim. Staka taem, first samting olketa lukim hem wei wea iumi no join witim olketa lo celebration blo false religion and no joinim politik. Lo firstaem, samfala relative maet kros lo iumi. (Matt. 10:35, 36) Bat iumi shud no givap. Sapos iumi stop for helpem olketa for luksavve lo wanem iumi bilivim, hem olsem iumi judgem olketa dat olketa no fit for kasem laef olowe. Jehovah no givim iumi waka for judge, bat hem givim datfala assignment lo Jesus. (John 5:22) Sapos iumi patient, gogo maet olketa relative blo iumi bae willing for lisin lo message blo iumi. Iumi mas strong bat iumi mas kaen tu, nomata sapos iumi feisim olketa hard taem. (1 Cor. 4:12b) For olketa relative luksavve hao wei for worshipim Jehovah hem important samting lo iumi datwan hem savve tek taem. w19.08 17 ¶10, 13; 18 ¶14

“Taem mi ting raonem olketa hard taem wea mi bin go thru lo hem, mi luksavve, sapos miseleva nomoa hard for mi deal witim datwan.” Waswe, enitaem iu talem kaen toktok olsem? Yes, staka talem sem samting. Maet iu talem datwan bihaen iu deal witim wanfala nogud sik or taem samwan wea iu lovem hem dae. Iu luksavve why iu fit for gohed each day, hem bikos holy spirit blo Jehovah nomoa givim iu “strong wea winim strong bilong man.” (2 Cor. 4:7-9.) Iumi needim tu holy spirit for helpem iumi againstim disfala nogud world. (1 John 5:19) And tu, iumi needim strong for againstim “bigfala sekson bilong olketa demon.” (Eph. 6:12) Holy spirit blo Jehovah savve strong iumi for duim evri samting wea iumi need for duim nomata iumi kasem hard taem. Taem aposol Paul kasem olketa hard taem hem feel olsem hem fit for gohed waka nomoa and for duim gud ministry blo hem bikos hem depend lo “paoa bilong Christ.”—2 Cor. 12:9. w19.11 8 ¶1-3

Bible nomoa hem only buk wea barava stret and wea explainim wanem Jesus duim for iu. Lane for lovem Jesus, and love blo iu for Jehovah bae grow. Why nao olsem? Bikos Jesus showimaot lo perfect wei olketa wei blo Dadi blo hem. So taem iumi gohed lane abaotem Jesus, datwan bae helpem iumi for savve gud and tinghae lo Jehovah. Tingim wei wea Jesus kaen lo olketa wea pipol ting daonem, olsem olketa wea poor, sik, and wea wik. Tingim tu olketa gud advaes wea hem givim iu, and hao laef blo iu kamap gud taem iu followim olketa advaes blo hem. (Matt. 5:1-11; 7:24-27) Love blo iu for Jesus savve kamap moa strong taem iu ting abaotem sakrifaes blo hem wea mekem iumi fit for kasem forgiveness for olketa sin blo iumi. (Matt. 20:28) Taem iu luksavve dat Jesus willing for dae for iu, datwan bae muvim iu for repent and duim samting for kasem forgiveness from Jehovah. (Acts 3:19, 20; 1 John 1:9) And taem iu start for lovem Jesus and Jehovah, datwan bae mekem iu for laek stap witim pipol wea lovem hem tu. w20.03 5-6 ¶10-12

Wanfala brata maet start for tingse hem nomoa qualify for wanfala assignment. Or wanfala waef maet ting ‘Hasband blo mi nao hem qualify winim datfala brata!’ Bat sapos iumi really hambol, iumi mas stap klia lo wei for garem kaen praod tingting olsem. Wanem nao iumi savve lanem from wei blo Moses taem olketa narawan kasem olketa privilege? Moses tinghae lo assignment blo hem for leadim nation blo Israel. Hao nao tingting blo Moses taem Jehovah givim samfala waka blo Moses for olketa narawan duim? Hem nating jealous. (Nambas 11:24-29) Hem hambol for letem olketa narawan duim waka wea hem duim for judgem olketa pipol. (Eksodas 18:13-24) Taem olsem, datwan helpem olketa Israelite bikos olketa garem staka man wea waka olsem olketa Judge. Datwan showimaot Moses tingim olketa pipol winim wei for garem staka privilege. Datwan hem nambawan example! Iumi mas remember sapos iumi laekem Jehovah for iusim iumi for duim waka blo hem, iumi mas tingim wei for hambol hem important winim wei for savve tumas hao for duim waka. w19.09 5-6 ¶13-14

Iumi no savve wanem nao olketa reason wea olketa nation maet iusim for sei olketa fit for attakim Bigfala Babylon. Olketa maet sei olketa religion nao mekem hem hard for garem peace and sei olketa evritaem poke nose lo politik. Or maet olketa sei olketa religion hipimap staka selen tumas and garem staka property. (Rev. 18:3, 7) So luk olsem lo disfala attak, maet no evri member blo olketa religion hia bae distroe. Bat, luk olsem olketa religion nao olketa nation bae finisim. Taem olketa religion hia distroe, olketa wea member blo religion hia bifor bae luksavve olketa leader blo olketa no duim wanem olketa promisim, and taem olsem, olketa bae no laek luksavve lo religion blo olketa. Wei wea bigfala Babylon finis hem bae happen insaed shortfala taem nomoa. (Rev. 18:10, 21) Jehovah hem promis hao hem bae no letem bigfala trabol for “gohed for longfala taem” mekem “olketa wea hem chusim” and tru religion bae no distroe.—Mark 13:19, 20. w19.10 15 ¶4-5

Olketa mami, maet parents blo iu savve kwiktaem for kros, and tok raf lo iu. From hem nao hao iu growap, maet iu tingse datwan hem normal wei for treatim pikinini. So nomata iu savve finis lo olketa standard blo Jehovah, maet iu faendem hem hard for patient and isi witim pikinini blo iu, especially lo taem wea iu taed and pikinini hem noti. (Eph. 4:31) Lo taem olsem, iu need for barava depend lo Jehovah thru lo prea. (Sams 37:5) Nara challenge hem nao wei wea hem no isi for olketa showimaot hao olketa lovem pikinini blo olketa. Olketa maet growap lo famili wea parents no garem klos wei for fren witim pikinini. Sapos iu kam from datkaen famili, no duim olsem moa lo pikinini blo iu. Mami wea stap anda lo Jehovah mas lane for showimaot love lo olketa pikinini blo hem. Hem maet hard lelebet for hem change, bat hem savve duim datwan, and datwan savve mekem mami and full famili for hapi. w19.09 18-19 ¶19-20

Samwan wea worshipim Jehovah and lo semtaem hem spendem staka taem and strong blo hem for kasem olketa riches blo disfala world, hem olsem hem trae for waka for tufala boss. From datwan, bae hem no isi for hem gohed worshipim Jehovah nomoa. Klosap end blo first century C.E., olketa lo kongregeson lo Laodicea tok praod and sei: “Mi rich and garem staka samting and mi no needim eni samting.” Bat hao Jehovah and Jesus luk lo olketa hia, ‘olketa no hapi, olketa poor, olketa blind, and olketa naked.’ Jesus kaonselem olketa, no from olketa rich bat bikos love wea olketa garem for riches hem spoelem wei wea olketa fren witim Jehovah. (Rev. 3:14-17) Sapos iumi luksavve datfala feeling for laekem riches hem start for grow insaed heart blo iumi, iumi mas kwiktaem for stretem datwan. (1 Tim. 6:7, 8) Sapos nomoa, heart blo iumi bae divaed, and Jehovah bae no acceptim worship blo iumi. Hem laekem iumi for worshipim hem nomoa.—Diutronomi 4:24. w19.10 27 ¶5-6

Datfala Greek toktok wea olketa transleitim for “leadim,” hem minim for “karem go,” or for “tekem go” wanfala samting. Lo buk blo Acts, Luke iusim wanfala Greek word wea klosap semsem tu, taem hem storyim wei wea wind “pushim go” wanfala ship. (Acts 27:15) So taem aposol Peter storyim hao holy spirit muvim olketa wea raetem Bible, hem iusim disfala toktok “tekem go,” wea wanfala man for raet hem sei “datwan hem wanfala tokpiksa wea join witim ship wea sail.” So hem olsem Peter hem sei, wei wea wind savve tekem go wanfala ship for kasem ples olketa laek for go, holy spirit muvim olketa profet and olketa wea raetem Bible for duim waka blo olketa. Datfala man for raet hem sei moa: “Hem olsem olketa profet apim sail blo olketa.” Then Jehovah duim part blo hem. Hem givim kam wind wea hem nao holy spirit. Olketa man wea raetem Bible duim part blo olketa. Olketa waka tugeta followim lead blo datfala spirit. And distaem, olsem wind lo raf sea wea tekem go boat, holy spirit muvim iumi thru lo olketa hard taem and kasem niu world wea God promisim. w19.11 9 ¶7-9

Bat iumi mas no letem olketa problem hia for affectim tumas tingting blo iumi. Sapos iumi duim olsem, maet iumi bae no tingim nao nambawan hope wea Jehovah givim lo iumi. (Rev. 21:3, 4) Feeling for discourage savve mekem iumi no strong and for laek givap. Tingim wanfala sista lo United States, hem gohed for keepim faith blo hem strong nomata hem lukaftarem hasband blo hem wea barava sik. Hem sei: “Samting wea kasem mifala hem mekem mifala stress tumas and discourage samfala taem, bat hope blo mifala hem strong. Mi barava tinghae lo evri information wea mifala kasem wea encouragem and strongim faith blo mifala. Olketa encouragement and advaes hia mifala barava needim. Hem helpem mifala for gohed servem Jehovah and for no givap.” Wanem disfala sista talem helpem iumi for luksavve iumi savve winim wei for discourage! Lo wanem wei? Taem iumi ting lo olketa hard taem olsem hem test from Satan. Trustim hao Jehovah bae comfortim iu. And gohed for tinghae lo olketa spiritual kaikai wea hem provaedem. w19.11 16 ¶9-10

Especially olketa elder nao mas followim disfala Bible principle. Wanfala elder mas luksavve dat hem mas no storyim lo waef blo hem eni confidential information wea samwan lo kongregeson storyim lo hem. Sapos hem duim datwan, olketa narawan bae no trustim hem and datwan bae spoelem gudfala nem blo hem. Olketa wea kasem responsibility lo kongregeson mas no garem dabol tongue or wei for laea. (1 Tim. 3:8) Datwan minim olketa shud no laea or laek for gossip. Sapos elder lovem waef blo hem, hem bae no talem information wea waef no need for savve. Waef savve helpem hasband blo hem for garem gudfala nem taem hem no putim pressure lo hasband for storyim olketa samting wea shud confidential. Taem waef followim disfala advaes, datwan showimaot hem sapotim hasband and hem respectim olketa wea trustim hasband blo hem. And samting wea barava important, hem mekem Jehovah hapi bikos hem help for keepim peace and wan mind lo kongregeson.—Rome 14:19. w20.03 22 ¶13-14

Lo 1512 B.C.E. taem olketa standapim tabernacle lo botom Maunt Sinai. Moses tekem ceremony for appointim Aaron and olketa son blo hem for kamap priest. (Eksodas 40:17; Levitikas 9:1-5) Wanem nao Jehovah duim for showimaot hem appruvim olketa niu priest hia? Taem Aaron and Moses blessim olketa pipol, Jehovah sendem kam fire and bornem evribit datfala sakrifaes wea stap lo altar. (Levitikas 9:23, 24) Taem olketa appointim hae priest, wanem nao datfala spesol fire wea kam daon from heven hem showimaot? Hem showimaot Jehovah appruvim and sapotim wei wea olketa chusim Aaron and olketa son blo hem for kamap priest. Taem olketa Israelite lukim kliafala pruv hao Jehovah sapotim olketa priest, olketa luksavve hao olketa tu need for sapotim olketa priest. Waswe, datwan fitim iumi distaem? Yes! Olketa priest lo Israel piksarem wanfala samting wea moa important winim datwan. Hem nao 144,000 priest wea bae rul witim Christ lo heven. (Heb. 4:14; 8:3-5; 10:1) Iumi barava sure Jehovah hem gaedem and hem kaen tumas for blessim organization blo hem distaem. w19.11 23 ¶13; 24 ¶14, 16

Taem hem lo Corinth, aposol Paul hem stap and waka witim Aquila and Priscilla, bikos “waka bilong tufala hem for wakem tent.” Wei wea Paul waka ‘day and naet’ hem no minim hem gohed waka and no rest. Samfala taem hem savve rest from wei for wakem tent, olsem lo taem blo Sabbath. Datfala day hem chance for hem preach lo olketa Jew, wea olketa tu no waka lo datfala day. (Acts 13:14-16, 42-44; 16:13; 18:1-4) Paul waka for kasem selen, nomata olsem, hem mek sure hem evritaem duim waka for “talemaot gud nius bilong God.” (Rome 15:16; 2 Cor. 11:23) Hem encouragem tu olketa narawan for duim sem samting. Dastawe, Aquila and Priscilla waka tugeta witim Paul for “duim waka bilong Christ Jesus.” (Rome 12:11; 16:3) Paul encouragem olketa lo Corinth for “evritaem busy long waka bilong Lord.” (1 Cor. 15:58; 2 Cor. 9:8) Jehovah muvim tu aposol Paul for raetem disfala toktok: “Man wea no laek waka shud no kaikai tu.”—2 Thess. 3:10. w19.12 5 ¶12-13

Jehovah creatim first couple witim feeling for laek garem pikinini. Bat hu nao shud mekem disison for wanfala couple garem pikinini and wanem taem tufala shud garem? Lo samfala culture, olketa expectim olketa couple wea just marit for mas garem pikinini kwiktaem. Maet olketa kasem pressure from famili and olketa narawan for mas followim datfala culture. Jethro, wanfala brata lo Asia, hem sei: “Lo kongregeson, samfala wea garem pikinini savve putim pressure lo olketa nara couple for olketa mas garem pikinini.” Nara brata lo Asia wea nem blo hem Jeffrey, hem sei: “Samfala sei lo olketa couple wea no garem pikinini, sapos olketa olo bae olketa no garem eniwan for lukaftarem olketa.” Bat each couple seleva nao shud disaed sapos olketa bae garem pikinini. Datwan hem disison blo tufala seleva, hem responsibility blo tufala. (Gal. 6:5) Olketa famili and frens blo wanfala couple wea just marit laekem tufala for hapi. Bat evriwan need for tingim, disison for garem pikinini or nomoa, hem disison blo datfala couple.—1 Thess. 4:11. w19.12 22 ¶1-3

Waswe, iu faendem hem hard for ting lo God olsem Dadi blo iu? Samfala maet ting Jehovah hem hae tumas, so olketa feel olsem olketa no important and no fit. Olketa daotem hao Olmaeti God kea for each wan lo olketa. Bat, Dadi blo iumi wea lovem iumi no laekem iumi for feel olsem. Hem givim laef lo iumi and hem laekem iumi for fren witim hem. Bihaen aposol Paul storyim diswan, hem explainim lo olketa wea lisin lo hem lo Athens dat Jehovah hem no farawe from iumi wanwan. (Acts 17:24-29) Jehovah laekem each wan lo iumi for story lo hem, olsem wei wea wanfala pikinini savve story lo parents wea lovem and kea for hem. Nara reason why hem no isi for samfala ting lo Jehovah olsem Dadi hem bikos real dadi blo olketa no showimaot love or kaen lo olketa. Wanfala sista hem sei olsem: “Dadi blo mi hem raf tumas. Firstaem wea mi start for study, hem hard for mi ting lo Jehovah olsem wanfala Dadi.” Waswe, iu feel olsem tu? Sapos olsem, iu savve sure hao gogo bae iu savve ting lo Jehovah olsem wanfala best Dadi. w20.02 3 ¶4-5

Jesus teachim hao nomata maet iumi no fit for duim staka samting or iumi tingse wanem iumi duim hem smol tumas bikos iumi start for olo, Jehovah barava tinghae lo wanem iumi fit for duim lo waka blo hem. (Sams 92:12-15; Luke 21:2-4) So ting abaotem wanem iu fit for duim. Olsem example, gohed story abaotem Jehovah, prea for olketa brata and sista, and encouragem olketa narawan for gohed faithful. Jehovah laekem iumi for waka witim hem bikos iumi willing for obeyim hem, and no bikos iumi fit for duim staka samting. (1 Cor. 3:5-9.) Iumi hapi tumas for worshipim Jehovah, wanfala God wea ting lo iumi olsem iumi spesol lo hem! Hem creatim iumi for duim wanem hem laekem, and tru worship nomoa savve mekem man hapi and satisfae lo laef. (Rev. 4:11) Nomata pipol lo world maet ting lo iumi olsem iumi iusles, Jehovah no ting olsem. (Heb. 11:16, 38) Taem iumi feel wikdaon bikos lo sik, hard taem saed lo selen, or taem iumi kamap olo, iumi laek for evritaem tingim hao no eni samting savve stopem iumi for kasem love blo Dadi blo iumi lo heven.—Rome 8:38, 39. w20.01 18 ¶16; 19 ¶18-19

Iumi savve faet againstim wei for jealous taem iumi mekem grow wei for hambol and satisfae. Taem iumi garem olketa gudfala wei hia bae iumi no jealous. Wei for hambol bae helpem iumi for no tingting tumas abaotem iumiseleva. Man wea hambol no tingse hem fit for kasem staka samting winim olketa narawan. (Gal. 6:3, 4) Man wea garem wei for satisfae bae hapi nomoa lo wanem hem garem and no comparem hemseleva witim olketa narawan. (1 Tim. 6:7, 8) Man wea hambol and satisfae bae hapi taem hem lukim narawan kasem gud samting.Iumi needim holy spirit blo God for helpem iumi for no garem wei for jealous and for mekem grow wei for hambol and satisfae. (Gal. 5:16; Phil. 2:3, 4) Holy spirit blo Jehovah savve helpem iumi for lukluk gud lo iumiseleva and why iumi duim samting. Witim help blo God, iumi savve aotem nogud tingting and feeling and changem witim olketa gudfala wei.—Sams 26:2. w20.02 15 ¶8-9

Dedication hem wanfala promis and Jehovah expectim iu for keepim datfala promis. So garem klos wei for fren witim kongregeson blo iu. Spiritual famili blo iu nao evri brata and sista blo iu lo kongregeson. Taem iu attendim olketa meeting evritaem, datwan bae strongim wei wea iufala fren gud tugeta. Readim Bible evriday and ting raonem wanem iu readim. (Sams 1:1, 2) Bihaen iu readim samfala verse lo Bible, hem gud for spendem taem for barava ting abaotem datwan. Then olketa toktok hia bae kasem heart blo iu. Mas gohed for prea. (Matt. 26:41) Taem iu prea from heart datwan bae mekem iu kam moa klos lo Jehovah. “Evritaem Kingdom . . . mas first samting.” (Matt. 6:33) Iu savve duim datwan taem iu mekem preaching waka for kamap important samting lo laef blo iu. Taem iu share evritaem lo ministry, faith blo iu bae strong. Olketa hard samting wea iu feisim lo world distaem “hem for lelebet taem nomoa and hem no big tumas.” (2 Cor. 4:17) Bat lo narasaed, wei wea iu dedicate and baptaes hem openem wei for iu kasem laef wea mekem iu satisfae distaem, and for kasem “datfala tru laef” lo future. Taem iu disaed for duim diswan bae iu barava kasem gud samting!—1 Tim. 6:19. w20.03 13 ¶19-21

Sapos Bible student blo iu no gohed gud lo study, bae gogo iu need for askem iuseleva olsem, ‘Waswe, mi shud stop for study witim hem?’ Taem iu ting raonem diswan, askem iuseleva: ‘Taem mi tingim student blo mi, waswe, hem gohed gud fitim situation blo hem?’ ‘Waswe hem start for “followim,” or obeyim olketa samting wea hem lanem?’ (Matt. 28:20) Sorre samting nao, samfala Bible student olsem olketa Israelite lo taem blo Ezekiel. Jehovah sei olsem lo Ezekiel: “Yu olsem nomoa wanfala man hu hemi gohed fo plei long gita, an hemi gohed fo singim olketa lav singsing, an voes blong hem hemi barava here naes tumas. Olketa gohed fo lisin long olketa toktok blong yu, bat olketa nating obeim.” (Esikiel 33:32) Iumi maet faendem hem hard for talem student bae iumi stop for study witim hem. Bat, “lelebet taem nomoa hem stap.” So winim wei for spendem taem for study witim student wea no muv ahed, iumi need for lukaotem olketa wea “showimaot olketa laekem laef olowe.”—Acts 13:48. w20.01 6 ¶17; 7 ¶20

Staka religion wea sei olketa Christian, no teachim disfala tru teaching wea kam from Bible abaotem hao lo future pipol wea obey bae laef olowe lo earth. (2 Cor. 4:3, 4) Distaem, staka religion wea sei olketa Christian teachim hao evri gud pipol bae go lo heven taem olketa dae. Bat, datwan hem difren from teaching blo olketa Bible Student, wanfala smol grup wea start pablisim Watch Tower lo 1879. Olketa luksavve hao God bae mekem Paradaes kamap moa lo earth and staka million pipol wea obey bae laef lo disfala earth, and no lo heven. Bat, hem tek taem for olketa minim gud hu nao olketa pipol hia wea obey. Olketa Bible Student luksavve tu hao Bible sei samfala pipol bae “God peim from earth” for go rul witim Jesus lo heven. (Rev. 14:3) Olketa hia nao 144,000 Christian wea dedicate lo God and wea strong, and faithful for servem God taem olketa stap yet lo disfala earth. w19.09 27 ¶4-5