November

Distaem, staka pipol wea tingse olketa skul gud and garem big savve, olketa ting long advaes long Bible olsem karangge samting. Olketa sei, taem iu ting long narawan olsem hem winim iu, datwan bae mekem hem isi for pipol ting daonem iu and mekius long iu. Bat wanem nao kamaot from disfala tingting wea world bilong Satan mekhae long hem? Waswe, pipol wea tingim seleva and selfish olketa hapi? Waswe, famili bilong olketa hapi, and olketa garem olketa gudfala fren? Waswe, olketa fren gud witim God? From samting wea iuseleva lukim, wanem nao bae helpem iumi for kasem gud samting, waswe hem wisdom bilong world or wisdom bilong God? (1 Cor. 3:19) Wei for followim advaes bilong pipol wea world tingse olketa wise, hem olsem taem wanfala tourist wea laek for go kasem wanfala ples, hem askem direction long nara tourist wea tufala evriwan no savve long datfala ples, so gogo tufala lus nao. Long taem bilong Jesus, hem sei kaen pipol olsem “olketa blind, bat olketa trae for leadim olketa narawan. Sapos man wea blind leadim nara man wea blind, tufala evriwan bae foldaon insaed hol.” (Matt. 15:14) Tru nao, wisdom bilong disfala world hem barava karangge samting long God. w19.05 24-25 ¶14-16

Lo olketa year wea go pas, namba blo olketa wea kaikaim bred and drinkim wine hem go ap. Waswe, iumi need for wari abaotem diswan? Nomoa. “Jehovah hem savve gud long olketa bilong hem.” (2 Tim. 2:19) Jehovah savve lo hu nao hem really anointed, bat olketa brata wea kaontem namba blo olketa wea kaikai bred and drinkim wine lo Memorial olketa no savve. So insaed datfala namba, hem samfala wea tingse olketa anointed bat olketa no really anointed. Olsem example, samfala wea bin kaikaim bred and drinkim wine gogo olketa stop for duim datwan. Olketa narawan maet garem problem saed lo tingting and feeling blo olketa wea mekem olketa for tingse olketa bae rul witim Christ lo heven. So hem klia, iumi no savve lo real namba blo olketa anointed wan wea stap yet lo earth. Olketa anointed wan bae stap lo staka difren ples lo earth taem Jesus kam for tekem olketa go lo heven. Bible sei lo olketa last day, namba blo olketa anointed wea stap lo earth bae no staka. (Rev. 12:17) Bat Bible no talem namba blo olketa anointed wan wea bae stap yet lo earth taem big trabol hem start. w20.01 29-30 ¶11-13

Jesus showimaot hao big nao love wea Jehovah garem for olketa pikinini blo hem taem hem talem story abaotem son wea lus. (Luke 15:11-32) Datfala dadi lo story hia still garem hope dat son blo hem bae kam bak. Taem son kam bak, datfala dadi welkamim hem. Sapos iumi go difren bat iumi repent, iumi sure Dadi blo iumi lo heven wea lovem iumi hem redi and willing for welkamim iumi. Dadi blo iumi bae stretem evri samting wea Adam spoelem. Bihaen Adam disobey, Jehovah plan for adoptim 144,000 man and woman from earth for kamap olketa king and priest lo heven witim Son blo hem. Jesus and olketa wea rul witim hem bae helpem olketa man wea obey for kamap perfect lo niu world. Bihaen olketa winim datfala last test for pruvim sapos olketa obey, God bae givim laef olowe lo olketa. Dadi blo iumi bae barava hapi taem hem lukim earth fulap witim olketa perfect son and dota. Datfala taem bae hem barava naes tumas! w20.02 6-7 ¶17-19

Iumi need for askem iumiseleva, ‘Olketa change wea mi mekem for kamap wanfala Christian, hem samting mi duim for pipol lukim nomoa, or hem really samting wea mi duim from heart blo mi?’ Tufala wei for change hia hem barava difren. Toktok blo Jesus lo Matthew 12:43-45, hem showim iumi wanem iumi need for duim. Datfala scripture helpem iumi for luksavve lo disfala important point: Hem no inaf for aotem nomoa olketa tingting wea no stret, bat iumi mas changem datwan witim tingting wea God hapi lo hem. Waswe, man savve barava changem hu nao hem and really wei blo hem? Bible sei: “Mas garem niufala wei wea fitim wanem God hem laekem and wea datwan hem barava raeteous and faithful.” (Eph. 4: 24) Diswan showimaot iumi fit for barava changem wei blo iumi, bat hem no isi. Iumi need for no just kontrolem olketa feeling and akson wea no stret, bat iumi need for changem datfala strong tingting wea kontrolem wei blo iumi. Insaed diswan hem wei for changem wanem iumi laekem, wei blo iumi, and why iumi duim samting. Datwan hem samting iumi mas waka hard for duim evritaem. w19.06 9-10 ¶6-7

Jehovah barava tingim Lot and sendem olketa angel for go sevem hem and famili blo hem. Bat, Lot gohed for delay. Olketa angel grabim hand blo hem and helpem hem and famili blo hem for ranawe from datfala city. (Jenesis 19:15,16) Olketa angel talem hem for ranawe go lo olketa maunten. Bat winim wei for Lot obeyim Jehovah, hem ask for go lo nara taon wea stap klosap. (Jenesis 19:17-20) Jehovah hem patient for lisin lo Lot and letem hem for go lo datfala taon. Bat gogo Lot fraet for stap lo there tu, so hem muv go lo olketa maunten, wea hem nomoa sem ples wea Jehovah talem finis for hem go stap. (Jenesis 19:30) Jehovah barava patient witim Lot! Olsem Lot, maet wanfala brata or sista insaed spiritual famili blo iumi, mekem wanfala nogud disison wea kosim problem for hemseleva. Sapos samting olsem happen, wanem nao iumi bae duim? Maet iumi bae laek for sei, ‘samting wea hem plantim datwan nao hem harvestim.’ Datwan hem tru. (Gal. 6:7) Nomata olsem, iumi no laek for talem datwan. Bat, iumi laek for followim hao Jehovah hem helpem Lot. w19.06 20-21 ¶3-5

Taem olketa enemy blo iumi banim waka blo iumi, olketa laek for mekem iumi fraet for duim waka blo Jehovah. Nara samting tu, olketa savve spredim olketa laea story, sendem police for go reidim haos blo iumi, tekem iumi lo kot, or maet putim iumi lo prison. Olketa tingse wei for putim samfala lo iumi lo prison bae mekem iumi evriwan for fraet. Sapos iumi start for letem olketa for mekem iumi fraet, then hem olsem iumiseleva nao banim worship blo iumi. Iumi no laek for olsem olketa wea Bible storyim lo Levitikas 26:36, 37. Iumi mas no letem wei for fraet for mekem iumi katdaon or stop for duim olketa spiritual samting. Iumi barava trustim Jehovah and iumi no panic. (Aesaea 28:16) Iumi mas prea and askem Jehovah for leadim iumi. Taem Jehovah sapotim iumi, nomata olketa gavman wea garem bigfala paoa, bae no savve stopem iumi for gohed faithful for worshipim God blo iumi. Winim wei for fraet taem pipol againstim iumi, iumi savve duim moa samting for Jehovah. w19.07 9-10 ¶6-7

Nomata maet luk olsem pipol no interest, iu mas no givap for faendem samwan wea maet laek for kamap wanfala disaepol. Tingim, Jesus sei wei for faendem disaepol hem olsem wei for fishing. Olketa man for fishing savve spendem staka hour bifor olketa savve kasem eni fish. Staka taem olketa mas fishing lo midol naet or early lo morning, and samfala taem olketa mas go farawe for faendem olketa fish. (Luke 5:5) Olsem tu, samfala brata and sista mas patient for spendem staka hour for duim ministry lo olketa difren taem and ples. Why nao olsem? Datwan hem for garem chance for meetim pipol. Olketa wea waka hard for duim olsem, staka taem bae meetim pipol wea interest lo message blo iumi. Hao sapos iu trae for preach lo taem and ples wea isi for iu meetim pipol? Why nao iumi need for patient taem iumi conductim wanfala Bible study? Wanfala reason hem bikos iumi laek helpem Bible student blo iumi for savve and lovem olketa Bible teaching. Iumi need for helpem Bible student blo iumi for savve abaotem and lovem man wea givim kam Bible, Jehovah. w19.07 18-19 ¶14-15

Samfala lo iumi maet feel guilty bikos lo olketa sin wea iumi duim bifor. Sapos olsem, hem gud for duim study project abaotem ransom blo Christ. Taem iumi study, ting raonem, and prea abaotem datfala subject, datwan maet helpem iumi for no feel guilty tumas. And tu, hem maet helpem iumi for no gohed kros lo iumiseleva for samting wea Jehovah forgivim finis. Nara samting iumi savve lanem from Paul. Maet samfala lusim waka for big selen, for duim moa samting for Kingdom. Sapos olsem, iumi shud no tingim moa olketa samting lo bihaen, wea minim iumi no regret lo olketa chance wea iumi bin garem for kasem olketa material samting. (Nambas 11:4-6; Eklesiastes 7:10) Olketa samting lo bihaen, savve minim tu eniting wea iumi duim finis for Jehovah or hard taem wea iumi deal witim bifor. Hem tru, wei for ting bak lo hao Jehovah blessim and sapotim iumi bifor, savve helpem iumi for klos lo Dadi blo iumi. Bat, iumi no laek for tingse bikos iumi duim staka samting for Jehovah finis, iumi shud rest nao.—1 Cor. 15:58. w19.08 3 ¶5-6

Lo wei wea showimaot respect, iumi savve prea lo God enitaem and lo eni ples wea iumi stap. No enitaem hem busy tumas for herem olketa prea blo iumi, hem evritaem redi and lisin gud taem iumi prea. Taem iumi tinghae lo wei wea Jehovah lisin lo olketa prea blo iumi, datwan bae mekem iumi kamap moa klos lo hem. Man wea raetem psalm sei: “Mi lavem [Jehovah] tumas, bikos hemi lisin long prea blong mi.” (Sams 116:1) Dadi blo iumi no just lisin lo olketa prea blo iumi nomoa, bat hem ansarem tu. Aposol John sei: “Eni samting wea iumi askem wea followim tingting bilong God, God hem herem iumi.” (1 John 5:14, 15) Hem tru, Jehovah maet no ansarem olketa prea blo iumi olsem hao iumi expectim. Hem savve wanem nao best for iumi, so samfala taem maet hem laekem iumi for weit firstaem or maet hem sei no lo wanem iumi askem. (2 Cor. 12:7-9) Jehovah provaed for iumi. Jehovah duim samting wea hem laekem evri dadi for duim. (1 Tim. 5:8) Hem provaedem wanem olketa pikinini blo hem needim. Hem no laekem iumi for wari abaotem kaikai, kaleko, and ples for stap. (Matt. 6:32, 33; 7:11) Olsem parents wea lovem iumi, Jehovah mek sure iumi garem evri samting wea iumi needim for future. w20.02 5 ¶10-12

No evriwan wea garem hope for stap lo heven olketa part lo “datfala wakaman wea faithful and wise.” (Matt. 24:45-47) Olsem lo first century, distaem tu, Jehovah and Jesus iusim tu-thri brata for feedim, or teachim staka pipol. Only tu-thri anointed Christian lo first century nomoa Jehovah iusim for raetem olketa Christian Greek Scripture. Distaem, only tu-thri anointed Christian nomoa garem responsibility for givim “kaikai long barava taem” lo pipol blo God. Jehovah disaed for givim laef olowe lo earth lo staka pipol blo hem and laef lo heven lo samfala wea bae rul witim Jesus. Jehovah givim reward for evriwan wea worshipim hem, nomata hem datfala “Jew” or “tenfala strensa,” and hem laekem olketa for obeyim olketa sem law and for gohed faithful. (Sekaraea 8:23) Olketa mas gohed hambol. Olketa mas worshipim hem tugeta and mas wan mind. And evriwan mas waka tugeta for keepim peace insaed kongregeson. Taem iumi gogo for kasem end, iumi evriwan laek for gohed servem Jehovah and followim Christ olsem “wanfala sekson nomoa.” w20.01 31 ¶15-16

Iumi no savve forcem olketa relative blo iumi for acceptim gud nius, bat iumi savve encouragem olketa for ting raonem and acceptim message blo Bible. (2 Tim. 3:14, 15) Showimaot gudfala wei. Staka taem, wanem iumi duim nao affectim olketa relative winim wanem iumi talem. Gohed traem best for helpem olketa relative. Jehovah showimaot gudfala example for iumi. Hem gohed for givim chance lo pipol for acceptim gud nius and kasem laef. (Jeremaea 44:4) And aposol Paul talem Timothy for gohed strong for helpem olketa narawan. Why nao olsem? Bikos taem hem duim olsem, hem bae mekem hemseleva and olketa wea lisin lo hem for kasem laef. (1 Tim. 4:16) Iumi lovem olketa relative, so iumi laekem olketa for savve lo truth wea stap insaed lo Bible. w19.08 14 ¶2; 16-17 ¶8-9

Iumi mas remember dat sapos samwan hem givim taem blo hem for kam stretem iumi, datwan minim wanem iumi duim hem showimaot iumi start for go farawe tumas nao. Lo taem olsem, maet kwiktaem iumi laek for rejectim datfala kaonsel. Iumi maet komplenim man wea givim datfala kaonsel or hao hem duim datwan. Bat sapos iumi hambol, iumi bae traem best for garem stretfala tingting abaotem datwan. Man wea hambol hem tinghae lo kaonsel. Tingim disfala example: Iu lo wanfala meeting lo Kingdom Hall. Iu gohed story lo staka didifren wan, then bihaen samwan iu bin story witim hem kam and story smol lo iu, and sei ‘Wanfala smol pis kaikai hem stap lo teeth blo iu.’ Maet iu bae barava feel shame. Bat waswe, bae iu no thankiu lo hem from hem kam talem iu? Maet iu ting, ‘Mi wish nomoa samwan talem mi abaotem datwan lo firstaem!’ Olsem tu, iumi shud hambol and tinghae taem wanfala brata or sista hem no fraet for givim iumi kaonsel lo taem wea iumi needim. Iumi ting lo hem no olsem wanfala enemy bat olsem fren blo iumi.—Provebs 27:6; Gal. 4:16. w19.09 5 ¶11-12

Jehovah givim important waka lo mami insaed famili, and God givim hem paoa tu for disaedem samfala samting for olketa pikinini blo hem. Tru nao, samting wea mami duim or talem savve barava affectim pikinini for full laef blo hem. (Provebs 22:6) Olketa mami savve lane from Mary, mami blo Jesus. Mary hem savve gud lo olketa Scripture. Hem garem bigfala respect for Jehovah and hem barava fren klos witim Jehovah. Hem willing for obeyim direction wea kam from Jehovah nomata datwan bae changem full laef blo hem. (Luke 1:35-38, 46-55) Iufala olketa mami savve lane from example blo Mary lo staka difren wei. Lo wanem wei? First, iuseleva need for gohed fren gud witim Jehovah thru lo wei for duim study seleva and for prea seleva. Mek-tu samting, iu need for changem samfala samting lo laef blo iu for mekem Jehovah hapi. w19.09 18 ¶17-19

Aposol John lukim wanfala vision abaotem wanfala profesi wea mekem hem hapi tumas. Lo datfala vision, fofala angel kasem komand for holem bak wind blo bigfala trabol, go kasem taem olketa putim lastfala mark lo datfala grup blo olketa wakaman blo God. (Rev. 7:1-3) Datfala grup hem nao 144,000 wea bae rul witim Jesus lo heven. (Luke 12:32; Rev. 7:4) Then John lukim nara grup wea barava big tumas wea mekem hem for singaot and sei: “Mi lukim wanfala big crowd wea no eniwan fit for kaontem. Olketa hia from evri kantri and tribe and pipol and languis. Olketa standap front long datfala throne and front long datfala Pikinini Sheepsheep.” (Rev. 7:9-14) Tingim hapi wea John garem taem hem savve hao staka pipol bae followim tru worship lo future! Iumi sure datfala vision strongim faith blo John. And datwan shud barava strongim go moa faith blo iumi, bikos iumi stap lo taem wea datfala vision hem kamap tru! Distaem, iumi lukim staka million pipol nao kam tugeta wea garem hope for go thru lo datfala big trabol and laef olowe lo earth. w19.09 26 ¶2-3

Tingim go taem wea olketa nation bae announcem datfala toktok, ‘peace and security’ wea iumi bin weit for herem. Olketa maet tok praod dat world hem barava sef and garem peace winim eni narataem bifor. Olketa nation laekem pipol for tingse olketa garem full kontrol lo evri samting wea happen lo world. Batawea, olketa bae no fit for kontrolem nao next samting wea bae happen. “Bigfala Babylon” bae distroe! (Rev. 17:5, 15-18) “God [bae] mekem olketa garem tingting for duim samting wea hem laekem.” Wanem nao God laekem? Hem laek for distroem evri false religion, wea insaed diswan hem olketa blo Christendom. God putim datfala tingting insaed lo heart blo “tenfala horn” blo datfala “wild animal wea kala bilong hem red.” Tenfala horn hem minim evri gavman wea sapotim datfala “wild animal” wea hem nao United Nation. (Rev. 17:3, 11-13; 18:8) Taem wea olketa gavman hia attakim false religion, datwan hem saen wea showimaot bigfala trabol hem start. Datwan hem wanfala big samting wea bae affectim full world. w19.10 14 ¶1, 3

Lo first century, Diotrephes jealous lo olketa wea lead insaed kongregeson. From hem ‘laek for kamap leader’ lo kongregeson, hem tok spoelem John and olketa nara brata mekem olketa lo kongregeson no respectim olketa. (3 John 10) Nomata hem bae hard for iumi duim samting wea Diotrephes hem duim, maet iumi start for jealous lo wanfala brata or sista wea kasem assignment wea iumi laek for kasem, especially sapos iumi feel olsem iumi savve gud hao for duim datfala assignment winim datfala brata or sista. Wei for jealous hem olsem rabis grass. Sapos wei for jealous start for grow insaed lo heart blo iumi, bae hem hard lelebet for aotem. Olketa samting wea savve mekem grow wei for jealous hem nao olketa nogud feeling olsem wei for praod, selfish, and nogud wei for jealous. Olsem rabis grass wea stopem wanfala flaoa for grow, wei for jealous savve stopem olketa gudfala wei olsem love, wei for sorre lo narawan, and kaen. Sapos iumi lukim hao wei for jealous hem start for grow, iumi need for aotem from heart blo iumi. w20.02 15 ¶6-7

Aposol Paul storyim hem wei wea hem safa from hem kasem wanfala problem wea mekem hem feelim pain. Hem sei datfala problem hem olsem “wanfala angel bilong Satan wea gohed hitim” hem. Satan or olketa demon blo hem maet no barava kosim olketa problem wea olsem datfala nila wea go deep insaed body blo hem. Bat taem Satan and olketa demon luksavve Paul garem “nila” lo body, olketa trae for iusim datwan for mekem Paul safa go moa. Wanem nao Paul duim? Lo firstaem, Paul laekem datfala “nila” for mas aot. Hem sei: “Thrifala taem nao mi askem Lord [Jehovah] for hem aotem disfala nila from mi.” Nomata Paul prea staka taem, datfala nila hem still stap. Waswe, datwan minim Jehovah no ansarem olketa prea blo Paul? Nomoa. Hem ansarem olketa prea blo hem. Jehovah no aotem datfala problem, bat hem strongim Paul for deal witim datwan. Jehovah sei: “Paoa bilong mi barava strong taem iu wik.” (2 Cor. 12:8, 9) From Jehovah helpem Paul, datwan mekem hem for gohed hapi and garem peace!—Phil. 4:4-7. w19.11 9 ¶4-5

Jehovah nomoa fit for iumi worshipim bikos hem nao wakem evri samting and givim laef lo iumi. (Rev. 4:11) Bat, wanfala danger hem stap. Nomata iumi lovem and respectim Jehovah, maet iumi letem olketa nara samting for affectim wei wea iumi shud lovem and worshipim Jehovah nomoa. Lo Bible, wei for barava lovem Jehovah hem join witim wei for worshipim hem nomoa. Iumi bae no letem eniwan or eni nara samting for spoelem wei wea iumi worshipim Jehovah nomoa. (Eksodas 34:14) Love blo iumi for Jehovah hem no blind. Why nao olsem? Bikos iumi savve pruvim olketa samting wea iumi lanem abaotem hem. Iumi laekem tumas olketa gudfala wei blo hem. Iumi savve lo olketa samting wea hem laekem and no laekem, and iumi agree witim datwan. Iumi savve lo plan blo hem for olketa man, and iumi sapotim datwan. Iumi barava hapi for garem disfala privilege for fren witim Jehovah. (Sams 25:14) Evri samting wea iumi lanem abaotem Creator blo iumi hem mekem iumi fren gud witim hem.—Jas. 4:8. w19.10 26 ¶1-3

Distaem, olketa brata and sista blo iumi feisim olketa difren kaen hard taem. Olsem example, staka safa from olketa natural disaster and olketa nara nogud samting wea man kosim. Taem olketa samting olsem happen, maet iumi fit for invaetem olketa brata and sista hia for kam stap lo haos blo iumi. Or iumi maet help saed lo selen. Bat samting iumi evriwan savve duim hem nao for prea for olketa. Sapos iumi herem wanfala brata or sista hem wikdaon, maet iumi no savve wanem for talem or duim. Nomata olsem, iumi savve help. Olsem example, iumi savve spendem taem witim hem. Iumi savve lisin gud taem hem story. And iumi savve storyim fevaret scripture blo iumi witim hem. (Aesaea 50:4) Important samting nao hem for iu stap witim fren blo iu lo taem wea hem needim iu. Iumi mas disaed strong for duim samting for gohed strongim wei wea iumi fren gud witim olketa brata and sista blo iumi distaem. Olketa klos wei for fren olsem hem no just for taem blo end nomoa, bat hem for olowe! w19.11 7 ¶18-19

Disfala offering hem samting wea man seleva nao bae disaed for givim bikos hem lovem Jehovah God. Man wea givim datfala sakrifaes, famili blo hem, and olketa priest, bae kaikaim meat blo datfala animal wea olketa sakrifaesim. Bat samfala part lo animal hia hem for Jehovah nomoa. Olketa wanem part nao datwan? Lo Jehovah, gris blo wanfala animal hem nao best part. Hem chusim tu samfala nara part blo animal wea barava important lo hem, wanfala lo olketa hem kidney. (Levitikas 3:6, 12, 14-16) So Jehovah hapi tumas, especially taem wanfala Israelite disaed for sakrifaesim gris and olketa nara important part blo wanfala animal. Taem wanfala Israelite mekem kaen sakrifaes olsem, hem showimaot hem barava laek for givim best samting lo Jehovah. Lo sem wei tu, Jesus willing for givim lo Jehovah best blo hem taem hem servem hem witim full soul bikos hem lovem Jehovah. (John 14:31) Wei for duim wanem God laekem hem samting wea Jesus hapi tumas for duim. (Sams 40:7, 8) Jehovah mas hapi tumas for lukim Jesus willing for servem hem! w19.11 22-23 ¶9-10

Bible sei bihaen sixfala day wea hem creatim evriting, God hem stop for wakem olketa samting lo earth. (Jenesis 2:2) Bat, Jehovah hem man wea laekem tumas for waka, and lo narafala wei, hem still “gohed waka” kam kasem distaem. (John 5:17) Datfala arrangement for keepim Sabbath evri week hem followim sem wei blo Jehovah for rest wea Genesis storyim. God sei datfala Sabbath hem wanfala saen midolwan hem and olketa Israelite. (Eksodas 31:12-14) Datfala law stopem evriwan for waka, nomata olketa pikinini, olketa slave, and olketa animal tu. (Eksodas 20:10) Diswan hem for mekem pipol garem moa taem for duim olketa spiritual samting. Staka bigman blo religion lo taem blo Jesus barava ova tumas lo hao olketa ting lo Sabbath day. Olketa sei man hem brekem law sapos hem pikim eni wheat lo taem blo Sabbath, or healim man wea sik. (Mark 2:23-27; 3:2-5) Olketa kaen tingting olsem no followim tingting blo God, and Jesus mekem klia datwan lo olketa wea willing for lisin lo hem. w19.12 3-4 ¶8-9

Taem iumi gohed for lane abaotem olketa wei blo Jehovah, datwan bae helpem iumi for garem olketa sem kaen wei tu. David savve gud lo Dadi blo hem lo heven, dastawe taem hem deal witim olketa narawan hem followim olketa wei blo Jehovah. From David fren gud witim Jehovah, olketa Israelite lovem hem tumas and Jehovah iusim hem olsem example for olketa nara king blo Israel. (Fas Kings 15:11; Mektu Kings 14:1-3) Wanem nao leson for iumi? Iumi mas ‘followim wei blo God.’ Taem iumi followim olketa wei blo Jehovah, datwan showimaot iumi olketa pikinini blo hem. (Eph. 4:24) No enitaem bae iumi stop for lane abaotem Jehovah. (Eklesiastes 3:11) Important samting nao, hem no haomas savve iumi garem, bat hem for followim wanem iumi lanem. Taem iumi followim wanem iumi lanem and traem best for followim example blo Dadi blo iumi, hem bae gohed for fren gud witim iumi. (Jas. 4:8) Lo Bible, Jehovah talem hao hem bae no lusim olketa wea barava laek for savve gud lo hem. w19.12 20 ¶20; 21 ¶21, 23

Jacob lovem evri son blo hem, bat fevaret son blo hem nao Joseph wea hem 17 years old. Hao nao feeling blo olketa brata blo Joseph taem olketa lukim datwan? Olketa start for jealous lo hem, and datwan mekem olketa for heitim hem. So olketa salem Joseph for kamap slave and laea lo dadi blo olketa and sei wanfala wild animal nao killim dae fevaret son blo hem. Wei for jealous spoelem peace wea olketa garem insaed famili and mekem dadi blo olketa for sorre tumas. (Jenesis 37:3, 4, 27-34) Jealous hem insaed lo list blo olketa nogud samting wea lead go lo dae and wea mekem man no fit for kasem Kingdom blo God. (Gal. 5:19-21) Staka taem wei for jealous nao kosim olketa nogud samting olsem wei for kros, raoa, and enemy lo each other. Example blo olketa brata blo Joseph showimaot hao wei for jealous savve spoelem wei for fren tugeta and spoelem tu peace insaed lo famili. Nomata hem bae hard for iumi duim wanem olketa brata blo Joseph duim, heart blo iumi evriwan no perfect and savve laea lo iumi. Dastawe, maet samfala taem iumi stragol witim feeling for jealous. w20.02 14 ¶1-3

Wantaem Jehovah tekem aot samfala holy spirit blo hem from Moses and givim lo wanfala grup blo olketa Israelite elder wea standap klosap lo datfala tent blo meeting. No longtaem bihaen, Moses herem dat tufala elder wea no kam lo datfala tent blo meeting, tufala tu kasem holy spirit and start for act olsem olketa profet. Wanem nao Moses duim taem Joshua askem hem for stopem tufala elder hia? Moses no jealous lo wei wea Jehovah givim holy spirit lo tufala. Bat, hem hambol and hapi witim olketa. (Nambas 11:24-29) Wanem leson nao iumi savve lanem from Moses? Sapos iu wanfala elder, waswe, enitaem olketa askem iu for trainim samwan lo kongregeson for lukaftarem wanfala privilege wea iu barava enjoyim? Sapos iu hambol olsem Moses, iu bae no garem tingting for sei olketa bae kamap moa important winim iu. Bat, bae iu hapi for helpem brata blo iu. w20.02 17 ¶9-11

Sik savve affectim mind blo iumi. Iumi maet shame taem pipol luksavve dat iumi sik, or iumi mas depend lo olketa narawan for help. Nomata sapos olketa narawan no savve dat iumi sik, iumi maet garem feeling for shame bikos iumi no savve duim olketa samting wea iumi bin duim bifor. Lo olketa hard taem olsem, Jehovah savve encouragem iumi. Hao nao hem savve encouragem iumi? Lo Bible, Jehovah givim olketa gudfala toktok for remindim iumi hao iumi important lo hem nomata iumi sik. (Sams 31:19; 41:3) Thru lo olketa toktok hia, Jehovah bae helpem iumi for deal witim negative tingting wea iumi garem taem iumi sik. Iu savve sure dat Jehovah savve lo wanem hem kasem iu. Iu savve barava askem hem for helpem iu garem stretfala tingting abaotem situation blo iu. Then lukluk lo Bible for faendem olketa gudfala toktok wea Jehovah givim iumi. Ting raonem olketa verse wea showimaot hao Jehovah barava tinghae lo olketa wea worshipim hem. Taem iu duim olsem, iu bae lukim hao Jehovah hem kaen tumas lo olketa wea faithful for servem hem.—Sams 84:11. w20.01 15-16 ¶9-10; 17 ¶12

Isaac hem wanfala rich man, and datwan mekem olketa lo Philistine for jealous lo hem. (Jenesis 26:12-14) Olketa blokem tu olketa well wea Isaac depend lo hem for givim wata lo olketa animal blo hem. (Jenesis 26:15, 16, 27) Olsem olketa Philistine hia, distaem tu samfala pipol savve jealous lo olketa narawan wea garem staka material samting winim olketa. Olketa no just laekem nomoa samting wea olketa hia garem, bat olketa duim samting for spoelem tu wanem olketa garem. Olketa bigman blo Jew religion jealous lo Jesus bikos staka pipol tinghae lo hem. (Matt. 7:28, 29) God nao sendem kam Jesus, and hem teachim olketa tru samting. Nomata olsem, olketa bigman blo religion hia spredim olketa laea story for spoelem Jesus. (Mark 15:10; John 11:47, 48; 12:12, 13, 19) Hao nao disfala story hem olsem wanfala warning for iumi? Iumi mas faet againstim eni feeling for jealous lo eni brata or sista lo kongregeson wea garem olketa naesfala wei wea mekem olketa narawan tinghae lo hem. Bat, iumi shud trae for followim olketa gudfala wei wea hem garem.—1 Cor. 11:1. w20.02 15 ¶4-5

Tingim sapos iu stap lo Persia samting olsem 2,500 year go finis and iu laek for story lo king. Bae hard tumas for iu go story lo king sapos hem no letem. Sapos hem no letem bat iu go, olketa savve killim iu dae! Iumi barava hapi bikos Jehovah hem no olsem king blo Persia! Hem hapi for iumi story lo hem enitaem nomoa. Hem laekem iumi for feel free for story lo hem. Olsem example, nomata Jehovah garem olketa spesol title olsem, Nambawan Creator, Olmaeti, and Sovereign Lord, hem invaetem iumi for story lo hem and kolem hem “Dadi” blo iumi. (Matt. 6:9) Iumi hapi tumas bikos Jehovah laekem iumi for feel klos lo hem olsem! Hem stret for iumi kolem Jehovah “Dadi,” bikos hem nao givim laef. (Sams 36:9) From hem nao Dadi blo iumi, iumi garem responsibility for obeyim hem. Sapos iumi obeyim hem, bae iumi enjoyim staka nambawan blessing. (Heb. 12:9) Wanfala lo olketa blessing hia nao hem for laef olowe lo heven or lo earth. w20.02 2 ¶1-3

Goal blo iumi hem for helpem Bible student blo iumi for grow lo spiritual wei. (Eph. 4:13) Taem samwan acceptim wanfala Bible study, maet main samting wea hem bae interest for savve lo hem nao, hem olketa gud samting wea hemseleva savve kasem from wei for studyim Bible. Bat, taem love blo hem for Jehovah grow, maet hem start for tingim hao hem savve helpem olketa narawan, insaed diswan hem olketa lo kongregeson tu. (Matt. 22:37-39) Lo taem wea fitim, no hol bak for storyim privilege for givim selen for sapotim Kingdom waka. Teachim Bible student lo wanem for duim taem problem kamap. Olsem example, hao sapos student blo iu wea anbaptaes pablisa, storyim dat narawan lo kongregeson mekem hem feel nogud. Winim for teksaed, hem gud for explainim lo hem wanem Bible sei hem savve duim. Hem savve chus sapos bae hem forgivim man wea mekem hem feel nogud, or sapos hem no savve forgetim datwan, hem savve go and story kaen witim datfala man witim goal for fren bak witim hem. (Comparem Matthew 18:15.) Helpem student for prepare gud mekem hem savve wanem for talem. w20.01 5-6 ¶14-15

Iumi showimaot iumi tinghae lo wei wea Jehovah forgivim iumi taem iumi prea for forgiveness, acceptim discipline, and waka hard for stap klia lo wei for duim moa olketa mistek. Taem iumi duim olsem, iumi bae kasem bak peace lo mind and heart. Iumi barava hapi tumas for savve hao ‘Jehovah hem stap klosap lo olketa wea sorre tumas. Hem gohed for sevem olketa wea tingting blo olketa hem wikdaon’! (Sams 34:18) From iumi barava klosap lo end blo olketa last day, staka samting moa bae kamap wea bae mekem iumi for wari tumas. Taem iu wari abaotem eni samting, kwiktaem askem help blo Jehovah. Studyim gud Bible. Lane from example blo Hannah, aposol Paul, and King David. Askem Dadi blo iumi lo heven for helpem iumi for luksavve wanem nao mekem iumi wari. (Sams 139:23) Letem Jehovah karem olketa hevi blo iumi, especially olketa hevi wea iumi no fit for deal witim. Taem iu duim datwan, iu olsem datfala man wea raetem psalm wea singsing olsem lo Jehovah: “Taem olketa wari blo mi hem tumas for mi, iu comfortim mi and helpem mi for garem peace.”—Ps. 94:19, NW. w20.02 24 ¶17; 25 ¶20-21

Datfala toktok wea olketa transleitim “kam from God,” lo Greek languis hem minim “for God blowim go.” Datwan minim God iusim holy spirit for putim tingting blo hem insaed lo mind blo olketa man wea raetem Bible. So taem iumi readim Bible and ting raonem wanem iumi readim, olketa instruction blo God bae go insaed lo mind and heart blo iumi. Olketa toktok hia bae muvim iumi for duim wanem God laekem. (Heb. 4:12) Bat for barava kasem gud samting from holy spirit, iumi mas markem taem for studyim Bible evriday and ting abaotem wanem iumi readim. Then Bible bae affectim evri samting wea iumi talem and duim. And tu, iumi mas worshipim God tugeta. (Sams 22:22) Spirit blo Jehovah hem stap lo olketa meeting. (Rev. 2:29) Taem iumi lo meeting witim olketa brata and sista blo iumi, iumi prea for holy spirit, iumi singim olketa Kingdom song wea kam from olketa scripture, and iumi lisin lo olketa Bible tok wea olketa brata wea holy spirit appointim nao givim. Nomata olsem, for barava kasem gud samting from holy spirit, iumi need for prepare mekem iumi savve givim olketa koment lo meeting. w19.11 11 ¶13-14