October

Iumi lukim staka pruv wea showimaot Jehovah protectim pipol bilong hem distaem. Tingim diswan, iumi preachim and teachim truth long evri kantri long earth. (Matt. 28:19, 20) Taem iumi duim datwan, iumi showimaot klia olketa nogud samting wea Devil duim. So iumi sure, sapos Satan fit for stopem evri waka bilong iumi, hem bae duim finis, bat hem nating fit for duim datwan. Sapos iumi faithful long Jehovah, olketa demon hard for spoelem iumi for olowe. Bat, iumi evriwan need for againstim olketa demon and trustim Jehovah. Sapos iumi duim olsem, bae iumi kasem staka blessing, and Satan bae no savve laea long iumi. And tu, iumi bae no letem wei for fraetem olketa demon mekem iumi stop for worshipim Jehovah. And main samting nao, iumi bae strongim wei wea iumi fren witim Jehovah. James sei: “Againstim Devil mekem hem ranawe from iufala. Fren gud witim God and bae hem fren gud witim iufala.”—Jas. 4:7, 8. w19.04 24 ¶15; 25 ¶18

Olketa parents. Jehovah nao givim iufala olketa pikinini, olsem ‘present’ from hem. Hem responsibility bilong iu for protectim olketa. Wanem nao iu savve duim for protectim pikinini bilong iu from child sexual abuse? First samting, iu need for lane abaotem child sexual abuse. Iu need for savve abaotem wei bilong pipol wea savve abusim olketa pikinini and olketa teknik wea olketa iusim for laea long olketa. Lukluk evritaem for olketa situation wea maet danger for olketa pikinini. (Provebs 22:3) Iu mas tingim tu hao staka taem samwan wea duim child abuse hem man wea pikinini savve long hem and trustim. Mek-tu samting, garem gudfala wei for story tugeta witim pikinini bilong iu. (Diutronomi 6:6, 7; Jas. 1:19) Pikinini savve hol bak for storyim samting wea happen. Maet hem fraet nogud no eniwan bilivim story bilong hem, or man wea abusim hem maet sei bae hem duim eni nogud samting long hem sapos hem reportim hem. Sapos iu tingse samting happen long pikinini bilong iu, hem gud for ask long kaenfala wei and lisin taem hem story. Mek-thri samting, teachim pikinini bilong iu. Teachim olketa wanem for talem and duim sapos samwan laek tasim olketa. w19.05 13 ¶19-22

Why nao Jehovah heitim pipol wea praod? Wanfala reason hem bikos pipol wea praod and lovem olketa seleva, olketa followim wei bilong Satan for mekhae long hemseleva. Tingim hao nomata Jesus nao helpem Jehovah for creatim evri samting, Satan hem tingse Jesus shud baodaon and worshipim hem! (Matt. 4:8, 9; Col. 1:15, 16) Pipol wea garem kaen wei olsem for tinghae tumas long seleva, barava showimaot hao wisdom bilong disfala world hem krangge samting. (1 Cor. 3:19) Bible helpem iumi for garem balance tingting abaotem iumiseleva. Bible showimaot hao hem no rong for lovem iumiseleva bat man mas no ova tumas long datwan. Jesus sei: “Iu mas lovem narawan long sem wei wea iu lovem iuseleva.” Diswan hem minim iumi duim samting for lukaftarem iumiseleva. (Matt. 19:19) Nomata olsem, Bible sei iumi mas no tingse iumi important winim olketa narawan. Bat hem sei: “Iufala mas no laek raoa olowe and mas no praod, bat iufala mas hambol and ting long narawan olsem hem winim iufala.”—Phil. 2:3; Rome 12:3. w19.05 24 ¶13-14

Ting go bak lo olketa change wea iu mekem taem iu start for lanem truth from Bible and iu disaed for worshipim Jehovah. For duim datwan, staka lo iumi mas lusim olketa nogud wei. (1 Cor. 6:9-11) Iumi barava hapi bikos Jehovah helpem iumi for lusim olketa no gud wei hia! Nomata olsem, iumi mas no tingse iumi olraet nao. Nomata iumi stop for duim olketa serious sin wea iumi duim bifor iumi baptaes, iumi mas gohed waka hard for no letem eni samting for pullim iumi for duim datwan moa. Iumi need for duim tufala samting. First wan, Paul sei “no gohed followim” wei blo world, wea minim no letem world for sheipim or changem tingting blo iumi. Mek-tu, iumi mas barava changem wei blo iumi, wea minim iumi need for changem tingting blo iumi. Disfala change wea Paul storyim hem no minim for changem lukluk blo iumi nomoa, bat hem minim evri samting nao. For duim datwan, iumi mas changem tingting, wei blo iumi, feeling blo iumi, and wanem iumi laekem. w19.06 9 ¶4-6

Taem iumi stress, iumi savve kamap strong moa taem iumi go lo olketa meeting. Olketa meeting hem nara chance for Jehovah helpem and comfortim iumi. Lo olketa meeting, Jehovah savve strongim iumi thru lo holy spirit, Bible, and pipol blo hem. Olketa meeting givim iumi chance for enjoyim wei for strongim each other. (Rome 1:11, 12) Wanfala sista wea nem blo hem Sophia sei: “Jehovah and organization blo hem nao helpem mi for no givap. Olketa meeting hem barava important samting lo mi. Taem mi spendem staka taem lo ministry and kongregeson, datwan helpem mi for deal witim stress and wari wea mi kasem.” Taem iumi feel wikdaon, tingim hao Jehovah promisim dat lo niu world bae hem finisim stress for olowe, and tu, hem promis for helpem iumi for deal witim stress distaem. Hem bae givim iumi strong for mekem iumi winim feeling for wikdaon and wei for no garem hope.—Phil. 2:13. w19.06 19 ¶17-18

Luk olsem Jesus garem samfala important instruction for givim lo olketa disaepol blo hem, bikos disfala meeting hem first samting wea hem arrangem bihaen hem resurrect! Lo datfala meeting wea Jesus arrangem, hem talem olketa disaepol blo hem abaotem wanfala important waka for olketa duim lo first century, datfala sem waka tu iumi duim distaem. Jesus sei: “Iufala go and teachim pipol long evri kantri for kamap disaepol bilong mi. . . . Teachim olketa for followim evri samting wea mi laekem iufala for duim.” (Matt. 28:19, 20) Jesus laekem evri follower blo hem for preach. Hem no givim disfala komand for 11-fala faithful aposol blo hem nomoa. Hao nao iumi sure lo datwan? Tingim diswan, waswe, olketa aposol nomoa stap lo maunten lo Galilee taem Jesus givim datfala komand for teachim pipol for kamap disaepol? Tingim hao datfala angel tok olsem lo olketa woman lo datfala tomb: “Taem iufala go long [Galilee] iufala bae lukim hem.” (Matt. 28:7) So masbi olketa faithful woman hia tu stap lo datfala meeting. w20.01 2-3 ¶1-4

Jesus explainim why iumi shud expectim pipol for againstim iumi. Hem sei tu, olketa bae heitim iumi bikos iumi difren from pipol lo world. Taem iumi kasem persecution hem no minim Jehovah no blessim iumi. Bat hem showimaot iumi duim stret samting! Olketa man hard tumas for stopem worship blo olmaeti God Jehovah. Staka pipol trae for duim datwan, bat olketa nating win. Tingim samting wea happen lo World War II. Lo datfala taem, olketa gavman lo staka kantri barava persecutim pipol blo God. Olketa banim waka blo Jehovah’s Witness lo Nazi Germany, Australia, Canada and tu lo olketa nara kantri. Nomata olsem, wanem nao happen? Lo 1939, taem World War II start, 72,475 pablisa stap evriwea lo world. Bat, olketa report showimaot lo end blo war lo 1945, namba blo pablisa kasem 156,299. Datwan showimaot Jehovah blessim olketa. Datfala namba hem dabol lo namba blo pablisa taem war hem start! w19.07 9 ¶4-5

Nomata sapos iu no conductim wanfala Bible study distaem, iu savve helpem samwan for kamap disaepol. Olsem example, iu savve welkamim olketa niu wan and helpem olketa taem olketa kam lo Kingdom Hall. Taem iu duim olsem, iu helpem olketa for luksavve hao iumi olketa tru Christian bikos iumi showimaot love. Taem iu givim olketa koment lo meeting, nomata sapos hem short nomoa, datwan bae helpem olketa niu wan for lane hao for givim olketa ansa wea kam from heart and wea showimaot respect. Iu savve waka tu witim wanfala niufala pablisa lo ministry, and helpem hem for iusim Bible taem hem story witim pipol. Taem olsem, iu gohed for teachim hem for followim example blo Christ. (Luke 10:25-28) Staka brata and sista barava busy bikos olketa garem staka important responsibility. Nomata olsem, olketa markem taem for conductim olketa Bible study, and datwan mekem olketa hapi. w19.07 17 ¶11, 13

Aposol Paul no letem olketa mistek or samting wea hem duim bifor, for disturbim waka blo hem for Jehovah. Bat, Paul sei for mekem hem “kasem olketa samting wea stap front” lo hem, wea hem nao for winim datfala resis, hem mas “no tingim olketa samting long bihaen.” Wanem nao samfala samting wea maet disturbim waka blo Paul for Jehovah? First samting, Paul bin duim staka samting saed lo religion blo olketa Jew. Nomata olsem, hem ting lo datwan olsem “rabis nomoa.” (Phil. 3:3-8) Mek-tu, hem no letem feeling for guilty from hem persecutim pipol blo Jehovah bifor, for mekem hem wikdaon. And mek-thri, Paul no tingse hem duim finis staka samting for Jehovah. Paul hem go lo prison, olketa whipim hem, sutim hem, ship wea hem go insaed hem rek, and hem no garem inaf kaikai and kaleko, nomata olsem, hem gohed duim gud ministry blo hem. (2 Cor. 11:23-27) Bat nomata hem duim staka samting finis and hem bin safa, Paul savve hem mas gohed waka hard. Iumi tu mas olsem. w19.08 3 ¶5

Staka lo olketa brata and sista stap lo kantri wea olketa no free for preach lo pablik or from haos tu haos, so olketa mas faendem olketa nara wei for talemaot gud nius. (Matt. 10:17-20) Lo wanfala kantri olsem, circuit overseer givim idea for each pablisa mas garem preaching “territory” blo hemseleva, wea hem nao olketa relative, neiba, skulfren, wakfren, and olketa narawan wea olketa savve lo hem. Insaed lo tufala year nomoa, namba blo kongregeson lo datfala circuit hem barava go ap. Iumi maet stap lo kantri wea iumi free for preach. Nomata olsem, iumi savve lanem wanfala important leson from example blo olketa brata and sista hia, hem nao: Iumi mas evritaem lukaotem wei for duim gud ministry, iumi trustim hao Jehovah bae givim iumi paoa wea iumi needim for winim eni hard samting. (Phil. 2:13) Lo disfala barava important taem, iumi laek for mek sure lo olketa samting wea barava important, for mas perfect, no mekem narawan stambol, and for gohed garem olketa raeteous frut. Then love blo iumi bae kamap moa big and iumi mekhae lo Dadi wea lovem iumi, Jehovah. w19.08 13 ¶17-18

Staka lo iumi maet no laek for waka witim pipol wea evriting mas followim tingting blo olketa and no laek for acceptim idea blo narawan. Bat, iumi savve laekem tumas for fren witim olketa brata and sista wea savve “sorre witim olketa wea safa, lovem olketa brata, tingim and kaen long narawan, and hambol.” (1 Pet. 3:8) From iumi laekem pipol wea garem wei olsem, datwan showimaot sapos iumi hambol bae pipol laek fren witim iumi. Wei for hambol savve mekem laef blo iumi moa isi tu. Tru samting nao, samfala taem iumi maet lukim hao samfala samting wea happen lo laef hem no mas luk stret. Nomata sapos samwan savve tumas for duim samting, staka taem pipol no luksavve lo wanem hem duim. And samfala taem man wea no savve gud hao for duim samting, hem nao kasem praise and pipol tinghae lo hem. Nomata olsem, Solomon sei winim wei for feel nogud lo olketa negative samting wea gohed happen, man wea wise hem bae deal witim really samting wea happen lo laef. (Eklesiastes 6:9) Sapos iumi hambol, bae hem isi for iumi acceptim olketa samting wea happen lo laef nomata hem no wanem iumi tingim. w19.09 4-5 ¶9-10

Olketa wea garem paoa for disaedem samting olsem olketa dadi garem chance for helpem olketa narawan. Jehovah markem dadi olsem hed lo famili, and God expectim dadi for trainim and disciplinem pikinini. (1 Cor. 11:3) Bat paoa blo hem for disaedem samting hem garem spialaen bikos hem mas ansa lo Jehovah, bikos Jehovah nao givim nem long evri famili. (Eph. 3:14, 15) Olketa dadi showimaot olketa obeyim Jehovah taem olketa iusim paoa wea olketa garem lo famili lo wei wea Jehovah bae hapi lo hem. No iusim rong lo datfala paoa wea Jehovah givim lo iu. No haedem mistek blo iu, bat acceptim kaonsel wea olketa narawan givim from Bible. Sapos iu duim olsem, famili blo iu bae respectim iu bikos iu hambol. Taem iu prea witim famili, prea from heart blo iu lo Jehovah, letem olketa herem hao iu barava depend lo Jehovah. Winim evri samting hia, mekem worship for Jehovah kamap barava important samting lo laef blo iu. (Diutronomi 6:6-9) Gudfala example blo iu hem olsem wanfala nambawan present wea iu savve givim lo famili blo iu. w19.09 15 ¶8; 17 ¶14; 18 ¶16

Mark hem hapi for helpem olketa narawan. Samfala taem hem waka witim aposol Paul and aposol Peter taem tufala hia duim waka blo tufala, and luk olsem Mark savve provaedem wanem olketa needim. (Acts 13:2-5; 1 Pet. 5:13) Paul sei Mark hem wanfala lo olketa wea ‘waka witim hem for Kingdom blo God’ and hem “barava comfortim” Paul. (Col. 4:10, 11) Mark kamap wanfala klos fren blo Paul. Olsem example, lastfala taem wea Paul prisoner lo Rome, lo samting olsem 65 C.E., hem raetem mek-tu leta blo hem lo Timothy. Lo datfala leta, Paul askem Timothy for kam lo Rome and talem Mark for kam witim hem. (2 Tim. 4:11) Paul mas barava tinghae lo wei wea Mark bin faithful for duim waka blo hem, so hem askem Mark for stap witim hem lo datfala important taem. Mark helpem Paul lo olketa difren wei, maet for tekem kam kaikai or olketa samting wea Paul iusim for raet. Luk olsem, sapot and encouragement wea Paul kasem helpem hem for no givap lo olketa last day bifor olketa killim hem dae. w20.01 11 ¶12-13

Iumi chus finis for givim laef blo iumi for duim waka blo Jehovah and for waka hard. Jesus warnim iumi hao olketa bae persecutim iumi. Bat iumi savve expectim hao Jehovah bae strongim iumi for no givap lo eni hard taem wea iumi kasem. Taem iumi gohed for no givap, datwan bae strongim iumi go moa. (Jas. 1:2-4) Iumi expectim tu hao Jehovah bae givim iumi wanem iumi needim, Jesus bae lukaftarem iumi, and olketa brata and sista bae encouragem iumi. (Matt. 6:31-33; John 10:14; 1 Thess. 5:11) Datfala woman wea garem “sik wea blood hem ran olowe” hem kamap gud nao lo datfala sem day wea Jesus healim hem. (Luke 8:43-48) Bat hem bae kamap gud for olowe only sapos hem kamap wanfala faithful disaepol blo Christ. So wanem nao hem duim? Sapos hem chus for karem yoke blo Jesus, then hem bae kasem reward for rul witim Jesus lo heven! Eni samting wea hem lusim for followim Christ, hem samting nating nomoa taem iumi markem witim datfala nambawan blessing for rul witim Christ lo heven. Nomata iumi garem hope for stap olowe lo heven or lo disfala earth, iumi barava hapi bikos iumi acceptim disfala invitation blo Jesus wea sei: “Kam long mi!” w19.09 25 ¶21-22

From David hem needim help, olketa man blo David askem Nabal wanfala rich Israelite for eni kaikai. Olketa feel free for askem Nabal bikos olketa bin protectim sheepsheep blo Nabal lo wilderness. Bat Nabal wea selfish les givim eni samting. David kros tumas and laek killim dae Nabal and evri man lo haos blo hem. (Fas Samuel 25:3-13, 22) Bat, Abigail, waef blo Nabal wea luk naes hem garem fasin for luksavve. Hem no fraet for go and baodaon lo David, and askem hem for no pei bak bikos hem bae guilty lo blood. Lo kaenfala wei, hem advaesem David for leavim evriting lo hand blo Jehovah. Olketa hambol toktok blo Abigail and hao hem duim samting barava tasim heart blo hem. David luksavve Jehovah nao sendem kam Abigail. (Fas Samuel 25:23-28, 32-34) Gudfala wei blo Abigail mekem Jehovah for iusim hem. Distaem tu, Jehovah savve iusim olketa sista wea kaen and garem fasin for luksavve for strongim famili blo olketa, and olketa narawan lo kongregeson.—Titus 2:3-5. w19.10 23 ¶10

Evri tru Christian mas showimaot klia hao olketa barava difren from Bigfala Babylon. Bifor wanfala Bible student hem lane abaotem truth, maet hem member blo wanfala false religion. Maet hem savve go lo olketa service blo olketa and join insaed olketa samting wea church duim. Or maet hem givim olketa contribution for datfala religion. So bifor datfala Bible student fit for kamap anbaptaes pablisa hem mas barava lusim false religion. Hem shud raetem wanfala leta or duim samting for showimaot klia hao hem finis for member lo datfala church or eni organization wea join witim Bigfala Babylon. Wanfala tru Christian mas mek sure waka wea hem duim for selen mas no join witim Bigfala Babylon. (2 Cor. 6:14-17) Why nao iumi mas strong lo diswan? Bikos iumi no laek for join insaed eni waka and sin blo olketa organization hia wea barava no klin lo eye blo God.—Aesaea 52:11. w19.10 12 ¶16-17

Jeremiah nao raetem Bible buk wea garem nem blo hem, and luk olsem hem tu raetem 1 Kings and 2 Kings. Iumi sure, datfala assignment mekem hem barava luksavve Jehovah showimaot mercy lo olketa man wea no perfect. Olsem example, Jeremiah savve taem King Ahab repent, Jehovah sei Ahab bae dae firstaem and hem bae no lukim nao taem wea full famili blo hem dae. (Fas Kings 21:27-29) And tu, Jeremiah savve wanem Manasseh duim hem barava nogud go moa winim wanem Ahab duim. Nomata olsem, Jehovah forgivim Manasseh bikos hem repent. (Mektu Kings 21:16, 17; Mektu Kronikols 33:10-13) Luk olsem, olketa story hia helpem Jeremiah for followim wei blo God for patient and for showimaot mercy. Tingim hao Jeremiah deal witim Baruch taem hem start for go difren from assignment blo hem. Winim wei for kwiktaem givap lo fren blo hem, Jeremiah helpem Baruch taem hem talem hem kaonsel from Jehovah wea kaen bat wea tok stret tu.—Jeremaea 45:1-5. w19.11 6 ¶14-15

Lo buk blo Leviticus, iumi lanem dat wanfala Israelite savve givim wanfala communion sakrifaes “fo talem tengkiu.” (Levitikas 7:11-13, 16-18) Hem no givim disfala sakrifaes bikos hem samting wea hem mas duim, bat hem bikos hem laek for duim datwan. Olsem olketa communion sakrifaes bifor, service blo iumi for Jehovah hem samting wea iumi willing for duim for showimaot hao iumi feel abaotem hem. Iumi givim best blo iumi lo Jehovah, and iumi duim datwan bikos iumi lovem hem witim full heart. Jehovah mas hapi tumas taem hem lukim staka million pipol willing for servem hem bikos olketa barava lovem hem and olketa wei blo hem! Hem barava comfortim iumi taem iumi tingim hao Jehovah lukim and tinghae, no just lo wanem iumi duim, bat why iumi duim datwan. Olsem example, sapos iu olo and no fit nao for duim staka samting wea iu laekem, iu savve sure hao Jehovah luksavve lo datwan. Maet iu feel iu no fit for duim staka samting, bat Jehovah luksavve lo bigfala love blo iu wea muvim iu for duim wanem iu fit for duim. Hem hapi for acceptim best samting wea iu savve givim lo hem. w19.11 22 ¶9; 23 ¶11-12

Saed lo waka, wei for balance hem barava important. God muvim King Solomon for raet olsem: “Evrisamting hemi kamap long barava taem blong hem.” Hem storyim taem for plant, build, krae, laflaf, dance, and for duim olketa nara samting. (Eklesiastes 3:1-8) So hem klia hao tufala main samting lo laef hem nao for waka and for rest. Jesus garem balance tingting abaotem waka and rest. Wantaem olketa aposol kam bak from preaching. From olketa busy tumas, gogo olketa no garem taem for kaikai. Jesus talem olketa toktok wea stap lo text blo tuday. (Mark 6:30-34) Nomata staka taem Jesus and olketa disaepol no garem chance for rest, Jesus savve olketa evriwan needim rest. Samfala taem, iumi evriwan needim taem for rest or duim samfala difren samting. Diswan hem showaot lo wanfala arrangement wea God mekem witim pipol blo hem bifor, wea hem nao datfala Sabbath evri week. Iumi no stap anda lo Law blo Moses, nomata olsem, iumi savve kasem gud samting from wei for lane abaotem Sabbath. w19.12 3 ¶6-7

Jehovah promis hao hem bae lukaftarem olketa wea faithful for worshipim hem, and hem ting hem mas duim wanem hem promisim. (Sams 31:1-3) Nara samting tu, Jehovah savve dat iumi bae feel sorre tumas sapos hem no lukaftarem evriwan wea part lo famili blo hem. Jehovah promis for givim wanem iumi needim lo laef and wanem iumi needim for gohed faithful for servem hem, and no eni samting savve stopem hem for fulfillim datfala promis! (Matt. 6:30-33; 24:45) Taem iumi tingim why Jehovah keepim olketa promis blo hem, iumi savve barava trustim hao hem bae helpem iumi taem iumi kasem hard taem saed lo selen. Tingim example blo olketa Christian lo first century. Taem bigfala persecution kamap lo kongregeson lo Jerusalem, klosap evriwan olketa ranawe go stap lo olketa didifren ples, olketa aposol nomoa stap. (Acts 8:1) So wanem nao datwan minim? Olketa kasem hard taem saed lo selen! Luk olsem olketa Christian hia lusim olketa haos and bisnis blo olketa. Nomata olsem, Jehovah no lusim olketa; and tu olketa no lusim hapi wea olketa garem. (Acts 8:4; Heb. 13:5, 6; Jas. 1:2, 3) Jehovah sapotim olketa faithful Christian hia, and hem bae sapotim iumi tu.—Sams 37:18, 19. w20.01 17-18 ¶14-15

Taem David protectim olketa sheepsheep blo dadi blo hem from wanfala lion and wanfala bear, hem luksavve Jehovah nao helpem hem for killim dae olketa wild animal hia. Taem David killim dae Goliath, hem lukim klia dat Jehovah nao helpem hem. (Fas Samuel 17:37) And taem hem ranawe from King Saul, wea jealous lo hem, David savve Jehovah nao servem hem. (Smol toktok wea stap antap lo Sams 18) Sapos David hem praod maet hem tingse hemseleva nao duim olketa samting hia. Bat David hem hambol, dastawe hem luksavve Jehovah nao helpem hem lo laef blo hem. Wanem nao leson for iumi? Iumi no ask for help blo Jehovah nomoa. Iumi mas trae for luksavve wanem taem and hao hem givim help. Sapos iumi hambol and luksavve iumi no fit for duim samfala samting, iumi bae lukim hao Jehovah savve helpem iumi for duim wanem iumi no fit for duim. And each taem wea iumi lukim Jehovah helpem iumi datwan mekem wei wea iumi fren witim hem for kamap moa strong. w19.12 20 ¶18-19

Iumi garem staka reason moa for bilivim dat iumi spesol lo Jehovah. Hem leadim iumi kam lo hem and hem lukim wei wea iumi acceptim datfala gud nius. (John 6:44) Taem iumi fren gud witim Jehovah, hem fren gud witim iumi tu. (Jas. 4:8) Jehovah spendem taem and duim staka samting for teachim iumi, datwan showimaot iumi barava spesol lo hem. Hem savve wanem kaen man nao iumi distaem, and hem savve wanem kaen man nao iumi savve kamap. And hem stretem iumi bikos hem lovem iumi. Evri samting hia barava showimaot klia hao iumi spesol lo Jehovah! Nomata samfala ting lo King David olsem hem iusles man nomoa, David savve dat Jehovah lovem and sapotim hem. Datwan helpem David garem stret tingting abaotem situation blo hem. (Mektu Samuel 16:5-7) Taem iumi feel sorre or feisim olketa problem, Jehovah savve helpem iumi for garem stretfala tingting and hem bae helpem iumi for winim olketa problem hia. (Sams 18:27-29) Sapos Jehovah sapotim iumi, no eni samting savve stopem iumi for hapi and gohed servem hem.—Rome 8:31. w20.01 15 ¶7-8

Taem iu conductim Bible study, startim study witim prea. Maet insaed lo first tu-thri week bihaen iu startim wanfala Bible study, hem gud for startim and finisim study witim prea. Iumi mas helpem student for luksavve only wei for minim toktok blo God hem thru lo help blo holy spirit blo hem. Samfala study conductor savve iusim James 1:5 for helpem student luksavve why iumi need for prea, datfala scripture sei: “Sapos eniwan long iufala hem needim wisdom, hem mas gohed askem God.” Then hem savve askem student, “Hao nao iumi savve askem God for wisdom?” Staka taem student savve sei, “Iumi shud prea lo God.” Teachim student blo iu for prea. Talem hem hao Jehovah laek for herem olketa prea wea hem talem from heart. Explainim hao taem iumiseleva prea lo Jehovah, iumi savve talemaot evri samting wea stap lo heart blo iumi, nomata olketa samting wea iumi maet hol bak for talem lo eniwan. Tingim hao Jehovah savve finis lo tingting blo iumi.—Sams 139:2-4. w20.01 2 ¶3; 5 ¶11-12

Jehovah nao disaedem taem wea hem bae chusim olketa anointed. (Rome 8:28-30) Jehovah start for chusim olketa anointed wan bihaen Jesus resurrect. Luk olsem lo first century, evri tru Christian nao anointed. Lo olketa year bihaen, staka lo olketa wea sei olketa Christian no really followim Christ. Nomata olsem, lo olketa year hia, Jehovah anointim tu-thri wea olketa tru Christian. Olketa olsem wheat wea Jesus sei bae grow midolwan lo olketa rabis grass. (Matt. 13:24-30) Lo olketa last day, Jehovah gohed for chusim pipol wea bae kamap part lo datfala 144,000. So sapos God disaed for chusim samfala lo olketa hia just bifor end hem kam, iumi no kwestinim wisdom blo hem. (Rome 9:11) Iumi mas careful for no duim samting olsem olketa wakaman wea Jesus storyim lo wanfala lo olketa tokpiksa blo hem. Olketa komplen abaotem wei wea datfala boss treatim olketa wea just kam lo last hour.—Matt. 20:8-15. w20.01 30 ¶14

Jehovah laekem famili blo hem for mas hapi. Nomata iumi feisim olketa hard taem, iumi garem staka reason for hapi distaem. Olsem example, iumi sure Dadi blo iumi lo heven hem lovem iumi tumas. Iumi garem stretfala savve wea kam from Bible. (Jeremaea 15:16) And tu, iumi kamap part lo wanfala spesol famili wea evriwan lovem Jehovah, lovem olketa standard blo hem, and lovem each other. (Sams 106:4, 5) Iumi savve gohed hapi bikos iumi barava sure hao lo future laef bae kamap gud tumas. Iumi savve hao klosap nao Jehovah bae finisim evri nogud pipol, and anda lo rul blo Kingdom disfala earth bae kamap wanfala Paradaes moa. And tu, iumi garem nambawan hope hao olketa wea dae finis bae laef bak and bae iumi stap tugeta moa. (John 5:28, 29) Datwan hem barava hapi samting! And main important samting, iumi sure hao klosap nao evriwan lo heven and earth bae mekhae lo Dadi wea lovem iumi and givim hem praise and worship wea hem nomoa fit for kasem. w20.02 13 ¶15-16

Sapos iu duim wanfala serious sin, no trae for haedem. Bat talemaot lo Jehovah lo prea. Datwan bae katem daon wei for wari wea kamap from guilty konsens. Bat sapos iu laek for fren bak moa witim Jehovah, iu need for duim nara samting winim for just prea nomoa. Iu need for acceptim discipline. Taem Jehovah sendem profet Nathan for showim lo King David dat hem duim sin witim Bath-sheba, David no mek excuse or trae for sei dat sin wea hem duim hem no barava nogud tumas. Hem stretawe talemaot dat hem sin, no just againstim hasband blo Bath-sheba, bat samting wea winim datwan, hem sin againstim Jehovah. David acceptim discipline wea kam from Jehovah, and Jehovah forgivim hem. (Mektu Samuel 12:10-14) Sapos iumi duim wanfala serious sin, iumi need for story lo olketa wea Jehovah markem for lukaftarem iumi. (Jas. 5:14, 15) And iumi mas no trae for mek excuse for wanem iumi duim. Sapos iumi kwiktaem acceptim and followim discipline, bae iumi kwiktaem kasem bak peace and hapi. w20.02 24 ¶17-18

“Tenfala strensa” hia piksarem olketa wea garem hope for stap olowe lo disfala earth. Olketa savve Jehovah blessim disfala grup blo olketa anointed wan wea datfala Jew hem piksarem, and olketa ting hem wanfala privilege for worshipim Jehovah tugeta witim olketa. Hem hard for savve lo nem blo each wan lo olketa anointed wea stap lo earth distaem, nomata olsem, olketa wea garem hope for stap lo earth savve ‘go witim’ olketa anointed wan. Lo wanem wei? Olsem iumi lukim lo text for tuday, datfala verse story abaotem wanfala Jew. Bat datfala toktok “yufala” hem minim staka pipol. Diswan minim datfala Jew hem no wanfala man nomoa bat hem minim full grup blo olketa anointed wan. Olketa wea no anointed worshipim Jehovah tugeta witim olketa wea anointed. Nomata olsem, olketa no ting lo olketa anointed wan olsem leader, bikos olketa luksavve Jesus nao leader blo olketa.—Matt. 23:10. w20.01 26 ¶1-2

Jesus sei pipol bae luksavve hu nao olketa tru disaepol blo hem sapos olketa showimaot sem kaen love wea hem showimaot. Datwan kamap tru lo first century, and hem tru lo distaem tu. So hem barava important for gohed showimaot love lo each other nomata samfala taem datwan no isi! Askem iuseleva: ‘Wanem nao mi savve lanem from olketa brata and sista wea gohed for showimaot love lo each other nomata lo taem wea hem no isi?’ From iumi no perfect, samfala taem hem hard for iumi barava lovem narawan. Nomata olsem, iumi mas trae for followim example blo Christ. Jesus teachim iumi dat hem important for mek peace witim wanfala brata wea feel nogud lo iumi. (Matt. 5:23, 24) Hem strongim hao sapos iumi laek for mekem God hapi, iumi need for keepim gudfala wei for fren witim olketa narawan. Jehovah hapi taem iumi traem best for mek peace witim olketa brata blo iumi. Jehovah bae no acceptim worship blo iumi sapos iumi gohed feel nogud lo samwan, and no laek for trae mek peace witim hem.—1 John 4:20. w20.03 24 ¶1-4

Satan hem “dadi bilong wei for laea.” Hem laea long pipol start kam from taem bilong Adam and Eve. (John 8:44) Samfala long olketa laea hia nao, olketa false teaching abaotem dae and samting wea happen long man bihaen hem dae. Olketa teaching hia mekem staka kastom and biliv kamap abaotem olketa wea dae. Why nao staka pipol bilivim laea wea Satan talem? Satan savve pipol no laek for dae and hem iusim datfala feeling for laea long pipol. Iumi no laek for dae bikos God creatim iumi witim feeling for laef olowe. (Eccl. 3:11, NW) Iumi ting long dae olsem wanfala enemy. (1 Cor. 15:26) Nomata Satan waka hard for laea long pipol, truth abaotem dae hem no haed. Winim enitaem bifor, staka pipol savve and talemaot wanem Bible teachim abaotem samting wea happen long olketa wea dae and hope for olketa wea dae. (Eklesiastes 9:5, 10; Acts 24:15) Olketa truth hia comfortim iumi, helpem iumi for no fraet, and givim iumi hope. w19.04 14 ¶1; 15 ¶5-6

Jehovah God lovem olketa wea worshipim hem. Hem duim bifor, and bae hem gohed duim. And tu, hem laekem tumas justice. (Sams 33:5) So, iumi fit for trustim tufala samting hia: (1) Jehovah sorre tumas taem hem lukim samwan no treatim gud pipol bilong hem. (2) Hem bae mek sure pipol bilong hem kasem justice. Love nao faondeson bilong datfala Law wea God givim long Moses for olketa Israelite. Disfala Law mekhae long wei for showimaot justice long evriwan, especially for olketa wea no savve protectim olketa seleva. (Diutronomi 10:18) Datfala Law showimaot Jehovah barava lovem pipol bilong hem. Law bilong Moses finis long 33 C.E. taem Christian kongregeson start. So waswe, olketa Christian bae garem tu eni law wea love nao faondeson bilong hem and wea mekhae long justice? Ia! Olketa Christian garem niu law, hem nao datfala “law bilong Christ.” Jesus no raetem list bilong olketa law for olketa disaepol followim, bat hem givim olketa instruction, komand, and principle for gaedem olketa. So “law bilong Christ” nao evri samting wea Jesus teachim. w19.05 2 ¶1-3

Iumi evriwan laekem samwan for comfortim iumi, and tu, iumi evriwan fit for comfort narawan. Olsem example: Sapos wanfala smol pikinini plei, then hem foldaon and garekil, bae hem krae and ran go long mami or dadi. Hem tru, hard for mami or dadi healim datfala garekil, bat hem savve comfortim datfala pikinini. Maet hem karem, story long hem, draem tias bilong hem, and tok kaen long hem. And maet hem putim eni medicine long garekil bilong hem. Kwiktaem nomoa pikinini hia finis krae and go plei moa. Isisi, datfala garekil bae kamap gud. Bat, wanfala samting wea savve kasem pikinini hem barava worse winim datwan. Hem nao taem pikinini kasem sexual abuse. Nomata sapos samwan abusim pikinini wantaem nomoa or datwan gohed for staka year, datwan savve mekem pikinini barava feel nogud and hem affectim full laef bilong hem. Samfala taem, man wea duim child abuse hem kasem panis. Bat samfala taem, luk olsem man wea duim child abuse hem no kasem panis. Nomata sapos datfala man kwiktaem kasem panis or nomoa, hao datfala abuse affectim pikinini hem maet gohed go kasem taem hem growap. w19.05 14 ¶1-2