September

Waswe, example wea Jehovah and Jesus showimaot saed lo wei for waka hard hem minim iumi no need for rest nao? Nomoa. Jehovah no savve taed, so hem no needim rest bihaen hem duim wanfala waka. Nomata olsem, Bible sei bihaen Jehovah creatim heven and earth hem rest tu. (Eksodas 31:17) Luk olsem, datwan minim bihaen Jehovah creatim evri samting, hem stop and spendem lelebet taem for hapi lo olketa samting wea hem wakem. And nomata Jesus waka hard taem hem stap lo earth, hem markem taem tu for rest and enjoy for kaikai witim olketa fren blo hem. (Matt. 14:13; Luke 7:34) Bible encouragem pipol blo God for mas waka. Olketa servant blo hem shud waka hard and no lesy. (Provebs 15:19) Maet iu mas waka for selen for provaed for famili blo iu. And from iumi disaepol blo Christ, iumi garem responsibility for share lo waka for preachim gud nius. Nomata olsem, iu needim tu inaf taem for rest. w19.12 2 ¶2; 3 ¶4-5

Stap klia long wei for storystory abaotem olketa demon. Iumi laek for followim example bilong Jesus. Bifor Jesus kam long earth, hem stap long heven and hem savve long staka samting abaotem Satan and olketa demon. Bat hem nating laek for storyim wanem olketa demon hia duim. Main wan wea Jesus laek for teach abaotem hem Jehovah, and no Satan. Iumi savve followim example bilong Jesus taem iumi no spredim olketa story abaotem olketa demon. Bat, iumi showimaot long toktok bilong iumi hao tingting bilong iumi hem “fulap long olketa gudfala toktok” wea hem nao truth. (Sams 45:1) No fraetem olketa demon. Long world distaem, olketa nogud samting savve happen long iumi. Olketa accident, sik, or dae savve kasem iumi long enitaem wea iumi no expectim. Bat iumi shud no tingse olketa demon nao kosim datwan. Bible sei: “Enikaen samting hemi save kasem evriwan ya long enikaen taem.” (Eklesiastes 9:11) Jehovah showimaot hem garem bigfala paoa winim olketa demon. w19.04 23-24 ¶13-14

Taem olketa elder kasem report abaotem samwan wea olketa accusim long child sexual abuse, waswe, olketa followim law bilong gavman abaotem wei for reportim datwan? Yes. Sapos wanfala kantri garem olketa law olsem, taem olketa elder kasem report abaotem samwan wea olketa accusim long child abuse olketa mas obeyim law for reportim datwan. Olketa law olsem hem no againstim law bilong God. (Acts 5:28, 29) So taem samwan talem olketa elder hao hem ting samwan abusim wanfala pikinini, olketa elder kwiktaem contactim branch office for kasem instruction long hao for obeyim law bilong kantri for reportim datwan. Taem olketa elder story witim victim and parents bilong hem, or samwan wea savve long wanem hem happen, olketa elder savve letem olketa for savve sapos olketa laek for reportim datwan long police, olketa shud feel free for duim datwan. Bat hao sapos datfala report hem abaotem samwan wea part long kongregeson and then olketa long community herem? Waswe, datfala brata or sista wea reportim datwan, hem shud feel hem spoelem nem bilong Jehovah? Nomoa. Man wea duim child abuse nao spoelem nem bilong God. w19.05 10 ¶13-14

Bible givim advaes long olketa hasband and waef for mas showimaot respect and keepim marit promis wea tufala mekem. Hem encouragem hasband and waef for mas stap tugeta for olowe taem hem sei: “Man hemi mas lusim mami an dadi blong hem, an hemi mas joen wetem waef blong hem, an tufala bae i kamap wanfala nomoa.” (Jenesis 2:24) Bat wisdom bilong world mekhae long difren tingting, olketa sei hasband and waef shud tingim wanem olketa seleva laekem. Wanfala buk wea story abaotem divorce sei long samfala wedding ceremony, disfala toktok insaed marit promis wea sei “for full laef bilong iumi tufala,” olketa changem witim disfala toktok, “sapos iumi tufala gohed lovem each other.” Kaen tingting olsem abaotem marit savve lead go long wei for famili separate and hem mekem famili for safa. So hem barava tru, iumi lukim hao wei for no respectim marit hem barava karangge tingting. w19.05 23 ¶12

Paul wari bikos luk olsem olketa rong idea and tingting blo world blo Satan hem affectim samfala lo olketa Christian hia. (Eph. 4:17-19) Datwan savve happen lo eniwan lo iumi tu. Satan hem ruler blo disfala world and hem traem staka difren teknik for mekem iumi lusim Jehovah. Olsem example, sapos iumi laekem olketa narawan for tinghae lo iumi or iumi laek kamap famous, bae Satan iusim datwan. Hem maet iusim culture, education, or samfala samting lo laef blo iumi, for mekem iumi for garem sem kaen tingting olsem hem. Waswe, iumi savve aotem olketa samting wea stap “strong tumas” lo mind blo iumi? (2 Cor. 10:4) Lukim wanem Paul talem, hem sei: “Mifala aotem tingting blo pipol wea hem no stret and enikaen praod tingting wea againstim datfala savve abaotem God. Hem olsem mifala kasholem and leadim tingting bilong pipol for olketa obeyim Christ.” (2 Cor. 10:5) Jehovah savve helpem iumi for aotem olketa tingting wea no stret. w19.06 8 ¶1-3

Nomata olketa barava stress, Hannah, David, and wanfala man wea raetem Psalm depend lo Jehovah for helpem olketa. Olketa prea lo Jehovah abaotem olketa hevi and wari blo olketa. Olketa storyim reason why olketa stress tumas. And olketa gohed for go lo ples for worshipim Jehovah. (Fas Samuel 1:9, 10; Sams 55:22; 73:17; 122:1.) Jehovah ansarem prea blo each wan lo olketa hia lo kaenfala wei. Hannah kasem peace lo mind. (Fas Samuel 1:18) David raet olsem: “Man wea hemi stret maet hemi safa lo plande trabol, bat [Jehovah] hemi sevem hem from olketa trabol ya.” (Sams 34:19) And man wea raetem psalm hem sei, hem olsem Jehovah holem raet hand blo hem and leadim hem witim olketa advaes blo hem. (Sams 73:23, 24) Wanem nao iumi lanem from olketa example hia? Samfala taem olketa problem wea kasem iumi hem mekem iumi garem bigfala hevi and datwan kosim stress. Bat iumi savve deal witim datwan, sapos iumi ting raonem wanem Jehovah duim finis for olketa narawan, prea and depend lo hem, and obeyim wanem hem talem iumi for duim.—Sams 143:1, 4-8. w19.06 17-18 ¶14-15

Iu mas no letem wanem olketa man talem or duim for mekem iu shame for showimaot iu wanfala Jehovah’s Witness. (Maeka 4:5) Tingim example blo olketa aposol lo Jerusalem no longtaem bihaen olketa killim dae Jesus. Olketa savve finis dat olketa leader blo Jew religion barava heitim olketa. (Acts 5:17, 18, 27, 28) Nomata olsem, olketa gohed for go lo temple and showimaot hao olketa disaepol blo Jesus. (Acts 5:42) Olketa no letem wei for fraetem man for stopem olketa. Iumi tu savve winim wei for fraetem man, sapos iumi evritaem showimaot iumi Jehovah’s Witness. Iumi duim diswan lo waka ples, lo skul, and lo pipol wea stap raonem iumi. (Acts 4:29; Rome 1:16) Why nao olketa aposol hapi? Bikos olketa savve why pipol heitim olketa, and olketa ting hem privilege for kasem persecution bikos lo Jehovah. (Luke 6:23; Acts 5:41; 1 Pet. 2:19-21) Taem iumi luksavve pipol heitim iumi bikos iumi duim stret samting, iumi bae no letem feeling for fraetem man for stopem iumi for gohed worshipim Jehovah. w19.07 7 ¶19-20

Jesus and olketa Jew wea followim hem keepim Sabbath bikos olketa stap anda lo Law blo Moses. Bat, wanem Jesus talem and duim showimaot man mas balance taem hem keepim Sabbath, and hem stret nomoa for man kaen and helpem narawan lo Sabbath. (Matt. 12:9-11) Lo tingting blo hem, wei for kaen and helpem narawan hem no brekem law blo Sabbath. Samting wea Jesus duim mekhae lo main reason why God talem pipol blo hem for keepim Sabbath. From pipol blo God olketa rest from waka, datwan mekem olketa savve duim olketa spiritual samting. Jesus growap lo famili wea iusim taem blo Sabbath for duim olketa spiritual samting. Iumi lukim datwan taem iumi read abaotem Jesus taem hem stap lo hom blo hem lo Nazareth. Bible sei: “Long Sabbath [Jesus] go long sinagog olsem hem savve duim olowe, and hem standap for read.” (Luke 4:15-19). And tu, olketa disaepol blo Jesus barava tinghae lo datfala law blo Sabbath, dastawe olketa weit go kasem taem wea Sabbath hem finis bifor olketa finis for redyim evri samting for putim lo body blo Jesus.—Luke 23:55, 56. w19.12 4 ¶10

Evri Christian share for helpem samwan wea garem honest heart for kamap disaepol. Iumi olsem olketa wea waka hard for faendem wanfala smol pikinini wea lus. Why nao iumi sei olsem? Tingim samting wea really happen lo wanfala smol boy wea thri years nomoa wea lus from haos blo hem. Samting olsem 500 pipol nao lukaotem datfala smol boy. Gogo, bihaen samting olsem 20 hour, wanfala lo olketa faendem hem lo wanfala field wea olketa plantim corn. Datfala volunteer no laek acceptim wei wea pipol sei hem nao faendem datfala boy. Hem sei: “Staka handred pipol nao share lo disfala waka for faendem disfala smol boy.” Staka pipol nao olsem datfala smol boy wea lus, olketa no garem hope and olketa needim help. Winim eit million pipol nao share lo disfala waka for faendem olketa. Maet iuseleva no faendem eni Bible study. Bat maet olketa nara pablisa wea iufala waka tugeta lo datfala territory nao faendem samwan wea laek for lanem truth wea stap insaed Bible. Taem wanfala brata or sista faendem samwan wea laek for kamap disaepol blo Christ, evriwan wea share insaed disfala waka garem gudfala reason for hapi. w19.07 16-17 ¶9-10

Aposol Paul remindim olketa Christian lo Philippi hao olketa need for gohed ran and no givap. Taem wea kongregeson start, olketa deal witim wei wea pipol heitim olketa. Paul and Silas obeyim datfala direction from God for go “long Macedonia,” and olketa kasem Philippi lo samting olsem 50 C.E. (Acts 16:9) Olketa meetim wanfala woman wea nem blo hem Lydia, wea willing for lisin, and “Jehovah openem heart bilong hem” for acceptim gud nius. (Acts 16:14) Lydia and olketa lo haos blo hem baptaes. Bat Satan start for mek trabol. Olketa bigman lo datfala taon kasholem Paul and Silas, and tekem tufala go lo magistrate and laea for sei tufala mek trabol. From datwan, olketa whipim Paul and Silas, putim tufala lo prison, and bihaen raosem tufala from datfala taon. (Acts 16:16-40) Waswe, tufala givap? Nomoa! Bat waswe lo olketa brata and sista lo datfala niu kongregeson? Olketa tu no givap! Iumi sure gud example blo Paul and Silas barava encouragem olketa. w19.08 2 ¶1-2

Samfala lo olketa raeteous frut nao, hem wei for lovem Jehovah and lovem pipol blo hem. Datwan minim tu wei for story abaotem faith wea iumi garem lo Jesus and nambawan hope blo iumi. Iumi garem raeteous frut taem iumi busy for duim disfala important waka. (Matt. 28:18-20) Nomata wanem nao iumi mas deal witim, iumi savve shaen olsem laet. Samfala taem, wanfala samting wea happen wea iumi tingse bae mekem hem hard for iumi talemaot gud nius, hem kamap wanfala chance for iumi preach. Olsem example, taem aposol Paul prisoner lo wanfala haos lo Rome, hem raetem datfala leta lo olketa lo Philippi. Nomata hem garem olketa chain lo hand blo hem, datwan no mekem hem hol bak for preach lo olketa wea gardim hem and olketa wea visitim hem. Paul strong for preach nomata hem mas deal witim olketa hard taem hia, and datwan mekem olketa brata kasem strong and “no fraet nao for talemaot toktok bilong God.”—Phil. 1:12-14; 4:22. w19.08 12 ¶15-16

Main important reason why iumi shud lane for hambol hem bikos iumi laek for mekem Jehovah hapi. Aposol Peter story klia abaotem datwan taem hem raetem toktok lo text blo tuday. Lo “Come Be My Follower” buk hem storyim datfala toktok blo Peter. Lo chapter 3, paragraf 23 hem sei: “Wei for praod hem olsem poison. Samting wea kamaot from datwan hem barava nogud tumas. Sapos man hem praod, nomata hem garem big savve God bae no iusim hem. Bat hambol fasin hem opposite lo datwan, nomata man hem garem lelebet savve bat sapos hem hambol Jehovah savve barava iusim hem . . . . Jehovah bae . . . barava hapi and givim iu reward sapos iu hambol.” So waswe, eni nara samting hem winim wei for mekem heart blo Jehovah for hapi? (Provebs 23:15) Taem iumi gohed lane for hambol datwan mekem Jehovah hapi, and tu, iumi bae kasem staka gud samting. Sapos iumi hambol datwan bae mekem pipol for laek fren witim iumi. For luksavve why pipol feel olsem, tingim wanem kaen pipol nao iu laek for fren witim.—Matt. 7:12. w19.09 4 ¶8-9

Olketa elder savve waka hard for helpem olketa brata and sista blo olketa. And olketa no letem position wea olketa garem for mekem olketa praod. Bat, olketa savve treatim olketa brata and sista lo kongregeson lo wei wea showimaot love. (1 Thess. 2:7, 8) Bigfala love and wei for hambol, mekem olketa for story kaen lo olketa brata and sista. Andrew, wanfala mature elder sei: “Mi lukim hao taem elder hem kaen and fren gud witim olketa brata and sista, datwan hem tasim heart blo olketa, and muvim evriwan lo kongregeson for waka tugeta witim olketa elder.” Tony, wea elder for longtaem finis sei: “Mi trae for followim kaonsel wea stap lo Philippi 2:3 and mi evritaem trae for ting lo olketa narawan olsem olketa winim mi. Datwan helpem mi for no olsem wanfala boss.” Olketa elder mas hambol olsem Jehovah hem hambol. Nomata Jehovah hem Haefala Ruler lo universe, hem willing for “luk kamdaon” and helpem olketa man, nomata olketa dust nating. (Sams 18:35; 113:6, 7) Tru tumas, Jehovah barava heitim olketa wea praod and wea tinghae lo olketa seleva. w19.09 16-17 ¶11-12

Taem iumi karem yoke blo Jesus, iumi savve gohed kasem strong sapos iumi gohed garem stret wei for ting lo samting. Iumi duim waka blo Jehovah, so iumi mas duim followim wei blo Jehovah. Iumi olketa wakaman and Jehovah nao boss. (Luke 17:10) Sapos iumi laek for duim waka blo hem followim wei blo iumi, bae iumi mekem hem hard for iumiseleva nomoa. Bat lo narasaed, iumi savve duim staka samting, and winim staka hard taem sapos iumi followim direction blo Jehovah. Tingim, no eniwan savve stopem wanem Jehovah laekem for mas happen! (Rome 8:31; 1 John 4:4) Goal blo iumi hem for praisem Dadi blo iumi Jehovah. Olketa lo first century wea letem wei for greedy or wei for tingim seleva for kontrolem olketa, no longtaem nomoa, olketa no hapi and lusim nao yoke blo Jesus. (John 6:25-27, 51, 60, 66; Phil. 3:18, 19) Bat, olketa wea lovem God and olketa narawan, gohed karem yoke blo Jesus lo full laef blo olketa lo earth, and olketa garem hope for waka witim Christ lo heven. Olsem wanem olketa duim, iumi tu bae gohed hapi for karem yoke blo Jesus, bikos stret reason nao muvim iumi for duim samting. w19.09 20 ¶1; 24-25 ¶19-20

Tingim tu olketa blessing wea iu kasem bikos iu free from olketa laea teaching. Iumi barava hapi for garem disfala freedom! Iu savve expectim hao lo future bae iu barava free go moa. Klosap nao Jesus bae duim samting for finisim olketa false religion and olketa gavman blo man wea corrupt. God bae protectim “wanfala big crowd” wea servem hem, and then hem bae letem olketa for enjoyim olketa blessing lo paradaes earth. (Rev. 7:9, 14) Staka pipol bae resurrect and bae garem chance for kamap free from olketa nogud samting wea kamaot from sin. (Acts 24:15) Lo Thousand Year Rul blo Jesus, hem and olketa wea rul witim hem bae helpem iumi olketa man for garem perfect health and bae iumi fren gud witim God lo perfect wei. Lo datfala taem, evriting bae kamap gud moa and evriwan bae kamap free, diswan hem olsem datfala Jubilee lo Israel. Datwan minim evriwan lo full earth wea faithful for servem Jehovah bae perfect and free from sin. w19.12 12-13 ¶14-16

Lo first century C.E., wanfala man wea nem blo hem Joseph (wea nara nem blo hem Barnabas) hem kaen tumas, hem willing for letem Jehovah for iusim hem. (Acts 4:36, 37) Bihaen Saul kamap Christian, staka brata fraet for go story lo hem bikos lo wei blo hem bifor for persecutim olketa lo kongregeson. Bat from Barnabas hem man wea kaen hem helpem Saul. (Acts 9:21, 26-28) Bihaen, olketa elder lo Jerusalem luksavve olketa brata wea stap farawe lo Antioch lo Syria, olketa needim encouragement. Hu nao bae olketa sendem? Barnabas! Olketa mekem gudfala disison. Iumi savve hao Barnabas “hem encouragem olketa for faithful long Lord and for gohed strong.” (Acts 11:22-24) Distaem tu, Jehovah savve helpem iumi for kamap “man for strongim” olketa brata and sista blo iumi. Olsem example, Jehovah maet iusim iumi for comfortim olketa wea lusim samwan wea olketa lovem lo dae. Or Jehovah savve muvim iumi for go visitim or ringim samwan wea sik or wea kasem stress and for encouragem hem. Waswe, bae iu letem Jehovah for iusim iu olsem hem iusim Barnabas?—1 Thess. 5:14. w19.10 22 ¶8

Samfala taem, from iumi waka klos witim olketa fren blo iumi, bae iumi lukim gudfala wei blo olketa and wik point blo olketa tu. Wanem nao savve helpem iumi for deal witim disfala challenge? Tru samting nao, iumi no expectim olketa brata and sista blo iumi for perfect. Dastawe, taem iumi start for fren gud witim olketa narawan, iumi need for duim samting for keepim datwan. Sapos olketa fren blo iumi duim wanfala mistek, iumi maet need for givim kaonsel from Bible lo wei wea kaen bat tok stret. (Sams 141:5) Sapos olketa mekem iumi feel nogud, iumi need for forgivim olketa. Taem iumi forgivim olketa, iumi mas traem best for no storyim datwan moa bihaen. Iumi stap lo taem wea no isi, so hem barava important for ting lo gud saed blo olketa brata and sista blo iumi and no ting lo wik point blo olketa! Diswan bae strongim wei wea iumi fren gud tugeta, and hem important for duim datwan distaem bikos iumi needim diskaen wei for fren klos lo taem blo big trabol. w19.11 6 ¶13, 16

Taem iumi conductim Bible study, iumi mas traem best for ‘teachim pipol for kamap disaepol and teachim olketa for followim evri samting wea Jesus laekem olketa for duim.’ Iumi need for helpem pipol for luksavve hem barava important for olketa sapotim Jehovah and Kingdom blo hem. Diswan minim iumi mas trae for helpem pipol for followim wanem olketa lanem, dedicatem laef blo olketa lo Jehovah, and baptaes. Datwan nomoa bae mekem olketa sev lo day blo Jehovah. (1 Pet. 3:21) From distaem go kasem end blo disfala world, lelebet taem nomoa stap. So iumi no garem inaf taem for gohed studyim Bible witim pipol wea no changem laef blo olketa for kamap disaepol blo Christ. (1 Cor. 9:26) Iumi mas hariap for duim waka hia! Staka pipol stap yet wea need for herem disfala Kingdom message bifor hem leit. w19.10 11-12 ¶14-15

Evri year lo Atonement Day, nation blo Israel savve hipap and hae priest savve offerim olketa animal sakrifaes. Olketa sakrifaes hia hem for remindim olketa Israelite dat olketa mas klin from sin blo olketa! Bat, bifor datwan hae priest mas pourim datfala holy incense antap lo sakol wea gohed for bone and datfala rum bae barava smel naes tumas. Wanem nao iumi savve lanem from datwan? Bible showimaot hao olketa prea wea Jehovah acceptim from olketa wea faithful for worshipim hem, hem olsem incense. (Sams 141:2; Rev. 5:8) Taem hae priest tekem go incense front lo Jehovah, hem duim witim bigfala respect. Olsem tu, taem iumi prea lo Jehovah, iumi duim witim bigfala respect. Iumi barava respectim hem. Iumi barava tinghae lo wei wea Creator blo iumi letem iumi for story lo hem, and kam klos lo hem olsem wanfala pikinini witim dadi blo hem. (Jas. 4:8) Hem acceptim iumi olsem olketa fren blo hem! (Sams 25:14) Iumi tinghae tumas lo disfala privilege and iumi no laek for duim eni samting wea bae mekem hem no hapi lo iumi. w19.11 20-21 ¶3-5

Wanem nao tingting blo staka pipol lo ples wea iu stap abaotem waka? Lo staka kantri, pipol waka hard tumas and spendem staka taem lo waka winim enitaem bifor. Pipol wea waka hard tumas, staka taem olketa busy and no garem taem for rest, spendem taem witim famili, or for duim olketa spiritual samting. (Eklesiastes 2:23) Bat, samfala pipol nating laek for waka and olketa talem staka excuse for no duim eni samting. (Provebs 26:13, 14) Pipol lo world no garem balance tingting abaotem waka. Bat, Jehovah and Jesus barava difren. Jehovah hem man for waka. Jesus talem klia datwan taem hem sei: “Dadi bilong mi hem gohed waka kam kasem distaem, and mi tu gohed waka.” (John 5:17) Tingim evri samting wea God duim taem hem creatim staka million angel and full universe. Iumi savve lukim tu staka samting wea God wakem lo earth wea luk naes tumas. w19.12 2 ¶1-2

Wanem nao mekem David for barava klos lo Jehovah? David lane abaotem Jehovah from creation. Taem David young, hem spendem staka taem aotsaed bikos hem lukaftarem sheepsheep blo dadi blo hem. Maet lo datfala taem nao hem start for ting raonem olketa samting wea Jehovah wakem. Olsem example, taem David luk ap lo skae lo naet hem no just lukim staka thousand star nomoa, bat hem luksavve tu lo olketa wei blo Man wea Creatim evri samting hia. (Sams 19:1, 2) Taem David ting raonem hao Jehovah wakem olketa man, hem luksavve lo nambawan wisdom blo Jehovah. (Sams 139:14) Taem David trae for minim gud olketa creation blo Jehovah, datwan mekem hem for barava hambol. (Sams 139:6) Wanem nao leson for iumi? Evriday, hem gud for ting raonem olketa creation wea stap raonem iu, olsem olketa plant, animal, and pipol, and hao datwan teachim iu abaotem Jehovah. Then evriday bae iu lanem moa samting abaotem Dadi wea lovem iu. (Rome 1:20) And each day bae iu luksavve love blo iu for hem bae kamap moa strong. w19.12 19-20 ¶15-17

Moses duim samting followim wanem hem lanem. Taem hem samting olsem 40 year, Moses chus for associate witim olketa Israelite wea olketa nao pipol blo God, winim wei for olketa kolem hem “son bilong dota bilong Pharaoh.” Moses willing for lusim hae position blo hem. Taem Moses saed witim olketa Israelite wea slave lo Egypt, hem savve Pharaoh wea garem bigfala paoa and pipol ting lo hem olsem wanfala god bae barava kros lo hem. Moses garem strongfala faith! Moses trustim Jehovah. Kaen wei for trust olsem, hem faondeson blo wei wea hem fren witim Jehovah for full laef blo hem. (Provebs 3:5.) Wanem nao leson for iumi? Olsem Moses, iumi evriwan mas mekem wanfala disison: Waswe, bae iumi chus for servem Jehovah and associate witim pipol blo hem? Iumi maet need for sakrifaesim samfala samting for servem God, and maet olketa narawan wea no savve lo Jehovah bae againstim iumi. Bat sapos iumi trustim Dadi blo iumi lo heven, iumi sure hem bae sapotim iumi! w19.12 17 ¶5-6

Nomata Jehovah wakem iumi from dust lo graon, iumi barava spesol winim datwan. Tingim samfala reason why iumi savve dat iumi spesol lo Jehovah. Hem creatim iumi for garem olketa wei blo hem. (Jenesis 1:27) Taem hem duim datwan, hem mekem iumi gud winim evri nara creation lo earth, and hem markem iumi for lukaftarem earth and olketa animal. (Sams 8:4-8) Nomata bihaen Adam sin, tingting blo Jehovah hem no change, iumi still spesol lo hem. Iumi barava important lo hem dastawe hem givim Jesus, Son blo hem wea hem lovem tumas, olsem wanfala ransom for olketa sin blo iumi. (1 John 4:9, 10) Bikos lo datfala ransom, Jehovah bae resurrectim “pipol wea raeteous and pipol wea no raeteous” wea dae from sin blo Adam. (Acts 24:15) Bible showimaot hao nomata iumi sik, garem hard taem saed lo selen, or olo, iumi barava important lo Jehovah.—Acts 10:34, 35. w20.01 15 ¶5-6

Man no savve kasem hope for go lo heven from famili blo hem. Hem kasem datwan from God. (1 Thess. 2:12) Iumi shud no askem olketa kwestin wea maet mekem olketa narawan feel nogud. Olsem example, iumi bae no askem waef blo wanfala anointed brata hao nao feeling blo hem abaotem wei wea hem bae laef olowe lo earth bat hasband blo hem bae go lo heven. Iumi barava sure hao lo niu world, Jehovah bae mek sure dat evri samting wea laef bae hapi and satisfae.” (Sams 145:16) And tu, iumi bae protectim iumiseleva sapos iumi no treatim olketa anointed wan olsem olketa important winim narawan. Lo wanem wei? Bible talem iumi hao samfala wea anointed maet no gohed faithful. (Matt. 25:10-12; 2 Pet. 2:20, 21) Bat sapos iumi stap klia lo wei for tinghae tumas lo samwan, datwan bae mekem iumi no followim olketa, nomata sapos olketa anointed, or samwan wea evriwan savve lo hem, or wea servem Jehovah for longtaem finis. (Jude 16) Then, sapos olketa no faithful or lusim kongregeson, iumi bae no lusim faith blo iumi lo Jehovah or stop for servem hem. w20.01 29 ¶9-10

From iumi “olketa pikinini bilong God wea hem lovem,” iumi traem best for followim example blo hem. Iumi followim olketa wei blo hem taem iumi showimaot love, kaen, and forgivim olketa narawan. Taem olketa wea no savve lo God lukim gudfala wei blo iumi, datwan bae mekem olketa laek for lane abaotem Jehovah. (1 Pet. 2:12) Christian parents shud trae for treatim pikinini blo olketa lo sem wei wea Jehovah treatim iumi. Taem olketa duim datwan, maet pikinini blo olketa bae laek for fren gud witim Dadi blo iumi, Jehovah. Iumi praod abaotem Dadi blo iumi lo heven, Jehovah, and iumi laekem olketa narawan for savve lo hem. Iumi garem sem kaen feeling lo heart blo iumi olsem King David, wea sei olsem: “Bae mi gohed fo preisim [Jehovah].” (Sams 34:2) Bat, hao sapos iumi hol bak? Wanem nao bae helpem iumi for no fraet? Iumi bae no fraet taem iumi tingim hao Jehovah bae hapi sapos iumi story abaotem hem, and hao olketa narawan savve kasem gud samting taem olketa lane abaotem hem. Jehovah bae givim iumi strong wea iumi needim for mekem iumi no fraet. Hem helpem olketa brata blo iumi lo first century for no fraet and hem bae helpem iumi tu.—1 Thess. 2:2. w20.02 11 ¶12; 13 ¶13

Staka wea studyim Bible, olketa gohed gud lo study gogo olketa baptaes. Bat samfala wea gohed studyim Bible, olketa hol bak for kamap disaepol. Olketa enjoyim wei for study, bat olketa no gohed gud mekem olketa fit for baptaes. Sapos iu garem wanfala Bible study, mifala sure iu laekem student blo iu for followim wanem hem lanem, and for kamap disaepol blo Christ. Jehovah laekem pipol for worshipim hem bikos olketa lovem hem. So goal blo iumi hem for helpem olketa Bible student blo iumi for luksavve Jehovah barava tingim olketa wanwan and hem lovem olketa tumas. Iumi laek for helpem olketa for ting lo Jehovah olsem hem dadi blo olketa wea no garem dadi and man for lukaftarem olketa widow. (Sams 68:5) Taem student blo iumi start for tinghae lo wei wea God lovem hem, datwan bae kasem heart blo hem and mekem grow love blo hem for God. So helpem student for luksavve God blo iumi wea lovem iumi hem laekem olketa for kasem laef olowe, and Hem redi for helpem olketa for kasem datfala goal. w20.01 3 ¶7-8

Aposol Paul hem hambol, hem laekem olketa fren blo hem for encouragem hem. Hem no wari sapos olketa narawan tingse hem man wea wik from hem willing for acceptim comfort from olketa narawan taem hem feisim olketa hard taem. (Col. 4:7-11) Taem iumi hambol for luksavve hao iumi needim encouragement, olketa brata and sista blo iumi bae hapi for givim sapot wea iumi needim. Paul savve Bible bae comfortim hem. (Rome 15:4) Olketa toktok lo Bible bae givim hem wisdom for deal witim eni hard taem. (2 Tim. 3:15, 16) Lo mek-tu taem wea Paul prisoner lo Rome, hem savve dat klosap nao hem bae dae. Hem askem Timothy for kwiktaem kam lo hem and “tekem kam olketa scroll.” (2 Tim. 4:6, 7, 9, 13) Why nao olsem? Luk olsem olketa scroll hia hem samfala lo olketa Hebrew Scripture wea Paul iusim for study seleva. Taem iumi followim example blo Paul for studyim Bible evritaem, Jehovah bae iusim olketa scripture for helpem iumi garem peace nomata wanem hard taem nao iumi feisim. w20.02 23-24 ¶14-15

Eliphaz, Bildad, and Zophar, no ting raonem hao for helpem Job. Bat, olketa gohed for ting raonem nomoa hao olketa bae pruvim lo Job dat masbi hem duim eni rong samting. Samfala toktok wea olketa talem hem tru, bat staka samting wea olketa talem abaotem Job and Jehovah hem no kaen and no tru. Olketa barava judgem Job. (Job 32:1-3) Wat nao Jehovah duim? Hem barava kros lo thrifala man hia. Hem sei olketa man hia karangge and hem talem olketa for askem Job for prea for olketa. (Job 42:7-9) Iumi savve lanem samfala leson from olketa nogud example blo Eliphaz, Bildad, and Zophar. First samting, iumi shud no judgem olketa brata blo iumi. (Matt. 7:2-5) Bat, iumi shud lisin gud firstaem bifor iumi talem eni samting. Taem iumi duim olsem, bae iumi minim wanem olketa feisim. (1 Pet. 3:8) Mek-tu, taem iumi talem samting, iumi mas mek sure toktok blo iumi hem kaen and stret. (Eph. 4:25) And mek-thri, Jehovah barava interest lo hao iumi story lo each other. w20.03 22-23 ¶15-16

Staka taem, taem iumi teachim olketa narawan abaotem Jehovah, datwan mekem iumiseleva tu savve gud lo hem. Olsem example, iumi lukim klia wei wea Jehovah tingim pipol taem hem leadim iumi go lo olketa wea laek for savve abaotem hem. (John 6:44; Acts 13:48) Iumi lukim hao Word blo God garem paoa taem olketa wea iumi study witim lusim olketa nogud wei and garem gudfala wei. (Col. 3:9, 10) And iumi lukim pruv wea showimaot Jehovah hem patient taem hem givim chance lo staka pipol for lane abaotem hem and for olketa sev. (Rome 10:13-15) So nomata hao long nao iumi bin servem Jehovah, iumi shud no ting nating lo wei wea iumi fren witim hem. Wanfala wei wea iumi savve showimaot iumi tinghae lo wei wea iumi fren witim God, hem nao taem iumi story witim hem thru lo prea. Wei for story gud tugeta hem main samting wea strongim wei for fren. So fren gud witim God lo wei for prea evritaem, no fraet for talem hem evri tingting and feeling blo iu. w19.12 19 ¶11, 13-14

Datfala toktok barava comfortim iumi! From Jesus hem King long Kingdom bilong God, hem bae finisim evri nogud samting wea kamaot from rul bilong Satan and nogud world bilong hem. (Aesaea 65:17; 1 John 3:8; Rev. 21:3, 4) Datwan barava strongim hope bilong iumi for future! And tu, nomata Jesus givim iumi wanfala assignment wea no isi, hem stap witim iumi and bae hem sapotim iumi insaed olketa last day. (Matt. 28:19, 20) Datwan strongim wei wea iumi no fraet! From iumi kasem comfort, garem hope, and no fraet, datwan helpem iumi for gohed garem peace long mind and heart. Bat, hao nao iu savve gohed garem peace long mind taem iu kasem olketa barava hardfala test? Iu savve garem peace taem iu followim example bilong Jesus. First samting, iumi need for prea, and nomata wanem happen, gohed for prea. Mek-tu, obeyim Jehovah and strong for preach, nomata long taem wea hem no isi. And mek-thri, depend long olketa fren bilong iu for helpem iu taem iu kasem olketa hard taem. Taem iu duim olsem, peace bilong God bae gaedem heart and tingting bilong iu. (Phil. 4:6, 7) And olsem Jesus, iu bae winim eni hard taem wea iu kasem.—John 16:33. w19.04 13 ¶16-17