January

Timothy fren gud witim Jehovah bikos hem savve lo hem and hem garem strong faith. Iumi tu need for studyim Bible and ting raonem wanem iumi lanem abaotem Jehovah. Iumi need for sure lo thrifala main truth. First, iumi need for sure Jehovah God hem creatim evri samting. (Ex. 3:14, 15, NW; Heb. 3:4; Rev. 4:11) Mek-tu, iumi need for sure Bible hem toktok blo God for iumi olketa man. (2 Tim. 3:16, 17) And mek-thri, iumi need for barava sure Jehovah garem pipol blo hem wea organize and worshipim hem anda lo direction blo Jesus Christ, and Olketa Jehovah’s Witness nao datfala organization. (Aesaea 43:10-12; John 14:6; Acts 15:14) Diswan hem no minim bae iumi mas savve lo evri samting abaotem Bible. Goal blo iumi hem for iusim “gudfala tingting” for sure wanem iumi bilivim hem nao truth.—Rome 12:1. w20.07 10 ¶8-9

Disfala profesi storyim olketa grashopa wea garem feis blo man, and “samting wea luk olsem olketa gold kraon hem stap long hed bilong olketa.” (Rev. 9:7) Olketa mekem “olketa [enemy blo God] wea no garem datfala mark bilong God long forhed bilong olketa” for safa for faevfala month, wea datwan nao hao long wanfala grashopa savve laef. (Rev. 9:4) Luk olsem diswan piksarem olketa wea anointed. Olketa no fraet for talemaot judgment blo God againstim disfala nogud world and datwan mekem olketa wea sapotim world for feel nogud tumas. So waswe, datwan minim olketa “grashopa” wea Joel 2:7-9 storyim hem difren from olketa “grashopa” wea buk blo Revelation storyim? Yes. Bible storyim wanfala samting wea savve piksarem olketa difren samting. Wanfala example hem lo Revelation 5:5, wea sei “datfala Lion wea kam from tribe bilong Judah” hem piksarem Jesus, bat datfala “lion wea singaot big” wea 1 Peter 5:8 storyim hem piksarem Devil. w20.04 3 ¶8; 4 ¶10

Hagar, haosgele blo Sarai, duim karangge samting bihaen hem kamap waef blo Abram. From Hagar babule, hem start for no respectim Sarai wea no garem pikinini. Situation kamap moa worse, so gogo Sarai raosem Hagar. (Jenesis 16:4-6) Maet iumi tingse from Hagar praod hem faendem ansa blo hem, bat Jehovah no ting olsem abaotem Hagar. Hem sendem angel go lo Hagar for helpem hem changem wei blo hem and angel hia blessim Hagar. Hagar luksavve Jehovah tingim hem and luksavve lo evri samting wea happen lo hem. (Jenesis 16:7-13) Hao nao Jehovah ting lo Hagar? Jehovah luksavve lo evri samting wea Hagar bin go thru lo hem. Nomata Jehovah no acceptim wei wea Hagar no showimaot respect lo Sarai, iumi sure hem minim background and situation blo Hagar. w20.04 16 ¶8-9

Aposol Paul sei evri tru Christian insaed lo wanfala resis. (Heb. 12:1) And iumi evriwan, nomata iumi young or olo, strong or taed, iumi mas no givap go kasem end sapos iumi laek for kasem datfala prize wea Jehovah promisim. (Matt. 24:13.) Paul fit for talem disfala advaes bikos hem win for “kasem end bilong datfala resis.” (2 Tim. 4:7, 8) Bat wanem kaen resis nao Paul story abaotem? Samfala taem Paul iusim example blo olketa game lo Greece bifor for teachim olketa important leson. (1 Cor. 9:25-27; 2 Tim. 2:5) Tu-thri taem, hem markem wei for ran lo wanfala resis witim laef blo wanfala Christian. (1 Cor. 9:24; Gal. 2:2; Phil. 2:16) Wanfala man start for ran lo disfala resis taem hem dedicatem hemseleva lo Jehovah and baptaes. (1 Pet. 3:21) Hem finisim datfala resis taem Jehovah givim hem datfala prize blo laef olowe.—Matt. 25:31-34, 46; 2 Tim. 4:8. w20.04 26 ¶1-3

Jehovah bae strongim and protectim iufala from Satan. (2 Thess. 3:3) Hao nao Jehovah protectim iumi? Jehovah provaedem olketa samting for werem lo faet for protectim iumi from Satan. (Eph. 6:13-17) For barava kasem protection iumi mas werem olketa samting hia, and no enitaem aotem. For example, datfala belt hem piksarem olketa tru samting wea stap lo Bible. Why nao hem important for werem disfala belt? Bikos Satan hem “dadi bilong wei for laea.” (John 8:44) For staka thousand year finis hem laea lo “evriwan long earth”! (Rev. 12:9) Bat from iumi savve lo olketa tru samting wea Bible talem, datwan helpem iumi for no bilivim olketa laea blo Satan. Wanem nao hem minim for werem belt? Hem nao for lanem olketa tru samting abaotem Jehovah, worshipim Jehovah followim wanem hem laekem, and honest lo evri samting wea iumi duim.—John 4:24; Eph. 4:25; Heb. 13:18. w21.03 26-27 ¶3-5

Samting wea mekem datfala land for spesol hem bikos olketa lo there followim tru worship. Start lo Pentecost 33 C.E., datfala “land” no minim wanfala ples nomoa lo earth, bikos distaem pipol blo Jehovah stap evriwea lo earth. Distaem datfala “land wea Luk Naes” hem minim waka wea pipol blo Jehovah duim, olsem for worshipim hem lo olketa meeting and duim preaching waka. Lo olketa last day, king blo north gohed for go insaed datfala “land wea Luk Naes.” Olsem example, taem Nazi Germany kamap king blo north, especially lo World War II, datfala king go insaed lo “land wea Luk Naes” taem hem persecutim and killim pipol blo God. Then bihaen World War II taem Soviet Union kamap king blo north, hem go insaed datfala “land wea Luk Naes” taem hem persecutim pipol blo God and sendem olketa lo nara ples, olsem prisoner. w20.05 13-14 ¶7-8

Tingim samfala lo Bible wea kamap fren blo God. Abraham hem showimaot strongfala faith. Winim 1,000 years bihaen hem dae, Jehovah still kolem hem ‘fren blo hem.’ (Aesaea 41:8) So nomata pipol dae, Jehovah still ting lo olketa olsem fren blo hem. Nomata Abraham die, Jehovah gohed tingim hem. (Luke 20:37, 38) Nara example hem Job. Wantaem, olketa angel hipap lo heven and Jehovah storyim hao hem tinghae lo Job. Jehovah sei: “Hemi wanfala [gud] an stretfala man. An hemi tinghae long mi an hemi les fo duim eni ravis samting.” (Job 1:6-8) Hao nao Jehovah ting lo Daniel, wea faithful for worshipim hem for samting olsem 80 year, nomata hem stap lo ples wea pipol no worshipim Jehovah? Taem Daniel olo, thrifala taem olketa angel talem hem God ‘lovem hem tumas.’ (Daniel 9:23; 10:11, 19) Iumi barava sure Jehovah luk forward for resurrectim olketa fren blo hem wea dae finis.—Job 14:15. w20.05 27 ¶3-4

Wanfala Bible study maet lane abaotem olketa law blo God and tinghae lo olketa. Bat waswe, datfala student bae laek obeyim Jehovah bikos hem lovem hem? Tingim, Eve hem savve lo olketa law blo God, bat hem no followim, and Adam tu olsem. (Jenesis 3:1-6) Iumi mas teachim Bible study abaotem olketa standard blo God. Olketa law and standard blo Jehovah barava nambawan. (Sams 119:97, 111, 112) Bat Bible study maet no luksavve lo datwan sapos olketa no minim hao love nao muvim Jehovah for givim olketa law hia. So iumi savve askem Bible study: “Why nao God askem iumi for mas duim wanfala samting and for stap klia from nara samting? Wanem nao datwan hem showimaot abaotem hem?” Hem gud for helpem Bible study blo iumi for ting abaotem Jehovah and for barava lovem hem. Gogo Bible study bae tinghae lo olketa law and lovem Jehovah wea givim law. Olketa bae garem strong faith and savve gohed strong nomata olketa kasem test.—1 Cor. 3:12-15. w20.06 10 ¶10-11

For helpem samwan for kam bak lo Jehovah, iumi need for patient bikos hem savve tek taem. Staka wea inactive bifor sei samting wea helpem olketa kam bak hem from olketa elder and olketa narawan lo kongregeson visitim olketa staka taem. Wanfala sista from Southeast Asia wea nem blo hem Nancy, hem raet olsem: “Wanfala klos fren blo mi lo kongregeson barava helpem mi. Hem olsem big sista wea lovem mi tumas. Hem helpem mi for tingim bak olketa gud taem wea mitufala enjoyim bifor. Hem patient for lisin taem mi talemaot feeling blo mi, and hem no hol bak for givim mi advaes. Hem fren wea redi for helpem mi enitaem mi needim.” Taem iumi tingim feeling blo narawan hem olsem wanfala strong medicine wea savve helpem man for gud bak moa. Samfala inactive for staka year from olketa feel nogud lo samwan insaed kongregeson. Datwan mekem hem hard for olketa kam bak lo Jehovah. From olketa tingse wanem hem happen lo olketa hem no stret bae olketa needim samwan wea bae lisin lo olketa and minim feeling blo olketa. w20.06 26 ¶10-11

Evritaem iu winim olketa test, hem bae moa isi for duim samting wea stret. Tingting blo disfala world abaotem sex hem followim tingting blo Satan. So taem iumi againstim tingting blo world, iu winim Satan. Iumi luksavve Jehovah nao garem raet for talem sapos man hem sin, and iumi traem best for no duim eni sin. Bat taem iumi sin, iumi prea lo Jehovah and talem hem datwan. (1 John 1:9) And sapos iumi duim wanfala serious sin, iumi savve askem help blo olketa elder wea Jehovah appointim for lukaftarem iumi. (Jas. 5:14-16) Bat iumi shud no gohed guilty lo sin wea iumi repent lo hem finis. Why nao olsem? Bikos Dadi blo iumi wea barava lovem iumi hem provaedem ransom sakrifaes blo Son blo hem for mekem wei for iumi kasem forgiveness. Jehovah forgivim olketa wea repent, so no eni samting shud stopem iumi for gohed servem Jehovah witim klin konsens.—1 John 2:1, 2, 12; 3:19, 20. w20.07 22-23 ¶9-10

Lo firstaem Jehovah stap seleva, bat hem no lonely. Nomata olsem, God laekem olketa narawan for enjoyim laef. So love nao muvim Jehovah for start for creatim olketa samting. (1 John 4:19) First, Jehovah wakem Son blo hem, Jesus. Then hem and Jesus wakem olketa angel and “wakem evri nara samting.” (Col 1:16) Jesus hapi for waka witim Dadi blo hem. (Provebs 8:30) And olketa angel blo hem lo heven tu hapi taem olketa lukim Jehovah and Jesus wakem heven and earth. Wanem nao olketa angel duim lo datfala taem? Olketa klap and praisem God taem olketa lukim hem wakem disfala earth, and masbi olketa gohed for hapi lo evri nara samting wea Jehovah creatim, especially taem hem creatim olketa man. (Job 38:7; Provebs 8:31) Evri samting wea Jehovah creatim showimaot love and wisdom blo hem.—Sams 104:24; Rome 1:20. w20.08 14 ¶1-2

Hem wei blo pipol for showimaot love lo narawan and for laekem narawan for showimaot love lo olketa. So taem samwan heitim iumi, iumi savve feel sorre or fraet. Wanfala brata sei: “Taem olketa soldia hitim mi, tok spoelem mi, and sei olketa bae killim mi nogud bikos mi wanfala Jehovah’s Witness, datwan mekem mi fraet fogud.” Iumi no laekem pipol for heitim iumi, bat iumi shud expectim diswan bikos Jesus talem finis datwan bae happen. Why nao samfala les lo iumi wea followim Jesus? Bikos olsem Jesus, iumi “no olsem pipol long world.” (John 15:17-19) Nomata iumi respectim olketa gavman, bae iumi no saedem politik, no salutim flag, and no singim national anthem. Iumi worshipim Jehovah nomoa and iumi luksavve God nao garem raet for rul, nomata Satan and olketa wea saedem hem no acceptim datwan. (Jenesis 3:1-5, 15) Taem iumi preach, iumi storyim Kingdom blo God nao hope blo olketa man and datfala Kingdom bae finisim evri nara gavman. (Daniel 2:44; Rev. 19:19-21) Diswan hem gud nius for olketa wea hambol, bat nogud pipol no laek for herem datwan. w21.03 20 ¶1-2

Jehovah tinghae lo olketa sista insaed kongregeson. Olketa showimaot nambawan example blo wisdom, faith, for waka hard, no fraet, kaen, and duim olketa gudfala waka. (Luke 8:2, 3; Acts 16:14, 15; Rome 16:3, 6; Phil. 4:3; Heb. 11:11, 31, 35) Iumi hapi bikos iumi garem staka olo brata and sista lo kongregeson tu. Nomata maet olketa olo stragol witim health problem, olketa traem best for duim wanem olketa fit for duim lo ministry, and iusim strong blo olketa for encouragem and trainim olketa narawan. Iumi savve kasem gud samting from experience blo olketa. Olketa barava luk naes lo Jehovah and lo iumi tu. (Provebs 16:31) Tingim tu olketa young wan blo iumi. Olketa feisim staka challenge bikos olketa growap insaed world wea Satan kontrolem. Nomata olsem, iumi hapi tumas for lukim hao olketa young wan givim olketa koment lo meeting, share lo ministry, and no fraet for defendim wanem olketa bilivim. Iufala young wan garem important waka insaed lo kongregeson blo Jehovah!—Sams 8:2. w20.08 21-22 ¶9-11

Taem iu start for duim preaching waka and talem pipol iu wanfala Jehovah’s Witness, iu bae feisim samfala hard taem, olsem maet famili againstim iu, olketa fren maet mekfani lo iu, and pipol maet no laek herem Kingdom message. Wanem nao bae helpem iu for no fraet? Iu mas barava sure Jesus gohed for leadim disfala waka from heven. (John 16:33; Rev. 14:14-16) And tu, bae iu need for trustim olketa promis blo Jehovah for kea for iu. (Matt. 6:32-34) Strongfala faith lo Jehovah bae helpem iu for no fraet. Taem iu talem olketa fren and olketa famili member hao iu start for studyim Bible witim Olketa Jehovah’s Witness and for attendim olketa meeting, datwan showimaot iu garem faith! And gogo, masbi iu mekem olketa bigfala change lo laef blo iu mekem iu followim olketa raeteous standard blo Jehovah. Datwan tu showimaot iu garem faith and no fraet. Taem iu gohed strongim faith blo iu, iu bae barava sure “eniples wea yu go long hem, [Jehovah], God blong yu bae stap wetem yu.”—Josua 1:7-9. w20.09 5 ¶11-12

King Asa hem nambawan example blo man wea garem gudfala tingting bikos hem barava depend lo Jehovah. Hem servem Jehovah taem hem isi, and taem hem no isi tu. From taem hem young hem ‘barava tinghevi lo Jehovah.’ (Fas Kings 15:14) Wanfala wei hem showim hem lovem Jehovah hem taem hem aotem false worship from Judah. Bible sei “hemi tekemaot evri olta blong olketa hiden pipol, an hemi aotem olketa tambuples, an hemi brekemdaon olketa barava tolfala tambu ston.” (Mektu Kronikols 14:3, 5) Hem aotem tu Maacah, granmami blo hem from position blo hem lo kingdom. Why nao olsem? Bikos hem mekhae lo wei for worshipim idol. (Fas Kings 15:11-13) Asa aotem false worship, bat hem mekhae tu lo tru worship taem hem helpem kingdom blo Judah for kam bak lo Jehovah. Jehovah blessim Asa and olketa Israelite witim taem blo peace. For tenfala year taem Asa rul, Kingdom blo Judah garem peace.—Mektu Kronikols 14:1, 4, 6. w20.09 14 ¶2-3

Maet iumi givim samting iumi ownim wea garem hae price for narawan lukaftarem. Olsem example, iumi maet putim selen blo iumi lo bank. And iumi expectim selen blo iumi for no lus and no eniwan stealim. Aposol Paul remindim Timothy hao hem kasem samting wea barava spesol, wea hem nao stretfala savve abaotem plan blo God for olketa man. Timothy kasem privilege for “talemaot toktok blo God” and for “duim waka for talemaot gud nius.” (2 Tim. 4:2, 5) Paul talem Timothy for protectim gud wanem hem kasem from God. Olsem Timothy, iumi tu kasem olketa samting from God. Jehovah kaen tumas for givim iumi stretfala savve abaotem olketa truth lo Bible wea barava spesol. Olketa truth spesol bikos iumi lanem hao for fren gud witim Jehovah and for savve wanem bae helpem iumi for barava hapi lo laef. Taem iumi acceptim olketa truth hia and followim, bae iumi free from olketa false teaching and olketa nogud wei.—1 Cor. 6:9-11. w20.09 26 ¶1-3

Bible study blo iumi need for luksavve hao iu barava tinghae lo olketa truth wea stap lo Bible, and barava bilivim datwan. Datwan bae mekem hem interest for lanem moa samting abaotem Bible. Sapos fitim, storyim hao olketa Bible principle helpem iu lo laef blo iuseleva. Then hem bae luksavve Bible garem olketa gudfala advaes wea savve helpem hem for kasem gud samting tu. Taem iutufala study, storyim lo Bible study example blo samwan wea feisim semkaen challenge olsem hem and hao olketa winim datwan. Iu savve askem samwan lo kongregeson wea example blo hem savve helpem student for joinim iu lo study. Helpem Bible study blo iu for luksavve hao hem wise for followim olketa Bible principle lo laef blo hem. Sapos Bible study marit, waswe, marit partner blo hem study tu? Sapos nomoa, invaetem hem for joinim study. Encouragem Bible study blo iu for sharem wanem hem lanem witim famili blo hem and olketa fren.—John 1:40-45. w20.10 16 ¶7-9

Parents blo Jesus helpem hem for kamap samwan wea Jehovah hapi lo hem taem hem growap. Tufala followim direction wea Jehovah givim lo olketa parents. (Diutronomi 6:6, 7) Joseph and Mary barava lovem Jehovah, and main samting nao tufala encouragem pikinini for barava lovem Jehovah tu. Joseph and Mary garem gudfala spiritual schedule for famili blo olketa. Masbi evri week olketa attendim olketa meeting lo sinagog lo Nazareth, and evri year olketa go for Pasova lo Jerusalem. (Luke 2:41; 4:16) From famili savve go tugeta lo Jerusalem, tufala iusim taem hia for teachim Jesus and olketa brata and sista blo hem abaotem history blo pipol blo Jehovah. Maet olketa savve visitim tu olketa ples wea Bible storyim lo gogo blo olketa. Taem famili start for kamap big, maet Joseph and Mary mas waka hard for keepim spiritual schedule blo famili. Bat olketa kasem gud samting from datwan! From olketa evritaem duim wanem Jehovah laekem, famili blo olketa gohed gud lo spiritual wei. w20.10 28 ¶8-9

Taem pablisa askem iu for go witim hem lo Bible study, hem gud for iu preparem wanem iufala bae studyim. Daniel, wanfala spesol pioneer sei: “Mi hapi taem pablisa wea kam witim mi lo Bible study hem prepare firstaem. Datwan mekem hem isi for hem join insaed story.” Nara samting, taem iu and conductor prepare hem gudfala example for Bible study. Sapos samting happen wea mekem iu no garem taem for prepare gud, hem gud for mek sure iu savve lo olketa main point for datfala study. Lo Bible study prea hem important samting, so sapos conductor talem iu bifor iufala go lo study bae iu prea, hem gud for ting raonem firstaem wanem for prea abaotem. Datwan bae helpem iu for prea abaotem samting wea fitim datfala Bible study. (Sams 141:2) Hanae, wea distaem hem wanfala sista lo Japan, sei hem tingim olketa prea blo sista wea kam witim conductor blo hem. Hanae sei: “Olketa prea blo datfala sista mekem mi luksavve hem fren gud witim Jehovah and mi tu laek for duim datwan. Nara samting, taem sista hia prea abaotem mi, datwan mekem mi for hapi.” w21.03 9-10 ¶7-8

Jesus promisim aposol Paul bae hem kasem Rome. Bat, samfala Jew lo Jerusalem plan for weit for killim dae Paul. Taem Claudius Lysias, komanda lo army blo Rome herem datwan, hem helpem Paul. Kwiktaem nomoa, Claudius sendem Paul go lo Caesarea. Hem iusim staka soldia for protectim Paul. Lo there, Felix wea governor givim order for putim Paul lo “haos bilong Herod and gaedem hem gud.” So hem hard for olketa wea laek killim dae Paul for kasem hem. (Acts 23:12-35) Bat Festus wea governor for changem Felix laekem olketa “Jew for hapi long hem.” Hem askem Paul: “Hao, iu laek for go long kot long Jerusalem? Mi bae stap long there taem olketa judgem iu long kot.” Paul savve sapos hem go lo Jerusalem, maet olketa killim hem dae. So hem sei: “Mi laekem King long Rome nao for judgem case bilong mi!” Festus talem Paul: “From iu laekem King long Rome for judgem case bilong iu, bae iu mas go long hem nao.” Gogo, Paul stap lo Rome farawe from olketa Jew wea laek killim hem dae.—Acts 25:6-12. w20.11 13 ¶4; 14 ¶8-10

Iumi evriwan savve feel guilty samfala taem. Olsem example, samfala feel guilty bikos lo samting wea olketa duim bifor olketa lanem truth. Samfala feel guilty bikos lo mistek wea olketa duim bihaen olketa baptaes. (Rome 3:23) Iumi laek for duim wanem hem stret bat “iumi evriwan savve sin staka taem.” (Jas. 3:2; Rome 7:21-23) Iumi no laekem for feel guilty, bat datfala feeling savve helpem iumi. Hao nao olsem? Bikos taem iumi feel guilty bae iumi laek for stretem samting wea iumi duim, and disaed strong for no duim moa datfala sem mistek. (Heb. 12:12, 13) Bat samfala taem iumi savve feel guilty tumas, and iumi savve gohed feel guilty nomata iumi repent and Jehovah forgivim iumi finis. Datwan guilty olsem savve spoelem iumi. (Sams 31:10; 38:3, 4) Hem barava important for iumi no feel guilty tumas mekem iumi laek givap. Tingim, Jehovah no laekem iumi for givap bat Satan hapi tumas sapos iumi givap!—Comparem 2 Corinth 2:5-7, 11. w20.11 27 ¶12-13

Wanfala Levite wea raetem psalm start for jealous lo gudfala laef wea olketa nogud pipol garem. (Sams 73:2-9, 11-14) Olketa rich, garem staka gud samting, and no wari. Datfala Levite need for luksavve lo tingting blo Jehovah abaotem olketa samting hia. Taem hem duim datwan, hem lusim kros and hem hapi. Hem sei: “An bikos yu nao God blong mi [Jehovah], mi no laekem enisamting moa long disfala wol.” (Sams 73:25) Iumi tu no laek for jealous taem iumi lukim nogud pipol garem gudfala laef. Olketa bae hapi for lelebet taem nomoa. (Eklesiastes 8:12, 13) Sapos iumi jealous lo olketa datwan bae mekem iumi wikdaon and spoelem wei wea iumi fren witim Jehovah. So sapos iumi luksavve iumi start for jealous lo nogud pipol from olketa garem gud laef, iumi shud duim wanem datfala Levite duim. Followim advaes wea kam from God, and associate witim olketa narawan wea duim wanem God laekem. Taem iumi lovem Jehovah winim eni nara samting, iumi bae barava hapi and iumi bae stap lo road wea leadim iumi lo datfala “tru laef.”—1 Tim. 6:19. w20.12 19 ¶14-16

Taem iumi prea lo Jehovah and storyim olketa wari blo iumi, hem gud for talem thankiu tu for samfala samting. Nomata iumi garem olketa problem, hem gud for tingim olketa gud samting wea iumi garem tu. Wanem nao iumi shud duim sapos iumi no savve hao for storyim feeling blo iumi? Tingim, Jehovah bae ansarem prea blo iumi nomata iumi sei nomoa ‘Plis helpem mi!’ (Mektu Kronikols 18:31) Depend lo wisdom blo Jehovah and no tingting blo iuseleva. Lo taem blo profet Isaiah, pipol lo Judah fraet nogud Assyria bae attakim olketa. From olketa no laek for stap anda lo Assyria, olketa askem Egypt for helpem olketa. (Aesaea 30:1, 2) Jehovah warnim olketa lo Judah, sapos olketa trustim Egypt bae olketa kasem nogud samting. (Aesaea 30:7, 12, 13) Jehovah iusim Isaiah for talem olketa for no fraet. Hem sei: ‘Sapos yufala trastem Jehovah an stap kuaet, bae hem mekem yufala strong.’—Aesaea 30:15b. w21.01 3-4 ¶8-9

From olketa anointed brata blo Christ faithful, olketa bae kasem reward for kamap king and priest witim Jesus lo heven. (Rev. 20:6) Jehovah, Jesus, and olketa angel bae hapi for lukim datfala 144,000 wea anointed kasem reward blo olketa lo heven. Bihaen aposol John story abaotem 144,000 king and priest, hem lukim tu “wanfala big crowd” wea gohed laef bihaen Armageddon. John no talem namba blo olketa wea insaed lo big crowd bat hem staka winim namba blo olketa wea bae go lo heven. (Rev. 7:9, 10) Datfala big crowd “werem white kaleko” wea showimaot olketa “stap klia long olketa rabis wei” lo world blo Satan, and gohed faithful lo God and Christ. (Jas. 1:27) Olketa mekhae lo Jehovah and Jesus, datfala Pikinini Sheepsheep, from tufala sevem olketa. Olketa holem leaf blo olketa palm tree tu, wea showimaot olketa acceptim Jesus hem King wea Jehovah chusim.—Comparem John 12:12, 13. w21.01 15-16 ¶6-7

Hasband savve kamap gudfala hed blo famili taem hem followim example blo Jehovah and Jesus. For example, tingim Jehovah, nomata hem barava wise, bat hem laek for herem tingting blo olketa wea worshipim hem, bikos hem hambol. (Jenesis 18:23, 24, 32) Jehovah hem perfect bat iumi no perfect, so hem helpem iumi for duim olketa samting wea hem laekem. (Sams 113:6, 7) And Bible sei Jehovah hem ‘gohed for helpem’ iumi. (Sams 27:9; Heb. 13:6) King David sei from Jehovah hambol and willing for helpem hem, datwan mekem hem fit for duim staka samting for Jehovah. Tingim tu example blo Jesus. Nomata olketa disaepol stap anda lo Jesus, hem wasim feet blo olketa. Jesus sei: “Mi showim wei for iufala followim, mekem samting wea mi duim long iufala, iufala mas duim long narawan tu.” (John 13:12-17) Nomata Jesus hem Son blo God, hem hapi for duim waka for helpem olketa narawan.—Matt. 20:28. w21.02 3-4 ¶8-10

From iufala young brata strong, iufala fit for duim staka samting lo kongregeson. Iufala duim staka samting finis for helpem kongregeson. And maet iu garem goal for kamap ministerial servant. Bat maet iu tingse olketa narawan ting iu young tumas or iu no garem experience wea mekem iu fit for duim datfala important assignment. Nomata iu young, iu savve waka hard lo kongregeson distaem mekem olketa lo kongregeson trustim and respectim iu. Iufala young brata tu maet garem savve abaotem samting for helpem olketa lo kongregeson. For example, maet iu savve hao for iusim technology. Samfala wea no minim gud hao for iusim tablet or mobile bae tinghae sapos iu showim olketa hao for iusim for meeting and for duim study seleva. Savve wea iu garem mekem iu fit for barava helpem olketa narawan lo kongregeson. Duim olketa samting wea bae mekem Jehovah hapi lo iu. w21.03 2 ¶1, 3; 7 ¶18

Nomata waef skul gud winim hasband, hem responsibility blo hasband for leadim famili lo olketa spiritual samting, olsem for duim famili worship. (Eph. 6:4) Nomata waef stap anda lo hasband blo hem, waef mas duim samting for strongim faith blo hemseleva. So hem mas markem taem for duim study seleva and ting raonem wanem hem lanem. Datwan bae helpem hem for gohed lovem and respectim Jehovah and for hapi for stap anda lo hasband blo hem. Waef wea willing for stap anda lo hasband from hem lovem Jehovah bae hapi winim waef wea no followim disfala arrangement. Waef olsem showim gud example for olketa singol sista and olketa singol brata tu. Taem waef stap anda lo hasband, famili bae stap gud tugeta and kongregeson tu bae kasem gud samting. (Titus 2:3-5) Distaem, big haf lo olketa wea faithful for worshipim Jehovah hem olketa sista.—Sams 68:11. w21.02 13 ¶21-23

Aposol Paul hem gudfala example blo samwan wea gohed faithful and no laek givap. Nomata samfala taem hem feel wikdaon, hem gohed faithful bikos hem depend lo Jehovah for strongim hem. (2 Cor. 12:8-10; Phil. 4:13) Olsem Paul, iumi tu savve gohed faithful and no givap sapos iumi hambol and depend lo Jehovah for helpem and strongim iumi. (Jas. 4:10) Taem iumi kasem hard taem, datwan no showimaot Jehovah no hapi lo iumi. James wea hem wanfala disaepol sei: “Taem man kasem test, hem mas no sei: ‘God nao hem traem mi.’ Diswan hem bikos no eniwan savve switim God for duim nogud samting and God tu no switim eniwan for duim nogud samting.” (Jas. 1:13) Taem iumi sure lo datwan, bae iumi laek for fren gud witim Dadi blo iumi lo heven. Jehovah no “savve change.” (Jas. 1:17) Hem helpem olketa Christian lo first century taem olketa kasem hard taem, so hem bae helpem iumi tu. Askem Jehovah for helpem iumi for garem wisdom, faith, and for strongim iumi, and hem bae duim wanem iumi askem. w21.02 31 ¶19-21

Iumi savve encouragem Bible study wea gohed for kam lo olketa meeting taem iumi story witim hem. (Phil. 2:4) Maet iumi praisem hem for eni change hem mekem, or askem hem sapos hem enjoyim study blo hem, or askem hem abaotem famili or waka blo hem. Kaen story olsem savve mekem iutufala for kamap fren, and taem hem garem olketa fren datwan savve helpem hem for laek kamap Witness. Taem Bible study gohed for mekem olketa change, iumi savve helpem hem for laek stap insaed kongregeson lo wei for spendem taem witim hem. (Heb. 1313:2)Taem wanfala Bible study kamap anbaptaes pablisa, iumi savve invaetem hem for go preaching witim iumi. Diego, wanfala brata lo Brazil, sei: “Taem mi anbaptaes pablisa olketa brata invaetem mi for go preaching witim olketa. Taem mi duim ministry witim olketa brata hia mi fren gud witim olketa, mi lanem staka samting, and mi start for fren gud witim Jehovah.” w21.03 12 ¶15-16

Jesus talem olketa follower blo hem for lovem olketa enemy. (Matt. 5:44, 45) Diswan hem no isi for duim. Bat holy spirit savve helpem iumi for garem love, for patient, kaen lo narawan, hambol, and kontrolem seleva. (Gal. 5:22, 23) Olketa wei hia savve helpem iumi for no givap taem pipol againstim iumi. Samfala stop for againstim iumi bikos hasband, waef, pikinini, or neiba blo olketa showimaot olketa gudfala wei hia. Gogo samfala hia kamap olketa brata and sista blo iumi tu. So sapos iumi faendem hem hard for garem love for samwan wea againstim iumi from iumi worshipim Jehovah, prea for holy spirit for helpem iumi. (Luke 11:13) And evritaem trustim Jehovah. (Provebs 3:5-7)Hem no isi samting taem pipol againstim iumi, bat taem iumi showimaot love datwan savve changem tingting blo olketa. And taem iumi showimaot love, datwan mekem Jehovah hapi. So nomata samfala gohed for againstim iumi, iumi savve hapi. w21.03 23 ¶13; 24 ¶15, 17

Profet Joel hem profesi abaotem wanfala attak blo army. (Joel 2:1, 8, 11) Jehovah sei hem bae iusim bigfala army blo hem (olketa soldia blo Babylon) for panisim olketa Israelite wea no obey. (Joel 2:25) Hem storyim hao datfala army hem from north bikos olketa blo Babylon bae attakim Israel from north. (Joel 2:20) Datfala army hem olsem staka grashopa wea go stret followim gogo blo olketa. Joel sei olsem abaotem olketa: “No eniwan hemi satem gogo blong narawan. . . . Olketa kam kuiktaem . . . Olketa klaem long olketa haos, an gotru long olketa windo olsem olketa man fo stil.” (Joel 2:8, 9) Waswe, iu savve piksarem datwan lo mind blo iu? Staka soldia kam insaed lo datfala taon. Pipol bae no garem eni ples for haed. No eniwan savve ranawe from sword blo olketa lo Babylon! Olsem olketa grashopa, olketa lo Babylon (or, olketa Chaldean) tekovarem taon lo Jerusalem lo 607 B.C.E. Bible sei: “King blong Babilonia . . . no sore long olketa, Nomata, yangman, o yang gele, o man, o olo, Olketa bonem Tambuhaos blong God, . . . an [distroem] evri gudfala samting tu.”—Mektu Kronikols 36:17. w20.04 5 ¶11-12