February

Iumi laek for savve gud lo olketa brata and sista. Story witim olketa bifor and bihaen lo meeting, waka witim olketa lo ministry, and sapos fitim, invaetem olketa for kam kaikai lo haos. Taem iu duim olsem, bae iu luksavve hao sista wea iu tingse hem no kaen, hem savve shame tumas, or brata wea iu tingse lovem tumas selen, hem man wea kaen tumas, or iu faendaot wanfala famili kasem hard taem from dadi blo olketa, dastawe olketa savve leit for olketa meeting. (Job 6:29) Hem tru, iumi shud no “poke nose long bisnis bilong narawan.” (1 Tim. 5:13) Bat hem gud for savve lo olketa brata and sista and minim samting wea olketa feisim lo laef. Sapos iu no laekem wei blo wanfala brata or sista, maet hem helpem iu for minim hem for savve abaotem background blo hem. Nomata hem savve tek taem for savve gud lo olketa brata and sista, taem iumi followim kaonsel lo Bible for lovem pipol, iu followim example blo Jehovah wea lovem “evri difren kaen man.”—1 Tim. 2:3, 4; 2 Cor. 6:11-13. w20.04 16-17 ¶10-12

Lo naet bifor Jesus dae, hem remindim olketa disaepol for lovem each other mekem olketa tingim each other firstaem. Jesus savve kaen love olsem bae helpem olketa for wan mind and for no givap taem pipol againstim olketa. Tingim example blo kongregeson lo Thessalonica. Taem datfala kongregeson hem start, pipol persecutim olketa brata and sista. Nomata olsem, olketa gohed faithful and showimaot love. (1 Thess. 1:3, 6, 7) Paul encouragem olketa for gohed showimaot love “long bigfala wei moa.” (1 Thess. 4:9, 10) Paul savve datwan bae helpem olketa for comfortim olketa wea sorre and for helpem olketa wea wik lo spiritual wei. (1 Thess. 5:14) Luk olsem olketa followim wanem Paul talem, bikos lo mek-tu leta wea Paul raetem wan year bihaen, hem sei: “Love bilong iufala for narawan hem kamap strong.” (2 Thess. 1:3-5) From olketa lovem each other datwan helpem olketa for deal witim hard taem and persecution. w21.03 22 ¶11

Sapos iumi laek for kasem prize blo laef olowe, iumi mas followim stretfala wei wea olketa Christian shud followim. (Acts 20:24; 1 Pet. 2:21) Bat Satan and olketa wea followim hem, laekem iumi for “duim olketa rabis samting olsem olketa.” (1 Pet. 4:4) Olketa mekfani lo iumi and sei road wea olketa followim nao gud, and bae mekem man free. Bat datwan no tru. (2 Pet. 2:19) Hem barava important for iumi chusim stretfala road for followim! Satan laekem iumi evriwan for stop for followim road wea smol and wea lead go for “laef olowe,” and hem laekem iumi for followim road wea waed wea staka pipol lo world followim. Datfala road hem isi for followim and staka nao laekem, bat hem lead go for “dae.” (Matt. 7:13, 14) For gohed followim stretfala road and no go difren, iumi mas trustim Jehovah and lisin lo hem. w20.04 26 ¶1; 27 ¶5, 7

Lo olketa year wea just go pas, Russia and olketa wea sapotim hem tu go insaed datfala “land wea Luk Naes.” (Dan. 11:41, NW) Lo wanem wei? Lo 2017, disfala king blo north distaem banim waka blo pipol blo Jehovah and putim samfala brata and sista lo prison. Hem banim tu olketa pablikeson, and New World Translation. And tu, hem tekem branch office lo Russia and olketa Kingdom Hall and Assembly Hall. Bihaen datwan happen, lo 2018 Governing Body sei Russia and olketa wea sapotim hem nao king blo north. Bat, pipol blo Jehovah bae no againstim or trae for changem eni gavman, nomata sapos datfala gavman persecutim olketa. Bat, olketa followim wanem Bible talem for prea for “olketa king and olketa bigman” especially taem olketa gavman bae mekem olketa disison wea bae affectim wei wea pipol blo God free for worship. w20.05 14 ¶9

Olketa parents, for helpem pikinini blo iu for barava sure olketa garem truth, olketa need for fren gud witim God and pruvim lo olketa seleva wanem Bible teachim hem tru. Taem iu teachim pikinini blo iu truth abaotem God, iuseleva mas showimaot gudfala example lo wei for studyim Bible. Iu mas markem taem for ting raonem wanem iu lanem. Then iu bae fit for teachim pikinini blo iu for duim sem samting. Lo sem wei wea iu teachim Bible study, iu need for teachim pikinini for iusim olketa Bible study tul blo iumi. Datwan bae helpem pikinini blo iu for tinghae lo Jehovah and for tinghae lo datfala “wakaman wea faithful and wise” wea givim kam spiritual kaikai. (Matt. 24:45-47) Teachim pikinini olketa main truth blo Bible and tu, teachim olketa deep spiritual truth for helpem pikinini for garem strong faith, bat duim lo wei wea fitim age and savve blo olketa.—1 Cor. 2:10. w20.07 11 ¶10, 12-13

Distaem staka million pipol fren witim Jehovah, nomata olketa no perfect. Olketa savve fren witim hem bikos olketa garem faith lo ransom sakrifaes blo Jesus and dedicatem laef blo olketa lo Jehovah and baptaes. Sapos iumi duim datwan tu, iumi joinim staka million nara Christian wea dedicate and baptaes and fren gud witim Jehovah! Hao nao iumi savve showimaot iumi tinghae lo wei wea iumi fren witim God? Olsem Abraham and Job, wea gohed faithful lo God for winim wan handred years, iumi tu mas gohed faithful nomata hao long iumi servem Jehovah. Olsem Daniel, wei wea iumi fren gud witim God nao mas important winim laef blo iumi. (Daniel 6:7, 10, 16, 22) Jehovah savve helpem iumi for winim eni hard taem mekem iumi gohed fren gud witim hem.—Phil. 4:13. w20.05 27 ¶5-6

King David hem lukim waef blo nara man hem gohed for swim. Lo datfala taem, waswe, heart blo David hem complete or hem divaed? Hem savve lo standard blo Jehovah wea sei: “Yufala mas no kavetem waef blong [nara man].” (Eksodas 20:17) Bat, luk olsem hem gohed nomoa for lukluk. Heart blo hem divaed, hem laekem datfala woman Bath-sheba, bat lo semtaem hem laek for mekem Jehovah hapi tu. Nomata David lovem Jehovah and fraet lo hem for longtaem finis, hem disaed for followim selfish feeling blo hem. Lo datfala taem, David hem duim barava nogud samting. Hem barava spoelem nem blo Jehovah. David spoelem tu olketa innocent pipol, and famili blo hemseleva tu. (Mektu Samuel 11:1-5, 14-17; 12:7-12.) Jehovah disciplinem David, and gogo hem fren gud moa witim Jehovah. (Mektu Samuel 12:13; Sams 51:2-4, 17) David rememberim olketa hard taem and sorre wea hem kasem from wei wea hem letem heart blo hem for divaed. Datfala toktok blo hem lo Psalm 86:11 hem savve minim tu: “Givim mi wanfala heart wea no divaed.” Waswe, Jehovah helpem David for garem heart wea complete, or wea no divaed? Yes, bikos bihaen Bible sei David hem wanfala man wea heart blo hem complete for Jehovah, God blo hem.—Fas Kings 11:4; 15:3. w20.06 11 ¶12-13

Bible sei hao love blo Jehovah hem olsem wanfala rope. Lo wanem wei? Tingim disfala tokpiksa: Sapos iu klosap for draon lo raf sea and samwan torowem kam wanfala laef jacket lo iu, bae iu barava tinghae lo datwan bikos bae hem helpem iu for float. Bat datfala laef jacket seleva bae no savve sevem laef blo iu. Sea hem barava cold, and iu bae laef only sapos iu go insaed wanfala laefboat. Bat iu needim samwan for torowem kam rope and pullim iu kam insaed lo laefboat. Olsem Jehovah hem talem lo toktok lo text blo tuday, hem bae “pulum” olketa Israelite wea go difren from hem. Distaem God feel olsem abaotem olketa wea inactive. Hem olsem olketa draon from olketa problem and hevi. God laekem olketa for savve hem lovem olketa, and pullim olketa kam bak lo hem. And Jehovah savve iusim iumi for helpem olketa hia for savve hem lovem olketa. Hem barava important for helpem olketa wea inactive for savve Jehovah lovem olketa and iumi tu lovem olketa. w20.06 27 ¶12-13

Bihaen olketa killim dae Stephen, staka Christian ranawe from Jerusalem and ‘go stap long Judea and Samaria,’ and gogo samfala stap lo olketa farawe ples olsem Cyprus and Antioch. (Acts 7:58–8:1; 11:19) Nomata olketa kasem disfala hard taem, olketa gohed preach lo olketa ples wea olketa stap, and datwan mekem staka niu kongregeson kamap lo olketa ples hia. (1 Pet. 1:1) Bat olketa Christian kasem samfala nogud samting moa. For example, lo samting olsem 50 C.E., bigman lo Rome, Claudius, sei evri Jew mas lusim Rome. Nomata olketa Jew wea kamap Christian, olketa tu mas lusim haos blo olketa and muv go lo nara ples. (Acts 18:1-3) Lo samting olsem 61 C.E., Paul raetem leta wea storyim olketa hard taem wea olketa Christian bin kasem. Hem sei pipol tok daonem olketa, putim olketa lo prison, and tekem material samting blo olketa. (Heb. 10:32-34) Nara samting tu, samfala lo olketa poor tumas or kasem bigfala sik.—Rome 15:26; Phil. 2:25-27. w21.02 26-27 ¶2-4

Sapos wanfala Christian hem strongim faith blo hemseleva bae hard for Satan or olketa narawan wea followim hem for duim eni samting wea bae mekem hem wikdaon. (2 John 8, 9.) Iumi expectim hao disfala world bae heitim iumi. (1 John 3:13) John remindim iumi hao “full world hem stap long paoa bilong Satan.” (1 John 5:19) Taem iumi gogo for end blo disfala world, Satan hem barava kros fogud. Hem attakim iumi thru lo wei for iusim olketa samting olsem wei for durong or olketa laea blo olketa apostate. Bat nara wei wea hem attakim iumi hem thru lo persecution. Satan savve short taem nomoa stap for hem trae stopem preaching waka blo iumi or for spoelem faith blo iumi. So iumi no sapraes taem iumi lukim olketa kantri restrictim or banim waka blo iumi. Nomata olsem, olketa brata and sista blo iumi lo olketa kantri olsem olketa gohed and no givap. Olketa gohed for pruvim hao nomata wanem Satan duim lo iumi, iumi savve win! w20.07 24 ¶12-13

Jehovah laekem pipol for enjoyim laef olowe lo disfala earth wea hem creatim. Bat taem Adam and Eve disobeyim Jehovah, sin and dae affectim evriwan. (Rome 5:12) Wanem nao Jehovah duim? Stretawe, hem talem wanem hem bae duim for helpem olketa man. (Jenesis 3:15) Jehovah plan for provaedem ransom wea bae mekem olketa pikinini blo Adam and Eve kamap free from sin and dae. Bihaen datwan pipol bae fit for disaed sapos olketa bae worshipim Jehovah mekem olketa savve kasem laef olowe. (John 3:16; 1 Cor. 15:21, 22) Lo future, taem Jesus resurrectim staka million pipol, luk olsem evriwan bae no laef bak lo semtaem. Why nao olsem? Bikos datwan bae mekem earth kwiktaem fulap lo pipol and evri samting bae olobaot. Jehovah no enitaem duim samting lo wei wea no organize. Hem savve evri samting mas organize gud mekem pipol stap lo peace.—1 Cor. 14:33. w20.08 14 ¶3; 15 ¶5

Hem important for Bible study blo iumi for luksavve reason for studyim Bible hem for helpem hem for kamap wanfala Witness blo Jehovah. Hem need for isisi duim samfala samting mekem hem kasem goal for baptaes! First samting, Bible study mas lane abaotem Jehovah, lovem hem, and garem faith lo hem. (John 3:16; 17:3) Then hem bae start for fren witim Jehovah and olketa lo kongregeson. (Heb. 10:24, 25; Jas. 4:8) Gogo, hem mas lusim olketa nogud wei and repent from olketa sin blo hem. (Acts 3:19) Faith blo hem bae strongim hem for sharem truth witim olketa narawan. (2 Cor. 4:13) Then hem bae laek for dedicatem hemseleva lo Jehovah and baptaes. (1 Pet. 3:21; 4:2) Lo datfala day, evriwan bae hapi tumas! Bat for hem kasem datfala goal iumi need for gohed praisem hem and encouragem hem taem hem waka hard for changem laef blo hem. w20.10 17-18 ¶12-13

Sapos iu comparem iuseleva witim olketa narawan insaed kongregeson, maet bae iu feel olsem iu nating important. Samfala lo kongregeson savve tumas for teach, for organize, or olketa gudfala shepherd. Maet iu feel iu no garem savve olsem olketa. Diswan showimaot iu hambol and iu luksavve lo wanem iu no fit for duim. (Phil. 2:3) Bat iu mas careful. Sapos iu evritaem comparem iuseleva witim olketa narawan wea savve tumas, iu bae ting daonem iuseleva. Gogo, olsem aposol Paul storyim, iu maet feel iu no fit for insaed kongregeson. Jehovah givim holy spirit lo samfala Christian lo first century for duim samfala spesol waka, bat no evriwan kasem sem kaen waka. (1 Cor. 12:4-11) Nomata olsem, evri Christian olketa important. Distaem iumi no kasem spesol paoa from holy spirit. Bat principle blo hem still fitim iumi. Iumi no kasem olketa sem waka, bat iumi evriwan important lo Jehovah. w20.08 23 ¶13-15

Taem iu prea lo Jehovah for helpem iu for no fraet, hem bae ansarem olketa prea blo iu and no lusim iu. (Acts 4:29, 31) Hem bae evritaem sapotim iu. Tingim hao Jehovah helpem iu finis for winim olketa challenge and hem strongim iu for mekem olketa change lo laef blo iu. For sure, Jehovah wea leadim pipol blo hem go thru lo Red Sea savve helpem iu for kamap disaepol blo Christ. (Eksodas 14:13) Iu savve garem sem kaen faith olsem man wea raetem Psalm wea talem toktok lo text for tuday. Jehovah savve helpem tu olketa niu pablisa for no fraet. Tingim experience blo wanfala sista wea nem blo hem Tomoyo. Taem hem start for preach from haos tu haos, firstfala haosholder wea hem meetim singaot lo hem olsem: “Mi no laekem Olketa Jehovah’s Witness!” and hem satem door. Tomoyo no fraet and talem partner blo hem: “Iu herem datwan? Mi no talem yet eniting bat hem luksavve nao mi wanfala Jehovah’s Witness. Mi barava hapi!” Distaem Tomoyo hem wanfala regular pioneer. w20.09 6 ¶13-14

Asa talem olketa Israelite hao Jehovah nao givim peace lo olketa. (Mektu Kronikols 14:6, 7) Asa no tingse datfala taem blo peace hem taem for hem relax. Hem duim bigfala waka for start buildim olketa taon, olketa wall, olketa taoa, and olketa gate. Hem talem pipol lo Judah for mekius lo land blo olketa. Wanem nao Asa minim? Hem minim pipol still free for muv raon insaed land wea God givim olketa, and olketa savve gohed build from no eni enemy stap for againstim olketa. So hem encouragem pipol for iusim gud datfala taem blo peace. Asa iusim tu datfala taem blo peace for strongim army blo hem. (Mektu Kronikols 14:8) Waswe, diswan minim hem nating trustim Jehovah? Nomoa. Asa savve datwan hem responsibility blo hem olsem king for redyim pipol for olketa trabol wea maet kamap lo future. Asa savve tu disfala taem blo peace wea Judah kasem bae no stap for olowe, and hem nao wanem happen. w20.09 15 ¶4-5

Maet wanfala elder tingse hem fit for mekem olketa rul bikos hem laek protectim olketa sheepsheep blo God. Nomata samfala waka blo olketa elder and hed blo famili semsem, samfala waka no semsem. Olsem example, Jehovah sei olketa elder savve judgem olketa wea no repent and aotem from kongregeson. (1 Cor. 5:11-13) And tu, Jehovah givim samfala waka lo hed blo famili wea hem no givim lo olketa elder, olsem Jehovah sei dadi savve mekem olketa rul for famili and for mek sure olketa followim olketa rul hia. (Rome 7:2) For example, dadi garem raet for markem wanem taem lo evening for pikinini kam bak lo haos. And sapos pikinini no obeyim datfala rul, dadi fit for disciplinem hem. (Eph. 6:1) Nomata olsem, dadi wea lovem famili blo hem bae story witim waef bifor hem mekem olketa rul bikos tufala “wanfala body nomoa.”—Matt. 19:6. w21.02 16-18 ¶10-13

Wanfala reason why truth lo Bible spesol tumas hem bikos olketa wea hambol and wea “laekem laef olowe” savve luksavve lo olketa truth hia. (Acts 13:48) Olketa luksavve Jehovah iusim datfala wakaman wea faithful and wise for minim kam olketa truth hia. (Matt. 11:25; 24:45) Iumi no savve minim olketa truth hia seleva. (Provebs 3:13) Jehovah givim iumi privilege for teachim truth abaotem hem and olketa plan blo hem lo olketa narawan. (Matt. 24:14) Diswan bae helpem pipol for kamap part lo famili blo Jehovah and chance for olketa kasem laef olowe. (1 Tim. 4:16) Nomata iumi fit for duim staka samting or lelebet nomoa lo ministry, iumi gohed for sapotim disfala barava important waka wea gohed lo disfala taem. (1 Tim. 2:3, 4) Hem nambawan privilege for waka tugeta witim God!—1 Cor. 3:9. w20.09 26-27 ¶4-5

Lo gogo blo aposol Paul for Rome, staka taem nao Jehovah iusim olketa brata and sista for helpem Paul. Olsem example, tufala faithful fren blo Paul, Aristarchus and Luke, disaed for go witim Paul lo Rome. Nomata luk olsem tufala no kasem eni promis from Jesus hao hem bae protectim tufala for travel go kasem Rome, tufala willing for putim laef blo tufala lo danger for go witim Paul. Gogo lo taem blo datfala raf sea nao tufala just savve hao tufala bae sef. Taem olketa kasem port lo city blo Sidon, Julius letem Paul “for go lukim olketa fren bilong hem and olketa lukaftarem hem.” (Acts 27:1-3) And bihaen, lo city blo Puteoli, Paul and olketa fren blo hem “meetim samfala brata long there wea laekem tumas for [olketa] stap witim olketa for wanfala full week.” Taem olketa brata hia lukaftarem Paul and olketa fren blo hem, olketa mas barava hapi from Paul sharem olketa experience wea strongim olketa.—Comparem witim Acts 15:2, 3. w20.11 16 ¶15-17

Taem parents talem and duim olketa samting wea showimaot olketa lovem Jehovah datwan savve teachim olketa pikinini for duim sem samting. Best present wea iu savve givim lo olketa pikinini hem for helpem olketa for lovem Jehovah. And important leson wea iu savve teachim olketa hem for garem gudfala schedule for study, prea, meeting, and for duim ministry. (1 Tim. 6:6) Hem tru, iu mas givim olketa pikinini olketa material samting wea olketa needim. (1 Tim. 5:8) Bat tingim, olketa pikinini bae sev lo end blo nogud world blo Satan and go insaed niu world no from olketa material samting, bat from olketa fren gud witim Jehovah. (Esikiel 7:19) Hem barava gud for lukim staka parents mekem olketa gudfala disison wea helpem famili blo olketa for fren witim Jehovah! Staka wea growap lo kaen famili olsem garem olketa gudfala wei wea olketa lanem and olketa no regret!—Provebs 10:22. w20.10 28-29 ¶10-11

Samfala taem aposol Peter duim samting wea mekem hem sorre bihaen. Olsem example, taem Jesus talem olketa aposol hem bae safa and dae, Peter tok lo hem and talem toktok lo text for tuday. (Matt. 16:21-23) Bihaen datwan Jesus stretem Peter. Taem samfala kam for arrestim Jesus, Peter no tingting firstaem and katemaot ear blo slave blo hae priest. (John 18:10, 11) Jesus stretem Peter moa. Narafala taem, Peter tok praod and sei nomata sapos olketa nara aposol bae lusim Christ, hard for hem duim datwan! (Matt. 26:33) Bat no longtaem bihaen datwan, Peter talem thrifala taem hem no savve lo Masta blo hem. Datwan mekem Peter barava feel wikdaon so hem “go aotsaed and hem krae fogud.” (Matt. 26:69-75) Masbi Peter warim sapos Jesus bae forgivim hem. Bat Peter no givap. Nomata hem stambol, hem kamap strong moa, and then hem gohed for servem Jehovah and waka tugeta witim olketa nara aposol.—John 21:1-3; Acts 1:15, 16. w20.12 20 ¶17-18

Lo staka difren wei, hed blo famili savve showimaot hem hambol. For example, bae hem no expectim waef and olketa pikinini for perfect. Hem laek for herem tingting blo olketa, nomata hem difren from tingting blo hem. Nara wei hasband showimaot hem hambol, hem willing for kukim kaikai or klinim haos nomata olketa narawan tingse datwan hem waka blo woman. Bat why nao maet datwan hem no isi for wanfala hasband? Rachel, wanfala sista sei: “Lo ples mi stap, sapos hasband helpem waef for wasim pleit or klinim haos, bae olketa neiba and relative tok spoelem hem. Bae olketa sei waef nao bossim hem.” Sapos datwan hem wei blo pipol lo ples blo iu, tingim hao Jesus wasim feet blo olketa disaepol nomata pipol ting lo datwan olsem waka blo wanfala slave. Gudfala hasband bae laek for mekem waef and olketa pikinini for hapi, and hem bae no wari sapos olketa narawan ting daonem hem from hem duim datwan. w21.02 2 ¶3; 4 ¶11

Nomata laef blo iumi bifor maet gud winim distaem, future blo iumi lo niu world bae gud go moa. Olketa narawan maet duim samting wea mekem iumi feel nogud bat taem iumi forgivim olketa, datwan bae helpem iumi for gohed lo service blo iumi for Jehovah. Wei for guilty tumas savve stopem iumi for hapi for worshipim Jehovah. Bat olsem aposol Paul, iumi need for feel sure Jehovah forgivim iumi. (1 Tim. 1:12-15) Iumi garem hope for laef olowe. And lo niu world, iumi bae no tingim moa olketa samting lo bifor wea mekem iumi regret. Bible sei abaotem datfala taem: “Evrisamting wea hemi hapen bifoa, bae pipol i fogetem finis nao.” (Aesaea 65:17) So tingim diswan: Samfala lo iumi wea worshipim Jehovah olo nao, bat lo niu world, iumi bae kamap young moa. (Job 33:25) So iumi disaed strong for no tingim olketa samting lo bifor. Bat iumi tingim future and tingim olketa samting wea bae kam! w20.11 24 ¶4; 29 ¶18-19

Wanem moa bae happen? Lo bigfala trabol, Jehovah bae protectim iumi. Firstaem hem bae protectim iumi taem hem iusim olketa gavman for finisim evri false religion, wea hem nao Bigfala Babylon. (Rev. 17:16-18; 18:2, 4) Then lo Armageddon, Jehovah bae protectim iumi taem hem finisim evri nara nogud pipol lo world blo Satan. (Rev. 7:9, 10; 16:14, 16) Nomata wanem Satan duim lo iumi, sapos iumi gohed fren gud witim Jehovah iumi garem hope. Satan nao no garem hope bikos gogo Jehovah bae finisim hem. (Rome 16:20) So iumi mas werem evri samting for faet and no enitaem aotem! And tu, iumi mas luksavve iumi needim help for faetem Satan and olketa wea saedem hem and no trae for faet seleva, sapotim olketa brata and sista, and followim direction wea kam from Jehovah. Sapos iumi duim evri samting hia, iumi savve sure Jehovah wea hem dadi blo iumi bae strongim and protectim iumi.—Aesaea 41:10. w21.03 30 ¶16-17

Hao nao iumi showimaot iumi trustim Jehovah? Taem iumi followim direction wea kam from hem. Staka story lo Bible showimaot hem important for trustim Jehovah and no wari tumas. Hem gud for studyim olketa example hia and lanem wanem hem helpem olketa wea worshipim God for no wari tumas taem pipol againstim olketa. Olsem example, taem Hae Kot blo olketa Jew stopem olketa aposol for preach, olketa no fraet for sei: “God nao hem ruler wea mifala mas obeyim, no olketa man.” (Acts 5:29) Nomata bihaen olketa lo kot whipim olketa aposol, olketa no fraet. Why nao olsem? Bikos olketa savve Jehovah sapotim and hapi lo olketa. So olketa gohed for talemaot gud nius. (Acts 5:40-42) Nara example hem Stephen. Bifor hem dae, from hem no fraet “feis bilong hem luk olsem feis bilong wanfala angel.” (Acts 6:12-15) Why nao olsem? Bikos hem savve hem duim samting wea mekem Jehovah hapi. w21.01 4 ¶10-11

Datfala scripture showimaot big crowd garem klin konsens and Jehovah hapi lo olketa. (Aesaea 1:18) Olketa dedicate, baptaes, garem strong faith lo sakrifaes blo Jesus, and fren gud witim Jehovah. (John 3:36; 1 Pet. 3:21) Datwan mekem olketa fit for standap front lo throne blo God (wea minim olketa stap lo earth) for “worshipim hem evri day and evri naet” insaed lo spiritual temple. (Rev. 7:15) From olketa tinghae lo Kingdom blo God, olketa duim big part lo preaching waka and helpem pipol for kamap disaepol. (Matt. 6:33; 24:14; 28:19, 20) Datfala big crowd wea no dae lo big trabol barava sure bae God gohed lukaftarem olketa bikos “God wea hem sidaon long datfala throne bae kavarem olketa witim tent bilong hem.” Distaem olketa luk forward lo taem wea disfala promis bae kamap tru: “[God] bae draem evri tias long eye bilong olketa.”—Rev. 21:3, 4. w21.01 16 ¶9-10

Iumi hapi iumi insaed famili blo Jehovah and iumi tinghae lo hao Jehovah organizem famili blo hem. Bible showimaot Jehovah tinghae lo olketa woman. For example, lo first century, Jehovah givim holy spirit lo olketa man, and olketa woman. Olketa savve duim olketa mirakol olsem for story lo difren languis. (Acts 2:1-4, 15-18) Olketa man and woman bae rul witim Christ bikos Jehovah anointim olketa witim holy spirit. (Gal. 3:26-29) No olketa man nomoa, bat olketa woman tu bae kasem laef olowe lo disfala earth. (Rev. 7:9, 10, 13-15) And tu, olketa woman and man preachim gud nius and teachim narawan. (Matt. 28:19, 20) For example, Bible buk blo Acts story abaotem wanfala sista wea nem blo hem Priscilla. Hem and hasband blo hem Aquila helpem Apollos for minim gud moa olketa scripture nomata Apollos hem man wea skul gud.—Acts 18:24-26. w21.02 14 ¶1; 15 ¶4

Hem responsibility blo olketa elder for helpem olketa pablisa for duim gud ministry, especially for conductim Bible study. Sapos elder joinim wanfala Bible study and pablisa hem fraet lelebet for conductim datfala study, elder savve ask for duim datwan. Olketa elder savve barava encouragem olketa study conductor. (1 Thess. 5:11) Maet iumi no garem Bible study distaem bat iumi savve duim samting for helpem olketa Bible study for laek kamap Witness. Taem iumi go lo wanfala study hem gud for prepare and talem olketa koment wea join witim story blo conductor. Taem olketa Bible study kam lo Kingdom Hall iumi laek for kamap fren blo olketa and showim gudfala example lo olketa. Elder bae helpem olketa Bible study taem hem savve gud lo olketa. And tu, olketa elder savve trainim and praisem study conductor. Bae iumi barava hapi sapos iumi duim samting wea helpem olketa Bible study for lovem and worshipim dadi blo iumi, Jehovah. w21.03 13 ¶18-19

Nomata David hem young man, hem garem olketa wei wea mekem narawan fit for trustim hem. For example, hem waka hard for lukaftarem olketa sheepsheep blo dadi blo hem, nomata samfala taem laef blo hem stap lo danger. Wanfala taem David storyim datwan lo King Saul. Hem sei: “King, mi bin lukaftarem olketa sipsip blong dadi blong mi. An taem laeon o bea hemi kam fo tekem wanfala smolfala sipsip, oltaem mi ran go bihaen an mi kilim hem fo sevem smolfala sipsip ya.” (Fas Samuel 17:34, 35) David savve hem responsibility blo hem for lukaftarem gud olketa sheepsheep. Olketa young brata savve followim example blo David for duim gud eni assignment wea olketa kasem lo kongregeson. Taem David hem young, hem fren gud witim Jehovah. David laek for pleim harp and for lukaftarem olketa sheepsheep, bat hem barava laek for fren gud witim Jehovah, God blo hem. Hem barava important for iufala young brata for fren gud witim Jehovah. w21.03 3 ¶4-5