March

Iumi no laekem pipol for heitim iumi and iumi no laek kasem persecution. So why nao Jesus sei iumi bae hapi taem pipol heitim iumi? First reason, taem iumi no givap God bae hapi lo iumi. (1 Pet. 4:13, 14) Mek-tu reason, olketa hard taem savve strongim faith blo iumi. (1 Pet. 1:7) And mek-thri reason, bae iumi kasem nambawan reward wea hem laef olowe. (Rome 2:6, 7) No longtaem bihaen Jesus resurrect, pipol againstim olketa aposol bat olsem Jesus talem olketa gohed hapi. Nomata samfala whipim olketa aposol and stopem olketa for preach, olketa hapi nomoa. Why nao olsem? Bible sei: “From olketa savve God nao letem datwan for kasem olketa bikos olketa faithful for followim Jesus.” (Acts 5:40-42) From olketa lovem Jesus, olketa no fraet lo olketa enemy hia and “olketa gohed” for preachim gud nius. Distaem, staka brata and sista gohed faithful nomata pipol againstim olketa. Olketa savve bae hard for Jehovah forgetim waka wea olketa duim and love wea olketa showimaot for nem blo hem. w21.03 25 ¶18-19

Olketa anointed Christian kasem hope for go lo heven from God. Hem no samting wea olketa seleva disaedem. Olketa tingim and prea abaotem datfala hope, and olketa luk forward tumas for go lo heven, bat olketa no minim staka samting abaotem laef lo heven.(Phil. 3:20, 21; 1 John 3:2) Nomata olsem, olketa laekem tumas for stap lo there. Olketa nara sheepsheep garem hope for laef olowe lo earth. Olketa hapi lo diswan bikos no eniwan laek for dae. Olketa luk forward for help mekem disfala full earth kamap paradaes. Olketa tingim taem wea olketa bae buildim haos blo olketa seleva, plantim garden, and evriwan bae no sik. (Aesaea 65:21-23) Olketa luk forward for travel lo staka ples lo earth for lukim maunten, forest, and sea blo olketa ples hia, and for lane abaotem evri samting wea Jehovah wakem. Bat samting wea olketa luk forward tumas lo hem, hem chance for barava fren gud witim Jehovah. w21.01 18-19 ¶17-18

Taem olketa blo Babylon finis for distroem Jerusalem, Bible sei: “Hemi kamap wanfala ravis ples olsem drae eria nomoa wea no eni man o animol save stap long hem.” (Jeremaea 32:43.) Samting olsem 200 years bihaen profesi blo Joel, Jehovah iusim Jeremiah for profesi abaotem nara samting abaotem disfala attak. Hem storyim hao olketa bae lukaotem olketa Israelite wea duim olketa nogud samting, and tekem olketa olsem prisoner. Hem sei: “[Jehovah] hemi gohed fo tok olsem, ‘Mi seleva nao bae mi sendem toktok go long olketa enemi, mekem olketa kam pulum yufala, olsem man hemi pulum fis. An bihaen bae mi sendem samfala enemi moa, mekem olketa lukaotem yufala evriwea long lan, olsem man fo [hunting] hemi lukaotem mit . . . long olketa maonten an hil, an long olketa hol long ston. . . . Bae mi dabolem panis blong yufala from olketa sin blong yufala.’” Nomata, olketa Israelite wea no repent haed lo sea or lo mauntenolketa blo Babylon bae faendem olketa.—Jeremaea 16:16, 18. w20.04 5 ¶12-13

From wanfala taem Lot hem no kwiktaem for followim instruction blo Jehovah, maet iumi tingse hem no warim warning, and hem disobey tu. Bat Jehovah no givap lo hem. Hem sendem tufala angel for holem hand blo famili and leadim olketa go aot from datfala taon. (Jenesis 19:15, 16) Masbi Jehovah luksavve Lot warim samfala samting. Maet from Lot fraetem olketa pipol wea stap aotsaed lo datfala city, hem no kwiktaem obey. Samfala nara danger tu stap. Lot maet savve abaotem tufala king wea foldaon insaed olketa hol wea fulap lo tar wea stap lo valley wea klosap. (Jenesis 14:8-12) From Lot hem hasband and dadi, masbi hem warim famili blo hem. And tu, from Lot hem rich, maet hem garem naes haos lo Sodom. (Jenesis 13:5, 6) Hem tru, olketa samting hia hem no gudfala reason for Lot no kwiktaem obeyim Jehovah. Bat Jehovah savve Lot hem wanfala “raeteous man,” and no luk nomoa lo olketa mistek blo hem.—2 Pet. 2:7, 8. w20.04 18 ¶13-14

Olketa young brata, maet hem tek taem for samfala luksavve iu no smol pikinini distaem, iu big nao. Nomata maet iu luk young, Jehovah no tingim datwan bat hem savve gud lo iu and luksavve iu fit for duim samfala samting. (Fas Samuel 16:7) Iu savve lane tu for gohed fren gud witim God. Wanfala wei David duim datwan, hem lukluk lo creation blo Jehovah. Taem David ting raonem olketa samting hia, hem lanem staka samting abaotem Jehovah. (Sams 8:3, 4; 139:14; Rome 1:20) Nara samting iu savve lanem, hem for askem Jehovah for strongim iu for gohed faithful. For example, waswe, samfala wea iu skul witim mekfani lo iu bikos iu wanfala Jehovah’s Witness? Sapos olsem, prea lo Jehovah mekem hem helpem iu for deal witim datwan. And followim gudfala advaes from Bible, olketa Bible pablikeson, and olketa video blo iumi. Taem iu luksavve Jehovah evritaem helpem iu for deal witim hard samting, datwan bae mekem iu for barava trustim Jehovah. And tu, taem olketa narawan luksavve iu depend lo Jehovah, olketa tu bae trustim iu. w21.03 4 ¶7

Olketa klos fren savve storyim tingting and feeling lo each other. Waswe, iumi fren klos witim Jehovah lo sem wei tu? Ia! Jehovah iusim Bible for storyim feeling and tingting blo hem. Taem iumi prea, iumi savve storyim feeling and tingting blo iumi. Fren blo iumi Jehovah no just lisin nomoa lo prea blo iumi bat hem ansarem tu. Samfala taem hem kwiktaem for ansarem, bat samfala taem maet iumi mas gohed for prea. Nomata olsem, iumi sure hao hem bae ansarem lo barava taem and lo wei wea barava fitim. Bat hao God ansarem prea blo iumi hem maet difren from wanem iumi expectim. Olsem example, maet hem no finisim wanfala hard taem, bat hem givim iumi wisdom and strong “for winim datwan.” (1 Cor. 10:13.) Hao nao iumi savve showimaot iumi tinghae lo prea? Wanfala wei hem for followim disfala kaonsel for “prea evritaem.”—1 Thess. 5:17. w20.05 27-28 ¶7-8

Olketa wea ran lo wanfala long-distance resis mas luk lo front mekem olketa no foldaon. Sapos olketa foldaon, olketa bae getap and ranran moa. Main samting wea olketa tingim hem for finisim resis and for kasem prize, no datfala samting wea mekem olketa foldaon. Lo resis wea iumi insaed, iumi maet foldaon staka taem from iumi mistek lo wanem iumi talem or duim. Iumi shud no sapraes sapos olketa narawan tu duim mistek wea mekem iumi feel nogud. Iumi evriwan no perfect, and iumi evriwan ranran lo sem smol road wea lead go for laef. So samfala taem maet iumi savve “bangam” narawan and mekem olketa feel nogud. (Col. 3:13) Bat winim wei for gohed tingim samting wea mekem iumi foldaon, iumi laek for tingim prize wea iumi bae kasem, and gohed for ran. Sapos iumi kros and feel nogud and no laek for getap, iumi bae no finisim datfala resis and no kasem prize nao. And tu, datwan savve satem datfala smol road for laef lo olketa narawan wea trae for ran. w20.04 26 ¶1; 28 ¶8-9

Profet Daniel storyim olketa gavman blo man wea rul blo olketa hem affectim pipol blo God. Hem storyim olketa gavman hia olsem didifren part blo wanfala big maeti image. Last gavman lo datfala profesi hem nao feet blo datfala image wea hem iron wea mix witim clay. Datfala feet piksarem England-America World Paoa. So datfala profesi showimaot hem bae still rul taem Kingdom blo God finisim evri gavman blo man. Aposol John tu storyim olketa world paoa wea rul blo olketa affectim pipol blo Jehovah. John storyim olketa gavman hia olsem wanfala wild animal wea garem sevenfala hed. Mek-seven hed blo datfala animal hem piksarem England-America World Paoa. Important samting abaotem diswan nao, bae no eni nara hed moa kamap. Mek-seven hed blo disfala animal bae still rul taem Christ and army blo hem lo heven bae distroem hem witim datfala full wild animal.—Rev. 13:1, 2; 17:13, 14. w20.05 14 ¶11-12

Iumi savve God wakem evri samting. Bat datfala toktok blo John helpem iumi for tingim love tu hem kam from God. Jehovah barava lovem iumi! From iumi savve lo datwan, iumi feel sef and hapi. Tufala law lo Bible sei olketa Christian mas lovem God and pipol. (Matt. 22:37-40) Taem iumi savve gud lo Jehovah, maet hem isi for followim datfala first law for lovem hem. From hem perfect, hem evritaem tingim iumi and kaen lo iumi. Bat maet hem no isi for obeyim mek-tu law for lovem pipol. Why nao olsem? Bikos pipol, wea insaed diswan hem olketa brata and sista blo iumi, olketa no perfect. So maet samfala taem olketa duim samting wea no kaen or no showimaot love. From Jehovah hem savve hem no isi for iumi lovem evriwan, hem iusim samfala wea raetem Bible for teachim iumi why iumi shud showimaot love lo narawan and hao iumi savve duim datwan. Aposol John nao wanfala wea raet abaotem love.—1 John 3:11, 12. w21.01 8 ¶1-2

Nomata sapos iumi insaed lo truth for lelebet taem or for staka year finis, iumi need for tingim, ‘Waswe, mi gohed againstim olketa samting wea Satan duim for mekem heart blo mi divaed?’ Olsem example, sapos iu lukim wanfala piksa lo TV or Internet wea mekem iu for garem rong tingting, wanem nao bae iu duim? Maet iumi sei datfala piksa or movie hem no really pornography. Bat Satan savve iusim kaen samting olsem for divaedem heart blo iumi. Datfala piksa hem olsem wanfala smol haf iron wea man iusim for splitim wanfala log. Firstaem, hem bae hamarem go thin sharp part blo iron lo log. Then taem hem gohed hamarem go deep datfala iron, log hia bae split nao. Waswe, olketa piksa lo TV or Internet hem olsem datfala thin part lo datfala pis iron? Firstaem maet man tingse hem smol samting nomoa and hard for spoelem hem, bat gogo hem savve kosim hem for duim sin wea bae mekem hem no faithful lo Jehovah. So no letem eni nogud samting for go insaed heart blo iu! Keepim full heart blo iu for fraet lo Jehovah! w20.06 12 ¶14-15

Olketa wea inactive needim iumi for gohed encouragem olketa. Olsem prodigal son lo tokpiksa blo Jesus, olketa maet wikdaon. (Luke 15:17-24) Maet datwan bikos olketa stap longtaem tumas lo world blo Satan. Iumi need for helpem olketa for strongim bak faith blo olketa lo Jehovah. Lo tokpiksa blo Jesus abaotem wanfala sheepsheep wea lus, hem storyim hao shepherd putim datfala sheepsheep lo shoulder and karem hem go bak lo olketa nara sheepsheep. Datfala shepherd iusim taem and strong for faendem datfala sheepsheep wea lus. Bat shepherd luksavve hem need for karem sheepsheep hia bikos hem no garem strong for go bak seleva. (Luke 15:4, 5) Maet iumi bae iusim staka taem and strong for helpem samfala wea inactive for kam bak. Bat witim help blo holy spirit, Bible, and olketa pablikeson wea organization provaedem, iumi savve helpem olketa for kamap strong moa. So sapos olketa elder askem iu for study witim samwan wea inactive, acceptim datfala privilege. w20.06 28 ¶14-15

Olketa tru Christian mas showimaot love, bat iumi need for garem “stretfala savve and gudfala tingting” tu. (Phil. 1:9) Sapos nomoa, bae isi tumas for “enikaen teaching bilong pipol wea laea and trikim narawan” for affectim iumi, olsem laea teaching blo apostate. (Eph. 4:14) Lo first century C.E., staka disaepol blo Jesus stop for followim hem, bat aposol Peter talem hao hem barava bilivim ‘toktok blo Jesus nomoa savve mekem man laef olowe.’ (John 6:67, 68) Nomata lo datfala taem Peter no minim gud staka samting wea Jesus storyim, hem gohed faithful bikos hem luksavve lo truth abaotem Christ. Iu tu savve strongim trust lo wanem Bible teachim. Datwan bae mekem faith blo iu strong nomata wanem bae happen, and bae hem helpem iu for trustim olketa narawan tu.—2 John 1, 2. w20.07 8 ¶2; 13 ¶18

For helpem olketa brata and sista blo iumi for gohed followim wei blo truth, iumi need for kaen lo each other. (1 John 3:10, 11, 16, 17) Iumi need for showimaot love no just lo gud taem nomoa bat taem problem kamap tu. Olsem example, waswe, iu savve lo samwan wea lusim samwan wea olketa lovem lo dae and wea needim iu for comfortim olketa or helpem olketa lo narafala wei? Or waswe, iu herem wanfala brata or sista wea natural disaster kasem olketa and olketa needim help blo iu for buildim bak moa haos or Kingdom Hall blo olketa? Iumi showimaot iumi kaen and barava lovem olketa brata and sista blo iumi, no lo wanem iumi talem nomoa bat lo wanem iumi duim for helpem olketa. Iumi followim example blo Dadi blo iumi wea lovem iumi taem iumi showimaot love lo each other. (1 John 4:7, 8) Wanfala important wei for iumi showimaot love hem for forgivim narawan. Olsem example, maet samwan mekem iumi feel nogud bat then hem sei sorre. Iumi showimaot love taem iumi forgivim hem and forgetim wanem hem duim.—Col. 3:13. w20.07 24 ¶14-15

Waswe, bae iumi teachim olketa wea resurrect olsem iumi conductim olketa Bible study distaem? Waswe, olketa niu wan hia bae joinim olketa kongregeson and kasem training for teachim olketa wea bae resurrect kam bihaen? Iumi no savve. Bat samting wea iumi savve hem hao lo end blo Wan Thousand Year Rul blo Christ, earth bae fulap witim pipol wea savve gud lo Jehovah. (Aesaea 11:9) So bae iumi busy and enjoyim waka for teachim narawan insaed datfala wan thousand year! Lo datfala taem, iumi evriwan bae changem samfala wei for Jehovah hapi lo iumi. So iumi bae minim feeling blo olketa wea resurrect taem iumi helpem olketa for changem olketa nogud wei and followim olketa standard blo Jehovah. (1 Pet. 3:8) Iumi sure olketa wea resurrect bae tinghae lo pipol blo Jehovah bikos olketa tu hambol for duim samting for kasem laef olowe.—Phil. 2:12. w20.08 16 ¶6-7

Sapos iumi followim kaonsel blo aposol Paul wea stap insaed lo Bible and iumi lukluk lo wanem iumi savve duim, bae iumi start for luksavve iumi garem waka and iumi savve hao for duim samfala samting. Olsem example, wanfala elder maet hem no barava gudfala teacher lo platform, bat hem savve tumas hao for teach lo ministry. Or maet wanfala elder no barava savve hao for organize gud olsem olketa nara elder lo kongregeson, bat evriwan savve lo hem olsem wanfala shepherd wea evritaem showimaot love and olketa pablisa no hol bak for story witim hem from hem savve givim olketa gud advaes from Bible. Or maet hem garem naesfala wei for showimaot love and welkamim olketa narawan. (Heb. 13:2, 16) Taem iumi luksavve lo gudfala waka wea iumi savve duim, diswan bae helpem iumi for hapi lo wanem iumi fit for duim for helpem kongregeson. And tu, iumi bae no jealous lo savve or waka wea olketa narawan duim wea hem difren from wanem iumi duim. Nomata wanem waka nao iumi garem insaed kongregeson, iumi evriwan laek for duim moa samting lo service blo iumi and iumi laek for kasem moa savve lo hao for duim waka. w20.08 24 ¶16-18

Joseph Rutherford givim tok “The Great Multitude” lo wanfala convention lo Washington, D.C., U.S.A., lo 1935. Lo datfala tok, Brata Rutherford storyim hu nao insaed datfala “great multitude” (King James Version), wea hem “datfala big crowd,” wea Revelation 7:9 storyim. Firstaem, Olketa Bible Student tingse datfala big crowd bae go lo heven bat olketa no barava gud olsem nara grup. Brata Rutherford iusim Bible for explainim datfala big crowd bae no go lo heven. Bat big crowd hem olketa nara sheepsheep blo Christ wea bae no dae lo “datfala big trabol” and bae laef olowe lo earth. (Rev. 7:14) Jesus sei: “Mi garem olketa nara sheepsheep wea no insaed disfala fence. Mi mas tekem kam olketa hia tu and bae olketa herem toktok bilong mi. Evri sheepsheep hia bae wanfala sekson nomoa and wanfala man nao bae lukaftarem olketa.” (John 10:16) So olketa nara sheepsheep hem olketa wea faithful for witness abaotem Jehovah and garem hope for laef olowe lo Paradaes earth.—Matt. 25:31-33, 46. w21.01 14 ¶1-2

Iumi need for disciplinem iumiseleva sapos iumi laek for gohed strong and finisim disfala waka blo iumi for preach. (Matt. 28:19, 20) Wei for disciplinem seleva hem no samting wea iumi born witim. Bat normal wei blo iumi hem for duim nomoa samting wea hem isi for duim. Wei for disciplinem seleva hem minim iumi need for kontrolem seleva. Dastawe, iumi need for trainim iumiseleva for duim olketa samting wea maet hem hard for iumi duim. Jehovah givim iumi help thru lo holy spirit blo hem. (Gal. 5:22, 23) Aposol Paul hem man wea disciplinem hemseleva. Bat hem sei hem mas “whipim” body blo hem for duim stret samting. (1 Cor. 9:25-27) Hem encouragem olketa narawan for disciplinem olketa seleva and for duim olketa samting lo wei wea “stret and no olobaot.” (1 Cor. 14:40) Iumi mas disciplinem iumiseleva for mekem iumi garem wanfala gud spiritual schedule wea insaed diswan hem for share evritaem lo preaching waka.—Acts 2:46. w20.09 6-7 ¶15-17

Lo staka kantri distaem, iumi free for preach. Waswe, iu stap lo kantri wea garem freedom for worship? Sapos olsem, hem gud for tingim, ‘Hao nao mi iusim datfala freedom?’ Insaed lo olketa last day distaem, organization blo Jehovah duim preaching and teaching waka wea winim eni nara taem lo history. Staka waka stap for pipol blo Jehovah. Hao nao iu savve iusim gud disfala taem blo peace? (2 Tim. 4:2) Hem gud for iuseleva savve lukluk lo situation blo iu, and ting raonem sapos iu or eni narawan lo famili savve duim moa samting lo preaching waka, maet for kamap pioneer. Distaem hem no taem for hipimap olketa riches and olketa material samting bikos olketa samting hia bae hard for iumi tekem go thru lo bigfala trabol. (Provebs 11:4; Matt. 6:31-33; 1 John 2:15-17) Staka pablisa lanem wanfala niu languis mekem olketa savve iusim datwan for preach and teach. Organization blo God sapotim olketa lo wei for gohed wakem olketa Bible pablikeson lo winim 1,000 languis! w20.09 16 ¶9-11

Wanfala gud soldia bae faet hard for protectim samwan hem lovem or wanfala samting wea hem tinghae lo hem. Paul encouragem Timothy for barava lovem God and gohed faithful lo God. (1 Tim. 4:7) From iumi lovem and laek for faithful lo God, bae iumi barava laek hol strong lo truth. (1 Tim. 4:8-10; 6:6) Wanfala gud soldia mas disciplinem hemseleva tu mekem hem savve gohed fit for duim waka blo hem. Timothy gohed fit lo spiritual wei for duim waka blo hem bikos hem followim advaes blo Paul for stap klia lo eni rong tingting and gohed garem olketa wei wea God laekem and for associate witim olketa brata and sista. (2 Tim. 2:22) Datwan minim hem mas disciplinem hemseleva. Iumi need for disciplinem iumiseleva mekem iumi no duim samting wea no stret. (Rome 7:21-25) And tu, iumi need for disciplinem iumiseleva mekem iumi savve aotem olketa old wei and garem olketa niufala wei. (Eph. 4:22, 24) And taem iumi taed lo end blo day, iumi need for forcem iumiseleva for go meeting.—Heb. 10:24, 25. w20.09 28 ¶9-11

Iumi need for patient taem iumi helpem Bible study for laek for dedicate and baptaes. Bat maet iumi need for faendaot sapos hem study bikos hem laek for worshipim Jehovah God. Waswe, iu lukim samfala samting wea showimaot student traem best for followim wanem Jesus talem? Or waswe, hem just laek for savve nomoa lo samfala interesting samting lo Bible? Hem gud for tingim sapos Bible study blo iumi gohed gud lo spiritual wei. Olsem example, waswe, hem storyim tingting blo hem abaotem Jehovah? Waswe, hem prea lo Jehovah? (Sams 116:1, 2) Waswe, hem laek for readim Bible? (Sams 119:97) Waswe, hem attendim olketa meeting evritaem? (Sams 22:22) Waswe, hem mekem olketa change lo laef blo hem? Waswe, hem storyim wanem hem lanem lo olketa famili member and fren blo hem? (Sams 9:1) And waswe, hem laek for kamap wanfala Jehovah’s Witness? (Sams 40:8) Sapos iu lukim student no duim samfala samting hia, trae for faendaot why, then lo kaenfala wei story witim hem abaotem datwan. w20.10 18 ¶14-15

Jehovah, dadi blo Jesus evritaem mekem olketa gudfala disison, and parents blo Jesus lo earth tu mekem olketa wise disison. Bat taem Jesus growap, hemseleva mas mekem olketa disison. (Gal. 6:5) Olsem iumi, Jesus garem freedom for chus. Hem savve disaed for duim samting wea hemseleva laekem, bat hem chus for gohed fren gud witim Jehovah. Jesus chus for duim waka wea Jehovah laekem hem for duim. (John 6:38) Hem savve hao staka bae heitim hem and masbi datwan mekem hem sorre. Nomata olsem, hem chus for obeyim Jehovah. Bihaen Jesus baptaes lo 29 C.E., Jesus iusim laef blo hem for duim wanem Jehovah laekem. (Heb. 10:5-7) Nomata taem Jesus klosap for dae lo post, hem gohed for duim wanem Dadi blo hem laekem.—John 19:30. w20.10 29 ¶12; 30 ¶15

Waswe, iu tingim eniwan lo kongregeson blo iu wea sik or feisim olketa nara challenge lo laef? Maet samwan wea olketa lovem hem dae. Sapos iumi tingim samwan wea needim help, askem Jehovah for helpem iumi for talem or duim samting for showimaot iumi lovem olketa. Maet toktok blo iumi or samting wea iumi duim hem wanem brata or sista blo iumi barava needim. (1 Pet. 4:10) sure Jehovah bae helpem iumi bikos hem iusim Jesus and olketa angel for duim datwan. And tu, Jehovah savve iusim pipol wea garem paoa for helpem iumi. Staka lo iumi experiencem hao Jehovah iusim holy spirit blo hem for muvim heart blo olketa servant blo hem for helpem iumi. So, olsem aposol Paul talem, iumi sure hao, ‘Jehovah nao hem helpem iumi. Bae iumi no fraet. No eniwan savve spoelem iumi.’—Heb. 13:6. w20.11 17 ¶19-20

Olketa aposol sure Jehovah sapotim waka blo olketa bikos hem givim paoa lo olketa for duim mirakol. (Acts 5:12-16; 6:8) Distaem iumi no savve duim mirakol. Nomata olsem, toktok lo Bible showimaot Jehovah sapotim iumi and iusim holy spirit for helpem iumi taem iumi safa bikos iumi duim samting wea stret. (1 Pet. 3:14; 4:14) So iumi shud no tingting tumas abaotem wanem bae iumi duim sapos iumi kasem persecution. Bat iumi shud waka hard for strongim trust blo iumi lo Jehovah, wea datwan mekem iumi sure hem bae sapotim and sevem iumi. Iumi mas trustim promis blo Jesus wea sei: “Mi bae givim iufala wisdom and helpem iufala for savve wanem for talem, and olketa enemy bilong iufala bae no fit for talem eni samting nao.” Then Jesus sei: “Sapos iufala no givap, bae iufala sevem laef bilong iufala.” (Luke 21:12-19) Hem gud for tingim tu, sapos man faithful go kasem taem hem dae, Jehovah fit for rememberim evri samting abaotem hem mekem Jehovah resurrectim hem. w21.01 4 ¶12

Aposol Paul no first wan for story abaotem hope for wanfala resurrection. Job tu story abaotem datwan, and hem barava sure God bae tingim hem and mekem hem laef bak moa lo future. (Job 14:7-10, 12-15) “Resurrection” hem part lo datfala “main teaching” wea evri Christian bilivim. (Heb. 6:1, 2) Paul story abaotem resurrection lo 1 Corinth chapter 15. Masbi wanem hem raetem hem strongim olketa Christian lo first century. Datfala chapter lo Bible savve encouragem iumi tu and strongim hope wea iumi garem for future. Resurrection blo Jesus Christ mekem iumi sure hao nomata sapos olketa wea iumi lovem olketa dae, iumi garem hope for lukim olketa laef bak. Diswan hem part lo datfala “gud nius” wea Paul storyim lo olketa lo Corinth. (1 Cor. 15:1, 2) Sapos Christian no biliv lo resurrection, faith blo hem iusles nomoa.—1 Cor. 15:17. w20.12 2 ¶2-4

Bihaen Peter denyim Jesus, wanem nao helpem hem for no wikdaon? Peter tingim hao Jesus prea for hem no lusim faith blo hem, and Jehovah ansarem prea blo hem. Masbi Jesus encouragem Peter tu taem hem kam lukim hem bihaen hem resurrect. (Luke 22:32; 24:33, 34; 1 Cor. 15:5) Bihaen naet wea olketa aposol fishing and no kasem eni fish, Jesus hem kam lo olketa. Lo datfala taem, Peter garem chance for talem Jesus hem lovem hem. Jesus forgivim fren blo hem Peter, and givim hem staka waka. (John 21:15-17) Jesus showimaot mercy lo Peter, and datwan showimaot hem followim wei blo Dadi blo hem. So taem iumi mekem mistek, iumi shud no tingse iumi no fit nao. Satan nao laekem iumi for garem datkaen tingting. Bat iumi shud garem sem tingting olsem Jehovah abaotem iumiseleva and olketa narawan. Dadi blo iumi lo heven hem kaen and lovem iumi.—Sams 103:13, 14. w20.12 20-21 ¶17-19

Iumi savve lane from example blo olketa wea wari tumas and no trustim Jehovah. Example blo olketa savve helpem iumi for no duim sem mistek. For example, taem Asa kamap king hem depend lo Jehovah taem hem kasem olketa problem. Bat hem no duim olsem lo olketa narataem. Hemseleva trae for stretem olketa problem wea hem kasem. (Mektu Kronikols 16:1-3, 12) Taem Asa askem help blo olketa lo Syria, maet hem luk olsem datwan bae helpem olketa lo Judah, bat hem for lelebet taem nomoa. Jehovah iusim wanfala profet for talem Asa: “Bikos yu no trastem [Jehovah] hu hemi God blong yu, bat yu trastem nomoa king blong Siria, oraet, bae yu garem trabol bikos ami blong king blong Siria hemi goaot from han blong yu.” (Mektu Kronikols 16:7) Iumi mas no tingse iumiseleva savve stretem olketa problem blo iumi, and no needim advaes blo Jehovah lo Bible. Nomata taem iumi mas kwiktaem disaedem samting, iumi shud no wari tumas and depend lo Jehovah, and hem bae helpem iumi for disaedem stret samting. w21.01 6 ¶13-15

Distaem samfala pipol blo Jehovah hangre from olketa no garem inaf kaikai bikos olketa short lo selen or bikos war hem gohed lo ples blo olketa. Olketa narawan stap lo prison bikos olketa faithful lo God. Bat from olketa hia part blo big crowd olketa barava hapi bikos olketa savve bihaen disfala nogud world finis, olketa bae garem staka kaikai and kasem tu staka spiritual kaikai. Taem Jehovah finisim nogud pipol lo world blo Satan, “sun bae no hotem” olketa blo big crowd wea minim Jehovah bae protectim olketa. Lo end blo datfala big trabol, Jesus bae leadim olketa hia go lo “olketa springwata wea savve mekem man laef [olowe].” (Rev. 7:17) Tru nao, datfala big crowd garem nambawan hope. Nomata staka billion pipol dae kam kasem distaem, olketa hia bae no savve dae! (John 11:26) Olketa nara sheepsheep barava tinghae lo nambawan hope wea olketa kasem from Jehovah and Jesus! w21.01 17 ¶11-12

Lo naet bifor Jesus dae, hem tingim olketa hard samting wea olketa disaepol blo hem bae kasem. From Jesus lovem olketa disaepol, hem askem Dadi blo hem for “lukaftarem olketa mekem Satan no spoelem olketa.” (John 17:14, 15) Jesus savve bihaen hem go bak lo heven, Satan bae gohed for againstim olketa wea worshipim Jehovah, so Jehovah bae need for protectim olketa. Distaem iumi barava needim Jehovah for protectim iumi bikos start lo taem wea Jesus torowem kam Satan lo earth, Satan “kros fogud.” (Rev. 12:12) Satan mekem samfala wea againstim iumi for tingse olketa “duim waka bilong God.” (John 16:2) Olketa narawan, wea no biliv lo God, againstim iumi bikos iumi difren from pipol lo world. Nomata wanem reason olketa againstim iumi, iumi no fraet. Why nao olsem? Iumi kasem ansa lo text blo iumi for tuday. w21.03 26 ¶1, 3

Evri samting wea Jehovah duim showimaot love. Hem provaedem olketa need blo iumi. And tu, Jehovah provaedem datfala ransom sakrifaes. Jesus tu showimaot hem lovem iumi from hem willing for dae for iumi. (John 3:16; 15:13) No eni samting savve stopem Jehovah and Jesus for gohed lovem olketa wea faithful lo tufala. (John 13:1; Rome 8:35) Olsem tu, evri samting wea hed blo famili duim shud showimaot love. Why nao datwan barava important? Aposol John sei: “Sapos man no lovem brata bilong hem [or famili] wea hem savve lukim, hard tumas for hem lovem God wea hem no savve lukim.” (1 John 4:11, 20) So hasband wea lovem famili blo hem and laek for followim example blo Jehovah and Jesus bae helpem famili for fren gud witim Jehovah, tingim feeling blo olketa, and provaedem need blo olketa. (1 Tim. 5:8) Dadi bae trainim and stretem olketa pikinini blo hem. Hem bae traem best for mekem olketa disison wea mekhae lo Jehovah and wea helpem famili blo hem. w21.02 5 ¶12-13

Jehovah savve lo wanem iumi feisim bifor, and hao tingting wea no stret savve affectim iumi. Bat hem lukim tu gud samting wea stap lo heart blo iumi, nomata maet iumi no luksavve lo datwan. (1 John 3:19, 20) Samwan maet traem best for stop for duim rong samting, bat sapos hem foldaon moa lo datfala sem mistek datwan savve mekem hem wikdaon. Hem normal nomoa for feel guilty taem iumi sin. (2 Cor. 7:10) Bat iumi shud no feel nogud tumas and sei: ‘Mi no fit nao. Bae Jehovah savve forgivim mi tu?’ Kaen tingting olsem no stret, and hem savve mekem iumi stop for worshipim Jehovah. Hem gud for stretem evri samting lo wei for prea lo Jehovah and askem hem for forgivim iumi. (Aesaea 1:18) Taem Jehovah lukim iu repent, hem bae forgivim iu. And tu, go lo olketa elder, olketa bae patient for helpem iu for kamap gud moa lo spiritual wei.—Jas. 5:14, 15. w20.12 23 ¶5-6

Jesus respectim olketa woman. Jesus no followim wei blo olketa Pharisee wea ting daonem olketa woman, no story witim olketa lo pablik ples, and no storyim Scripture witim olketa. Jesus hapi for storyim scripture witim olketa woman, and olketa man. (Luke 10:38, 39, 42) Hem hapi tu for olketa woman kam witim hem taem hem go preach lo olketa difren ples. (Luke 8:1-3) And Jesus givim olketa woman bigfala privilege for go storyim lo olketa disaepol hem laef bak nao. (John 20:16-18) Aposol Paul talem Timothy for respectim olketa woman. Paul luksavve mami and granmami blo Timothy nao first wan wea helpem hem for savve lo olketa holy raeting. (2 Tim. 1:5; 3:14, 15) Paul respectim olketa woman tu. Taem hem raetem leta lo wanfala kongregeson hem sei hello lo samfala sista tu. Hem luksavve olketa sista waka hard lo ministry and hem talem thankiu lo olketa.—Rome 16:1-4, 6, 12; Phil. 4:3. w21.02 15 ¶5-6