December

Samfala taem maet hem no isi for minim wanfala Bible teaching. Or maet Jehovah no ansarem prea blo iumi followim wanem iumi laekem. Kaen samting olsem savve mekem iumi for daotem samting wea Bible teachim. Then maet iumi start for no trustim Jehovah and for wikdaon. (Jas. 1:7, 8) Gogo, maet samfala lusim hope wea olketa garem for future. Aposol Paul sei hope wea iumi garem for future hem olsem wanfala anka. (Heb. 6:19) Anka savve mekem ship for stedy and no go ap lo reef lo taem blo bigfala wind. Bat sapos chain wea holem anka hem rasta, gogo chain savve brek and ship bae rek nao. Olsem tu, sapos samwan gohed daotem samting wea Bible teachim, datwan savve mekem hem for wikdaon. Then sapos narawan tok againstim truth, datwan maet mekem hem for no garem faith lo olketa promis blo Jehovah. Sapos man no garem faith, bae hem no garem hope nao. Man olsem bae hard for hapi! w21.02 30 ¶14-15

Luk olsem Abraham winim 70 years taem hem and famili blo hem lusim Ur. (Jenesis 11:31–12:4) For samting olsem wan handred year olketa stap insaed lo tent, and staka taem olketa muv lo difren ples lo Canaan. Abraham dae taem hem 175 years. (Gen. 25:7, NW) Hem no lukim Jehovah fulfillim promis for givim datfala land lo olketa pikinini blo hem. And tu, hem no laef taem Kingdom blo God start for rul. Nomata olsem, Bible sei taem Abraham dae hem satisfae lo laef blo hem. (Gen. 25:8, NW) Nomata Abraham mas deal witim staka challenge, hem garem strongfala faith and hapi for weit lo Jehovah. Wanem nao helpem hem for gohed and no givap? Lo full laef blo Abraham, Jehovah protectim hem and hem fren blo hem. (Jenesis 15:1; Aesaea 41:8; Jas. 2:22) Olsem Abraham, iumi tu gohed weitim datfala Kingdom blo God. (Heb. 11:10) Iumi no weitim for Kingdom start for rul bikos hem start finis lo 1914 and hem kontrolem evri samting lo heven. (Rev. 12:7-10) Bat distaem iumi weitim Kingdom for kontrolem evri samting lo disfala earth. w20.08 4-5 ¶11-12

For lisin gud lo olketa narawan, iumi need for hambol and patient. Iumi garem thrifala reason for laek lisin gud lo pipol. First reason, iumi bae no kwiktaem for garem negative tingting abaotem pipol. Mek-tu, iumi bae minim feeling blo brata blo iumi and why hem duim samting, and datwan bae helpem iumi for kaen lo hem. And mek-thri, taem samwan storyim feeling blo hem, datwan savve helpem hem for luksavve lo samfala samting abaotem hemseleva. Samfala taem iumiseleva no minim feeling blo iumi go kasem taem iumi story abaotem datwan lo narawan. Samfala brata and sista faendem hem hard for storyim feeling blo olketa bikos lo background, culture, or wei blo olketa. Maet hem tek taem for olketa feel free for story lo iumi, bat taem olketa duim datwan bae iumi minim feeling blo olketa. Taem iumi patient olsem Jehovah, bae gogo olketa trustim iumi. Then, taem olketa laek for talem feeling blo olketa, iumi shud lisin gud lo olketa. w20.04 15-16 ¶6-7

Fish savve stap lo ples wea fitim olketa and wea staka kaikai blo olketa hem stap. Hem important for fisherman savve wanem taem hem gud for go kasem olketa fish. Wanfala missionary wea stap lo wanfala Pacific island lanem wat taem nao best taem for kasem fish. Wanfala brata lo there invaetem hem for tufala go fishing. Datfala missionary sei: “Bae mi meetim iu lo naen klok tumoro morning.” Datfala brata sei: “Iu savve, iumi bae no followim taem wea fitim iumi, bat bae iumi followim taem wea fit for iumi kasem fish.” Olketa disaepol lo first century garem sem kaen tingting. Olketa go lo olketa ples wea bae olketa meetim pipol, and olketa go lo taem wea hem isi for kasem olketa. Olsem example, olketa preach lo temple and lo sinagog, from haos tu haos, and lo olketa market. (Acts 5:42; 17:17; 18:4) Iumi tu need for savve lo wei blo pipol lo territory blo iumi. Iumi need for change fitim olketa and preach lo ples and taem wea bae hem isi for kasem staka pipol.—1 Cor. 9:19-23. w20.09 4 ¶8-9

Wanfala wei for fren gud witim Jesus, hem for sapotim olketa arrangement blo Christian kongregeson. Iumi bae barava luksavve Jesus hem hed blo kongregeson taem iumi waka tugeta witim olketa wea Jesus markem for lukaftarem iumi. (Eph. 4:16) Olsem example, distaem iumi trae for iusim gud evri Kingdom Hall wea iumi garem. For duim datwan, samfala kongregeson mas join tugeta. Disfala arrangement sevem staka selen wea pipol contributem lo organization. Bat bikos lo datfala niu arrangement, samfala pablisa mas change for fitim datwan. Olketa pablisa wea stap lo wanfala kongregeson for staka year finis maet savve gud lo olketa brata and sista lo there. Bat distaem olketa askem olketa for muv go lo difren kongregeson. Jesus barava hapi tumas lo wei wea olketa faithful disaepol hia waka tugeta for sapotim olketa arrangement hia. w20.04 24 ¶14

King blo north and king blo south gohed for compete for kasem big paoa ovarem full world. Olsem example, tingim samting wea happen bihaen lo World War II. Soviet Union and olketa wea sapotim hem tekovarem staka part lo Europe. King blo north mekem king blo south for mekem agreement witim olketa nara kantri for startim wanfala international military organization wea olketa kolem NATO. King blo north gohed for compete witim king blo south lo wei for wakem staka samting for faet. Tufala king hia bihaenem and sapotim tu olketa war wea kamap midolwan lo olketa enemy blo each other lo Africa, Asia, and Latin America.Distaem Russia and olketa wea sapotim hem garem big paoa evriwea lo world. And tu, olketa iusim cyber warfare for attakim king blo south . Tufala king hia sei olketa iusim olketa computer program for spoelem economy and gavman blo each other. And olsem Daniel talem, king blo north gohed for attakim pipol blo God.—Dan. 11:41, NW. w20.05 13 ¶5-6

Lo taem blo profet Isaiah, Jehovah askem: “Waswe, . . . woman save fogetem nomoa bebi blong hem wea hemi susum?” Jehovah sei moa: “Nomata sapos wanfala woman hemi save fogetem pikinini blong hem, bat mi no save fogetem yufala.” (Aesaea 49:15) Lo disfala story God comparem hemseleva witim wanfala mami. Jehovah storyim klos feeling wea wanfala mami and pikinini garem for each other for helpem pipol blo hem minim feeling wea hem garem for olketa. Staka mami garem sem feeling olsem wanfala sista wea nem blo hem Jasmin, wea sei: “Taem iu susum baby blo iu, iu garem wanfala spesol wei for klos witim hem wea bae stap for olowe.” Jehovah savve taem wanfala pikinini blo hem stop for attendim olketa meeting or for duim preaching waka. Staka brata and sista wea inactive, gogo olketa kam bak moa lo kongregeson and iumi hapi tumas lo datwan! Jehovah laekem tumas for olketa kam bak, and iumi tu feel olsem.—1 Pet. 2:25. w20.06 18 ¶1-3

Lo Sermon lo Maunten, Jesus storyim samfala spesol present lo heven wea barava winim olketa riches lo earth. Iumi no savve lukim olketa samting hia. Then Jesus sei: “Samting wea man tinghae long hem nao bae hem interest for garem.” (Matt. 6:19-21) Taem iumi tinghae lo wanfala samting or ting lo hem olsem hem spesol, iumi bae laek for aftarem. Iumi hipimap “riches long heven” taem iumi garem gudfala nem witim God. Jesus sei kaen spesol samting olsem bae no savve finis and no eniwan savve stealim. Aposol Paul encouragem iumi for ‘gohed for tingim olketa samting wea iumi no savve lukim.’ (2 Cor. 4:17, 18) Olketa samting hia wea iumi no savve lukim hem olketa spesol present, wea insaed diswan hem olketa blessing wea iumi bae enjoyim lo niu world blo God. Waswe, iumi showimaot iumi tinghae lo olketa spesol samting hia wea iumi no savve lukim? w20.05 26 ¶1-2

Samting wea Moses teachim lo olketa Israelite hem strongim and encouragem olketa. Hao nao iumi savve mek sure hao iumi teach hem olsem tu? Taem iumi preach from haos tu haos or lo pablik witnessing, iumi laek iusim Bible for showim lo pipol hao nem blo God, hem Jehovah. Iumi givimaot olketa literature, video, and information lo website blo iumi wea mekhae lo Jehovah. Lo waka ples, skul, or taem iumi travel, iumi savve lukaotem chance for story abaotem God wea iumi lovem and abaotem olketa wei blo hem. Taem iumi story lo pipol abaotem nambawan plan blo Jehovah for olketa man and disfala earth, datwan maet firstaem for olketa savve dat Jehovah barava lovem iumi. Taem iumi talem truth abaotem Dadi blo iumi lo olketa narawan, iumi help for mekem nem blo hem kamap holy. Iumi aotem samfala lo olketa laea wea nara pipol teachim abaotem Jehovah. Iumi teachim pipol samting wea savve strongim and encouragem olketa.—Aesaea 65:13, 14. w20.06 10 ¶8-9

Hao nao iumi savve helpem olketa wea laek for kam bak lo Jehovah? Tingim wanem iumi savve lanem from tokpiksa blo Jesus abaotem datfala son wea lusim hom. (Luke 15:17-24) Datfala son kasem bak gudfala tingting and hem disaed for kam bak. Taem datfala dadi ran go for meetim son blo hem and hagem hem, datwan mekem son for luksavve dadi barava lovem hem. Datfala son feel guilty tumas and hem feel olsem hem no fit for dadi kolem hem son blo hem. Taem son hia talemaot feeling blo hem, dadi sorre lo hem. Then dadi duim samting for welkamim son blo hem and mekem hem feel hem part lo famili moa. For showimaot datwan, dadi wakem wanfala big feast and givim naes kaleko for datfala son blo hem wea repent. Jehovah hem olsem dadi lo datfala tokpiksa. Hem lovem olketa inactive brata and sista blo iumi and hem laekem olketa for kam bak lo hem. Taem iumi followim example blo Jehovah, iumi savve helpem olketa for kam bak. For duim datwan, iumi mas patient, tingim feeling blo olketa, and lovem olketa. w20.06 25-26 ¶8-9

Jesus sei samfala bae “hapi for kasem” truth, bat taem olketa kasem test bae olketa no garem faith. (Matt. 13:3-6, 20, 21) Maet olketa no minim hao taem olketa followim Jesus, bae olketa kasem hard taem. (Matt. 16:24) Or maet olketa tingse taem olketa kamap Christian, laef blo olketa bae no garem eni problem, and bae olketa kasem olketa blessing nomoa. Distaem, iumi bae kasem olketa challenge tu. Laef savve change and datwan savve mekem iumi for no hapi. (Sams 6:6; Eklesiastes 9:11) Staka brata and sista blo iumi showimaot olketa barava sure wanem olketa bilivim hem nao truth. Hao nao iumi sei olsem? Bikos faith blo olketa no wikdaon nomata taem brata or sista mekem olketa feel nogud or duim samting wea no followim wei blo Christian. (Sams 119:165) Each taem wea olketa kasem test, faith blo olketa hem kamap moa strong. (Jas. 1:2-4) Iumi mas mekem grow diskaen strong faith. w20.07 8 ¶1; 9 ¶4-5

Bifor iu start for readim Bible, talem Jehovah iu laekem wanem iu bae readim for helpem iu. For example, sapos iu needim advaes lo hao for deal witim wanfala problem, askem Jehovah for mekem iu luksavve lo eni Bible principle wea savve helpem iu. (Phil. 4:6, 7) Wei for piksarem samting lo mind hem nambawan present from Jehovah. Taem iu readim wanfala story lo Bible, tingim olsem iu lo there and iu nao datfala man wea iu read abaotem. Tingim samting wea happen lo hem and feeling blo hem abaotem datwan. Next samting, ting raonem wanem iu readim. Diswan minim bihaen iu readim wanfala story lo Bible, hem gud for tingim wanem iu lanem from datwan. Sapos iumi no duim datwan, hem olsem iu lanem staka word lo wanfala niu languis bat iu no savve hao for joinim tugeta for mekem wanfala sentence. Taem iu ting raonem wanfala story iu readim lo Bible and lane from datwan, hem olsem iu joinim gud olketa word lo languis wea iu lanem for mekem wanfala sentence. Taem iu ting raonem wanem iu readim bae datwan helpem iumi for luksavve lo full story. w21.03 15 ¶3-5

Aposol Paul savve ting olsem, sapos hem no kamap wanfala Christian olketa bae hard for arrestim hem. And tu, Paul fit for kros lo olketa brata wea stop for associate witim hem, and maet datwan mekem hem no trustim olketa nara fren blo hem. Bat Paul no garem kaen tingting olsem. Nomata Paul savve bae hem dae, hem luksavve hem important for gohed duim samting wea mekhae lo Jehovah. Hem gohed for tingim olketa narawan tu. Hem showimaot hem depend lo Jehovah from hem prea evritaem. Paul no laek tingim olketa brata wea no associate witim hem, bat hem sei hem tinghae lo olketa fren wea gohed for sapotim and helpem hem. And tu, hem gohed for studyim olketa Scripture. (2 Tim. 3:16, 17; 4:13) Paul barava sure Jehovah and Jesus lovem hem. w21.03 18 ¶17-18

Bihaen 100 C.E., olketa false Christian wea followim olketa laea teaching and haedem truth lo Bible, start for kamap staka insaed lo tru Christian kongregeson. From datfala taem kam kasem 19 century, no eni organization blo God stap lo earth. Olketa false Christian kamap staka olsem rabis grass, and datwan mekem hem hard for luksavve lo hu nao olketa tru Christian. (Matt. 13:36-43) Why nao hem important for savve lo datwan? Diswan showimaot wanem iumi readim abaotem king blo north and king blo south lo Daniel chapter 11 hem no minim eni king or gavman wea stap lo 100 C.E. go kasem 1870, bikos no eni organization blo God hem stap lo datfala taem mekem olketa savve attakim. Nomata olsem, iumi savve hao king blo north and king blo south bae showaot moa no longtaem bihaen 1870. w20.05 3 ¶5

Joel profesi abaotem staka grashopa wea bae spoelem land blo Israel and kaikaim evri samting lo there! (Joel 1:4) For staka year finis, iumi sei disfala profesi abaotem olketa grashopa, hem piksarem wei wea pipol blo Jehovah duim disfala preaching waka. Iumi tingse disfala waka hem barava spoelem datfala “land,” wea minim hem affectim pipol wea stap anda lo olketa leader blo olketa religion. Bat, sapos iumi lukluk lo full story blo datfala profesi, iumi bae luksavve dat iumi mas changem hao iumi minim datfala profesi. Tingim wanem Jehovah talem abaotem staka grashopa hia, hem sei: “Bae mi ronemaot disfala ami blong grashopa wea hemi kamdaon from not.” (Joel 2:20) So sapos olketa grashopa hia piksarem olketa Jehovah’s Witness wea obeyim komand blo Jesus for preach and mek disaepol, why nao Jehovah sei hem bae raosem olketa? (Esikiel 33:7-9; Matt. 28:19, 20) Hard for Jehovah raosem olketa faithful servant blo hem, so hem klia dat hem raosem samting or samwan wea kosim trabol for pipol blo hem. w20.04 2-3 ¶3-5

Wanem nao iumi shud duim sapos Jehovah no kwiktaem ansarem prea blo iumi? James sei iumi “mas gohed askem God.” Jehovah bae no kros witim iumi sapos iumi gohed askem hem for wisdom. Hem hapi for givim iumi wisdom taem iumi kasem hard samting. (Sams 25:12, 13) Hem no laek for lukim iumi kasem hard taem, hem sorre lo iumi, and hem barava laek helpem iumi. Iumi hapi for savve Jehovah tingim iumi! Bat hao nao Jehovah givim iumi wisdom? Iumi savve kasem wisdom blo Jehovah from Bible. (Provebs 2:6) For duim datwan, iumi mas studyim Bible and olketa Bible pablikeson. Bat hem no inaf for kasem savve nomoa. Iumi mas duim samting followim wanem iumi lanem lo Bible. James sei: “Iufala mas followim toktok bilong God, no herem nomoa.” (Jas. 1:22) Taem iumi duim datwan, iumi bae stap gud witim narawan, no forcem tingting blo iumi lo olketa, and bae iumi showimaot mercy lo narawan. (Jas. 3:17) Sapos iumi garem olketa wei hia, iumi savve gohed hapi taem iumi deal witim eni hard samting. w21.02 29 ¶10-11

Wanfala Bible study needim help from evriwan lo kongregeson for hem kamap wanfala Witness. Evri pablisa savve helpem olketa Bible study for laek kamap Witness. Wanfala pioneer sei: “Mifala savve sei, wanfala pikinini savve lanem staka samting from evriwan lo vilij. Hem olsem tu taem iumi helpem samwan for kamap wanfala disaepol. Evriwan lo kongregeson savve helpem hem.” Parents, olketa relative, olketa fren, and olketa teacher lo skul savve helpem pikinini for garem gudfala laef. Olsem tu, olketa brata and sista lo kongregeson savve givim gudfala advaes, encouragem, and showimaot gudfala example wea bae helpem Bible study for laek kamap Witness. (Provebs 15:22) Why nao iumi laekem olketa narawan lo kongregeson for helpem Bible study blo iumi? Bikos evriwan savve helpem Bible study for kamap Witness. w21.03 8 ¶1-3

Evri Witness, nomata young or old, no laek for garem dabol laef. Aposol John talem hao iumi hard for wakabaot lo truth and lo semtaem duim samting wea no stret. (1 John 1:6) Sapos iumi laekem God for hapi lo iumi distaem and lo future, iumi need for tingim hao Jehovah savve lukim evri samting wea iumi duim, so no eni sin hem haed. (Heb. 4:13) Iumi mas rejectim hao pipol lo world ting lo sin. Lo taem blo John, staka apostate sei man savve chus for duim sin and hem savve gohed fren witim God. Distaem tu, staka pipol garem sem tingting olsem. Staka sei olketa biliv lo God, bat olketa no agree witim tingting blo Jehovah abaotem sin, especially saed lo sex. Lo tingting blo pipol, wei for homosexual or olketa narafala wei for duim sex wea Jehovah ting lo hem olsem wanfala sin, olketa sei hem laef blo man wanwan or hem samting wea man seleva nao bae disaedem. w20.07 22 ¶7-8

Iumi laek for story kaen abaotem olketa spiritual sista blo iumi. Tingim disfala example, maet staka taem wanfala sista wea hasband blo hem no Witness arrive leit lo olketa meeting and bihaen meeting hem go bak kwiktaem. Olketa narawan lo kongregeson no lukim hem tekem kam olketa pikinini blo hem lo meeting evritaem. So olketa maet story abaotem hem and sei, why nao hem no talem hasband blo hem for letem olketa pikinini kam lo meeting. Bat sista blo iumi duim nomoa wanem hem fit for duim. Hem no savve kontrolem evri samting lo schedule blo hem, and hasband nao garem raet for mekem disison abaotem olketa pikinini. Sapos iumi praisem datfala sista and talem olketa narawan olketa gud samting wea hem duim, iumi bae stopem narawan for tok spoelem hem. Olketa elder luksavve Jehovah laekem iumi for kaen lo olketa sista. (Jas. 1:27) So olketa elder followim example blo Jesus for kaen and minim olketa sista, no mekem olketa rul nomoa. (Matt. 15:22-28) Taem olketa elder waka hard for helpem olketa sista, datwan helpem olketa sista luksavve Jehovah and organization blo hem tingim olketa. w20.09 24-25 ¶17-19

Profet Daniel hem hambol and evritaem luk lo Jehovah for directim hem. Olsem example, taem Jehovah iusim hem for explainim dream blo Nebuchadnezzar, Daniel no sei datwan hem savve blo hemseleva. Bat hem hambol for sei Jehovah nao bihaenem diswan. (Daniel 2:26-28) Wanem nao leson for iumi? Sapos olketa brata barava laekem tok wea iumi givim or iumi garem olketa naesfala experience lo ministry, iumi laek forgivim praise lo Jehovah. Iumi laek for hambol and sei hard for iumi duim datwan sapos Jehovah no helpem iumi. (Phil. 4:13) Taem iumi garem kaen tingting olsem, iumi followim tu example blo Jesus. (John 5:19, 30) Philippi 2:6 storyim hao Jesus ‘no enitaem ting for trae tekem position bilong God for mekem hem semsem witim God.’ From Jesus hambol, hem luksavve lo wanem hem fit for duim and hem respectim position blo Dadi blo hem. w20.08 10-11 ¶12-13

Samfala wea ran lo road for laef deal witim problem wea maet olketa narawan no savve abaotem or minim. Sapos iu no fit for duim staka samting nao and feel olsem olketa narawan no minim iu, example blo Mephibosheth maet encouragem iu. (Mektu Samuel 4:4) Mephibosheth mas deal witim sik blo hem, and hao King David no minim hem. Olketa problem wea kasem Mephibosheth hem no bikos hem duim eni rong samting, bat hem no letem datwan for mekem hem feel nogud. Hem tinghae lo olketa gud samting wea hem kasem lo laef blo hem. And hem tinghae lo kaenfala fasin wea David showim lo hem bifor. (Mektu Samuel 9:6-10) So taem David treatim hem nogud, Mephibosheth luksavve David mistek and no letem datwan for mekem hem feel nogud. And hem no blamem Jehovah for wanem David duim tu. Mephibosheth tingim nomoa wanem hem savve duim for sapotim king wea Jehovah nao appointim. (Mektu Samuel 16:1-4; 19:24-30) Jehovah putim example blo Mephibosheth lo Bible mekem iumi savve lane from datwan.—Rome 15:4. w20.04 26 ¶3; 30 ¶18-19

Maet samfala lo kongregeson kasem appointment for serve olsem missionary, spesol pioneer, or regular pioneer. Olketa mekem preaching waka kamap full-taem waka blo olketa. Nomata olketa hia wea duim full-taem service maet garem tu-thri material samting nomoa, Jehovah barava blessim olketa. (Mark 10:29, 30) Iumi tinghae lo olketa brata and sista olsem, and iumi barava hapi olketa part lo kongregeson! Waswe, olketa appointed brata and olketa wea duim full-taem ministry nomoa garem ples insaed kongregeson? Nomoa! Evri pablisa blo gud nius important lo God and lo kongregeson. (Rome 10:15; 1 Cor. 3:6-8) Diswan hem bikos main goal blo kongregeson hem for helpem pipol kamap disaepol blo Lord blo iumi, Jesus Christ. (Matt. 28:19, 20; 1 Tim. 2:4) Evriwan insaed kongregeson, nomata sapos olketa baptaes or anbaptaes pablisa, olketa trae for mekem disfala waka for kamap main samting lo laef blo olketa.—Matt. 24:14. w20.08 21 ¶7-8

Olsem toktok blo text for tuday showimaot, taem iumi feisim olketa challenge, Jesus savve helpem iumi. Toktok blo hem savve strongim iumi. Why? Bikos samfala taem iumi faendem hem no isi for deal witim wanfala samting. Olsem example, taem samwan wea iumi lovem hem dae, iumi no deal witim datfala pain for samfala day nomoa bat maet for samfala year. Olketa narawan mas deal witim olketa hard samting wea kasem olketa olo. And olketa narawan, samfala taem faendem hem hard for deal witim feeling for sorre. Nomata olsem, taem iumi savve Jesus stap witim iumi evriday, datwan savve strongim iumi for feisim olketa barava hard taem lo laef. (Matt. 11:28-30) Bible promisim iumi hao Jehovah iusim olketa angel blo hem for helpem iumi. (Heb. 1:7, 14) Olsem example, olketa angel sapotim and gaedem iumi taem iumi talemaot disfala “gud nius abaotem Kingdom” lo pipol blo “evri kantri, tribe, and languis.”—Matt. 24:13, 14; Rev. 14:6. w20.11 13-14 ¶6-7

Iumi laekem Bible study blo iumi for luksavve wanem hem lanem hem kam from Bible. (1 Thess. 2:13) Hao nao iumi savve duim datwan? Encouragem student for storyim wanem hem lanem. Winim wei for iumi explainim olketa Bible verse, iumi savve askem hem for explainim wanem hem lanem. Helpem student for luksavve hao wei for followim Bible savve helpem hem lo laef blo hem. Askem olketa kwestin wea bae helpem hem for talemaot tingting blo hem abaotem scripture wea hem readim. (Luke 10:25-28) Olsem example, iumi savve askem hem: “Wanem nao wanfala wei blo Jehovah iu lukim lo disfala scripture?” “Hao nao disfala truth lo Bible savve helpem iu?” “Wanem nao tingting blo iu abaotem wanem iu just lanem?” Important samting hem for Bible study tinghae lo wanem hem lanem and laek followim. Iusim Bible for teachim hem. For kamap moabeta lo hao iu teach, iu mas hambol. w20.10 15 ¶5-6

Iumi barava sure waka for preachim Kingdom bae finis lo barava taem and bae no delay. Tingim wanem hem happen lo taem blo Noah. Jehovah showimaot hem barava followim taem. Samting olsem 120 year bifor Flood hem kam, Jehovah talem taem wea Flood bae start. Samting olsem 40 or 50 year bifor datfala Flood, Jehovah talem Noah for buildim ark and Noah gohed waka hard for duim datwan. Nomata staka pipol no interest, Noah talem warning message go kasem taem Jehovah sei for go insaed lo ark. Then, lo barava taem wea Jehovah markem, “hemi satem doa.” (Jenesis 6:3; 7:1, 2, 16) Klosap nao Jehovah bae sei hem taem for preaching waka for finis, and bae “hemi satem doa” lo olketa nogud samting lo world blo Satan. Then wanfala raeteous niu world bae start. Go kasem datfala taem, iumi laek followim example blo Noah and olketa narawan wea waka hard. Iumi laek for busy lo preaching waka, gohed patient, and garem strongfala faith lo Jehovah and olketa promis blo hem. w20.09 13 ¶18-19

Sapos Jehovah no markem samfala for hed blo olketa narawan, famili blo hem bae no hapi and evri samting bae olobaot. For example, sapos no eniwan hed lo famili, bae evriwan lo famili no savve hu nao shud disaedem samting, and hu nao shud organizem samting wea olketa disaedem. Hem shud gud samting for hasband hem hed blo famili, bat why nao staka waef sei hasband bossim and raf lo olketa? Bikos staka hasband no followim standard blo Jehovah, bat followim kastom or culture blo olketa. Or maet wanfala hasband treatim nogud waef blo hem for showimaot lo waef and olketa narawan, hem nao boss lo famili blo hem. From hem savve bae hem hard for waef lovem hem, so hem tingse sapos waef fraet lo hem, bae hem isi nao for hem kontrolem waef blo hem. Hem no stret for man garem datkaen tingting and for treatim woman lo nogud wei. Datwan no showimaot respect and againstim wanem Jehovah laekem.—Eph. 5:25, 28. w21.02 3 ¶6-7

Taem iu warim wanfala samting, iu savve prea lo Jehovah for helpem iu. Then, Jehovah savve givim iu datfala “peace bilong God wea winim nao wanem man savve minim.” (Phil. 4:6, 7) Jehovah bae iusim holy spirit blo hem for helpem iu for no wari tumas. (Gal. 5:22) Taem iu garem wanfala problem, prea lo Jehovah and storyim evri samting lo hem. Storyim hao datwan mekem iu wari. Sapos iu fit for stretem datfala problem, askem Jehovah for wisdom and strong for duim datwan. Sapos hem hard for stretem datfala problem, askem Jehovah for helpem iu for no wari tumas. Taem iu talem Jehovah wanem iu needim, bae hem isi for luksavve hao Jehovah ansarem olketa prea blo iu. So gohed for prea, nomata iu no kasem ansa kwiktaem. Jehovah laekem iu for talem hem wanem iu needim, and gohed for askem hem.—Luke 11:8-10. w21.01 3 ¶6-7

Insaed lo olketa kongregeson distaem, iumi garem olketa famili and olketa hasband and waef. Bat iumi garem tu, staka brata and sista wea no marit. Hao nao iumi shud ting lo olketa hia wea singol? Hem gud for savve lo tingting blo Jesus abaotem olketa wea singol and followim example blo hem. Taem Jesus stap lo earth, hem no marit. From hem singol datwan mekem hem garem staka taem for duim moa samting lo assignment blo hem. No enitaem Jesus teachim hao man mas marit or hem mas gohed singol. Bat hem sei samfala Christian chus for no marit. (Matt. 19:12) Jesus respectim olketa wea no marit. Hem no ting daonem singol pipol or tingse olketa missim samfala samting bikos olketa no marit. Olsem Jesus, aposol Paul gohed singol taem hem duim ministry blo hem. No enitaem Paul teachim hao hem rong for wanfala Christian for marit. Hem luksavve diswan hem disison blo man wanwan. w20.08 28 ¶7-8

Aposol John laef for longtaem and garem staka interesting experience. Hem kasem staka hard taem wea testim faith blo hem. Bat hem evritaem traem best for obeyim olketa law blo Jesus, olsem for lovem olketa nara Christian. From datwan, Jehovah and Jesus lovem hem and strongim hem for winim olketa hard taem. (John 14:15-17; 15:10) Satan and pipol wea hem iusim no savve stopem John for talem and duim samting for showimaot hem lovem olketa nara Christian. Iumi tu olsem John wea stap lo world blo Satan, datfala man wea no lovem eniwan. (1 John 3:1, 10) Satan laekem iumi for no lovem olketa brata and sista, bat iumi mas no letem hem for duim datwan. Iumi laek for gohed lovem olketa brata and sista, and showimaot datwan lo wanem iumi talem, and lo wanem iumi duim. Diswan bae mekem iumi hapi from iumi barava insaed lo famili blo Jehovah.—1 John 4:7. w21.01 13 ¶18-19

From Satan kontrolem disfala world, datwan savve mekem staka hard samting for kamap lo laef blo iumi. (2 Tim. 3:1) Bat iumi no need for wari or fraet. Jehovah hem savve lo olketa hard samting wea iumi deal witim. Taem iumi needim help, hem promis for strongim iumi. (Aesaea 41:10, 13) Iumi sure Jehovah bae iusim Bible for strongim iumi for winim eni hard taem. Olketa video and olketa Bible Reading Drama lo website garem sekson “Followim Faith blo Olketa Faithful Man and Woman.” Bifor iu lisin, lukim, or readim eni story hia, askem Jehovah for helpem iu for luksavve lo samfala point wea iu savve followim. Tingim iu nao datfala man wea iu read abaotem. Ting raonem wanem datfala faithful man hem duim and hao Jehovah helpem hem for deal witim hard taem wea hem kasem. Then duim samting followim wanem iu lanem. Talem thankiu lo Jehovah from hem evritaem helpem iu. And tu, iu savve showimaot iu tinghae lo datfala help taem iu encouragem and sapotim olketa narawan. w21.03 19 ¶22-23

Sapos iu marit and iu laek for garem pikinini, iutufala savve tingim diswan: ‘Waswe, mitufala hambol and garem spiritual tingting mekem mitufala for lukaftarem gud pikinini?’ (Sams 127:4) Sapos iu garem pikinini finis tingim diswan: ‘Waswe, mi teachim pikinini blo mi for luksavve hem important for waka hard?’ (Eklesiastes 3:12, 13) ‘Waswe, mi traem best for helpem pikinini luksavve lo olketa nogud samting wea savve spoelem hem?’ (Provebs 22:3) Hem hard for iu protectim pikinini from evri challenge wea hem maet feisim. Bat iu savve helpem hem for deal witim olketa problem taem iu teachim hem hao hem savve kasem gudfala advaes lo Bible. (Provebs 2:1-6) Olsem example, sapos wanfala relative stop for worshipim Jehovah, helpem pikinini for luksavve why hem important for gohed faithful lo Jehovah. (Sams 31:23) Or sapos samwan wea iufala lovem hem dae, showim pikinini hao for kasem advaes lo Bible for deal witim sorre and for garem peace.—2 Cor. 1:3, 4; 2 Tim. 3:16. w20.10 27 ¶7