November

From iumi no savve lo evri samting abaotem Jonah, maet iumi tingse hem no faithful. Jonah kasem klia komand from Jehovah for go talemaot judgment message lo Nineveh. Bat winim wei for obey, Jonah go insaed wanfala ship wea go lo opposite direction, hem “ranawe from [Jehovah].” (Jona 1:1-3) Sapos iu nao Jehovah, waswe, bae iu still givim nara chance lo Jonah for duim datfala assignment? Maet nomoa. Bat, Jehovah luksavve Jonah fit for kasem nara chance moa. (Jona 3:1, 2.) Toktok wea Jonah talem lo prea blo hem showimaot wanem kaen man nao hem. (Jona 2:1, 2, 9) Prea hia helpem iumi for luksavve Jonah hem hambol, savve tinghae, hem and disaed strong for obeyim Jehovah. Dastawe, Jehovah no tingim nomoa wanem Jonah duim taem hem ranawe, bat hem ansarem prea blo hem, and hem gohed for iusim hem olsem wanfala profet! Dastawe, hem barava important for olketa elder tu herem firstaem full story bifor olketa givim kaonsel! w20.04 15 ¶4-6

Olketa disaepol lo first century acceptim olketa Christian teaching and depend lo holy spirit blo God for helpem olketa for minim gud Bible. Olketa duim research for sure hao olketa teaching hia kam from Word blo God. (Acts 17:11, 12; Heb. 5:14) Faith blo olketa hem no depend lo tingting and feeling blo olketa nomoa, or from olketa hapi taem olketa associate witim olketa brata and sista. Bat, faith blo olketa hem strong bikos lo stretfala savve olketa kasem abaotem God.(Col. 1:9, 10.) Olketa truth lo Bible no savve change. (Sams 119:160) Olsem example, nomata wanfala brata or sista mekem iumi feel nogud or duim wanfala serious sin, datwan no changem olketa truth lo Bible. And olketa truth hia no savve change tu nomata taem iumi kasem olketa hard taem. So datwan minim iumi need for barava savve gud lo wanem Bible teachim and mas barava bilivim hem tru. Olsem hao wanfala anka savve helpem wanfala boat for gohed stedy lo taem blo big wind, taem iumi garem strong faith lo olketa tru teaching lo Bible bae iumi stedy nomata taem iumi kasem olketa test. w20.07 9 ¶6-7

Taem iumi duim samting for olketa anointed brata blo Jesus, hem ting lo datwan olsem iumi duim for hem. (Matt. 25:34-40) Main wei wea iumi sapotim olketa anointed, hem for helpem pipol kamap disaepol, wea Jesus talem olketa follower blo hem for duim. (Matt. 28:19, 20) For olketa brata blo Christ finisim disfala big waka for preach evriwea lo world, olketa needim help blo “olketa nara sheepsheep.” (John 10:16) Sapos iu wanfala lo olketa, each taem iu share insaed disfala waka, iu showimaot iu lovem olketa anointed and Jesus tu. And tu, iumi fren witim Jehovah and Jesus taem iumi iusim selen blo iumi for sapotim waka blo tufala. (Luke 16:9) Olsem example, iumi savve givim contribution lo waka wea gohed evriwea lo world, wea bae helpem olketa wea disaster spoelem. Iumi savve sapotim tu kongregeson blo iumi saed lo selen and helpem eniwan wea needim help.—Provebs 19:17. w20.04 24 ¶12-13

King blo north fulfillim datfala profesi taem hem nating showimaot respect lo god wea olketa grani blo hem worshipim. Hao nao hem duim datwan? Soviet Union garem goal for finisim religion, so hem laek for aotem paoa wea olketa religion garem ovarem olketa pipol. Start kam lo 1918, Soviet gavman givim order mekem olketa skul start for teachim hao no eni God hem stap. Hao nao king blo north givim glory lo god blo olketa strongfala ples? Soviet Union spendem staka selen for garem strongfala army and for wakem staka thousand nuclear weapon for strongim paoa blo hem. Gogo, king blo north and king blo south tufala evriwan garem olketa strongfala weapon wea savve killim dae staka billion pipol! samting wea king blo north sapotim king blo south for duim, hem nao for setimap datfala “barava rabis samting wea spoelem evri samting.”—United Nations.—Dan. 11:31 NW. w20.05 6 ¶16-17

Hu nao savve helpem olketa wea inactive? Iumi evriwan. Olketa elder, pioneer, famili member, and olketa pablisa lo kongregeson savve help for lukaotem olketa wea inactive. Waswe, iu garem wanfala fren or relative wea inactive? Waswe, iu meetim eniwan wea inactive taem iu go lo haos-tu-haos or lo pablik witnessing? Iu savve talem hem sapos hem laekem elder for visitim hem, iu hapi for givim phone namba blo hem lo olketa elder. Wanfala elder wea nem blo hem Thomas sei: “Mi savve askem olketa brata and sista sapos olketa savve wea nao samfala inactive wan stap distaem. Or mi savve askem olketa pablisa sapos olketa savve tingim eniwan wea no savve kam lo olketa meeting. Taem mi visitim inactive brata or sista, mi savve ask abaotem pikinini blo olketa and olketa nara relative. Samfala lo olketa wea inactive garem olketa pikinini wea kam lo olketa meeting bifor, and samfala wea pablisa bifor. So olketa tu savve kasem help for kam bak lo Jehovah.” w20.06 24 ¶1; 25 ¶6-7

Iumi olketa man difren from olketa animal bikos iumi savve lane abaotem wanem hem stret or no stret taem iumi rememberim and ting raonem samting wea happen lo laef blo iumi. Datwan bae helpem iumi for garem olketa gudfala wei and changem tingting and olketa nogud wei blo iumi. (1 Cor. 6:9-11; Col. 3:9, 10) Iumi savve trainim konsens blo iumi for luksavve lo wanem hem stret and no stret. (Heb. 5:14) Iumi savve lane for showimaot love, kaen, mercy, and justice. Wanfala wei for showimaot iumi tinghae lo memory blo iumi, hem taem iumi chus for rememberim olketa taem wea Jehovah helpem and comfortim iumi. Datwan bae helpem iumi for sure hem bae helpem iumi lo future tu. (Sams 77: 12; 78:4, 7) Iumi laek for rememberim tu olketa gud samting wea nara pipol duim for iumi, and for tinghae lo wanem olketa duim. Olketa wea duim research faendaot hao pipol wea garem wei for tinghae, olketa hapi winim olketa wea no savve tinghae. w20.05 23-24 ¶12-13

Tingim feeling blo Moses taem hem haed insaed wanfala smol cave and hem lukim vision blo glory blo Jehovah. Insight on the Scriptures storyim hao “luk olsem experience blo Moses winim eni nara samting wea man experiencem go kasem taem Jesus Christ kam lo earth.” Moses herem disfala toktok, wea maet wanfala angel nao talem: “Mi [Jehovah] nao mi God. Oltaem mi save sore long pipol, an mi kaen tumas long olketa. Mi no save kros kuiktaem, an oltaem mi gohed fo lavem pipol blong mi an tinghevi tumas long olketa. Mi gohed fo barava lavem olowe olketa pipol blong mi, wetem olketa hu bae i bon kam bihaen long olketa go-go kasem plande taosen yia. Mi save fogivim olketa sapos olketa duim olketa ravis samting.” (Eksodas 33:17-23; 34:5-7) Maet evritaem Moses iusim nem blo Jehovah bihaen datwan, hem ting go bak lo wanem hem happen. Olsem lo toktok lo text blo tuday, taem iumi tingim datfala nem Jehovah, hem gud for ting raonem tu olketa wei blo hem, olsem paoa, wisdom, justice, and love. Datwan bae muvim iumi for barava respectim hem.—Sams 77:11-15. w20.06 8-9 ¶3-4

Jesus sei pipol bae luksavve lo olketa disaepol blo hem from love wea olketa garem for each other. (John 13:34, 35) Bat iumi needim moa samting mekem iumi garem strongfala faith. Why nao olsem? Waswe sapos nara brata or sista, maet wanfala elder or pioneer, hem duim serious sin? Or waswe sapos wanfala brata or sista duim samting wea mekem iu feel nogud? Or maet samwan kamap apostate and sei wanem iumi bilivim hem no tru. Sapos samting olsem happen, waswe, bae iu stambol and stop for worshipim Jehovah nao? Point nao hem olsem: Sapos faith blo iu lo God hem depend nomoa lo wanem olketa narawan duim, and hem no bikos iu fren gud witim God, bae faith blo iu hem no strong. Faith blo iu hem olsem wanfala haos. Iu shud no wakem nomoa lo olketa material wea no strong, olsem olketa feeling and tingting blo iu nomoa, bat iu need for wakem lo olketa strong material olsem olketa tru teaching and gudfala tingting. Iu need for pruvim lo iuseleva hao Bible teachim iumi truth abaotem Jehovah.—Rome 12:2. w20.07 8 ¶2-3

Staka experience pruvim hao olketa angel helpem iumi for faendem olketa wea inactive wea laek for kam bak lo Jehovah. (Rev. 14:6) Olsem example, Silvio from Ecuador, prea and askem Jehovah for helpem hem kam bak lo kongregeson. Taem hem gohed prea yet doorbell lo haos blo hem krae. Tufala elder kam visitim hem and sei tufala hapi for duim samting for helpem hem. Bae iumi hapi tumas for helpem olketa wea wik lo spiritual wei for kam bak lo Jehovah. Tingim wanem Salvador, wanfala pioneer wea traem best for helpem olketa inactive, hem talem: “Samfala taem, mi hapi gogo mi laek krae nao. Mi hapi tumas taem mi tingim hao Jehovah laek sevem sheepsheep blo hem from world blo Satan and hao mi garem privilege for waka tugeta witim Hem for duim datwan.” Sapos iu inactive distaem, tingim hao Jehovah hem still lovem iu. Jehovah hem gohed lukluk for iu kam bak, and hem bae hapi tumas for welkamim iu bak. w20.06 29 ¶16-18

From Jehovah hem nambawan teacher hem provaedem staka example lo Bible for teachim iumi. (Aesaea 30:21) Iumi savve lanem staka samting taem iumi ting raonem wanem hem happen lo olketa wea followim olketa gudfala wei blo God. And tu, bae iumi lane from olketa wea no showimaot olketa gudfala wei tu. (Sams 37:37; 1 Cor. 10:11) Tingim samting wea happen lo King Saul. Taem hem young hem hambol. Hem luksavve lo wanem hem fit for duim, so hem hol bak for duim samfala big responsibility. (Fas Samuel 9:21; 10:20-22) Bat Saul kamap praod no longtaem bihaen hem kamap king. Wantaem hem no patient for weitim profet Samuel and hem offerim wanfala sakrifaes wea hem no garem raet for duim. From datwan, Jehovah no hapi lo hem and no laekem hem for gohed rul. (Fas Samuel 13:8-14) Iumi wise sapos iumi lane from disfala warning example and stap klia from wei for praod. w20.08 10 ¶10-11

Jehovah givim “olketa man olsem present” for kongregeson blo Hem. (Eph. 4:8) Olketa brata hia hem olketa member blo Governing Body, olketa helper blo Governing Body, olketa Branch Komiti member, circuit overseer, instructor blo olketa skul, and olketa elder and ministerial servant lo kongregeson. Jehovah iusim holy spirit for appointim olketa brata hia for lukaftarem olketa sheepsheep blo Jehovah and for strongim kongregeson. (1 Pet. 5:2, 3) Olketa brata hia garem olketa didifren responsibility. Olsem olketa hand and leg waka tugeta for helpem full body, olketa brata wea holy spirit appointim waka hard for helpem full kongregeson. Olketa no duim samting for olketa narawan praisem olketa, bat for strongim olketa brata and sista. (1 Thess. 2:6-8) Iumi thankiu lo Jehovah from hem givim olketa spiritual man hia wea no tingim olketa seleva! w20.08 21 ¶5-6

Samting wea mekem iumi laek for preach hem from iumi luksavve staka pipol olsem sheepsheep wea “garekil and stap olobaot” and barava need for lanem truth abaotem Kingdom. (Matt. 9:36) Jehovah laekem evriwan for sev and for garem stretfala savve abaotem olketa tru teaching. (1 Tim. 2:4) Iumi laek for duim disfala preaching waka, taem iumi tingim hao datwan savve sevem laef blo pipol. (Rome 10:13-15; 1 Tim 4:16) Iumi need for garem olketa stretfala tul for waka blo iumi, and for savve hao for iusim gud olketa. Jesus talem olketa disaepol blo hem wanem for storyim, wea for preach, and wanem for tekem. (Matt. 10:5-7; Luke 10:1-11) Distaem, organization blo Jehovah provaedem Teaching Toolbox wea garem olketa tul iumi needim for duim gud waka blo iumi. And iumi kasem training lo hao for iusim olketa tul hia. Datfala training helpem iumi for no fraet and for savve gud hao for duim waka blo iumi.—2 Tim. 2:15. w20.09 4 ¶6-7, 10

Masbi aposol John barava hapi taem hem herem olketa wea hem helpem for savve lo truth gohed faithful for servem Jehovah. Olketa feisim staka problem, and John waka hard for strongim faith blo olketa from hem ting lo olketa olsem pikinini blo hem. Iumi tu hapi tumas taem wanfala pikinini blo iumi or wanfala spiritual pikinini blo iumi, hem dedicatem hemseleva lo Jehovah and gohed worshipim hem. (3 John 3) Lo samting olsem 98 C.E., holy spirit blo Jehovah muvim John for raetem thrifala leta. for encouragem olketa faithful Christian for gohed strongim faith blo olketa lo Jesus and for gohed wakabaot followim truth. John warim hao olketa false teacher affectim kongregeson. (1 John 2:18, 19, 26) Olketa apostate hia sei olketa savve lo God, bat olketa nating obeyim Jehovah. w20.07 20 ¶1-3

From iumi bilivim message wea iumi preachim, iumi sharem datwan witim evriwan. Iumi trustim olketa promis blo God wea stap lo Bible. (Sams 119:42; Aesaea 40:8) Iumi lukim olketa Bible profesi fulfill distaem. Iumi lukim pipol changem laef blo olketa taem olketa start for followim olketa samting lo Bible. Diswan mekem iumi luksavve hem important for evriwan herem gud nius abaotem Kingdom. Iumi garem faith lo Jehovah, wea givim kam message iumi preachim, and lo Jesus, wea Jehovah markem for King blo Kingdom blo Hem. Nomata wanem hard samting iumi feisim, Jehovah bae strongim iumi. (Sams 46:1-3) Nara samting, iumi sure Jesus gohed directim disfala preaching waka from heven, and hem iusim paoa wea Jehovah givim hem for duim datwan. (Matt. 28:18-20) Faith mekem iumi trustim Jehovah bae blessim evri waka wea iumi duim. w20.09 12 ¶15-17

Olketa sista maet needim samwan for helpem olketa taem olketa feisim samfala challenge. (Aesaea 1:17) Olsem example, wanfala sista wea widow or divorce maet needim samwan for helpem hem for duim samfala waka wea hasband blo hem duim bifor. Wanfala olo sista maet needim samwan for helpem hem story lo olketa doctor. Or pioneer sista wea waka lo nara project for organization maet needim samwan for explainim datwan lo narawan wea kwestinim why hem no duim staka samting lo ministry olsem olketa nara pioneer. Tingim example blo Jesus. Hem kwiktaem defendim olketa spiritual sista blo hem taem pipol no minim gud olketa. Olsem example, hem defendim Mary taem Martha no hapi lo hem. (Luke 10:38-42) And hem defendim Mary moa taem olketa narawan tok againstim Mary and sei hem mekem nogud disison. (Mark 14:3-9) Jesus savve lo reason why Mary mekem disison and praisem hem. Jesus sei gud samting wea Mary duim bae evriwan herem “long evri ples long world wea olketa preachim datfala gud nius.” w20.09 24 ¶15-16

Wanfala gud shepherd bae luksavve hao samfala sheepsheep savve lus. And sapos wanfala sheepsheep blo hem go difren, datfala shepherd bae no raf lo hem. Tingim example wea God showimaot taem hem helpem samfala wea start for go farawe from hem. Profet Jonah ranawe from assignment blo hem. Nomata olsem, Jehovah no kwiktaem givap lo Jonah. Olsem wanfala gud shepherd, Jehovah sevem hem and helpem hem for kasem bak strong wea hem needim for fulfillim assignment blo hem. (Jona 2:7; 3:1, 2) Bihaen, God iusim wanfala botol-gourd plant for helpem Jonah luksavve lo hao important nao laef blo pipol. (Jona 4:10, 11) Wanem nao leson? Olketa elder mas no kwiktaem for givap lo olketa wea inactive bat bae trae for minim wanem mekem hem for go difren. And taem datfala sheepsheep kam bak lo Jehovah, olketa elder gohed for showimaot olketa lovem and tingim hem. w20.06 20-21 ¶10-12

Bihaen Soviet Union lusim paoa lo 1991, pipol blo God wea stap anda lo rul blo Soviet Union kamap free for lelebet taem. Daniel kolem datwan “lelebet help.” Olketa free for preach and no longtaem nomoa, namba blo olketa pablisa lo olketa kantri wea part lo Soviet Union bifor kasem staka handred thousand. Gogo, Russia and olketa kantri wea sapotim hem nao kamap king blo north. For wanfala gavman kamap king blo north or king blo south, hem mas duim thrifala samting: (1)  hem duim samting wea barava affectim pipol blo God, (2)  hem showimaot hem enemy blo Jehovah and olketa pipol blo hem, and (3) tufala king hia bae compete for paoa. Russia and olketa wea sapotim hem olketa duim samting wea barava affectim pipol blo God. Olketa banim preaching waka and persecutim staka handred thousand brata and sista blo iumi. Olketa samting hia showimaot olketa heitim Jehovah and pipol blo hem. And olketa gohed for compete witim king blo south, wea hem England-America World Paoa. w20.05 12-13 ¶3-4

Iumi laek for duim best blo iumi taem iumi teachim narawan bikos datwan savve helpem hem for kamap disaepol. Olketa Jehovah’s Witness teachim staka million pipol abaotem truth lo Bible. From iumi tinghae lo wanem iumi teachim, maet iumi laek for storystory tumas abaotem datwan. Bat nomata iumi conductim Wastaoa Study, Kongregeson Bible Study, or Bible study, iumi shud no toktok tumas. No trae for explainim evri samting wea iumi savve abaotem olketa verse or wanfala subject, bat letem Bible nao for teach. (John 16:12) Hem gud for comparem savve wea iumi garem abaotem Bible lo taem iumi baptaes witim savve iumi garem distaem. Luk olsem lo datfala taem, iumi savve lo olketa main teaching nomoa. (Heb. 6:1) Hem tekem staka year for iumi lanem wanem iumi savve distaem, so no trae for teachim wanfala Bible study evri samting wantaem. w20.10 14-15 ¶2-4

Jehovah chusim nambawan parents for Jesus. (Matt. 1:18-23; Luke 1:26-38) Toktok blo Mary wea stap lo Bible showimaot hem barava lovem Jehovah and tinghae lo olketa Scripture. (Luke 1:46-55) And from Joseph obeyim direction blo Jehovah, datwan showimaot hem lovem God and laek for mekem hem hapi. (Matt. 1:24) Tingim, Jehovah no chusim rich pipol for kamap parents blo Jesus. Sakrifaes wea Joseph and Mary offerim bihaen Jesus born showimaot tufala poor. (Luke 2:24) Masbi olketa no garem staka samting, especially taem famili start for kamap big and for provaed for samting olsem sevenfala pikinini. (Matt. 13:55, 56) Jehovah protectim Jesus from samfala danger, bat Jehovah no protectim Son blo hem from evri challenge wea hem feisim. (Matt. 2:13-15) Olsem example, Jesus mas deal witim olketa relative wea againstim hem and no bilivim hem nao Messiah. (Mark 3:21; John 7:5) And tu, luk olsem Joseph, dadi blo Jesus, hem dae so Jesus mas deal witim sorre from datwan. w20.10 26-27 ¶4-6

Waswe, enitaem iu feel olsem no eniwan for helpem iu taem iu deal witim wanfala challenge? Staka feel olsem, nomata olketa faithful servant blo Jehovah. (Fas Kings 19:14) Sapos diswan happen lo iu, tingim promis blo Jehovah wea sei: “Bae mi nating lusim iu.” So iumi savve sure: “Jehovah nao hem helpem mi. Bae mi no fraet.” (Heb. 13:5, 6) Aposol Paul raetem olketa toktok hia for olketa brata and sista lo Judea lo samting olsem 61 C.E. Olketa toktok wea hem talem hem olsem tu toktok wea stap lo Sams 118:5-7. Olsem man wea raetem psalm, Paul savve Jehovah nao bae helpem hem bikos staka taem finis Jehovah duim datwan. Olsem example, samting olsem tufala year bifor hem raetem leta for olketa Hebrew, Paul go lo wanfala gogo wea danger tumas lo sea wea barava raf. (Acts 27:4, 15, 20) Lo datfala gogo and lo narawan bifor, Jehovah showimaot hem barava helpem Paul lo olketa didifren wei. w20.11 12 ¶1-2

Why nao hem nogud for evritaem tingim hao laef bifor hem gud winim distaem? Datwan savve mekem iumi for tingse no eni nogud samting happen bifor. Tingim example blo olketa Israelite. Taem olketa lusim Egypt, olketa kwiktaem forgetim hao laef lo there barava hard, bat olketa tingim nomoa gudfala kaikai wea olketa bin enjoyim. Olketa sei: “Long Ijip, mifala kaikaim staka fis olsem wea mifala laekem! Evritaem mifala save kaikaim kiukamba, an melen, an salat, an anian, an galik.” (Nambas 11:5) Bat waswe, olketa kaikai hia free nomoa? Nomoa, olketa slave so olketa barava waka hard mekem olketa kasem kaikai, and olketa lo Egypt treatim olketa barava nogud. (Eksodas 1:13, 14; 3:6-9) Nomata olsem, olketa Israelite forgetim olketa hard samting hia. Olketa tingim nomoa gudfala taem lo bifor winim wei for tingim olketa gud samting wea Jehovah duim for olketa. Jehovah no hapi lo kaen wei olsem.—Nambas 11:10. w20.11 25 ¶5-6

Samfala taem, maet iumi tingim hao laef short tumas and iumi “garem staka hadtaem.” (Job 14:1) Datwan savve mekem iumi wikdaon. Samfala servant blo Jehovah lo bifor feel olsem tu, and samfala laek for dae nomoa. (Fas Kings 19:2-4; Job 3:1-3, 11; 7:15, 16) Bat evritaem Jehovah God hem comfortim and strongim olketa. Story blo olketa hia stap insaed Bible for teachim and comfortim iumi. (Rome 15:4) Tingim Joseph, son blo Jacob. Joseph hem fevaret son blo dadi blo hem, bat then laef blo hem change and hem kamap slave blo wanfala bigman lo Egypt wea no worshipim Jehovah. (Jenesis 37:3, 4, 21-28; 39:1) Then waef blo Potiphar laea and sei Joseph trae for reipim hem. Potiphar no mek sure sapos datfala story hem tru, bat hem putim Joseph lo prison, and olketa chainim hem. (Jenesis 39:14-20; Sams 105:17, 18) Tru nao, hem barava fitim for Joseph feel wikdaon! w20.12 16-17 ¶1-4

Datwan nao main samting wea Jesus sei iumi shud prea for hem. Bat wanem nao disfala toktok blo Jesus minim? For mekem samting kamap holy, hem minim for mekem hem klin or pure. Bat samfala maet ting, ‘Nem blo God hem holy, pure, and klin finis, so why nao hem need for kamap holy?’ For ansarem datwan, iumi need for tingim wanem nao hem minim for garem wanfala nem. Wanfala nem hem no just wanfala word wea olketa raetem or talem nomoa. Bible sei: “Gudfala [nem], hemi gud moa winim nambawan oel wea hemi barava smel naes tumas.” (Provebs 22:1; Eklesiastes 7:1) Why nao nem hem barava important? Bikos nem blo man hem join witim hao olketa narawan ting lo hem. So hao olketa raetem wanfala nem or hao olketa talem, hem no really important, samting wea barava important nao hem wanem olketa narawan tingim taem olketa lukim or herem datfala nem. Taem pipol laea abaotem Jehovah, datwan mekem pipol ting lo hem olsem wanfala nogud man. Taem olketa duim datwan, olketa spoelem nem blo hem. w20.06 3 ¶5-7

Maet iumi barava warim samting, gogo iumi no savve tingim eni nara samting. For example, maet iumi wari nogud iumi no garem inaf selen for peim wanem iumi needim, or nogud iumi sik and no savve waka. Maet iumi wari nogud iumi no faithful taem samwan switim iumi for duim samting wea no stret. And tu, klosap nao Satan bae iusim olketa wea hem kontrolem for attakim pipol blo God, so maet iumi warim wanem iumi bae duim taem datwan hem happen. Maet iu laek savve, ‘Waswe, hem normal for warim olketa samting olsem?’ Jesus talem olketa disaepol blo hem for “no wari.” (Matt. 6:25) Waswe, Jesus minim iumi shud no warim eni samting? Nomoa, bikos samfala faithful man and woman bifor barava wari, bat Jehovah no les lo olketa. (Fas Kings 19:4) Jesus encouragem iumi for no wari. Hem no laekem iumi for warim tumas olketa samting wea iumi needim, gogo iumi no busy lo olketa spiritual samting. w21.01 3 ¶4-5

Jehovah and Jesus expectim hasband for treatim gud famili blo hem. (1 Pet. 3:7) From Jehovah Hed blo evriwan lo heven and earth, hem garem raet for mekem olketa rul for olketa lo famili blo hem, and for mek sure olketa followim olketa rul hia. (Aesaea 33:22) And tu, from Jesus hed blo kongregeson, hem garem raet for mekem olketa rul and for mek sure iumi followim. (Gal. 6:2; Col. 1:18-20) Olsem Jehovah and Jesus garem raet for disaedem samting for olketa wea stap anda lo tufala, hed blo famili garem raet for disaedem samting for famili blo hem. (Rome 7:2; Eph. 6:4) Nomata olsem, datwan garem spialaen. For example, hem shud disaedem samting followim olketa Bible principle. (Provebs 3:5, 6) Hed blo famili no garem raet for disaedem eni samting for olketa wea no insaed famili blo hem. (Rome 14:4) And tu, dadi no hed blo pikinini wea big finis and muv aot from haos, nomata olsem, pikinini bae gohed for respectim dadi.—Matt. 19:5. w21.02 2-3 ¶3-5

Taem wanfala dadi provaedem wanem famili needim datwan showimaot hem lovem famili blo hem. Bat hem mas luksavve hem important tu for helpem famili blo hem for fren gud witim Jehovah. (Matt. 5:3) Taem Jesus hange lo post and klosap for dae, hem laek for mek sure Mary kasem wanem hem needim. Nomata Jesus deal witim bigfala pain, hem askem aposol John for lukaftarem mami blo hem. (John 19:26, 27) Wanfala brata wea garem famili maet garem staka responsibility. Taem hem waka for selen hem bae duim gud datfala waka bikos datwan hem mekhae lo Jehovah. (Eph. 6:5, 6; Titus 2:9, 10) And maet hem elder tu, so bae hem busy for encouragem olketa brata and sista, and busy lo preaching waka. Nomata olsem, hem important for hem lukaftarem spiritual saed blo waef and pikinini blo hem lo wei for evritaem duim famili worship. Famili bae barava tinghae lo dadi from hem helpem olketa for gohed fren gud witim Jehovah and hem waka hard for provaedem wanem famili needim.—Eph. 5:28, 29; 6:4. w21.01 12 ¶15, 17

Bible storyim olketa samting wea waef fit for duim, olsem for peim pis land, duim bisnis, and mek sure olketa narawan duim gud olketa waka lo haos. (Provebs 31:15, 16, 18) Waef no wanfala slave wea no garem raet for talem tingting blo hem. Hasband shud trustim waef and lisin lo olketa idea blo hem. (Provebs 31:11, 26) Taem hasband duim olketa samting hia, bae waef hapi for stap anda lo hem. Nomata Jesus savve tumas for duim staka samting, hem no tingse for stap anda lo Jehovah hem nogud samting. (1 Cor. 15:28; Phil. 2:5, 6) Olsem tu, waef wea followim example blo Jesus bae hapi for stap anda lo hasband blo hem. Hem duim datwan bikos hem lovem hasband, bat main reason hem bikos hem lovem and respectim Jehovah. Nomata sista stap anda lo hasband, sapos hasband laekem hem for duim samting wea brekem law blo God, bae sista no duim datwan. w21.02 11 ¶14-15; 12 ¶19

Taem pipol blo Jehovah kasem persecution, love for God helpem olketa for deal witim datwan. For example, taem Hae Kot blo olketa Jew talem olketa aposol for no preach olketa sei, “God nao hem ruler wea mifala mas obeyim, no olketa man.” From olketa aposol lovem God, olketa gohed for preach. (Acts 5:29; 1 John 5:3) Distaem tu, samfala gavman persecutim samfala brata, bat from olketa lovem Jehovah olketa gohed faithful. So taem pipol lo world againstim iumi, iumi no wikdaon bat iumi gohed for hapi. (Acts 5:41; Rome 5:4-5) Taem iumi studyim Bible and olketa famili member againstim iumi, datwan hem barava hard samting for deal witim. Maet olketa tingse wanem iumi lanem hem no tru, or tingse iumi karangge from iumi laek studyim Bible. (Comparem Mark 3:21.) Samfala famili member maet barava treatim iumi nogud. Iumi expectim kaen samting olsem for happen bikos Jesus sei: “Bae enemy bilong man nao olketa wea stap long sem haos witim hem.”—Matt. 10:36. w21.03 21 ¶6-7

Taem iumi go witim wanfala pablisa lo Bible study blo hem, lisin gud taem conductor and Bible study story tugeta. Datwan bae mekem iu luksavve lo stret taem for iu story. Hem gud for no story tumas, no katem story blo conductor, and no storyim difren subject. Taem iu iusim tokpiksa, kwestin, or talem short koment datwan savve mekem wanfala point klia. Maet samfala taem iu no garem eni samting for storyim. Bat taem iu showimaot iu tinghae lo datfala Bible study and praisem hem, datwan savve encouragem hem for gohed study. Sapos fitim, iu savve story for lelebet taem abaotem hao iu kam insaed lo truth, or hao iu winim wanfala hard samting, or hao Jehovah helpem iu for deal witim samting. (Sams 78:4, 7) Experience blo iu savve encouragem Bible study. Maet hem strongim faith blo hem and encouragem hem for gohed studyim Bible. w21.03 10 ¶9-10

Taem Bible study blo iumi gohed gud, hu nao bihaenem datwan? Paul ansarem datfala kwestin taem hem storyim kongregeson lo Corinth: “Mi plantim seed, Apollos hem watarem, bat God nao mekem hem for grow. So man wea plantim seed and man wea watarem datwan, tufala no important. God nao important from hem nao mekem datfala seed for grow.” (1 Cor. 3:6, 7) Olsem Paul talem, iumi shud evritaem givim praise lo Jehovah for eni gud samting wea iumi kasem lo ministry. Hao nao iumi showimaot iumi tinghae lo privilege for “waka tugeta” witim God, Christ, and olketa angel? (2 Cor. 6:1) Iumi duim datwan taem iumi duim best for lukaotem chance for sharem gud nius witim narawan. Iumi no plantim olketa seed blo truth nomoa bat iumi mas watarem tu. Taem samwan showimaot interest, iumi laek for duim best for go bak lo hem. Taem wanfala Bible study gohed gud, iumi hapi taem iumi lukim hao Jehovah helpem datfala Bible student for changem olketa wei blo hem. w20.05 30 ¶14, 16-18