October

Taem iumi savve gud lo Jesus, iumi bae followim hao hem ting lo samting, and fren gud witim hem. Hao nao iumi savve followim wei blo Jesus? Tingim wanfala example. Jesus laek for helpem olketa narawan winim wei for tingim hemseleva. (Matt. 20:28; Rome 15:1-3) From hem garem datkaen tingting, hem willing for helpem narawan and forgivim narawan. Hem no kwiktaem feel nogud lo wanem nara pipol talem abaotem hem. (John 1:46, 47) Hem no tingim olowe mistek wea narawan duim. (1 Tim. 1:12-14) Jesus sei: “Sapos iufala lovem iufala evriwan, pipol bae savve iufala olketa disaepol bilong mi.” (John 13:35) Hem gud for iumi tingim disfala kwestin: “Waswe, mi followim example blo Jesus lo wei for duim wanem mi fit for duim for keepim peace witim olketa brata and sista?” w20.04 24 ¶11

Nomata disfala world hem fulap lo savve laea and tok spoelem nem blo Jehovah, iu garem chance for talemaot dat Jehovah hem holy, raeteous, duim gud samting, and showimaot love. Iu savve sapotim rul blo hem. Iu savve talemaot hao wei blo hem for rul nomoa hem stret and hao datfala rul nomoa bae mekem evri samting wea hem creatim for kasem peace and hapi. (Sams 37:9, 37; 146:5, 6, 10) Tingim nara important samting wea iumi savve duim. Taem iumi teachim truth from Bible lo olketa narawan, staka taem iumi mekhae lo rul blo God, hao Jehovah nomoa garem raet for rulim full universe, and datwan hem barava tru. Bat, taem iumi teachim olketa law blo God, main goal blo iumi hem for helpem pipol for lovem Dadi blo iumi Jehovah, and for faithful lo hem. For duim datwan, iumi need for mekhae lo olketa gudfala wei blo Jehovah thru lo wei for storyim wanem kaen Man nao hem. (Aesaea 63:7) Sapos iumi teach lo wei olsem, iumi bae helpem olketa narawan for lovem Jehovah and for obeyim hem bikos olketa laek for faithful lo hem. w20.06 6 ¶16; 7 ¶19

Jehovah designim brain blo iumi lo barava nambawan wei. Taem iumi insaed bele blo mami, brain blo iumi gohed grow followim wanfala plan wea set finis, and evri minute staka thousand niu brain cell hem form! Olketa wea duim research sei hao brain blo wanfala adult hem garem klosap 100 billion spesol cell wea olketa kolem lo neuron wea join tugeta and formimap brain blo iumi. Weight blo brain samting olsem 1.5 kilogram. Brain savve duim samting wea spesol tumas. Brain kontrolem samting olsem 100 masol lo tongue, throat, lips, jaw, and chest mekem iumi savve toktok. For talem klia olketa word, evri masol hia mas muv tugeta followim stret taeming. Wanfala research lo 2019 storyim hao olketa baby wea just bon savve kwiktaem for heresavve lo olketa word. Datwan sapotim wanem staka nara research talem. Olketa sei iumi bon kam witim disfala wei for heresavve and lanem languis. Tru nao, wei wea iumi savve toktok hem present from God. w20.05 22-23 ¶8-9

Abraham willing for lusim gudfala laef blo hem lo taon blo Ur, bikos hem willing for weitim “datfala taon wea garem strongfala faondeson.” (Heb. 11:8-10, 16) Datfala taon wea Abraham weitim, hem Kingdom blo God. Jesus Christ and 144,000 anointed Christian insaed lo datfala Kingdom. Paul sei datfala Kingdom hem “wanfala taon bilong datfala God wea laef,” wea hem nao “Jerusalem long heven.” (Heb. 12:22; Rev. 5:8-10; 14:1) Jesus teachim olketa disaepol blo hem for prea for datfala Kingdom, and ask for Kingdom duim samting lo earth olsem hem duim lo heven. (Matt. 6:10) Waswe, Abraham savve lo evri samting abaotem hao datfala Kingdom blo God bae setap? Nomoa. For staka handred year olketa information hia hem wanfala “holy secret.” (Eph. 1:8-10; Col. 1:26, 27) Bat Abraham savve samfala lo olketa pikinini blo hem bae kamap king bikos Jehovah promisim datwan lo hem.—Jenesis 17:1, 2, 6. w20.08 2-3 ¶2-4

Iumi mas rejectim olketa teaching blo olketa apostate. From taem wea Christian kongregeson start, Devil hem iusim apostate for mekem olketa faithful servant blo God for daot. So hem important for iumi luksavve lo wanem hem tru and wanem hem no tru. Olketa savve iusim Internet or social media for mekem iumi no trustim Jehovah and no lovem olketa brata and sista blo iumi. Bat tingim, Satan nao bihaenem olketa laea olsem, and then iumi mas rejectim olketa laea hia! (1 John 4:1, 6; Rev. 12:9) For helpem iumi strong for againstim olketa attak blo Satan, iumi need for strongim trust lo Jesus and for sure Jehovah iusim hem for duim waka blo hem. And tu, iumi need for trustim pipol wea Jehovah iusim for leadim iumi distaem. (Matt. 24:45-47) Samting wea bae strongim faith blo iumi hem for evritaem studyim Bible. Then faith blo iumi bae olsem wanfala tree wea garem rut wea go deep insaed lo graon. Aposol Paul tu iusim sem example for strongim point blo hem taem hem raetem toktok lo text for tuday. w20.07 23-24 ¶11-12

From iumi no perfect, hem isi for kwiktaem judgem olketa narawan followim wanem iumi lukim. (John 7:24) Bat iumi savve lelebet samting nomoa abaotem samwan from wanem iumi lukim. Olsem example, wanfala doctor wea garem big savve bae hard for savve gud lo sik blo wanfala man sapos hem lukluk nomoa lo hem. Doctor hia mas faendaot abaotem medical history blo datfala sikman, hu nao hem, feeling blo hem, so hem mas lisin gud lo hem. Doctor maet sendem hem tu for x-ray for lukim insaed lo body. Sapos doctor no duim datwan, hem maet givim rong treatment. Lo sem wei tu, iumi hard for savve gud lo olketa brata and sista blo iumi sapos iumi depend nomoa lo wanem iumi lukim. Iumi mas traem best for barava minim gud hu nao olketa. Hem tru, iumi no savve readim heart blo pipol. Nomata olsem, iumi savve traem best for followim example blo Jehovah. Hem lisin lo olketa wea worshipim hem. Hem minim situation and background blo olketa. And hem tingim olketa. w20.04 14-15 ¶1-3

Iumi need for hambol bikos olketa wea praod no savve “garem gudfala tingting.” Pipol wea praod savve raoa and laek winim narawan. Wanem olketa duim savve mekem olketa seleva and narawan for feel nogud. Sapos olketa no changem tingting blo olketa, bae Satan blindim mind blo olketa. (2 Cor. 4:4; 11:3) Bat man wea hambol bae garem gudfala tingting. Hem bae luksavve olketa narawan gud winim hem lo staka difren samting. (Phil. 2:3) And hem savve “God hem againstim olketa wea praod tumas, bat hem kaen tumas long olketa wea hambol.” (1 Pet. 5:5) Olketa wea garem gudfala tingting no laek for kamap enemy blo Jehovah. So for gohed hambol, iumi mas followim disfala kaonsel lo Bible for ‘lusim old wei blo iumi and iumi mas garem niufala wei wea God hem givim.’ Iumi need for studyim example blo Jesus and trae for barava followim datwan.—Col. 3:9, 10; 1 Pet. 2:21. w20.07 7 ¶16-17

Hem nambawan privilege for insaed lo kongregeson! Iumi insaed lo spiritual paradaes wea fulap lo pipol wea garem peace and hapi. Wanem nao waka blo iu insaed kongregeson? Aposol Paul sei kongregeson hem olsem wanfala body. Hem comparem each wan insaed kongregeson olsem olketa didifren part blo body. (Rome 12:4-8; 1 Cor. 12:12-27; Eph. 4:16) Wanfala leson wea iumi savve lanem from tokpiksa blo Paul hem abaotem hao each wan lo iumi hem important lo Jehovah. Paul sei: “Body bilong iumi garem staka part, bat evri part duim difren waka. Long sem wei tu, nomata iumi staka, iumi wanfala body nomoa wea wan mind witim Christ and wea iumi evriwan depend long narawan.” (Rome 12:4, 5) Wanem nao Paul minim? Each wan lo iumi garem didifren waka insaed kongregeson, bat iumi evriwan important. w20.08 20 ¶1-2; 21 ¶4

Olketa parents, hao nao iu savve followim example blo Jehovah for hambol? Hem gud for askem olketa pikinini samfala taem wanem nao tingting blo olketa lo hao for duim wanfala samting. And sapos fitim, iu savve followim idea blo olketa. Jehovah showimaot gudfala example lo diswan taem hem patient witim olketa wea kwestinim disison blo hem. Hem lisin taem Abraham storyim olketa wari blo hem abaotem disison blo Jehovah for distroem Sodom and Gomorrah. (Jenesis 18:22-33) And tingim hao Jehovah treatim Sarah, waef blo Abraham. Jehovah no feel nogud lo Sarah taem hem laf bihaen hem herem bae hem babule nomata hem olo finis. (Jenesis 18:10-14) Jehovah showimaot respect lo Sarah. Wanem nao iufala parents and olketa elder lanem from example blo Jehovah? Hao nao bae iu feel sapos pikinini or samwan lo kongregeson kwestinim wanfala disison blo iu? Waswe, bae iu laek for stretem olketa? Or bae iu trae for minim why olketa kwestinim iu? Olketa pikinini and olketa lo kongregeson bae kasem gud samting taem parents and olketa elder followim example blo Jehovah. w20.08 10 ¶7-9

Taem iumi start for associate witim pipol blo Jehovah, iumi willing for acceptim help from narawan. Iumi luksavve iumi olsem wanfala pikinini nomoa and iumi laek for lanem staka samting. (1 Cor. 3:1, 2) Bat waswe distaem? Sapos iumi servem Jehovah for staka year finis and garem staka experience, iumi maet no laek for acceptim help, especially from olketa wea no stap longtaem lo truth. Bat Jehovah savve iusim olketa brata and sista for strongim iumi. (Rome 1:11, 12) Iumi mas luksavve lo diswan sapos iumi laek for kasem strong from Jehovah. For gohed gud iumi mas no depend lo strong blo iumi, education, selen, or background blo iumi. Bat iumi luksavve iumi mas hambol and barava depend lo Jehovah. Iumi evriwan savve gohed for (1) depend lo Jehovah, (2) lane from olketa example lo Bible, and (3) acceptim help from olketa brata and sista. Then, nomata iumi wik, Jehovah bae mekem iumi for barava strong! w20.07 14 ¶2; 19 ¶18-19

Maet iumi faendem hem hard for patient taem iumi preach lo olketa relative wea no Witness. Wanfala Bible principle lo Eklesiastes 3:1, 7 savve helpem iumi. Hem sei: “Taem hem stap fo man stap kuaet, and taem hemi stap fo tok.” Bae iumi lukaotem chance for story abaotem truth, bat bae iumi laek for garem gudfala wei lo olketa narataem. (1 Pet. 3:1, 2) Taem iumi preach iumi patient witim pipol, nomata olketa famili member blo iumi tu. Iumi savve lanem samting from samfala lo Bible wea patient and olketa lo distaem. Habakkuk laekem evri nogud samting for finis, bat hem patient and hem sei: “Bae mi gohed fo lukluk olsem sekiuriti.” (Habakuk 2:1) Paul sei samting wea hem laekem tumas hem for “finisim” ministry blo hem. Nomata olsem, hem patient for “talemaot long evriwan datfala gud nius.”—Acts 20:24. w20.09 11-12 ¶12-14

Nomata Jesus garem hae position, hem no tinghae lo hemseleva. Taem iumi followim example blo Jesus for hambol, bae iumi showimaot love lo olketa narawan, wea datwan nao hem mark blo pipol blo Jehovah. (Luke 9:48; John 13:35) Hao sapos iu samfala problem hem kamap lo kongregeson and iu tingse olketa elder no deal witim lo stret wei? Winim wei for komplen, iu savve showimaot iu hambol and sapotim olketa wea lead. (Heb. 13:17) For helpem iu duim datwan, tingim: ‘Waswe, olketa problem hia hem barava big mekem olketa mas stretem? Waswe, hem stret taem for olketa stretem olketa problem hia? Waswe, hem responsibility blo mi for stretem? Waswe, wanem mi storyim mekem kongregeson garem wan mind, or mi laek for mekhae lo miseleva nomoa?’ Jehovah laekem iumi for hambol and helpem kongregeson for garem wan mind.—Eph. 4:2, 3. w20.07 4-5 ¶9-11

Jesus tinghae lo help wea hem kasem from olketa faithful woman wea “iusim samting olketa garem” for lukaftarem hem. (Luke 8:1-3) Hem storyim olketa deep spiritual truth lo olketa. Olsem example, hem talem olketa bae hem dae and resurrect. (Luke 24:5-8) Hem redyim olketa woman hia for olketa hard taem wea bae kamap, olsem hem duim for olketa aposol. (Mark 9:30-32; 10:32-34) Interesting samting, nomata olketa aposol ranawe taem samfala arrestim Jesus, samfala woman stap witim hem go kasem taem hem dae lo post. (Matt. 26:56; Mark 15:40, 41) Olketa woman nao first wan for lukim Jesus taem hem resurrect. Hem askem olketa hia for go talem olketa aposol hem laef bak. (Matt. 28:5, 9, 10) And lo Pentecost 33 C.E., luk olsem olketa woman stap taem God pourimaot holy spirit mekem olketa fit for story lo olketa didifren languis and for talem olketa narawan abaotem “olketa nambawan samting wea God hem duim.”—Acts 1:14; 2:2-4, 11. w20.09 23 ¶11-12

Waka for helpem pipol kamap disaepol hem sevem laef blo olketa! Taem Jesus givim komand lo Matthew 28:19, 20, hem sei: “Go, . . . and teachim pipol . . . , baptaesim olketa.” Hem important for baptaes for kasem laef. Samwan wea laek for baptaes mas bilivim hem savve kasem laef olowe bikos Jesus dae for iumi and hem resurrect. Dastawe aposol Peter talem olketa Christian: “Wei for baptaes . . . nao sevem iufala bikos Jesus Christ hem laef bak.” (1 Pet. 3:21) So taem samwan baptaes, hem showimaot hem garem hope for laef olowe. For teachim pipol kamap disaepol, iumi need for mekem grow wei for “teach long gudfala wei.” (2 Tim. 4:1, 2) Why nao olsem? Bikos Jesus givim iumi komand for “go and teachim pipol for kamap disaepol.” Aposol Paul sei for “gohed strong” for duim disfala waka bikos hem “bae mekem iu and olketa wea lisin long iu for kasem laef.” w20.10 14 ¶1-2

Peter hem disaepol wea barava enjoyim waka for fishing for kasem pipol. And from Jehovah helpem Peter, hem barava duim gud datfala waka. (Acts 2:14, 41) Main reason why iumi preach bikos iumi lovem Jehovah, and datwan helpem iumi for winim eni feeling for tingse iumi no fit. Taem Jesus invaetem Peter for kamap wanfala fisherman for kasem pipol, hem sei: “Iu no fraet.” (Luke 5:8-11) Peter no fraet lo wanem maet happen sapos hem kamap wanfala disaepol, bat hem seke from Jesus mekem olketa for kasem staka fish, and Peter feel olsem hem no fit for waka witim Jesus. Sapos iumi warim hao staka samting insaed lo wei for kamap disaepol blo Christ, strongim love blo iumi Jehovah, Jesus, and pipol, and datwan bae muvim iu for acceptim invitation blo Jesus for duim waka for fishing for kasem pipol.—Matt. 22:37, 39; John 14:15. w20.09 3 ¶4-5

Iumi hapi for iusim taem, strong, and selen blo iumi for faendem pipol “wea showimaot olketa laekem laef olowe.” (Acts 13:48) Datwan hem followim example blo Jesus wea sei: “Kaikai bilong mi hem for duim waka wea man wea sendem mi kam hem laekem mi for duim and for finisim datfala waka.” (John 4:34; 17:4) Iumi tu barava laek for duim datfala waka and finisim waka wea hem trustim iumi for duim. (John 20:21) And iumi laekem olketa wea inactive for duim moa disfala waka witim iumi. (Matt. 24:13) Hem tru, for followim komand blo Jesus for preach hem no isi. Bat iumi no duim disfala waka seleva bikos Jesus promis hem bae stap witim iumi. Iumi “waka tugeta witim God,” and witim Christ. (1 Cor. 3:9; 2 Cor. 2:17) Datwan mekem iumi fit for duim disfala waka. Hem nambawan privilege and iumi hapi tumas for duim waka hia and for helpem narawan for duim disfala waka tu!—Phil. 4:13. w20.11 7 ¶19-20

Staka taem disison wea parents mekem bae affectim pikinini for longfala taem. Sapos parents mekem nogud disison, datwan savve kosim problem for pikinini blo olketa. Bat sapos olketa mekem wise disison, datwan bae givim chance for pikinini garem gudfala laef. Bat, olketa pikinini tu mas mekem gudfala disison. Best disison wea olketa savve mekem hem for worshipim Jehovah. (Sams 73:28) Parents blo Jesus laekem olketa pikinini blo tufala for worshipim Jehovah, and olketa disison wea tufala mekem showimaot datwan hem main goal lo laef blo tufala. (Luke 2:40, 41, 52) Jesus tu mekem olketa gudfala disison wea helpem hem for duim waka blo hem lo plan blo Jehovah. (Matt. 4:1-10) Taem Jesus growap, hem kaen, faithful, and no fraet. Olketa parents wea worshipim Jehovah bae hapi for garem pikinini wea olsem hem. w20.10 26 ¶1-2

Tingim thrifala example hia. Wanfala olo sista ting go bak lo olketa gudfala taem bifor. Nomata laef blo hem no isi distaem, hem gohed duim best blo hem for Jehovah. (1 Cor. 15:58) Evriday hem tingim taem wea hem bae stap tugeta witim famili and olketa fren blo hem lo paradaes. Nara sista tingim hao samwan lo kongregeson mekem hem feel nogud, bat hem chus for no gohed feel nogud lo datfala sista. (Col. 3:13) Wanfala brata luksavve hem duim olketa mistek bifor, bat hem traem best for tingim wanem hem savve duim for gohed faithful lo Jehovah distaem. (Sams 51:10) Wanem nao thrifala Christian evriwan duim? Olketa tingim olketa samting wea happen lo olketa bifor, bat no tingim datwan evritaem. Olketa gohed for tingim future. Why nao hem important for duim datwan? Olsem wanfala man hard for wakabaot followim stret laen sapos hem gohed for luk bak, iumi bae hard for muv ahed lo service blo iumi for Jehovah sapos iumi gohed tingim olketa samting wea happen lo iumi bifor.—Luke 9:62. w20.11 24 ¶1-3

Goliath hem wanfala barava strong soldia wea and lo tingting blo hem David nating strong nomoa. Goliath hem big winim David, hem garem staka samting for faet, and hem kasem training for faet. Bat David hem wanfala young boy nomoa wea luk olsem hem nating fit for faet. Nomata olsem, David depend lo Jehovah for paoa, and hem winim Goliath. (Fas Samuel 17:41-45, 50.) David mas deal witim nara challenge wea maet hem wikdaon. David faithful for servem King Saul wea Jehovah appointim olsem king blo Israel. Firstaem King Saul barava respectim David. Bat bihaen, Saul kamap praod so hem jealous lo David. Saul barava treatim David nogud and hem trae for killim hem tu. (Fas Samuel 18:6-9, 29; 19:9-11) Nomata olsem, David gohed for respectim Saul, datfala king wea Jehovah appointim. (Fas Samuel 24:6) David gohed for depend lo Jehovah for givim hem strong wea hem needim for no givap nomata hem kasem datfala hard taem.—Ps. 18:1, NW, smol toktok antap chapter 18. w20.07 17 ¶11-13

Bigfala part lo profesi abaotem king blo north and king blo south hem fulfill finis, so iumi savve sure dat nara part blo datfala profesi bae fulfill tu. For helpem iumi minim datfala profesi lo Daniel chapter 11, iumi need for tingim hao profesi blo Daniel hem story nomoa abaotem olketa ruler and gavman wea duim samting wea affectim pipol blo Jehovah. Pipol blo Jehovah no staka nomoa taem iumi comparem witim population blo full world, so why nao olketa gavman hia targetim pipol blo God? Bikos Satan and world blo hem garem goal for spoelem olketa wea servem Jehovah and Jesus. (Jenesis 3:15; Rev. 11:7; 12:17) And tu, profesi blo Daniel mas agree witim olketa nara profesi lo Bible. Only wei for iumi minim gud datfala profesi hem sapos iumi comparem witim olketa nara part lo Bible. w20.05 2 ¶1-2

Pipol garem staka difren idea abaotem wanem hem happen bihaen man dae. Bat wanem nao Bible teachim? Taem samwan hem dae, body blo hem rotten. Bat Jehovah wea creatim universe savve resurrectim datfala man and wakem body for hem. (Jenesis 1:1; 2:7) Aposol Paul iusim wanfala tokpiksa for showimaot God bae no givim bak sem body wea hem garem bifor hem dae. Tingim wanfala “seed bilong wheat or eni nara seed.” Datfala seed olketa plantim lo graon and hem grow and hem kamap wanfala niu plant. Plant hia barava luk difren from datfala smol seed wea olketa plantim. Paul iusim disfala tokpiksa for showim Creator savve givim wanfala man body fitim wanem hem tingim. Paul sei tu “body bilong olketa long heven hem difren, and body bilong olketa long earth hem difren.” Lo wanem wei? Lo earth iumi garem physical body, bat lo heven olketa garem spirit body olsem olketa angel.—1 Cor. 15:36-41. w20.12 9-10 ¶7-9

Iumi evriwan laek for stap gud and no wari tumas. Bat samfala samting savve mekem iumi for wari and garem sem kwestin olsem King David wea stap lo text blo tuday. Hem hard for iumi stopem samfala samting wea savve mekem iumi for wari. Olsem example, iumi hard for stopem price blo kaikai, kaleko, and rent for go ap. Iumi no savve kontrolem olketa lo waka or skul sapos evritaem olketa trae for switim iumi for duim samting wea no stret. And tu, iumi no savve stopem olketa criminal for duim olketa nogud samting lo ples wea iumi stap. Olketa samting hia happen bikos iumi stap lo world wea staka pipol no followim wanem Bible talem. And Satan wea rulim disfala world laekem ‘iumi for wari abaotem olketa samting lo laef,’ gogo iumi stop for worshipim Jehovah. (Matt. 13:22; 1 John 5:19) Dastawe staka problem kamap wea mekem iumi wari! w21.01 2 ¶1, 3

Aposol John sei for iumi no heitim olketa brata and sista. Sapos iumi no followim datfala kaonsel, Satan savve iusim iumi for duim wanem hem laekem. (1 John 2:11) Datwan happen lo samfala Christian lo first century C.E. Satan iusim olketa for mekem olketa brata and sista heitim each other and no wan mind. Taem John raetem olketa leta blo hem, samfala olsem stap insaed olketa kongregeson. For example, lo wanfala kongregeson Diotrephes talem and duim olketa samting for mekem olketa brata heitim each other. (3 John 9, 10) Hem no respectim olketa traveling elder wea governing body sendem kam. Hem no laekem olketa wea welkamim olketa brata hia, and trae for aotem olketa from kongregeson. Datwan barava nogud samting! Distaem tu, Satan no laekem iumi for wan mind and hem trae for spoelem datwan. So iumi laek gohed wan mind and no enitaem heitim olketa brata and sista blo iumi. w21.01 11 ¶14

Lo World War I, gavman blo Germany and Britain persecutim pipol blo God wea no laek for faet insaed lo datfala war. And gavman lo U.S. putim olketa brata wea lead lo preaching waka insaed lo prison. Diswan fulfillim profesi lo Revelation 11:7-10. Then lo olketa year bihaen 1930, and especially lo taem blo World War II, king blo north barava attakim pipol blo God. Hitler and olketa wea followim hem banim waka blo pipol blo God. Datfala king blo north killim dae staka handred pipol blo God and putim staka thousand lo concentration camp. Datfala king blo north “spoelem datfala holy ples” and “aotem datfala samting wea stap evritaem” thru lo wei wea hem banim preaching waka. (Dan. 11:30b, 31a, NW) Hitler wea hem leader blo Nazi party, hem promis tu for killim dae evri pipol blo God lo Germany. w20.05 5-6 ¶12-13

From iumi lovem olketa brata and sista lo kongregeson, bae iumi no jealous lo olketa and no laek for gud winim olketa. Tingim, Jonathan no jealous lo David and trae for kamap next king. (Fas Samuel 20:42) Iumi evriwan fit for followim example blo Jonathan. Iumi no laek jealous lo olketa brata and sista bikos olketa savve duim gud wanfala samting, ‘bat iumi mas hambol and ting long narawan olsem hem winim iumi.’ (Phil. 2:3) Evriwan fit for duim samting wea savve helpem kongregeson. Taem iumi hambol, bae iumi tinghae lo olketa gud samting wea olketa narawan lo kongregeson savve duim and lane from example blo olketa. (1 Cor. 12:21-25) From iumi olketa brata and sista showimaot love lo each other, iumi stap gud witim each other. And tu, hem mekem pipol wea lukaotem truth luksavve iumi olketa disaepol blo Jesus and bae olketa laek for worshipim Jehovah. Bat main samting, love wea iumi showimaot lo each other mekhae lo Jehovah, datfala ‘God wea kaen and sorre long iumi, and wea givim iumi comfort.’—2 Cor. 1:3. w21.01 24 ¶14; 25 ¶16

Distaem samfala pipol ting daonem iumi olketa Jehovah’s Witness, and sei iumi pipol wea no garem bigfala savve and iumi wik. Why nao olsem? Bikos wei blo iumi hem no olsem olketa. Iumi trae for hambol, kwaet, and obey. Bat pipol lo world olketa tinghae lo pipol wea praod, wea tinghae lo olketa seleva, and bighed. And tu, iumi no tek part lo politik, and iumi no join insaed lo olketa military army lo eni kantri. Iumi no join witim pipol lo world, so olketa ting daonem iumi. (Rome 12:2) Nomata hao pipol ting lo iumi, Jehovah iusim iumi for duim staka nambawan samting. Hem gohed for duim wanfala big preaching campaign winim enitaem lo history. Iumi duim waka for transleitim and givimaot staka magasin evriwea lo earth and iumi iusim Bible for helpem staka million pipol for helpem laef blo olketa kamap gud. Evri praise for olketa samting hia hem go lo Jehovah. w20.07 15 ¶5-6

Jesus stap anda lo Jehovah, bat datwan no minim Jesus no garem eni savve and Jehovah kontrolem evri samting wea Jesus duim. Jesus savve lo staka samting and taem hem teach hem explainim gud olketa samting. (John 7:45, 46) Jehovah luksavve Jesus fit for duim staka samting, so tufala waka tugeta for wakem evri samting lo heven and lo earth. (Provebs 8:30; Heb. 1:2-4) And bihaen Jesus resurrect and go bak lo heven, gogo Jehovah givim ‘paoa lo hem ovarem evri samting lo heven and earth.’ (Matt. 28:18) Nomata Jesus savve lo staka samting, hem evritaem depend lo Jehovah. Why nao olsem? Bikos hem lovem Dadi blo hem. Olketa hasband savve hao Jehovah sei waef shud stap anda lo hasband, bat diswan hem no bikos Jehovah ting olketa man important winim olketa woman. Hem showimaot datwan from hem chusim olketa woman and olketa man for rul witim Jesus lo heven. (Gal. 3:26-29) Jehovah showimaot hem trustim Jesus taem hem givim hem paoa for rul. Hasband tu bae showimaot hem trustim waef for duim samfala samting. w21.02 11 ¶13-14

Toktok lo Bible hem olsem wanfala mirror, bikos hem helpem iumi for luksavve wanem iumi need for stretem. (Jas. 1:23-25) For example, taem iumi readim samting lo Bible datwan maet mekem iumi luksavve iumi need for kontrolem kros blo iumi. Wanem iumi lanem savve helpem iumi for kaen lo pipol and for no kros kwiktaem. And bae iumi lane tingting gud and mekem olketa gudfala disison. (Jas. 3:13) Diswan showimaot hem important for studyim gud Bible! Hem gud for lane from olketa wea duim gud samting, and hem gud for lane from mistek blo narawan winim for iumiseleva duim mistek and kasem nogud samting from datwan. Dastawe James encouragem iumi for lane from example blo olketa lo Bible olsem Abraham, Rahab, Job, and Elijah. (Jas. 2:21-26; 5:10, 11, 17, 18) Nomata olketa hia deal witim staka hard samting, Jehovah helpem olketa for gohed hapi and no givap. Jehovah savve duim sem samting tu for iumi. w21.02 30 ¶12-13

Conductor nao main wan for teachim Bible study. Nomata olsem, taem samwan askem iu for go witim hem lo Bible study blo hem, hem laekem iu for helpem hem. (Eklesiastes 4:9, 10) Bat hao nao iu savve duim datwan? Prepare for Bible study. Firstaem, askem pablisa for talem iu samfala samting abaotem Bible study blo hem. Bae hem gud for savve olketa samting abaotem hem olsem age blo hem, famili blo hem, and religion blo hem. Askem pablisa subject wea hem bae storyim lo study, and eni point wea hem laek strongim. Hem gud for savve wanem iu shud no storyim or no duim lo Bible study, and wanem samting for storyim wea maet encouragem hem. Pablisa bae talem nomoa olketa samting wea bae helpem iu for minim datfala Bible study and no eni nara samting wea iu shud no savve. Hem nao samting Joy, wanfala missionary, sei: “Diswan helpem sista wea kam witim mi for minim datfala Bible study and hao sista hia savve helpem hem.” w21.03 9 ¶5-6

Samfala pipol les lo iumi bikos iumi followim olketa raeteous standard blo God. Olketa standard blo God barava difren from olketa standard blo world. For example, staka pipol sei hem olraet for man durong witim man, bat hem nao why God distroem pipol lo Sodom and Gomorrah! (Jude 7) From iumi followim olketa standard lo Bible and no acceptim diswan, pipol tok spoelem iumi and sei iumi ting daonem olketa man hia! (1 Pet. 4:3, 4) Taem pipol les lo iumi and tok spoelem iumi, wanem nao savve helpem iumi for no givap? Iumi mas garem faith and sure Jehovah bae helpem iumi. Faith blo iumi hem olsem shield wea “blokem olketa arrow bilong Satan.” (Eph. 6:16) Nomata iumi garem faith, iumi mas garem love tu. Why nao olsem? Bikos man wea garem love “no kwiktaem for kros,” and no givap taem pipol againstim hem. (1 Cor. 13:4-7, 13) Love wea iumi garem for Jehovah, olketa brata and sista, and olketa enemy tu, bae helpem iumi for no givap. w21.03 21 ¶3-4

Iumi showimaot iumi lovem olketa brata and sista taem iumi no duim samfala samting. For example, iumi no kwiktaem feel nogud lo wanem olketa talem. Tingim samting wea happen taem Jesus lo earth. Hem talem olketa disaepol hao man wea kaikaim body blo hem and drinkim blood blo hem bae kasem laef olowe. (John 6:53-57) Wanem hem talem mekem staka disaepol feel nogud and lusim hem, bat olketa fren blo Jesus no lusim hem. Olketa no minim wanem Jesus talem and maet olketa seke for herem datwan. Nomata olsem, olketa no tingse Jesus talem samting wea no stret and feel nogud lo hem. Olketa trustim hem bikos olketa savve hem evritaem talem tru samting. (John 6:60, 66-69) Hem important for no kwiktaem feel nogud lo wanem olketa fren blo iumi talem! Bat hem gud for askem olketa for explainim wanem olketa minim.—Provebs 18:13. w21.01 11 ¶13