January

Jesus no fraet for sei olketa bigman blo religion hypocrite from olketa followim olketa kastom. For example, hem tok lo olketa Pharisee wea mekhae lo kastom for wasim hand winim for lukaftarem parents blo olketa. (Matt. 15:1-11) Nomata olketa Pharisee kros lo wanem Jesus talem, hem no fraet for talem tru samting. Jesus showimaot tu samfala teaching blo religion no tru and God no acceptim evri teaching blo religion. Hem sei staka bae followim road wea waed and lead go lo dae, and samfala nomoa bae wakabaot lo road wea lead go lo laef olowe. (Matt. 7:13, 14) Jesus sei samfala bae luk olsem olketa worshipim God, bat nating nomoa. Hem talem disfala warning: “Keakea long olketa laea profet wea olsem olketa wild dog, bat wea talem and duim olketa samting for mekem pipol tingse olketa hambol and kaen olsem wanfala sheepsheep. Iufala bae luksavve long olketa hia from samting wea olketa duim.”​—Matt. 7:15-20. w21.05 9 ¶7-8

Hannah maritim Elkanah, wanfala Levite wea barava lovem hem. Bat Elkanah garem tu nara waef wea nem blo hem Peninnah. Elkanah lovem Hannah winim Peninnah. Nomata olsem, “Penina hemi garem olketa pikinini, bat Hana hemi no garem.” Bikos lo datwan, “oltaem Penina hemi gohed fo mekful long [Hannah] fo mekem hem filnogud.” Bible sei Hannah “hemi gohed fo krae, an hemi les long kaikai.” Bible no storyim sapos Hannah trae for changem bak nogud samting lo Peninnah. Hannah storyim evri samting lo Jehovah and trustim Jehovah for helpem hem. (Fas Samuel 1:2, 6, 7, 10) Wanem nao iumi savve lanem from example blo Hannah? Sapos samwan trae for winim iumi, no raoa witim hem. No changem bak nogud samting wea hem duim lo iumi, bat trae for mek peace witim hem. (Rome 12:17-21) Nomata sapos hem no laek for duim datwan, bae iumi hapi from iumi traem. w21.07 17 ¶13-14

From Judas Iscariot hem greedy, hem givim Jesus go lo olketa enemy. Bat firstaem Judas no kaen man olsem. (Luke 6:13, 16) Jesus trustim Judas for lukaftarem selen blo olketa wea stap lo wanfala box. Bat gogo Judas start for stealim selen blo olketa, nomata staka taem Jesus warnim olketa for no greedy. (Mark 7:22, 23; Luke 11:39) Samting wea happen no longtaem bifor Jesus dae showimaot Judas hem barava greedy. Jesus, Mary, Martha, and samfala nara disaepol go for kaikai lo haos blo Simon. Taem olketa kaikai, Mary kapsaetem oil wea expensive lo hed blo Jesus. Datwan mekem Judas and olketa nara disaepol for feel nogud. Olketa nara disaepol no hapi bikos olketa tingse sapos Mary no peim datfala oil, bae olketa savve iusim selen hia for sapotim preaching waka. Bat Judas no hapi bikos hem “man for steal” and hem savve sapos selen hia stap lo box wea hem lukaftarem, bae hem tekem for hemseleva.​—John 12:2-6; Matt. 26:6-16; Luke 22:3-6. w21.06 18 ¶12-13

Sapos iu wanfala elder, maet iu garem staka waka and samfala taem iu tingse hem big tumas. Sapos olsem, bae iu minim feeling blo Paul wea “wari tumas abaotem olketa kongregeson.” (2 Cor. 11:23-28) Or sapos iu sik, maet datwan mekem iu no hapi. Paul tu garem sik wea olsem ‘nila wea stap long body bilong hem,’ and hem barava laekem sik hia for finis. (2 Cor. 12:7-10) Or maet iu ting daonem iuseleva. Samfala taem Paul tu savve feel olsem, and hem sei hem “iusles man nomoa.” (Rome 7:21-24) Paul deal witim staka hard samting. Nomata olsem hem gohed worshipim Jehovah. Wanem nao helpem hem for no givap? Paul hem man wea sin, bat bikos lo dae blo Jesus hem savve God forgivim hem. w21.04 22 ¶7-8

Taem Adam sin, datwan mekem hem no fit for gohed laef olowe, and olketa lo laen blo hem no savve kasem laef olowe tu. Adam min for duim datfala sin and hem fit for dae. Bat bikos olketa kam from laen blo Adam olketa kasem sin and dae. (Rome 5:12, 14) So waswe, God savve duim eni samting for sevem olketa? Ia! Stretawe bihaen Adam sin, Jehovah storyim plan blo hem for sevem olketa man from sin and dae. (Jenesis 3:15) Bikos lo ransom, iumi savve fren gud witim Jehovah nomata iumi sin. And tu, datfala ransom sakrifaes bae finisim evri nogud samting wea Satan duim. (1 John 3:8) From Jesus hem dae for iumi, plan blo Jehovah for full earth kamap paradaes bae kamap tru. w21.04 14 ¶1; 19 ¶17

Bigfala grup blo olketa man and woman hipap lo Jerusalem lo Pentecost 33 C.E. Olketa kam from olketa difren kantri and story lo staka difren languis. Wanfala spesol samting happen lo datfala day. Samfala Jew start for story lo languis blo olketa. Hem tru datwan spesol, bat wanem olketa Jew and aposol Peter storyim hem important winim datwan. Olketa herem hao olketa savve sev sapos olketa showimaot faith lo Jesus Christ. Datfala message barava kasem heart blo olketa hia, and olketa askem Peter and olketa aposol: “Wanem nao mifala mas duim?” Peter sei: “Iufala mas repent and baptaes.” (Acts 2:37, 38) Lo datfala sem day, samting olsem 3,000 baptaes and kamap disaepol blo Jesus Christ. Hem barava nambawan samting! Datwan hem start blo waka for helpem pipol kamap disaepol wea Jesus sei olketa follower blo hem mas duim. Datfala waka hem gohed kam kasem distaem. w21.06 2 ¶1-2

Maet staka pipol lo territory no interest for studyim Bible. Nomata lo territory blo iumi staka pipol no acceptim or les lo message blo iumi, why nao iumi shud gohed lukaotem pipol wea laek for study? Hem gud for tingim laef blo pipol savve change, and olketa wea no interest firstaem maet start for luksavve olketa needim God. (Matt. 5:3) Samfala wea firstaem olketa les for readim olketa pablikeson blo iumi gogo olketa laek for studyim Bible. Iumi savve tu diswan hem waka blo Jehovah. (Matt. 9:38) Hem laekem iumi for gohed plantim seed and for watarem, bat hem nao mekem datfala seed for grow. Nomata iumi waka hard for garem Bible study maet iumi no garem Bible study distaem, so hem gud for tingim hao Jehovah hapi lo iumi from iumi duim best blo iumi! w21.07 6 ¶14

Jehovah wakem pipol for garem pikinini, and parents shud teachim pikinini for lovem and worshipim Jehovah. Jehovah givim olketa angel staka gud samting, bat olketa no savve garem pikinini. So olketa dadi and mami shud tinghae lo privilege for garem pikinini. And tu, parents shud “stretem and trainim [pikinini] followim samting wea Jehovah talem.” (Eph. 6:4; Diutronomi 6:5-7) For helpem parents for duim datwan, organization blo Jehovah provaedem olketa Bible pablikeson, video, olketa song, and olketa nara samting lo website. Datwan showimaot Jehovah and Jesus barava lovem olketa pikinini. (Luke 18:15-17) Jehovah hapi taem parents followim direction blo hem and lukaftarem gud olketa pikinini. Taem parents duim datwan, pikinini tu bae garem chance for insaed famili blo Jehovah for olowe! w21.08 5 ¶9

Samfala tingse sapos man garem faith hem no need for pruvim wanem hem bilivim. Bat Bible no teachim datwan. Olsem example, nomata iumi no savve lukim Jehovah, Jesus, and datfala Kingdom lo heven, iumi garem faith lo olketa samting hia bikos iumi garem kliafala pruv olketa samting hia stap. (Heb. 11:3) Davey Loos, wanfala Witness wea hem scientist sei: “Olketa Jehovah’s Witness no againstim science, bat olketa garem pruv for wanem olketa bilivim.” Maet iumi sei, ‘Sapos staka pruv stap wea showimaot God nao wakem earth, why nao staka pipol no bilivim datwan?’ Samfala no savve pruv hem stap. Robert, wea hem wanfala Witness distaem sei: “Lo skul and university, olketa no storyim creation so mi tingse hem no tru. Taem mi 22 years, hem nao firstaem for mi herem wanem Bible talem abaotem creation and hem mek sense lo mi.” w21.08 15 ¶4-5

Iumi savve readim lo Bible hao Jehovah hem gud, and iumi herem experience blo olketa narawan abaotem olketa gud samting wea Jehovah duim for olketa. Bat for barava minim hao Jehovah hem gud, iumiseleva need for experiencem datwan. Olsem example, maet iumi laek for kamap regular pioneer, bat for kasem datfala goal iumi need for katdaon lo waka for selen and changem olketa nara samting lo laef. Iumi savve Jehovah bae provaedem wanem iumi needim taem Kingdom hem first samting lo laef blo iumi, bat hem firstaem for iumi mas barava trustim datwan. (Matt. 6:33) Nomata olsem, iumi katdaon lo waka and selen iumi spendem, and iumi busy lo ministry. From datwan bae iumi experiencem hao Jehovah barava lukaftarem iumi and provaedem wanem iumi needim, and iumi barava lukim hao Jehovah hem gud tumas. w21.08 26 ¶2

Wanem nao tingting blo pipol abaotem Olketa Jehovah’s Witness? Olketa bigman blo religion savve les lo Olketa Jehovah’s Witness from iumi followim olketa standard blo Jehovah and from iumi no laek garem bignem. Bat olketa bigman hia laekem pipol wea rich, garem bignem, or olketa savveman for kamap member lo church blo olketa. Olketa bigman acceptim olketa hia nomata staka lo olketa duim olketa samting wea barava againstim standard blo God. Nomata olsem, Paul sei God chusim pipol wea olketa narawan “lukdaonem.” (1 Cor. 1:26-29) Nomata pipol luk daonem iumi, Jehovah barava lovem iumi bikos iumi followim olketa standard blo hem. Wanem nao olketa wea interest lo truth need for duim? (Matt. 11:25, 26) Olketa shud no letem tingting blo pipol lo world abaotem Olketa Jehovah’s Witness for affectim olketa. Olketa shud luksavve Jehovah iusim pipol wea hambol for duim wanem hem laekem. (Sams 138:6) And olketa shud ting raonem olketa samting wea pipol blo Jehovah duim kam kasem distaem, nomata pipol lo world ting daonem olketa. w21.05 8 ¶1; 9 ¶5-6

Aposol Paul tinghae lo olketa narawan wea helpem hem. Hem acceptim help from olketa brata and sista. (Phil. 2:19-22) Olketa olo savve showimaot olketa tinghae lo olketa narawan lo kongregeson lo staka wei. Olsem example, sapos eniwan laek for helpem iu for go samwea, baem samting iu needim, or eni nara samting, hem gud for acceptim help blo olketa. Jehovah iusim olketa brata and sista for helpem iu. From iu spendem taem witim olketa hia, gogo bae iufala fren gud. Hem gud for showimaot interest lo spiritual saed blo olketa young wan and talem olketa iu hapi for lukim olketa laek duim moa samting lo kongregeson. And hem gud for storyim olketa experience wea iu kasem lo laef blo iu. Taem iu duim olsem, iu showimaot iu tinghae lo Jehovah from hem leadim olketa wea young for kam lo kongregeson.​—Col. 3:15; John 6:44; 1 Thess. 5:18. w21.09 11-12 ¶12-13

Jehovah lovem evri brata and sista. Bat maet iumi faendem hem hard for showimaot love lo samfala brata and sista hia. Maet datwan bikos hem culture or wei blo olketa hem difren from iumi. Or maet olketa duim samting wea mekem iumi feel nogud. Bat iumi savve duim samting for mekem kongregeson for gohed stap gud. Iumi savve followim example blo Jehovah and showimaot love lo evri brata and sista. (Eph. 5:1, 2; 1 John 4:19) Man wea kaen hem laek duim samting for helpem and comfortim narawan. Jesus followim example blo Jehovah for kaen lo pipol. (John 5:19) Wantaem hem lukim pipol wea “stap olobaot olsem olketa sheepsheep wea no garem eni man for lukaftarem olketa” and hem “barava sorre tumas long olketa.” (Matt. 9:36) Hem no just sorre lo olketa nomoa, bat hem duim samting for helpem olketa. Hem healim olketa wea sik, and strongim olketa wea sorre and wikdaon.​—Matt. 11:28-30; 14:14. w21.09 22 ¶10-11

Jehovah laek for showimaot mercy. Aposol Paul sei God hem showimaot “bigfala mercy.” Lo disfala scripture Paul storyim hao God givim hope lo olketa anointed Christian wea no perfect for kasem laef lo heven, and datwan showimaot mercy. (Eph. 2:4-7) Jehovah showimaot mercy lo olketa narawan tu. David sei: “Oltaem hemi gud tumas long yumi evriwan, an hemi [showim mercy] long yumi an evrisamting wea hemi mekem.” (Sams 145:9) From Jehovah lovem pipol hem showimaot mercy taem gudfala reason stap for duim datwan. Jesus barava savve hao Jehovah laek for showimaot mercy from tufala stap tugeta lo heven for long taem bifor Jesus kam lo earth. (Provebs 8:30, 31) So Jesus lukim taem Dadi blo hem showimaot mercy lo olketa man wea no perfect. (Sams 78:37-42) Taem Jesus lo earth, hem savve storyim hao Dadi blo hem showimaot mercy. w21.10 8-9 ¶4-5

Jehovah ansarem datfala prea witim bigfala voice from skae, and hem sei bae hem mekhae lo nem blo hemseleva. Lo ministry blo Jesus, hem evritaem mekhae lo nem blo Dadi blo hem lo pipol. (John 17:26) So hem wanfala privilege for iumi olketa Christian iusim nem blo God and storyim datwan lo pipol. Lo first century Jehovah start for chusim staka difren pipol for kam insaed Christian kongregeson. (Acts 15:14) Taem olketa Christian hia preach olketa hapi for storyim nem blo God, and olketa wea raetem olketa Bible buk iusim datfala nem lo olketa raeting blo olketa. Olketa hia barava mekhae lo nem blo God. (Acts 2:14, 21) Distaem tu, Olketa Jehovah’s Witness mekhae lo nem blo Jehovah. w21.10 20-21 ¶8-10

Strongfala love blo God hem stap for olowe. Disfala toktok strongfala love blo God kamap 26 taem lo Psalm 136 (NWT). Lo verse 1 hem sei: “Talem thankiu lo Jehovah bikos hem duim gudfala samting. Strongfala love blo hem stap for olowe.” (Ps. 136:1, NWT) Start lo verse 2 go kasem 26 hem garem tu disfala toktok “strongfala love blo hem stap for olowe.” Olketa verse hia helpem iumi for tinghae lo staka samting Jehovah duim wea showimaot hem garem strongfala love for iumi wea no savve finis. From disfala toktok “strongfala love blo hem stap for olowe” stap staka taem lo disfala Psalm,datwan helpem iumi for luksavve love blo God for pipol blo hem no savve change. Iumi hapi for savve Jehovah bae gohed for lovem iumi for olowe, especially taem iumi kasem hard taem. From iumi savve Jehovah bae gohed for lovem iumi, datwan strongim iumi for deal witim eni hard taem and helpem iumi for gohed worshipim hem.​—Sams 31:7. w21.11 4-5 ¶9-10

Waswe, iumi warim olketa samting wea bae happen lo future, olsem taem God finisim false religion, taem Gog blo Magog attakim pipol blo God, and taem Armageddon kam? Maet iumi tingse bae iumi no garem strongfala faith taem olketa hard samting hia happen. Sapos iumi warim datwan, toktok lo text for tuday bae helpem iumi. Jesus sei lo olketa disaepol blo hem: “Iufala no wari. Showimaot faith.” So iumi needim strongfala faith for deal witim olketa hard samting wea bae happen. Sapos iumi savve wanem for duim taem iumi deal witim olketa test wea kasem iumi distaem and ting raonem datwan, iumi bae luksavve hao for strongim faith blo iumi. Taem iumi winim each test, datwan bae strongim faith blo iumi for deal witim olketa test wea bae kamap lo future. w21.11 20 ¶1-2

Aposol Paul encouragem Timothy for barava duim gud ministry blo hem, and datfala encouragement fitim iumi tu. (2 Tim. 4:5) Bat samfala brata and sista feisim hard samting saed lo ministry. Olsem example, samfala Witness stap lo kantri wea gavman stopem preaching waka. Iumi olketa Witness maet deal witim olketa difren kaen hard samting saed lo ministry. Olsem example, staka mas barava waka hard for kasem wanem famili needim. Nomata olketa laek for duim staka samting lo ministry lo weekend, olketa taed tumas bihaen olketa waka for full week. Olketa narawan maet no fit for spendem staka taem lo preaching waka bikos olketa barava sik or olo. Samfala hia mas stap nomoa lo haos. Olketa nara brata and sista maet ting daonem olketa seleva. Nomata iumi kasem olketa hard samting, Jehovah savve strongim iumi for deal witim olketa samting hia and for gohed duim wanem iumi fit for duim. w21.05 20 ¶1-3

Samfala taem olketa narawan, maet laekem iumi for duim samting wea Jehovah no laekem. Taem olketa duim olsem, iumi mas disaedem stret samting. Tingim principle lo Levitikas 19:19 wea sei: “Yufala mas no werem kaleko wea olketa wakem long tufala deferen samting olsem koton an wul.” So olketa Israelite mas werem kaleko wea olketa wakem lo wanfala samting nomoa, and datwan mekem olketa difren from pipol lo olketa kantri raonem olketa. Distaem, hem no rong for iumi werem kaleko wea olketa mixim, olsem cotton and polyester. Bat iumi no laek olsem pipol wea no duim wanem Bible talem. Hem tru, iumi lovem olketa famili member blo iumi, bat iumi laek for obeyim Jehovah lo evri samting, nomata datwan mekem iumi difren from olketa hia. Diswan hem barava important sapos iumi laek for holy.​—2 Cor. 6:14-16; 1 Pet. 4:3, 4. w21.12 5 ¶14; 6 ¶16

Iu savve faendem datfala road wea lead go for laef. Jesus sei: “Sapos iufala followim teaching bilong mi, iufala barava disaepol bilong mi nao. Iufala bae savve long samting wea tru, and datwan bae mekem iufala free.” (John 8:31, 32) Hem gud iu no laek followim datfala road wea waed, and iu lukaotem truth. Iu studyim Bible for lanem wanem God laekem iu for duim and iu herem olketa teaching blo Jesus. Iu lanem hao Jehovah laekem iu for lusim olketa teaching blo false religion, and for stop for celebratem olketa samting olsem Christmas and Easter. Iu luksavve tu hao taem iu changem samfala samting lo laef for duim wanem Jehovah laekem, maet datwan no isi. (Matt. 10:34-36) Taem iu duim olsem, maet iu kasem hard taem. Nomata olsem, iu waka hard for change from iu lovem Jehovah. Hem mas barava hapi lo iu!​—Provebs 27:11. w21.12 22 ¶3; 23 ¶5

Moses hem gud example for iumi bikos hem willing for acceptim kaonsel taem hem duim bigfala mistek. From Moses kros lo olketa Israelite hem no mekhae lo Jehovah bat mekhae lo hemseleva. From diswan, Jehovah disaed for no letem hem for go insaed lo Promis Land. (Nambas 20:1-13) Taem Moses askem Jehovah for changem disison blo hem, Jehovah sei lo Moses: “Yu mas no talem eni toktok moa abaotem disfala samting.” (Diutronomi 3:23-27) Moses no feel nogud lo datwan, bat hem acceptim wanem Jehovah talem, and Jehovah gohed for iusim hem for leadim olketa Israelite. (Diutronomi 4:1) Moses acceptim kaonsel, and hem gud example for iumi followim. Moses showimaot hem acceptim kaonsel blo Jehovah bikos hem gohed faithful nomata hem lusim bigfala privilege blo hem. Bae hem barava helpem iumi taem iumi followim example blo olketa faithful man olsem Moses, olsem olketa nara brata and sista blo iumi duim.—Provebs 4:11-13. w22.02 11 ¶9-10

Lo winter blo 32 C.E., Lazarus, gud fren blo Jesus, hem sik and gogo hem dae. (John 11:3, 14) Lazarus garem tufala sista, Mary and Martha, and Jesus lovem thrifala hia. Taem Martha herem Jesus kakam followim road, hem ran go for meetim Jesus, and from hem barava sorre hem sei: “Lord, sapos iu long hia, hard for brata bilong mi dae.” (John 11:21, 32-33) Masbi Jesus sorre and krae taem hem lukim Mary and Martha sorre tumas from brata blo tufala dae. Sapos samwan iu lovem hem dae Jehovah minim feeling blo iumi. Jesus “barava olsem” Dadi blo hem. (Heb. 1:3) Jesus krae taem Lazarus hem dae, and datwan showimaot Jehovah garem sem feeling tu taem samwan hem dae. (John 14:9) Sapos samwan wea iumi lovem hem dae, iumi savve sure Jehovah hem tingim and sorre lo iumi, and hem laek for helpem iumi.​—Sams 34:18; 147:3. w22.01 15 ¶5-7

Hem gud for iusim taem blo iumi for prea lo Jehovah, studyim Bible, and ting raonem olketa samting iumi lanem abaotem hem. Why nao olsem? First reason, hem bikos datwan bae helpem iumi for mekem olketa gud disison. Bible sei hem gud for “fren wetem waes man, [bikos] bae yu waes.” (Provebs 13:20) Mek-tu reason, hem bikos datwan bae helpem iumi for teach gud. Taem iumi studyim Bible witim samwan, iumi laek for helpem hem for fren gud witim Jehovah. From iumi prea and studyim Bible, datwan helpem iumi for lovem Jehovah and hem bae helpem iumi for teachim Bible study blo iumi for lovem Jehovah tu. Tingim example blo Jesus. Hem savve storyim lo olketa disaepol blo hem why hem lovem Dadi blo hem, and datwan helpem olketa for lovem Jehovah tu. (John 17:25, 26 Mek-thri reason, hem bikos datwan bae helpem iumi for garem strongfala faith. Taem Jehovah ansarem olketa prea blo iumi for help, comfort, or sapot, datwan strongim faith blo iumi.​—1 John 5:15. w22.01 30 ¶15-17

Jehovah laekem olketa wea studyim Bible for lusim eni nogud tingting or nogud wei wea olketa garem, from hem lovem olketa and laekem olketa for hapi. (Aesaea 48:17, 18) Hem savve sapos iumi no lusim olketa nogud wei blo iumi, bae iumi spoelem iumiseleva and olketa narawan, and datwan savve mekem Jehovah sorre. Maet samfala fren or famili member tok spoelem iumi from iumi trae changem samfala wei blo iumi. (1 Pet. 4:3, 4) Olketa maet sei iumi garem raet for duim wanem iumi laekem and shud no followim tingting blo narawan. Bat for tok stret, olketa wea no laek followim standard blo Jehovah, olketa followim wei and tingting blo pipol lo world blo Satan. (Rome 12:1, 2) Iumi evriwan mas disaed sapos iumi bae keepim old wei blo iumi wea followim tingting blo Satan, or bae iumi change and followim olketa standard blo Jehovah.​—Aesaea 64:8. w22.03 3 ¶6-7

Taem iumi ting raonem wanem iumi readim lo Bible, datwan savve helpem iumi for deal witim olketa hard samting wea kasem iumi. Tingim example blo sista wea sorre tumas from hasband blo hem dae. Wanfala elder sei hem bae kasem gud samting sapos hem readim Bible buk blo Job. Hem duim datwan and hem lukim hao samfala toktok blo Job showimaot Job tingim nomoa samting wea happen lo hem. Hem laek talem Job: “Job! Iu tingim nomoa olketa problem blo iu!” Bat then sista hia luksavve hem tu lelebet olsem Job. Bible buk blo Job helpem and strongim hem for deal witim sorre feeling bihaen hasband blo hem dae. Jehovah iusim olketa brata and sista for strongim iumi. Paul raet lo olketa brata and sista and sei “mi laekem iumi evriwan strongim [each other].​—Rome 1:11, 12. w21.05 22 ¶10-11; 24 ¶12

Olketa Israelite kasem disfala instruction: “Evri yia, yufala olketa man, yufala mas kam trifala taem long datfala tambuples wea [Jehovah] hemi siusim.” (Diutronomi 16:16) Datwan minim olketa mas lusim haos and garden blo olketa and no eniwan stap for security. Bat Jehovah sei lo olketa: ‘Taem yufala kam fo wosipim mi, bae no eniwan hemi trae fo stilim lan ya from yufala.’ (Eksodas 34:24) From olketa Israelite trustim Jehovah, olketa hapi for go worshipim Jehovah lo olketa festival hia. Lo there, olketa lanem moa samting abaotem Law blo God, ting raonem gud samting wea Jehovah duim, and spendem taem witim olketa narawan wea lovem Jehovah. Iumi tu kasem olketa gud samting olsem taem iumi attendim olketa meeting. And masbi Jehovah hapi lo iumi taem iumi givim olketa short koment wea iumi ting raonem firstaem. w22.03 22 ¶9

Jehovah trainim Jesus for duim waka blo Hae Priest lo heven. Jesus experiencem hao hem no isi for obeyim God taem hem kasem bigfala test. Hem “prea big and hem krae tu” from hem laek gohed obeyim Jehovah. From Jesus barava safa, hem minim feeling blo iumi and hem savve hao for helpem iumi taem iumi kasem test. Iumi hapi tumas from Jehovah markem Jesus for Hae Priest bikos hem “minim olketa wik point bilong iumi”! (Heb. 2:17; 4:14-16; 5:7-10) Jehovah letem Jesus for safa for pruvim Satan hem laea. Satan sei no eni man savve gohed faithful lo God taem hem kasem test. Satan sei tu pipol worshipim God bikos olketa laek for kasem samting from God, and hem sei pipol bae no lovem Jehovah. (Job 1:9-11; 2:4, 5) From Jesus faithful go kasem taem hem dae, datwan pruvim Satan hem man for laea. w21.04 16-17 ¶7-8

Bifor Bible study savve baptaes, hem mas followim wanem Bible teachim. Bible study wea followim wanem hem lanem hem olsem datfala man lo tokpiksa blo Jesus “wea garem gudfala tingting.” Hem digim hol wea deep for putim faondeson blo haos antap lo ston. (Matt. 7:24, 25; Luke 6:47, 48) Helpem Bible study for changem olketa samting lo laef blo hem. (Mark 10:17-22) Jesus savve datfala rich man bae faendem hem hard for salem olketa samting wea hem ownim. (Mark 10:23) Jesus askem hem for duim datwan bikos hem lovem datfala man and hem luksavve man hia need for changem samting lo laef blo hem. Maet iumi hol bak for talem Bible study for changem samting from iumi tingse hem no redi yet. (Col. 3:9, 10) Bat hem gud for no delay for storyim samting Bible study need for changem mekem hem start for duim datwan. From iumi storyim datwan lo hem iumi showimaot iumi tingim hem.​—Sams 141:5; Provebs 27:17. w21.06 3 ¶3, 5

Taem aposol Peter sei for followim footstep blo Jesus, hem minim iumi shud followim example blo Jesus for no givap. Bat iumi savve followim example blo Jesus lo olketa nara samting tu. (1 Pet. 2:18-25) Evri samting wea Jesus duim and talem hem gudfala example for iumi followim. Nomata iumi no perfect, waswe, iumi savve followim example blo Jesus wea perfect? Ia! Taem Peter sei for “followim gud footstep bilong [Jesus]” hem encouragem iumi for traem best for followim example blo Jesus. Aposol John tu talem iumi for “duim sem samting wea [Jesus] duim,” wea minim iumi mas traem best for followim example blo hem. (1 John 2:6) Followim example blo Jesus mekem iumi fren gud witim Jehovah. Wanem nao Jesus duim mekem hem fren gud witim Jehovah? Jesus evritaem duim samting wea God laekem. (John 8:29) Taem iumi duim wanem God laekem olsem Jesus, datwan bae mekem Jehovah hapi and bae showimaot iumi laek fren witim Jehovah. So Jehovah bae laek fren witim iumi tu.​—Jas. 4:8. w21.04 3 ¶4-6

Jehovah leadim iumi kam lo truth bikos hem lukim olketa gudfala wei blo iumi, and luksavve iumi fit for changem samfala samting. Sapos iumi gohed faithful, bae hem fren blo iumi for olowe! (John 6:44) Hem important for luksavve Jehovah lovem iumi bikos nomata iumi deal witim olketa hard samting bae iumi laek for gohed worshipim Jehovah. Bat sapos iumi tingse God no lovem iumi, datwan savve mekem iumi for wikdaon. (Provebs 24:10) And taem iumi wikdaon, hem isi nao for Satan attakim iumi. (Eph. 6:16) From samfala brata and sista tingse Jehovah no lovem olketa, datwan mekem olketa for wikdaon. Sapos iumi olsem, iumi mas stretawe aotem datfala tingting! Askem Jehovah for changem tingting blo iumi and for givim iumi ‘peace bilong God wea bae gaedem heart and tingting bilong iumi.’ (Sams 139:23; Phil. 4:6, 7) Tingim, hem no iumiseleva nomoa savve ting daonem seleva. w21.04 20 ¶1; 21 ¶4-6

Hu nao helpem iu for kamap wanfala baptaes Witness? Maet iu herem gud nius from parents blo iu, samwan lo waka ples or skul, or samwan wea kam lo haos for preach lo iu. (Mark 13:10) Then, datfala pablisa iusim staka taem for studyim Bible witim iu. Datwan helpem iu for lovem Jehovah and for luksavve hem lovem iu. Jehovah leadim iu kam lo truth, and distaem from iu wanfala disaepol blo Jesus Christ, iu garem chance for kasem laef olowe. (John 6:44) Iumi barava tinghae lo Jehovah from Hem iusim samwan for teachim iumi olketa truth lo Bible and from Hem acceptim iumi for worshipim hem. From iumi savve lo truth, iumi garem privilege for teachim narawan mekem olketa wakabaot witim iumi lo road for kasem laef olowe. Maet iumi no fraet for duim preaching waka, bat maet iumi hol bak for duim olketa Bible study. w21.07 2 ¶1-2