February

Jehovah laekem iumi wea worshipim hem for hapi. Hem luksavve taem iumi sorre or wikdaon and hem barava laek for helpem iumi. (Sams 145:18, 19) Tingim hao Jehovah helpem profet Elijah. Elijah stap lo taem wea pipol persecutim olketa Israelite from olketa worshipim Jehovah. And tu, king and queen barava laek for killim dae Elijah. (Fas Kings 19:1, 2) Elijah feel wikdaon bikos evri nara profet dae finis, and hem tingse hemseleva nomoa worshipim Jehovah. (Fas Kings 19:10) God lukim datwan and duim samting for helpem Elijah. Hem sendem wanfala angel for talem Elijah staka Israelite gohed faithful for worshipim Jehovah, and no hemseleva nomoa! (Fas Kings 19:5, 18) Jesus encouragem olketa disaepol taem hem sei olketa bae garem wanfala big spiritual famili. (Mark 10:29, 30) Dadi blo iumi Jehovah promis for helpem iumi.​—Sams 9:10. w21.06 8-9 ¶3-4

Samfala no laekem hao Olketa Jehovah’s Witness againstim olketa laea teaching. Olketa bigman blo religion teachim pipol God panisim olketa nogud man lo hellfire. Datwan mekem pipol fraet. Bat iumi teachim pipol God wea iumi worshipim showimaot love and hard for hem duim datwan. Olketa bigman teachim tu hao soul no savve dae. Bat iumi showimaot teaching hia no kam from Bible bikos sapos olsem, bae no eniwan need for resurrect. And staka religion sei God disaedem wanem bae happen lo iumi. Bat iumi teachim hao man seleva disaedem samting and savve chus for worshipim God. Wanem nao tingting blo olketa bigman taem iumi showimaot olketa teaching hia no tru? Olketa savve kros fogud! Bat olketa wea tinghae lo truth bae followim toktok blo God. (John 8:45, 46) Iumi no olsem Satan wea followim samting wea no tru, bat iumi followim olketa tru teaching. (John 8:44) Jehovah laekem iumi for olsem Jesus wea “barava heitim olketa rabis samting and hol strong long samting wea hem stret.”​—Rome 12:9; Heb. 1:9. w21.05 10 ¶10-11

Sapos iumi luksavve iumi foldaon lo trap for praod or greedy, wanem nao iumi shud duim? Aposol Paul sei olketa wea Devil “kasholem olketa” savve aot from datfala trap. (2 Tim. 2:26) Hem important for luksavve Jehovah nao strong winim Satan. So depend lo Jehovah for helpem iumi mekem iumi aot from trap blo Satan. Iumi no laek for Satan kasholem iumi, so iumi shud stap klia lo olketa trap blo hem. So evritaem askem Jehovah for helpem iumi luksavve sapos iumi start for kamap praod or greedy. (Sams 139:23, 24) Waka hard for no kamap praod or greedy! For staka thousand year finis Satan trae for trapim pipol blo God. Bat klosap nao Jesus bae kasholem hem, and gogo bae Jesus finisim hem. (Rev. 20:1-3, 10) Iumi luk forward lo datwan! Bat distaem iumi mas stap klia lo olketa trap blo Satan. Traem best for no kamap praod or greedy. Disaed strong for “againstim Devil mekem hem ranawe from iufala.” w21.06 19 ¶15-17

Jehovah barava hapi lo man wea kam insaed lo truth and storyim wanem hem lanem lo olketa narawan. (Provebs 23:15, 16) Masbi Jehovah hapi taem hem lukim iumi waka hard for preach and teachim pipol distaem! Olsem example, lo 2020 service year nomata iumi evriwan deal witim datfala coronavirus, Olketa Jehovah’s Witness duim 7,705,765 Bible study and 241,994 lo olketa hia dedicate lo Jehovah and baptaes. Then olketa hia tu bae garem olketa Bible study and helpem olketa for kamap disaepol. (Luke 6:40) Iumi savve Jehovah tinghae lo iumi taem iumi duim datfala waka for helpem pipol kamap disaepol. Hem bigfala waka for duim wanfala Bible study, bat Jehovah savve helpem iumi for duim waka hia for teachim pipol for lovem hem. Hem bae gud for markem goal for garem wanfala Bible study. Taem chance kamap for preach lo pipol wea iumi meetim, hem gud for askem olketa sapos olketa laek for studyim Bible. w21.07 6-7 ¶14-16

King David givim staka material samting for sapotim datfala waka. (Fas Kronikols 22:11-16) Nomata olketa olo maet no fit for waka lo olketa construction project, olketa savve sapotim olketa project hia taem olketa givim contribution wea olketa fit for givim. Olketa savve storyim tu, staka gud experience wea olketa garem lo olketa young wan. Tingim wanem Paul duim for helpem Timothy. Paul askem Timothy for joinim hem taem hem duim missionary waka, and trainim hem hao for duim gud preaching and teaching. (Acts 16:1-3) Training wea Timothy kasem from Paul helpem hem for barava duim gud ministry. (1 Cor. 4:17) Then Timothy trainim olketa narawan, olsem hao Paul trainim hem. w21.09 12 ¶14-15

Wanem nao iumi savve lane from example blo disaepol Apollos and aposol Paul? Tufala evriwan savve gud lo olketa Scripture, savve gud hao for teach, and helpem staka pipol for kamap disaepol. Nomata olsem, tufala no garem eni reason for laek winim each other. (Acts 18:24) Bihaen Apollos lusim Corinth, Paul talem hem for go bak lo there. (1 Cor. 16:12) Apollos iusim savve blo hem for preachim gud nius and for strongim olketa brata and sista. Apollos hem man wea hambol. Olsem example, Bible no sei hem feel nogud taem Aquila and Priscilla “helpem hem for minim gud moa teaching bilong God. (Acts 18:24-28.).Aposol Paul savve lo gudfala waka wea Apollos hem duim, bat hem no laek for trae winim Apollos. Kaonsel wea Paul raetem for olketa lo Corinth helpem iumi for luksavve Paul hem hambol and no tinghae lo hemseleva.​—1 Cor. 3:3-6. w21.07 18-19 ¶15-17

Adam and Eve min for no obeyim God, so God aotem tufala from famili blo hem. Bat waswe lo olketa from laen blo tufala? Jehovah adoptim samfala wea faithful lo hem for kam insaed lo famili blo hem. Sakrifaes blo Jesus nao mekem olketa fit for kasem datwan. (John 3:16) Bible sei God hem adoptim 144,000 wea faithful for kamap olketa son blo hem. (Rome 8:15-17; Rev. 14:1) Olketa narawan wea faithful lo God bae garem chance for stap insaed famili blo God for olowe bihaen datfala last test lo end blo thousand year rul blo Jesus. (Sams 25:14; Rome 8:20, 21) Nomata olsem, distaem iumi savve kolem Jehovah “Dadi” blo iumi. (Matt. 6:9) Olketa wea dae finis and laef bak bae garem chance for lane abaotem wanem Jehovah laekem olketa for duim, and olketa wea duim wanem Jehovah laekem bae fit for insaed famili blo Jehovah tu. w21.08 5 ¶10-11

Aposol Paul duim gud ministry blo hem bikos hem “luksavve long olketa samting wea barava important.” Ministry blo hem nao hem barava important samting lo laef blo hem. Hem preach lo “pablik and long haos tu haos. (Acts 20:20) Hem iusim evri chance wea hem garem for preach! Olsem example, taem hem weit for samfala brata for kam joinim hem lo Athens, hem preach lo staka bigman, and samfala biliv. (Acts 17:16, 17, 34) Nomata taem Paul “stap long prison,” hem preach lo olketa narawan lo there. (Phil. 1:13, 14; Acts 28:16-24) Paul iusim gud taem blo hem for trainim olketa narawan. Staka taem hem invaetem narawan for joinim hem lo assignment blo hem. Olsem example, hem tekem John Mark lo first missionary gogo blo hem, then lo mek-tu taem, hem tekem Timothy. (Acts 12:25; 16:1-4) Luk olsem Paul trainim olketa brata hia lo hao for organizem waka lo kongregeson, hao for duim shepherding waka, and hao for teach gud lo kongregeson.​—1 Cor. 4:17. w22.03 27 ¶5-6

Samfala sei olketa no biliv lo God bikos olketa no lukim hem. Nomata olsem, olketa biliv lo olketa nara samting wea olketa no lukim, olsem air, bikos olketa garem pruv hem stap. Nomata man no savve lukim God, Bible sei pipol savve garem faith lo hem bikos kliafala pruv hem stap for showimaot diswan. (Heb. 11:1) Bat bae hem tek taem for studyim olketa pruv hia, and samfala no laek duim datwan. Man wea no studyim olketa pruv maet faendem hem hard for bilivim God hem stap. Samfala scientist studyim olketa pruv abaotem creation, and gogo olketa bilivim God nao wakem universe. Firstaem, staka scientist biliv lo evolution bikos university no teachim creation. Bat samfala distaem lane abaotem Jehovah, gogo olketa biliv lo hem and start for worshipim hem. Iumi tu need for waka hard for strongim faith blo iumi lo God, so iumi need for duim study seleva. w21.08 14 ¶1; 15-16 ¶6-7

Jesus story abaotem wanfala prodigal son for helpem iumi minim hao Jehovah barava laek for showimaot mercy. Datfala son lusim dadi and “hem spoelem selen bilong hem and evri samting dadi givim hem long enikaen rabis samting.” (Luke 15:13) Gogo hem sorre lo wanem hem duim, hem repent, and hem go bak lo hom. Wanem nao dadi duim taem hem lukim son blo hem? Jesus sei: “Taem [hem] lelebet farawe yet, dadi bilong hem lukim hem and barava sorre long hem. Hem ran go long hem, and hem holem and kissim hem.” Dadi no mek shame lo son blo hem, bat hem showimaot mercy and forgivim hem. Hem hapi tumas from son kam bak moa lo famili. Nomata son duim bigfala sin, from hem repent, dadi forgivim hem. Datfala dadi hem piksarem Jehovah. Jesus storyim hao Jehovah barava laek for showimaot mercy lo olketa wea repent and for forgivim olketa.​—Luke 15:17-24. w21.10 8 ¶4; 9 ¶6

Staka bigman blo religion waka hard for mek sure pipol no savve God garem nem. Olketa aotem nem blo God from Bible wea olketa iusim, and samfala no iusim lo lotu blo olketa. Olketa religion no mekhae lo nem blo God. Bat Olketa Jehovah’s Witness nao mekhae lo nem blo Jehovah! Iumi waka hard for witness abaotem Jehovah. (Aesaea 43:10-12) Iumi wakem winim 240 million copy blo New World Translation of the Holy Scriptures. Datfala Bible iusim nem blo Jehovah lo olketa scripture wea olketa nara transleita aotem from Bible blo olketa. And iumi wakem olketa Bible pablikeson lo winim 1,000 languis wea iusim nem blo Jehovah! w21.10 20-21 ¶9-10

Helpem olketa brata and sista wea garem need. Jehovah promis for blessim olketa Israelite wea kaen lo olketa wea poor. (Diutronomi 15:10) Sapos iumi helpem wanfala brata or sista wea garem need, hem olsem iumi duim samting for Jehovah. (Provebs 19:17) Olsem example, taem Paul hem insaed prison and olketa Christian lo Philippi sendem present lo hem, Paul sei God hapi lo datwan. (Phil. 4:18) Waswe, iu tingim eniwan lo kongregeson wea iu savve helpem? Jehovah hem hapi for lukim iumi iusim taem, strong, savve, and olketa material samting blo iumi for helpem olketa wea garem need, bikos datwan hem wanfala wei for worshipim God. (Jas. 1:27) Iumi need for iusim taem and strong blo iumi for worshipim Jehovah, bat hem no hard tumas for duim datwan. (1 John 5:3) Why nao olsem? Bikos iumi worshipim Jehovah from iumi lovem hem. w22.03 24 ¶14-15

Taem iumi savve lo hard samting wea olketa brata and sista feisim, bae iumi luksavve hao for helpem olketa. Olsem example, maet iumi faendaot wanfala sista garem health problem. Hem no laek askem narawan for helpem hem, bat bae hem hapi sapos samwan duim samting for helpem hem. Maet iumi savve kukim kaikai or klinim haos blo hem samfala taem. Or maet iumi faendaot wanfala brata no garem waka nao for selen. Maet iumi savve givim famili lelebet selen. Iumi savve givim stret or duim lo wei wea olketa no savve hu nao givim. Iumi laek for duim samting for helpem olketa brata and sista nomata olketa no askem iumi, olsem Jehovah duim for iumi evriwan. Olsem example, nomata iumi no askem Jehovah, hem mekem sun kamap evriday. And hot from sun mekem iumi evriwan kasem gud samting, nomata olketa wea no raeteous tu. From Jehovah provaedem evri samting wea iumi needim, datwan showimaot hem lovem iumi. Iumi tinghae lo Jehovah from hem kaen and lukaftarem iumi! w21.09 22-23 ¶12-13

From God garem strongfala love hem bae forgivim iumi. Taem Jehovah luksavve samwan wea duim sin hem repent and lusim nogud wei blo hem, Jehovah forgivim hem. David sei olsem abaotem Jehovah: “Hemi no save panisim yumi fitim olketa sin blong yumi, an hemi no save sensimbaek olketa nogud wei blong yumi.” (Sams 103:8-11) David experiencem hao sin mekem hem guilty and for sorre tumas. Bat hem savve tu Jehovah hem “willing for forgive.” Wanem nao mekem Jehovah for forgive? Ansa stap lo text blo iumi for tuday. Lo datfala prea, David sei taem samwan wea sin askem Jehovah for forgivim hem, Jehovah duim datwan bikos hem garem strongfala love for hem. Hem stret for sorre from iumi duim sin, bikos datwan savve helpem iumi for ask for forgiveness and for changem wei blo iumi. w21.11 5 ¶11-12

Jehovah laekem evriwan for tinghae lo nem blo hem. (Aesaea 42:8) Bat for winim six thousand year pipol barava spoelem nem blo hem. (Sams 74:10, 18, 23) Datwan start taem Devil (wea nem hia minim “samwan wea tok spoelem narawan”) sei God stopem Adam and Eve for kasem samting tufala needim. (Jenesis 3:1-5) Start kam lo datfala taem, Satan gohed for mekem pipol tingse Jehovah stopem olketa for kasem wanem olketa barava needim. Jesus feel nogud lo olketa wea spoelem nem blo Dadi blo hem. Jehovah nao fit for rulim olketa lo heven and lo earth and rul blo hem barava stret. (Rev. 4:11) Bat Satan trae for mekem olketa angel and pipol for tingse God hem no fit for rul. Klosap nao evriwan bae luksavve God nomoa fit for rul and Kingdom blo God nomoa savve mekem full world garem peace and for evriwan stap gud. w21.07 9 ¶5-6

Dadi bae laek for provaedem kaikai, kaleko, and ples for famili stap lo hem. Waswe, distaem iu lusim waka blo iu or iu stragol for kasem inaf selen? Sapos olsem, datwan no isi. Bat maet iu savve iusim disfala taem for strongim faith blo iu. Hem gud for readim wanem Jesus talem lo Matthew 6:25-34 and ting raonem datwan. Tingim tu example blo olketa brata and sista wea busy lo waka blo Jehovah and hem provaedem wanem olketa needim. (1 Cor. 15:58) Datwan bae helpem iu for garem strongfala faith lo Jehovah for lukaftarem iu, olsem hem duim for olketa narawan. Jehovah savve lo wanem iu needim, and bae hem provaedem datwan. Taem iu luksavve Jehovah hem evritaem lukaftarem iu, datwan bae strongim faith blo iu mekem iu fit for deal witim olketa hardfala test lo future. w21.11 20 ¶3; 21 ¶6

Samfala Christian wea olo distaem sei from olketa tinghae lo ransom datwan helpem olketa lo full laef blo olketa. Datwan strongim olketa for gohed preach nomata pipol againstim olketa, and hem helpem olketa for deal witim hard samting lo laef. Tingim example blo aposol John. Luk olsem hem gohed for preach abaotem Christ and datfala ransom for winim 60 year. Taem John klosap 100 years, olketa lo Rome forcem hem for go stap lo Patmos. Why nao olketa duim datwan? From olketa laek stopem hem for ‘story abaotem God and talem tru samting abaotem Jesus.’ (Rev. 1:9) John hem showimaot gudfala example bikos hem faithful and no givap! Lo olketa Bible buk wea John raetem, hem storyim hao hem lovem Jesus and tinghae lo ransom. Hem storyim ransom or gud samting iumi kasem from datwan winim 100-fala taem. (1 John 2:2) John barava tinghae lo ransom. w21.04 17 ¶9-10

Jehovah laekem pipol blo hem for mas kaen lo olketa wea blind, earpas, or kripol. Olsem example, hem talem olketa Israelite for no talem eni nogud samting lo man wea earpas. Datwan hem barava nogud samting for duim bikos man wea earpas no savve herem datwan, and no savve talem samting go bak lo samwan wea tok spoelem hem. Lo Levitikas 19:14 tu, God sei olketa Israelite “mas no mekem eni blaen man fo hemi foldaon.” Wanfala buk wea storyim pipol wea blind, earpas, and kripol sei: “Pipol lo Midol East lo datfala taem savve treatim nogud [kaen pipol olsem].” Maet olketa duim samting for mekem man wea blind for foldaon from olketa les lo hem or for laflaf lo hem. Olketa barava spoelem man olsem! Datfala law lo verse 14 helpem pipol blo Jehovah for luksavve olketa shud tingim and kaen lo pipol wea earpas, blind, or kripol. w21.12 8-9 ¶3-4

Jacob hem fraet tumas nogud brata blo hem Esau still laek for killim hem dae. So hem prea lo Jehovah firstaem, then hem sendem go staka animal lo Esau olsem present. (Jenesis 32:9-15) Taem Jacob meet witim Esau hem baodaon lo Esau sevenfala taem for showimaot respect lo hem. From Jacob hambol and showimaot respect lo brata blo hem, datwan helpem tufala for mek peace. (Jenesis 33:3, 4) Iumi lanem gud samting from wanem Jacob duim bifor hem meetim Esau, and hao hem showimaot respect lo Esau taem hem meetim hem. Jacob askem Jehovah tu for helpem hem. Then hem duim samting followim datfala prea and go for mek peace witim Esau. Taem tufala meet, Jacob no laek pruvim hem nao stret and Esau nao rong. Goal blo Jacob hem for stretem problem blo tufala. Waswe, iumi savve followim example blo Jacob?​—Matt. 5:23, 24. w21.12 25 ¶11-12

Taem iu ting raonem hao Jesus hem dae for mekem iu kasem forgiveness for olketa sin blo iu, maet iu tingse, ‘Kaen man olsem mi no fit for kasem datwan.’ Why nao maet iu ting olsem? Olsem Bible talem, heart blo iumi savve mekem iumi feel guilty, then bae iumi tingse God no lovem iumi. (1 John 3:19) Nomata iumi garem kaen feeling olsem, iumi need for luksavve “God hem savve gud long iumi winim iumiseleva” and hem lovem and forgivim iumi. Iumi need for changem tingting blo iumi and acceptim hao Jehovah lovem iumi. Samting wea savve helpem iumi hem for readim Bible evriday, prea evritaem, and spendem taem witim olketa brata and sista. Why nao hem barava important for duim olketa samting hia? Bae iu lanem staka samting abaotem olketa naesfala wei blo Jehovah. And tu, bae iu luksavve hem barava lovem iu. Bihaen iu readim samting lo Bible and ting raonem datwan, hem savve stretem tingting blo iu and helpem iu for luksavve Jehovah lovem iu.​—2 Tim. 3:16. w21.04 23-24 ¶12-13

Iumi mas duim samting for strongim faith blo iumi. Taem iumi studyim Bible, hem important for iumi ting raonem wanem iumi lanem. Tingim wanem man wea raetem Sams 77 duim taem hem wari bikos hem tingse Jehovah no hapi lo hem and olketa nara Israelite. From hem wari tumas, hem no savve sleep lo naet. (Verse 2-8) So hem sei lo Jehovah: “Bae mi tingting strong long evri gudfala samting an evri bikfala samting wea yu bin duim.” (Verse 12) Nomata disfala man savve lo olketa samting wea Jehovah duim for pipol blo hem bifor, hem wari and sei: “Waswe, God hemi no sore long mifala nao? Waswe, kros blong hem long mifala hemi ovam moa nao wei wea hemi kaen long mifala?” (Verse 9) So hem ting raonem evri samting wea Jehovah duim bifor and hao God showimaot mercy lo pipol blo hem. (Verse 11) Hao nao datwan helpem hem? Disfala man luksavve hard for Jehovah lusim pipol blo hem. (Verse 15) w22.01 30 ¶17-18

Jehovah luk forward for lukim moa olketa faithful man and woman wea dae! (Job 14:15) Masbi Jehovah barava missim fren blo hem Abraham. (Jas. 2:23) And hem mas missim tu hao hem savve story witim Moses. (Eksodas 33:11) Masbi hem luk forward for herem moa olketa song blo David and narawan wea raetem olketa song for praisem hem! (Sams 104:33) Jehovah no forgetim olketa hia nomata olketa dae finis. (Aesaea 49:15) Hem rememberim evri samting abaotem olketa. Klosap nao Jehovah bae mekem olketa laef bak, and olketa bae worshipim and prea lo hem moa. Olketa samting hia savve comfortim iumi sapos samwan wea iumi lovem hem dae. Taem Satan, Adam, and Eve bighed lo Eden, Jehovah savve gogo evri samting bae kamap nogud. Hem heitim olketa nogud samting wea pipol duim distaem. w21.07 10 ¶11; 12 ¶12

From iumi lovem olketa brata and sista datwan showimaot iumi tinghae lo ransom. Why nao olsem? Bikos Jesus dae for iumi and olketa brata and sista wea showimaot Jesus lovem olketa tu. (1 John 3:16-18) Iumi savve showimaot iumi lovem olketa brata and sista taem iumi duim gud samting for olketa. (Eph. 4:29, 31–5:2) For example, iumi helpem olketa taem olketa sik or taem olketa kasem nogud samting, olsem natural disaster. Bat wanem nao iumi shud duim taem brata or sista duim or talem samting wea mekem iumi feel nogud? Waswe, iu faendem hem hard for forgivim samfala brata or sista? (Levitikas 19:18) Sapos olsem, followim disfala advaes: “Nomata sapos eniwan long iufala hem feel nogud long narawan, hem mas no kros bat mas evritaem forgivim hem. Iufala mas olsem Jehovah wea hem willing for forgivim iufala.” (Col. 3:13) Evritaem iumi forgivim olketa brata and sista, iumi showimaot lo Jehovah iumi tinghae lo ransom. w21.04 18 ¶12-13

Maet iumi waka hard for preachim gud nius and helpem staka for kamap disaepol, bat iumi luksavve Jehovah nao helpem iumi. Samting wea iumi lanem from Apollos and aposol Paul, hem hao olketa wea garem bigfala responsibility lo kongregeson shud no laekem olketa brata and sista for mekhae lo olketa. Iumi tinghae tumas lo olketa elder and ministerial servant wea iusim Bible for helpem iumi, and wea no mekhae lo tingting blo olketa seleva bat mekhae lo example blo Jesus. (1 Cor. 4:6, 7) God givim iumi savve for duim olketa difren samting lo kongregeson. Maet iumi tingse wanem iumi duim hem smol nomoa. Bat evri samting iumi duim, nomata hem smol, savve helpem kongregeson for stap gud tugeta. Iumi no laek for trae winim narawan, bat iumi laek for stap gud and wan mind witim evriwan lo kongregeson.​—Eph. 4:3. w21.07 19 ¶18-19

Iumi sure bae iumi lukim moa olketa wea iumi lovem wea dae finis. From Jesus hem krae witim olketa fren blo hem wea sorre, datwan showimaot Jesus laekem tumas for resurrectim olketa wea dae! (John 11:35) Iumi savve comfortim olketa wea sorre taem samwan olketa lovem hem dae. Jesus krae witim Martha and Mary, and hem lisin and comfortim tufala. (John 11:25-27) Iumi tu savve comfortim olketa wea sorre. Dan, wanfala elder wea stap lo Australia sei: “Bihaen waef blo mi dae, mi barava needim olketa narawan for comfortim mi. Samfala fren blo mi barava willing for lisin lo mi taem mi krae and storyim feeling blo mi, nomata lo daytaem or lo naet. Olketa helpem mi tu lo olketa nara samting, olsem for wasim car blo mi, shopping, and kuki for mi. And staka taem olketa prea witim mi tu. Olketa nao trufala fren wea redi for ‘helpem mi long hadtaem’ wea kasem mi.”​—Provebs 17:17. w22.01 16 ¶8-9

Jehovah laekem iumi for garem gudfala laef. (Provebs 4:20-22) Hem showimaot hem lovem iumi taem iumi kasem kaonsel from nara Christian, or iumi readim samting lo Bible or olketa pablikeson blo iumi wea helpem iumi. (Heb. 12:9, 10) Tingim hao kaonsel savve helpem iumi. Taem iumi kasem kaonsel, maet iumi tingse man wea kaonselem iumi no tingim feeling blo iumi. Hem tru, man wea givim kaonsel shud traem best for kaen taem hem duim datwan. (Galatia 6:1) Bat nomata iumi tingse man wea kaonselem iumi hem tok stret tumas lo iumi, hem gud for tingim hao datfala kaonsel savve helpem iumi. Bae hem gud for tingim: ‘Nomata mi no laekem hao datfala man story lo mi, maet samting hem talem lo mi hem tru. Nomata mi savve hem garem olketa wik point, waswe, kaonsel blo hem savve helpem mi?’ Bae hem wise for lisin and followim kaonsel wea iumi kasem. w22.02 12 ¶13-14

Jehovah savve samwan wea studyim Bible mas waka hard and bae hem tek taem for lusim samfala nogud tingting or wei blo hem. (Sams 103:13, 14) Bat Jehovah iusim Bible, holy spirit, and organization blo hem for helpem iumi for garem wisdom, strong, and sapot wea iumi needim for changem wei blo iumi. Iusim Bible for lukluk gud lo iumiseleva. Bible hem olsem mirror bikos hem savve helpem iumi for luksavve sapos tingting, toktok, and wanem iumi duim hem stret. (Jas. 1:22-25) Jehovah tu hem redi for helpem iumi. Hem nao best wan for helpem iumi bikos hem savve gud lo iumi. (Provebs 14:10; 15:11) So traem best for prea lo hem and studyim Bible evriday. Luksavve olketa standard blo Jehovah nao hem best. Iumi bae kasem gud samting sapos iumi duim wanem Jehovah laekem. Olketa wea followim olketa standard blo Jehovah garem gud and hapi laef.​—Sams 19:7-11. w22.03 4 ¶8-10

Wakem and lukaftarem olketa ples for worship. Bible sei olketa wea wakem tabernacle and olketa samting insaed, olketa duim “holy waka.” (Ex. 36:1, 4, NWT) Distaem tu construction waka hem samting wea olketa brata and sista duim for worshipim Jehovah. Samfala brata and sista iusim staka taem for wakem olketa Kingdom Hall and olketa nara building wea organization iusim for Kingdom waka. Iumi tinghae lo bigfala waka wea olketa duim. Olketa hia duim preaching waka tu and samfala maet laek for kamap regular pioneer. Sapos olketa fit for kasem hour blo pioneer, olketa elder shud no hol bak for appointim olketa taem olketa apply for pioneer. Diswan bae showimaot olketa elder sapotim construction waka wea olketa duim. Nomata iumi duim construction waka or nomoa, iumi evriwan fit for klinim and lukaftarem olketa building hia. w22.03 22 ¶11-12