March

“Olketa sheepsheep” lo tokpiksa blo Jesus wea Matthew 25:31-36 storyim, hem minim olketa nara sheepsheep wea garem hope for stap lo earth. Main samting wea olketa duim for helpem olketa anointed wan hem for sapotim olketa hia lo preaching waka wea gohed evriwea lo world, and for teachim pipol for kamap disaepol. (Matt. 24:14; 28:19, 20) Evri year, lo olketa week bifor Memorial, olketa nara sheepsheep sapotim olketa brata blo Christ for duim campaign for invaetem olketa wea interest for attendim Memorial. And tu, olketa arrangem evri samting for Memorial. Olketa hapi for duim olketa samting hia for sapotim olketa brata blo Christ. Olketa savve Jesus ting lo wanem olketa duim for sapotim olketa brata blo hem, hem olsem olketa duim for hem nao.​—Matt. 25:37-40. w22.01 22 ¶11-12

Jesus garem olketa gudfala wei olsem hem sorre lo man wea leprosy, hem tok kaen lo wanfala woman wea barava sik, and hem krae witim olketa fren and relative blo Lazarus wea dae. Taem iumi garem olketa wei olsem Jesus, iumi followim example blo Jehovah tu. (Mark 1:40, 41; 5:25-34; John 11:33-35) From iumi traem best for showimaot olketa wei blo Jesus and Jehovah, iumi bae fren gud witim Jehovah. Followim example blo Jesus mekem olketa samting lo world no savve switim iumi. Lo naet bifor Jesus dae, hem fit for sei: “Mi winim world finis.” (John 16:33) Datwan showimaot Jesus no letem tingting blo pipol lo world, goal blo olketa, and wanem olketa laekem for switim hem. Hem evritaem tingim hem kam lo earth for mekhae lo nem blo Jehovah. Waswe, iumi followim example blo Jesus? Staka samting lo world savve switim iumi. Bat sapos iumi evritaem tingim wanem Jehovah laekem, olsem Jesus duim, iumi tu bae fit for sei iumi “winim” disfala world.​—1 John 5:5. w21.04 3-4 ¶7-8

Aposol Paul savve lo promis blo Jesus wea sei ‘evriwan wea showimaot faith long Jesus bae kasem laef olowe.’ (John 3:16; Rome 6:23) From Paul showimaot faith lo ransom sakrifaes blo Jesus, nomata hem duim bigfala sin from hem repent, hem sure Jehovah forgivim hem. (Sams 86:5) Nara samting, Paul sure God lovem hem bikos God sendem Jesus for dae for hem and olketa narawan. Lo Galatia 2:20 Paul sei ‘Son bilong God lovem mi and dae for sevem mi.’ Datwan showimaot Paul savve Jehovah lovem hem. And Paul luksavve Jehovah lovem olketa narawan tu, dastawe hem sei lo olketa blo Rome: “Christ hem dae for iumi taem iumi sin yet.” (Rome 5:8) God lovem iumi evriwan! Paul barava sure no eni samting ‘savve stopem iumi for no kasem love bilong God.’ Paul savve Jehovah patient and showimaot mercy lo olketa Israelite bifor, and Jehovah showimaot mercy lo hem tu. w21.04 22 ¶8-10

Taem iu study witim samwan, helpem hem for lovem Jehovah. Hao nao for duim datwan? Storyim olketa gudfala wei blo Jehovah and storyim hao hem datfala hapi God wea lukaftarem olketa wea lovem hem. (1 Tim. 1:11; Heb. 11:6) Helpem Bible study for luksavve hem bae kasem olketa blessing from hem followim wanem hem lanem, and explainim olketa blessing hia showimaot Jehovah lovem hem. (Aesaea 48:17, 18) Taem Bible study lovem Jehovah, datwan bae helpem hem for changem eni nara samting. For samfala Bible study kasem goal for baptaes, maet olketa mas changem samting lo laef. Samfala Bible study mas sakrifaesim olketa material samting. Or samfala mas stop for fren witim olketa fren blo olketa wea no lovem Jehovah. Or maet samfala lo famili les lo Bible study from olketa no laekem Olketa Jehovah’s Witness. Jesus sei olketa wea kamap follower blo hem bae hapi lo datfala disison bikos olketa bae insaed wanfala spiritual famili wea lovem olketa.​—Mark 10:29, 30. w21.06 4-5 ¶8-9

Aposol Paul sei waka for teachim pipol hem olsem iumi duim samting for mekem wanfala seed wea iumi plantim finis for grow. Hem sei lo olketa lo Corinth: “Mi plantim seed, Apollos hem watarem . . . Iufala nao garden bilong God.” (1 Cor. 3:6-9) From iumi olketa wakaman lo “garden bilong God,” taem iumi preach hem olsem iumi plantim seed, and taem iumi teach hem olsem iumi watarem plant and gohed lukluk sapos hem grow. Bat iumi luksavve hao God nao mekem olketa seed for grow. Iumi garem nambawan privilege for preachim gud nius lo pipol, and for teachim truth lo olketa tu. Disfala waka mekem iumi for barava hapi! Aposol Paul, wea helpem staka lo Thessalonica for kamap disaepol barava hapi lo olketa. Hem sei: “Iufala nao hope and prize wea mekem mifala hapi long taem wea Lord bilong iumi Jesus hem stap. Mifala barava feel praod and hapi long iufala nao.”​—1 Thess. 2:19, 20; Acts 17:1-4. w21.07 3 ¶5; 7 ¶17

Jehovah leadim each wan lo iumi kam lo hem. (John 6:44) Datwan minim taem Jehovah lukluk lo heart blo evriwan, hem lukim gud samting lo heart blo iumi and hem luksavve iumi savve fren witim hem. (Fas Kronikols 28:9) Diswan showimaot Jehovah savve lo iumi, minim iumi, and hem lovem iumi. Iumi barava tinghae lo datwan! Jehovah lovem iu and evri nara brata and sista lo kongregeson. Jesus mekhae lo diswan taem hem comparem Jehovah witim wanfala shepherd. Sapos shepherd garem 100 sheepsheep and wanfala hem lus, wanem nao bae hem duim? Hem bae “leavim nara 99 sheepsheep antap long maunten and go lukaotem datwan wea lus.” Taem shepherd faendem sheepsheep wea lus, bae hem no kros, bat bae hem barava hapi. Wanem nao iumi lanem? Evriwan lo kongregeson hem important lo Jehovah. Jesus sei Dadi blo hem “no laekem eniwan long olketa disaepol hia for lus.”​—Matt. 18:12-14. w21.06 20 ¶1-2

Taem iumi ting raonem hao God barava lovem iumi, datwan bae strongim love blo iumi for Jehovah and helpem iumi for barava fren gud witim hem. (Rome 8:38, 39) Iumi laek for followim example blo Jesus. (1 Pet. 2:21) Lo olketa day bifor Memorial, iumi duim Bible reading abaotem olketa samting wea happen lo last week blo Jesus lo earth, abaotem dae blo hem, and abaotem taem wea hem laef bak. Then lo Memorial, iumi herem wanfala tok wea helpem iumi for tingim love wea Jesus showimaot for iumi. (Eph. 5:2; 1 John 3:16) Taem iumi read abaotem and ting raonem example blo Jesus, iumi laek “duim sem samting wea hem duim.” (1 John 2:6) Iumi laek for gohed fren gud witim God. (Jude 20, 21) Iumi bae gohed fren gud witim God taem iumi obeyim hem, mekhae lo nem blo hem, and duim samting wea mekem hem hapi. (Provebs 27:11; Matt. 6:9; 1 John 5:3) Taem iumi attendim Memorial, datwan bae helpem iumi for disaed strong for gohed fren witim Jehovah for olowe. w22.01 23 ¶17-18; 25 ¶19

Jehovah letem iumiseleva for disaedem olketa samting. Iumi savve disaed for worshipim Jehovah or nomoa. Jehovah hem barava hapi taem iumi disaed for worshipim hem. (Sams 84:11; Provebs 27:11) Iumi savve disaed tu for duim olketa nara samting wea mekem Jehovah hapi. Iumi savve followim example blo Jesus for tingim olketa narawan firstaem. Wanfala taem Jesus and olketa aposol barava taed so olketa go lo wanfala kwaet ples for rest lelebet, bat staka pipol kam lo Jesus and laekem hem for teachim olketa. Nomata olsem, Jesus no kros, bat hem laek helpem olketa. So wanem nao hem duim? “Hem teachim olketa plande samting.” (Mark 6:30-34) Sapos iumi iusim taem and strong blo iumi for helpem olketa narawan olsem Jesus duim, datwan bae mekhae lo Jehovah.​—Matt. 5:14-16. w21.08 3 ¶7-8

Jehovah no laekem evri samting for semsem. Iumi savve lo datwan bikos hem wakem staka difren kaen plant, animal, and nomata iumi olketa man iumi no semsem. No eniwan semsem olsem iumi. So hard for Jehovah comparem iumi witim olketa narawan. Hem savve gud lo wanem kaen man nao iumi. (Fas Samuel 16:7) Hem savve tu lo wanem iumi fit for duim, olketa samting wea iumi no savve duim, and wei blo famili blo iumi. Jehovah no askem iumi for duim wanem iumi no fit for duim. So iumi tu laek for followim example blo hem. Then bae iumi garem “gudfala tingting,” and no tinghae tumas lo iumiseleva or ting daonem iumiseleva. (Rome 12:3) Hem gud samting for lane from example blo brata or sista wea duim gud ministry. (Heb. 13:7) Maet iumi luksavve lo samfala samting wea iumi savve kamap gud lo hem lo ministry. (Phil. 3:17) Hem gud for followim example blo narawan, bat no comparem iumiseleva witim hem and tingse iumi mas barava olsem hem bikos datwan savve mekem iumi jealous, wikdaon, or feel iusles. w21.07 20 ¶1-2

Sapos iumi tek taem for lane abaotem olketa animal, plant, and star, datwan bae strongim faith blo iumi lo Jehovah. (Sams 19:1) Taem iumi lane abaotem olketa samting hia wea Jehovah wakem, ting raonem wanem datwan teachim iumi abaotem Jehovah. (Rome 1:20) Olsem example, hot from sun mekem iumi fit for laef lo earth, bat samfala laet (ultraviolet laet) from sun savve spoelem olketa samting wea laef lo earth, so wanem nao God wakem for protectim iumi? Hem wakem ozone layer, wea olsem shield raonem earth wea stopem sun for no spoelem iumi. Haomas ozone stap lo air hem savve change for fitim haomas ultraviolet laet hem kam from sun. Datwan helpem iumi for luksavve God nao wakem ozone layer and hem duim datwan bikos hem tingim iumi. w21.08 17 ¶9-10

Bihaen samwan hem baptaes finis, iumi mas gohed for respectim and showimaot love lo hem. (1 John 4:20) Olsem example, sapos iumi no hapi lo samting wea hem duim, bae iumi no judgem hem and sei hem nogud man. Bat bae iumi trae for minim hem, showimaot respect lo hem, and no tingse iumi winim hem. (Rome 12:10; Phil. 2:3) Kaen and showimaot mercy lo narawan. Sapos iumi laek for insaed famili blo Jehovah, iumi mas followim wanem Bible talem. Olsem example, Jesus teachim iumi for kaen and showimaot mercy lo narawan, nomata olketa enemy blo iumi tu. (Luke 6:32-36) Maet samfala taem hem no isi samting for duim. Nomata olsem, iumi mas followim example blo Jesus for kaen lo narawan and showimaot mercy. Datwan bae showimaot iumi laek for insaed lo famili blo Jehovah for olowe. w21.08 6 ¶14-15

Hem gud for depend lo Jehovah. Sapos iumi trustim Jehovah and duim best blo iumi lo waka blo hem, hem promis for blessim iumi. Bible storyim staka example blo olketa wea mas duim samting firstaem bifor olketa kasem blessing from Jehovah. Olsem example, Abraham mas lusim hom blo hem for go lo ples wea hem no savve, and then Jehovah blessim hem. (Hebrew 11:8) And tu, Jacob mas stragol witim wanfala angel firstaem bifor Jehovah blessim hem. (Jenesis 32:24-30) Nara example, hem olketa Israelite wea redi for go insaed lo Promis Land. Olketa priest mas firstaem step insaed Jordan River bifor olketa Israelite savve akrosim river for go lo narasaed. (Josua 3:14-16) Iumi savve followim tu example blo olketa brata and sista distaem, wea olketa duim moa samting lo ministry and wea depend lo Jehovah for helpem olketa. w21.08 29-30 ¶12-14

Iufala olketa olo brata and sista garem staka experience lo hao for duim olketa samting, bat iufala luksavve staka samting hem change distaem and maet iufala need for change tu. Nomata maet iu baptaes taem iu olo, iu savve helpem olketa narawan. Tingim, olketa narawan bae laek for herem olketa experience blo iufala. Sapos iufala sharem wanem iufala savve lo hem witim olketa narawan, Jehovah bae barava blessim iufala. (Luke 6:38) Hem barava gud for olketa wea olo and olketa wea young for fren gud tugeta bikos olketa savve sapotim each other. (Rome 1:12) Gud samting wea olketa olo garem hem wisdom and experience from olketa laef longtaem. Bat olketa young wan garem strong for duim waka. Taem olketa wea young and olketa wea olo fren and waka gud tugeta, datwan bae helpem full kongregeson and bae mekhae lo Jehovah. w21.09 8 ¶3; 13 ¶17-18

Olketa Jew tingse from Jesus dae lo post hem wanfala criminal and man wea sin, and hem no datfala Messiah. (Diutronomi 21:22, 23.) Olketa Jew wea rejectim Jesus nating luksavve hem no duim eni rong samting, and wanem pipol duim lo hem no stret. Olketa wea kotem hem no followim law from olketa kwiktaem kotem hem lo naet. (Luke 22:54; John 18:24) Olketa wea judgem Jesus no laek savve lo tru samting abaotem hem, bat olketa “lukaotem eni pruv for sei Jesus hem fit for dae.” (Matt. 26:59; Mark 14:55-64) Then bihaen Jesus laef bak, olketa nogud judge hia givim “staka silver coin” lo olketa soldia wea gaedem cave, for talem laea story abaotem why body blo Jesus no stap lo cave.​—Matt. 28:11-15. w21.05 11 ¶12-13

Jehovah fit for finisim disfala nogud world enitaem nomoa, bat from hem patient gud samting kamaot from datwan! Evriwan wea kam from laen blo Adam and Eve no perfect taem olketa born. Nomata olsem, Jehovah lovem and lukaftarem olketa, and hem promis for finisim disfala nogud world. (1 John 4:19) Hem markem finis taem for duim datwan. From iumi lovem Jehovah, iumi tu shud gohed deal witim olketa samting hia olsem hem duim. Jesus followim example blo Dadi blo hem wea showimaot nambawan example lo hao for deal witim olketa nogud samting. Jesus no givap nomata pipol tok spoelem hem, mek shame lo hem, and gogo hem dae lo post for iumi. (Heb. 12:2, 3) Example blo Jehovah for deal witim olketa nogud samting barava helpem Jesus for gohed faithful and no givap. Iumi tu savve followim example blo Jehovah. w21.07 12-13 ¶15-17

Evriday Jehovah forgivim iumi for olketa sin blo iumi. (Sams 103:10-14) Jesus showimaot mercy and forgivim olketa follower blo hem bikos olketa no perfect and savve duim mistek. And hem willing for dae for iumi mekem iumi kasem forgiveness for olketa sin. (1 John 2:1, 2) Iumi savve strongim love wea iumi garem for olketa brata and sista taem iumi showimaot mercy and “forgivim” olketa. (Eph. 4:32) Maet samfala taem hem no isi, so iumi need for waka hard for duim datwan. Wanfala Wastaoa article wea garem title “Iumi Mas Evritaem Willing for Forgivim Narawan” barava helpem wanfala sista. Hem sei “[Datfala article] explainim hao taem iumi forgivim narawan, datwan no minim iumi no feel nogud or iumi tingse wanem hem duim hem olraet nomoa. Bat hem minim iumi no gohed kros lo hem, and bae iumi garem peace.” Taem iumi forgivim olketa brata and sista, iumi showimaot iumi lovem olketa and iumi followim example blo Dadi blo iumi Jehovah. w21.09 23-24 ¶15-16

Jesus tinghae lo truth abaotem God and olketa plan blo God. Evri samting wea Jesus duim showimaot datwan, and hem storyim datfala truth lo olketa narawan. (John 18:37) Olketa follower blo Jesus tu barava tinghae lo truth. (John 4:23, 24) Dastawe Peter sei olketa Christian followim “olketa tru teaching.” (2 Pet. 2:2) From olketa Christian lo first century tinghae lo truth, olketa no followim olketa idea blo olketa nara religion, kastom blo olketa man, or olketa idea wea againstim truth. (Col. 2:8) Distaem tu, iumi Olketa Jehovah’s Witness showimaot iumi “followim olketa tru teaching” bikos iumi bilivim and traem best for duim wanem Bible talem. (3 John 3, 4) Olketa Jehovah’s Witness no sei olketa barava minim evri samting lo Bible. Olketa mekem samfala mistek lo hao olketa explainim Bible teaching or hao olketa organizem kongregeson. Bat taem olketa luksavve lo stretfala mining blo wanfala Bible teaching, olketa willing for change followim datwan. w21.10 21-22 ¶11-12

Lo bifor, pipol trustim olketa wall blo taon for gaedem and protectim olketa from enemy. Strongfala love blo Jehovah hem olsem datfala wall and iumi sure hem bae protectim iumi from eni samting wea savve spoelem faith blo iumi. From Jehovah garem strongfala love for iumi hem leadim iumi kam lo hem tu. (Jer. 31:3, NWT) David story moa abaotem hao pipol blo God kasem protection. Hem sei abaotem Jehovah: “Yu lavem mi tumas. Yu nao yu sefples blong mi.” David sei tu: “Hem showimaot strongfala love lo mi. Hem sef ples blo mi and hem gohed sevem mi. Hem olsem shield blo mi and hem keepim mi sef.” (Sams 59:17; Ps. 144:2, NWT) Why nao David comparem strongfala love blo Jehovah witim wanfala sef ples? From iumi worshipim Jehovah, iumi sure nomata wea iumi stap lo earth, Jehovah bae protectim iumi from eni samting wea savve spoelem faith blo iumi. w21.11 6 ¶14-15

Taem Jesus and olketa disaepol lo sea, bigfala wind kasem olketa. Jesus iusim samting wea happen for helpem olketa disaepol for luksavve olketa need for strongim faith blo olketa. (Matt. 8:23-26) Datfala strong wind mekem sea for kam insaed lo boat, bat Jesus gohed sleep. Olketa disaepol fraet and wekapem hem for askem hem for sevem olketa. Jesus kaonselem olketa and sei: “Hao nao iufala fraet? Faith bilong iufala hem smol nomoa.” Waswe, distaem iu tu feisim hard taem? Maet natural disaster kasem ples blo iu. Or maet iu feisim difren kaen hard taem, olsem wanfala big sik wea mekem iu discourage from iu no savve hao for deal witim. Olketa hard taem wea kasem iu savve mekem iu wari. Nomata olsem, gohed for trustim Jehovah. Prea lo Jehovah for helpem iu, and tingim olketa samting wea Jehovah duim finis for helpem iu. Datwan bae strongim faith blo iu. (Sams 77:11) Iu savve sure Jehovah bae gohed lukaftarem iu. w21.11 22 ¶7, 10

Samfala maet tingse sapos olketa no tekem eni samting blo narawan, olketa obeyim datfala komand nao. Bat olketa verse lo Levitikas 19 showimaot nara wei for stealim samting tu hem stap. Olsem example, samwan wea ravem narawan hem olsem hem steal. Levitikas 19:13 showimaot man wea no honest lo bisnis hem steal tu. Hem sei: “Yufala mas no ravem o mekful long wantok blong yufala.” Mek-eit komand sei hem rong for steal, bat olketa verse lo Levitikas 19 helpem iumi for tingim olketa principle wea join witim datfala law, for mas honest lo evri samting. Hem gud for tingim sapos iumi followim olketa principle hia. Maet hem gud for tingim tu sapos iumi need for changem eni samting for mekem iumi barava honest lo bisnis or lo hao iumi duim waka. w21.12 9-10 ¶6-8

Hem gud for talem Jehovah eni mistek wea iumi duim and askem hem for forgivim iumi. Bat sapos iumi duim bigfala sin, iumi mas go story lo olketa elder for helpem iumi. Olketa bae lisin lo iumi and givim iumi kaonsel from Bible. And tu, bae olketa prea witim iumi and askem Jehovah for forgivim iumi mekem iumi savve fren bak witim hem. (Jas. 5:14-16) Hem gud tu for ting raonem ransom. Maet iumi barava sorre taem iumi readim hao Jesus safa tumas. Bat taem iumi ting raonem olketa gud samting wea kamaot from sakrifaes blo Jesus, datwan bae strongim love wea iumi garem for Jesus and Dadi blo hem. Evri year iumi showimaot iumi tinghae lo ransom taem iumi attendim Memorial and invaetem olketa narawan for kam lo Memorial. Jehovah givim iumi nambawan privilege for teachim olketa narawan abaotem Son blo hem! w21.04 18-19 ¶13-16

Tingim samting wea Jesus duim taem staka pipol kam for lukim hem taem hem kam daon from wanfala maunten. Nomata Jesus hem taed tumas from hem spendem full naet for prea, taem hem lukim olketa pipol hia hem barava sorre lo olketa wea poor and sik. Hem healim olketa and hem givim tu wanfala tok wea barava encouragem olketa, wea hem nao datfala Sermon lo Maunten. (Luke 6:12-20) Jesus willing tu for spendem staka taem for helpem narawan. Tingim diswan. Jesus mas sorre tumas taem hem herem olketa killim dae fren blo hem John Baptaesa. Bible sei: “Taem Jesus herem [olketa killim dae John], hem go insaed wanfala boat and go long wanfala kwaet ples wea no eniwan stap.” (Matt. 14:10-13) Bat staka pipol kasem finis datfala ples. (Mark 6:31-33) Hem luksavve olketa pipol hia needim help and comfort from God, so hem teachim olketa.​—Luke 9:10, 11. w22.02 21 ¶4, 6

Wanem nao iumi savve duim sapos iumi luksavve iumi mekem wanfala brata or sista feel nogud? Iumi shud prea lo Jehovah firstaem. Askem Jehovah for helpem iumi for stretem problem witim datfala brata or sista. Ting raonem tu wanem iumi savve duim for stretem problem hia. Maet iumi tingim olketa kwestin olsem: ‘Waswe, mi willing for go stretem problem witim brata or sista hia, for sei sorre, and for sei mi nao rong? Waswe, sapos mi go stretem datfala problem bae Jehovah and Jesus hapi lo datwan?’ Ansa blo iumi for olketa kwestin hia savve helpem iumi for followim toktok blo Jesus for mek peace witim brata or sista blo iumi. Dastawe hem gud for hambol taem iumi go for stretem problem witim brata or sista blo iumi. (Eph. 4:2, 3) Iumi shud garem goal for helpem hem for fren bak moa witim iumi. Tingim, hem important for mek peace witim brata or sista blo iumi winim for pruvim hu nao stret and hu nao rong.​—1 Cor. 6:7. w21.12 25-26 ¶13-16

Jesus hem sorre bikos hem savve staka Jew showimaot finis hao olketa bae no acceptim message blo Kingdom. From datwan, gogo olketa enemy distroem Jerusalem and olketa Jew wea laef bihaen datwan kamap slave. (Luke 21:20-24) Olsem Jesus profesi abaotem, klosap evri Jew rejectim hem. Waswe, pipol lo ples wea iumi stap laek for herem message abaotem Kingdom? Sapos staka no interest, wanem nao iumi savve lanem from taem Jesus hem sorre and krae for olketa Jew? Jehovah lovem pipol. Taem Jesus krae for olketa Jew, datwan helpem iumi for luksavve Jehovah lovem pipol. Bible sei: “[Jehovah] no laekem eniwan for dae bat hem laekem evriwan for garem chance for repent.” (2 Pet. 3:9) Iumi savve showimaot iumi lovem pipol wea iumi preach lo olketa taem iumi duim best for helpem olketa for savve lo gud nius abaotem Kingdom.​—Matt. 22:39. w22.01 16 ¶10-12

Sapos iumi ting raonem wanem Jehovah duim for pipol blo hem bifor and wanem hem duim for iumi distaem, datwan bae strongim faith blo iumi tu. Bat barava important nao, datwan bae strongim love blo iumi for Jehovah. Iumi need for garem strongfala love for Jehovah bikos datwan bae helpem iumi for obeyim hem, willing for duim wanem hem laekem, and no givap lo olketa hard taem. (Matt. 22:37-39; 1 Cor. 13:4, 7; 1 John 5:3) Hem barava spesol samting for iumi fren witim Jehovah! (Sams 63:1-7) Tingim hao prea, studyim Bible, and for ting raonem wanem iumi lanem, hem part lo worship blo iumi. Olsem Jesus, faendem ples wea kwaet for prea and for duim study. No busy lo nara samting taem iumi study. And askem Jehovah for helpem iumi for concentrate taem iumi duim study seleva or lo taem blo meeting. Sapos iumi iusim gud taem blo iumi distaem, Jehovah bae blessim iumi and iumi bae enjoyim laef for olowe lo niu world.​—Mark 4:24. w22.01 30 ¶18; 31 ¶19-20

Samting wea man tingim maet bae hem duim. Dastawe Jesus talem iumi for lusim olketa nogud tingting wea gogo bae mekem iumi for duim bigfala sin. (Matt. 5:21, 22, 28, 29) Iumi laek for mekem Jehovah hapi, iaman? So hem barava important for stretawe aotem eni nogud tingting wea maet iumi garem! Jesus sei: “Olketa samting wea kamaot from mouth hem samting wea stap long tingting bilong man.” (Matt. 15:18) Hem tru, wanem iumi storyim showimaot wanem iumi tingting abaotem. So hem gud for tingim: Waswe, iumi disaed for talem tru samting, nomata iumi savve bae iumi kasem trabol from datwan? Nomata iumi marit, waswe, iumi laek for switim narawan wea no marit partner blo iumi? Waswe, iumi savve storyim olketa dirty samting? Waswe, iumi savve showimaot iumi kros taem samwan mekem iumi feel nogud? Hem important for luksavve sapos iumi laek for lusim old wei blo iumi, iumi mas lusim olketa nogud toktok, dirty toktok, and iumi mas no laea. w22.03 5 ¶12-14

Iumi bae mekem olketa gudfala disison sapos iumi askem advaes and no weit for samwan givim kaonsel lo iumi. So iumi shud no hol bak for askem advaes lo olketa narawan. Wanem nao samfala samting wea iumi maet needim advaes or kaonsel for hem from olketa nara brata or sista? Tingim olketa example hia. (1) Wanfala sista askem nara sista for go witim hem lo Bible study blo hem. Bihaen hem askem datfala sista for givim hem advaes lo hao for kamap gudfala teacher. (2) Wanfala singol sista laek peim longkwi, so hem askem tingting blo wanfala mature sista abaotem longkwi wea hem laekem. (3) Wanfala brata bae duim first pablik tok blo hem. Hem askem brata wea savve tumas lo hao for duim tok for lisin gud lo tok blo hem, and then talem hem eni samting for hem waka lo hem. Hem gud tu for olketa brata wea givim tok for staka year finis for askem kaonsel from nara brata wea garem experience, and then followim datfala kaonsel.​—Provebs 19:20. w22.02 13 ¶15-17

Jehovah lovem and lukaftarem iumi olsem hem lovem and lukaftarem Jesus taem hem stap lo earth. (John 5:20) Jehovah encouragem Jesus taem hem sorre, hem helpem Jesus for gohed faithful, and hem mek sure Jesus garem wanem hem needim. And tu, Jehovah no hol bak for talem Jesus hem lovem and hapi lo hem. (Matt. 3:16, 17) Jesus savve Dadi blo hem bae lukaftarem hem and bae no lusim hem. Jehovah showimaot hem lovem iumi tu. Olsem example, Jehovah leadim iumi kam lo hem and givim iumi wanfala spiritual famili wea encouragem iumi taem iumi sorre. (John 6:44) Jehovah givim iumi staka spiritual kaikai tu for helpem iumi gohed faithful lo hem. And hem mek sure iumi garem wanem iumi needim. (Matt. 6:31, 32) Taem iumi tingim olketa samting wea Jehovah duim for iumi, datwan mekem iumi for barava lovem hem. w21.09 22 ¶8-9

Hao nao laef blo iumi bifor iumi studyim Bible witim Olketa Jehovah’s Witness? Maet iumi no laek for tingim datwan distaem. Lo datfala taem maet iumi followim tingting blo pipol lo world abaotem wanem hem stret and no stret. From datwan, maet iumi “no garem hope” and iumi “no savve long God.” (Eph. 2:12) Bat taem iumi studyim Bible, iumi luksavve Dadi blo iumi lo heven hem lovem iumi tumas. Iumi luksavve tu, for mekem Jehovah hapi and for iumi fit for insaed famili blo hem, iumi bae need for mekem samfala big change lo laef blo iumi. Iumi need for lanem tu hao for followim olketa hae standard blo Jehovah. (Eph. 5:3-5) From Jehovah nao Creator and Dadi blo iumi, hem garem raet for disaedem wanem kaen wei nao olketa wea worshipim hem shud garem. Bifor iumi baptaes Jehovah laekem iumi for mas waka hard for “lusim old wei” blo iumi. w22.03 2 ¶1-3

Olketa nara sheepsheep hapi for attendim Memorial for lukluk lo wanem hem gohed and for tingting abaotem hope blo olketa. Olketa luk forward for herem Memorial tok bikos hem storyim wanem Jesus and 144,000 wea rul witim hem bae duim for olketa lo datfala Wan Thousand Year Rul. Jesus Christ wea King, witim olketa nara ruler hia bae help for mekem disfala earth kamap paradaes and helpem olketa man for kamap perfect. Memorial tok hem helpem staka million nara sheepsheep for tingim hao olketa Bible profesi olsem Aesaea 35:5, 6, Aesaea 65:21-23, and Revelation 21:3, 4 bae kamap tru. Hem chance for olketa tingim datfala taem wea olketa bae stap lo niu world witim famili and olketa fren blo olketa. Datwan bae strongim hope blo olketa and mekem olketa for laek gohed worshipim Jehovah.​—Matt. 24:13; Gal. 6:9. w22.01 21 ¶5-7

Wanem nao datfala ransom? Ransom hem price wea Jesus givim for baem bak wanem Adam lusim. (1 Cor. 15:22) So why nao iumi needim datfala ransom? Wanfala Law wea Jehovah givim lo Moses sei laef mas changem laef. (Eksodas 21:23, 24) Adam lusim laef wea perfect. So for followim justice blo God, Jesus sakrifaesim laef blo hem wea perfect. (Rome 5:17) Dastawe Bible sei Jesus kamap “Dadi hu hemi stap olowe” for olketa wea showimaot faith lo ransom. (Aesaea 9:6; Rome 3:23, 24) From Jesus barava lovem Dadi blo hem and iumi, hem willing for dae. (John 14:31; 15:13) Love wea hem garem for Jehovah and iumi mekem hem laek duim evri samting wea Jehovah laekem, and for gohed faithful go kasem taem hem dae. From Jesus hem dae for iumi, datwan mekem plan blo Jehovah for olketa man and for earth bae kamap tru. w21.04 14 ¶2-3