April

Jesus lovem iumi tumas from hem willing for dae for iumi. (John 15:13) Iumi no savve changem bak love wea Jesus and Jehovah showimaot for iumi. Bat iumi savve showimaot iumi tinghae lo datwan lo wanem iumi duim lo laef blo iumi. (Col. 3:15) Olketa anointed wan barava tinghae lo datfala ransom bikos hem mekem olketa for garem nambawan hope. (Matt. 20:28) From olketa garem faith lo sakrifaes blo Christ, lo tingting blo Jehovah olketa raeteous and hem adoptim olketa olsem olketa pikinini blo hem. (Rome 5:1; 8:15-17, 23) Olketa nara sheepsheep tu tinghae lo datfala ransom. From olketa garem faith lo sakrifaes blo Christ, God forgivim sin blo olketa, and olketa garem hope for sev lo taem blo “datfala big trabol.” (Rev. 7:13-15) Tufala grup hia showimaot olketa tinghae lo ransom taem olketa attendim Memorial evri year. w22.01 23 ¶14-15

Jesus barava sorre from olketa sei hem mas dae from hem tok spoelem God. Olketa sei hem no respectim God and no tinghae lo nem blo God. (Matt. 26:64-66) Datwan mekem hem barava feel nogud and hem laekem Dadi blo hem for stopem datwan for happen. (Matt. 26:38, 39, 42) Jesus mas hange lo post for dae for finisim wanfala panis wea mekem olketa Jew fit for dae. (Gal. 3:10) Bible sei olketa kasem datfala panis bikos olketa no faithful for followim evri samting lo Law blo God. Olketa Jew fit for dae tu bikos olketa kam from laen blo Adam. (Rome 5:12) For finisim panis blo olketa Jew, Jesus mas hange lo post for fitim wanfala Law blo God wea sei sapos man duim bigfala sin hem shud dae, then bihaen olketa killim hem dae olketa mas hangem dead body blo hem lo post. (Diutronomi 21:22, 23; 27:26) So taem Jesus hange lo post for dae datwan mekem olketa Jew fit for kasem laef olowe, nomata olketa rejectim hem. w21.04 16 ¶5-6

Lo day wea Jesus dae, olketa soldia blo Rome barava whipim hem nogud. (Matt. 26:52-54; John 18:3; 19:1) Then olketa putim datfala post wea hem bae dae lo hem lo shoulder wea garekil. Jesus stragol for pullim datfala post bikos hem hevi fogud, so olketa soldia talem nara man for karem. (Matt. 27:32) Taem olketa kasem ples wea bae olketa killim hem dae, olketa soldia nilam Jesus lo post. From hand and leg nomoa holem weight blo body blo hem, nila mekem big hol lo hand and leg blo hem. Olketa fren blo Jesus barava sorre and mami blo hem krae, bat olketa bigman blo Jew tok spoelem hem. (Luke 23:32-38; John 19:25) Jesus safa for staka hour. Gogo heart and lung blo hem no savve waka gud, so hem start for shortwind. Then taem Jesus klosap for dae, hem talem last prea lo Jehovah. (Mark 15:37; Luke 23:46; John 10:18; 19:30) Jesus safa tumas and hem dae lo barava nogud wei! w21.04 16 ¶4

Jesus storyim tufala agreement lo 11-fala faithful aposol blo hem. Wanfala hem niu agreement and narawan hem agreement for rul lo wanfala Kingdom. (Luke 22:20, 28-30) Olketa aposol and samfala narawan moa bae kamap king and priest lo heven bikos lo tufala agreement hia. (Rev. 5:10; 14:1) So olketa anointed Christian wea laef distaem savve kaikaim bred and drinkim wine bikos olketa nomoa insaed lo tufala agreement hia. Olketa garem nambawan hope for go lo heven and no savve dae. Olketa bae rul witim Jesus and olketa narawan lo 144,000. And spesol samting nao, olketa bae garem chance for lukim Jehovah. (1 Cor. 15:51-53; 1 John 3:2) Olketa anointed wan luksavve olketa mas gohed faithful go kasem taem olketa dae.​—2 Tim. 4:7, 8. w22.01 21 ¶4-5

Olketa nilam lo post wanfala criminal lo left saed blo Jesus and narawan lo raet saed. (Luke 23:40, 41) Wanfala luk go lo Jesus and sei: “Tingim mi taem iu King.” (Luke 23:42) Jesus savve Dadi blo hem laek showim mercy lo pipol, dastawe hem talem olketa toktok wea givim hope for datfala criminal. (Sams 103:8; Heb. 1:3) Jehovah willing for forgivim and showim mercy lo pipol. Bat hem savve duim datwan nomoa sapos man hem repent from olketa sin wea hem duim bifor, and sapos hem garem faith lo ransom sakrifaes blo Jesus Christ. (1 John 1:7) Bat maet iu tingse hem hard for Jehovah forgivim olketa. Sapos olsem, hem gud for tingim diswan: Taem Jesus hange lo post, hem showim mercy lo datfala criminal wea just start for showimaot faith lo hem. So iumi sure Jehovah bae showim mercy lo pipol blo hem!​—Sams 51:1; 1 John 2:1, 2. w21.04 9 ¶5-6

Thrifala samting kamaot from Jesus faithful go kasem taem hem dae. First samting, Jesus pruvim Satan hem man for laea. Hem showimaot man wea perfect savve gohed faithful nomata Satan duim staka nogud samting lo hem. Mek-tu samting, from Jesus dae hem baem bak iumi olketa man. So datwan mekem iumi fit for fren witim God and for garem hope for laef olowe. Mek-thri samting, Jesus mekhae lo nem blo Jehovah and pruvim Jehovah nomoa hem fit for rul. Maet iumi no laef tumoro, so evriday gohed faithful. Sapos iumi duim datwan, Jehovah bae luksavve iumi faithful go kasem taem iumi dae, iumi pruvim Satan hem man for laea, and iumi mekhae lo nem blo Jehovah and raet blo hem for rul. w21.04 12 ¶13-14

Olketa bigman blo Jew kotem Jesus and nomata hem no duim eni rong samting olketa sei hem guilty. Bihaen, staka barava tok spoelem and treatim hem nogud. Olketa nilam leg and hand blo Jesus lo post for killim hem dae. Bigfala pain wea hem kasem mekem hem no isi for toktok. Nomata olsem, hem garem samfala important samting for talem. Iumi lanem staka samting from lastfala toktok blo Jesus! Iumi shud forgivim olketa narawan and iumi sure Jehovah bae forgivim iumi tu. Iumi garem olketa brata and sista lo kongregeson wea laek helpem iumi, bat iumi mas no hol bak for askem olketa. Iumi savve Jehovah bae helpem iumi for no givap lo eni hard taem wea kasem iumi. Iumi laek gohed faithful nomata iumi mas dae bikos lo faith blo iumi, and iumi sure Jehovah bae resurrectim iumi. w21.04 8 ¶1; 13 ¶17

Followim example blo Jesus, mekem iumi kasem laef olowe. Taem wanfala young man wea rich askem Jesus wanem nao hem mas duim for kasem laef olowe, Jesus sei: “Iu kam followim mi.” (Matt. 19:16-21) Jesus talem samfala Jew tu wea no bilivim hem datfala Christ, ‘olketa sheepsheep bilong mi followim mi. Bae mi mekem olketa laef olowe.’ (John 10:24-29) So iumi showimaot faith lo Jesus taem iumi followim olketa teaching and example blo hem. Datwan bae helpem iumi for kasem laef olowe. (Matt. 7:14) Bifor iumi savve followim gud example blo Jesus, iumi mas lane abaotem hem. Iumi savve gohed “lane abaotem” Jesus taem iumi lanem staka samting abaotem tingting and wei blo hem. Nomata iumi stap lo truth for longtaem finis, iumi mas gohed lane abaotem Jehovah and Son blo hem. w21.04 4 ¶9-10

Maet aposol Paul feel shame taem hem tingim olketa nogud samting wea hem duim bifor. Hem sei hem nao “worst wan” lo olketa wea sin! (1 Tim. 1:15) Bifor Paul kamap Christian, hem persecutim olketa Christian, hem putim samfala lo prison, and hem agree for olketa killim dae samfala. (Acts 26:10, 11) Tingim sapos bihaen Paul kamap Christian hem meetim wanfala pikinini blo wanfala Christian olsem, maet hem bae feel shame. Paul sorre lo wanem hem duim bifor, bat hem savve hem hard for changem datwan. Nomata olsem, hem sure God forgivim hem bikos hem sei: “From God hem kaen long mi nao mi duim disfala waka.” (1 Cor. 15:3, 10) Samting iumi savve lanem from diswan, hem hao Christ hem dae for iumi wanwan mekem iumi fren gud witim Jehovah. (Acts 3:19) God no gohed tingim nogud samting wea iumi duim bifor bikos hem forgivim iumi. Hem tingim nomoa wanem iumi duim distaem and wanem iumi bae duim lo future.​—Aesaea 1:18. w21.04 23 ¶11

Staka Jew no expectim Messiah for mas dae nomata profesi sei: ‘Hem wiling fo dae long sem wei wea olketa nogud man dae. Hem tekem ples blong staka pipol wea sin, an hem askem mi fo fogivim olketa.’ (Aesaea 53:12) So olketa Jew no garem reason for feel nogud taem Jesus dae olsem criminal. Distaem tu, iumi need for luksavve lo olketa tru samting. Lo Sermon lo Maunten Jesus sei pipol bae ‘talem enikaen nogud samting wea no tru’ abaotem olketa wea lisin lo hem. (Matt. 5:11) Satan nao bihaenem olketa laea hia, and hem iusim olketa wea againstim Olketa Jehovah’s Witness for spredim olketa laea story. (Rev. 12:9, 10) No lisin lo olketa laea hia or letem datwan for mekem iufala fraet or spoelem faith blo iufala. w21.05 11 ¶14; 12 ¶16

Helpem Bible study for depend lo Jehovah. Jesus talem olketa disaepol Jehovah bae helpem olketa bikos Hem lovem olketa. (Matt. 10:19, 20, 29, 30) Storyim hao Jehovah bae helpem Bible study tu. Iumi savve helpem hem for depend lo Jehovah taem iumi prea witim hem abaotem olketa goal wea hem markem. Franciszek wea stap lo Poland sei: “Teacher blo mi savve storyim olketa goal wea mi markem taem hem prea. Then mi lukim Jehovah helpem mi for kasem olketa goal hia, so mi tu start for askem Jehovah for helpem mi. So taem mi askem boss for taem off for attendim meeting or convention, mi lukim Jehovah helpem mi.”Jehovah barava lovem olketa Bible study blo iumi, and hem lovem and tinghae lo olketa pablisa wea waka hard for helpem olketa Bible study fren gud witim hem. (Aesaea 52:7) Sapos iumi no garem Bible study distaem, iumi savve joinim olketa nara pablisa lo Bible study for helpem hem kamap fit for baptaes. w21.06 7 ¶17-18

Iumi bae showimaot iumi tinghae lo privilege for garem Bible taem iumi readim evriday. Hem gud for markem taem for readim and studyim Bible bikos taem iumi duim datwan bae iumi garem strongfala faith. Iumi no olsem staka savveman wea no biliv lo God, bikos iumi garem kliafala pruv God hem stap. (Matt. 11:25, 26) From iumi studyim Bible, iumi minim why evri samting lo earth hem gogo for nogud and wanem Jehovah bae duim for stretem datwan. So strongim faith blo iumi, and helpem olketa narawan for garem faith lo God wea wakem evri samting. (1 Tim. 2:3, 4) And distaem tu, iumi luk forward lo taem wea evriwan wea stap lo earth bae talem sem samting olsem Revelation 4:11 talem: “Jehovah, . . . iu nao fit for kasem glory . . . bikos iu wakem evri samting.” w21.08 19 ¶18-20

From olketa elder nao shepherd, olketa garem responsibility for givim kaonsel lo olketa brata and sista. Olketa shud givim kaonsel wea isi for man acceptim and followim, and wea “mekem man hapi.” (Prov. 27:9, NWT) Olketa elder lovem olketa brata and sista lo kongregeson. Wanfala wei wea olketa showimaot love hem for kaonselem samwan lo kongregeson wea start for go rong. (Gal. 6:1) Bat bifor elder givim kaonsel, maet hem gud for hem tingim wanem Paul talem abaotem man wea garem love. Hem sei: “Hem patient and kaen. . . . Nomata wanem hem happen, . . . hem hapi nomoa. Hem gohed for biliv, hem evritaem garem hope, and no eni samting savve mekem hem givap.” (1 Cor. 13:4, 7) Taem datfala elder ting raonem olketa verse hia, datwan bae helpem hem for mek sure hem bae kaonselem brata or sista from hem lovem hem. From brata or sista hia luksavve datfala elder lovem hem, datwan bae helpem hem for acceptim kaonsel. w22.02 14 ¶3; 15 ¶5

Jehovah wakem olketa angel and Adam and Eve, for evriwan perfect. Bat then datfala bighed angel Satan (wea nem hia minim “samwan wea againstim narawan”) againstim Jehovah, and hem mekem Adam and Eve tu for againstim Jehovah. Satan mekem staka angel for duim sem samting. (Jude 6) Jehovah barava feel sorre lo datwan. Nomata olsem, hem bae gohed deal witim bighed pipol go kasem taem hem finisim olketa. Then, Jehovah and evriwan wea faithful for worshipim hem bae hapi from olketa no need for deal witim nogud wei blo olketa hia! Satan laea for sei Job and olketa narawan worshipim Jehovah bikos Jehovah blessim olketa. (Job 1:8-11; 2:3-5) Satan gohed for accusim olketa wea worshipim Jehovah kam kasem distaem. (Rev. 12:10) From iumi gohed faithful lo Jehovah bikos iumi lovem hem and no givap taem iumi kasem hard taem, datwan showimaot samting wea Satan talem hem no tru. w21.07 9 ¶7-8

Aposol Paul talem samting wea showimaot hao iumi mas willing for lusim old wei blo iumi for mekem Jehovah hapi. Hem sei: “Wei bilong iumi bifor hem finis taem olketa nilam Christ long post.” (Rome 6:6) So iumi mas followim example blo Jesus. Hem willing for dae lo post for mekem Jehovah hapi. Iumi tu mas willing for lusim olketa old wei blo iumi wea Jehovah heitim. Iumi mas duim datwan mekem iumi garem gudfala konsens and hope for garem laef olowe. (John 17:3; 1 Pet. 3:21) Jehovah bae no changem olketa standard blo hem for fitim iumi. Iumi nao mas changem olketa nogud wei blo iumi and willing for followim olketa standard blo hem. (Aesaea 1:17, 18; 55:9) Nomata bihaen iumi baptaes, iumi no laek for garem moa old wei blo iumi. Prea for Jehovah iusim holy spirit for helpem iumi, and no depend lo iumiseleva. (Gal. 5:22; Phil. 4:6) Iumi mas waka hard for lusim old wei blo iumi. w22.03 6 ¶15-17

Jehovah promis for provaedem kaikai, kaleko, and ples for stap taem Kingdom hem first samting lo laef blo iumi, and from iumi followim olketa raeteous standard blo hem. (Matt. 6:33) So no tingse olketa material samting savve mekem iumi hapi or for stap gud. Iumi savve main samting wea bae mekem iumi hapi hem for duim wanem Jehovah laekem. (Phil. 4:6, 7) Nomata maet iumi garem inaf selen for peim staka samting, waswe, hem tekem staka taem and strong blo iumi for iusim and lukaftarem olketa samting hia? Tingim, God expectim iumi for busy lo waka blo hem, so iumi mas no busy tumas lo olketa nara samting. Iumi no laek for olsem datfala man wea laekem tumas olketa samting wea hem ownim. Bikos lo datwan, hem disaed for no followim Jesus and misstim chance for worshipim God and for God adoptim hem for insaed lo famili blo Hem.​—Mark 10:17-22. w21.08 6 ¶17

Taem iumi studyim Bible bae iumi minim gud olketa gudfala wei blo God wea showaot lo creation, and datwan bae strongim faith blo iumi hao God hem stap. (Eksodas 34:6, 7; Sams 145:8, 9) Taem iumi studyim Bible, datwan bae helpem iumi for savve gud lo Jehovah, fren gud witim hem, and barava lovem hem. Story abaotem God lo pipol. Bat hao sapos samwan wea iumi preach lo hem sei hem no biliv lo God, and iumi no savve hao for ansarem hem? Lukaotem eni article lo olketa pablikeson blo iumi wea storyim datfala subject, then go storyim datwan witim hem. Iumi savve askem nara brata or sista for helpem iumi tu. Nomata man wea no biliv lo God acceptim ansa blo iumi or nomoa, iumi bae lanem samting from research wea iumi duim, and datwan bae strongim faith blo iumi. w21.08 18 ¶14-15

Nomata iumi busy lo ministry, iumi savve enjoyim laef. (Eklesiastes 5:19, 20) Maet iumi hol bak for duim moa samting for Jehovah from iumi tingim nogud iumi mas lusim olketa material samting. Bat iumi no laek for duim sem mistek olsem man lo tokpiksa blo Jesus wea hipimap staka material samting, bat hem no tingim God. (Luke 12:16-21) Sapos iumi laek for duim moa samting lo ministry bat problem kamap, wakemaot hao for deal witim datwan. (Provebs 3:21) Iumi kasem staka blessing from Jehovah. Iumi savve showimaot iumi tinghae lo olketa blessing hia taem iumi duim wanem iumi fit for duim for mekhae lo Jehovah. (Heb. 13:15) Maet iumi fit for duim moa samting lo ministry, and taem iumi duim datwan bae iumi lukim Jehovah blessim iumi. Evriday tingim wanem iumi savve duim for Jehovah, then iumi savve talem sem samting olsem Jesus wea sei: “Kaikai bilong mi hem for duim waka wea man wea sendem mi kam hem laekem mi for duim and for finisim datfala waka.”​—John 4:34. w21.08 30-31 ¶16-19

Satan laekem iumi for praod. Hem savve sapos iumi praod bae iumi no kasem laef olowe. Dastawe Paul sei samwan wea “kamap praod [bae] kasem sem judgment wea Devil hem kasem.” (1 Tim. 3:6, 7) Paul talem disfala warning bikos nomata iumi niu lo truth or worshipim Jehovah for staka year finis maet iumi kamap praod. Pipol wea praod tingim olketa seleva nomoa. Taem iumi feisim olketa hard samting, Satan savve mekius lo datwan for mekem iumi tingim iumiseleva and no tingim Jehovah. Olsem example, sapos samwan accusim iumi lo samting wea iumi no duim, or treatim iumi nogud, Satan laekem iumi for blamem Jehovah or organization blo hem. Satan laekem iumi for followim tingting blo iumiseleva lo hao for stretem hard samting wea iumi kasem, and no followim direction blo Jehovah lo Bible.​—Eklesiastes 7:16, 20. w21.06 15 ¶4-5

Why nao Jehovah talem Haggai for storyim disfala profesi? Lo 537 B.C.E., olketa Jew kam bak lo Jerusalem bihaen olketa prisoner lo Babylon, and luk olsem Haggai tu witim olketa. No longtaem bihaen olketa kasem Jerusalem olketa wakem faondeson blo temple blo Jehovah. (Esra 3:8, 10) Bat no longtaem bihaen, pipol start for againstim olketa and datwan mekem olketa wikdaon and stop for duim waka. (Esra 4:4; Hagae 1:1, 2) Dastawe lo 520 B.C.E. Jehovah talem Haggai for encouragem olketa Jew for buildim bak datfala temple. (Esra 6:14, 15) Toktok blo Haggai hem for strongim faith blo olketa Jew wea wikdaon. Masbi datfala toktok “Jehovah, komanda blo olketa army” (NWT) strongim olketa Jew. Bae olketa tingim hao Jehovah garem bigfala army blo olketa angel wea hem komandim, so olketa Jew fit for trustim hem for helpem olketa. w21.09 15 ¶4-5

Distaem, Olketa Jehovah’s Witness evriwea lo world showimaot love lo each other and wan mind. Iumi olsem wanfala famili nomata iumi kam from difren kantri and garem difren culture. Iumi lukim olketa brata and sista showimaot love lo each other lo olketa meeting, assembly, and convention. From iumi lovem each other, iumi barava sure hao iumi worshipim God hem mekem hem hapi. (John 13:34) Bible sei iumi “mas barava lovem narawan.” (1 Pet. 4:8) Wanfala wei for showimaot iumi barava lovem each other hem for forgivim narawan and for no gohed tingim mistek blo narawan. Iumi laek for tingim and kaen lo evriwan insaed kongregeson, nomata olketa wea duim samting wea mekem iumi feel nogud. (Col. 3:12-14) Taem iumi duim olsem, iumi showimaot iumi olketa trufala Christian. w21.10 22 ¶13-14

Waswe, taem samwan disfellowship datwan savve helpem hem for laek repent? Yes. Staka wea reinstate sei datwan helpem olketa for luksavve olketa duim bigfala sin, and hem helpem olketa for laek change, repent, and kam bak lo Jehovah. (Heb. 12:5, 6) Tingim disfala tokpiksa. Wanfala shepherd lukim wanfala sheepsheep wea sik. Shepherd savve hem mas separatem sheepsheep hia from olketa nara sheepsheep mekem hem kamap gud moa. Bat olketa sheepsheep laek stap tugeta and sapos wanfala mas stap seleva hem savve krae tumas. Waswe, from shepherd separatem datfala sheepsheep datwan minim hem no kaen? Nomoa. Hem savve sapos hem letem sheepsheep wea sik for stap witim olketa narawan, olketa tu bae kasem datfala sik, so hem laek for protectim olketa. w21.10 10 ¶9-10

Iumi hapi for garem olketa brata and sista evriwea lo world wea lovem each other. And iumi laekem staka pipol moa for joinim iumi for worshipim Jehovah. Dastawe, iumi no laek for duim eni samting wea mekem pipol for ting daonem Dadi blo iumi lo heven or pipol blo hem. Iumi laek for duim olketa samting wea mekem pipol interest for lane abaotem Jehovah. From iumi obeyim Jehovah and duim preaching waka, maet samfala tok spoelem iumi or persecutim iumi. Wanem nao iumi savve duim sapos datwan mekem iumi fraet for story? Iumi sure Jehovah and Jesus laek for helpem iumi. Jesus talem olketa disaepol blo hem for no wari abaotem wanem for talem. Why nao olsem? Jesus sei: “Bae iufala savve wanem for talem long datfala taem. Diswan hem bikos taem iufala story, spirit bilong Dadi bilong iufala nao bae mekem iufala savve long wanem for talem.”​—Matt. 10:19, 20. w21.09 24 ¶17-18

Moses storyim hao Jehovah hem olsem wanfala sef ples. (Ps. 90:1, footnote, NWT) No longtaem bifor Moses hem dae, hem sei: “Yufala save stap sef long God hu hemi stap olowe. Oltaem nomoa, hemi gohed fo holem yufala long han blong hem.” (Diutronomi 33:27) Wanem nao disfala toktok “holem yufala long han blong hem” showimaot abaotem Jehovah? From iumi savve Jehovah hem sef ples blo iumi datwan strongim iumi. Bat maet iumi faendem hard for deal witim laef samfala taem. Hao nao bae Jehovah helpem iumi lo taem olsem? (Ps. 136:23, NWT) Jehovah bae ‘holem iumi lo hand blo hem’ olsem Moses storyim, for helpem iumi getap taem iumi foldaon. (Sams 28:9; 94:18) Iumi savve Jehovah laek for protectim iumi and diswan helpem iumi lo tufala wei. First wan, nomata wea iumi stap Jehovah hem olsem sef ples blo iumi. Mek-tu, iumi sure Jehovah lovem iumi tumas. w21.11 6 ¶15-16

Jesus savve bae hem no isi for olketa disaepol deal witim olketa samting wea no followim justice. Jesus iusim datfala tokpiksa lo Bible buk blo Luke for helpem olketa. Jesus storyim widow woman wea gohed askem wanfala judge for helpem hem from hem sure gogo datfala judge bae duim datwan. Jesus comparem datfala judge wea no raeteous witim Jehovah wea followim justice. Hem sei: “Sapos datfala judge savve duim stret samting, God bae barava duim stret samting for olketa wea hem chusim and wea singaot long hem evritaem for helpem olketa.” (Luke 18:1-8) Then Jesus sei: “Taem Son bilong man hem kam, waswe, pipol long earth bae garem diskaen faith?” Taem iumi deal witim olketa samting wea no followim justice, iumi need for garem strongfala faith olsem datfala widow. Strongfala faith bae mekem iumi patient and weit lo Jehovah for helpem iumi. And iumi need for sure Jehovah bae ansarem olketa prea blo iumi. w21.11 23 ¶12; 23-24 ¶14

Maet samfala young wan tingse olketa standard blo Jehovah hem strict tumas. Satan laekem iufala for tingse olketa narawan garem gudfala laef winim iufala. Maet iufala lukim olketa piksa wea olketa classmate postim lo Internet, and tingse laef blo iufala hem boring. Satan laekem iu for tingse iu no savve enjoyim laef taem iu followim olketa standard blo Jehovah. Hem gud for tingim diswan: Satan no laekem olketa wea followim road wea waed for savve wanem bae kasem olketa lo end blo road hia. (Matt. 7:13, 14) Bat Jehovah laekem iu for savve sapos iu gohed followim datfala smol road bae iu kasem olketa nambawan samting lo future.​—Sams 37:29; Aesaea 35:5, 6; 65:21-23. w21.12 23 ¶6-7

Iumi shud forgivim narawan, bat samfala taem hem no isi. Maet hem no isi for aposol Peter tu. (Matt. 18:21, 22) Wanem nao savve helpem iumi for forgivim narawan? First samting, tingim hao Jehovah hem barava willing for forgivim iumi. (Matt. 18:32, 33) And Jehovah forgivim iumi nomata iumi no fit for kasem datwan. (Sams 103:8-10) Iumi luksavve tu, from “God lovem iumi . . . iumi mas lovem iumi evriwan.” So iumi mas forgivim narawan, bikos datwan showimaot iumi lovem olketa brata and sista. (1 John 4:11) Mek-tu samting, tingim gud samting wea bae kamaot from iumi forgivim narawan. Bae man wea iumi forgivim no wikdaon, bae kongregeson stap gud tugeta, bae iumi gohed fren gud witim Jehovah, and iumi tu bae hapi. (2 Cor. 2:7; Col. 3:14) Last samting wea bae helpem iumi for forgivim narawan, hem for prea lo Jehovah. Askem hem for no letem Satan for spoelem wan mind lo kongregeson. (Eph. 4:26, 27) Iumi needim Jehovah for helpem iumi for forgivim narawan. w21.06 22 ¶11; 23 ¶14

Saul, wea hem king blo Israel, laek for killim dae David, so David ranawe and lukaotem ples for haed. Gogo, David needim kaikai, so hem go lo taon blo Nob and askem nomoa faevfala bred from priest lo there. (Fas Samuel 21:1, 3) Bihaen datwan, hem and olketa man blo hem go stap lo wanfala cave. (Fas Samuel 22:1) Why nao Saul laek for killim dae David? Saul barava jealous lo David bikos pipol laekem David and praisem hem from hem winim staka faet. Saul savve tu hao from hem no obey, Jehovah rejectim hem for king blo Israel and Jehovah chusim David nao for kamap next king. (Fas Samuel 23:16, 17) Bat from Saul hem still king blo Israel, hem garem bigfala army and staka pipol sapotim hem, so David mas ranawe for sevem laef blo hemseleva. Waswe, Saul tingse hem savve stopem plan blo God for David kamap king? (Aesaea 55:11) Bible no talem, bat wanem Saul duim showimaot hem againstim God. Iumi savve olketa wea faet againstim God no savve win! w22.01 2 ¶1-2

Jesus waka hard lo ministry. Jesus showimaot hem lovem pipol from hem laek for iusim evri chance for teachim olketa. (Luke 19:47, 48) Jesus duim datwan bikos hem tingim pipol. Olsem example, samfala taem from staka pipol laek for lisin lo Jesus and olketa disaepol blo hem, gogo olketa “no savve kaikai nao.” (Mark 3:20) And tu, Jesus willing for story witim pipol lo taem wea fitim olketa, olsem taem wanfala man kam for story witim hem lo naet. Jesus mek sure evriwan herem message blo hem nomata staka no kamap disaepol blo hem. Iumi tu laek for iusim evri chance for talemaot gud nius lo pipol. (Acts 10:42) For duim datwan, maet iumi need for changem schedule blo iumi. Iumi shud willing for changem schedule blo iumi for preach lo taem wea iumi savve meetim pipol. Sapos iumi duim datwan, iumi savve sure Jehovah bae hapi lo iumi. w22.01 17 ¶13-14

Distaem pipol faendem hard for trustim olketa wea garem paoa. Maet olketa lukim olketa gavman and law protectim olketa wea rich or garem hae position, bat olketa no helpem pipol wea poor. Pipol maet lukim tu olketa bigman blo religion duim olketa nogud samting, and diswan mekem olketa for no trustim God. So taem iumi studyim Bible witim samwan, iumi need for helpem hem for trustim Jehovah and olketa brata wea lead lo organization blo hem. Iumi wea insaed lo truth for staka year finis tu mas gohed for trustim Jehovah and organization blo hem lo evri samting. Bat samting kamap wea maet mekem iumi garem daot. w22.02 2 ¶1-2