May

Jehovah mek sure olketa Gospel (Matthew, Mark, Luke, and John) stap lo Bible for helpem iumi lane abaotem Son blo hem. Fofala buk hia storyim laef and ministry blo Jesus, wanem Jesus story abaotem, wanem hem duim, and feeling blo hem abaotem olketa samting. Olketa Gospel helpem iumi for “ting raonem” example blo Jesus. So taem iumi studyim fofala Bible buk hia, datwan bae helpem iumi for savve gud lo Jesus, and followim example blo hem. Hem important for spendem taem for readim, studyim, and ting raonem olketa Gospel mekem iumi lanem staka gud samting. (Josua 1:8) Piksarem lo mind story iumi readim lo Gospel. Tingim iu lo there, and tingim wanem iu maet lukim and herem. Duim research lo olketa pablikeson blo iumi. w21.04 4-5 ¶11-13

Tu-thri handred year bifor Messiah kam, Bible profesi sei wanfala man bae kasem 30 silver selen from hem givim Jesus lo olketa enemy. (Sekaraea 11:12, 13) Nara Bible profesi sei man hia bae gudfala fren blo Jesus. (Sams 41:9) Zechariah profesi tu hao taem man for lukaftarem sheepsheep hem dae ‘bae olketa sipsip go olobaot.’ (Sekaraea 13:7) From olketa profesi hia abaotem Messiah kamap tru, olketa wea lukim olketa samting hia happen lo Jesus shud no rejectim hem, bat datwan shud strongim faith blo olketa. Hao nao tingting blo pipol distaem? Samfala wea garem responsibility lo organization blo Jehovah lusim truth and kamap apostate, then olketa trae for mekem olketa narawan for duim sem samting. Olketa talem olketa laea story abaotem Olketa Jehovah’s Witness lo niuspepa, radio, TV, and Internet. Nomata olsem, pipol wea hambol no bilivim olketa laea hia and luksavve Bible storyim finis olketa samting olsem bae happen.​—Matt. 24:24; 2 Pet. 2:18-22. w21.05 11 ¶12; 12-13 ¶18-19

Bible sei iumi bae gohed kasem moa savve wea tru abaotem God. (Col. 1:9, 10) Jehovah isisi helpem iumi for luksavve lo olketa tru samting, so iumi mas patient. Taem Governing Body luksavve hao olketa explainim wanfala Bible teaching shud change, olketa kwiktaem stretem datwan. Staka religion distaem changem wanem olketa teachim bikos olketa laek for mekem olketa follower for hapi and for pipol lo world tinghae lo olketa. Bat iumi changem wanem iumi teachim bikos iumi laek for mekem God hapi and worshipim hem lo stretfala wei olsem Jesus duim. (Jas. 4:4) Iumi no changem wanem iumi teachim followim tingting blo pipol lo world, bat hem from iumi luksavve lo stretfala mining blo datfala teaching. Iumi tinghae tumas lo truth!​—1 Thess. 2:3, 4. w21.10 22 ¶12

Wat nao iu savve duim sapos iu feel lonely? Tingim hao Jehovah helpem iu. (Sams 55:22) Datwan bae helpem iu for luksavve Jehovah hem stap witim iu. Tingim tu hao Jehovah gohed helpem olketa brata and sista wea lonely. (1 Pet. 5:9, 10) Hiroshi, wanfala brata wea hemseleva nomoa insaed lo truth for longfala taem sei: “Nomata no eni relative blo mi lo truth, from mi lukim evriwan lo kongregeson gohed for worshipim Jehovah, datwan encouragem mi for no givap.” Hem important tu for gohed prea, readim Bible, and attendim meeting. Storyim feeling blo iu lo Jehovah. (1 Pet. 5:7) Readim Bible evriday and ting raonem story wea savve helpem iu luksavve Jehovah lovem iu. Samfala Christian baeheartim scripture wea comfortim olketa, olsem Sams 27:10 and Aesaea 41:10. Olketa narawan lisin lo audio recording blo Watchtower, Meeting Book, or Bible reading taem olketa prepare for meeting. Datwan mekem olketa for no feel lonely tumas. w21.06 9-10 ¶5-8

Maet iu tu deal witim wanfala big test distaem. Waswe, samwan iu lovem hem dae? Iu savve strongim faith blo iu taem iu readim olketa story lo Bible abaotem olketa wea laef bak from dae. Waswe, iu barava sorre from samwan insaed famili disfellowship? Hem gud for duim study wea bae mekem iu sure hao hem stret for Jehovah disciplinem olketa wea no repent. Nomata wanem hard taem iu kasem, datwan hem chance for iu strongim faith blo iu. Storyim evri feeling blo iu lo Jehovah. No stap seleva, bat spendem taem witim olketa brata and sista. (Provebs 18:1) Duim olketa spiritual samting nomata maet hem no isi bikos datwan bae helpem iu for gohed faithful. (Sams 126:5, 6) So gohed for go lo olketa meeting, duim preaching waka, and readim Bible. And gohed for tingim olketa nambawan blessing wea Jehovah promisim for iumi lo future. Taem iu lukim hao Jehovah helpem iumi distaem, datwan bae barava strongim faith blo iumi. w21.11 22-23 ¶11; 24 ¶17

Hao nao olketa disaepol blo Jesus olsem “smol pikinini”? Pipol lo world interest lo olketa wea rich, garem bignem, or hae position, bat olketa tingse iumi no important, olsem iumi smol pikinini. (1 Cor. 1:26-29) Bat Jehovah no garem datkaen tingting abaotem pipol blo hem. Why nao lo Matthew 18:10 Jesus talem olketa disaepol blo hem for “no les” lo olketa nara disaepol? Bikos olketa showimaot olketa laek for winim narawan taem olketa sei: “Hu nao man wea important winim olketa narawan long Kingdom bilong God?” (Matt. 18:1) Lo datfala taem, olketa Jew barava tinghae lo man wea garem hae position. Wanfala savveman sei: “Olketa laekem tumas for garem hae position and for pipol respectim and mekhae lo olketa.”Jesus savve hem wei blo olketa Jew for laek winim narawan, so olketa disaepol mas waka hard for aotem datkaen tingting. w21.06 20 ¶2; 21 ¶6, 8; 22 ¶9

Aposol Paul hem gudfala example for olketa elder lo hao for givim kaonsel. Olsem example, taem Paul luksavve olketa lo Thessalonica needim kaonsel, hem no hol bak for duim datwan. Taem hem raet lo olketa, firstaem hem praisem olketa. Hem storyim waka wea olketa duim from olketa faithful and garem love, and hao olketa no givap. Hem storyim tu hao laef blo olketa no isi, and hao olketa faithful for deal witim persecution. (1 Thess. 1:3; 2 Thess. 1:4) And tu, hem sei olketa brata and sista showimaot gudfala example for olketa nara Christian. (1 Thess. 1:8, 9) Masbi olketa hapi tumas from Paul praisem olketa! From olketa luksavve Paul lovem olketa, datwan mekem hem isi for olketa acceptim kaonsel wea hem raetem for olketa.​—1 Thess. 4:1, 3-5, 11; 2 Thess. 3:11, 12. w22.02 15 ¶6

Satan iusim olketa bigman blo religion for mekem pipol tingse Jehovah nao kosim pipol for safa. Olketa savve sei taem wanfala pikinini dae, God tekem pikinini hia from hem needim nara angel moa lo heven. Datwan no tru and iumi savve hard for Jehovah duim olsem! Nomata taem iumi sik or samwan iumi lovem hem dae, bae iumi hard for blamem God. Iumi savve lo future Jehovah bae healim evriwan wea sik and resurrectim olketa wea dae. Iumi laek for talem evriwan wea willing for lisin hao Jehovah lovem iumi evriwan. From iumi duim olsem, diswan showimaot wanem Satan talem abaotem Jehovah hem no tru. (Provebs 27:11) Jehovah hem God wea tingim pipol. Hem no laek for lukim iumi safa from pipol persecutim iumi, iumi sik, or iumi duim samting wea no stret bikos iumi no perfect. (Sams 22:23, 24) Jehovah luksavve iumi safa and hem laek for duim samting for stretem datwan.​—Comparem Eksodas 3:7, 8; Aesaea 63:9. w21.07 9-10 ¶9-10

Klosap nao olketa wea obeyim Jehovah and wea bae gohed stap lo earth, olketa bae kasem nambawan privilege for lovem and worshipim Jehovah for olowe! Jesus bae stretem evri problem wea kamaot from Adam and Eve tufala sin. Jehovah bae resurrectim staka million pipol and givim chance for olketa laef olowe lo paradaes wea no eniwan bae sik. (Luke 23:42, 43) Taem iumi wea insaed lo famili blo Jehovah lo earth kamap perfect, iumi bae kasem datfala “glory” wea David story abaotem. Sapos iumi insaed lo datfala “big crowd,” iumi garem wanfala nambawan hope. (Rev. 7:9) God lovem iumi and hem laekem iumi for insaed lo famili blo hem. So iumi laek for evritaem duim olketa samting wea mekem Jehovah hapi and evritaem tingim olketa promis blo hem. And tu, iumi tinghae lo privilege for worshipim Dadi blo iumi and datfala chance for iumi laef olowe! w21.08 7 ¶18-19

Profet Jeremiah preach for staka year and pipol againstim hem and no laek lisin lo message blo hem. Olketa barava “mekfan long [hem], an tokspoelem [hem].” Datwan mekem hem wikdaon and ting for givap. (Jeremaea 20:8, 9) Bat Jeremiah no givap! Wanem nao helpem Jeremiah for gohed hapi for duim ministry blo hem? Hem tingim tufala important samting. First wan, message blo God wea Jeremiah storyim hem givim hope lo pipol. (Jeremaea 29:11) Mek-tu samting, Jehovah chusim Jeremiah for story for hem. (Jeremaea 15:16) Iumi tu talem message lo pipol wea givim olketa hope, and Jehovah chusim iumi for witness for hem. Taem iumi tingim olketa samting hia, datwan savve helpem iumi for gohed hapi nomata maet pipol no laek herem message blo iumi. So no givap sapos Bible study hem isisi changem samfala samting lo laef blo hem. For duim Bible study iumi mas patient.​—Jas. 5:7, 8. w21.10 27 ¶12-13

Nomata iumi worshipim Jehovah for longtaem finis, iumi mas gohed for strongim faith blo iumi. Why nao olsem? Bikos olketa idea lo world savve spoelem faith blo iumi. From iumi no savve lukim God, maet iumi start for daotem hem stap. Dastawe Paul sei daot hem wanfala “sin wea savve isi for spoelem” iumi. Wanem nao savve helpem iumi for garem strongfala faith? (2 Thess. 1:3) First samting, evritaem askem Jehovah for holy spirit. Why nao olsem? Bikos holy spirit helpem iumi for garem faith. (Gal. 5:22, 23) Iumi needim faith, so gohed askem Jehovah for holy spirit blo hem and hem bae givim lo iumi. (Luke 11:13) Iumi savve prea olsem: “Strongim go moa faith bilong mifala.” (Luke 17:5) Nara samting, evritaem studyim Bible.​—Sams 1:2, 3. w21.08 18-19 ¶16-18

Olketa olo brata and sista savve duim yet samfala samting for Jehovah. Nomata olketa no strong olsem bifor, olketa garem staka experience insaed lo organization, and Jehovah iusim olketa for duim difren waka. Olsem example, Bible storyim olketa wea duim samting for Jehovah nomata olketa olo. Olsem example, Moses hem samting olsem 80 years taem Jehovah chusim hem for kamap profet and for leadim nation blo Israel. Jehovah iusim Daniel tu for talemaot toktok blo Hem nomata Daniel winim 90 years. And tu, Jehovah iusim aposol John for raetem Bible buk Revelation taem hem winim 90 years. Jehovah iusim Simeon wea “hem wanfala raeteous man wea worshipim God.” Nomata Bible no storyim staka samting abaotem Simeon, Jehovah savve gud lo hem. Jehovah givim hem privilege for lukim datfala baby wea bae kamap Messiah, and for talem profesi abaotem Jesus and Mary, mami blo Jesus.​—Luke 2:22, 25-35. w21.09 3-4 ¶5-7

Parents no laek for comparem wanfala pikinini witim nara pikinini, or expectim pikinini for duim samting wea hem no fit for duim. Sapos parents duim datwan pikinini savve feel wikdaon. (Eph. 6:4) Wanfala sista wea nem blo hem Sachiko sei: “Mami talem hao mi mas kasem hae mark lo evri exam, bat mi no fit for duim datwan. Mi no skul distaem, bat from mami and olketa teacher no hapi lo wanem mi duim lo datfala taem, mi tingse Jehovah tu no hapi lo mi.” King David hem hambol, hem luksavve hem no fit for duim samfala samting. (Sams 131:2) Wanem nao parents savve lanem from toktok blo David? Sapos parents hambol olketa bae luksavve olketa no fit for duim samfala samting, and shud no expectim pikinini for duim samting wea hem no fit for duim. Parents savve helpem pikinini for no tingse hem iusles taem olketa markem goal wea hem fit for kasem. w21.07 21-22 ¶5-6

Jehovah letem each wan for chus sapos hem bae worshipim God. Samfala young wan wea parents no showimaot gud example disaed for worshipim Jehovah and gohed faithful. Bat samfala young wan wea parents waka hard for teachim olketa for lovem Jehovah disaed for no duim datwan. So man seleva nao bae disaed sapos hem worshipim Jehovah. (Josua 24:15) Dastawe parents shud no blamem olketa seleva sapos pikinini disaed for no worshipim Jehovah! Maet mami or dadi wea lusim truth hem lusim famili tu. (Sams 27:10) Diswan savve affectim olketa pikinini wea lovem tumas mami or dadi wea lusim olketa. Olketa young wan, sapos dadi or mami disfellowship, Jehovah minim sorre feeling blo iufala. From iufala gohed faithful, datwan mekem Jehovah for lovem and tinghae lo iufala. Tingim tu, sapos dadi or mami disaed for lusim Jehovah, hem no rong blo iufala. w21.09 27 ¶5-7

Samwan wea disfellowship hem olsem sheepsheep wea garem sik wea savve spred go lo olketa nara sheepsheep. Bat man wea disfellowship hem sik lo spiritual wei. (Jas. 5:14) Taem samwan sik hem savve pasim sik lo narawan. Lo sem wei tu, man wea sin savve mekem olketa narawan for tingse hem olraet for duim nogud samting, so hem fitim for samwan wea duim sin and no repent for disfellowship. Disfala discipline showimaot Jehovah lovem olketa sheepsheep blo hem lo kongregeson, and maet hem helpem man wea duim sin for luksavve wanem hem duim no stret and for laek repent. Nomata hem disfellowship, maet hem savve attendim olketa meeting for kasem spiritual kaikai. And tu, hem savve kasem olketa pablikeson for hem readim and studyim, and hem savve lukim JW Broadcasting^®. And taem olketa elder lukim hem start for change, olketa savve givim hem kaonsel and direction lo wanem moa hem savve duim mekem hem reinstate. w21.10 10 ¶9, 11

Olketa Jehovah’s Witness followim example blo hao olketa Christian lo first century worshipim God. Olsem example, iumi followim sem arrangement olsem olketa Christian lo first century for garem olketa traveling overseer, elder, and ministerial servant. (Phil. 1:1; Titus 1:5) Iumi followim olketa sem standard wea olketa Christian lo first century followim tu. Olsem example, iumi respectim law blo Jehovah abaotem sex and marit, blood, and arrangement for aotem from kongregeson samwan wea sin and no repent. (Acts 15:28, 29; 1 Cor. 5:11-13; 6:9, 10; Heb. 13:4) Bible talemaot klia God garem wanfala wei nomoa for worshipim hem, wea datwan nao “wanfala faith.” (Eph. 4:4-6) Hem nambawan privilege for kamap pipol blo Jehovah and for savve lo truth abaotem hem and olketa plan blo hem! So iumi laek for gohed hol strong lo truth wea iumi followim. w21.10 22-23 ¶15-17

Wanfala big problem kamap for King Jehoshaphat. Army blo olketa Ammonite, Moabite, and olketa man blo Seir kam for faetem hem, and datwan mekem famili blo hem and olketa pipol barava fraet. (Mektu Kronikols 20:1, 2) Wanem nao Jehoshaphat duim? Hem askem Jehovah for helpem and strongim hem. Lo Mektu Kronikols 20:5-12, iumi savve readim prea blo Jehoshaphat wea showimaot hem barava trustim Jehovah. Jehovah sendem Jahaziel, wanfala Levite, for talem lo Jehoshaphat toktok wea stap lo text for tuday. Jehoshaphat barava trustim God and followim instruction hia. Taem hem and army blo hem go for feisim olketa enemy, hem sei olketa soldia mas standap bihaen lo olketa man for singsing wea no holem eni weapon. Jehovah keepim promis blo hem for winim olketa enemy blo Jehoshaphat.​—Mektu Kronikols 20:18-23. w21.11 15-16 ¶6-7

Taem iumi kasem hard taem iumi sure Jehovah bae helpem iumi for gohed faithful lo hem. (2 Cor. 4:7-9) Iumi sure Jehovah garem strongfala love for iumi bikos Bible sei: “[Jehovah] gohed fo lukaftarem olketa hu i trastem hem bikos hemi tinghevi [“showimaot strongfala love,” NWT] long olketa olowe.” (Sams 33:18-22) Jehovah lovem iumi finis bifor iumi worshipim hem, and then taem iumi worshipim Jehovah hem showimaot tu strongfala love for iumi. From datwan, iumi kasem protection from Jehovah, hem gohed for lovem iumi, and hem duim evri samting wea hem promisim. Hem laekem iumi for fren witim hem for olowe! (Sams 46:1, 2, 7) So nomata wanem hard samting kasem iumi, Jehovah bae strongim iumi for gohed faithful. w21.11 6-7 ¶17-18

Staka lo iumi savve lo samwan wea gohed heitim wanfala lo waka ples, lo skul, or lo famili, maet for staka year! Tingim hao tenfala haf brata blo Joseph heitim hem gogo olketa duim nogud samting lo hem. (Jenesis 37:2-8, 25-28) Bat Joseph no heitim olketa brata blo hem! Nomata taem hem kamap bigman and hem garem chance for changem bak wanem olketa duim lo hem, hem showimaot mercy lo olketa. Hem duim wanem Levitikas 19:18 talem for showimaot love lo olketa. (Jenesis 50:19-21) Olketa Christian wea laek for mekem God hapi shud followim example blo Joseph for forgivim narawan and no gohed heitim hem. Jesus sei for iumi forgivim olketa wea sin againstim iumi. (Matt. 6:9, 12) Aposol Paul tu talem olketa Christian for “no changem bak nogud samting wea narawan duim.”​—Rome 12:19. w21.12 11 ¶13-14

Lo naet blo Nisan 14, 33 C.E, Jesus go lo garden blo Gethsemane and prea lo Jehovah for talemaot feeling blo hem. (Luke 22:39-44) Lo datfala taem Jesus “prea strong” and “hem prea big and hem krae tu.” (Heb. 5:7) Wanem nao Jesus prea abaotem bifor hem dae? Hem askem Jehovah for strongim hem for gohed faithful and for duim wanem God laekem. Jehovah herem prea blo Son blo hem and sendem wanfala angel for strongim Jesus. Jesus luksavve hem garem responsibility for mekhae lo nem blo Dadi blo hem. Jehovah ansarem prea blo Jesus. Why nao olsem? Bikos Jesus barava laek for faithful lo Dadi blo hem and for mekhae lo nem blo Hem. Sapos iumi prea lo Jehovah for helpem iumi from iumi laek for faithful and for mekhae lo nem blo hem, bae hem ansarem olketa prea blo iumi.​—Sams 145:18, 19. w22.01 17-18 ¶15-17

Staka pipol no laekem iumi bikos iumi no teksaed lo politik. Olketa sei iumi shud vote lo olketa election. Bat sapos iumi votem wanfala man for rulim iumi, hem olsem iumi rejectim Jehovah for rulim iumi. (Fas Samuel 8:4-7) Samfala tingse iumi shud wakem olketa skul and olketa hospital, and duim olketa waka for helpem pipol lo community. Olketa tingse iumi shud duim olketa samting for stretem olketa problem lo world distaem, and no busy nomoa for duim preaching waka. Wanem nao iumi need for duim? (Matt. 7:21-23) Iumi need for busy lo preaching waka olsem Jesus hem talem. Iumi no laekem politik or olketa problem lo world for mekem iumi go difren. Iumi tingim pipol and laek for helpem olketa, bat best wei for duim datwan hem for teachim olketa abaotem Kingdom blo God and helpem olketa for fren witim Jehovah. w21.05 7 ¶19-20

Nomata staka ruler blo olketa kantri distaem sei olketa worshipim God, olketa no laek for lusim paoa blo olketa. So olketa ruler hia duim sem samting olsem olketa ruler lo taem blo Jesus. Olketa attakim olketa faithful follower blo Jesus Christ. (Acts 4:25-28) Hao nao Jehovah ting lo datwan? Lo Sams 2:10-12 Jehovah sei lo olketa: ‘Yufala olketa king mas herem gudfala olketa toktok ya. Yufala mas waka fo Jehovah an yufala mas tinghae long hem. Hemi gud wea yufala barava tinghae long Jehovah, an long san blong hem. Sapos nomoa, bae hemi kros, an no long taem bae yufala dae nao ya. Evriwan wea go long hem fo hemi gadem olketa, olketa nao hapi.’ From Jehovah kaen tumas, hem givim chance lo olketa wea againstim hem for change and sapotim Kingdom blo hem. Bat olketa no garem staka taem. (Aesaea 61:2) Olketa need for hariap for savve lo tru samting and for disaed for worshipim Jehovah. w21.09 15-16 ¶8-9

Wanem Paul minim lo scripture hia hem for satisfae witim wanem iumi garem finis. (Phil. 4:12) Hem barava important for fren gud witim God winim for garem olketa material samting. (Habakuk 3:17, 18) Tingim wanem Moses talem olketa Israelite bihaen olketa stap lo wilderness for 40 year. Hem sei: “[Jehovah], God blong yufala, hemi blesim yufala long evrisamting wea yufala duim. Olowe long foti yia . . . hemi lukaftarem yufala, an yufala nating save sot long enisamting.” (Diutronomi 2:7) For 40-fala year, Jehovah givim manna for olketa Israelite for kaikaim. And Jehovah mek sure kaleko wea olketa karem kam from Egypt hem no brek. (Diutronomi 8:3, 4) Jehovah laekem iumi for satisfae lo wanem iumi garem, and for luksavve eni samting iumi kasem hem blessing from Jehovah and for tinghae lo datwan. w22.01 5 ¶10-11

Hasband iu garem responsibility for lukaftarem famili blo iu, so iu waka hard for protectim and provaedem wanem olketa needim. Taem iu feisim olketa problem, maet iu tingse iuseleva savve deal witim olketa problem hia. Hem gud for prea lo Jehovah for helpem iu, and no depend lo iuseleva. And tu, prea witim waef blo iu. Studyim Bible and olketa pablikeson wea kam from organization blo God for kasem direction from Jehovah, and then followim datfala direction. Taem iu mekem disison followim wanem Bible talem, maet samfala no agree witim datwan. Maet olketa sei best wei for lukaftarem famili hem for garem staka selen and olketa material samting. Bat tingim example blo King Jehoshaphat. (Mektu Kronikols 20:1-30) Hem trustim Jehovah and duim samting wea showimaot datwan. Jehovah helpem datfala faithful man, and bae hem helpem iu tu.​—Sams 37:28; Heb. 13:5. w21.11 15 ¶6; 16 ¶8

Iumi sorre lo pipol taem olketa kasem samting wea no stret bikos God wakem iumi for olsem. (Jenesis 1:26) Bat from iumi no perfect, maet iumi no judgem samwan lo stretfala wei, nomata iumi tingse iumi savve lo full story. Olsem example, tingim hao Jonah no hapi witim disison blo Jehovah for showimaot mercy lo pipol lo Nineveh. (Jona 3:10–4:1) Bat tingim gud samting wea kamaot from datfala disison. Winim 120,000 pipol lo Nineveh olketa sev! Jehovah nao disaedem stretfala samting and no Jonah. Jehovah no need for explainim why hem duim samting. Hem tru, Jehovah letem samfala lo bifor for storyim feeling blo olketa abaotem olketa disison blo hem. (Jenesis 18:25; Jona 4:2, 3) And samfala taem hem explainim why hem disaedem samfala samting. (Jona 4:10, 11) Nomata olsem, Jehovah no needim iumi for appruvim olketa disison blo hem.​—Aesaea 40:13, 14; 55:9. w22.02 3-4 ¶5-6

Jesus showimaot iumi shud “ting long narawan olsem hem winim [iumi].” (Phil. 2:3) Taem iumi garem datkaen tingting, bae iumi no ting daonem narawan and mekem hem stambol. Evri brata and sista gud winim iumi lo samfala samting. Bae iumi luksavve lo datwan taem iumi tingim olketa gudfala wei blo olketa. Hem important for ting raonem disfala kaonsel wea aposol Paul talem for olketa lo Corinth: “Wanem nao mekem iu gud winim narawan? Evri samting wea iu garem, God nao givim long iu. Sapos olsem, hao nao iu tok praod and sei no eniwan givim iu olketa samting hia?” (1 Cor. 4:7) So iumi shud no laekem pipol for mekhae lo iumi or tingse iumi gud winim narawan. Olsem example, sapos brata savve tumas for givim naes tok or sista savve tumas for startim olketa Bible study, olketa shud mekhae lo Jehovah. w21.06 22 ¶9-10

Samfala pablisa faendem hem no isi for preach bikos lo territory blo olketa, pipol stap lo building wea garem intercom, or pipol stap lo area wea garem fence raonem and gate hem lok. Maet pipol hia garem security tu wea letem nomoa olketa fren blo olketa wea stap lo building or haos for kam insaed. Maet lo territory blo olketa nara pablisa, staka pipol no stap lo haos. And samfala territory no garem staka haos, so olketa pablisa maet wakabaot for staka hour for kasem wanfala haos, bat haosholder go finis! Nomata maet iumi deal witim olketa samting hia, iumi laek for gohed preach. Hem gud for preach lo olketa difren taem wea pipol maet stap lo haos. Nomata pipol lusim haos for waka or nara reason, olketa bae kam bak lo haos! So samfala brata and sista preach lo aftanun or evening taem pipol stap lo haos. Lo taem olsem samfala haosholder garem taem for story. w21.05 15 ¶5, 7

Wanem nao tingting blo pipol abaotem Olketa Jehovah’s Witness? Samfala no laekem Olketa Jehovah’s Witness bikos iumi no duim celebration olsem Christmas, birthday, and olketa celebration wea mekhae lo kantri. Olketa savve kros lo iumi tu from iumi no followim olketa kastom taem man dae. Olketa hia maet tingse olketa nao duim wanem God laekem. Bat God bae no hapi lo olketa sapos olketa duim olketa celebration and followim olketa kastom winim for followim wanem Bible talem. (Mark 7:8, 9) Wanem nao olketa wea interest lo truth need for duim? Olketa need for lane abaotem olketa law and principle blo Jehovah. (Sams 119:97, 113, 163-165) Datwan bae helpem olketa for fren gud witim Jehovah, and olketa bae no laek followim olketa kastom blo man wea Jehovah no acceptim. w21.05 6 ¶15-16

Hao nao iumi savve followim datfala advaes blo aposol Paul? Iumi savve strongim faith blo iumi taem iumi gohed for studyim Bible, prea olowe, and busy for duim preaching waka. (2 Tim. 4:4) Taem iumi duim olsem, iumi bae no fraet taem pipol talem olketa laea story abaotem iumi. (Aesaea 28:16) From iumi tinghae lo Bible and iumi lovem Jehovah and olketa brata and sista, iumi bae no bilivim olketa laea story blo olketa apostate. Lo first century staka rejectim Jesus, bat staka narawan kamap disaepol blo hem. Wanfala hem bigman blo Sanhedrin, and “plande priest tu” kamap disaepol. (Acts 6:7; Matt. 27:57-60; Mark 15:43) Distaem tu Olketa Jehovah’s Witness no letem eni samting for spoelem faith blo olketa. Olketa luksavve lo olketa tru teaching and followim datwan. Bible sei: “Olketa wea tinghae lo law blo iu bae kasem peace and no eni samting bae spoelem faith blo olketa.”​—Ps. 119:165, NWT. w21.05 13 ¶20-21

Aposol Paul luksavve Jehovah nao strongim hem for duim evri waka lo ministry. Jehovah iusim holy spirit for strongim Paul for duim gud ministry blo hem, nomata taem hem kasem persecution, hem lo prison, or hem kasem olketa nara hard samting. Timothy, wea young winim Paul, mas depend lo holy spirit blo God tu for duim ministry blo hem. Timothy savve go witim Paul lo olketa missionary gogo, and tu, Paul sendem hem for visitim and encouragem olketa kongregeson. (1 Cor. 4:17) Maet Timothy tingse hem no fit for duim datfala waka. Dastawe Paul talem Timothy “nomata iu wanfala young man no letem eniwan lukdaonem iu.” (1 Tim. 4:12) Nara samting, Timothy mas deal witim sik samfala taem. (1 Tim. 5:23) Bat Timothy savve holy spirit blo Jehovah bae strongim hem for preachim gud nius and duim waka for helpem olketa kongregeson.​—2 Tim. 1:7. w21.05 21 ¶6-7

Datfala principle lo James 1:19 hem fitim olketa wea givim kaonsel. James sei: “Evriwan mas willing for lisin, no kwiktaem for toktok, and no kwiktaem for kros.” Elder wea go for kaonselem samwan maet tingse hem savve lo full story, bat waswe, datwan hem tru? Hem gud for elder tingim toktok lo Provebs 18:13 wea sei: “Man hu hemi ansa bifoa hemi lisin, bae hemi krangge an filsem.” Hem gud for elder lisin lo story blo brata or sista abaotem samting wea happen firstaem bifor hem kaonselem hem. Elder savve askem kaen kwestin olsem: “Iu feisim eni hard samting distaem?” and “Eni samting mifala savve duim for helpem iu?” Sapos olketa elder savve lo full story, datwan bae helpem olketa for minim olketa brata and sista and for encouragem olketa. Olsem iumi storyim finis, taem elder kaonselem samwan, nomata hem readim samfala scripture and givim advaes, hem important for olketa brata and sista luksavve hem tingim, minim, and laek helpem olketa. Datwan nao bae helpem olketa for acceptim kaonsel. w22.02 17 ¶14-15