June

Laef blo datfala widow no isi and maet hem no savve peim evri samting hem needim. Nomata olsem, hem go putim tufala smol coin lo contribution box. From tufala coin no hevi maet hem no mekem eni saond taem olketa foldaon insaed lo box, bat Jesus lukim tufala coin hia wea olketa kolem lepta coin. Tufala coin no fit for peim wanfala smol bird for kaikaim, nomata datkaen bird hem cheap tumas. Jesus barava tinghae lo wanem disfala widow woman duim. So hem kolem kam olketa disaepol blo hem and sei lo olketa: “Selen wea disfala widow woman givim, hem barava winim nao selen wea evri narawan givim.” Then Jesus sei moa: “Olketa [wea rich] givim lelebet nomoa long staka selen wea olketa garem, bat disfala woman, nomata hem poor, givim evri selen wea hem garem.” (Mark 12:43, 44) Taem disfala faithful widow woman givim last selen blo hem for datfala day, hem showimaot hem trustim Jehovah bae provaedem need blo hem.​—Sams 26:3. w21.04 6 ¶17-18

Taem Jesus stap lo earth hem gohed for preach and hem hope samfala bae interest lo datfala message. Hem laekem olketa disaepol tu for gohed preach. (John 4:35, 36) Olketa disaepol blo Jesus barava enjoyim preaching waka taem Jesus stap witim olketa. (Luke 10:1, 5-11, 17) Bat from olketa soldia arrestim Jesus and then hem dae, olketa stop for preach nao. (John 16:32) Bihaen Jesus resurrect, hem encouragem olketa for gohed preach. Then bihaen Jesus go bak lo heven, olketa disaepol barava busy for duim preaching waka, gogo olketa enemy talem toktok wea stap lo scripture for tuday. Taem Jesus lo heven, hem leadim preaching waka wea olketa Christian lo first century duim. Jehovah blessim datfala waka and staka kamap disaepol, olsem example, lo Pentecost 33 C.E. samting olsem 3,000 nao baptaes. (Acts 2:41) Bihaen lo datwan, staka pipol moa kamap disaepol. (Acts 6:7) Nomata olsem, Jesus sei lo olketa last day, preaching waka bae kamap barava big winim datwan.​—John 14:12; Acts 1:8. w21.05 14 ¶1-2

Waswe, iu tingim taem wea iu luksavve wanem iu lanem lo Bible hem tru? Iu laekem evri narawan for lanem olketa truth hia tu. Iu savve truth lo Bible bae helpem olketa for garem gudfala laef and hope for future. (Sams 119:105) So iu storyim truth lo olketa fren and relative blo iu. Bat iu sapraes bikos olketa no laek herem. Iumi shud no sapraes sapos pipol no laek herem message wea iumi preachim. Staka pipol rejectim Jesus, nomata hem duim olketa mirakol wea pruvim Jehovah givim paoa lo hem. Olsem example, Jesus duim mirakol for resurrectim Lazarus, and olketa wea againstim hem savve Lazarus hem laef bak. Nomata olsem, olketa bigman blo Jew religion no bilivim Jesus hem Messiah, and olketa laek for killim dae Jesus and Lazarus tu!​—John 11:47, 48, 53; 12:9-11. w21.05 2 ¶1-2

Traem best for attendim evri meeting bikos datwan bae encouragem iu and bae helpem iu for savve gud lo olketa brata and sista. Garem olketa fren wea savve encouragem iu, nomata olketa wanem age or culture. Hem gud for olketa young wan fren witim olketa olo wea “waes.” (Job 12:12) And olketa olo savve lanem samting tu from olketa young wan wea gohed faithful. David hem barava young winim Jonathan bat tufala barava fren gud. (Fas Samuel 18:1) Taem David and Jonathan kasem olketa hard samting, tufala helpem each other for gohed worshipim Jehovah. (Fas Samuel 23:16-18) Irina, wea no garem eni relative lo truth sei: “Olketa lo kongregeson kamap spiritual mami, dadi, brata, and sista blo iumi. Jehovah iusim olketa for kamap famili blo iumi.” Hem gud for talem olketa fren blo iu wanem iu needim bikos olketa laek for encouragem and helpem iu. w21.06 10-11 ¶9-11

Jesus storyim tokpiksa abaotem king and wakaman blo hem. King talem wakaman for no changem bak bigfala kaon wea hem no fit for peim bak. Bat then datfala wakaman forcem nara wakaman for peim bak smol selen wea hem kaonem. King putim wakaman wea no showimaot mercy lo prison. Hao nao samting wea datfala wakaman duim affectim narawan? First samting, mek-tu wakaman safa bikos first wakaman “talem olketa for putim hem long prison go kasem taem hem changem bak kaon bilong hem.” Mek-tu, “taem olketa nara wakaman lukim diswan, olketa barava feel nogud.” (Matt. 18:30, 31) Samting wea iumi duim tu savve affectim narawan. Taem samwan treatim iumi nogud, wanem nao savve happen sapos iumi no forgivim hem? First samting, maet hem sorre from iumi no kaen and les for story lo hem. Mek-tu, from olketa brata and sista lukim iumi les lo hem, bae olketa feel nogud. w21.06 22 ¶11-12

God wakem olketa man for garem olketa naesfala wei blo hem, bat Satan laekem pipol for duim olketa rabis samting. Lo taem blo Noah, God lukim wei blo pipol “kamap nogud tumas” and hem “filnogud tumas” lo olketa samting hia. (Jenesis 6:5, 6, 11) Waswe lo wei blo pipol distaem? Hem nogud tumas! Satan hem hapi taem pipol durong, olsem for man and woman durong, man sleep witim man, and woman sleep witim woman tu! (Eph. 4:18, 19) Satan barava hapi tu sapos olketa wea worshipim Jehovah duim serious sin. Anda lo rul blo Satan, pipol mekem olketa narawan for safa, and olketa spoelem earth and no lukaftarem olketa animal olsem Jehovah talem. (Eklesiastes 8:9; Jenesis 1:28) Wat nao kamaot from datwan? Samfala savveman sei from pipol spoelem earth, bihaen tu-thri year nomoa samting olsem wan million difren kaen plant, animal, fish, and bird bae nomoa nao. w21.07 12 ¶13-14

Samfala wea repent finis gohed guilty bikos lo olketa sin wea olketa duim bifor. Olketa tingse Jehovah hard for forgivim olketa nomata olketa askem hem for forgivim olketa and stop for duim olketa nogud samting. Sapos iu feel olsem, samting wea savve helpem iu hem for savve Jehovah forgivim iu bikos hem garem strongfala love for iu. And tu, iu savve garem gudfala konsens and gohed hapi for worshipim Jehovah. Diswan bikos ‘blood blo Jesus hem mekem iumi klin from evri sin blo iumi.’ (1 John 1:7) Sapos iumi wikdaon bikos lo eni sin wea iumi duim bifor, hem gud for tingim Jehovah laekem tumas for forgivim iumi sapos iumi repent. Lukim wanem David talem abaotem hao strongfala love blo God mekem Hem for forgivim iumi. David sei: “Lav [“strongfala love,” NWT] blong hem fo olketa wea i gohed fo tinghae long hem, hemi bikfala tumas, hemi bikfala moa winim disfala wol. Hemi gohed fo tekem go farawe olketa sin blong yumi, olsem ples wea san hemi kamap hemi farawe from ples wea san hemi godaon.”​—Sams 103:11, 12. w21.11 5-6 ¶12-13

Christian hasband mas tinghae lo waef blo hem. (1 Pet. 3:7) Olsem example, hasband wea tinghae lo waef bae no expectim waef for duim samting wea hem no fit for duim. And bae hem no sei olketa nara woman gud winim waef blo hem. Why nao olsem? Hasband blo Rosa wea hem no wanfala Witness savve sei olketa nara woman gud winim Rosa. Datwan mekem Rosa for feel iusles. Hem sei, “Mi evritaem needim samwan for storyim hao Jehovah tinghae lo mi.” Hasband shud no treatim waef olsem. Hasband wea tinghae lo waef blo hem bae stap gud witim waef, praisem hem, and talem waef hem lovem hem. Datwan bae mekem waef and Jehovah for hapi lo hem. w21.07 22 ¶7-8

Hao bae iu feel nogud sapos iu expectim fren blo iu for tekem kam wanfala pasol for iu, bat hem no kam lo taem wea iufala markem? Sapos iu savve gudfala reason stap why fren blo iu no savve kam, bae iu willing for patient and weitim hem. Wanfala Bible principle wea helpem iumi for luksavve why iumi need for patient hem Proverbs 13:11, NWT. Hem sei: “Taem man kasem riches kwiktaem bae hem savve lusim, bat man wea tek taem for kasem riches bae hem gohed kasem samfala moa.” Disfala principle showimaot iumi mas patient and hem savve tek taem for duim samfala samting. Proverbs 4:18, NWT sei: “Road wea raeteous man followim hem olsem laet lo early morning wea kakamap braet go kasem bigfala daylaet.” Toktok hia showimaot Jehovah isisi helpem pipol blo hem for luksavve lo plan blo Hem. Scripture hia hem wanfala principle wea showimaot hao hem bae tek taem for wanfala Christian kamap mature. w21.08 8 ¶1, 3-4

End lo disfala nogud world hem klosap, so iumi garem staka waka for duim. (Matt. 24:14; Luke 10:2; 1 Pet. 5:2) Iumi laek for waka hard for Jehovah, so samfala duim moa samting lo ministry, samfala laek for kamap pioneer, and samfala laek for waka lo Bethel or lo construction. And staka brata waka hard for kamap fit for ministerial servant or elder. (1 Tim. 3:1, 8) Masbi Jehovah hapi for lukim pipol blo hem willing for duim staka samting for hem! (Ps. 110:3, NWT) Bat waswe, iumi feel sorre bikos iumi no kasem yet privilege wea iumi laekem? Sapos olsem, storyim datwan lo Jehovah. (Sams 37:5-7) Nara samting, hem gud for askem olketa mature brata for samfala idea lo hao for kamap gud lo samfala samting, then traem best for followim datwan. Sapos iumi duim olsem, maet bae iumi kasem datfala privilege. w21.08 20 ¶1; 21 ¶4

Anna hem wanfala widow wea 84 years, bat hem savve go worship lo temple evritaem. Anna hem olsem staka olo sista distaem wea no misstim olketa meeting, and Jehovah rewardim hem for garem chance for karem baby Jesus. (Luke 2:36-38) Distaem tu, staka olo brata and sista showim nambawan example for iumi. Wanfala example hem Sista Lois Didur. Iumi bae kasem gud samting sapos iumi askem kwestin and lisin gud lo olketa naes experience blo olketa. Olketa olo brata and sista important lo organization blo Jehovah. Olketa experiencem hao Jehovah blessim organization lo staka difren wei and hao hem blessim olketa tu. And tu, olketa lane from olketa mistek blo olketa. So iumi savve kasem gud samting from wisdom and experience blo olketa. (Provebs 18:4) Sapos iumi spendem taem for savve gud lo olketa, datwan savve strongim faith blo iumi. w21.09 3 ¶4; 4 ¶7-8; 5 ¶11, 13

Isaiah profesi abaotem datwan and sei “olketa narafala kantri bae i lukaftarem yufala, olsem mami hu hemi susum bebi blong hem.” (Aesaea 60:5, 16) Distaem olketa wea worshipim Jehovah duim preaching waka lo 240 kantri and transleitim olketa pablikeson lo winim 1,000 languis. Lo disfala taem blo end, Jehovah gohed sekem olketa kantri and datwan mekem evriwan for mas disaed sapos olketa bae sapotim Kingdom blo God, or olketa gavman blo disfala world. Pipol blo Jehovah obeyim olketa law blo gavman lo ples wea olketa stap, bat olketa no teksaed lo politik. (Rome 13:1-7) Olketa savve Kingdom blo God nomoa bae stretem olketa nogud samting wea happen lo disfala world, and Kingdom blo God hem no from disfala world.​—John 18:36, 37. w21.09 17-18 ¶13-14

Taem samwan wea iumi lovem hem disfellowship, hem important for gohed strongim faith blo iumi and olketa narawan lo famili. Hao nao iumi savve duim datwan? Evriday iumi shud readim Bible and ting raonem wanem iumi readim, and mas evritaem attendim olketa meeting. Joanna, wea dadi blo hem and sista blo hem tu disfellowship, hem sei: “Samting wea helpem mi for no sorre tumas hem for readim olketa story lo Bible abaotem Abigail, Esther, Job, Joseph, and Jesus. Example blo olketa encouragem mi and helpem mi for no laek givap.” Taem iumi sorre, gohed prea lo Jehovah. Askem hem for helpem iumi for garem “gudfala tingting” abaotem wanem hem happen lo famili member blo iumi. (Sams 32:6-8) Maet hem no isi for storyim feeling blo iumi lo Jehovah, bat hem barava minim iumi. Hem laekem iumi for story lo hem.​—Eksodas 34:6; Sams 62:7. w21.09 28 ¶9-10

Bihaen lo Pasova lo 32 C.E., aposol Peter, James, and John lukim wanfala vision wea lukluk blo Jesus hem change. Taem thrifala standap lo wanfala hae maunten wea maet hem Maunt Hermon, olketa lukim “feis bilong [Jesus] shaen olsem sun and kaleko bilong hem barava white fogud.” (Matt. 17:1-4) Olketa aposol herem God sei lo olketa: “Disfala man hem Son bilong mi wea mi lovem and wea mi hapi long hem. Iufala mas herem samting wea hem talem.” Wanem thrifala aposol duim lo laef blo olketa showimaot olketa herem and followim toktok blo Jesus. Iumi tu laek for followim example blo olketa. Iumi hapi tumas Jehovah iusim Jesus Christ, “hed bilong kongregeson,” for givim iumi kaonsel wea savve helpem iumi! (Eph. 5:23) Olsem aposol Peter, James, and John, iumi laek gohed “herem samting wea [Jesus] talem.” Taem iumi duim olsem, iumi savve kasem staka blessing distaem and enjoyim laef lo future. w21.12 22 ¶1; 27 ¶19

Wanfala brata lo Corinth hem durong witim waef blo dadi blo hem. Aposol Paul talem olketa elder for disfellowshipim hem. Sin wea man hia duim hem affectim olketa narawan lo kongregeson, and samfala start for tingse wanem hem duim hem no bigfala sin! (1 Cor. 5:1, 2, 13) Gogo Paul faendaot datfala man hem repent. Paul talem olketa elder for “mas willing for forgivim and comfortim hem.” Paul talem datwan bikos hem no laekem “man hia hem wikdaon from hem sorre tumas.” Paul sorre lo disfala man wea repent. Hem no laekem disfala man for givap and tingse hard for hem kam bak nao. (2 Cor. 2:5-8, 11) Olsem Jehovah, olketa elder laek for showimaot mercy. Olketa bae disfellowshipim samwan sapos hem no repent, bat sapos gudfala reason stap for showimaot mercy bae olketa duim datwan. Nomata olsem, olketa bae no showimaot mercy lo man wea no repent bikos datwan bae olsem olketa acceptim datfala sin. w21.10 11-12 ¶12-15

Taem iumi feel nogud lo samwan hem olsem garekil. Samfala garekil hem smol, bat samfala barava big. Olsem example, maet iumi katem finger, bat hem smol kat nomoa. Datwan savve soa tumas, bat bae hem kamap gud bihaen wan or tufala day. Maet gogo iumi forgetim nao datfala kat. Olsem datfala kat, maet samting wea wanfala fren talem or duim mekem iumi feel nogud, bat hem no big samting nomoa and hem isi for forgivim hem. Bat sapos iumi garem bigfala kat lo hand blo iumi, doctor maet need for stitchim and bandagem datfala garekil. Sapos iumi gohed for tasim and skrasem datfala garekil, maet bae hem no heal or bae kamap worse. Olsem tu, maet samwan wea barava feel nogud lo narawan gohed for tingim nogud samting wea man hia talem or duim. Sapos hem gohed heitim datfala man, bae hem spoelem hemseleva nomoa. So hem gud tumas for followim kaonsel wea stap lo text blo iumi for tuday. w21.12 12 ¶15

Wanfala elder maet tingse kaleko or lukluk blo wanfala brata or sista no showimaot respect. Bat hem shud tingim, ‘Waswe, mi garem eni reason from Bible for kaonselem hem, or diswan hem tingting blo mi nomoa?’ Maet hem savve askem tingting blo nara elder or mature brata or sista. Maet tufala savve storyim tugeta kaonsel wea Paul givim abaotem kaleko and lukluk blo olketa Christian. (1 Tim. 2:9, 10) Paul storyim olketa principle wea helpem olketa Christian for luksavve olketa shud werem kaleko wea fitim and showimaot respect, bat hem no mekem olketa rul. Hem savve olketa brata and sista garem raet for disaedem wanem olketa bae werem, sapos hem no againstim wanem Bible talem. Bifor olketa elder givim kaonsel abaotem kaleko or lukluk blo samwan, olketa shud ting raonem sapos datfala brata or sista brekem eni Bible principle. Hem gud for olketa elder tingim hao tufala mature Christian maet no mekem sem disison abaotem wanfala samting, bat datwan no minim disison blo wanfala hem stret and narawan hem rong. Olketa elder shud no trae for forcem olketa brata and sista for duim wanem olketa tingse hem stret. w22.02 16 ¶9-10.

Iumi garem olketa gudfala reason for showimaot strongfala love lo each other. Proverbs storyim samfala reason. First wan: “No lusim wei fo lavem pipol [“garem strongfala love,” NWT] an kaen long olketa olowe. . . . Sapos yu duim olsem, bae God hemi hapi long yu, an pipol tu bae hapi long yu.” Mek-tu: “Yu kaen long man, [“showimaot strongfala love,” NWT] bae hemi kaen long yu.” Mek-thri: “Man falom wei fo lav an wei fo kaen, hemi kasem gudfala laef.” (Provebs 3:3, 4; 11:17; 21:21) So first reason for showimaot strongfala love hem bikos God bae hapi lo iumi. Mek-tu reason, taem iumi duim datwan iumi bae kasem gud samting. Olsem example, from iumi showimaot strongfala love lo each other iumi garem olketa gudfala fren. Mek-thri reason, bae iumi kasem staka blessing lo future and laef olowe. So iumi garem staka gudfala reason for obeyim toktok blo Jehovah wea sei: “Showimaot strongfala love and mercy lo each other.” w21.11 8 ¶1-2

Sapos hard samting wea kasem iumi bifor or distaem mekem iumi luksavve faith blo iumi no strong, no discourage. Datwan chance for iumi strongim faith blo iumi. Prea strong lo Jehovah taem iumi kasem hard taem, and luksavve hao Jehovah iusim famili and olketa fren for givim help wea iumi needim. Taem iumi feisim hard taem acceptim help from Jehovah, bikos datwan bae mekem iumi sure hem bae helpem iumi for deal witim eni hard samting wea iumi feisim lo future. Nomata Jesus talem olketa disaepol for showimaot faith, hem sure witim help blo Jehovah olketa bae garem strongfala faith for deal witim eni hard samting wea bae kamap. (John 14:1; 16:33) Jesus sei tu wanfala big crowd bae winim bigfala trabol from olketa garem strongfala faith. (Rev. 7:9, 14) Bae iumi tu insaed lo datfala big crowd sapos iumi duim evri samting wea iumi fit for duim distaem for strongim faith blo iumi!​—Heb. 10:39. w21.11 25 ¶18-19

Distaem iumi no expectim Jehovah for duim mirakol for protectim iumi. Bat iumi savve from iumi trustim Jehovah iumi bae kasem laef olowe, nomata maet iumi dae distaem. Klosap nao bae iumi need for barava trustim Jehovah for protectim iumi. Taem Gog blo Magog, wea minim olketa nation, attakim pipol blo God maet hem luk olsem iumi no wei nao. So iumi need for sure Jehovah bae sevem iumi. Olketa nation hia bae tingim iumi olsem olketa sheepsheep wea no garem eni shepherd for protectim olketa. (Esikiel 38:10-12) Iumi bae no garem olketa weapon and no kasem training for faet. Olketa nation hia bae tingse hem isi nomoa for finisim iumi. From olketa no garem faith lo God, olketa bae no luksavve staka angel gaedem iumi and redi for defendim iumi. So olketa bae sapraes tumas taem army blo God lo heven faet for iumi!​—Rev. 19:11, 14, 15. w22.01 6 ¶12-13

Jehovah lovem evriwan wea worshipim hem, so iumi tu shud lovem evri brata and sista lo kongregeson, no samfala nomoa. Iumi laek for tingim and protectim olketa brata and sista blo iumi. Sapos iumi luksavve iumi mekem samwan feel nogud, iumi shud no tingse datwan wari blo hem and act olsem no eni samting hem happen. Maet wanem nao samfala reason olketa brata and sista savve feel nogud lo samting iumi talem or duim? Samfala ting daonem olketa seleva from olketa growap lo famili wea narawan savve tok daonem olketa. And samfala wea niu lo truth no savve hao for deal witim wik point blo olketa lo kongregeson. Nomata wanem nao reason brata or sista feel nogud, from iumi luksavve hem feel nogud lo iumi, iumi mas trae for stretem datwan. Bat sapos hem wei blo iumi for kwiktaem feel nogud lo narawan iumi shud waka hard for changem datwan. Sapos iumi duim olsem, iumi bae hapi and fren gud witim olketa narawan. w21.06 21 ¶7

Jesus minim feeling blo Iumi. Taem iumi barava wari bae iumi hapi for kasem comfort from wanfala fren wea kaen and minim feeling blo iumi. Jesus hem datkaen fren. Taem iumi wikdaon and needim help, hem minim iumi bikos hem tu kasem datwan. Hem minim feeling blo iumi, and hem bae mek sure iumi kasem help lo “taem iumi needim.” (Heb. 4:15, 16) Olsem Jesus hem acceptim help from wanfala angel lo garden blo Gethsemane, iumi tu laek for acceptim help wea Jehovah provaedem. Maet hem iusim wanfala pablikeson, video, tok, or maet wanfala elder or nara brata or sista kam encouragem iumi. (Luke 22:39-44) Jehovah bae givim iumi “peace bilong God.” Taem iumi prea lo Jehovah, hem bae strongim iumi from hem givim iumi “peace bilong God wea winim nao wanem man savve minim.”​—Phil. 4:6, 7. w22.01 18-19 ¶17-19

Jehovah evritaem duim wanem hem stret. Bat maet hem no isi for iumi trustim olketa man wea hem appointim for leadim iumi. Maet iumi kwestinim sapos olketa followim direction blo Jehovah or followim tingting blo olketa seleva nomoa. Jehovah trustim olketa wea hem appointim for lead lo organization blo hem and lo kongregeson. So sapos iumi no trustim olketa hia, hem olsem iumi no trustim Jehovah. Distaem Jehovah iusim “datfala wakaman wea faithful and wise” for leadim organization blo hem lo earth. (Matt. 24:45) Olsem governing body lo first century, Jehovah iusim datfala wakaman for lukaftarem pipol blo hem and datfala wakaman givim olketa direction lo olketa elder. Olketa elder mek sure kongregeson kasem olketa direction hia. Iumi showimaot iumi trustim Jehovah lo evri samting taem iumi followim direction wea iumi kasem from organization and olketa elder. w22.02 4 ¶7-8

Iumi hapi from iumi Olketa Jehovah’s Witness! Iumi hapi for helpem olketa wea “showimaot olketa laekem laef olowe” for kam insaed lo truth. (Acts 13:48) Maet iumi feel olsem Jesus wea “hapi tumas” taem hem herem olketa gudfala report blo olketa disaepol abaotem preaching waka wea olketa duim. (Luke 10:1, 17, 21) Aposol Paul sei lo Timothy: “Lukluk gud evritaem long iuseleva and long samting wea iu teachim.” Paul sei moa: “Wei for duim olsem bae mekem iu and olketa wea lisin long iu for kasem laef.” (1 Tim. 4:16) Preaching waka wea iumi duim helpem pipol for kasem laef. So iumi mas ‘lukluk gud long iumiseleva’ bikos iumi story abaotem Kingdom blo God lo pipol. Wei blo iumi shud mekhae lo Jehovah and showimaot iumi bilivim wanem iumi preach abaotem. (Phil. 1:27) And tu, iumi showimaot iumi ‘lukluk gud lo teaching’ blo iumi taem iumi prepare gud for duim ministry and prea lo Jehovah for helpem iumi lo datfala waka. w21.10 24 ¶1-2

Samwan wea garem “niufala wei” bae followim hao Jehovah tingim and duim samting. And tu, holy spirit bae helpem hem for garem olketa gudfala wei. Olsem example, man wea garem “niufala wei” bae lovem Jehovah and pipol blo hem. (Matt. 22:36-39) Hem bae gohed hapi nomata hem deal witim hard samting. (Jas. 1:2-4) Hem waka hard for stap gud witim olketa narawan. (Matt. 5:9) Hem patient and kaen. (Col. 3:13) Hem duim gud samting lo narawan. (Luke 6:35) Hem showimaot hem garem strongfala faith lo Jehovah. (Jas. 2:18) And nomata narawan laek raoa witim hem, bae hem kontrolem hemseleva. (1 Cor. 9:25, 27; Titus 3:2.) For iumi garem niufala wei, iumi need for showimaot olketa gudfala wei wea Galatia 5:22, 23 and olketa nara scripture storyim. w22.03 8-9 ¶3-4

Olketa elder savve followim example blo aposol Paul taem olketa preach from haos tu haos, and taem olketa willing for iusim eni chance for witness lo eniwan. (Eph. 6:14, 15) Olsem Paul, taem elder duim ministry, hem savve trainim ministerial servant and narawan tu. (1 Pet. 5:1, 2) Bat elder shud no busy tumas for duim waka lo kongregeson gogo hem no garem taem for duim preaching waka. (Matt. 28:19, 20) Maet hem gud for balance and sei no lo wanfala assignment. Wanfala elder shud prea and ting raonem datwan. Maet hem luksavve sapos hem acceptim datfala assignment bae hem no garem taem for duim olketa important samting, olsem for duim famili worship evri week, preaching waka evri week, and for trainim pikinini for preach. Olketa elder savve sure Jehovah luksavve olketa traem best for balance lo evri samting olketa duim. w22.03 27 ¶4, 7; 28 ¶8

Waswe lo taem iumi study, iumi fraet taem iumi tingim wanem iumi need for duim for kamap wanfala Jehovah’s Witness? Maet iumi fraet for duim preaching waka. Or maet iumi wari nogud famili and olketa fren againstim iumi sapos iumi kamap Witness. Sapos olsem, bae iumi minim feeling blo Bible study blo iumi sapos hem warim kaen samting olsem. Jesus luksavve hem normal for man fraet, so hem sei olketa follower blo hem shud no fraet for duim wanem Jehovah laekem. (Matt. 10:16, 17, 27) Trainim Bible study for storyim wanem hem lanem lo narawan. Taem Jesus talem olketa disaepol for go preach, maet olketa fraet. Bat Jesus trainim olketa taem hem talem olketa hu for preach lo olketa and wanem for talem. (Matt. 10:5-7) Hao nao iumi savve followim example blo Jesus? Helpem Bible study for tingim eniwan wea hem savve preach lo hem. Olsem example, askem hem for tingim samwan wea maet interest for lanem samting from Bible. Then helpem hem for savve hao for storyim datwan lo simpol wei. w21.06 6-7 ¶15-16

Lo 2015 wanfala big earthquake kasem Nepal. Wanfala man sei, “Mi seke for lukim olketa old building and olketa stoa kwiktaem foldaon.” Narawan sei, “Evriwan barava fraet fogud . . . Samfala sei datfala earthquake sekem graon for samting olsem tu minute nomoa, bat lo mi hem longtaem tumas.” Bat distaem iumi experiencem difren kaen seksek. Jehovah sekem evri kantri lo world. Profet Haggai sei: “Hem nao [Jehovah] hu hemi garem evri paoa hemi tok olsem, ?I no longtaem, bae mi mekem heven, an disfala wol i seksek.” (Hagae 2:6) Taem Jehovah sekem olketa kantri lo world hem no olsem wanfala earthquake wea distroem olketa samting nomoa, bikos gud samting tu bae kamaot from datwan. Jehovah sei: “Bae mi [sekem] olketa narafala kantri, an tekemaot olketa gudfala samting blong olketa, an karim kam fo fulumap Tambuhaos ya long hem.” w21.09 14 ¶1-3

Iumi savve kamap gudfala fren witim narawan sapos iumi story witim hem evriday. So for fren gud witim Jehovah iumi need for story witim hem evritaem. Taem iumi storyim lo Jehovah feeling, tingting, and wanem iumi warim, iumi showimaot iumi luksavve hem lovem iumi and iumi trustim hem. (Sams 94:17-19; 1 John 5:14, 15) Spendem taem witim olketa brata and sista. Olketa lo kongregeson olsem present from Jehovah. (Jas. 1:17) Jehovah showimaot hem tingim iumi wanwan from hem givim iumi wanfala spiritual famili lo olketa brata and sista wea lovem iumi. (Provebs 17:17) Lo leta wea aposol Paul raetem for olketa lo Colossae, hem talem nem blo samfala wea “barava comfortim” hem. (Col. 4:10, 11) Christ Jesus tu needim and tinghae lo olketa angel and olketa fren wea helpem and sapotim hem. (Luke 22:43) Hem gud for askem olketa brata and sista lo kongregeson for helpem iumi. Diswan no minim iumi no garem strong faith, bat hem savve helpem iumi for no givap. w21.04 24-25 ¶14-16

Wanem nao iumi shud duim sapos wanfala brata or sista duim samting wea mekem iumi feel nogud? Trae for stretem datwan. Prea lo Jehovah and askem hem for helpem datfala brata or sista. And askem Jehovah for helpem iumi tingim olketa gudfala wei wea Jehovah lukim lo datfala brata or sista. (Luke 6:28) Sapos iumi gohed for tingim wanem datfala brata or sista duim, then hem gud for go story witim hem. Tingim, staka taem olketa brata and sista no min for mekem iumi feel nogud. (Matt. 5:23, 24) Bat hao sapos hem no laek mek peace? Bible sei for “evritaem forgivim” narawan. (Col. 3:13) Barava important samting nao, hem for no gohed kros lo brata or sista blo iumi from datwan savve spoelem hao iumi fren witim Jehovah. From iumi barava lovem Jehovah, bae iumi no letem narawan for mekem iumi stambol.​—Sams 119:165. w21.06 23 ¶15