July

Hem arrangement blo Jehovah for disfellowshipim olketa wea no repent. Datwan showimaot love blo Jehovah for iumi and man wea disfellowship. Maet samfala lo kongregeson storyim lo iumi hao olketa no agree witim disison for disfellowshipim samwan, bat olketa no storyim hao maet datfala man duim samting wea mekem hem fit for disfellowship. Hard for iumi savve lo full story. So hem wise for trustim disison blo olketa elder bikos olketa disaed followim olketa Bible principle and Jehovah markem olketa elder for duim disfala waka. (Mektu Kronikols 19:6) Taem iumi sapotim disison blo olketa elder for disfellowshipim samwan wea iumi lovem, maet datwan helpem hem for kam bak lo Jehovah. Elizabeth sei: “Hem barava hard samting for no associate witim son blo mifala. Bat bihaen hem reinstate, hem sei hem stret for olketa elder disfellowshipim hem. Hem storyim tu hao hem lanem staka gud samting. Diswan helpem mi tu for luksavve discipline blo Jehovah hem helpem man.” w21.09 28-29 ¶11-12

Tingim, maet datfala widow laek for givim staka selen lo Jehovah, bat hem duim samting wea hem fit for duim, and givim best blo hem for Jehovah. And Jesus savve Jehovah tinghae lo contribution blo datfala woman. So important leson for iumi hem olsem: Taem iumi duim samting from full heart and full soul blo iumi and duim best blo iumi, datwan mekem Jehovah barava hapi. (Matt. 22:37; Col. 3:23) Jehovah hapi taem hem lukim iumi duim wanem iumi fit for duim for worshipim hem, olsem for duim best blo iumi lo ministry and for go lo olketa meeting. Hao nao iumi savve iusim datfala story abaotem widow woman for helpem narawan? Iumi savve tingim samfala lo kongregeson wea maet tingse Jehovah no hapi lo olketa. Maet iu tingim wanfala olo sista wea sik and no strong, and hem feel sorre bikos hem no fit for duim staka samting lo ministry olsem hem duim bifor. w21.04 6 ¶17, 19-20

Jehovah savve lo best taem for finisim disfala nogud world. From hem no finisim yet nogud pipol, datwan givim taem for staka pipol lane abaotem hem, and distaem wanfala big crowd lo staka million pipol worshipim hem. Olketa hia barava hapi from Jehovah hem patient for longtaem, and datwan givim chance for olketa born, lane for lovem hem, and dedicate lo hem. Disison blo Jehovah for patient mekem staka million pipol for garem chance for enjoyim laef lo niu world! Jehovah hem gohed for hapi nomata hem deal witim olketa nogud samting wea Satan duim. (1 Tim. 1:11) Iumi laek for gohed hapi olsem Jehovah, taem iumi weitim hem for mekhae lo nem blo hem, for showimaot hem nao fit for rul, for finisim nogud pipol, and finisim evri nogud samting. Jehovah gohed for deal witim olketa nogud samting, and iumi laek for duim olsem tu. w21.07 13 ¶18-19

Staka pipol lo first century rejectim Jesus. Lo tingting blo olketa hem son blo carpenter nomoa, and hem growap lo Nazareth, wanfala taon wea pipol ting daonem. Bifor Nathanael kamap disaepol blo Jesus, hem sei: “Waswe, eni gud samting savve kam from Nazareth tu?” Hem maet tingim profesi lo Micah 5:2 wea sei Messiah bae born lo Bethlehem, and no lo Nazareth. Lo wanfala profesi, Isaiah sei olketa wea rejectim Jesus bae no interest for savve lo olketa tru samting abaotem hem. (Isa. 53:8, NWT) Sapos olketa laek for savve lo tru samting abaotem Jesus, bae olketa faendemaot hao hem born lo Bethlehem and hem kam from laen blo King David. (Luke 2:4-7) Ples wea Jesus born hem stret witim wanem Micah 5:2 profesi abaotem. So why nao olketa ting daonem Jesus? Bikos olketa judgem hem followim ples wea hem growap and bikos dadi blo hem carpenter nomoa. Hem nao why olketa les lo hem. w21.05 2-3 ¶4-6

Bible storyim olketa wea acceptim kaonsel and kasem blessing from datwan. Tingim example blo Job. Hem wanfala gud man, bat hem no perfect. Taem hem kasem hard taem, hem talem samting wea no stret, so Elihu and Jehovah kaonselem hem. Waswe, Job followim datfala kaonsel? Hem sei: “Mi bin tokabaotem olketa samting wea mi no minim . . . So, mi les tumas long mi seleva nao, an mi sidaon insaet long asis an long dast fo somaot dat mi sensim tingting blong mi.” (Job 42:3-6, 12-17) Job acceptim kaonsel wea hem kasem from Elihu nomata Elihu young winim hem. (Job 32:6, 7) Sapos iumi hambol iumi bae acceptim kaonsel, nomata iumi tingse iumi shud no kasem datwan, or samwan wea kaonselem iumi hem young winim iumi. Iumi evriwan need for gohed waka hard for showimaot olketa gudfala wei and for duim gud ministry blo iumi. w22.02 11 ¶8; 12 ¶12

Evriwan lo kongregeson mas showimaot love lo each other and mek sure no eniwan tingse hem stap seleva. Hem important for duim and talem samting for encouragem each other! Wanem nao iumi savve duim for helpem olketa brata and sista wea lonely? Kamap fren blo olketa wea joinim kongregeson. Hem gud for welkamim olketa wea joinim kongregeson blo iumi. (Rome 15:7) Iumi laek for sei hello lo olketa, bat iumi laek for fren gud witim olketa tu, and datwan savve tek taem. So kaen and showimaot iumi tingim olketa. No poke nose lo bisnis blo olketa, bat showimaot iumi laek for helpem olketa lo eni samting wea olketa needim. Hem gud for askem samfala kwestin and lisin gud lo olketa. Olsem example, iumi savve askem olketa hao nao gogo olketa lanem truth. Bat sapos olketa hol bak for storyim eni samting, no trae for forcem olketa. w21.06 11 ¶13-14

Iumi wan mind for worshipim Jehovah and iumi hapi for insaed “wanfala sekson” wea stap anda lo wanfala shepherd! Datfala buk Organized to Do Jehovah’s Will, lo page 165 sei: “Iumi kasem gud samting taem iumi garem wan mind, so each wan lo iumi mas waka hard for wan mind.” Dastawe “iumi laek followim example blo Jehovah wea lukluk for olketa gudfala wei blo olketa brata and sista.” Jehovah lovem evriwan wea followim Jesus, and hem laekem iumi for duim sem samting. Waswe, hem nao hao iu ting lo olketa brata and sista? Sapos olsem, Jehovah lukim and tinghae lo wanem iu duim for helpem olketa wea followim Jesus. (Matt. 10:42) From iumi lovem olketa brata and sista, iumi no laek for “duim eni samting wea savve mekem wanfala brata for sin” or for stambol. (Rome 14:13) Iumi ting lo olketa brata and sista olsem olketa winim iumi, and iumi laek for barava forgivim olketa. Iumi no laek letem olketa narawan for mekem iumi stambol. Bat iumi laek for “traem best for stap gud witim nara pipol and duim olketa samting wea savve strongim narawan.”​—Rome 14:19. w21.06 24 ¶16-17

Sapos iumi studyim gud Bible and followim kaonsel from Bible and organization blo Jehovah, baebae iumi kamap mature Christian wea garem olketa nambawan wei blo Christ. And baebae iumi lanem staka nara samting abaotem God tu. Tokpiksa blo Jesus showimaot message abaotem Kingdom wea iumi preachim hem olsem smol seed wea tek taem for grow lo heart blo pipol wea herem message hia. Jesus storyim really seed taem hem sei: “Olketa seed start for grow and kamap big. [Man wea plantim] no savve tu hao nao olketa seed hia grow. Graon nao mekem olketa seed grow, gogo olketa garem frut. First samting for kamap hem leaf, then hem garem flaoa, gogo hem garem frut.” (Mark 4:27, 28) Jesus showimaot wanfala plant hem tek taem for grow, so man wea tinghae lo Kingdom message bae isisi changem samfala samting lo laef blo hem. Olsem example, taem Bible study gohed for lane abaotem Jehovah, datwan bae helpem hem for garem olketa gudfala wei. (Eph. 4:22-24) Bat iumi savve Jehovah nao mekem datfala smol seed lo heart blo pipol for grow. w21.08 8-9 ¶4-5

Disfala scripture storyim wanem savve mekem iumi for hapi. Man savve hapi sapos hem “no traehad fo garem narafala samting” wea hem no fit for garem, bat hem need for “hapi long olketa samting” wea hem garem finis. So wanem nao iumi lanem? Iumi savve hapi sapos iumi satisfae lo wanem iumi duim, and sapos iumi markem goal wea iumi fit for kasem. Samfala maet sei, hao nao iumi savve satisfae lo wanem iumi duim distaem bikos hem normal for laek traem olketa difren samting? Bat iumi savve satisfae lo wanem iumi duim. Hao nao olsem? For savve lo ansa, tingim tokpiksa blo Jesus lo Matthew 25:14-30 abaotem olketa wakaman wea kasem silver selen. Main samting wea bae iumi lanem hem hao for hapi lo olketa privilege and blessing iumi garem distaem. w21.08 21 ¶5-6

Jehovah barava tingim olketa wea feel “sore tumas.” Olketa elder and iumi evriwan savve encouragem olketa brata and sista blo iumi wea feel sorre. Wanfala wei iumi savve encouragem olketa hem for showimaot iumi tingim olketa. Taem iumi duim datwan, olketa bae luksavve Jehovah tingim olketa tu. (Provebs 19:17) Sapos iumi hambol and no mekhae lo olketa gud samting iumi duim lo kongregeson datwan tu savve helpem olketa. Iumi no laekem olketa for comparem olketa seleva witim iumi. Iumi laekem evri samting iumi talem and duim for encouragem olketa brata and sista. (1 Pet. 4:10, 11) Iumi savve lane from example Jesus lo hao hem treatim olketa follower blo hem. Nomata hem garem bigfala savve “hem hambol.” (Matt. 11:28-30) Taem Jesus teachim pipol, hem iusim simpol toktok and olketa tokpiksa wea isi for minim and wea kasem heart blo pipol wea hambol.​—Luke 10:21. w21.07 23 ¶11-12

Go story witim olketa olo brata and sista. Nomata olketa olo no lukluk gud, wakabaot slow, or olketa no savve story big, olketa fren gud witim Jehovah, and olketa interest lo staka samting yet. (Eccl. 7:1, NWT) Remember, Jehovah tinghae lo olketa, so iumi mas tinghae lo olketa tu. Iumi laek for followim example blo Elisha wea hem no laek for lusim Elijah lo last day wea tufala stap tugeta. Thrifala taem Elisha sei lo Elijah: “Bae mi no lusim yu.” (Mektu Kings 2:2, 4, 6) Showimaot iumi interest lo olketa olo brata and sista lo wei for askem olketa naesfala kwestin. (Provebs 1:5; 20:5; 1 Tim. 5:1, 2) Iumi maet ask olsem: “Taem iu young yet, wanem nao mekem iu sure diswan nao truth?” “Wanem nao samfala samting wea happen lo laef blo iu wea mekem iu barava trustim Jehovah?” or “Wanem nao helpem iu for gohed hapi taem iu worshipim Jehovah?” (1 Tim. 6:6-8) Bihaen iumi askem kwestin, lisin gud taem hem story. w21.09 5 ¶14; 7 ¶15

Taem iumi duim best for obeyim komand blo Jesus for preach and teach, datwan showimaot iumi lovem God. (1 John 5:3) Tingim diswan: Iu showimaot finis iu lovem Jehovah taem iu preach from haos tu haos. Maet firstaem hem no isi for followim datfala komand for preach. Waswe, firstaem iu noknok lo wanfala haos iu fraet? Maet olsem! Bat iu savve diswan hem waka wea Jesus laekem iu for duim so iu duim nao. And maet bihaen lelebet taem iu start for enjoyim preaching waka. Bat waswe for garem Bible study? Maet iu fraet for conductim wanfala Bible study. Bat sapos iu askem Jehovah for helpem iu for no fraet for study witim samwan, then bae Jehovah helpem iu for duim datwan. w21.07 3 ¶7

Lo bifor olketa putim mark lo olketa slave for showimaot hu nao ownim olketa. Olsem tu, datfala tokpiksa mark lo hand and lo forhed minim olketa gavman bae expectim evriwan for showimaot hu nao olketa sapotim. Waswe, bae iumi acceptim disfala tokpiksa mark and sapotim olketa gavman? Sapos iumi no acceptim datfala mark bae iumi kasem hard taem, olsem Revelation sei: “Sapos eniwan hem no garem datfala mark, hem no savve baem or salem eni samting.” (Rev. 13:17) Nomata olsem, iumi savve lo wanem God bae duim lo olketa wea garem datfala mark wea Revelation 14:9, 10 storyim. Dastawe iumi laek for showimaot iumi sapotim Jehovah, olsem iumi raetem toktok lo hand blo iumi wea sei, “Mi nao blong Jehovah.” (Aesaea 44:5) So distaem nao iumi need for strongim faith blo iumi, then Jehovah bae hapi for sei, iumi pipol blo hem! w21.09 18 ¶15-16

Samting wea bae helpem iumi for duim gud ministry hem for lane from narawan. Aposol Paul teachim Timothy hao for preach and teach, and hem encouragem Timothy for teachim olketa narawan wanem hem lanem. (1 Cor. 4:17) Olsem Timothy, iumi savve lanem gud samting from olketa narawan lo kongregeson. And tu, iumi shud prea lo Jehovah for helpem iumi. Evritaem iumi go preaching, askem Jehovah for helpem iumi. Iumi needim holy spirit blo Jehovah for helpem iumi duim preaching waka. (Sams 127:1; Luke 11:13) Taem iumi prea lo Jehovah, talem hem iumi laek for meetim samwan wea willing for lisin and bae interest for lane abaotem hem. Iumi shud markem taem tu for duim study seleva. Bible showimaot taem iumi duim study seleva, iumi bae “luksavve long samting wea God laekem iumi for duim.” (Rome 12:2) Study bae helpem iumi for savve gud lo truth, then taem iumi preach lo pipol bae olketa luksavve iumi biliv strong lo wanem iumi storyim. w21.05 18 ¶14-16

Maet iumi waka hard for teachim Bible study blo iumi and prea for God helpem hem, bat hem no followim wanem hem lanem, and iumi luksavve hem taem for stopem study. Or maet iumi no garem chance for helpem samwan kamap baptaes. Waswe, diswan minim iumi no duim gud waka blo iumi and Jehovah no hapi lo wanem iumi duim? Iumi sure Jehovah hem hapi lo wanem iumi duim. Jehovah luksavve iumi waka hard and no givap. Nomata pipol interest lo gud nius or nomoa, Jehovah hem hapi iumi duim best blo iumi lo preaching waka bikos iumi lovem hem. Paul sei: “God hem raeteous so hard for hem forgetim waka wea iufala duim and love wea iufala showimaot for nem bilong hem taem iufala helpem olketa holy wan and gohed for duim datwan.” (Heb. 6:10) Nomata no eniwan wea iumi study witim hem baptaes, Jehovah hapi from iumi duim best blo iumi, olsem Paul talem lo text for tuday. w21.10 25 ¶4-6

Jesus kaen and showimaot love lo olketa follower blo hem bifor. From olketa follower garem difren savve and laef blo olketa no semsem, Jesus savve each wan bae gud lo olketa difren waka and samfala bae garem moa taem for duim ministry winim narawan. Nomata olsem, hem tinghae lo hao olketa duim best blo olketa. Jesus mekhae lo datwan lo tokpiksa abaotem selen wea olketa wakaman kasem. Boss givim selen lo thrifala wakaman for duim bisnis witim selen “followim wanem olketa fit for duim.” Tufala nomoa duim bisnis witim selen hia bat wanfala givim go bak lo boss big selen winim narawan. Nomata olsem, boss praisem tufala evriwan and sei: “Gud tumas! Iu barava faithful long wanem iu duim witim selen hia!” (Matt. 25:14-23) Jesus kaen and showimaot love lo iumi tu. Nomata iumi garem difren savve and laef blo iumi no semsem, hem hapi from iumi duim best blo iumi. w21.07 23 ¶12-14

Samfala taem King David no showimaot mercy lo narawan. Olsem example, taem Nabal tok spoelem David and no laek givim kaikai lo olketa man blo David, David kros tumas and disaed for killim dae Nabal and evri man lo haos blo hem. Bat Abigail, datfala gud and patient waef blo Nabal, kwiktaem duim samting for stopem David. (Fas Samuel 25:9-22, 32-35) Taem David barava kros lo Nabal, hem judgem Nabal and sei hem and olketa man blo hem fit for dae. And taem David judgem man lo story blo Nathan, hem sei datfala man shud dae. Bat David hem kaenfala man, so why nao hem mekem strongfala judgment againstim man wea stealim wanfala sheepsheep? Lo datfala taem, David duim sin and hem garem guilty konsens. So datfala strong judgment showimaot hem wik lo spiritual saed. w21.10 12 ¶17-18; 13 ¶20

Toktok blo text for tuday showimaot iumi savve followim example blo Jehovah wea barava holy, and iumi mas holy lo evri samting wea iumi duim. Bat maet iumi tingse from iumi no perfect, iumi no savve holy. Nomata aposol Peter duim samfala mistek, example blo hem showimaot iumi savve holy tu. Taem samfala tingim samwan wea holy, olketa maet tingim olketa bigman blo religion wea werem spesol kaleko, no savve smile, and barava serious. Bat pipol wea holy no olsem bikos Bible sei Jehovah wea holy, hem “datfala hapi God.” (1 Tim. 1:11) Olketa wea worshipim Jehovah olketa “hapi.” (Sams 144:15) Jesus no tinghae lo olketa wea werem spesol kaleko and act olsem olketa raeteous for mekem pipol lukim olketa. (Matt. 6:1; Mark 12:38) For iumi olketa Christian, Bible helpem iumi for savve wanem hem minim for holy. From God hem lovem iumi, hard for hem talem iumi for holy sapos iumi no fit for duim datwan. w21.12 2¶1, 3

Wanfala nambawan samting wea iumi savve duim nao hem for worshipim Jehovah. Iumi showimaot iumi lovem Jehovah taem iumi “obeyim olketa law bilong hem.” (1 John 5:3) Jesus talemaot samting wea Dadi blo hem laekem iumi for duim, wea hem nao for teachim pipol for kamap olketa disaepol. (Matt. 28:19) Jesus talem iumi for lovem each other tu. (John 13:35) Taem iumi obeyim Jehovah bae hem laekem iumi for insaed lo famili blo hem. (Sams 15:1, 2) Showimaot love lo olketa narawan. Jehovah nao first wan for showimaot love. (1 John 4:8) Hem lovem iumi nomata iumi no savve yet lo hem. (1 John 4:9, 10) Iumi followim example blo hem taem iumi showimaot love lo olketa narawan. (Eph. 5:1) Wanfala wei iumi savve showimaot love lo pipol hem for helpem olketa for lane abaotem Jehovah distaem. (Matt. 9:36-38) Datwan bae givim chance lo olketa for joinim famili blo God. w21.08 5-6 ¶13-14

From Jesus lovem Jehovah hem willing for duim wanem Jehovah laekem mekem hem sevem iumi olketa man. (John 14:31) Taem Jesus stap lo earth hem showimaot hem barava lovem pipol. Hem kaen and sorre lo pipol, nomata samfala againstim hem. And tu, hem teachim pipol abaotem Kingdom blo God, wea hem nao main wei wea hem showimaot hem lovem pipol. (Luke 4:43, 44) Jesus pruvim hem lovem God tu from hem willing for safa and dae for iumi mekem iumi savve kasem laef olowe. Iumi dedicate and baptaes bikos iumi lovem Jehovah. So iumi laek followim example blo Jesus for showimaot iumi lovem Jehovah lo hao iumi treatim pipol. Aposol John sei: “Sapos man no lovem brata bilong hem wea hem savve lukim, hard tumas for hem lovem God wea hem no savve lukim.”​—1 John 4:20. w22.03 10 ¶8-9

Nomata iumi laek for prea, studyim Bible, and for ting raonem wanem iumi lanem, maet iumi no garem inaf taem for duim olketa samting hia from iumi busy. Maet iumi busy lo waka, olketa famili responsibility, and olketa nara samting wea iumi mas duim. Olketa nara samting tu savve mekem iumi busy tumas. Sapos iumi no careful, iumi savve busy lo samfala samting wea no rong, bat wea mekem iumi for no garem taem for Jehovah. Olsem example, iumi needim taem for rest and relax. Hem olraet for duim samfala hapitaem, bat sapos iumi spendem staka taem for duim datwan, bae iumi no garem taem for duim olketa spiritual samting. So tingting gud abaotem haomas hapitaem iumi duim.​—Provebs 25:27; 1 Tim. 4:8. w22.01 26 ¶2-3

Taem Jehovah sei for olketa Israelite mas lovem narawan, hem no sei for olketa lovem nomoa olketa nara Israelite. Hem laekem olketa for lovem tu pipol from difren kantri wea stap witim olketa. Iumi savve read abaotem datwan lo Levitikas 19:33, 34. Olketa Israelite mas no treatim pipol from nara kantri olsem difren pipol, bat mas “lavem olketa” hia olsem olketa lovem olketa seleva. Olsem example, Law sei for olketa Israelite shud letem pipol from difren kantri and olketa wea poor for kolektem leftova lo harvest blo olketa. (Levitikas 19:9, 10) Datfala principle hem fitim iumi distaem tu. (Luke 10:30-37) Iumi savve showimaot love lo pipol from difren kantri wea muv kam lo kantri blo iumi. Nomata man, woman, or pikinini, hem barava important for kaen and showim respect lo olketa hia. w21.12 12 ¶16

Iumi laek for depend lo Jehovah for helpem iumi distaem, mekem iumi barava trustim hem for sevem iumi lo future. Olsem example, iumi need for depend lo Jehovah taem iumi askem boss for tekem taem off mekem iumi savve attendim assembly or convention. Or maet iumi askem boss for iumi no duim ovataem mekem iumi attendim evri meeting and spendem moa taem lo ministry. Sapos boss no letem datwan and iumi lusim waka blo iumi, waswe, iumi garem faith hao Jehovah bae no lusim iumi and hem bae provaedem olketa samting wea iumi needim? (Heb. 13:5) Staka wea duim full-taem service experiencem hao Jehovah helpem olketa lo taem wea olketa barava needim. Iumi savve trustim Jehovah. From Jehovah sapotim iumi, iumi no need for fraetem wanem bae happen lo future. God bae no lusim iumi sapos kingdom hem first samting lo laef blo iumi. w22.01 7 ¶16-17

Sapos olketa elder disaed for disfellowshipim samwan and hem wanfala fren or relative blo iumi, maet iumi faendem hard for trustim disison blo olketa elder. Maet iumi wari nogud olketa elder no savve lo full story, or maet iumi wari olketa elder no judgem hem followim hao Jehovah bae judgem hem. Wanem nao bae helpem iumi for trustim disison blo olketa elder? Iumi shud tingim hao hem arrangement blo Jehovah for disfellowshipim samwan, bikos datwan bae protectim kongregeson and maet helpem man wea sin. Sapos man wea sin and no repent gohed stap lo kongregeson, maet olketa narawan followim hem for duim sin tu. (Gal. 5:9) And tu, maet hem no luksavve hao sin wea hem duim hem barava nogud and maet hem tingse hem no need for changem tingting and wei blo hem for mekem Jehovah hapi. (Eklesiastes 8:11) Iumi savve sure olketa elder luksavve hem big responsibility for disaed for disfellowshipim samwan. w22.02 5-6 ¶13-14

Sapos samwan no acceptim kaonsel firstaem, elder shud patient and kaen. Elder mas no kros sapos hem no kwiktaem for followim kaonsel. So taem elder prea lo Jehovah, hem savve askem Jehovah for helpem brata or sista wea kasem kaonsel for minim why hem kasem kaonsel and for acceptim datwan. Maet datfala brata or sista needim taem for ting raonem kaonsel hia. Taem elder patient and kaen, bae hem laek for lisin lo datfala kaonsel. Elder mas mek sure tu kaonsel hia hem kam from Bible. Kaonsel wea olketa givim shud helpem man and “mekem man hapi.”​—Prov. 27:9, NWT. w22.02 18 ¶17; 19 ¶19

Taem iumi askem Jehovah for helpem iumi deal witim hard taem or wanfala wik point, maet iumi tingse hem tek longtaem for hem ansarem datfala prea. Iumi laek for savve why Jehovah no ansarem olketa prea blo iumi stretawe. Taem iumi prea hem showimaot iumi garem faith lo Jehovah. (Heb. 11:6) Bat Jehovah laek for lukim tu sapos bae iumi duim samting followim wanem iumi prea abaotem and followim wanem hem laekem. (1 John 3:22) So sapos iumi trae for winim wanfala wik point, maet iumi need for duim samting followim prea blo iumi firstaem, and patient for weitim Jehovah for ansarem prea blo iumi. Jesus tu showimaot maet iumi no kwiktaem kasem ansa lo olketa prea blo iumi. Hem sei: “Gohed for ask and iufala bae kasem samting wea iufala ask for hem. . . . Gohed for noknok long door and bae hem open for iufala. Bikos evriwan wea ask bae kasem samting, . . . and door bae open for evriwan wea noknok long hem.”​—Matt. 7:7, 8. w21.08 8 ¶1; 10 ¶9-10

Iumi need for gohed strongim faith blo iumi, and gohed studyim Bible. (Josua 1:8) Tingim hao olketa profesi kamap tru, and hao evri buk lo Bible agree witim each other. Datwan bae strongim faith blo iumi lo God and mekem iumi sure God nao givim kam Bible. (2 Tim. 3:14; 2 Pet. 1:21) Taem iumi studyim Bible, tingim tu hao advaes from Bible savve helpem iumi. Olsem example, Bible sei sapos man laekem tumas selen datwan bae “spoelem” hem. (1 Tim. 6:9, 10; Prov. 28:20; Matt. 6:24) So advaes blo Bible for no laekem tumas selen hem gudfala advaes. Waswe, iu savve tingim eni nara advaes lo Bible wea helpem iu finis? Taem iumi luksavve advaes blo Creator barava helpem iumi, bae iumi laek for gohed followim wanem Bible talem. (Jas. 1:5) Datwan bae mekem iumi for barava enjoyim laef.​—Aesaea 48:17, 18. w21.08 17-18 ¶12-13

Sapos iu olo distaem, tingim hao Jehovah no forgetim olketa samting wea iu duim for hem lo bifor. Olsem example, iu busy lo preaching waka, iu no givap taem iu kasem olketa hard taem, iu evritaem followim olketa Bible principle, iu waka hard insaed organization, and iu trainim olketa narawan tu. Nara samting, iu willing for change followim organization blo Jehovah, and iu barava encouragem olketa wea duim pioneer waka. Jehovah God lovem iu from iu barava faithful, and hem promis for no lusim man wea faithful lo hem! (Sams 37:28) Jehovah sei tu: “Bae mi nao mi gohed fo lukaftarem yufala, go-go hea blong yufala hemi kamap waet.” (Aesaea 46:4) So no tingse from iu olo iu no important insaed organization blo Jehovah. Iu barava important lo Jehovah! w21.09 3 ¶4

Jehovah showimaot mercy bikos lo wisdom blo hem. Bible sei datfala “wisdom from heven” mekem Jehovah for “showimaot mercy long narawan.” (Jas. 3:17) Jehovah savve hem gud for showimaot mercy lo pipol blo hem, olsem dadi showimaot mercy lo olketa pikinini blo hem. (Aesaea 49:15) From Jehovah showimaot mercy lo pipol blo hem olketa garem hope for future, nomata olketa no perfect. From Jehovah hem wise hem showimaot mercy taem gudfala reason stap for duim datwan. Bat Jehovah luksavve tu, samfala taem hem no fitim for showimaot mercy. Hem bae no showimaot mercy lo man wea duim bigfala sin and no repent, bikos hem bae olsem Jehovah acceptim datfala sin. Wanem nao iumi shud duim sapos wanfala brata or sista duim bigfala sin and no laek for repent? Bible sei iumi mas “no fren witim” pipol olsem. (1 Cor. 5:11) Dastawe olketa wea no repent bae disfellowship. Hem for protectim evriwan lo kongregeson, and hem for followim olketa standard blo Jehovah. w21.10 9-10 ¶7-8

Givim donation for sapotim Kingdom waka. Taem olketa Israelite go lo olketa festival, olketa mas tekem samting for givim lo Jehovah. (Diutronomi 16:16) Olketa savve givim eni samting wea olketa fit for givim. Datwan bae showimaot olketa tinghae lo olketa samting wea Jehovah duim for olketa. Hao nao iumi savve showimaot iumi lovem Jehovah and tinghae lo olketa spiritual samting wea iumi kasem? Wanfala wei hem for givim donation for sapotim kongregeson and Kingdom waka wea gohed raonem world. Aposol Paul sei: “God . . . laekem man for givim samting wea hem garem, and hem no askem man for givim samting wea hem no garem.” (2 Cor. 8:4, 12) Nomata donation wea iumi givim hem big or smol, Jehovah tinghae lo donation wea kam from heart blo iumi.​—Mark 12:42-44. w22.03 24 ¶13

Olketa elder no savve finisim olketa hard taem wea iumi feisim. Nomata olsem, Jehovah laekem olketa for encouragem and protectim olketa sheepsheep blo hem. Hao nao olketa savve garem taem for helpem olketa brata and sista? Followim example blo aposol Paul. Paul laek for praisem and encouragem olketa brata and sista. Hem gud for olketa elder followim wei blo hem for kaen and showimaot love lo olketa brata and sista. (1 Thess. 2:7) Paul talem olketa brata and sista hem lovem olketa and Jehovah tu lovem olketa. (2 Cor. 2:4; Eph. 2:4, 5) Paul fren gud witim olketa lo kongregeson and hem spendem taem witim olketa. From hem trustim olketa, hem storyim lo olketa wanem hem warim and olketa wik point blo hem. (2 Cor. 7:5; 1 Tim. 1:15) Paul no tingim nomoa olketa problem blo hemseleva, bat hem laek for helpem olketa brata and sista. w22.03 28 ¶9-10