August

Maet Jesus laekem Jehovah for forgivim olketa soldia blo Rome wea nilam leg and hand blo hem lo post. Nomata pipol hia barava treatim hem nogud, hem no kros and feel nogud lo olketa. (1 Pet. 2:23) Iumi laek followim example blo Jesus wea willing for forgivim narawan. (Col. 3:13) Maet olketa relative and samfala narawan againstim iumi bikos olketa no agree witim wanem iumi bilivim. So maet olketa talem samting wea no tru abaotem iumi, mek shame lo iumi, brekem olketa pablikeson blo iumi, or sei olketa laek for killim iumi. Iumi no laek for gohed feel nogud lo olketa, bat iumi shud askem Jehovah for helpem olketa luksavve lo truth. (Matt. 5:44, 45) Nomata olsem, samfala taem hem no isi for forgivim olketa, especially sapos olketa duim barava nogud samting lo iumi. Bat sapos iumi gohed for feel nogud and no forgivim olketa bae iumi no hapi. (Sams 37:8) Taem iumi forgivim narawan hem minim iumi disaed for no gohed feel nogud lo hem.—Eph. 4:31, 32. w21.04 8-9 ¶3-4

Waswe, samwan wea iumi lovem hem disfellowship? Datwan savve mekem iumi sorre tumas! Masbi Jehovah barava sorre tumas taem staka angel lo famili blo hem againstim hem! (Jude 6) And masbi Jehovah feel sorre tumas tu taem olketa Israelite wea hem lovem, olketa bighed againstim hem. (Sams 78:41) So taem samwan wea iumi lovem hem disfellowship, iumi sure Dadi blo iumi sorre tu lo datwan. Hem minim gud feeling blo iumi, and bae hem mek sure iumi kasem help and encouragement wea iumi needim. Staka parents wea son or dota blo olketa hem disfellowship blamem olketa seleva and tingse olketa no duim inaf samting for helpem pikinini stap lo truth. Wanfala brata sei: “Mi blamem miseleva, mi no savve sleep gud lo naet.” Wanfala sista wea son blo hem tu disfellowship sei: “Mi tingse mi nogud mami and masbi mi no teachim hem gud for lovem Jehovah.” w21.09 26 ¶1-2, 4

Samfala tingse Olketa Jehovah’s Witness shud no teachim narawan abaotem Bible bikos olketa no attendim eni spesol Bible skul. Bat olketa hia need for savve lo tru samting abaotem iumi. Luke, wanfala wea raetem Bible, “chekim gud evri story” abaotem Jesus bifor hem raetem, bikos hem laekem olketa wea readim datwan for sure olketa story hia “barava tru.” (Luke 1:1-4) Olketa Jew lo Beroea tu chekim wanem olketa herem. Bihaen olketa herem gud nius abaotem Jesus, olketa chekim olketa Hebrew Scripture for mek sure wanem olketa herem hem tru. (Acts 17:11) Olketa wea interest lo truth tu need for mek sure wanem Olketa Jehovah’s Witness teachim olketa hem kam from Bible. Hem gud for olketa studyim tu wanem pipol blo Jehovah duim kam kasem distaem. Sapos olketa duim datwan, bae olketa no daotem wanem olketa lanem. w21.05 3 ¶7-8

Waswe, iu savve tingim eniwan lo kongregeson wea iu savve invaetem kam lo haos blo iumi. Hem gud for spendem taem witim olketa nara Christian lo taem wea olketa maet barava lonely. Olsem example, lo taem blo olketa celebration olsem Christmas, olketa relative maet hipap tugeta and brata or sista bae stap seleva. Or, brata or sista wea famili member hem dae, savve tingim hem tumas lo datfala date each year. Sapos iumi spendem taem witim olketa brata and sista wea kasem kaen samting olsem, iumi showimaot iumi “barava tingim and lukaftarem” olketa. (Phil. 2:20) Staka reason stap why olketa Christian savve lonely. Bat iumi sure Jehovah tingim olketa hia. Staka taem Jehovah iusim olketa brata and sista for helpem olketa wea lonely. (Matt. 12:48-50) Iumi sapotim disfala arrangement blo Jehovah taem iumi willing for duim samting for spiritual famili blo iumi. Nomata samfala taem maet iumi feel lonely, no tingse iumi stap seleva bikos Jehovah hem stap witim iumi! w21.06 13 ¶18-20

Jesus gohed for preach nomata samfala no interest lo message blo hem bikos hem luksavve hem important for pipol savve lo truth, and hem laekem staka for herem message abaotem Kingdom. Hem savve tu samfala wea no laek lisin firstaem maet gogo bae olketa interest. Tingim olketa haf brata blo Jesus. Insaed thri and haf year wea Jesus preach, no eniwan lo olketa kamap disaepol blo hem. (John 7:5) Bat bihaen Jesus resurrect, olketa kamap Christian. (Acts 1:14) Taem iumi preach, iumi no savve hu nao bae interest. Hem maet tek longtaem bifor samfala pipol disaed for studyim Bible. Olsem example, samfala wea no laek herem message firstaem, gogo maet olketa interest lo truth from olketa lukim gudfala wei blo iumi and from iumi no givap for preach lo olketa. w21.05 18 ¶17-18

Taem Jesus lo earth, hem talem olketa follower blo hem for duim tufala waka. Hem talem olketa for preachim gud nius abaotem Kingdom, and for helpem olketa for savve hao for duim datwan. (Luke 8:1) Jesus talem olketa disaepol wanem for duim taem pipol interest or nomoa lo message abaotem Kingdom. (Luke 9:2-5) Jesus profesi hao olketa follower blo hem bae preach lo staka pipol and “long evri ples long world.” (Matt. 24:14; Acts 1:8) Hem talem olketa tu for teachim pipol for followim evri samting wea hem komandim. Jesus storyim hao disfala waka bae gohed lo taem blo iumi “go kasem taem wea world hem finis.” (Matt. 28:18-20) And gogo Jesus givim vision lo John tu wea showimaot Jesus expectim evri disaepol for helpem narawan for savve lo Jehovah.​—Rev. 22:17. w21.07 2-3 ¶3-4

Staka pipol distaem laek winim narawan, nomata datwan savve spoelem man wea olketa laek for winim. Olsem example, samfala bisnisman savve duim samting for spoelem bisnis blo narawan, mekem bisnis blo olketa seleva gohed gud. Samfala wea ranran lo resis min for bangam narawan mekem hem foldaon, and olketa seleva nao for winim resis. Lo samfala kantri, olketa student lo skul savve cheat lo exam mekem olketa go lo best university. Olketa Christian savve datkaen wei hem “nogud samting wea man laek for duim.” (Gal. 5:19-21) Nomata olsem, maet samfala lo kongregeson trae winim narawan and evritaem storyim hao samfala gud winim narawan. Sapos samfala duim olsem, datwan savve mekem kongregeson for no wan mind. So hem gud for tingim samfala lo bifor wea faithful for worshipim Jehovah wea no trae for winim narawan. w21.07 14 ¶1-2

Strongfala love bae mekem iumi for helpem olketa narawan wea sorre or discourage. Olketa brata and sista distaem gohed helpem olketa narawan insaed kongregeson wea sorre or discourage. Olketa brata and sista lovem olketa, and laek for duim eni samting for helpem olketa. (Provebs 12:25; 24:10) Aposol Paul encouragem iumi for helpem olketa taem hem sei: “Comfortim olketa wea sorre, helpem olketa wea wik, and patient long evriwan.” (1 Thess. 5:14) Staka taem best wei for helpem brata or sista wea sorre hem for lisin lo hem and for talem hem iumi lovem hem. Jehovah tinghae lo wanem iumi duim for helpem olketa sheepsheep blo hem. Provebs 19:17 sei: “Taem yu kaen long puaman, [Jehovah] hemi garem kaon long yu. Hem nao bae sensimbaek gudfala long yu.” w21.11 10 ¶11-12

Wanem nao iumi savve duim distaem for redi for wanem bae happen lo future? Iumi need for satisfae witim wanem iumi garem and hapi from iumi fren gud witim Jehovah. Taem iumi strongim faith blo iumi lo God, datwan bae mekem iumi sure hem bae protectim iumi taem Gog blo Magog attakim iumi. Datfala toktok lo text for tuday showimaot why David trustim Jehovah for sapotim hem. David depend lo Jehovah and evritaem God helpem hem. Olsem example, taem David hem young, hem talem Goliath datfala giant blo Philistine: “Tude nomoa, [Jehovah] bae hemi putum yu long han blong mi.” (Fas Samuel 17:46) And tu, taem David waka for King Saul, tu-thri taem Saul trae for killim hem dae. Bat Jehovah “hemi stap wetem” David. (Fas Samuel 18:12) Olketa samting hia helpem David for trustim Jehovah for helpem hem lo eni hard taem wea hem deal witim. w22.01 6 ¶14-15

Lo evri samting wea Jehovah duim, hem tek taem for mek sure hem barava gud, bikos datwan bae mekhae lo nem blo hem and bae mekem olketa narawan kasem gud samting. Olsem example, tingim hao Jehovah wakem earth mekem earth redi for man stap lo hem. Bible sei hem tek taem for duim evri samting lo gudfala wei, olsem hem “makem saes” blo hem, and “putum faondesin an kona ston.” (Job 38:5-7) Then Jehovah tek taem for lukluk gud lo wanem hem wakem. (Jenesis 1:10, 12) Masbi olketa angel barava hapi tumas taem olketa lukim wanem Jehovah wakem! Bible sei olketa angel “singaot” witim hapi. Wanem nao iumi lanem? Nomata hem tekem staka thousand year for Jehovah wakem earth, bihaen hem finisim datwan hem fit for sei hem “barava gud tumas.”​—Jenesis 1:31–2:1. w21.08 9 ¶6-7

Lo tokpiksa blo Jesus, wanfala boss hem redi for go lo nara kantri. Bifor hem go, hem kolem kam olketa wakaman blo hem and givim lo each wan silver selen for duim bisnis witim. From hem tingim wanem each wan fit for duim, hem givim first wakaman faevfala silver selen, nara wakaman tufala, and mek-thri wakaman wanfala. Tufala wakaman mek profit for boss blo tufala. Bat mek-thri wakaman hem no duim bisnis witim selen hem kasem, so boss sakem hem. Datfala first wakaman and mek-tu wakaman tinghae lo privilege wea olketa kasem. Olketa willing for waka hard for boss blo tufala, and from tufala duim bisnis witim selen and kasem nara silver selen moa, so boss hem hapi. From datwan boss praisem tufala and givim tufala samfala waka moa! w21.08 21 ¶7; 22 ¶9-10

Lo olketa last day, Jehovah barava patient witim pipol bikos hem no laekem eniwan for dae. (2 Pet. 3:9) Jehovah givim chance lo evriwan for worshipim hem. Bat sapos olketa rejectim Jehovah, hem bae deal witim olketa lo sem wei hem deal witim Pharaoh lo taem blo Moses. Jehovah talem Pharaoh: “Sapos mi bin wande duim, mi save yusim bikfala paoa blong mi fo panisim yu wetem olketa pipol blong yu long wanfala bikfala sik an finisim yufala nao from disfala wol. Bat mi bin letem yufala fo laef, bikos mi laek fo somaot long yu dat mi garem paoa, mekem nius long paoa blong mi hemi kasem evriwea long wol.” (Eksodas 9:15, 16) So gogo evri kantri bae luksavve Jehovah nao hem datfala tru God. (Esikiel 38:23) Taem text for tuday storyim hao God bae sekem olketa kantri, hem minim Jehovah bae finisim pipol wea olsem Pharaoh and rejectim rul blo hem. w21.09 18-19 ¶17-18

Waswe, iu sorre tumas bikos samwan iu lovem hem disfellowship? And hao sapos samwan lo kongregeson talem samting wea mekem iumi barava feel nogud? From iumi no perfect, maet samfala talem samting wea olketa no min for talem wea mekem iumi feel nogud. (Jas. 3:2) Lo taem olsem, hem gud for tingim toktok blo aposol Paul wea sei: “Nomata sapos eniwan long iufala hem feel nogud long narawan, hem mas no kros bat mas evritaem forgivim hem.” (Col. 3:13) Gohed helpem and comfortim famili blo samwan wea disfellowship. Iumi need for encouragem and showimaot love lo olketa. (Heb. 10:24, 25) Samfala taem olketa hia tingse samfala lo kongregeson no laek story witim olketa, and datwan mekem olketa feel olsem olketa tu disfellowship. Iumi mas no duim datwan! Olketa young wan wea dadi or mami disfellowship barava needim encouragement. w21.09 29 ¶13-14; 30 ¶16

Taem iumi story witim olketa olo lo kongregeson, iumi and olketa bae kasem encouragement. (Rome 1:12) Iumi bae luksavve Jehovah lukaftarem olketa wea faithful for worshipim hem, and datfala olo bae hapi from iumi interest lo hem. Bae hem hapi for storyim olketa blessing wea hem kasem from Jehovah. Nomata body blo olketa olo gogo daon, Jehovah tinghae lo strongfala faith and olketa gudfala wei blo olketa. (1 Thess. 1:2, 3) Lo laef blo olketa, olketa changem olketa nogud wei and letem holy spirit helpem olketa for garem olketa gudfala wei. Bae iumi barava tinghae lo olketa olo brata and sista taem iumi story lo olketa, savve gud lo olketa, and lane from example blo olketa! Taem iumi tinghae lo olketa olo brata and sista, datwan savve strongim kongregeson. Bat olketa olo brata and sista tu need for tinghae lo olketa wea young lo olketa. w21.09 7 ¶15-18

Iumi mas careful for no judgem narawan, bat mas showimaot “bigfala mercy” olsem Jehovah. (Eph. 2:4) Man wea showimaot mercy no sorre lo pipol nomoa, bat hem duim samting for helpem olketa. So iumi evriwan savve lukaotem chance for helpem olketa lo famili blo iumi, olketa brata and sista, and nara pipol tu. Staka wei stap for helpem narawan! Olsem example, iumi savve duim samting for comfortim olketa wea sorre, olsem for wakem kaikai for olketa, or nara samting olsem. Or iumi savve encouragem samwan wea reinstate. And nara wei for helpem pipol hem for storyim gud nius lo olketa wea iumi meetim. (Job 29:12, 13; Rome 10:14, 15; Jas. 1:27) Staka wei stap for showimaot mercy lo pipol so trae for luksavve lo wanem pipol needim. Taem iumi showimaot mercy lo pipol, datwan bae mekem Dadi blo iumi lo heven wea showimaot “bigfala mercy” for hapi tumas! w21.10 13 ¶20-22

Toktok blo David lo datfala psalm 23 sei: “[Jehovah] hemi gohed fo lukaftarem mi gudfala olsem mi wanfala sipsip blong hem, so mi no sot long enisamting.” Waswe, David minim hem no short lo olketa material samting? Nomoa. Lo olketa nara verse lo datfala psalm, David storyim olketa spiritual blessing wea hem kasem bikos hem acceptim Jehovah olsem shepherd blo hem. Jehovah leadim David “long olketa stretfala wei,” and lukaftarem hem lo taem wea hem isi and lo taem hem hard. David luksavve bae hem feisim samfala hard taem. And hem luksavve samfala taem bae hem wikdaon olsem hem wakabaot lo ples “wea hemi barava tudak,” and bae hem garem olketa enemy. Bat David savve Jehovah bae lukaftarem hem. Hao nao David ‘garem evri samting’? David kasem evri samting hem needim lo spiritual saed. David no needim staka material samting for mekem hem hapi. David satisfae lo wanem Jehovah provaedem lo physical saed. Wanem hem important lo David hem for kasem blessing and protection from Jehovah. Toktok blo David helpem iumi for garem balance tingting abaotem olketa material samting. w22.01 3-4 ¶5-7

Lo taem blo Bible, staka no laek herem message blo olketa wea preach. Olsem example, for staka year Noah “preach abaotem samting wea raeteous.” (2 Pet. 2:5) Masbi hem laekem pipol for lisin lo message blo hem, bat Jehovah no sei datwan bae happen. Taem Jehovah givim instruction lo Noah lo hao for wakem ark, hem sei: ‘Yu mas go insaet long ark wetem waef blong yu, an trifala pikinini blong yu wetem trifala waef blong trifala.’ (Jenesis 6:18) And tu, Noah mas luksavve no staka pipol bae lisin bikos bae hard for staka pipol fit insaed lo ark bikos lo size wea God markem for ark. (Jenesis 6:15) Olsem iumi savve, no eniwan lisin lo Noah. (Jenesis 7:7) Waswe, Jehovah tingse Noah no duim gud waka blo hem for preach? Nomoa! Jehovah hapi lo Noah bikos hem faithful for duim wanem Jehovah laekem hem for duim.​—Jenesis 6:22. w21.10 26-27¶10-11

Masbi Ruth hem feel nogud taem hem herem Naomi talem datfala toktok! Ruth duim staka samting for helpem Naomi. Hem krae witim Naomi, comfortim hem, and wakabaot witim hem for staka day. Nomata olsem, Naomi sei: “Mi no garem enisamting nao.” Naomi talem samting wea showimaot hem no tinghae lo wanem Ruth duim, nomata Ruth standap saed lo hem. Datwan mas mekem Ruth feel nogud tumas! Nomata olsem, hem no lusim Naomi. (Rut 1:3-18) Nomata iumi duim staka samting finis for helpem maet wanfala sista wea discourage, maet hem talem samting wea mekem iumi sorre. Bat iumi no laek for tingse hem no tinghae lo wanem iumi duim. Iumi gohed for helpem sista blo iumi, and askem Jehovah for helpem iumi luksavve lo hao for comfortim hem. (Provebs 17:17) Firstaem, maet sista wea needim help no acceptim help blo iumi. Bat, iumi bae no givap for helpem hem bikos iumi garem strongfala love for hem.​—Gal. 6:2 w21.11 11 ¶17-19

Lo Bible datfala toktok “holy” hem minim iumi mas followim olketa standard blo Jehovah. For “holy” savve minim tu iumi worshipim Jehovah followim hao hem laekem, and datwan bae mekem iumi fren gud witim hem. Iumi tinghae tumas lo Jehovah from hem laek for fren witim iumi nomata iumi no perfect, especially taem iumi tingim wanem Bible teachim abaotem hao Jehovah hem holy tumas. Iumi savve lo datwan bikos samfala angel (seraph) wea stap klosap lo throne blo Jehovah sei olsem abaotem Jehovah: “Hemi barava holi tumas.” (Aesaea 6:3) Olketa angel hia fren gud witim Jehovah, datfala holy God, bikos olketa tu holy. w21.12 3 ¶4-5

Olketa young wan mas disaedem wanem for duim lo laef blo olketa. Maet olketa teacher and olketa famili member wea no Witness encouragem olketa for go lo university mekem olketa garem gud waka and kasem staka selen. Sapos olketa disaed for duim olsem datwan bae mekem olketa busy tumas. Bat parents and olketa fren blo olketa lo kongregeson bae encouragem olketa young wan for garem olketa spiritual goal. Wanem nao bae helpem wanfala young wan wea lovem Jehovah for disaed gud? Bae hem gud for young wan hia readim and ting raonem toktok lo Ephesus 5:15-17. Bihaen hem readim olketa verse hia, hem gud for datfala young wan for tingim: ‘Wanem nao “Jehovah laekem” mi for duim? Wanem nao bae mi duim witim laef blo mi for mekem Jehovah hapi, and for “iusim gud taem” blo mi?’ Tingim, “iumi stap long barava nogud taem” and klosap nao disfala world wea Satan rulim bae finis. w22.01 27 ¶5

Wanem taem nao James kamap disaepol blo Jesus? Taem Jesus resurrect “James lukim hem, then evri aposol lukim hem tu.” (1 Cor. 15:7) Bihaen datwan nao James disaed for kamap disaepol blo Jesus and hem duim staka samting. Taem olketa aposol weit for kasem holy spirit lo datfala rum antap lo wanfala haos lo Jerusalem, James hem lo there. (Acts 1:13, 14) Gogo James kamap member blo governing body lo first century. (Acts 15:6, 13-22; Gal. 2:9) Hem raetem tu wanfala leta lo olketa nara anointed Christian bifor lo 62 C.E. Datfala leta savve helpem iumi distaem nomata iumi garem hope for go lo heven or for stap lo earth. (Jas. 1:1) Josephus, man for raetem history sei, olketa killim dae James bikos Ananias, Hae Priest blo olketa Jew, givim order for olketa duim datwan. James hem wanfala faithful disaepol and hem kasem reward for go lo heven. w22.01 9 ¶3; 9 ¶5

Wanfala samting iumi lanem from text for tuday hem hao iumi shud no expectim Jehovah for stopem olketa test for kasem iumi. Olsem Jesus pruvim hem faithful go kasem taem hem dae, maet iumi tu need for duim datwan. (Matt. 16:24, 25) Bat iumi sure God bae no letem iumi kasem eni test wea iumi no fit for winim. (1 Cor. 10:13) Nara samting iumi lanem hem hao samfala maet persecutim iumi. (1 Pet. 2:19, 20) Nomata iumi no duim rong samting, olketa againstim iumi from iumi no olsem pipol lo world and from iumi preach abaotem olketa tru samting. (John 17:14; 1 Pet. 4:15, 16) Jesus minim why Jehovah letem hem for safa. Bat samfala brata and sista wea kasem test kwestinim why Jehovah letem datwan for happen. (Habakuk 1:3) From Jehovah minim iumi, hem luksavve datkaen kwestin no minim olketa lusim faith blo olketa, bat olketa needim hem for kaen and sorre lo olketa.​—2 Cor. 1:3, 4. w21.04 11 ¶9-10

Jehovah bae acceptim worship blo iumi from iumi love hem and respectim hem. Iumi savve hao Jehovah nomoa fit for iumi worshipim, dastawe iumi laekem worship blo iumi hem mas klin. Prea hem wanfala wei wea iumi worshipim hem. Bible sei olketa prea blo iumi hem olsem incense wea olketa priest bonem insaed lo tabernacle, and then lo temple tu. Naesfala smel blo datfala incense hem mekem God hapi tumas. God hem “hapi” tu lo olketa prea blo iumi wea kam from heart, nomata iumi iusim simpol toktok. (Provebs 15:8; Diutronomi 33:10) Jehovah hapi taem iumi sei iumi lovem hem, and taem iumi talem thankiu lo hem. Hem laekem iumi for storyim tu olketa samting wea iumi wari abaotem and olketa goal blo iumi. Bifor iumi prea lo Jehovah, hem gud sapos iumi tingting gud firstaem abaotem wanem bae iumi talem. Sapos iumi duim olsem, olketa prea blo iumi bae olsem “incense” wea smel naes tumas lo Jehovah. w22.03 20 ¶2; 21 ¶7

Lo Armageddon, iumi bae no disaedem hu nao shud kasem mercy blo Jehovah or nomoa. (Matt. 25:34, 41, 46) Waswe, bae iumi trustim wanem Jehovah disaedem, or bae samting hem disaedem mekem iumi for stambol? Diswan helpem iumi for luksavve hem important for trustim Jehovah distaem, mekem iumi barava trustim hem lo future. Lo niu world iumi bae hapi tumas from Jehovah finisim false religion, olketa bigfala bisnis, and olketa gavman wea spoelem pipol and mekem olketa for safa. Lo datfala taem iumi bae no sik or olo, and no eniwan bae dae. Satan and olketa demon blo hem bae no savve spoelem iumi for wan thousand year and evri nogud samting wea olketa kosim bae nomoa nao. (Rev. 20:2, 3) Lo datfala taem bae iumi hapi tumas from iumi trustim olketa disison and judgment blo Jehovah! w22.02 6-7 ¶16-17

Jesus trae for stretem eni problem and hem encouragem olketa narawan for duim sem samting tu. Hem sei sapos olketa laekem Jehovah for acceptim worship blo olketa, olketa mas stretem eni problem witim brata blo olketa. (Matt. 5:23, 24) And tu-thri taem hem helpem olketa aposol for stretem raoa blo olketa abaotem hu lo olketa nao hem important. (Luke 9:46-48; 22:24-27) Sapos iumi laek for stap gud witim narawan, iumi mas willing for stretem eni problem wea kamap, and encouragem olketa brata and sista for duim sem samting tu. (Phil. 4:2, 3; Jas. 3:17, 18) Hem gud for tingim: ‘Wanem nao mi willing for duim for stretem problem witim narawan? Taem brata or sista mekem mi feel nogud, waswe, mi gohed kros lo hem? Waswe, mi weitim hem nao for stretem problem, or mi willing for go stretem problem witim hem nomata mi tingse hem nao kosim problem?’ w22.03 10 ¶10-11

Bible sei pipol blo God bae “hapi tumas fo kam an joen” lo waka blo Jehovah, and Jesus nao bae leadim olketa. (Sams 110:3) Wanem Bible talem hem kamap tru distaem. Evri year, pipol blo Jehovah willing for spendem staka million hour for duim preaching waka, and olketa no kasem pei for duim datwan. Olketa willing for iusim taem blo olketa tu for helpem olketa nara brata and sista, encouragem olketa, and strongim faith blo olketa lo Jehovah. And olketa elder and ministerial servant spendem staka taem for redyim olketa tok for olketa meeting and for visitim olketa brata. Pipol blo Jehovah duim olketa samting hia bikos olketa lovem Jehovah and lovem olketa narawan. (Matt. 22:37-39) Jesus willing for helpem olketa narawan and hem tingim olketa narawan firstaem. Iumi laek for duim best blo iumi for followim example blo hem. (Rome 15:1-3) Sapos iumi duim olsem, iumi bae kasem gud samting. w22.02 20 ¶1-2

Lo Israel bifor, staka pipol waka lo farm and boss savve peim olketa wakaman lo end blo each day. Sapos boss no duim datwan, datfala wakaman bae no garem selen for peim samting wea famili blo hem needim lo datfala day. Jehovah sei: “Yufala mas peim hem long waka blong hem, bikos man ya hemi pua tumas an hemi nidim seleni.” (Diutronomi 24:14, 15; Matt. 20:8) Distaem staka wakaman savve kasem pei bihaen tufala week or lo end lo month, and no evriday. Nomata olsem, principle lo Levitikas 19:13 hem fitim distaem tu. Samfala boss no peim selen wea olketa wakaman fit for kasem, bikos maet olketa savve olketa wakaman barava needim datfala waka. So hem olsem olketa boss hia “kipim pei” blo olketa wakaman. Wanfala Christian wea boss bae no laek for duim olsem. w21.12 10 ¶9-10

For full day Jesus deal witim staka nogud samting, so masbi bihaen evri samting hia hem barava laek for drink wata. Jesus no shame for talem narawan wanem hem needim, so iumi shud duim olsem tu. Samfala maet shame for askem narawan for samting wea olketa needim. Bat sapos iumi needim help, iumi shud no hol bak for askem narawan. For example, sapos iumi olo, maet iumi askem help from samwan for go baem kam samting lo market for iumi. Or sapos iumi sik, iumi savve askem narawan for go witim iumi lo clinic. Sapos samting mekem iumi for wari tumas, hem gud for storyim datwan lo elder or nara mature Christian wea hapi for lisin lo iumi and talem “gud toktok” wea savve encouragem iumi. (Provebs 12:25) Olketa brata and sista lovem iumi and laek for helpem iumi taem iumi kasem hard taem. (Provebs 17:17) Bat olketa no savve wanem iumi needim or warim sapos iumi no talem lo olketa. w21.04 11-12 ¶11-12

Maet hem no isi taem change kamap lo laef blo iumi. Samfala wea insaed lo spesol full-taem service for staka year, olketa mas finis from datfala assignment. Olketa narawan mas stop for duim wanfala assignment wea olketa enjoyim tumas bikos olketa olo nao. Hem fitim for iumi sorre sapos samting olsem happen lo iumi. Samting wea bae helpem iumi for deal witim eni change wea kamap hem for luksavve hao Jehovah duim staka spesol samting distaem, and hao iumi garem privilege for waka tugeta witim God. (1 Cor. 3:9) Jehovah bae gohed for lovem iumi. So sapos samting olsem happen lo iumi, no spendem staka taem for tingting abaotem why nao hem olsem? Winim wei for tingse “evrisamting long bifoa kam hemi barava gud tumas,” askem Jehovah for helpem iumi luksavve lo gud samting wea kamaot from datfala change. (Eklesiastes 7:10) Hem gud for tingim wanem iumi fit for duim, bikos datwan bae mekem iumi gohed hapi nomata samfala change kamap lo laef blo iumi. w22.03 17 ¶11-12

Hu nao Jehovah showimaot strongfala love lo olketa? Hem showimaot diskaen love lo olketa pipol nomoa. Bible showimaot hem garem strongfala love for olketa wea fren gud witim hem. Hem no showimaot diskaen love lo evriwan. God garem nambawan plan for olketa fren blo hem, wea datwan showimaot hem faithful lo olketa and lovem olketa. Jehovah showimaot love lo evri pipol. Jesus sei lo Nicodemus: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.”​—John 3:1, 16; Matt. 5:44, 45. w21.11 2 ¶3; 3 ¶6-7

Laef lo disfala world hem no isi, and maet bae hem hard go moa. (Matt. 24:21) Iumi luk forward lo taem wea evri samting hia bae finis and bae iumi no tingim moa! (Aesaea 65:16, 17) Nomata olsem, iumi mas no givap. Why nao olsem? Bikos Jesus sei: “Sapos iufala no givap, bae iufala sevem laef bilong iufala.” (Luke 21:19) Taem iumi ting raonem hao olketa narawan deal witim olketa hard samting olsem iumi and no givap, datwan bae strongim iumi. Hu nao showimaot nambawan example for deal witim olketa nogud samting? Jehovah God. Waswe, iu sapraes lo datwan? Maet olsem, bat tingim diswan: Satan nao kontrolem disfala world dastawe staka nogud samting gohed for happen. Jehovah garem paoa for finisim datwan enitaem nomoa, bat hem weitim taem wea hem markem. (Rome 9:22) So hem gohed deal witim staka nogud samting go kasem datfala taem. w21.07 8 ¶2-4