September

Jesus teachim staka gud samting. Nomata olsem, samfala pipol tingse datwan no pruvim hem Messiah. Bat olketa rejectim Jesus from hem no showim saen from God wea olketa laekem. (Matt. 16:4) Wanem nao tru samting abaotem Jesus? Jesus no laekem pipol for mekhae lo hem taem hem duim ministry. Isaiah talem datwan lo wanfala profesi abaotem Messiah. Hem sei: “Bae hemi no singaot bikfala falom olketa rod long taon.” (Isa. 42:1, 2) Jesus no mekhae lo hemseleva. Hem no werem spesol kaleko olsem olketa bigman blo religion, hem no laekem pipol for iusim spesol title for hem, and hem no busy for wakem olketa bigfala temple. And taem King Herod kotem hem, Jesus no duim mirakol wea king laekem. (Luke 23:8-11) Nomata Jesus duim samfala mirakol, main waka blo hem nao for preachim gud nius. Hem sei lo olketa disaepol: “Hem nao wanem mi kam for duim.”​—Mark 1:38. w21.05 4 ¶9-10

Taem iumi preach, iumi lukaotem pipol wea “showimaot olketa laekem laef olowe.” (Acts 13:48) Taem iumi study witim olketa hia, iumi mas helpem olketa for (1) minim, (2) acceptim, and (3) followim wanem olketa lanem lo Bible. (Col. 2:6, 7; 1 Thess. 2:13) Bat evriwan lo kongregeson savve helpem Bible study taem olketa welkamim and showimaot love lo Bible study taem hem kam lo olketa meeting. (John 13:35) Study conductor maet need for iusim staka taem for helpem Bible study for changem olketa biliv wea hem hol strong lo hem. (2 Cor. 10:4, 5) Hem gud samting for helpem samwan kamap disaepol, nomata maet hem tekem staka month go kasem taem Bible study fit for baptaes. w21.07 3 ¶6

Waswe, iumi barava sure Olketa Jehovah’s Witness teachim truth from Bible, and olketa followim example blo Jesus lo hao for worshipim Jehovah? Aposol Paul sure hem insaed truth. (1 Thess. 1:5) Hem studyim olketa Scripture for pruvim lo hemseleva wanem hem bilivim hem tru. Hem sure “evri toktok insaed long olketa Holy Raeting hem kam from God.” (2 Tim. 3:16) Wanem nao hem lanem from hem studyim olketa Scripture? Hem lanem staka samting wea pruvim Jesus nao datfala Messiah, bat olketa bigman blo Jew religion no laek for bilivim datwan. Olketa bigman hia sei olketa teachim truth abaotem God lo pipol, bat then olketa duim olketa samting wea mekem God no hapi. (Titus 1:16) Paul no olsem olketa bigman hia wea chusim nomoa samfala samting lo olketa Scripture for followim. Paul teachim and followim “evri samting” wea stap lo olketa Scripture.—Acts 20:27. w21.10 18 ¶1-2

Nomata iumi duim waka for plantim seed and watarem, iumi luksavve God nao mekem seed hem grow. (1 Cor. 3:6, 7) Jehovah laekem evriwan for herem gud nius. Dastawe Jesus leadim waka for preach distaem and iumi garem privilege for faendem pipol wea interest lo truth bifor end hem kam. (Hagae 2:7) Iumi wea preach olsem olketa wea sevem pipol taem ship hem sink lo sea. Nomata olketa sevem samfala pipol nomoa, evriwan wea go for help duim important waka. Datwan semsem tu witim preaching waka. Iumi no savve haomas pipol nao bae sev from world blo Satan, bat Jehovah savve iusim eniwan lo iumi for helpem olketa. Andreas, wanfala brata lo Bolivia sei: “Evriwan wea studyim Bible and gogo olketa baptaes hem from staka brata and sista nao helpem olketa.” So iumi laek for gohed duim disfala waka for preach bikos Jehovah bae blessim iumi for datwan, and iumi bae enjoyim disfala waka for sevem pipol. w21.05 19 ¶19-20

Man wea hunting laek for trapim or killim dae wanfala animal. Bible storyim olketa difren kaen trap wea man for hunting savve iusim. (Job 18:8-10) Hao nao man for hunting savve trapim wanfala animal? Firstaem hem mas studyim datfala animal, olsem wea hem go, kaikai wea hem laekem, and then bae hem iusim kaen trap wea savve kasholem datfala animal. Satan hem olsem datfala man for hunting. Hem studyim iumi, olsem hem lukluk lo wea iumi go and wanem iumi interest lo hem. Then Satan iusim trap wea hem hope bae kasholem iumi. Sapos iumi insaed lo wanfala trap blo Satan finis, Bible storyim wanem iumi savve duim for aot from datfala trap. Bible talem iumi tu hao for stap klia lo olketa trap blo Satan. Satan laekem iumi for foldaon lo trap for praod or greedy. Satan iusim tufala trap hia for staka thousand year, and staka pipol foldaon lo datwan. Satan hem duim samting olsem man wea switim bird or iusim net for kasholem hem. (Sams 91:3) Bat Jehovah no laekem iumi for foldaon lo olketa trap blo Satan, so hem helpem iumi for luksavve lo olketa trap hia.​—2 Cor. 2:11. w21.06 14 ¶1-2

Olketa olo brata and sista lo kongregeson barava spesol. Dastawe Bible sei white hair blo olketa hem olsem kraon. (Provebs 20:29) Nomata olsem, maet iumi no tingim tumas olketa olo brata and sista. Bat hem gud for tingim iumi savve lanem staka gudfala samting from olketa olo. Jehovah God barava tinghae lo olketa olo brata and sista. Hem luksavve and tinghae lo gudfala wei blo olketa. Hem hapi taem olketa storyim lo narawan samfala naes experience wea olketa kasem from olketa stap insaed organization blo Jehovah for staka year. (Job 12:12; Provebs 1:1-4) Jehovah tinghae lo olketa olo hia from olketa gohed and no givap. (Malakae 3:16) Olketa kasem staka hard samting lo laef, bat olketa gohed faithful lo Jehovah and hol strong lo hope for future. Jehovah lovem olketa bikos olketa gohed for preach ‘nomata olketa olo finis.”​—Sams 92:12-15. w21.09 2 ¶2-3

Samfala taem hem gud for iumi lukluk gud lo iumiseleva. Iumi savve duim olsem taem iumi ting raonem olketa kwestin hia: ‘Waswe, hem mekem mi feel gud taem mi duim samting wea winim narawan? Waswe, mi duim waka lo kongregeson bikos mi laek for showimaot mi gud winim olketa narawan, or from mi laek for mekem Jehovah hapi?’ Bible sei for no comparem iumiseleva witim olketa narawan. Why nao olsem? Sapos iumi tingse iumi gud winim olketa brata and sista, datwan savve mekem iumi praod. Bat sapos iumi tingse olketa brata and sista gud winim iumi, datwan savve mekem iumi ting daonem iumiseleva. (Rome 12:3) Hem gud for tingim hao Jehovah leadim iumi kam lo hem bikos iumi garem gudfala heart and willing for lisin lo Son blo hem, and no bikos iumi luk naes tumas, savve story gud, or from staka pipol laekem iumi.​—John 6:44; 1 Cor. 1:26-31. w21.07 14-15 ¶3-4

For iumi garem niu tingting, iumi need for prea, studyim Bible, and ting raonem wanem iumi lanem. Gohed for duim olketa samting hia, and depend lo Jehovah for helpem iumi. Hem bae iusim holy spirit for helpem iumi for no tingse narawan hem gud winim iumi or iumi gud winim narawan. Jehovah bae helpem iumi for luksavve sapos iumi praod or jealous, and for lusim olketa nogud wei hia. (Mektu Kronikols 6:29, 30) Jehovah luksavve iumi duim best blo iumi for worshipim hem, and nomata iumi no perfect iumi waka hard for no olsem pipol lo world. Hem barava lovem iumi from iumi duim datwan. Jehovah iusim example blo mami witim baby blo hem for showimaot hem barava lovem iumi. (Aesaea 49:15) Iumi hapi for minim bigfala love wea Jehovah garem for iumi, especially taem hem lukim iumi duim best blo iumi for worshipim hem. w21.07 24-25 ¶17-19

Hem important for waka hard and duim gud eni waka iumi duim for Jehovah, and datwan nao bae mekem iumi barava hapi. So hem gud for “barava busy” lo preaching waka and lo kongregeson. (Acts 18:5; Heb. 10:24, 25) Iumi laek for prepare gud for olketa meeting mekem iumi savve givim koment wea strongim narawan, and duim gud eni student assignment wea iumi kasem lo midol week meeting. Sapos olketa askem iumi for duim eni waka lo Kingdom Hall, kam lo taem wea olketa markem and duim gud datfala waka. Tinghae and waka hard for kamap gud lo eni assignment iumi kasem. (Provebs 22:29) Taem iumi waka hard and duim gud eni waka iumi kasem, bae iumi barava hapi. (Gal. 6:4) And tu, bae iumi hapi nomata narawan kasem wanfala privilege wea iumi laekem.​—Gal. 5:26. w21.08 22 ¶11

Iumi mas no praod, bat letem Jehovah teachim iumi. Taem man hem praod hem savve bighed and no laek for followim direction blo Jehovah. From olketa Pharisee praod, olketa no letem holy spirit blo God helpem olketa for luksavve lo pruv wea showimaot Jesus hem Son blo God. (John 12:37-40) Wei blo olketa nogud tumas, and hem mekem olketa no fit for kasem laef olowe. (Matt. 23:13, 33) So hem important for letem holy spirit and toktok blo Bible for helpem iumi for hambol, garem stret tingting, and mekem olketa disison wea followim direction blo Jehovah. From James hem hambol, hem willing for lane from Jehovah. And from hem hambol datwan helpem hem for kamap gudfala teacher. w22.01 10 ¶7

Taem iumi “gohed for prea,” iumi savve sure Dadi blo iumi bae herem and ansarem olketa prea blo iumi. (Col. 4:2) Nomata maet iumi tingse Jehovah delay for ansarem prea blo iumi, Jehovah bae ansarem lo stretfala taem. (Heb. 4:16) So hem no fitim for sei Jehovah hem delay for ansarem olketa prea. Olsem example, maet samfala prea for Kingdom blo God finisim disfala nogud world for staka year finis, and Jesus talem iumi for prea abaotem datwan. (Matt. 6:10) Bat sapos end no kam lo taem wea samwan laekem, bae hem karangge samting for letem datwan mekem hem wikdaon! (Habakuk 2:3; Matt. 24:44) Wise samting for duim hem for gohed weit lo Jehovah and garem faith bae hem ansarem olketa prea blo iumi. End bae kam lo barava stretfala taem, bikos Jehovah hem markem finis “day and taem” for hem kam.​—Matt. 24:36; 2 Pet. 3:15. w21.08 10 ¶10-11

From olketa olo brata hambol, olketa luksavve olketa no savve duim staka samting olsem bifor. Olsem example, tingim olketa circuit overseer blo iumi. Taem olketa kasem 70 years, branch askem olketa for duim nara assignment. Maet hem no isi for olketa changem assignment bikos olketa barava enjoyim circuit waka. Nomata olsem, olketa luksavve hem gud for olketa nara brata wea young lo olketa for duim datfala waka. Olketa followim gudfala example blo olketa Levite lo Israel bifor, wea taem olketa kasem 50 years, olketa mas finis for duim assignment blo olketa lo tabernacle. Bat olketa Levite hia hapi for duim eni nara assignment wea olketa kasem, and for helpem olketa nara Levite wea waka lo tabernacle. (Nambas 8:25, 26) Nomata olketa wea finis from circuit waka no savve helpem staka kongregeson, olketa savve duim staka samting for helpem kongregeson. w21.09 8-9 ¶3-4

Lo Luke 15:11-32, story blo Jesus abaotem datfala prodigal son teachim iumi staka samting. Jesus story abaotem wanfala young man wea bighed againstim dadi blo hem. Hem muv go lo “wanfala farawe kantri,” and lo there hem duim enikaen rabis samting. Bat taem hem kasem hard taem, hem barava ting raonem wanem hem duim. Hem luksavve hem duim karangge samting and hem shud go bak lo dadi blo hem. Olsem Jesus talem, datfala young man “kasem bak gudfala tingting” and hem disaed for go and askem dadi blo hem for forgivim hem. Hem important for datfala young man luksavve hem sin. Bat hem need for duim olketa nara samting tu! Datfala young man duim olketa samting wea showimaot hem repent. Disfala story blo Jesus garem olketa principle for helpem olketa elder taem olketa trae for faendaot sapos brata or sista wea duim bigfala sin hem repent. w21.10 5-6 ¶14-15

Wanem nao no savve seksek? Aposol Paul sei: “From iumi bae kasem wanfala Kingdom wea no savve seksek, iumi mas gohed . . . worshipim [God] long wei wea mekem hem hapi.” (Heb. 12:28) So bihaen God finisim pipol wea rejectim rul blo hem, Kingdom blo God nao datfala samting wea no savve seksek. (Sams 110:5, 6; Daniel 2:44) Klosap nao olketa samting hia bae happen! So pipol mas disaed sapos olketa bae sapotim disfala world wea bae lead go lo dae blo olketa, or disaed for changem laef blo olketa and worshipim Jehovah mekem olketa kasem laef olowe. (Heb. 12:25) Preaching waka wea iumi duim savve helpem pipol for disaedem hu nao olketa laek for sapotim. And iumi laek for tingim toktok blo Jesus wea sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.”​—Matt. 24:14. w21.09 19 ¶18-20

Olketa elder, iufala garem waka for comfortim famili blo samwan wea disfellowship. (1 Thess. 5:14) Bifor and bihaen lo meeting, elder savve go story witim olketa. Elder savve go lo haos blo olketa for prea witim olketa, and waka witim wanfala lo preaching waka, or askem olketa for joinim famili worship. Olketa elder need for lukaftarem, showimaot love, and tingim olketa sheepsheep blo Jehovah wea feel sorre. (1 Thess. 2:7, 8) Jehovah “no laekem eniwan for dae bat hem laekem evriwan for garem chance for repent.” (2 Pet. 3:9) Nomata man duim bigfala sin, laef blo hem important lo God. Tingim hao Jehovah givim Son blo hem for kamap ransom sakrifaes for iumi olketa man wea sin. Jehovah iusim olketa elder for trae helpem olketa wea disfellowship for kam bak lo hem. And hem hope olketa bae laek for duim datwan, olsem wanem prodigal son lo tokpiksa blo Jesus hem duim.​—Luke 15:11-32. w21.09 30-31 ¶17-19

Sapos iumi no savve duim staka samting lo ministry from iumi sik or olo, iumi savve hapi bikos iumi duim samting lo ministry. Tingim wanem hem happen lo taem blo King David. Olketa Amalekite tekem famili and olketa nara samting blo David and olketa man blo hem. Tu handred man blo David no garem strong for go faet, so olketa stap for lukaftarem evri samting taem David and olketa narawan go faetem olketa Amalekite. Bihaen olketa winim datfala faet, David sei for sharem evri samting wea olketa tekem witim olketa wea no go faet. (Fas Samuel 30:21-25) Olketa wea stap for lukaftarem olketa samting blo David kasem gud samting. Olsem tu, sapos iumi duim best blo iumi lo ministry iumi savve hapi taem samfala savve lo Jehovah and gogo olketa baptaes. Jehovah luksavve iumi traem best blo iumi and hem bae rewardim iumi. And tu, hem laekem iumi for hapi lo wanem iumi fit for duim lo preaching waka. (John 14:12) Iumi savve sure Jehovah bae hapi witim iumi sapos iumi gohed and no givap! w21.10 28 ¶15-17

Olketa olo brata and sista maet sorre bikos olketa no savve duim staka samting for Jehovah olsem olketa duim bifor. Hem tru, olketa olo no garem strong olsem bifor, bat olketa savve iusim wisdom and experience wea olketa garem for helpem narawan for duim moa samting lo organization blo Jehovah. Sapos olketa wea olo laek for helpem narawan lo kongregeson olketa mas hambol and ting lo narawan olsem hem winim olketa. (Phil. 2:3, 4) Sapos olsem, bae olketa luksavve samfala difren wei for duim waka wea followim olketa Bible principle hem stap, and hem waka gud tu. So bae olketa no tingse olketa narawan mas duim samting olsem hao olketa duim bifor. (Eklesiastes 7:10) Nomata olketa olo garem staka savve, olketa bae luksavve “world distaem hem gohed for change” and maet olketa need for change and duim samting lo difren wei.​—1 Cor. 7:31. w21.09 8 ¶1, 3

From Jehovah hem holy, hard for hem talem olketa wea worshipim hem for duim nogud samting olsem. Toktok wea olketa karvem lo gold hedband lo hat blo hae priest hem sei: “Jehovah hem barava holy.” Diswan remindim olketa Israelite hao Jehovah hem holy tumas. (Eksodas 28:36-38) Nomata maet olketa Israelite no savve lukim datfala toktok lo hedband blo hae priest from olketa no savve go klosap lo hem, waswe, bae olketa savve Jehovah hem holy? Ia, bikos taem olketa priest readim Law for olketa man, woman, and olketa pikinini lo Israel, evriwan savve herem hao Jehovah hem holy. (Diutronomi 31:9-12) Olketa savve herem disfala toktok: “Mi nao [Jehovah], God blong yufala, so yufala mas . . . stap holi bikos mi nao mi stap holi.” “Yufala mas stap holi bikos mi nao, [Jehovah], mi holi.”​—Levitikas 11:44, 45; 20:7, 26. w21.12 3 ¶6-7

Samfala maet wari tumas abaotem wanem olketa needim. Maet olketa stap lo kantri wea staka pipol poor. Datwan mekem hem hard for faendem waka or for kasem inaf selen for lukaftarem famili. Or dadi or mami wea waka for selen for sapotim famili hem dae, and famili no garem selen for peim wanem olketa needim. Samting wea bae helpem iumi for no wari tumas hem for trustim Jehovah. Tingim hao Jehovah hem promis for provaedem olketa samting wea iumi needim sapos Kingdom hem first samting lo laef blo iumi. (Matt. 6:32, 33) Evritaem hem lukaftarem pipol blo hem. (Diutronomi 8:4, 15, 16; Sams 37:25) Iumi savve Jehovah provaedem kaikai for olketa bird and hem mekem olketa flaoa for luk naes, so iumi no need for wari tumas abaotem wanem iumi bae kaikaim or werem! (Matt. 6:26-30; Phil. 4:6, 7) From dadi and mami lovem olketa pikinini, olketa mek sure olketa pikinini garem wanem olketa needim. Olsem tu, from Jehovah lovem iumi, bae hem provaedem wanem iumi needim. w21.12 16 ¶4-5; 18 ¶8

Waswe, eni brata or sista duim samting wea mekem iu barava feel nogud? Tingim example blo Joseph wea olketa brata blo hem treatim hem nogud. Hem evritaem tingim wanem hem savve duim for Jehovah, and Jehovah blessim hem from hem patient and no givap. Gogo Joseph forgivim olketa brata blo hem, and hem luksavve hao Jehovah iusim hem for helpem pipol blo God. (Jenesis 45:5) Sapos iumi depend lo Jehovah for stretem olketa nogud samting olsem Joseph duim, iumi bae no gohed feel nogud lo samting wea kasem iumi. (Sams 7:17; 73:28) Sapos iumi deal witim samting wea no stret or samting wea mekem iumi feel wikdaon, remember Jehovah hem tingim olketa wea “sore tumas.” (Sams 34:18) Hem lovem iumi from iumi patient and hem laekem iumi for storyim olketa wari blo iumi lo hem. (Sams 55:22) Jehovah lukim pipol duim nogud samting and bae hem stretem olketa samting hia. (1 Pet. 3:12) Taem iumi deal witim samting wea iumiseleva no savve stretem, waswe, iumi willing for weit for Jehovah hem stretem? w21.08 11 ¶14; 12 ¶16

Best disison wea olketa young wan savve mekem, hem for iusim laef blo olketa for mekem Jehovah hapi. So iumi mas luksavve lo wanem hem important. Samfala taem, maet iumi need for disaed sapos iumi bae duim spiritual samting or nara samting wea iumi laek for duim. Bat for iusim gud taem blo iumi, iumi mas luksavve which wan nao important. Wanfala example lo diswan hem taem Jesus visitim Mary and Martha. From Martha hapi tumas Jesus kam lo haos, hem redyim staka kaikai for Jesus. Bat Mary, sista blo Martha, chus for sidaon witim Jesus and lisin lo hem. Samting wea Martha duim hem no rong, bat Jesus sei Mary nao “chusim stret samting.” (Luke 10:38-42) Maet gogo Mary forgetim nomoa wanem olketa kaikaim lo datfala taem, bat iumi sure hem no forgetim wanem hem lanem from Jesus. Mary hem hapi for iusim taem blo hem for lisin lo Jesus, and iumi tu hapi for iusim taem blo iumi for fren gud witim Jehovah. w22.01 27 ¶5-6

Nomata Ahab sei hem sorre lo Jehovah for wanem hem duim, samting wea hem duim bihaen showimaot hem no repent. Hem no trae for stopem olketa Israelite for worshipim Baal, and hem no encouragem olketa for worshipim Jehovah. Bihaen Ahab dae, Jehovah showimaot hao hem ting lo Ahab. Jehovah sendem profet Jehu for sei Ahab hem “ravis man.” (Mektu Kronikols 19:1, 2) So tingim diswan, sapos Ahab hem repent, bae hard for Jehu sei hem wanfala rabis man wea les lo Jehovah. Nomata Ahab sorre lo wanem hem duim, hem nating showimaot hem repent. Wanem nao iumi savve lanem from Ahab? Taem Ahab herem Elijah sei Jehovah bae finisim famili laen blo hem, hem barava sorre, and datwan hem stret. Nomata olsem, olketa samting wea hem duim bihaen showimaot hem no repent. Man wea repent mas duim moa samting winim for sei sorre lo sin wea hem duim. w21.10 3 ¶4-5, 7-8

Isaiah hem wanfala profet, and maet waef blo hem tu savve profesi bikos Bible sei hem wanfala profet. (Isa. 8:1-4, NWT) Isaiah and waef blo hem duim staka waka for Jehovah. Olketa wea marit savve followim example blo Isaiah and waef blo hem taem olketa duim staka samting for Jehovah. Tufala savve strongim trust wea olketa garem lo Jehovah taem olketa studyim Bible tugeta and lukim hao olketa profesi evritaem kamap tru. (Titus 1:2) Tufala savve ting raonem olketa samting wea tufala duim wea join witim olketa profesi. Olsem example, from tufala duim preaching waka, datwan join witim profesi blo Jesus abaotem hao olketa disaepol bae talemaot gud nius lo evri ples lo earth bifor end hem kam. Taem tufala studyim gud olketa Bible profesi and lukim olketa profesi kamap tru distaem, datwan bae helpem tufala for laek duim staka samting for Jehovah. w21.11 16 ¶9-10

Jesus tingim mami blo hem, wea luk olsem hem widow. From Jesus lovem Mary hem markem John for encouragem Mary lo spiritual wei. Start lo datfala taem, John kamap olsem son blo Mary and lukaftarem Mary olsem mami blo hem. Wanem Jesus duim showimaot hem lovem mami blo hem from Mary lukaftarem Jesus start kam taem hem born, and hem no lusim Jesus taem hem klosap for dae. Wanem nao iumi savve lanem from toktok blo Jesus? Maet iumi lovem olketa Christian brata and sista winim samfala lo famili. Samfala lo famili savve againstim or lusim iumi, bat Jesus sei sapos iumi fren gud witim Jehovah and stap insaed organization blo Hem, bae iumi kasem big spiritual famili. Olketa hia bae kamap olsem son, dota, mami, or dadi. (Mark 10:29, 30) Iumi hapi for insaed wanfala spiritual famili wea lovem Jehovah and lovem each other, iaman?​—Col. 3:14; 1 Pet. 2:17. w21.04 9-11 ¶7-8

Strongfala love bae mekem iumi for laek duim samting for helpem narawan. Distaem, staka brata and sista showimaot strongfala love lo olketa narawan lo organization, nomata olketa no meetim samfala. Olsem example, taem olketa herem wanfala natural disaster happen, olketa laek duim samting for helpem olketa brata and sista. And taem samwan insaed kongregeson kasem hard taem saed lo selen, olketa no hol bak for faendemaot wanem nao brata hia needim and kwiktaem duim samting for helpem hem. Olsem olketa Christian lo Macedonia, olketa laek duim samting for helpem olketa nara brata and sista. Olketa willing for sharem olketa samting wea olketa garem, nomata maet hem “winim wanem olketa garem.” (2 Cor. 8:3) Distaem tu, olketa elder praisem olketa brata and sista wea kaen and helpem olketa narawan lo kongregeson. Taem olketa elder duim datwan, hem bae helpem olketa brata and sista hia for gohed and no givap.​—Aesaea 32:1, 2. w21.11 11 ¶14; 12 ¶21

Iumi evriwan needim kaonsel samfala taem. Maet iumi askem samwan wea iumi respectim for givim iumi advaes. Or sapos wanfala brata lukim iumi “start for go rong,” maet hem givim kaonsel lo iumi. (Gal. 6:1) Or samwan bae kaonselem iumi sapos iumi duim sin. Nomata why nao iumi kasem kaonsel iumi shud lisin and followim datfala kaonsel, bikos datwan bae helpem iumi and maet sevem laef blo iumi. (Provebs 6:23) Scripture lo text for tuday hem encouragem iumi for ‘lisin long toktok blong waesman.’ No eniwan savve lo evri samting. Nomata iumi garem savve abaotem samting, samwan bae garem bigfala savve and experience winim iumi. (Provebs 12:15) So taem iumi lisin lo kaonsel or advaes, datwan showimaot iumi hambol, and hem showimaot iumi luksavve iumi no savve lo evri samting and needim help for duim samfala samting. Wise King Solomon sei: “No eni advaes, bae plan gorong, plande advaes, bae plan gohed.”​—Provebs 15:22. w22.02 8 ¶1-2

Man wea duim sin, need for duim moa samting for showimaot hem repent. Hem mas barava laek changem olketa nogud wei blo hem. Hem mas stop for duim datfala sin and followim olketa standard blo Jehovah. (Esikiel 33:14-16) Main samting nao, hem mas laek for fren bak witim Jehovah. Wanem nao iumi shud duim sapos iumi faendaot wanfala fren blo iumi hem duim bigfala sin? Maet fren blo iumi no laekem iumi for talem olketa elder, bat Jehovah lukim evri samting, so iumi hard for haedem datfala sin. (Provebs 5:21, 22) Talem fren blo iumi olketa elder laek for helpem hem. Sapos hem sei hem no laek go story witim olketa elder, iumi nao shud talem olketa. Datwan showimaot iumi laek for helpem fren blo iumi. w21.10 7 ¶19-21

Hem tru, iumi evriwan no elder, bat iumi evriwan savve followim example blo Jesus for helpem narawan. Bible sei Jesus “kamap olsem wanfala slave.” (Phil. 2:7) ) Hao nao iumi savve kamap olsem slave lo narawan? Olsem wanfala gud slave bae lukaotem chance for duim samting wea mekem boss blo hem hapi, iumi tu laek for duim moa samting for Jehovah and for helpem olketa brata and sista. Hem gud for tingim: ‘Waswe, iumi willing for iusim taem and strong blo iumi for helpem narawan? Taem olketa ask for olketa volunteer for klinim ples wea convention bae kamap, or for duim waka lo Kingdom Hall, waswe, iumi laek for help?’ Maet iumi luksavve samfala taem iumi no willing for helpem narawan and iumi faendem hard for changem datwan. Sapos olsem, prea lo Jehovah and talem hem datwan. Askem Jehovah for helpem iumi for “laek duim samting” for narawan, and then duim datwan.​—Phil. 2:13. w22.02 22-23 ¶9-11

Jesus savve tok kaen and tingim need blo pipol. (Matt. 11:29, 30) Olsem example, taem wanfala woman from Phoenicia begim Jesus for healim gele blo hem, nomata firstaem Jesus no duim wanem woman hia askem, hem story kaen lo hem. Bat taem hem lukim woman hia showimaot faith, hem healim gele blo hem. (Matt. 15:22-28) From Jesus hem kaen, hem givim kaonsel lo olketa wea hem lovem tu. Olsem example, taem Peter trae for discouragem Jesus for duim wanem Jehovah laekem, Jesus kaonselem Peter front lo olketa nara disaepol. (Mark 8:32, 33) Hem no duim diswan for mek shame lo Peter, bat hem trainim hem and olketa nara disaepol for no duim samting wea olketa no garem raet for duim. Masbi Peter shame taem Jesus kaonselem hem, bat kaonsel hia helpem hem tu. Wanfala wei for kaen lo narawan wea iumi lovem, hem for tok stret lo hem. Taem iumi stretem hem, iumi savve followim example blo Jesus for iusim olketa Bible principle for helpem hem. w22.03 11 ¶12-13

Iumi worshipim Jehovah taem iumi praisem hem. (Sams 34:1) From iumi tinghae lo Jehovah hem isi for iumi praisem hem. Taem iumi ting raonem olketa gud samting wea Jehovah duim for iumi finis, bae iumi garem staka gud reason for praisem hem. Iumi praisem Jehovah taem iumi storyim hao iumi lovem hem and tinghae lo olketa samting wea hem duim for iumi. Preaching waka tu hem spesol chance for iumi “praisem God.” Olsem iumi tingting gud firstaem abaotem wanem iumi bae prea abaotem, hem important for tingting gud tu abaotem wanem bae iumi storyim lo ministry. Diswan bae helpem iumi for storyim hao iumi feel abaotem Jehovah and for praisem hem taem iumi sharem truth witim olketa narawan. w22.03 21 ¶8