December

Jesus and olketa disaepol savve gud lo each other, olsem wanfala shepherd and olketa sheepsheep blo hem. (John 10:14) Disfala tokpiksa hem fitim bikos olketa sheepsheep savve lo shepherd blo olketa and followim wanem hem talem. Wanfala tourist lukim olketa sheepsheep duim datwan. Hem sei: “Mifala laek tek photo lo samfala sheepsheep, so mifala trae for kolem olketa kam. Bat olketa no kam bikos olketa no heresavve lo voice blo mifala. Then wanfala young shepherd boy kolem olketa, and semtaem nomoa olketa kam lo hem.” Wanem hem happen lo datfala tourist mekem iumi tingim toktok blo Jesus abaotem olketa follower blo hem. Hem sei: “Bae olketa herem toktok bilong mi.” Bat Jesus stap lo heven, so hao nao iumi savve herem toktok blo hem? Main wei for showimaot iumi herem toktok blo Jesus hem for followim olketa teaching blo hem.​—Matt. 7:24, 25. w21.12 16 ¶1-2

Firstaem, aposol Paul hem bighed and hem persecutim olketa Christian. Bat gogo, hem luksavve wanem hem duim hem no stret and hem willing for change. (1 Tim. 1:12-16) From Jehovah helpem Paul, hem kamap elder wea showimaot love, tingim narawan, and hambol. Hem disaed for no gohed tingting tumas abaotem olketa wik point blo hem and trustim hao Jehovah savve forgivim hem. (Rome 7:21-25) Hem luksavve hard for hem perfect, bat hem waka hard for garem olketa gudfala wei and hem depend lo Jehovah for helpem hem for duim gud ministry blo hem. (1 Cor. 9:27; Phil. 4:13) Olketa brata no kamap elder from olketa perfect. Nomata olsem, Jehovah laekem olketa for luksavve lo wik point blo olketa and for waka hard for garem gudfala wei. (Eph. 4:23, 24) Taem elder studyim Bible, hem shud trae for luksavve lo eni samting wea hem need for changem, then waka hard for changem datwan. Taem elder duim olsem, Jehovah bae helpem hem for hapi and duim gud waka blo hem.​—Jas. 1:25. w22.03 29-30 ¶13-15

Sapos iumi luksavve iumi judgem samwan lo kongregeson, wanem nao iumi shud duim? Hem gud for tingim hao iumi mas lovem olketa brata and sista. (Jas. 2:8) And tu, iumi shud prea strong lo Jehovah, and askem hem for helpem iumi for stop for judgem narawan. Then duim samting followim prea blo iu and go story witim datfala brata or sista. Maet hem gud for askem hem for iutufala waka tugeta lo ministry or for kam kaikai lo haos. Taem iumi start for minim datfala brata or sista, datwan bae helpem iumi for tingim gud saed blo hem, olsem Jehovah and Jesus duim. Taem iumi duim olketa samting hia, iumi showimaot iumi herem and followim toktok blo Jesus for stop for judgem narawan. Olsem olketa sheepsheep herem voice blo shepherd and followim hem, iumi olketa follower blo Jesus laek for herem and followim toktok blo hem. Nomata iumi insaed lo “smol sekson bilong olketa sheepsheep” or iumi “olketa nara sheepsheep,” iumi laek for gohed for herem and obeyim toktok blo shepherd blo iumi, Jesus.​—Luke 12:32; John 10:11, 14, 16. w21.12 19 ¶11; 20-21 ¶17-18

Taem Rehoboam kamap king lo Israel, olketa pipol askem hem for mekem laef blo olketa isi winim wanem dadi blo hem, Solomon, askem olketa for duim. Gud samting wea Rehoboam duim nao hem askem advaes lo olketa leader blo Israel lo wanem for talem lo olketa pipol. Olketa leader hia talem hem, sapos hem duim wanem olketa pipol askem bae olketa gohed for sapotim hem. (Fas Kings 12:3-7) Luk olsem Rehoboam no laekem datfala advaes, so hem go askem advaes lo olketa fren blo hem wea hem growap witim olketa. Olketa talem hem for mekem laef blo pipol for hard go moa winim wanem Solomon duim. (Fas Kings 12:9-11) Rehoboam shud askem Jehovah which wan nao hem shud followim. Bat hem followim advaes from olketa fren blo hem. Rehoboam and olketa pipol blo Israel kasem nogud samting from datwan. Samfala taem iumi tu kasem kaonsel wea iumi no laekem. Nomata olsem, sapos datfala kaonsel hem kam from Bible iumi shud acceptim. w22.02 9 ¶6

Olketa brata wea hambol bae tinghae lo wanem olketa young brata fit for duim, and no warim wanem olketa young wan no savve lo hem yet. Bae olketa olo brata laek for waka tugeta witim olketa young brata, and bae no tingse olketa young wan trae for winim olketa. Olketa wea olo tinghae lo olketa wea young lo olketa bikos olketa hia present from Jehovah. From olketa olo no strong nao, olketa luksavve hem gud for garem olketa young wan wea strong and willing for duim waka lo kongregeson. Naomi hem nambawan example lo Bible lo wanfala olo wea acceptim help from samwan wea young lo hem. Bihaen hasband blo Ruth hem dae, Naomi talem dota-in-law blo hem for go bak lo famili blo hem. Bat Ruth hem sei hem barava laek for go witim Naomi lo Bethlehem, so Naomi sei for tufala go. (Rut 1:7, 8, 18) And hem wanfala blessing for tufala evriwan! (Rut 4:13-16) Olketa olo brata and sista wea hambol bae laek for followim example blo Naomi. w21.09 10-11 ¶9-11

Jehovah luksavve iumi evriwan no semsem. Maet iu fit for duim moa samting winim olketa narawan wea iu savve lo olketa. Or maet iu no fit for duim sem samting olsem olketa narawan, bikos lo age blo iu, from iu sik, or from iu garem olketa responsibility lo famili. Iu no discourage. (Gal. 6:4) Jehovah bae no forgetim waka wea iu duim. Hem bae hapi lo iu from iu duim best blo iu and from iu garem stretfala reason for duim datwan. Jehovah luksavve tu lo wanem iumi laek for duim, and hem laekem iumi for hapi and satisfae witim wanem iumi fit for duim lo worship blo iumi for hem. Distaem iumi hapi from iumi savve Jehovah bae helpem iumi taem iumi kasem hard taem. (Aesaea 41:9, 10) Iumi garem staka reason for hapi taem iumi worshipim Jehovah, wea hem nao fit for “kasem glory and for evriwan mekhae” lo hem!​—Rev. 4:11. w22.03 24 ¶16; 25 ¶18

Iumi laek followim example blo Jesus, bat iumi shud no discourage sapos iumi no followim example blo Jesus lo perfect wei for helpem narawan. (Jas. 3:2) Olsem example, painting blo samwan wea lane for paintim piksa bae no barava gud olsem painting blo teacher blo hem. Nomata hem no duim gudfala painting firstaem, sapos hem gohed for followim example blo hao teacher blo hem paintim piksa, bae hem isisi kamap gud. Olsem tu, sapos iumi followim wanem Jesus teachim lo Bible and iumi gohed waka hard for helpem narawan, bae iumi savve followim gud example blo Jesus. (Sams 119:59) Distaem staka pipol lo world tingim olketa seleva nomoa, bat pipol blo Jehovah difren from olketa. Iumi tinghae lo hao Jesus helpem olketa narawan, and iumi laek for followim example blo hem. Hem tru, maet iumi no followim example blo Jesus lo perfect wei, bat iumi fit for “followim gud” example blo hem. (1 Pet. 2:21) Taem iumi waka hard for followim example blo Jesus for tingim narawan firstaem and helpem olketa, bae iumi hapi from iumi mekem Jehovah hapi. w22.02 24 ¶16; 25 ¶18

Wanfala samting wea Jehovah iusim for givim direction lo iumi distaem hem Bible. Sapos iumi spendem taem for ting raonem wanem Jehovah hem teachim iumi lo Bible, datwan bae helpem iumi for followim direction blo hem and duim gud ministry blo iumi. (1 Tim. 4:15, 16) Jehovah iusim tu “datfala wakaman wea faithful and wise” for givim direction lo iumi. (Matt 24:45) Samfala taem maet iumi kwestinim why iumi kasem samfala direction. Olsem example, maet iumi kasem instruction for redyim samfala samting for wanfala natural disaster wea iumi tingse bae no savve happen lo ples blo iumi. Wanem nao iumi shud duim sapos iumi tingse olketa instruction wea iumi kasem hem no fitim iumi? Hem gud for tingim olketa story lo Bible, olsem taem pipol blo God followim direction wea olketa tingse hem no fitim, bat hem sevem laef blo olketa.​—Jajis 7:7; 8:10. w22.03 18 ¶15-16

Taem Jesus talem toktok lo text for tuday hem luksavve hem mas depend lo Jehovah for resurrectim hem, and hem sure Jehovah bae duim datwan. Wanem nao iumi savve lanem from toktok blo Jesus? Iumi mas willing for putim laef blo iumi lo hand blo Jehovah. Datwan showimaot iumi ‘trastem Jehovah long ful haat blong yumi.” (Provebs 3:5) Tingim example blo Joshua, wanfala young brata wea 15 years nomoa. Hem sik tumas bat hem no acceptim medical treatment wea no followim wanem Jehovah laekem. Taem hem klosap for dae, hem sei lo mami blo hem: “Mami, laef blo mi lo hand blo Jehovah. . . . And mami, mi sure Jehovah bae resurrectim mi lo niu world. Jehovah hem savve lo mi and hem savve mi lovem hem.” Hem gud for iumi tingim diswan: ‘Sapos mi mas dae bikos lo faith blo mi, waswe, bae mi trustim Jehovah for resurrectim mi?’ w21.04 12-13 ¶15-16

Taem pipol blo Jehovah duim preaching waka datwan savve strongim olketa, nomata pipol interest or nomoa. Samfala maet tingse olketa no fit for duim staka samting lo preaching waka. Bat tingim, Jehovah tinghae lo iumi taem iumi duim best blo iumi. Sapos iumi sik or olo and mas stap lo haos, iumi sure Jehovah luksavve iumi laek for duim preaching waka. Jehovah bae helpem iumi for iusim chance for preach lo eniwan wea kam lo haos. Sapos iumi comparem preaching waka wea iumi duim bifor witim distaem, datwan savve mekem iumi wikdaon. So hem gud for tingim hao Jehovah helpem iumi distaem, and datwan bae strongim iumi and bae iumi hapi lo wanem iumi duim. Taem iumi preach iumi no savve hu nao bae acceptim truth.—Eklesiastes 11:6. w21.05 24-25 ¶14-17

Jehovah givim David staka samting, olsem riches, hem mekem David kamap king, and hem helpem David for winim olketa enemy. Firstaem David tinghae lo wanem Jehovah duim for hem and hem sei olketa samting hia “barava plande tumas.” (Sams 40:5) Bat gogo David no satisfae lo wanem Jehovah givim and hem kamap greedy from hem laekem samfala samting moa. Nomata David garem staka waef finis, hem kavetem waef blo Uriah, Bath-sheba. David durong witim Bath-sheba and hem kamap babule. Then David duim samting wea nogud winim datwan. Hem mekem plan for olketa killim dae Uriah. (Mektu Samuel 11:2-15) Nomata David faithful lo Jehovah for staka year finis, hem foldaon lo trap for greedy and hem kasem nogud samting from datwan. Bat David luksavve hem duim sin and repent from datwan. Hem hapi nao Jehovah forgivim hem!​—Mektu Samuel 12:7-13. w21.06 17 ¶10

Maet samfala tingse olketa no fit for duim Bible study. Samfala tingse olketa no garem bigfala savve and no fit for teachim narawan. Sapos iumi olsem, tingim thrifala samting wea savve helpem iumi for no hol bak for duim Bible study. First samting, Jehovah sei iumi evriwan fit for teachim narawan. Mek-tu samting, Jesus wea ‘garem paoa ovarem evri samting long heven and earth’ talem iumi for teachim narawan. (Matt. 28:18) And mek-thri samting, iumi savve askem olketa narawan for helpem iumi. Jesus hem depend lo dadi blo hem lo wanem for storyim, so iumi savve depend lo Jehovah tu. (John 8:28; 12:49) Iumi savve askem field service grup overseer, wanfala pioneer, or pablisa wea garem Bible study for helpem iumi for garem and duim Bible study blo iumi. Or iumi savve ask for joinim wanfala lo olketa hia lo Bible study blo olketa mekem iumi lane from olketa. w21.07 6 ¶12

Disfala nogud world hem klosap tumas for finis, so iumi need for trustim Jehovah lo evri samting. Why nao olsem? Lo taem blo bigfala trabol maet iumi kasem olketa direction wea no mek sense lo iumi or wea no isi for followim. Iumi savve Jehovah seleva bae no talem iumi olketa direction hia, bat hem bae iusim olketa brata wea lead for duim datwan. Lo datfala taem iumi bae no laek for kwestinim sapos direction hem kam from Jehovah, and for kwestinim sapos olketa brata hia followim tingting blo olketa seleva nomoa. Waswe, bae iumi trustim Jehovah and organization blo hem lo datfala taem? Sapos iumi trustim direction blo organization distaem, datwan bae helpem iumi for trustim olketa direction wea iumi kasem lo taem blo bigfala trabol. w22.02 6 ¶15

Gideon and 300 soldia blo hem fit for tinghae lo olketa seleva from Jehovah helpem olketa for winim faet. Olketa from tribe blo Ephraim go lukim Gideon no for praisem hem, bat for raoa witim hem bikos hem no askem olketa firstaem for join insaed datfala faet. (Jajis 8:1) Gideon storyim samting wea olketa duim wea Jehovah blessim olketa for hem. Bihaen hem storyim datwan, olketa “no kros” nao. (Jajis 8:3) From Gideon hem hambol, datwan mekem evriwan for stap gud tugeta. Samting wea olketa lo tribe blo Ephraim duim mekem iumi luksavve hem important for mekhae lo Jehovah and no for pipol tinghae lo iumi. Olketa hed blo famili and olketa elder savve lanem samting from Gideon tu. Sapos samwan feel nogud lo wanem olketa duim, olketa shud trae for minim why hem kros and praisem hem for gud samting hem duim. Olketa bae need for hambol. Hem important for stap gud witim olketa brata and sista, and no for pruvim iumi nao stret. w21.07 16-17 ¶10-12

Jehovah wakem iumi for garem olketa wei blo hem. From datwan iumi savve garem olketa gudfala wei olsem Jehovah for showimaot love, sorre lo narawan, faithful, and duim olketa gud samting. (Sams 86:15; 145:17) Taem iumi waka hard for garem olketa kaen wei olsem, iumi mekhae lo Jehovah and showimaot iumi tinghae lo hem. (1 Pet. 1:14-16) And taem iumi showimaot olketa gudfala wei, datwan mekem iumi hapi and satisfae, and mekem iumi fit for stap insaed lo famili blo Jehovah. Jehovah wakem earth for iumi enjoyim laef. Longfala taem bifor Jehovah wakem firstfala man Adam, hem redyim disfala earth for olketa man stap lo hem. (Job 38:4-7; Jeremaea 10:12) From Jehovah hem kaen tumas, hem wakem staka gud samting for mekem iumi enjoyim laef. (Sams 104:14, 15, 24) Bihaen Jehovah wakem earth hem fit for sei “hemi gud.”​—Jenesis 1:10, 12, 31. w21.08 3 ¶5-6

Iumi evriwan preach lo pipol and helpem olketa for kamap disaepol. (Matt. 28:19, 20; Rome 10:14) Datfala Teach Gud brochure savve helpem iumi for kamap gud lo disfala important waka tu. So markem goal for studyim and followim wanem iumi lanem from datfala brochure. Hem barava important tu for gohed waka lo olketa wei blo iumi. (Col. 3:12; 2 Pet. 1:5-8) Olsem iumi storyim lo disfala study, iumi laek for duim staka samting for Jehovah. Iumi luk forward lo niu world wea iumi bae duim staka samting for Jehovah. Bat distaem iumi duim best blo iumi lo eni waka wea iumi duim for Jehovah, and datwan bae mekem iumi for barava hapi and bae iumi no warim olketa samting wea iumi no fit for duim. Taem iumi duim olsem, datwan bae mekhae lo Jehovah and mekem hem hapi. (1 Tim. 1:11) So iumi laek for hapi lo olketa privilege wea iumi garem distaem! w21.08 25 ¶18-20

Sapos mami and dadi blo iu insaed lo truth taem iu smol, masbi tufala teachim iu abaotem Jehovah. Olketa teachim iu Jehovah nao wakem olketa samting, hem garem olketa gudfala wei, and hem bae mekem earth kamap paradaes. (Jenesis 1:1; Acts 17:24-27) Staka pipol no biliv lo God, so hem hard for olketa bilivim God wakem evri samting. Olketa biliv lo evolution and sei laef kamap seleva. Staka savveman bilivim datwan tu. Olketa sei olketa scientist pruvim Bible hem rong, and olketa sei masbi pipol wea biliv lo wanfala creator no skul gud, no kleva, and bilivim samting wea no tru. Nomata iumi Jehovah’s Witness for longtaem, iumi need for gohed strongim faith blo iumi. Datwan bae helpem iumi for no daotem creation taem olketa savveman sei datwan no tru.​—Col. 2:8. w21.08 14 ¶1-3

Abel, Noah, Abraham, and Job showimaot olketa respectim and lovem Jehovah from olketa obeyim hem, garem faith, and givim olketa sakrifaes lo hem.Iumi savve olketa duim best blo olketa for worshipim hem, and Jehovah acceptim datwan. Gogo, Jehovah iusim Moses for givim Law lo olketa Israelite. Olketa law hia garem olketa instruction abaotem hao for worshipim Jehovah lo wei wea hem laekem. Bihaen Jesus dae and laef bak lo heven, Jehovah no expectim olketa Christian for worshipim hem followim Law blo Moses. (Rome 10:4) Bat olketa shud followim wanfala niu law, wea hem nao “law bilong Christ.” (Gal. 6:2) Diswan minim olketa Christian hia followim example blo Jesus and olketa teaching blo hem. And disfala “law” no garem tu staka rul for followim. Olketa Christian distaem tu followim example blo Jesus. Diswan mekem Jehovah hapi and datwan “strongim” olketa tu.​—Matt. 11:29. w22.03 20-21 ¶4-5

Jehovah lisin lo olketa prea blo iumi, and hem lisin lo olketa prea blo Son blo hem Jesus, taem hem stap lo earth. Jehovah lisin lo prea blo Jesus abaotem olketa important samting, olsem for disaedem hu nao bae kamap 12-fala aposol. (Luke 6:12, 13) Jehovah herem tu prea wea Jesus talem bifor Judas givim Jesus lo olketa enemy. Jesus prea lo Dadi blo hem abaotem hao hem wari abaotem hard samting wea bae hem kasem. From Jehovah herem prea blo Jesus, hem sendem wanfala angel for strongim hem. (Luke 22:41-44) Distaem tu Jehovah lisin lo olketa prea blo pipol blo hem, and hem ansarem lo best wei and lo barava taem. (Sams 116:1, 2) Wanfala sista lo India experiencem datwan. Hem savve gohed warim staka samting, so hem barava prea lo Jehovah abaotem datwan. Hem sei: “Datfala May 2019 JW Broadcasting^® wea story abaotem hao for deal witim olketa wari barava helpem mi. Mi luksavve datwan hem ansa lo prea blo mi.” w21.09 21-22 ¶6-7

Masbi hem hard for olketa Christian lo first century for lusim evri samting and startim niu laef. Olketa need for garem faith lo Jehovah for provaedem wanem olketa needim. Aposol Paul givim advaes for helpem olketa hia faevfala year bifor army blo Rome kam raonem Jerusalem. Hem sei: “Iufala mas no laekem tumas selen, bat iufala mas hapi nomoa long samting wea iufala garem, bikos God hem sei: ‘Bae mi nating lusim iu.’ So iumi mas no fraet, bat sei: ‘Jehovah nao hem helpem mi. Bae mi no fraet. No eniwan savve spoelem mi.’” (Heb. 13:5, 6) Olketa wea followim disfala advaes for garem simpol laef bifor army blo Rome tekovarem Jerusalem mas faendem hem moa isi for garem simpol laef bihaen olketa ranawe. Olketa sure Jehovah bae provaedem wanem olketa needim. w22.01 4 ¶7, 9

Taem iumi tingim man wea showimaot mercy maet iumi tingim hao hem kaen, showimaot love, feel sorre lo pipol, and willing for helpem narawan. Datwan mekem iumi tingim story blo Jesus abaotem datfala Samaritan wea kaen. Nomata hem man from nara kantri, hem “sorre” lo wanfala Jew wea olketa man for steal killim hem nogud. “Hem barava sorre tumas” lo datfala Jew wea garekil, and hem duim samting for helpem man hia. (Luke 10:29-37) Datfala story helpem iumi for minim hao Jehovah showimaot mercy. Hem duim olsem lo staka difren wei bikos hem lovem iumi. Man savve showimaot mercy lo nara wei tu. Hem maet disaed for no panisim samwan wea fit for kasem panis. Jehovah showimaot mercy lo iumi lo wei olsem. Bible sei: “Hemi no save panisim yumi fitim olketa sin blong yumi.” (Sams 103:10) Bat samfala taem Jehovah mas panisim man wea duim sin. w21.10 8 ¶1-2

Jehovah garem strongfala love for olketa wea worshipim hem. Iumi luksavve lo diswan from samting wea King David and profet Daniel talem. Olsem example, David sei: “Plis gohed for showimaot strongfala love lo pipol wea savve lo iu.” Hem sei tu: “Jehovah showimaot strongfala love lo olketa wea fraet lo hem for olowe.” And Daniel sei: “Jehovah, datfala tru God, hem showimaot strongfala love lo olketa wea lovem hem and followim law blo hem.” (Ps. 36:10; 103:17; Dan. 9:4, NWT) Olketa toktok hia showimaot Jehovah garem strongfala love for olketa wea worshipim hem bikos olketa savve lo hem, fraet lo hem, lovem hem, and obeyim olketa law blo hem. Hem showimaot diskaen love lo olketa wea worshipim hem nomoa. Nomata taem iumi no worshipim Jehovah yet hem lovem iumi finis. (Sams 104:14-15) Bat from iumi worshipim hem distaem, hem showimaot tu strongfala love lo iumi. w21.11 3-4 ¶8-9

Nomata wanem hem happen, iumi disaed strong or obeyim toktok blo Jesus lo text for tuday. Samfala bigman lo church distaem mekhae lo seleva and pipol interest tumas for herem story blo olketa and tinghae tumas lo olketa hia. Staka joinim church blo olketa, baem buk blo olketa, and givim big donation for olketa. Samfala bilivim evri samting wea olketa storyim and tinghae lo olketa bigman hia, olsem Jesus nao kam preach lo olketa! Bat olketa wea worshipim Jehovah no mekhae lo olketa man. Iumi respectim olketa brata wea lead lo kongregeson, bat iumi followim wanem Jesus talem: “Iufala evriwan olketa brata.” (Matt. 23:8-10) Nomata samwan hem bigman blo religion or gavman, iumi no mekhae lo hem. And iumi no teksaed lo eni samting wea join witim politik or religion, olsem olketa nara religion duim.​—John 18:36. w21.10 20 ¶6-7

From iumi olketa Christian laek for holy, iumi mas mek sure no eni samting spoelem hao iumi fren witim Jehovah. And from iumi Olketa Jehovah’s Witness, iumi no laek duim eni samting wea bae spoelem holy nem blo God. (Levitikas 19:12; Aesaea 57:15) From Jehovah hem God blo olketa Israelite, olketa followim olketa law blo hem. Levitikas 18:4 sei: “Mi nao [Jehovah], God blong yufala, so yufala mas obeim olketa lo blong mi, an yufala mas falom tingting blong mi.” Chapter 19 storyim samfala law hia. Olsem example, lo verse 5-8, 21, 22 hem storyim olketa animal sakrifaes. Olketa Israelite mas sakrifaesim olketa animal followim hao Jehovah bae acceptim. Olketa verse hia shud helpem iumi for laek duim samting for praisem Jehovah followim hao hem laekem, olsem Hebrew 13:15 storyim. w21.12 5 ¶14-15

Olketa mature brata and sista savve kamap gudfala example for olketa hasband and waef wea young. Samfala lo olketa duim full-taem ministry for staka year. Bae hem gud for olketa young wan hia askem advaes blo olketa sapos olketa laek for duim moa samting for Jehovah. Taem iufala duim olsem, datwan showimaot iufala trustim Jehovah. (Provebs 22:17, 19) Tingim, marit hem olsem present from Jehovah. (Matt. 19:5, 6) Hem laekem olketa wea marit for hapi. Hem gud for hasband and waef wea young for ting raonem olketa goal lo laef blo olketa. Hem gud for ting raonem sapos iutufala savve duim moa samting for showimaot iufala tinghae lo evri samting wea Jehovah givim lo iufala. Prea lo Jehovah abaotem datwan. Lukaotem eni Bible principle wea savve helpem iufala for mekem olketa gudfala disison, then duim samting followim datwan. Olketa hasband and waef wea duim olsem, savve sure olketa bae garem gudfala laef and hapi from olketa duim staka samting for Jehovah! w21.11 18 ¶16; 19 ¶18

James no tingse hem gud winim narawan. James no tingse hem spesol winim olketa narawan from hem brata blo Jesus or from hem member blo Governing Body lo datfala taem. Dastawe hem kolem olketa nara Christian, “olketa brata” blo hem. (Jas. 1:16, 19; 2:5) Hem no laekem olketa narawan for tingse hem perfect. Wanem iumi lanem: Iumi evriwan savve duim mistek. Iumi no laekem Bible study blo iumi for tingse iumi perfect and no savve duim eni mistek. Sapos hem garem tingting olsem abaotem iumi, maet datwan mekem hem discourage and tingse olketa standard blo God hem hard tumas for kasem. Bat hem gud for talem Bible study hao iumi tu stragol for followim olketa Bible principle bifor, and storyim hao Jehovah helpem iumi for change. Datwan bae helpem hem for luksavve hem tu fit for duim wanem Jehovah laekem. w22.01 11-12 ¶13-14

Iumi need for garem tingting blo Jesus mekem iumi savve followim example blo hem and garem datfala niu wei. (Heb. 1:3) Maet iumi tingse iumi no fit for followim example blo Jesus from hem perfect. Sapos olsem, tingim olketa samting hia. First samting, Jehovah wakem iumi for garem olketa wei blo hem and Jesus. So iumi fit for followim wei blo tufala nomata iumi no duim lo perfect wei. (Jenesis 1:26) Mek-tu samting, holy spirit blo God hem garem bigfala paoa. God bae iusim holy spirit for helpem iumi for duim olketa samting wea iumi tingse maet iumi no fit for duim. Mek-thri samting, Jehovah no expectim iumi for duim diswan lo perfect wei, and hem markem 1,000 year for olketa wea bae stap lo earth for kamap perfect. (Rev. 20:1-3) Distaem, Jehovah laekem iumi for traem best for garem niufala wei and for depend lo hem for helpem iumi. w22.03 9 ¶5-6

Prea hem wanfala wei for fren witim Jehovah, bat hem important tu for studyim Bible and attendim olketa meeting. Wanem nao savve helpem iumi for concentrate taem iumi duim olketa samting hia? Trae for tingim wanem savve disturbim iumi lo taem blo meeting or taem iumi studyim Bible. Maet samwan ringim, emailim, or textim iumi lo mobile, tablet, or computer blo iumi. Taem iumi duim study seleva or iumi lo meeting and luksavve iumi start for tingim nara samting, askem Jehovah for helpem iumi. Maet hem no isi for concentrate lo olketa spiritual samting, bat hem barava important for concentrate. So prea for peace blo God for gaedem heart blo iumi and for gaedem tu “tingting” blo iumi.​—Phil. 4:6, 7. w22.01 29 ¶12-14

King Uzziah no laek followim kaonsel. Hem go insaed lo holy ples lo temple wea olketa priest nomoa savve go insaed, and hem laek for bonem incense. Olketa priest blo Jehovah talem hem: ‘Yu no garem raet fo bonem insens fo mekem wosip long Jehovah! Mifala prist nomoa garem raet fo bonem insens.’ Waswe, Uzziah acceptim datfala kaonsel? Sapos hem hambol and stretawe go aot from temple, Jehovah maet forgivim hem. Bat Uzziah no duim olsem and hem “kros tumas.” Why nao hem no laek followim kaonsel blo olketa priest? From hem nao king, hem tingse hem garem raet for duim eni samting hem laekem, bat wanem hem duim hem againstim Jehovah. So Jehovah panisim Uzziah and hem garem leprosy “go kasem taem hemi dae.” (Mektu Kronikols 26:16-21) Wanem nao iumi lanem from diswan? Nomata wanem responsibility iumi garem, sapos iumi no laek followim kaonsel wea kam from Bible, bae Jehovah no hapi lo iumi. w22.02 9 ¶7

Samwan wea garem yet “old wei” bae tingim and duim olketa samting wea followim tingting and feeling blo hemseleva. (Col. 3:9) Olsem example, maet hem man for kros, no tinghae lo olketa samting, selfish, or praod. Or maet hem laek for lukluk lo olketa dirty piksa or olketa movie abaotem pipol wea raf or durong. Nomata hem garem samfala gudfala wei and maet hem feel guilty taem hem talem or duim nogud samting, problem nao, hem no laek for changem olketa nogud wei blo hem. (Gal. 5:19-21; 2 Tim. 3:2-5) Iumi evriwan no perfect, so hard for iumi aotem evri nogud tingting and feeling from heart and mind blo iumi. Samfala taem iumi bae duim or talem samting wea mekem iumi regret. (Jer. 17:9; Jas. 3:2) Bat taem samwan laek for lusim old wei blo hem, hem bae traem best for kontrolem hemseleva and start for changem wei blo hem.​—Aesaea 55:7. w22.03 3 ¶4-5

Olketa elder, tingim gudfala wei blo olketa brata and sista. Nomata olketa no perfect, each wan garem olketa naesfala wei. Hem tru, samfala taem elder need for givim kaonsel lo wanfala brata or sista. Bat olsem aposol Paul, elder shud no tingim nomoa wanem datfala brata or sista talem or duim. Hem shud tingim hao datfala brata or sista lovem Jehovah, hem gohed faithful for worshipim Jehovah, and olketa gudfala samting wea hem fit for duim. Elder wea tingim gud saed blo olketa brata and sista, bae helpem kongregeson for hapi and wan mind. Tingim hao Jehovah no expectim iufala for perfect, bat hem laekem iufala for gohed faithful. (1 Cor. 4:2) Iufala savve sure tu hao God tinghae lo waka wea iufala duim for hem. Bible sei Jehovah bae no “forgetim waka wea iufala duim and love wea iufala showimaot for nem bilong hem taem iufala helpem olketa holy wan and gohed for duim datwan.”​—Heb. 6:10. w22.03 31 ¶19, 21