November

Jehovah helpem iumi taem iumi preach. Olsem example, hem helpem iumi for no fraet taem haosholder no kaen lo iumi, hem helpem iumi for tingim scripture wea barava fitim haosholder wea interest, and hem strongim iumi for gohed preach nomata staka lo territory no interest. (Jeremaea 20:7-9) Nara gud samting Jehovah duim, hem trainim iumi for duim ministry. Lo datfala midol week meeting iumi savve lukim olketa demonstration lo hao for duim ministry, and iumi savve followim olketa idea hia. Maet firstaem iumi hol bak for followim, bat taem iumi traem iumi lukim pipol lo territory interest lo story blo iumi. Lo olketa meeting and convention, olketa encouragem iumi for traem olketa difren wei for preach wea maet iumi no duim bifor. Maet iumi fraet for traem olketa samting hia, bat taem iumi traem Jehovah bae blessim iumi. w21.08 27 ¶5-6

Aposol Paul givim strong kaonsel lo olketa Christian lo Corinth lo wanfala leta wea hem raetem for olketa. Bihaen datwan, hem sendem Titus lo olketa bikos hem laek for savve sapos olketa acceptim datfala kaonsel or nomoa. Hem hapi tumas taem hem herem olketa acceptim and followim kaonsel hia! (2 Cor. 7:6, 7) Olsem Paul, olketa elder savve spendem taem witim olketa brata and sista. Wanfala wei wea elder savve duim diswan hem for kam early lo meeting mekem hem savve story witim olketa. Datwan bae givim hem chance for givim encouragement wea olketa needim. (Rome 1:12) Nara samting elder savve duim for followim example blo Paul hem for iusim Bible for strongim faith blo olketa brata and sista and for helpem olketa luksavve God lovem olketa. Paul lukaotem chance for praisem olketa. Taem elder givim kaonsel, datwan mas kam from Bible. Nomata hem tok stret, hem mas kaen mekem olketa laek followim datfala kaonsel.​—Gal. 6:1. w22.03 28-29 ¶11-12

Distaem, Jehovah givim pipol blo hem “strong wea winim strong bilong man” mekem olketa gohed for worshipim hem. Wanfala samting wea Jehovah iusim for strongim iumi hem prea. Lo Ephesus 6:18, aposol Paul encouragem iumi for “evritaem” prea lo God. Taem iumi duim olsem God bae strongim iumi. Maet nogud samting wea kasem iumi mekem iumi for no sure wanem for prea abaotem. Nomata olsem, Jehovah laekem iumi for prea. (Rome 8:26, 27) Nara samting Jehovah iusim for strongim iumi hem Bible. Paul readim olketa scripture and datwan strongim and comfortim hem, and iumi need for duim sem samting tu. (Rome 15:4) Taem iumi readim Bible and ting raonem, Jehovah savve iusim holy spirit for helpem iumi for minim wanem iumi readim and for followim.—Heb. 4:12. w21.05 22 ¶8-10

Iumi savve hem important for teachim pipol, bat samfala samting maet mekem iumi hol bak for garem Bible study. Maet samfala olo or savve sik. Sapos olsem, tingim hao iumi savve duim olketa Bible study lo phone or tablet. So nomata iumi mas stap lo haos, maet iumi savve duim Bible study. Nara samting, samfala lo territory maet laek for studyim Bible bat olketa free nomoa for duim study lo early morning or lo evening, and no lo taem wea kongregeson markem for preach. Waswe, kaen taem olsem fitim iumi for duim wanfala Bible study? Jesus teachim Nicodemus lo naet bikos hem taem wea fitim Nicodemus.​—John 3:1, 2. w21.07 5 ¶10-11

Olketa follower blo John Baptaesa sapraes from olketa disaepol blo Jesus no followim kastom for no kaikai. Jesus sei olketa no need for duim datwan taem hem stap witim olketa. (Matt. 9:14-17) Nomata olsem, olketa Pharisee and olketa narawan accusim Jesus and sei hem no followim olketa kastom blo olketa, and olketa kros bikos hem healim pipol wea sik lo Sabbath. (Mark 3:1-6; John 9:16) Nomata olketa Pharisee talem Jesus hem mas keepim Sabbath, olketa letem narawan for duim bisnis insaed lo temple lo Sabbath, and olketa kros taem Jesus tok strong lo olketa. (Matt. 21:12, 13, 15) Nara samting tu, taem Jesus preach lo sinagog lo Nazareth, olketa Jew barava kros lo hem bikos hem no duim wanem olketa laekem and hem sei olketa tingim olketa seleva and no garem faith. (Luke 4:16, 25-30) From Jesus no followim olketa kastom and no duim wanem pipol laekem, olketa rejectim hem.​—Matt. 11:16-19. w21.05 5-6 ¶13-14

Wanfala wei Jehovah warnim iumi for no praod and greedy hem for encouragem iumi for ting raonem nogud example blo samfala. Satan hem barava greedy. Taem hem angel blo Jehovah yet hem kasem samfala privilege, bat hem laekem nara samting tu. Hem laekem pipol for worshipim hem, nomata Jehovah nomoa fit for kasem datwan. Satan laekem iumi for greedy tu, so hem trae for mekem iumi for no satisfae lo wanem iumi garem. Eve hem first wan wea Satan trapim witim diskaen tingting. Jehovah givim Adam and Eve staka naes kaikai for enjoyim. Hem sei tufala savve kaikaim frut from evri tree lo garden, bat wanfala tree nomoa hem tambuim. (Jenesis 2:16) Nomata olsem, Satan trikim Eve and mekem hem no satisfae lo wanem Jehovah givim hem, so Eve disaed for kaikaim datfala frut wea Jehovah tambuim. Nogud samting kamaot from datwan. Eve hem sin and gogo hem dae.​—Jenesis 3:6, 19. w21.06 14 ¶2-3; 17 ¶9

Sapos Adam and Eve followim plan blo God, tufala and olketa lo laen blo tufala bae insaed lo famili blo Jehovah for olowe. Wanem nao position blo Adam and Eve insaed famili blo Jehovah? Psalm 8:5 and footnote lo NWT storyim hao God ting lo olketa man. David sei: “Iu mekem [man] lelebet low winim olketa angel. Iu mekhae lo hem and givim glory lo hem.” Hem tru, God no givim man sem paoa and savve olsem hem givim lo olketa angel. (Sams 103:20) Bat Jehovah mekhae and givim glory lo olketa man. Adam and Eve no obeyim Jehovah, so tufala no fit for stap insaed lo famili blo Hem. Bat plan blo Jehovah no change. Hem laekem olketa wea obeyim hem for stap insaed lo famili blo hem for olowe. w21.08 2-3 ¶2-4

Distaem, staka brata and sista kasem hard taem from pipol againstim olketa. Olsem example, samfala stap lo olketa kantri wea gavman tambuim waka blo iumi. Maet olketa arrestim olketa brata and sista hia and tekem olketa lo kot, and diswan givim witness lo olketa. (Matt. 10:17, 18) Olketa nara brata and sista maet stap lo kantri wea olketa free for worshipim Jehovah, bat maet olketa famili member againstim olketa and trae for stopem olketa for no duim datwan. (Matt. 10:32-36) Staka taem, olketa famili member stop for againstim iumi taem olketa luksavve olketa no savve stopem iumi for worshipim Jehovah. And tu, samfala wea barava againstim iumi gogo olketa kamap Witness. So no fraet and givap taem pipol againstim iumi bikos Jehovah bae givim holy spirit for helpem iumi. w22.03 16 ¶8

Bible sei Jehovah heitim “wei fo praod, wei fo laea, [and for] kilim man dae.” (Provebs 6:16-19) And tu, hem ‘nating laekem man wea save [raf], an wea save trikim pipol.’ (Sams 5:6) Dastawe lo taem blo Noah Jehovah finisim nogud pipol wea duim olketa rabis samting hia. (Jenesis 6:13) Jehovah iusim profet Malachi tu for storyim nara samting wea Hem heitim. Hem sei Jehovah heitim man wea laek divorcem waef blo hem nomata waef hem no duim eni rong samting. Jehovah no acceptim worship blo olketa and hem bae judgem olketa. (Malakae 2:13-16; Heb. 13:4) Jehovah laekem iumi for “barava heitim olketa rabis samting.” (Rome 12:9) Sapos iumi “barava heitim” samting, hem minim bae iumi les lo datwan. So, iumi shud garem sem tingting abaotem olketa samting wea Jehovah heitim. Iumi shud barava heitim tu. w22.03 4-5 ¶11-12

Klosap nao Jehovah bae iusim Kingdom blo hem for stretem evri samting. Olketa wea willing for weitim Jehovah bae kasem staka blessing distaem and insaed lo niu world tu. Taem iumi kasem niu world, no enitaem moa bae iumi wari or deal witim olketa hard samting wea iumi feisim distaem. God bae finisim pain and evri samting wea no stret. (Rev. 21:4) Bae iumi no need for wari bikos bae iumi kasem evri samting iumi needim. (Sams 72:16; Aesaea 54:13) Iumi barava luk forward lo datfala taem! Jehovah hem redyim iumi distaem for stap anda lo rul blo hem. Hem helpem iumi for lusim olketa nogud wei and garem olketa gudfala wei. No wikdaon and feel olsem iu laek givap from olketa nogud samting wea happen. Laef lo future bae barava gud tumas! So gohed patient and weit lo Jehovah for duim wanem hem promisim! w21.08 13 ¶17-19

No longtaem bihaen olketa kasem leta blo aposol Paul, olketa mas lusim haos, bisnis, and olketa relative wea no Christian, and olketa “ranawe go long olketa maunten.” (Matt. 24:16) Taem olketa kasem lo there, olketa need for helpem each other. Sapos olketa followim advaes blo Paul finis for sharem wanem olketa garem, datwan bae helpem olketa for deal witim niu laef blo olketa. Olketa brata and sista blo iumi maet no talem iumi wanem olketa needim. So mas kaen and tingim pipol. Masbi iumi savve lo samfala brata and sista lo kongregeson wea kaen tumas and willing for helpem narawan, and iumi no fraet for askem help blo olketa. Iumi laek for olsem olketa tu! w22.02 23-24 ¶13-15

No longtaem go nomoa samfala change kamap lo olketa kongregeson and circuit. Sapos olketa elder askem iumi for joinim nara kongregeson, maet iumi sorre for lusim olketa fren and famili blo iumi. Olketa elder no kasem direction from God for which kongregeson each pablisa bae joinim, so maet iumi tingse iumi no need for followim disison blo olketa. Bat Jehovah trustim olketa elder for mekem olketa disison hia, and iumi mas trustim olketa tu. Why nao iumi shud sapotim disison blo olketa elder nomata iumi no agree witim datwan? Bikos hem bae helpem kongregeson for gohed garem wan mind. Taem evriwan lo kongregeson hambol for followim olketa disison blo olketa elder, hem bae mekem kongregeson gohed gud. (Heb. 13:17) And tu, taem iumi showimaot iumi trustim olketa elder wea Jehovah appointim for lukaftarem kongregeson, iumi showimaot iumi trustim hem tu.​—Acts 20:28. w22.02 4-5 ¶9-10

Sapos iu wanfala brata, maet iu markem goal for kamap gud lo reading and teaching. Why nao datwan hem gudfala goal? Bikos hem bae helpem iu for kamap gudfala speaker, and datwan bae barava helpem olketa wea lisin lo iu. (1 Tim. 4:15) Markem goal for studyim and followim evri point lo Gohed Waka Hard for Read and Teach Gud brochure. Waka hard for kamap gud lo wanfala point, practicem datfala point lo haos, waka lo datfala point lo eni tok wea iu duim, then go lo next point. Askem elder wea duim gud olketa tok or askem mek-tu brata wea givim kaonsel for samfala idea lo wanem iu savve waka lo hem. (1 Tim. 5:17) Nara samting for waka lo hem taem iu duim tok, hem for strongim faith blo audience and helpem olketa for followim wanem olketa herem. Datwan bae mekem olketa, and iu tu, for enjoyim tok blo iu. w21.08 24 ¶17

Sapos iumi ting lo narawan olsem hem winim iumi, iumi bae no laek for winim hem. Sapos samwan garem savve winim iumi, iumi tinghae lo datwan and hapi lo wanem hem duim, especially sapos hem iusim savve blo hem for waka blo Jehovah. Gud samting wea kamaot from datwan nao evriwan lo kongregeson bae stap gud tugeta and wan mind. Iumi bae no jealous lo narawan sapos iumi luksavve iumi no savve gud hao for duim samfala samting. Sapos iumi hambol, bae iumi no trae for winim narawan, bat bae iumi laek for lane from olketa wea garem savve winim iumi. Olsem example, sapos wanfala brata savve tumas hao for duim pablik tok, iumi savve askem hem for samfala idea lo hao for duim gud wanfala tok. Sapos wanfala sista savve tumas hao for kuki, maet hem gud for askem hem for showim iumi samfala teknik. w21.07 16 ¶8-9

Lo Bible buk blo Nambas, iumi read abaotem wanfala Israelite wea kolektem firewood lo Sabbath, and then Jehovah judgem hem for dae. Bat Mek-tu Samuel storyim hao staka handred year bihaen datwan, Jehovah forgivim King David, nomata hem duim adultery and killim nara man dae. (Nambas 15:32, 35; Mektu Samuel 12:9, 13) Maet iumi ting olsem, ‘Why nao Jehovah forgivim David wea duim adultery and wea killim man dae, bat hem judgem datfala nara man for dae nomata hem duim sin wea luk olsem hem smol nomoa? Bible no evritaem storyim evri samting wea happen. Olsem example, iumi savve David hem barava repent from olketa sin blo hem. (Sams 51:2-4) Bat staka samting iumi no savve abaotem datfala man wea brekem law blo Sabbath. Olsem example, waswe, hem sorre lo wanem hem duim? Waswe, hem duim olketa nara samting wea brekem law blo Jehovah bifor? Waswe, hem kasem eni warning bifor wea hem no laek followim? Bible no storyim olketa samting hia. Nomata olsem, iumi savve evri samting wea Jehovah duim hem “stret fogud.”​—Sams 145:17. w22.02 2-3 ¶3-4

Man wea hambol bae duim nomoa wanem hem fit for duim, and datwan bae mekem hem for hapi. Iumi savve comparem olketa olo wea hambol witim man wea draevem car go ap lo wanfala hill. Draeva mas changem gear blo car mekem car fit for go ap lo hill. Taem draeva duim datwan, car bae hard for go fast bat bae hem garem paoa for go ap. Olsem tu, olketa olo maet need for katdaon lo samfala samting, mekem olketa garem strong for gohed lo waka blo Jehovah. (Phil. 4:5) Tingim Barzillai wea 80 years taem King David askem hem for kamap bigman lo haos blo hem, bat Barzillai hambol and sei hem no fit for duim datfala waka, hem luksavve hem gud for samwan wea young lo hem for helpem David, so hem ask sapos Chimham savve duim datfala waka. (Mektu Samuel 19:35-37) Olsem Barzillai, olketa olo brata hapi for givim chance lo narawan for duim waka. w21.09 10 ¶6-7

Maet iumi faendem hem hard for ting lo Jehovah hem Dadi blo iumi. Datwan savve olsem sapos dadi blo iumi no kaen lo iumi, bae hem hard for iumi minim dadi wea lovem pikinini. Bat Jehovah hem wanfala gud dadi. Hem barava interest lo iumi and hem laek for fren gud witim iumi. Dastawe Bible sei: “Fren gud witim God and bae hem fren gud witim iufala.” (Jas. 4:8) Jehovah lovem iumi, and hem sei hem bae barava lukaftarem iumi olsem wanfala gud dadi. Jesus hem gudfala example lo hao for fren gud witim Jehovah. Jesus barava savve gud lo Jehovah and hem followim gudfala example blo Hem. Dastawe Jesus sei: “Man wea lukim mi hem lukim Dadi tu.” (John 14:9) Jesus hem olsem wanfala big brata wea showim example lo hao for respectim and obeyim Dadi, and hao for duim wanem Jehovah laekem. And taem Jesus lo earth, hem showimaot olketa gudfala wei blo Jehovah. w21.09 21 ¶4-5

Pipol blo Jehovah wan mind for worshipim hem. Jehovah givim big responsibility lo olketa elder for keepim kongregeson klin lo spiritual wei. Sapos wanfala brata or sista duim bigfala sin, Jehovah expectim olketa elder for disaed sapos hem savve stap lo kongregeson. Olketa need for faendaot sapos hem repent. Olketa bae tingim olketa samting olsem: Maet brata or sista hia sei hem repent, bat waswe, hem barava sorre lo nogud samting wea hem duim? Waswe, hem disaed strong for no duim moa datfala sin? Sapos hem garem olketa nogud fren and gogo hem sin, waswe, hem willing for stop for fren witim olketa? Olketa elder bae prea lo Jehovah, ting raonem information wea olketa kasem and olketa Bible principle, and trae for luksavve sapos hem barava repent. Then bae olketa disaed sapos hem savve stap lo kongregeson, or hem mas disfellowship.—1 Cor. 5:11-13. w22.02 5 ¶11-12

Nomata iumi baptaes for staka year finis or for samfala day nomoa, iumi evriwan laek for garem olketa gudfala wei wea mekem Jehovah hapi. For iumi garem olketa gudfala wei, iumi mas kontrolem tingting blo iumi. Why nao olsem? Bikos sapos iumi tingim olketa nogud samting, gogo bae iumi talem or duim olketa nogud samting. (Eph. 4:17-19) Bat sapos iumi tingting abaotem olketa gud samting, datwan bae helpem iumi for talem and duim samting wea Jehovah hapi lo hem. (Gal. 5:16.) Samfala taem iumi savve tingim olketa nogud samting, bat iumi savve disaed for no followim datwan. Bifor samwan fit for baptaes, bae hem need for stop for talem and duim samting wea Jehovah heitim. Datwan nao bae helpem hem for lusim old wei blo hem. Bat hem mas duim nara samting tu for mekem Jehovah hapi. Hem nao for garem niufala wei. w22.03 8 ¶1-2

Hem no isi for olketa elder luksavve sapos samwan wea duim bigfala sin hem barava repent bikos olketa elder no savve wanem insaed lo heart blo hem, so olketa needim pruv wea showimaot hem repent. From hem duim bigfala sin wea nogud tumas, datwan maet mekem hem hard for olketa elder sure sapos hem barava repent. So olketa elder need for lukim pruv brata barava laek changem olketa nogud wei blo hem and duim samting wea showimaot datwan. Maet hem tek longtaem for hem mekem olketa change hia. Man wea disfellowship savve showimaot hem repent taem hem kam lo olketa meeting and followim kaonsel blo olketa elder for prea and studyim Bible evritaem. And tu, bae hem stap klia lo olketa samting wea savve testim hem for sin moa. Sapos hem waka hard for duim samting wea mekem Jehovah hapi, hem savve sure gogo Jehovah bae forgivim hem and olketa elder bae letem hem for reinstate. w21.10 6 ¶16-18

From Jesus barava lovem Jehovah hem worshipim Jehovah nomoa, taem hem stap lo heven and lo earth tu. (Luke 4:8) Hem teachim olketa disaepol blo hem for duim sem samting. No enitaem Jesus and olketa disaepol blo hem worshipim olketa idol. From God hem wanfala Spirit, hard for man wakem samting wea semsem olsem hem! (Aesaea 46:5) Bat waswe, hem olraet for wakem image blo olketa saint and for prea lo olketa? Lo mek-tu lo Tenfala Komandment Jehovah talem toktok wea stap lo text for tuday. Datwan showimaot klia olketa wea laek for mekem God hapi shud no worshipim idol. Olketa wea studyim history sei olketa Christian lo first century worshipim nomoa God, and no olketa idol. Olketa Jehovah’s Witness distaem followim example blo olketa Christian lo first century wea no worshipim idol. w21.10 19-20 ¶5-6

Jesus warnim olketa Christian lo first century wea stap lo Judea hao bae olketa “lukim army hem raonem Jerusalem.” (Luke 21:20-24) Lo datfala taem, olketa mas “ranawe go long olketa maunten.” Sapos olketa duim datwan bae olketa sev, bat olketa bae lusim staka material samting. Wanfala Wastaoa sei olsem: ‘Olketa lusim garden and haos, and no tekem olketa samting from haos blo olketa tu. Olketa sure Jehovah bae protectim and sapotim olketa, and olketa luksavve for worshipim Jehovah hem important winim for garem olketa material samting.’ Datfala Wastaoa sei moa: ‘Maet iumi feisim olketa test saed lo olketa material samting. Waswe, olketa material samting important lo iumi, or hem barava important for iumi faithful lo God for iumi sev? Tru nao, taem end hem kam bae iumi feisim olketa hard taem and maet iumi short lo samfala samting. Iumi mas redi for deal witim olketa samting hia.’ w22.01 4 ¶7-8

No longtaem bihaen olketa Israelite lusim Egypt, Jehovah storyim nem and samfala wei blo hem lo Moses. Jehovah sei: “Mi [Jehovah] nao mi God. Oltaem mi save sore long pipol, an mi kaen tumas long olketa. Mi no save kros kuiktaem, an oltaem mi gohed fo lavem pipol blong mi an tinghevi tumas [“showimaot barava strongfala love,” NWT] long olketa. . . . Mi save fogivim olketa sapos olketa duim olketa ravis samting, o agensim mi, o mekem enikaen sin.” (Eksodas 34:6, 7) Disfala toktok helpem Moses for minim samfala samting abaotem strongfala love blo Jehovah. Wanem nao datwan? Jehovah sei hem showimaot “barava” strongfala love. Datfala toktok “barava strongfala love” kamap sevenfala taem nomoa lo Bible. (Num. 14:18; Neh. 9:17; Ps. 86:15; 103:8; Joel 2:13; Jonah 4:2, NWT) Jehovah nomoa showimaot “barava strongfala love” and no olketa man. And Jehovah storyim hao hem showimaot strongfala love, so masbi datfala fasin hem important tumas lo hem. w21.11 2-3 ¶3-4

Olketa wea marit savve lanem gud samting from example blo aposol Peter and waef blo hem. Samting olsem naenfala month bihaen Peter meetim Jesus, hem mekem wanfala important disison for lusim fishing bisnis blo hem. Peter duim disfala waka for sapotim famili blo hem, so taem Jesus askem Peter for followim hem, Peter mas tingim hao datfala disison bae affectim famili blo hem. (Luke 5:1-11) Peter disaed for go and preach witim Jesus. And luk olsem waef blo Peter hapi lo disison blo Peter. Bible storyim hao bihaen Jesus resurrect, waef blo Peter travel witim hem samfala taem. (1 Cor. 9:5) From waef blo Peter showimaot gudfala example, Peter fit for givim kaonsel lo olketa nara Christian hasband and waef. (1 Pet. 3:1-7) Iumi sure Peter and waef blo hem trustim promis blo Jehovah for lukaftarem olketa wea duim staka samting for sapotim Kingdom.​—Matt. 6:25, 31-34. w21.11 18 ¶14

Aposol Paul lovem olketa brata and sista and waka hard for lukaftarem olketa. (Acts 20:31) Dastawe olketa brata and sista lovem hem. Olsem example, taem olketa elder lo Ephesus luksavve bae olketa no lukim Paul moa “evriwan barava krae nao.” (Acts 20:37) Olketa elder distaem tu lovem olketa brata and sista and duim staka samting for helpem olketa. (Phil. 2:16, 17) Bat samfala taem olketa elder faendem samfala samting hem no isi. Wanem nao savve helpem olketa? Hem gud for olketa elder tingim example blo Paul. Hem no perfect and samfala taem hem stragol for duim gudfala samting. (Rome 7:18-20) Hem garem samfala problem tu for deal witim. Nomata olsem, Paul gohed hapi and no givap for helpem olketa brata and sista. Taem olketa elder followim example blo Paul, datwan bae helpem olketa for deal witim olketa hard samting and for gohed hapi. w22.03 26 ¶1-2

Levitikas 19:3 storyim hao olketa Israelite mas keepim Sabbath. Olketa Christian distaem no followim Law blo Moses, so iumi no need for keepim Sabbath. Bat iumi savve lanem samting from hao olketa Israelite keepim Sabbath and hao datwan helpem olketa. Sabbath hem taem for rest from waka blo olketa and for tingim olketa spiritual samting. Dastawe lo day blo Sabbath Jesus bae go lo sinagog and readim olketa Holy Raeting. (Eksodas 31:12-15; Luke 4:16-18) Lo Levitikas 19:3 Jehovah sei for keepim Sabbath, bat for iumi datwan hem minim for spendem taem evriday for duim spiritual samting. Waswe, iu tingim eni samting iu savve changem mekem iu fit for duim datwan? Sapos iumi duim olketa spiritual samting evriday iumi bae fren gud witim Jehovah, and datwan bae helpem iumi for holy. w21.12 5 ¶13

Jesus spendem taem witim staka difren kaen pipol. Hem kaikai witim olketa wea rich and wea garem hae position. Bat hem tingim tu olketa wea poor and “pipol wea sin.” Samfala Jew les lo Jesus bikos hem spendem taem witim olketa hia. Olketa askem olketa disaepol blo Jesus: “Hao nao iufala laek kaikai witim olketa wea tekem tax and pipol wea sin?” Jesus ansarem olketa olsem toktok blo text for tuday talem (Luke 5:29-31) Isaiah talem profesi abaotem Messiah wea sei pipol lo world bae rejectim Jesus. Datfala profesi sei: ‘Evriwan les long hem and tok spoelem hem. No eniwan laek luk long hem. Hem olsem samting nating nomoa.’ (Aesaea 53:3) So olketa Jew wea les lo Jesus shud savve profesi hia talem finis hao datwan nao samting wea bae happen lo Messiah. w21.05 8-9 ¶3-4

Samfala Christian bifor herem toktok blo God, bat no kwiktaem for followim. (Jas. 1:22) Samfala narawan favorim olketa brata and sista wea rich. (Jas. 2:1-3) And olketa narawan no savve kontrolem toktok blo olketa. (Jas. 3:8-10) Maet hem no isi for olketa brata and sista stretem olketa samting hia, bat James no givap for helpem olketa. Hem kaen taem hem kaonselem olketa and hem encouragem olketa wea needim help for go lo olketa elder. (Jas. 5:13, 14) Wanem iumi lanem: Iumi mas patient witim olketa narawan. Samfala wea iumi studyim Bible witim olketa maet no kwiktaem followim wanem olketa lanem. (Jas. 4:1-4) Maet hem tek taem for changem samfala nogud wei blo olketa. Iumi no hol bak for talem Bible study blo iumi samting wea hem need for stretem. And tu, iumi mas luksavve pipol wea hambol savve change and trustim hao Jehovah savve helpem olketa for mekem olketa change hia.​—Jas. 4:10. w22.01 11 ¶11-12

Evri Christian mas followim example blo Jehovah for showimaot mercy. Why nao olsem? Wanfala reason hem bikos Jehovah bae no lisin lo prea blo olketa wea no showimaot mercy. Iumi laekem Jehovah for lisin lo olketa prea blo iumi, so iumi laek for lisin lo olketa brata and sista wea storyim hard taem wea olketa kasem. Hem gud for tingim disfala toktok lo Bible: “Man wea no showimaot mercy long narawan bae God no showimaot mercy long hem taem hem judgem hem.” (Jas. 2:13) Sapos iumi luksavve iumi needim Jehovah for showimaot mercy lo iumi, datwan bae helpem iumi for showimaot mercy lo narawan. Iumi especially laek for showimaot mercy lo samwan wea reinstate. Olketa example lo Bible abaotem olketa wea kaen and showimaot mercy savve helpem iumi for showimaot mercy. w21.10 12 ¶16-17

Lo naet wea olketa killim dae Jesus, Jesus faendem kwaet ples for hem prea lo garden blo Gethsemane. Lo datfala taem, Jesus talem olketa aposol blo hem important samting abaotem prea. Taem Jesus and olketa aposol kasem garden blo Gethsemane hem barava leit lo naet. Jesus talem olketa aposol for “gohed for lukaot,” and then hem go for prea. (Matt. 26:37-39) Bat taem hem prea, olketa sleep nao. Hem kam bak and wekapem olketa and talem olketa for “gohed for lukaot and prea.” (Matt. 26:40, 41) Hem savve olketa wari and taed tumas and hem luksavve datwan mekem olketa “no strong for duim” wanem olketa laek for duim. Tufala taem moa Jesus go for prea, and each team hem kam bak hem lukim olketa aposol sleep nomoa and no prea.​—Matt. 26:42-45. w22.01 28 ¶10-11