January

From Timothy garem gudfala wei, Jehovah iusim hem for duim staka samting. (Phil. 2:​19-22) Aposol Paul tinghae lo Timothy bikos hem hambol, faithful, waka hard, and Paul savve depend lo hem. Timothy hem evritaem tingim olketa brata and sista. From datwan, Paul lovem Timothy and trustim hem for duim samfala assignment wea no isi. Olsem tu, taem iumi garem olketa gudfala wei, Jehovah bae lovem iumi and iumi savve duim staka samting for helpem olketa brata and sista. (Sams 25:9; 138:​6, SIPB) So prea and ting abaotem samfala wei blo iu wea iu laek for kamap gud lo hem. Then chusim wanfala wea iu laek for waka lo hem. Maet iu laek duim moa samting for helpem olketa brata and sista from iu tingim olketa. Or maet iu laek traem best for stap gud witim olketa narawan and forgivim olketa. Maet hem gud for askem wanfala klos fren for talem eni samting wea iu savve waka lo hem.—Provebs 27:​6, SIPB. w22.04 23 ¶4-5

Jehovah hem laekem iumi for hapi. And iumi savve lo datwan bikos holy spirit savve mekem iumi for hapi. (Gal. 5:22) Bible sei man wea givim samting hem barava hapi winim man wea kasem samting. So iumi hapi taem iumi waka hard lo ministry and helpem olketa brata and sista. (Acts 20:35) Olsem text for tuday storyim, aposol Paul storyim tufala samting wea bae helpem iumi for gohed hapi. First samting, iumi shud duim best blo iumi for Jehovah. Sapos iumi duim best blo iumi for hem, datwan shud mekem iumi hapi. (Matt. 22:​36-38) Mek-tu samting, iumi shud no comparem wanem iumi duim witim wanem olketa narawan duim. Sapos iumi garem gud health, or iumi savve gud hao for duim samfala samting, iumi shud thankiu lo Jehovah for olketa samting hia. And sapos olketa narawan gud lo samfala samting lo ministry winim iumi, iumi shud hapi olketa iusim savve wea olketa garem for praisem Jehovah. w22.04 10 ¶1-2

Olketa gavman bae seknomoa distroem Bigfala Babylon and pipol bae sapraes tumas lo datwan. (Rev. 18:​8-10) Taem Bigfala Babylon distroe, datwan bae affectim full world and maet bae laef hem hard. Bat pipol blo God garem tufala reason for hapi. Disfala enemy blo Jehovah God bae no stap nao, and no longtaem bihaen datwan God bae sevem iumi from disfala nogud world. Daniel storyim hao “stretfala savve” bae “kamap big.” And datwan hem tru bikos iumi minim olketa profesi wea fulfill distaem. (Dan. 12:​4, 9, 10.) Olketa samting hia barava happen olsem olketa profesi talem, and datwan mekem iumi tinghae go moa lo Jehovah and Bible. (Aesaea 46:10; 55:​11, SIPB) So gohed studyim Bible for strongim faith blo iumi, and gohed helpem olketa narawan for fren gud witim Jehovah. Hem bae protectim olketa wea barava trustim hem and bae helpem olketa for ‘stap long pis.’—Aesaea 26:​3, SIPB. w22.07 6-7 ¶16-17

Bible buk Revelation storyim hao Kingdom blo God hem rul finis lo heven and olketa aotem Satan from heven nao. (Rev. 12:​1-9) Datwan minim olketa lo heven garem peace, bat iumi lo earth kasem staka nogud samting. Why nao olsem? Bikos Satan kros tumas and hem attakim pipol wea faithful for worshipim Jehovah lo earth. (Rev. 12:​12, 15, 17) Nomata Satan gohed for attakim iumi, wat nao bae helpem iumi for gohed faithful? (Rev. 13:10) Wanfala samting wea bae helpem iumi, hem for savve lo olketa samting wea bae happen lo future. For example, lo Revelation, John storyim samfala samting wea klosap for happen. Wanfala nao, olketa enemy blo God bae finis. Lo first verse lo Revelation hem sei staka samting wea iumi readim lo Revelation hem “piksarem” or stand for olketa nara samting.—Rev. 1:1. w22.05 8 ¶1-3

From olketa wea faithful for worshipim Jehovah no sapotim “datfala wild animal,” olketa wea againstim Jehovah bae barava kros and olketa kantri bae join tugeta for attakim pipol blo God evriwea lo earth. Wanfala profesi lo Bible sei diswan nao hem attak blo Gog blo Magog. (Esikiel 38:​14, 15, SIPB) Hao nao bae Jehovah feel taem olketa kantri attakim pipol blo hem? Hem sei: “Bae mi barava kros fogud.” (Esikiel 38:​18, 21-23, SIPB) Revelation chapter 19 storyim next samting wea bae happen. Jehovah sendem kam Son blo hem for protectim pipol blo hem and faetem olketa enemy. “Olketa army long heven,” wea hem nao olketa angel and datfala 144,000, bae joinim Jesus lo datfala faet. (Rev. 17:14; 19:​11-15) Olketa hia bae finisim evri organization and pipol wea againstim Jehovah!—Rev. 19:​19-21. w22.05 16-17 ¶9-10

No longtaem bihaen Adam and Eve sin, Jehovah talem wanfala important profesi wea givim hope lo olketa pikinini blo Adam. Datfala profesi hem stap lo Genesis 3:15 hem sei: “Mi bae mekem iu and datfala woman for iutufala heitim iutufala. Pikinini bilong iu and pikinini bilong hem bae tufala heitim tufala tu. Hem bae smasem hed bilong iu, and iu bae killim leg bilong hem.” Datfala profesi hem stap lo first buk lo Bible, bat wanem evri nara buk lo Bible storyim hem join witim datfala profesi. Toktok blo datfala profesi hem olsem glue wea holem tugeta olketa page blo wanfala buk bikos datfala profesi hem joinim tugeta wanem evri buk lo Bible storyim for kamap wanfala message. Datfala message nao hem hao God bae sendem samwan wea bae sevem iumi and distroem Satan and evriwan wea followim hem. Datwan hem blessing for evriwan wea lovem Jehovah. Taem iumi studyim Bible hem bae helpem for lukim hao disfala profesi hem fulfill and gud samting wea bae iumi kasem from datwan. w22.07 14 ¶1-3

Askem Jehovah for givim iufala wisdom mekem iufala helpem pikinini blo iufala for lovem hem. (Jas. 1:5) Jehovah nao best wan wea savve givim advaes. Why nao iumi sei olsem? Bae iumi storyim tufala reason. First reason, Jehovah hem fit for givim advaes bikos hem wanfala dadi. (Sams 36:​9, SIPB) And mek-tu reason, olketa advaes blo hem bae evritaem helpem iumi. (Aesaea 48:​17, SIPB) Jehovah iusim Bible and organization blo hem for givim dadi and mami staka information wea olketa savve iusim for helpem pikinini for lovem Jehovah. (Matt. 24:45) For example, parents savve faendem gudfala advaes lo olketa article wea stap bifor insaed Awake! magasin wea garem title “Help for the Family.” Distaem staka article olsem stap lo sekson “Marit and Famili” lo jw.org. And tu, staka video stap lo jw.org wea savve helpem iufala for followim advaes blo Jehovah taem iufala trainim pikinini blo iufala.—Provebs 2:​4, 5, SIPB. w22.05 27 ¶4-5

Jehovah barava willing for forgivim iumi. First samting, Jehovah laekem tumas for forgivim iumi. Mek-tu samting, hem savve gud lo evri samting abaotem iumi and wanem hem happen lo laef blo iumi, so hem fit for luksavve sapos iumi barava repent. And mek-thri samting, taem Jehovah forgivim iumi, hem bae no tingim moa datfala sin wea iumi duim, and hem olsem iumi nating duim eni sin. Datwan bae helpem iumi for garem gudfala konsens and iumi savve fren bak moa witim hem. Hem tru, from iumi no perfect, bae iumi gohed for duim olketa mistek. Bat iumi savve kasem encouragement from toktok insaed lo Insight on the Scriptures, Volume 2, page 771, wea sei: “Jehovah luksavve pipol blo hem no perfect and hem showimaot mercy lo olketa. So nomata olketa gohed duim olketa mistek from olketa no perfect, olketa no need for barava ting daonem olketa seleva. (Sams 103:​8-14;130:​3, SIPB) Olketa savve hapi from olketa gohed traem best for duim wanem God laekem. (Php 4:​4-6; 1Jo 3:​19-22).” w22.06 7 ¶18-19

Satan iusim olketa gavman for mekem iumi fraet, bat hem duim olketa nara samting tu. Taem samfala kamap Witness, olketa no warim tumas persecution bat olketa warim hao famili bae ting lo olketa. Olketa lovem tumas famili blo olketa and laekem olketa insaed famili for savve and lovem Jehovah. Olketa sorre tumas taem olketa herem olketa lo famili tok daonem Jehovah and pipol blo hem. Samfala taem, olketa lo famili wea duim olsem olketa kam insaed lo truth. Bat hao sapos olketa lo famili les lo iumi and no laek lukim iumi moa? Wat nao bae iumi duim? Toktok wea stap lo Sams 27:10 savve barava comfortim iumi. Sapos iumi tingim hao Jehovah barava lovem iumi, bae iumi no wari or fraet nomata famili les lo iumi. And from iumi no givap, iumi savve sure hem bae blessim iumi. Jehovah nao bae givim evri samting iumi needim, helpem iumi for fren witim hem and for gohed hapi and garem peace! w22.06 16-17 ¶11-13

Taem Jesus duim ministry, samfala accusim hem and sei hem man for kaikai, hem man for drunk, Satan nao givim paoa lo hem, hem nating keepim Sabbath, and hem tok againstim God. (Matt. 11:19; 26:65; Luke 11:15; John 9:16) Bat Jesus no tok kros lo olketa. Olsem Jesus, sapos samwan tok spoelem iumi, iumi no laek for tok kros lo olketa. (1 Pet. 2:​22, 23) Bat hem no isi for kaen taem samwan no kaen lo iumi. (Jas. 3:2) So wanem nao savve helpem iumi? Nomata haosholder hem kros, tingim hao hem need for herem truth. Sam, wanfala brata hem sei, “Mi tingim hao haosholder need for herem truth, and hem fit for change.” Samfala taem maet haosholder kros bikos iumi kam lo rong taem. Taem iumi meetim samwan wea kros, iumi savve prea kwaet and askem Jehovah for helpem iumi for no kros, and for no talem toktok wea no showimaot respect. w22.04 6 ¶8-9

Wanfala important samting for helpem pikinini fren gud witim Jehovah, hem for studyim Bible witim olketa. (2 Tim. 3:​14-17) Bible storyim tu nara wei for olketa young wan savve lane abaotem Jehovah. Lo buk blo Proverbs, wanfala dadi talem son blo hem for no forgetim olketa wei blo Jehovah wea showaot lo creation. (Provebs 3:​19-21, SIPB) Parents, masbi iu hapi tumas for spendem taem for go wakabaot witim pikinini blo iu. Iusim olketa taem olsem for helpem pikinini for luksavve hao olketa nambawan wei blo Jehovah hem showaot klia lo creation blo hem. (Rome 1:20) Jesus iusim creation for teach. Wantaem hem askem olketa disaepol for lukluk lo olketa raven bird and olketa lily flaoa. (Luke 12:​24, 27-30) Hem iusim datwan for teachim olketa disaepol for luksavve hao Dadi blo olketa lo heven hem kaen tumas. Jehovah bae provaedem kaikai and kaleko for olketa faithful servant blo hem lo sem wei wea hem lukaftarem olketa bird and flaoa. w23.03 20-21 ¶1-4

Iumi hapi iumi savve talem olketa prea lo Jehovah lo nem blo Jesus, bikos only thru lo hem Jehovah bae givim iumi wanem iumi askem. Jehovah lisin and ansarem olketa prea wea iumi askem lo nem blo Jesus, and hem forgivim olketa sin blo iumi bikos lo ransom sakrifaes blo Jesus. (Rome 5:1) Bible sei Jesus hem “hae priest” blo iumi, and “hem sidaon long raet saed long throne bilong God long heven.” (Heb. 8:1) Jesus hem stap witim Dadi lo heven “for helpem iumi.” (1 John 2:1) Iumi thankiu lo Jehovah from hem givim iumi Hae Priest wea minim olketa wik point blo iumi, and wea savve “askem God for helpem iumi”! (Rome 8:34; Heb. 4:15) Iumi bae no fit for prea lo Jehovah sapos Jesus no peim ransom sakrifaes. Iumi luksavve Jehovah duim big samting for iumi taem hem givim kam Son blo hem for dae for iumi, and iumi barava tinghae lo datwan! w22.07 23 ¶10-12

Iumi savve trustim samwan wea keepim olketa promis and wea no savve laea lo iumi. (Sams 15:​4, SIPB) And iumi savve depend lo hem. Iumi laekem olketa brata and sista for trustim iumi bat iumi no savve forcem olketa narawan for trustim iumi. Iumi need for duim samting for mekem pipol trustim iumi. Pipol savve sei trust hem olsem selen, bikos iumi mas waka hard for kasem selen, bat hem isi tumas for lusim selen. Jehovah duim staka samting wea mekem iumi fit for “trustim evri samting wea [hem] duim.” (Ps. 33:4) Hem laekem iumi for followim example blo hem. (Eph. 5:1) Iumi thankiu lo Jehovah from iumi insaed famili blo hem wea olketa lovem and trustim each other! Iumi evriwan garem responsibility for duim samting mekem olketa brata and sista trustim iumi. Taem each wan duim best for showimaot love, hambol, garem gudfala tingting, honest, and kontrolem seleva, iumi keepim trust insaed kongregeson. So iumi laek for followim example blo Jehovah, and gohed duim samting wea bae mekem pipol trustim iumi. w22.09 8 ¶1-2; 13 ¶17

Nomata iumi garem staka brata and sista lo kongregeson, samfala taem iumi mas deal witim samfala samting seleva and maet iumi feel olsem no eniwan for helpem iumi. Jehovah no laekem iumi for feel olsem. Hao nao iumi savve lo datwan? Tingim hao Jehovah deal witim profet Elijah. Hem duim samfala samting for helpem Elijah. Hem encouragem Elijah for storyim feeling blo hem. Tufala taem hem askem Elijah: “Wanem nao yu duim long hia?” (Fas Kings 19:​9, 13, SIPB) Lo tufala taem hia Jehovah lisin lo prea blo Elijah. Hem talem Elijah tu hao staka Israelite stap wea still worshipim hem. (Fas Kings 19:​11, 12, 18, SIPB) Masbi Elijah barava hapi bihaen hem storyim feeling blo hem lo Jehovah, and lukim hao Jehovah stap witim hem. Jehovah givim samfala important assignment lo Elijah. Hem askem Elijah for anointim Hazael for king ovarem Syria, Jehu for king ovarem Israel, and anointim Elisha for kamap profet. (Fas Kings 19:​15, 16, SIPB) Olketa assignment wea Jehovah givim lo Elijah helpem hem for garem positive tingting. And tu, Jehovah talem Elisha for waka witim Elijah. w22.08 8 ¶3; 9 ¶5

Waswe, enitaem kongregeson blo iu buildim or renovatim Kingdom Hall blo iufala? Sapos olsem, maet iu no savve forgetim first meeting wea iu attendim lo datfala niu Kingdom Hall. Iu barava tinghae lo wanem Jehovah duim for iufala. Maet from iu hapi tumas iu klosap krae taem evriwan singim firstfala song lo datfala meeting. Olketa naesfala Kingdom Hall blo iumi mekhae lo Jehovah. Bat iumi barava mekhae lo Jehovah taem iumi duim nara waka, wea hem nao for strongim olketa brata and sista wea meet tugeta lo olketa Kingdom Hall hia. Aposol Paul storyim diswan taem hem raetem datfala toktok lo text for tuday. Aposol Paul showimaot nambawan example lo hao for strongim olketa brata and sista. Hem evritaem tingim feeling blo olketa. Iumi savve followim example blo Paul distaem for strongim olketa brata and sista.—1 Cor. 11:1. w22.08 20 ¶1-2

Wanfala Christian wea laek followim olketa standard blo Jehovah bae honest lo evri samting hem duim saed lo bisnis. Hem bae no laek for lukim samwan wea no kasem justice. And tu, “for mekem [Jehovah] hapi,” hem bae evritaem tingim hao Jehovah bae ting lo eni disison wea hem mekem. Jehovah nao savve lo wanem hem stret. Dastawe Bible sei Jehovah hem “ples wea wanem hem stret hem stap.” (Jer. 50:7) From Jehovah Creator blo iumi, hem nomoa fit for disaedem wanem hem stret and no stret. Wanem iumi tingse hem stret and no stret maet no fitim tingting blo Jehovah. (Provebs 14:12; Aesaea 55:​8, 9, SIPB) Bat from God wakem iumi for showimaot olketa wei blo hem, iumi fit for followim olketa raeteous standard blo hem. (Jenesis 1:​27, SIPB) And iumi hapi for duim datwan. From iumi lovem Dadi blo iumi lo heven, iumi traem best for followim wei blo hem.—Eph. 5:1. w22.08 27 ¶5-6

Taem iumi warim samting or discourage, maet iumi laek for duim samting wea mekem iumi for hapi and mekem iumi no tingim olketa wari blo iumi. Nomata olsem, iumi mas careful for no duim samting wea Jehovah heitim. (Eph. 5:​10-12, 15, 16) Lo leta blo Paul for olketa Christian lo Philippi, hem encouragem olketa for gohed tingim olketa samting wea ‘raeteous, klin, and gud.’ (Phil. 4:8) So hem gud for tingim sapos olketa song wea iumi chus for lisin lo hem, olketa movie wea iumi bae watchim, olketa buk wea iumi laek readim, or olketa video game wea iumi bae pleim olketa raeteous, klin, and gud. Datwan bae helpem iumi for luksavve sapos wanem iumi chus for duim hem bae mekem God hapi or nomoa. Iumi laek for followim olketa hae standard blo Jehovah.—Sams 119:​1-3, SIPB. w22.10 9 ¶11-12

Taem olketa laef bifor, samfala pipol wea “no raeteous” duim olketa barava nogud samting. Olketa bae need for lane hao for followim olketa raeteous standard blo Jehovah. For duim datwan, Kingdom blo God bae organizem wanfala bigfala teaching waka wea no happen enitaem bifor. Hu nao bae teachim olketa wea no raeteous? Datfala big crowd and olketa wea raeteous wea laef bak. Olketa wea no raeteous bae need for savve lo Jehovah mekem olketa fren gud witim hem and dedicatem laef blo olketa lo hem. Then Jehovah bae raetem nem blo olketa insaed lo buk blo laef. Jesus and olketa anointed wan bae lukluk gud for lukim sapos olketa hia acceptim wanem olketa lanem. (Rev. 20:4) Sapos samfala no laek duim datwan, nomata olketa kasem 100 years, bae olketa no savve stap lo niu world. (Isa. 65:20) Jehovah and Jesus savve lukim wat nao stap lo heart blo man, and tufala bae mek sure no eniwan bae spoelem laef lo niu world.—Aesaea 11:9; 60:18; 65:​25, SIPB; John 2:25. w22.09 16-17 ¶11-12

Lo disfala verse, “olketa wea rul,” hem minim olketa gavman blo man wea rul ovarem olketa pipol. Olketa Christian mas stap anda lo olketa. Olketa gavman mek sure law and order stap lo kantri, and samfala taem olketa savve defendim pipol blo Jehovah tu. (Rev. 12:16) Dastawe Bible sei iumi mas peim tax, obeyim, and respectim olketa. (Rome 13:7) Bat hem gud for luksavve hao olketa gavman hia garem paoa for rul from Jehovah nao letem olketa. Jesus mekem datfala point klia taem Pontius Pilate, Governor blo Rome, kwestinim hem. Taem Pilate sei hem nao garem paoa for sevem Jesus or judgem hem for dae, Jesus sei lo hem: “Sapos God hem no givim paoa long iu, hard for iu duim eni samting long mi.” (John 19:11) Paoa blo Pilate hem garem spialaen, and hem semsem tu witim olketa gavman distaem. w22.10 14 ¶6

King David raet abaotem laef blo pipol wea bae stap anda lo rul blo wanfala king wea wise and faithful. (Sams 37:​10, 11, 29, SIPB) Taem iumi storyim Paradaes lo pipol, staka taem iumi readim Sams 37:11 (SIPB). Datwan hem fitim bikos Jesus quotem datfala scripture lo Sermon lo Maunten for showimaot datfala scripture bae kamap tru lo future. (Matt. 5:5) Bat toktok blo David showimaot tu hao laef blo pipol lo taem blo King Solomon bae hem gud tumas. Taem Solomon rulim Israel, pipol blo God stap lo peace and garem evri samting olketa needim from land blo olketa “garem staka milk and honey.” God hem sei lo olketa: “Sapos iufala gohed wakabaot followim law . . . , mi bae mekem iufala garem peace lo datfala land, and iufala bae leidaon and no eniwan bae mekem iufala fraet.” (Lev. 20:24; 26:​3, 6) And datwan kamap tru lo taem Solomon hem rul. (1 Chron. 22:9; 29:​26-28) Iumi lukim hao toktok lo Sams 37:​10, 11, 29 (SIPB) hem kamap tru lo bifor, and bae hem kamap tru lo future tu. w22.12 10 ¶8

Iumi olketa tru Christian mas followim direction. Bible givim disfala gud advaes: “Yu wande mekem woa, planem gudfala fastaem. Yu wande winim woa, lisin long plande advaes.” (Provebs 24:​6, SIPB) Tingim hao taem iumi followim disfala principle datwan savve helpem iumi for kamap gud lo preaching and teaching waka blo iumi. Iumi laek for followim direction wea iumi kasem lo hao for duim ministry, and no duim wanem iumiseleva nomoa laekem. Iumi kasem olketa gudfala idea lo olketa Christian meeting from olketa tok and olketa presentation. And tu, organization blo Jehovah provaedem staka gud tul for iumi iusim, olsem olketa pablikeson and video for helpem pipol for minim Bible. Iumi barava hapi for kasem olketa wise advaes wea stap lo Bible! Iumi barava needim datwan for mekem iumi hapi. Iumi laek for followim datfala tru wisdom lo evri samting iumi duim.—Provebs 3:​13-17, SIPB. w22.10 23 ¶18-19

Taem iumi kaikai, datwan savve strongim body blo iumi. Lo sem wei tu, taem iumi studyim Bible and ting raonem, datwan strongim faith blo iumi. Jehovah laekem iumi for minim gud toktok blo hem lo Bible. For iumi duim datwan, first samting, iumi mas prea for redyim heart blo iumi for minim tingting blo God. Then iumi readim samting from Bible, and then tek taem for ting raonem wanem iumi readim. Taem iumi duim olsem, bae iumi minim gud toktok blo God, and datwan bae strongim faith blo iumi. Why nao hem important for readim Bible and ting raonem? Datwan bae strongim iumi for preachim Kingdom message distaem and redi for talemaot wanfala strong judgment message wea maet iumi bae preachim lo future. And tu, taem iumi ting raonem olketa gudfala wei blo Jehovah, iumi bae fren gud witim hem. w22.11 6-7 ¶16-17

Jesus showimaot, ino olketa follower blo hem nomoa bae luksavve lo olketa tru follower blo hem, bat nara pipol tu bae luksavve lo olketa from olketa lovem each other. And love wea pipol blo Jehovah showimaot lo each other hem barava spesol. Nomata olsem, olketa no perfect. (1 John 1:8) Dastawe taem iumi savve gud lo olketa brata and sista, bae hem isi for lukim wik point blo olketa. (Rome 3:23) Sorre samting nao, samfala stambol lo wik point blo olketa nara brata and sista and stop for servem Jehovah. Hao nao Jesus showimaot love lo olketa aposol blo hem? And waswe, bae iumi fit for followim example blo Jesus distaem? Iumi olketa Witness wea baptaes finis tu need for ting raonem olketa kwestin hia. Diswan bae helpem iumi for showimaot love, especially taem iumi deal witim wik point blo each other.—Eph. 5:2. w23.03 26-27 ¶2-4

From iumi klosap lo end blo disfala nogud world, iumi expectim olketa test for kamap insaed lo kongregeson. Olketa test hia savve mekem iumi for no trustim Jehovah. So iumi mas gohed for garem gudfala tingting. If wanfala brata or sista treatim iumi nogud, no kros and blamem God for datwan. If iumi kasem discipline, nomata maet iumi shame, no letem datwan for stopem iumi for acceptim and followim discipline. And taem olketa change kamap lo organization blo Jehovah, iumi laek for acceptim olketa change hia and followim direction. Gohed trustim Jehovah and organization blo hem nomata iumi kasem test. Iumi mas no wari tumas, garem stretfala tingting, and trae for tingim hao Jehovah bae ting lo datfala test. Prea lo Jehovah for helpem iumi. And no stop for associate witim olketa brata and sista lo kongregeson. Then nomata wanem hem happen, Satan bae no savve mekem iumi for lusim Jehovah and organization blo Hem.—Jas. 4:7. w22.11 24-25 ¶14-16

Olketa elder helpem olketa brata sista for prepare bifor eni disaster happen. Olketa mek sure evriwan lo kongregeson savve wat for duim for stap sef and hao for contactim olketa elder. Wat nao iu savve duim? If disaster happen klosap, askem olketa elder wat nao iumi savve duim for help. Maet iumi savve provaedem ples for stap for olketa wea displace or olketa construction volunteer. Or maet iumi savve help for distributim kaikai and olketa nara samting wea olketa pablisa needim. If disaster happen lo nara kantri, hao nao iumi savve help? Iumi savve prea for olketa. (2 Cor. 1:​8-11) Maet iumi savve sapotim relief waka taem iumi givim donation for waka raonem world. (2 Cor. 8:​2-5) If iu fit for go lo ples wea disaster happen for help, askem olketa elder for wat nao iu savve duim. If iu kasem invitation for go, bae iu need for kasem training mekem iu fit for helpem olketa brata and sista. w22.12 24 ¶8; 25 ¶11-12.

Nara Bible transleison, transleitim disfala verse lo text for tuday olsem: “Eni temptation wea kasem iufala, hem semkaen temptation wea savve kasem eni human being.” Paul talem datfala toktok for olketa Christian lo Corinth. Bifor olketa baptaes, samfala lo olketa duim adultery, homosexual, and savve drunk tumas. (1 Cor. 6:​9-11) Hao, iu tingse bihaen olketa baptaes, no enitaem bae olketa garem feeling nao for duim samting wea no stret? Nomoa. Hem tru, evriwan anointed Christian, bat olketa man nomoa wea no perfect. So olketa stragol tu samfala taem witim feeling for laek duim samting wea no stret. Datwan encouragem iumi bikos diswan showimaot if iumi stragol witim wanfala wik point, samwan winim finis datfala wik point. Tru nao, iumi savve ‘garem strongfala faith, from iumi savve olketa brata bilong iumi evriwea long world tu safa long olketa sem samting wea iumi safa long hem.’—1 Pet. 5:9. w23.01 12 ¶15

Jesus askem Jehovah for lukaftarem olketa follower blo hem. (John 17:11) Why nao datwan helpem iumi for no fraet? Bikos Jehovah hem strong winim eni enemy blo iumi. (1 John 4:4) Jehovah hem lukim evriting. Iumi barava sure taem iumi depend lo Jehovah, hem bae helpem iumi for no fraet and for gohed strong. Waswe lo skul or waka ples, iu shame for talem iu wanfala Jehovah’s Witness? Waswe, iu hol bak for anbaptaes pablisa or for baptaes bikos iu warim tingting blo pipol? No letem olketa feeling olsem stopem iu for duim samting wea iu savve hem stret. Prea strong lo Jehovah abaotem datwan. Askem hem for helpem iu for no fraet for duim wat hem laekem. Taem iu lukim Jehovah ansarem olketa prea blo iu, datwan bae strongim iu go moa and for no fraet.—Isa. 41:​10, 13. w23.01 29 ¶12; 30 ¶14

Jesus askem kwestin hia “Hao, no enitaem iufala read abaotem?” for showim hao olketa Pharisee garem rong idea abaotem wat olketa readim lo olketa Holy Raeting. (Matt. 12:​1-7) Lo dat taem, olketa Pharisee sei olketa disaepol blo Jesus brekem law blo Sabbath. Jesus ansarem olketa taem hem quotem tufala example lo olketa Holy Raeting, and wanfala verse from Hosea for showim hao olketa Pharisee nating minim why law blo Sabbath stap, and olketa nating showim mercy. Why nao olketa man hia no change followim wat olketa readim insaed Word blo God? Bikos taem olketa read, olketa praod and laek nomoa for judgem narawan. From datwan, olketa no minim nao wat olketa readim. (Matt. 23:23; John 5:​39, 40) Lukim tu Matthew 19:​4-6, wea Jesus askem sem kwestin tu lo olketa Pharisee: “Hao, iufala no readim?” Nomata olketa readim story abaotem creation, olketa nating acceptim tingting blo God abaotem marit. Story blo Jesus helpem iumi for luksavve hao taem iumi readim Bible hem important for iumi hambol. Iumi no olsem olketa Pharisee, bat iumi mas hambol and willing for lane. w23.02 12 ¶12-13

Jehovah givim olketa law lo olketa Israelite for helpem olketa for avoidim olketa serious accident lo haos and taem olketa waka. (Ex. 21:​28, 29; Deut. 22:8) If samwan killim dae narawan and hem no min for duim, datwan hem serious samting. (Deut. 19:​4, 5) Law sei if samwan killim dae baby wea no born yet nomata hem no min for duim, hem mas kasem panis. (Ex. 21:​22, 23) Bible showimaot klia Jehovah laekem iumi for tingim safety. Iumi showimaot iumi tinghae lo laef wea hem present from God taem iumi tingim safety lo haos and lo waka. If iumi torowem olketa samting wea sharp, chemical wea poison, or medicine, mek sure iumi torowem lo ples wea bae no spoelem eniwan, and keepim olketa samting olsem lo ples wea sef from olketa pikinini. Iumi need for careful taem iumi laetem fire, boelem wata, and iusim olketa paoa tul. Iumi bae no draev if medicine, alcohol, or wei wea iumi taed hem affectim tingting blo iumi and hem mekem hem no sef for draev. And tu, no iusim phone taem iumi draev. w23.02 21-22 ¶7-9

Jehovah hem patient, kaen, and minim iumi. Hem evritaem luk lo gud saed blo student blo hem. (Sams 130:​1-3, SIPB) Hem no expectim iumi for duim wanem iumi no fit for duim. Tingim, hem nao designim brain blo iumi, wea hem nambawan present. (Sams 139:​14, SIPB) Creator blo iumi laekem iumi for gohed lane for olowe and barava enjoyim datwan. So start distaem, hem gud for “lane for barava laekem” olketa Bible teaching. (1 Pet. 2:2) Markem olketa goal wea iu fit for kasem, and followim schedule for readim and studyim Bible. (Josh. 1:8) Witim help blo Jehovah, iu bae barava enjoy for read and gohed lane abaotem hem. For garem savve hem no inaf. Bat savve hem important bikos hem helpem iu for lane abaotem Jehovah and garem olketa gudfala wei, olsem for lovem and garem faith lo hem. (1 Cor. 8:​1-3) Taem iu gohed lane, gohed prea and askem Jehovah for helpem iu garem moa faith. (Luke 17:5) Hem hapi for ansarem kaen prea olsem. w23.03 10 ¶11, 13

Jesus laekem olketa disaepol blo hem for busy taem olketa weitim Jerusalem and temple for distroe. So Jesus givim waka for olketa duim. Hem komandim olketa for preachim gud nius “long Jerusalem, long evri ples long Judea and long Samaria, and long evri farawe ples long earth.” (Acts 1:​6-8) Datwan hem bigfala waka! Taem olketa busy for preach lo olketa narawan, olketa iusim gud taem blo olketa. For lukluk gud lo iumiseleva, iumi need for tingting gud abaotem hao iumi iusim taem blo iumi. “Olketa samting wea iumi no expectim” savve happen lo iumi. (Eccl. 9:11) And iumi savve dae lo enitaem nomoa. Iumi savve iusim gud taem blo iumi, taem iumi duim wanem Jehovah laekem and strongim frenship blo iumi witim hem. (John 14:21) Iumi need for ‘faithful and gohed strong and evritaem busy long waka bilong Lord.’ (1 Cor. 15:58) Then if iumi dae or end blo disfala nogud world hem kam, iumi bae no regret bikos iumi iusim gud taem blo iumi.—Matt. 24:13; Rome 14:8. w23.02 18-19 ¶12-14