February

Wat nao text for tuday hem minim? Jesus gohed explainim hao love bae mekem wanfala Christian for willing for dae for nara Christian. Bible teachim iumi hao love hem barava important. For example, diswan hem samfala fevaret scripture blo staka pipol. “God hem love.” (1 John 4:8) “Iu mas lovem narawan long sem wei wea iu lovem iuseleva.” (Matt. 22:39) “Man wea garem love hem evritaem willing for forgivim narawan.” (1 Pet. 4:8) “Love no savve finis.” (1 Cor. 13:8) Olketa scripture hia and olketa nara scripture mekem iumi luksavve hao hem important for garem and showimaot love. Trufala love hem kam from Jehovah, and olketa wea kasem blessing and spirit blo hem nomoa savve showimaot trufala love lo each other. (1 John 4:7) Dastawe Jesus sei olketa follower blo hem nomoa bae garem trufala love for each other. Olsem Jesus talem, staka pipol luksavve lo olketa tru follower blo hem bikos olketa lovem each other. w23.03 27-28 ¶5-8

Sapos iu faendem hard for forgivim narawan and iu laek for waka lo datwan, iu savve readim and ting raonem example blo samfala lo Bible wea willing for forgivim narawan and olketa wea no willing for forgive. For example, Jesus willing for forgivim olketa narawan. (Luke 7:47) Hem no tingim wik point blo olketa bat hem tingim wanem olketa fit for duim. Bat olketa Pharisee barava difren bikos olketa savve “ting daonem nara pipol.” (Luke 18:9) Taem iumi ting raonem tufala example hia, tingim: ‘Taem mi tingim narawan, waswe, mi tingim gud saed blo hem or wik point blo hem nomoa?’ Sapos hem no isi for forgivim samwan, raetem list blo olketa gudfala wei blo hem. Then tingim: ‘Hao nao Jesus bae ting lo disfala man? Hao, bae hem forgivim hem?’ Sapos iumi duim olsem, datwan savve helpem iumi for changem tingting blo iumi abaotem hem. Maet firstaem hem no isi for forgivim samwan wea mekem iumi feel nogud, bat sapos iumi gohed waka hard lo datwan gogo bae iumi forgivim hem. w22.04 23 ¶6

Lo Bible buk Revelation, iumi read abaotem samfala wild animal wea stand for olketa enemy blo God. For example, “wanfala wild animal hem kamaot from sea,” and hem garem “tenfala horn and sevenfala hed.” (Rev. 13:1) Then “nara wild animal hem kamaot from earth,” wea toktok blo hem olsem wanfala big snek and hem mekem “fire kam daon from skae.” (Rev. 13:​11-13) Then iumi read abaotem nara “wild animal wea kala bilong hem red” and wanfala jury woman hem sidaon antap lo hem. Thrifala wild animal hia stand for olketa enemy wea againstim Jehovah God and Kingdom blo hem for longtaem finis. So hem important for iumi savve hu nao olketa enemy hia. (Rev. 17:​1, 3) Samting wea bae helpem iumi for savve, hem for lukluk lo olketa nara buk lo Bible wea explainim mining blo olketa wild animal hia. w22.05 8-9 ¶3-4

Maet samfala no savve duim wanem olketa laek for duim for Jehovah from olketa olo or sik, and diswan savve mekem olketa discourage. Sapos iu discourage from iu no savve duim wanem iu laek for duim, hem gud for tingim Jehovah laekem iu for duim nomoa wanem iu fit for duim. Tingim disfala example. Wanfala sista wea hem 80 years hem discourage bikos hem no savve duim staka samting lo ministry olsem hem duim taem hem 40 years. Nomata hem duim wanem hem fit for duim, hem tingse Jehovah no hapi lo datwan. Bat waswe, datwan hem tru? Nomoa. Datfala sista duim wanem hem fit for duim taem hem 40 years, and nomata hem 80 years distaem hem gohed for duim best blo hem. Sapos iumi tingse wanem iumi duim for Jehovah hem no inaf for mekem hem hapi, hem gud for tingim hao Jehovah luksavve iumi duim best blo iumi and hem hapi lo datwan. Hem olsem Jehovah sei lo iumi: “Gud tumas! Iu barava faithful long wanem iu duim.” (Comparem Matthew 25:​20-23.) Bae iumi hapi sapos iumi tingim wanem iumi fit for duim and no tingting tumas abaotem wanem iumi no fit for duim. w22.04 10 ¶2; 11 ¶4-6

Revelation chapter 21 storyim “Niu Jerusalem,” wanfala taon wea luk naes tumas wea piksarem datfala 144,000. Faondeson blo datfala taon hem 12-fala ston wea “twelvfala nem bilong twelvfala aposol bilong datfala Pikinini Sheepsheep” stap long olketa ston hia. (Rev. 21:​10-14; Eph. 2:20) Datfala taon hem luk spesol tumas. God wakem main road blo datfala taon lo gold, and 12-fala gate blo taon hia, hem 12-fala pearl. God wakem olketa faondeson and wall lo olketa difren kaen spesol ston, and evri measurement blo olketa samting hia hem stret. (Rev. 21:​15-21) Bat John luksavve wanfala samting hem no stap lo datfala taon! Hem sei: “Mi no lukim eni temple long datfala taon bikos Jehovah . . . and datfala Pikinini Sheepsheep, tufala nao temple bilong datfala taon. Datfala taon no needim sun or moon for shaen long hem bikos glory bilong God nao shaen long hem, and datfala Pikinini Sheepsheep nao laet bilong hem.” (Rev. 21:​22, 23) So Niu Jerusalem wea piksarem datfala 144,000 no needim temple bikos olketa stap witim Jehovah.—Heb. 7:27; Rev. 22:​3, 4. w22.05 17 ¶14-15

Jehovah hem Creator and Judge, and hem givim iumi olketa law, bat hem Dadi wea lovem iumi tu. (Sams 100:3; Aesaea 33:​22, SIPB) Taem iumi sin againstim hem then iumi sorre and repent, hem savve forgivim iumi and hem laek for forgivim iumi tu. (Sams 86:​5, SIPB) Jehovah iusim profet Isaiah for encouragem iumi. Hem sei: “Nomata sin blong yufala hemi . . . olsem blad long waet kaleko, bat mi save mekem yufala fo kamap barava klin nomoa olsem snou.” (Aesaea 1:​18, SIPB) From iumi no perfect, iumi evriwan savve talem or duim samting wea mekem narawan feel nogud. (Jas. 3:2) Nomata olsem, iumi savve gohed fren gud witim olketa, sapos iumi willing for forgive. (Provebs 17:9; 19:​11, SIPB; Matt. 18:​21, 22) Sapos samwan talem or duim samting wea mekem iumi feel nogud, Jehovah laekem iumi for forgivim hem. And iumi shud forgivim hem bikos Jehovah forgivim iumi staka taem.—Aesaea 55:​7, SIPB. w22.06 8 ¶1-2

Iumi no laek comparem iumiseleva witim olketa narawan, bat iumi savve lane from example blo olketa wea faithful. Tingim example blo Jesus. Nomata iumi no perfect olsem Jesus, iumi savve lane from olketa gudfala samting wea hem duim and followim wei blo hem. (1 Pet. 2:21) Taem iumi waka hard for followim example blo hem, datwan bae helpem iumi for garem gudfala wei. Bible storyim staka faithful man and woman wea iumi savve followim example blo olketa, nomata olketa no perfect. Wanfala example hem King David, Jehovah sei hem man wea ‘barava wan mind witim hem.’ (Acts 13:22) Bat David hem duim samfala big sin tu. Nomata olsem, hem wanfala gud example wea iumi savve followim. Why nao olsem? Bikos hem no trae for denyim wanem hem duim, hem acceptim kaonsel and hem sorre lo wanem hem duim. From datwan, Jehovah forgivim hem.—Sams 51:​3, 4, 10-12, SIPB. w22.04 13 ¶11-12

Bible sei dae hem wanfala enemy. (1 Cor. 15:​25, 26) Taem iumi or samwan wea iumi lovem hem sik big, iumi savve fraet tumas nogud iumi or olketa bae dae. Why nao hem normal samting for iumi fraet for dae? Bikos Jehovah wakem iumi for laef olowe, so iumi no laek for dae. (Eklesiastes 3:​11, SIPB) And datfala feeling savve protectim laef blo iumi. From iumi no laek for dae iumi maet disaed for kaikaim healthy kaikai and for exercise. And taem iumi sik bae iumi go lukim doctor and tekem medicine. And tu, iumi bae no putim laef blo iumi lo danger. Satan savve iumi no laek for dae. And hem sei iumi bae willing for duim eni samting for sevem laef blo iumi, nomata for duim samting wea bae mekem iumi no faithful lo Jehovah tu. (Job 2:​5, SIPB) Bat hem no tru! Nomata olsem, from Satan garem paoa for “mekem pipol for dae,” hem iusim datfala feeling for no laek dae for trae mekem iumi no obeyim Jehovah.—Heb. 2:​14, 15. w22.06 18 ¶15-16

Taem gavman banim waka blo iumi, maet iumi need for meet lo olketa smol grup. So hem barava important for stap gud witim evri brata and sista. Iumi faet againstim Satan, no faetem each other. Hem gud for forgivim each other and kwiktaem stretem problem witim narawan. (Provebs 19:​11, SIPB) Stanbae for helpem each other. (Titus 3:14) Wanem wanfala field service grup duim for helpem wanfala sista, hem mekem evriwan insaed datfala grup for fren gud tugeta olsem famili. (Sams 133:​1, SIPB) Staka thousand brata and sista gohed faithful for worshipim Jehovah nomata olketa stap lo kantri wea gavman banim waka blo iumi. Olketa putim samfala lo olketa lo prison. Iumi savve prea for olketa hia, famili blo olketa, and olketa brata and sista wea putim laef blo olketa lo danger for sapotim olketa lo spiritual wei, provaedem wanem olketa needim, and defendim olketa lo kot. (Col. 4:​3, 18) Tingim, olketa prea blo iumi savve barava helpem olketa!—2 Thess. 3:​1, 2; 1 Tim. 2:​1, 2. w22.12 26-27 ¶15-16

Staka taem olketa pikinini bae followim wanem dadi and mami duim. Hem tru, olketa dadi and mami no perfect. (Rome 3:23) Nomata olsem, olketa shud traem best for showim gud example lo pikinini blo olketa. Wanfala dadi sei: “Olsem pis matres hem isi for sakem wata, olketa pikinini tu bae followim wanem parents duim. And sapos parents no duim wanem olketa teachim pikinini for duim, pikinini bae luksavve lo datwan.” So sapos parents laekem pikinini for lovem Jehovah, pikinini mas luksavve olketa barava lovem Jehovah tu. Staka difren wei hem stap for parents helpem pikinini for lovem Jehovah. Andrew, wanfala brata wea 17 years, hem sei: “Evritaem parents blo mi teachim mi hao hem barava important for prea. Evri naet dadi bae prea witim mi, nomata maet miseleva prea finis. . . . Distaem mi laekem tumas for prea lo Jehovah bikos mi tingim hao hem Dadi blo mi wea barava lovem mi.” Parents tingim, from iu lovem Jehovah, datwan bae helpem olketa pikinini blo iu for lovem hem tu. w22.05 28 ¶7-8

For iumi redi for baptaes, wanfala lo olketa first samting wea iumi mas duim, hem for barava repent from olketa sin blo iumi. (Acts 2:​37, 38) Trufala wei for repent helpem man for really change. Waswe, iu lusim finis olketa wei wea Jehovah no hapi lo hem, olsem for durong, iusim tobacco, or swear or tok nogud? (1 Cor. 6:​9, 10; 2 Cor. 7:1; Eph. 4:29) Gohed trae for change. Story witim man wea study witim iu, or askem olketa elder lo kongregeson for helpem iu and givim advaes. If iu young and stap yet witim parents, askem tufala for helpem iu lusim eni nogud wei wea iu garem wea maet stopem iu for baptaes. Hem important tu for followim gudfala spiritual schedule. Datwan minim for attendim and tek part lo olketa meeting. (Heb. 10:​24, 25) And taem iu qualify for join lo ministry, mekem datwan part lo schedule blo iu tu. w23.03 10-11 ¶14-16

Profesi lo Jenesis 3:​14, 15 (SIPB) storyim wanfala “snek,” and “pikinini” blo datfala snek. Sapos hem wanfala real snek, hard for hem minim toktok wea Jehovah talem lo garden blo Eden. So snek wea Jehovah story lo hem, hem mas samwan wea garem tingting. Hu nao datwan? Revelation 12:9 talem klia hao “datfala snek bilong bifor kam,” hem nao Satan. Samfala taem Bible iusim datfala toktok “pikinini” for minim olketa wea followim tingting and wei blo samwan, wea datwan mekem olketa for olsem pikinini blo hem. So pikinini blo datfala snek hem piksarem olketa angel wea no faithful and olketa man wea followim tingting and wei blo Satan, wea againstim God and pipol blo Hem. So olketa angel hia nao hem olketa angel wea lusim assignment blo olketa lo heven lo taem blo Noah, and olketa nogud pipol wea wei blo olketa hem olsem dadi blo olketa Satan.—Jenesis 6:​1, 2, SIPB; John 8:44; 1 John 5:19; Jude 6. w22.07 14-15 ¶4-5

Aposol Paul lovem tumas olketa brata and sista blo hem. Hem kasem staka hard taem lo laef blo hem, so hem minim feeling blo olketa and sorre lo olketa taem olketa feisim hard taem. Wantaem, from Paul short lo selen hem mas faendem waka for selen for sapotim hemseleva and olketa fren blo hem. (Acts 20:34) Waka blo Paul hem for wakem tent, so taem hem arrive lo Corinth hem waka witim Aquila and Priscilla wea tufala tu wakem tent. Bat lo “evri Sabbath” hem savve preach lo olketa Jew and pipol blo Greece. Then taem Silas and Timothy arrive, Paul “barava busy nao for preachim message bilong God.” (Acts 18:​2-5) Diswan showimaot Paul garem balance tingting abaotem waka, and worship blo hem for Jehovah nao main samting lo laef blo hem. So Paul fit for encouragem olketa brata and sista. Hem remindim olketa hao hard taem and waka for provaed for famili, shud no stopem olketa for duim olketa “barava important” samting, wea hem nao for worshipim Jehovah. w22.08 20 ¶3

Distaem God laekem pipol blo hem for talemaot gud nius abaotem Kingdom lo pipol lo evri kantri lo world. (1 Tim. 2:​3, 4) Diswan hem waka blo Jehovah and hem barava important, dastawe hem markem spesol Son blo hem for leadim disfala waka. From Jesus nao leadim preaching waka, iumi savve sure waka hia bae gohed gud olsem hao Jehovah laekem bifor world hem finis. (Matt. 24:14) Hao nao iumi sure Jesus hem leadim preaching waka? No longtaem bifor Jesus go bak lo heven, Jesus story witim samfala lo olketa faithful disaepol blo hem lo wanfala maunten lo Galilee. Hem sei lo olketa: “God givim paoa long mi ovarem evri samting long heven and earth.” Tingim next samting wea hem talem: “Iufala go and teachim pipol long evri kantri for kamap disaepol bilong mi.” (Matt. 28:​18, 19) So God givim paoa lo Jesus for leadim disfala preaching waka. And Jesus gohed leadim datfala preaching waka kam kasem taem blo iumi distaem. w22.07 8 ¶1, 3; 9 ¶4

Taem olketa wea raeteous wea duim gud samting olketa laef bak, olketa bae garem chance for “kasem laef olowe” bikos nem blo olketa hem stap finis insaed buk blo laef. So taem John 5:29 sei olketa wea “duim gud samting” bae laef bak, hem storyim sem samting wea Acts 24:15 storyim, taem hem sei “pipol wea raeteous” bae laef bak. Hao iumi minim diswan distaem hem join witim wanem Rome 6:7 storyim, wea sei: “Man wea dae, hem no guilty nao long olketa sin bilong hem.” So Jehovah hem forgivim eni sin wea olketa raeteous wan hia duim bifor olketa dae, and bae hem no forgetim tu olketa gud samting wea olketa duim bifor. (Heb. 6:10) Nomata olsem, olketa wea raeteous wea laef bak mas gohed faithful mekem nem blo olketa gohed for stap lo datfala buk blo laef. w22.09 17-18 ¶13, 15

Profet Daniel hem gud example lo samwan wea pipol trustim. Nomata hem stap lo Babylon olsem prisoner, pipol lo there trustim hem. Pipol trustim hem go moa taem Jehovah helpem hem for talem mining lo dream blo Nebuchadnezzar, King blo Babylon. (Daniel 4:​20-22, 25, SIPB) Staka year bihaen, Daniel talem mining blo wanfala spesol message wea appear lo wall blo palace blo King blo Babylon. (Daniel 5:​5, 25-29, SIPB) Bihaen datwan, Darius blo Media and olketa bigman wea waka witim hem tu luksavve Daniel hem barava spesol man and ‘pipol save trastem hem, an hemi nating talem o duim eni nogud samting.’ (Daniel 6:​3, 4, SIPB) Hem gud for tingim: ‘Waswe, pipol trustim iumi?’ Taem pipol trustim iumi datwan mekhae lo Jehovah. w22.09 8-9 ¶2-4

Iumi savve kasem gud samting taem iumi followim wanem Jehovah sei hem stret and no stret. Why nao olsem? Tingim, standard hem stap lo hao for wakem wanfala building. Bat hao sapos evri construction company followim own standard blo olketa? Datwan bae mekem evri samting olobaot. And tu, olketa doctor and nurse garem olketa rul lo hao for lukaftarem olketa wea sik. Sapos olketa no followim olketa rul hia, maet datwan mekem samfala sik man for dae. Hem tru, olketa rul or standard savve protectim iumi. Olsem tu, olketa standard blo God abaotem wanem hem stret and no stret hem for protectim iumi. Olketa wea traem best for followim olketa standard blo Jehovah bae kasem blessing from hem. Jehovah sei: “Bae olketa stretfala pipol i onam lan wea [Jehovah] hemi bin promisim fo olketa, an bae olketa stap long hem olowe.” (Sams 37:​29, SIPB) Tingim hao taem evriwan followim olketa standard blo Jehovah iumi bae wan mind, garem peace, and hapi. Hem nao laef wea Jehovah laekem iumi for garem. So iumi evriwan garem gudfala reason for tinghae lo olketa raeteous standard blo Jehovah! w22.08 27 ¶6-8

Taem iumi feisim olketa test, maet iumi start for lusim trust blo iumi lo Jehovah and organization blo hem. For no duim datwan, iumi need for gohed lukaot and garem gudfala tingting, mekem iumi gohed for faithful. Taem iumi feisim test, iumi bae gohed garem gudfala tingting taem iumi no wari tumas, garem stretfala tingting, and tingim hao Jehovah bae ting lo datfala test. Taem iumi duim olsem, bae iumi fit for kontrolem feeling blo iumi. Maet iumi ting dat wanfala brata or sista treatim iumi nogud, maet hem samwan lo kongregeson olsem wanfala elder. Maet datfala brata no min for spoelem feeling blo iumi. (Rome 3:23; Jas. 3:2) Nomata olsem, wanem hem duim maet mekem iumi kros. Maet datwan savve mekem iumi start for daotem organization blo God. Kaen tingting olsem nao Satan laekem iumi for garem. (2 Cor. 2:11) Gogo, datwan savve mekem iumi for lusim Jehovah and organization blo hem. So iumi mas no letem datwan mekem iumi kros and blamem God. w22.11 20 ¶1, 3; 21 ¶4

Jehovah givim iumi nambawan hope for laef olowe. Samfala hope for laef olowe lo heven and garem body wea no savve dae. (1 Cor. 15:​50, 53) Bat staka garem hope for laef olowe lo earth. Olketa bae healthy and hapi tumas. (Rev. 21:​3, 4) Nomata iumi luk forward for laef olowe lo heven or lo earth, datfala hope hem spesol lo iumi. Iumi sure hope blo iumi for future bae kamap tru bikos Jehovah nao promisim datwan. (Rome 15:13) Iumi savve lo olketa promis blo hem, and iumi savve wat hem promisim hem evritaem kamap tru. (Nambas 23:​19, SIPB) Iumi sure Jehovah laek for duim wanem hem promisim and hem garem paoa for duim datwan. Dadi blo iumi lo heven lovem iumi, and hem laekem iumi for trustim hem. Taem iumi trustim Jehovah and sure lo hope wea iumi garem, iumi savve deal witim olketa hard taem and bae iumi no fraet and bae gohed hapi nomata wanem hem happen. w22.10 24 ¶1-3

From olketa les for obeyim Jehovah, Isaiah sei Jehovah bae letem olketa for kasem trabol. (Isa. 30:​5, 17; Jer. 25:​8-11) And datwan happen taem olketa lo Babylon tekem olketa Jew go lo Babylon olsem prisoner. Bat samfala Jew hia faithful lo Jehovah and Isaiah sei wanday Jehovah bae helpem olketa for go bak moa lo Jerusalem. (Isa. 30:​18, 19) And hem nao wanem Jehovah duim taem hem mekem olketa free from Babylon. Bat datwan no happen stretawe. Taem Isaiah sei “Jehovah hem patient for weit for showim kaen fasin lo iufala,” datwan showim samfala year bae go pas bifor Jehovah sevem olketa. Olketa Israelite stap lo Babylon for 70 year bifor samfala lo olketa savve go bak lo Jerusalem. (Isa. 10:21; Jer. 29:10) Olketa Israelite barava sorre, bat taem olketa go bak lo homland blo olketa, olketa hapi tumas. w22.11 9 ¶4

Distaem, olketa brata and sista lo staka kantri kasem persecution. Olketa olsem olketa aposol lo first century wea kasem persecution from olketa preach abaotem Jesus. Staka taem olketa judge lo hae kot blo olketa Jew talem “olketa for no story long nem bilong Jesus.” (Acts 4:​18-20; 5:​27, 28, 40) Bat olketa savve God ‘talem olketa for mas preach long pipol and for witness long evriwan’ abaotem Christ. (Acts 10:42) So Peter and John sei olketa aposol bae obeyim God winim olketa judge and olketa bae no stop for story abaotem Jesus. (Acts 5:29) Bihaen datwan olketa whipim olketa aposol, then olketa go aot from hae kot. Bat “olketa hapi nomoa from olketa savve God nao letem datwan for kasem olketa bikos olketa faithful for followim Jesus,” and olketa gohed for preach!—Acts 5:​41, 42. w22.10 12-13 ¶2-4

Taem iumi lane abaotem Jehovah, first samting iumi lanem hem olketa main teaching. Lo leta blo hem for olketa Hebrew Christian, aposol Paul kolem olketa main teaching, “olketa first samting” wea iumi lanem. Taem hem comparem olketa main teaching hia witim milk for strongim baby, datwan no minim hem tok daonem. (Heb. 5:12; 6:1) Bat hem encouragem evri Christian for no just gohed lanem nomoa olketa main teaching bat for lanem olketa deep teaching insaed Bible. Waswe, iu laekem tumas for lanem olketa deep teaching lo Bible? Waswe, iu willing for gohed lanem moa samting abaotem Jehovah and olketa plan blo hem? Bat staka lo iumi faendem hem hard for study. Hao, iu feel olsem tu? Taem iu lo skul, waswe, iu lane for read gud and study? Waswe, iu enjoyim wei for study and kasem gud samting from datwan? Or iu feel dat wei for study hem hard tumas for iu? Sapos iu feel olsem, ino iuseleva. Nomata olsem, Jehovah savve helpem iu. Hem perfect and hem nao best Teacher. w23.03 9-10 ¶8-10

If iumi hambol, bae iumi letem Bible for changem wei blo iumi. Iumi mas no praod or judgem narawan taem iumi readim Bible bikos datwan savve stopem iumi for lanem samting abaotem mercy, feel sorre lo pipol, and for showimaot love. Hao iumi treatim narawan bae showim if iumi letem Bible for changem iumi. From olketa Pharisee no letem Word blo God kasem heart blo olketa, olketa “judgem olketa wea no guilty.” (Matt. 12:7) Lo sem wei tu, hao iumi ting lo olketa narawan and treatim olketa bae showim if iumi letem Bible for changem iumi. For example, waswe, hem wei blo iumi for storyim gudfala wei blo olketa narawan, or wik point blo olketa? Hao, iumi showim mercy and willing for forgive, or iumi judgem narawan and gohed for keepim kros? Ansa for olketa kwestin hia bae showim if iumi letem Bible for sheipim tingting, feeling, and wanem iumi duim.—1 Tim. 4:​12, 15; Heb. 4:12. w23.02 12 ¶13-14

Tingim example blo Joseph blo Arimathea. Pipol blo Jew bifor tinghae lo hem. Hem member blo Sanhedrin, wea hem hae kot blo olketa Jew. Bat taem Jesus duim ministry, Joseph fraet for showimaot dat hem followim Jesus. John sei “hem disaepol bilong Jesus bat hem no talem eniwan bikos hem fraetem olketa Jew.” (John 19:38) Nomata Joseph interest lo Kingdom message, hem no laekem eniwan for savve hem garem faith lo Jesus. Luk olsem hem fraet nogud hem lusim hae position blo hem lo community. Nomata wat nao reason, Bible sei bihaen Jesus dae, “nomata [Joseph] fraet lelebet for go long Pilate, . . . hem go long hem and ask for body bilong Jesus.” (Mark 15:​42, 43) Lo datfala taem, Joseph showimaot klia hem wanfala disaepol blo Jesus. Waswe, iu tu olsem Joseph wea fraet lo man? w23.01 30 ¶13-14

Queen blo Sheba herem hao anda lo rul blo Solomon olketa Israelite stap lo peace and garem staka samting. Datfala queen kam lo Jerusalem from farawe ples for lukim seleva situation lo there. (1 Ki. 10:1) Bihaen hem lukluk lo evri samting lo kingdom blo Solomon, hem talem toktok lo text blo iumi for tuday. Datfala queen lukim hao laef anda lo rul blo Solomon hem gud tumas. Bat datwan hem example nomoa lo wanem Jehovah bae duim for pipol wea bae stap anda lo rul blo Son blo Hem, Jesus. Jesus hem winim Solomon lo staka difren wei. Solomon no perfect and hem duim olketa nogud samting wea mekem pipol blo God safa. Bat Jesus hem no duim eni sin and hem wanfala perfect Ruler. (Luke 1:32; Heb. 4:​14, 15) Christ pruvim hao hem bae no sin or duim eni samting wea bae mekem olketa wea stap anda lo rul blo hem for safa. Jesus hem nambawan King blo iumi. w22.12 11 ¶9-10

Wat nao iumi shud duim if wanfala sik spred lo community? Iumi shud obeyim olketa direction from gavman olsem for wasim hand, social distancing, werem mask, and for quarantine. Taem iumi duim olketa samting hia, iumi showimaot iumi barava tinghae lo laef wea hem present from God. Taem wanfala disaster happen, samfala taem iumi savve herem samfala information wea no tru from olketa fren, olketa narawan, and lo nius. Hem gud for no bilivim “enisamting” nomoa wea iumi herem, bat iumi shud lisin lo olketa information wea iumi savve trustim from gavman and olketa doctor. (Provebs 14:​15, SIPB) Governing Body and olketa branch office duim best for mek sure information wea olketa kasem hem stret bifor olketa givim direction abaotem olketa meeting and preaching waka. Taem iumi followim direction, iumi protectim iumiseleva and olketa narawan. Iumi help tu for mekem olketa narawan garem gudfala tingting abaotem pipol blo Jehovah.—1 Pet. 2:12. w23.02 23 ¶11-12

Lo Promis Land, olketa Israelite stay lo barava big area. From datwan, maet olketa Israelite wea stap lo wanfala part lo Promis Land bae no kea abaotem olketa nara Israelite wea stap lo nara part Promis Land. Bat Jehovah mekem arrangement for evri Israelite for hipap tugeta samfala taem for herem olketa priest readim and explainim Word blo hem wea olketa raetem. (Deut. 31:​10-12; Neh. 8:​2, 8, 18) Tingim go feeling blo wanfala faithful Israelite taem hem arrive lo Jerusalem, and lukim maet staka million narawan wea worshipim Jehovah wea kam from evri nara part lo kantri! Datwan barava helpem pipol blo Jehovah for gohed wan mind. Lo taem blo Christian kongregeson, olketa man and woman wea insaed lo kongregeson iusim difren languis and garem difren baekgraon. Bat olketa wan mind for worshipim tru God. Only wei for olketa Christian savve minim Word blo God hem for kasem help from olketa nara Christian and for hipap tugeta witim olketa.—Acts 2:42; 8:​30, 31. w23.02 3 ¶7

Jehovah promisim hao olketa wea obeyim hem bae kasem “laef olowe.” (Rome 6:23) Taem iumi ting raonem datfala promis for laef olowe, datwan strongim love blo iumi for Jehovah. Hem gud for tingim hao Dadi blo iumi lo heven hem lovem iumi tumas and laekem iumi for fren witim hem for olowe. Promis blo God for iumi kasem laef olowe helpem iumi for deal witim olketa hard taem. Nomata olketa enemy blo iumi sei bae olketa killim iumi dae, iumi bae no stop for worshipim Jehovah. Samting wea helpem iumi for gohed faithful lo Jehovah hem from iumi savve nomata iumi dae, hem bae mekem iumi laef bak and iumi savve laef for olowe. (John 5:​28, 29; 1 Cor. 15:​55-58; Heb. 2:15) Iumi sure Jehovah savve mekem iumi for laef olowe bikos hem givim iumi laef, and from hem laef olowe tu. (Sams 36:​9, SIPB) Bible storyim hao Jehovah hem bin stap and bae hem gohed stap for olowe.—Sams 90:2; 102:​12, 24, 27, SIPB. w22.12 2 ¶1-3

Iumi pipol blo Jehovah no sapraes taem iumi feisim olketa hard taem. Olsem Bible talem, iumi luksavve hao “iumi mas kasem plande hard samting firstaem bifor iumi savve go insaed Kingdom bilong God.” (Acts 14:22) Iumi savve tu hao samfala problem blo iumi bae no finis go kasem taem wea iumi bae stap lo niu world wea no eniwan bae dae, sorre, krae, or feelim pain tu. (Rev. 21:4) Jehovah no protectim iumi from olketa hard taem, bat hem helpem iumi for deal witim. Tingim wanem aposol Paul talem lo olketa Christian lo Rome. Firstaem hem storyim olketa problem wea hem and olketa nara brata feisim. Then hem storyim hao Jehovah helpem olketa for “barava win.” (Rome 8:​36-37) Diswan minim iumi savve gohed for kasem blessing from Jehovah nomata iumi feisim wanfala hard taem. w23.01 14 ¶1-2