March

Aposol Peter, hem encouragem olketa lo kongregeson for iusim savve wea olketa garem for strongim each other. Peter sei: “From God hem kaen tumas, hem givim iufala evriwan savve for duim olketa difren kaen spesol waka. So iufala mas iusim datwan for helpem narawan.” (1 Pet. 4:10) Iumi shud no hol bak for iusim savve wea iumi garem nomata maet iumi tingse samfala bae jealous or discourage. Bat iumi mas no tok praod abaotem datwan. (1 Cor. 4:6) Sapos iumi savve gud lo hao for duim samting, tingim, datwan hem present from God. Iumi shud iusim datfala savve for strongim kongregeson, and no for mekem pipol tinghae lo iumiseleva. (Phil. 2:3) Taem iumi iusim strong, and savve blo iumi for duim wanem God laekem, datwan bae mekem iumi hapi bikos iumi duim datwan for mekhae lo Jehovah, and no from iumi laek for winim olketa narawan. w22.04 11-12 ¶7-9

Jesus lovem tumas olketa Holy Raeting, and profesi lo Psalm 40:8 storyim feeling blo hem. Hem sei: “O God blo mi, mi hapi tumas for duim will blo iu. Law blo iu hem stap deep insaed lo mi.” From Jesus lovem olketa Holy Raeting, hem hapi and gohed faithful for worshipim Jehovah. Iumi tu savve hapi and gohed faithful if iumi readim and lovem wanem Bible talem. (Sams 1:​1-3, SIPB) Iumi laek followim wat Jesus storyim and example blo hem taem iumi impruvim hao iumi readim Bible. Iumi savve impruv lo hao iumi minim olketa scripture, taem iumi prea, read slow, askem olketa kwestin, and raetem olketa short note. Iumi iusim wei for luksavve taem iumi ting raonem gud wat iumi readim and iusim olketa Bible pablikeson. And iumi letem Bible for changem iumi taem iumi gohed for hambol taem iumi readim Bible. Taem iumi followim olketa idea hia, iumi bae kasem gud samting from Bible reading blo iumi, and fren klos witim Jehovah.—Sams 119:​17, SIPB; Jas. 4:8. w23.02 13 ¶15-16

Markem wanfala goal, then waka hard for kamap gud lo hem. Wanem nao savve helpem iu for duim diswan? If iu laek for kamap gud lo hao for teach, hem gud for studyim datfala brochure Gohed Waka Hard for Read and Teach Gud. Sapos iu kasem assignment for duim wanfala part lo midol week meeting, askem wanfala experience brata for lisin lo tok blo iu firstaem and for givim iu samfala idea lo eni samting iu savve kamap gud lo hem. Preparem gud eni part wea iu kasem mekem olketa brata and sista luksavve iu man wea waka hard and olketa fit for trustim iu. (2 Cor. 8:22) Wat nao bae iu duim sapos iu laek for kamap gud lo samting wea hem no isi for iu duim? No givap! Nomata Bible no talem Timothy hem kamap nambawan speaker and teacher, iumi sure from hem followim advaes blo Paul hem duim gud olketa assignment wea hem kasem.—2 Tim. 3:10. w22.04 24-25 ¶8-11

Wat nao datfala animal wea garem sevenfala hed stand for hem? Revelation sei disfala wild animal hem luk olsem wanfala leopard, bat leg blo hem olsem leg blo bear and mouth blo hem olsem mouth blo lion, and hem garem tenfala horn. Daniel chapter 7 storyim fofala wild animal wea luk olsem leopard, bear, and lion tu. Bat Revelation storyim wanfala wild animal nomoa. Datfala wild animal hem no stand for wanfala gavman or wanfala world paoa nomoa, bat hem stand for staka gavman bikos Revelation sei tu datfala wild animal hem rul “ovarem evri tribe and pipol and languis and kantri.” (Rev. 13:7) So datfala wild animal hem stand for evri gavman wea rulim olketa man kam kasem distaem. (Eklesiastes 8:​9, SIPB) Nara samting tu, staka taem lo Bible, namba ten hem minim samting wea complete. w22.05 9 ¶6

Hu nao bae kasem olketa gud samting hia? Wanfala grup hem datfala big crowd wea no dae lo Armageddon, and tu, olketa pikinini wea bae born lo niu world. Bat Revelation chapter 20 storyim tu hao olketa wea dae finis bae laef bak lo niu world. (Rev. 20:​11-13) Staka wea dae finis bae laef bak lo earth. Bible sei olketa wea “raeteous” from olketa faithful, and “olketa wea no raeteous” from olketa no garem chance for lane abaotem Jehovah bae laef bak. (Acts 24:​15, John 5:​28, 29) Bat datwan no minim evriwan wea dae finis bae laef bak lo datfala Thousand Year Rul. Olketa wea disaed for no worshipim Jehovah nomata olketa garem chance for duim datwan, bae no savve laef bak. From olketa no laek worshipim Jehovah olketa no fit for laef lo Paradaes earth.—Matt. 25:46; 2 Thess. 1:9; Rev. 17:8; 20:15. w22.05 18 ¶16-17

Jesus iusim “datfala wakaman wea faithful and wise” for organizem gud pipol blo Jehovah for helpem olketa narawan for savve lo truth. (Matt. 24:45) Hao nao tingting blo iu abaotem organization blo Jehovah? Maet iu garem sem tingting olsem aposol Peter, wea talem toktok lo text for tuday lo Jesus. Bae iumi hao distaem, sapos iumi no kam insaed lo organization blo Jehovah? Christ iusim disfala organization for mek sure iumi kasem spiritual kaikai. Hem trainim iumi tu for duim gud ministry blo iumi. And hem helpem iumi for “garem niufala wei” for mekem Jehovah hapi. (Eph. 4:24) Jesus provaedem olketa wise direction lo olketa hard taem wea iumi feisim. Iumi lukim pruv blo diswan taem COVID-19 pandemic hem start. Taem staka pipol lo world no savve wat for duim, Jesus mek sure iumi kasem klia direction wea savve helpem iumi for stap sef. w22.07 12 ¶13-14

Jehovah talem olketa Israelite for iusim evri chance for teachim pikinini abaotem hem. (Diutronomi 6:​6, 7, SIPB) Olketa Israelite garem staka chance for story witim pikinini and for teachim olketa for lovem Jehovah. For example, wanfala smol boy maet spendem staka taem witim dadi blo hem for waka lo garden or harvestim garden. And wanfala smol gele maet helpem mami for sewim kaleko, weavim olketa samting, and duim olketa nara waka lo haos. Taem dadi and mami waka tugeta witim pikinini, hem chance for olketa storyim olketa spiritual samting witim pikinini. For example, parents savve storyim olketa gudfala samting wea Jehovah duim and storyim hao Jehovah helpem famili blo olketa. Lo staka kantri, parents and pikinini no savve spendem taem tugeta lo day bikos parents lo waka, and olketa pikinini lo skul. So parents mas trae for faendem eni nara taem for story witim pikinini blo olketa.—Eph. 5:​15, 16. w22.05 28 ¶10-11

Olketa wea duim serious sin olketa brekem law blo God. Sapos wanfala brata or sista duim serious sin, hem mas prea lo Jehovah God for forgivim hem and mas go story witim olketa elder. (Sams 32:​3-5, SIPB; Jas. 5:14) Wanem responsibility nao olketa elder garem? Jehovah nomoa garem paoa for forgivim olketa sin bikos lo ransom sakrifaes blo Jesus. Bat Jehovah givim olketa elder responsibility for disaedem sapos brata or sista wea duim sin savve gohed stap lo kongregeson taem olketa iusim Bible. (1 Cor. 5:12) Olketa elder bae trae for luksavve lo olketa kaen samting olsem: Waswe, hem min for duim datfala sin? Waswe, hem trae for haedem sin blo hem? Waswe, hem duim datfala sin for longtaem finis? And waswe, hem showimaot hem sorre and repent? Waswe, eni samting showimaot Jehovah forgivim hem finis?—Acts 3:19. w22.06 9 ¶4

Jesus talem olketa follower blo hem for barava laekem samting wea stret. (Matt. 5:6) Datwan minim iumi mas barava laek for duim wanem hem stret, gud, and klin lo eye blo God. Waswe, iu lovem samting wea tru and stret? Mifala sure iu duim datwan. Iu heitim wei for laea and evri nogud samting. (Sams 119:​128, 163, SIPB) Samwan wea laea hem followim wei blo Satan, wea hem ruler blo disfala world. (John 8:44; 12:31) Wanfala goal blo Satan hem for tok spoelem holy nem blo God, Jehovah. Start lo Eden kam kasem distaem, Satan laea abaotem God blo iumi. Hem laekem pipol for tingse Jehovah hem ruler wea selfish, no honest, and no laekem iumi for kasem gud samting. (Gen. 3:​1, 4, 5) Olketa laea blo Satan gohed mekem pipol for tingse Jehovah hem wanfala nogud ruler. Taem pipol chus for no laekem truth, Satan savve mekem olketa for duim enikaen nogud samting.—Rome 1:​25-31. w23.03 2 ¶3

Maet iu waka hard for lusim wanfala nogud wei, bat samfala taem iu foldaon moa lo datwan. Or maet iu no patient and feel nogud bikos iu no kasem goal blo iu. Wat nao bae helpem iu for no givap? Main samting, hem love blo iu for Jehovah. Love blo iu for Jehovah, hem nao best wei wea iu garem. (Proverbs 3:3; Provebs 3:​4-6, SIPB) If iu barava lovem Jehovah bae iu savve deal witim olketa challenge wea iu feisim. Staka taem Bible storyim loyal love blo Jehovah for olketa pipol blo hem. From hem garem loyal love for olketa, bae hem no lusim olketa or stop for lovem olketa. Jehovah creatim iumi for followim olketa wei blo hem. (Gen. 1:26) So hao nao iu savve showimaot diskaen love? First samting hem for thankiu lo Jehovah. (1 Thess. 5:18) Each day trae for tingim, ‘Hao nao Jehovah showimaot hem lovem mi?’ Then mek sure taem iu prea, talem thankiu lo Jehovah for olketa samting wea hem duim for iu. Iu need for luksavve lo olketa gud samting wea Jehovah duim wea showimaot hem lovem iu. w23.03 12 ¶17-19

Jesus kaen and lovem 12-fala aposol evriwan. Wat nao iumi lanem? Wanem hem important hem no only wanem olketa narawan duim bat hao iumi deal witim datwan tu hem important. Taem nara brata or sista mekem iumi feel nogud, tingim olketa kwestin hia: ‘Why nao mi feel nogud tumas lo wanem hem duim? Waswe, datwan mekem mi luksavve lo wanfala wik point wea mi need for waka lo hem? Waswe, hem deal witim eni problem? Nomata mi garem gud reason for feel nogud, hao, mi savve showimaot love and forgivim hem?’ If iumi lovem olketa narawan, datwan pruvim iumi olketa tru follower blo Jesus. Example blo Jesus helpem iumi tu for trae for minim gud olketa brata and sista. (Provebs 20:​5, SIPB) Jesus savve wanem hem stap lo heart, bat iumi nomoa. Nomata olsem, iumi savve patient witim olketa brata and sista taem olketa mekem iumi feel nogud. (Eph. 4:​1, 2; 1 Pet. 3:8) Hem bae isi for duim datwan if iumi savve lo baekgraon blo olketa. w23.03 30 ¶14-16

Satan savve iusim pipol for mekem iumi fraetem dae. Maet iumi kasem big sik, and olketa doctor or olketa famili member wea no Witness laek forcem iumi for tekem blood transfusion, wea datwan hem brekem law blo God. Or samwan maet encouragem iumi for acceptim wanfala treatment wea bae mekem iumi no followim olketa Bible principle. Nomata iumi maet dae, iumi savve Jehovah bae gohed for lovem iumi. (Rome 8:​37-39) Taem samwan wea Jehovah lovem hem dae, hem bae gohed tingim datfala man olsem hem laef nomoa. (Luke 20:37) Jehovah laekem tumas for mekem olketa for laef bak. (Job 14:​15, SIPB) Hem sendem kam spesol Son blo hem for dae for iumi mekem iumi savve “kasem laef olowe.” (John 3:16) Iumi sure Jehovah barava lovem iumi. So iumi no laek for lusim hem taem iumi sik or pipol sei olketa bae killim iumi dae. Bat iumi depend lo Jehovah for comfortim iumi, and givim iumi wisdom and strong for deal witim datwan.—Sams 41:​3, SIPB. w22.06 18 ¶16-17

Bible sei: “Wei for fraet lo Jehovah hem start blo wisdom, and savve blo Most Holy Wan hem nao wei for minim samting.” (Prov. 9:10) So bifor iumi mekem eni important disison, iumi mas mek sure hem followim tingting blo Jehovah, wea hem nao “savve blo Most Holy Wan.” Iumi savve kasem wisdom blo God taem iumi studyim Bible and olketa Bible pablikeson. Taem iumi duim datwan, bae iumi garem tru wisdom. (Provebs 2:​5-7, SIPB) Jehovah nomoa savve givim iumi tru wisdom. (Rome 16:27) Why nao iumi sei olsem? First samting, hem Creator, so hem savve gud lo evri samting wea hem creatim. (Sams 104:​24, SIPB) Mek-tu, evri samting wea Jehovah duim hem showimaot wisdom blo hem. (Rome 11:33) Mek-thri, pipol evritaem kasem gud samting taem olketa followim advaes blo Jehovah. (Provebs 2:​10-12, SIPB) If iumi laek for kasem tru wisdom, iumi mas acceptim thrifala samting hia and mek sure iumi tingim olketa samting hia bifor iumi duim eni samting and taem iumi mekem eni disison. w22.10 19 ¶3-4

Revelation chapter 12 storyim hao Satan lus lo faet, and Jesus and olketa angel blo hem torowem Satan and olketa demon blo hem kam daon lo earth. From datwan, Satan kros fogud and pipol lo “earth . . . kasem barava nogud samting.” (Rev. 12:​9-12) Wat nao olketa profesi hia helpem iumi for luksavve lo hem? Iumi luksavve Jesus hem King finis from distaem olketa big samting happen lo world and wei blo pipol hem barava nogud. So taem iumi lukim pipol selfish and raf, iumi shud no wari tumas bikos wanem olketa duim hem fulfillim Bible profesi. Datwan pruvim Kingdom hem rul distaem! (Sams 37:​1, SIPB) Taem Armageddon kakam klosap, iumi expectim staka nogud samting moa for happen lo world. (Mark 13:8; 2 Tim. 3:13) Iumi tinghae lo hao Jehovah helpem iumi for minim why olketa nogud samting happen. w22.07 3-4 ¶7-8

Iumi savve askem Jehovah for helpem olketa brata and sista blo iumi for deal witim sik, natural disaster, war, persecution and olketa nara hard samting. Iumi savve prea tu for olketa brata and sista wea duim relief waka. Sapos iumi savve lo samfala, bae hem gud for talem nem blo olketa lo prea blo iumi, and askem Jehovah for helpem olketa for no givap. Datwan showimaot iumi lovem olketa. Olketa wea lead lo kongregeson tinghae lo olketa prea iumi talem for olketa, and olketa prea hia helpem olketa tu. Aposol Paul luksavve lo datwan. Hem sei: “Prea tu for mi savve story gud, mekem mi no fraet for story taem mi talemaot datfala holy secret abaotem gud nius.” (Eph. 6:19) Distaem tu staka brata waka hard for lukaftarem kongregeson. Iumi showimaot iumi lovem olketa taem iumi askem Jehovah for blessim waka blo olketa. w22.07 23-24 ¶14-16

Soldia werem helmet for protectim hed blo hem. From iumi insaed wanfala spiritual faet, iumi need for protectim mind blo iumi from olketa nogud samting wea Satan iusim. Hem iusim staka samting and olketa idea for spoelem tingting blo iumi. Olsem helmet protectim hed blo soldia, hope blo iumi hem protectim tingting blo iumi for gohed faithful lo Jehovah. If hope blo iumi hem no strong and iumi start for tingim nomoa wat iumiseleva laekem, maet bae iumi forgetim hope blo iumi. For example, tingim samfala Christian lo Corinth bifor. Olketa no garem faith lo disfala important promis blo God, wea hem nao resurrection hope. (1 Cor. 15:12) Paul talem hao olketa wea no garem hope for future duim nomoa wat olketa seleva laekem. (1 Cor. 15:32) Distaem staka wea no garem hope lo olketa promis blo God duim nomoa wanem hem mekem olketa hapi. Bat iumi no olsem olketa, iumi trustim olketa promis blo God for future. w22.10 25-26 ¶8-9

Jehovah laekem iumi for prea lo hem. Hem lukim olketa hard taem wea kasem iumi, and hem sei bae hem lisin lo olketa prea blo iumi enitaem. Hem hapi for herem olketa prea blo olketa wea worshipim hem. (Provebs 15:​8, SIPB) Wat nao iu savve prea abaotem taem iu feel olsem no eniwan for helpem iu? Olsem Elijah, iu savve storyim feeling blo iu lo Jehovah. (Sams 62:​8, SIPB) Talem hem olketa wari blo iu and hao datwan affectim iu. Askem Jehovah for helpem iu for savve hao for deal witim datwan, and for helpem iu for no fraet for story. Iu savve askem hem for givim iu wisdom for explainim biliv blo iu. (Luke 21:​14, 15) Sapos iu depress or discourage, askem Jehovah for helpem iu for no hol bak for story witim wanfala mature brata or sista. Askem Jehovah tu for helpem datfala brata or sista for minim feeling blo iu. Lukim hao hem ansarem prea blo iu, and acceptim help wea olketa narawan givim. Datwan bae mekem iu luksavve Jehovah stap witim iu. w22.08 10 ¶6

Kongregeson lo Thessalonica kasem hard taem from samfala pipol againstim olketa. Olketa pipol hia tekem ‘samfala brata go long olketa bigman bilong taon.’ (Acts 17:6) Olketa brata and sista mas barava seke fogud. Datwan fit for mekem olketa for wikdaon lo spiritual wei, bat aposol Paul no laekem datwan for happen. Hem mek sure olketa brata and sista hia kasem help wea olketa needim. Paul sei lo olketa: “Mifala sendem kam brata bilong iumi Timothy . . . Hem bae strongim and comfortim iufala for helpem faith bilong iufala, mekem olketa hard taem hia no spoelem faith bilong eniwan.” (1 Thess. 3:​2, 3) Timothy lukim hao Paul strongim olketa brata and sista lo Lystra. From Timothy lukim hao Jehovah stap witim olketa lo datfala taem, hem fit for encouragem olketa brata and sista lo Thessalonica for tingim hao Jehovah bae helpem olketa tu.—Acts 14:​8, 19-22; Heb. 12:2. w22.08 21 ¶4

Lo 1870, wanfala grup blo olketa Bible student wea Charles Taze Russell leadim, start duim deep study lo Bible. Olketa laek for savve lo truth abaotem hao important nao sakrifaes blo Jesus, and wat nao stretfala wei for rememberim dae blo hem. Research wea olketa Christian brata hia duim barava helpem iumi distaem. Hao nao hem helpem iumi? Iumi luksavve lo truth abaotem sakrifaes blo Jesus and olketa gud samting iumi kasem from datwan. (1 John 2:​1, 2) Iumi lanem tu hao Bible storyim tufala hope for pipol wea mekem God hapi. Samfala hope for laef olowe lo heven and no savve dae moa and olketa narawan hope for laef olowe lo earth. Taem iumi luksavve Jehovah barava lovem iumi and hao iumi wanwan savve kasem gud samting from ransom sakrifaes blo Jesus, datwan mekem iumi for fren klos witim Jehovah. (1 Pet. 3:18) Olsem olketa faithful brata blo iumi lo bifor, iumi laek invaetem pipol for joinim iumi for duim Memorial followim hao Jesus duim bifor. w23.01 21 ¶6-7

Jesus teachim pipol abaotem olketa blessing wea Kingdom blo God bae givim. Iumi thankiu for datfala ransom bikos hem mekem iumi savve fren klos witim Jehovah and Jesus. And olketa wea showimaot faith lo Jesus, garem hope tu for laef olowe and for lukim moa olketa loved wan wea dae finis. (John 5:​28, 29; Rome 6:23) No eniting iumi duim savve mekem iumi fit for kasem olketa blessing hia, and iumi no fit tu for peim bak wanem God and Christ duim for iumi. (Rome 5:​8, 20, 21) Bat iumi savve showimaot iumi barava tinghae lo wat tufala duim for iumi. Hao nao iumi savve duim datwan? Taem iumi iusim taem, strong, and selen for sapotim waka blo Kingdom. For example, iumi savve stanbae and redi for help lo eni construction and maintenance project for olketa building wea iumi iusim for worship. w23.01 26 ¶3; 28 ¶5

Olketa wea bae rul lo Kingdom blo God bae lukaftarem staka billion pipol wea stap evriwea lo earth. Olsem Jesus, datfala 144,000 bae duim waka blo king and priest. (Rev. 5:10) Anda lo Law blo Moses, olketa priest nao main wan for duim waka for lukaftarem health blo pipol, and tu, for mek sure olketa gohed gud lo spiritual wei. Datfala Law hem “shadow nomoa bilong olketa gudfala samting” wea bae kamap lo future. So luk olsem olketa wea rul witim Jesus bae lukaftarem tu physical and spiritual saed blo pipol blo God. (Heb. 10:1) Iumi no savve yet hao nao olketa king and priest hia bae story witim pipol lo earth wea olketa rul ovarem. Bat iumi savve sure lo Paradaes wea bae kam, evriwan lo earth bae kasem direction wea olketa needim.—Rev. 21:​3, 4. w22.12 11 ¶11-13

Wanfala reason why iumi invaetem olketa narawan for attendim Memorial witim iumi, hem bikos iumi laekem olketa wea kam for lanem truth abaotem wanem Jehovah and Jesus duim for iumi evriwan. (John 3:16) And iumi hope wanem olketa herem and lukim lo Memorial bae helpem olketa for laek lanem samfala samting moa and worshipim Jehovah. Iumi invaetem tu olketa brata and sista wea inactive. Iumi duim datwan for remindim olketa hao God still lovem olketa, and iumi hapi for lukim staka lo olketa hia kam lo Memorial. Taem olketa kam, olketa remember hao taem olketa duim waka blo Jehovah bifor, datwan mekem olketa hapi tumas. (Sams 103:​1-4, SIPB) Nomata pipol acceptim invitation or nomoa, iumi laek duim best blo iumi for invaetem pipol for Memorial, bikos iumi savve Jehovah no interest lo namba nomoa, bat hem interest lo each wan wea attend.—Luke 15:7; 1 Tim. 2:​3, 4. w23.01 20 ¶1; 22-23 ¶9-11

Lo naet bifor Jesus hem dae, hem prea lo Jehovah and askem hem for lukaftarem olketa follower blo hem. (John 17:​15, 20) Jehovah hem evritaem lukaftarem pipol blo hem. Bat Jesus luksavve Satan bae attakim iumi, and hem luksavve tu hao iumi bae needim Jehovah for helpem iumi for deal witim datwan. World blo Satan kosim staka problem for iumi olketa Christian distaem. Iumi feisim olketa hard taem wea savve mekem iumi discourage and wea savve testim tu faith blo iumi. Bat iumi shud no wari tumas. Jehovah lukim olketa hard taem wea iumi feisim and hem laek for helpem iumi for deal witim datwan. Tru nao, Jehovah hem “lukaftarem olketa wea i tinghae long hem . . . Hemi gohed fo sevem olketa.”—Sams 33:​18-20, SIPB. w22.08 8 ¶1-2

Evri year lo olketa week bifor and afta lo Memorial, iumi showimaot iumi tinghae lo wat Jesus duim taem iumi spendem taem for prea and ting raonem gud samting iumi kasem from dae blo hem. And tu, iumi invaetem staka pipol for attend witim iumi lo datfala spesol taem. And iumi sure bae iumi no letem eni samting for stopem iumi for attendim Memorial. Lo taem blo Memorial, iumi lanem why iumi evriwan needim wanfala ransom, and hao dae blo wanfala man fit for finisim olketa sin blo staka pipol. Iumi lanem tu wat nao bred and wine piksarem and hu nao shud drinkim wine and kaikaim bred. (Luke 22:​19, 20) And iumi ting raonem tu olketa blessing wea bae kamap lo future for olketa wea garem hope for laef olowe lo earth. (Isa. 35:​5, 6; 65:​17, 21-23) Iumi shud no ting smol lo olketa important truth hia. w23.01 20 ¶2, 4

From God givim Son blo hem olsem ransom for kavarem olketa sin blo iumi, datwan mekem iumi fit for kasem laef olowe. (Matt 20:28) Aposol Paul sei: “Pipol dae bikos long wanfala man nomoa, and pipol laef bak tu bikos long wanfala man. Evriwan dae bikos long Adam, and tu, evriwan bae laef bak bikos long Christ.” (1 Cor. 15:​21, 22) Jesus teachim olketa follower blo hem for prea for Kingdom blo God for kam and for God duim wanem hem laekem lo earth. (Matt. 6:​9, 10) Wanfala samting wea God laekem, hem for pipol laef olowe lo earth. For datwan hem happen, God appointim Son blo hem for King lo Kingdom blo hem. God chusim 144,000 pipol from earth for rul witim Jesus for mekem plan blo God kamap tru.—Rev. 5:​9, 10. w22.12 5 ¶11-12

Taem wanfala loved wan blo iumi dae, iumi barava missim hem! Firstaem, iumi feel sorre tumas, especially if hem safa tumas bifor hem dae. Bat gogo, iumi savve feel hapi moa taem iumi tingim samting wea hem teachim, samting wea hem duim or talem for encouragem iumi, or wanem hem duim wea savve mekem iumi laflaf. Taem iumi read abaotem hao Jesus safa and dae, iumi feel sorre tu. Especially lo taem blo Memorial, iumi laek spendem taem for ting raonem hao ransom sakrifaes blo Jesus hem barava important. (1 Cor. 11:​24, 25) Bat iumi savve hapi tumas taem iumi ting raonem evriting wea Jesus talem and duim taem hem stap lo earth. Taem iumi ting raonem wat hem duim distaem, and wat bae hem duim for iumi lo future, datwan hem encouragem iumi. w23.01 26 ¶1-2

Olketa disaepol barava sorre taem Jesus dae. Klos fren blo olketa dae and olketa feel olsem wat olketa hope for hem bae no happen nao. (Luke 24:​17-21) Bat bihaen Jesus resurrect, hem meet witim olketa and hem iusim taem hia for explainim hao hem fulfillim olketa Bible profesi. And hem givim olketa wanfala important waka for duim tu. (Luke 24:​26, 27, 45-48) Gogo taem Jesus go ap lo heven and olketa disaepol no feel sorre nao. Olketa hapi tumas bikos olketa savve Masta blo olketa hem laef and redi for helpem olketa lo datfala niu assignment. From olketa hapi tumas, datwan mekem olketa for gohed praisem Jehovah. (Luke 24:​52, 53; Acts 5:42) For iumi followim example blo olketa disaepol blo Jesus, Kingdom blo God mas first samting lo laef blo iumi. For gohed worshipim Jehovah, iumi mas no givap. Hem promis for barava blessim iumi, if iumi duim olsem.—Provebs 10:​22, SIPB. w23.01 30-31 ¶15-16

Iumi no laek for mekem sem mistek olsem Adam and Eve. Bae iumi no duim datwan sapos iumi gohed for lane abaotem Jehovah, tinghae lo olketa gudfala wei blo hem, and trae for minim tingting blo hem. Olketa samting hia bae helpem iumi for barava lovem Jehovah. Tingim Abraham wea barava lovem Jehovah. Nomata hem no minim why Jehovah disaedem samfala samting, Abraham no againstim datfala disison. Bat hem trae for minim gud tingting blo Jehovah. For example, taem hem savve Jehovah disaed for distroem Sodom and Gomorrah, firstaem Abraham wari nogud Jehovah wea “jajem olketa pipol long wol” maet finisim raeteous pipol witim nogud pipol. Abraham no laekem datwan for happen, so hem askem Jehovah samfala kwestin and Jehovah patient for ansarem hem. Gogo, Abraham luksavve hao Jehovah lukluk lo heart blo each wan and hem bae no panisim innocent pipol witim pipol wea guilty.—Jenesis 18:​20-32, SIPB. w22.08 28 ¶9-10

Lo 455 B.C.E., bihaen Governor Nehemiah buildim bak wall blo Jerusalem, hem lukaotem olketa man wea hem savve trustim for lukaftarem datfala taon. Wanfala man wea hem chusim nao hem Hananiah, chief blo building for olketa soldia. Bible sei Hananiah hem “man wea pipol save trastem, an hemi barava tinghae long God.” (Nehemaea 7:​2, SIPB) From Hananiah lovem Jehovah and laek for mekem hem hapi, hem waka hard lo eni assignment wea hem kasem. Iumi laek for olsem Hananiah mekem olketa brata savve trustim iumi for duim eni assignment lo kongregeson. Tingim example blo Tychicus, wanfala brata wea aposol Paul trustim. Paul depend lo Tychicus, and sei hem wanfala “faithful wakaman.” (Eph. 6:​21, 22) Paul trustim hem for tekem olketa leta for olketa lo Ephesus and Colossae, and for encouragem and comfortim olketa tu. Wanem Tychicus duim mekem iumi for tingim olketa faithful brata wea lukaftarem spiritual saed blo iumi distaem.—Col. 4:​7-9. w22.09 9-10 ¶5-6

Joseph mas deal witim staka hard samting for samting olsem 13 years. Joseph maet start for daotem sapos Jehovah lovem hem, and maet hem tingse Jehovah lusim hem nao. Nomata olsem, Joseph no kros and blamem God for olketa samting wea happen. Datwan mekem hem gohed for garem gudfala tingting. Hem garem chance for pei bak lo olketa brata blo hem, bat hem showimaot love and forgivim olketa. (Gen. 45:​4, 5) Joseph no tingim nomoa olketa problem blo hemseleva, bat hem gohed tingim wanem Jehovah laekem. (Gen. 50:​19-21) Wat nao iumi lanem? If samwan treatim iumi nogud, no kros and blamem Jehovah or tingse Hem no lovem iumi. Bat, ting raonem hao Jehovah helpem iumi for deal witim datwan. And tu, sapos wanfala brata or sista treatim iumi nogud, showimaot love and forgivim hem. w22.11 21 ¶4

Profet Daniel lukim vision wea showimaot klia hao position blo Jehovah hem hae winim olketa wea rul. Firstaem Daniel lukim fofala big animal wea piksarem olketa world paoa, wea hem nao Babylon, Medo-Persia, Greece, and Rome, and then England-America wea world paoa distaem. (Daniel 7:​1-3, 17, SIPB) Then Daniel lukim Jehovah God sidaon lo throne blo hem lo kot lo heven. (Daniel 7:​9, 10, SIPB) God tekem evri paoa and authority from olketa gavman blo man and givim lo olketa narawan wea fit for rul and wea garem moa paoa. Hu nao olketa hia? Bible sei Jehovah givim lo samwan wea “luk olsem wanfala man,” wea hem nao Jesus Christ, and lo “olketa holy wan blo Most Hae,” wea minim 144,000 wea bae rul for “olowe.” (Daniel 7:​13, 14, 18) Datwan showimaot Jehovah “hemi barava hae tumas.” Wanem hem happen lo datfala vision hem join witim nara samting wea Daniel storyim lo chapter 2. Hem sei: “[God] nao hemi givim paoa long olketa king, an hemi save tekemaot moa paoa ya from olketa.”—Daniel 2:​19-21, SIPB. w22.10 14-15 ¶9-11