April

Hem gud for tingim: ‘Taem mi kasem kaonsel, waswe, mi acceptim datwan or mi denyim rong samting wea mi duim? Waswe, mi kwiktaem blamem narawan?’ Taem iumi read abaotem olketa nara faithful man and woman lo Bible, hem gud for tingim, hao nao olketa deal witim kaen samting olsem? And hao nao iumi savve followim example blo olketa faithful man or woman hia? Iumi savve lane tu from example blo olketa young wan, and olketa olo brata and sista lo kongregeson. Hao, iu savve tingim eniwan wea gohed faithful nomata maet hem kasem olketa hard taem olsem, famili againstim hem, narawan forcem hem for duim samting wea no stret, or garem problem saed lo health? Waswe, hem garem samfala gudfala wei wea iu laek for followim? Taem iumi ting raonem gudfala example blo hem, datwan savve helpem iumi for deal witim hard taem wea iumi feisim. Iumi tinghae tumas lo gudfala example blo olketa brata and sista wea showimaot gudfala example for iumi!—Heb. 13:7. w22.04 13 ¶13-14

Sapos iumi feisim hard taem, iumi tinghae lo elder wea hem lisin lo iumi and comfortim iumi. Or sapos iumi needim help witim wanfala Bible study, iumi hapi taem wanfala experience pioneer kam joinim study and givim iumi samfala idea. Olketa brata and sista hia hapi tumas for helpem iumi. Iumi tu savve duim samting for helpem olketa brata and sista. Maet iumi garem goal for duim moa samting lo waka blo Jehovah. Wanem nao bae helpem iumi for kasem datwan? Sapos iumi no garem eni plan lo hao bae iumi duim datwan maet iumi no savve kasem datfala goal. So garem wanfala plan. And maet hem gud for iumi raetem wat nao iumi plan for duim and hao bae iumi duim datwan. w22.04 25 ¶12-13

Distaem Jehovah hipimap “wanfala big crowd” blo pipol and hem trainim olketa for redi for laef anda lo rul blo Kingdom. (Rev. 7:​9, 10) Nomata staka pipol lo world distaem heitim narawan and datwan mekem war kamap, olketa lo big crowd waka hard for lovem evriwan nomata wea olketa kam from, tribe blo olketa, or eni nara samting. Hem olsem olketa hamarem sword for kamap samting for digim graon. (Maeka 4:​3, SIPB) Olketa no joinim war, bat olketa helpem pipol for luksavve lo “tru laef” and teachim olketa abaotem God and plan blo hem. (1 Tim. 6:19) Nomata olketa famili member againstim olketa or olketa no garem staka selen from olketa sapotim Kingdom blo God, Jehovah mek sure olketa garem wanem olketa needim. (Matt. 6:​25, 30-33; Luke 18:​29, 30) Olketa samting hia mekem iumi sure Kingdom blo God hem stap and Jehovah iusim Kingdom for mekem plan blo hem kamap tru. w22.12 5 ¶13

Lo end blo datfala 1,000 year, evriwan lo earth bae perfect. Sin blo Adam bae no affectim eniwan wea stap lo datfala taem. (Rome 5:12) Evri nogud samting wea kamaot from sin blo Adam bae nomoa nao. From evriwan bae perfect lo end blo datfala 1,000 year, hem olsem olketa “laef bak.” (Rev. 20:5) Iumi savve Jesus gohed faithful lo God nomata Satan testim hem. Bat waswe, olketa wea perfect lo datfala taem bae gohed for faithful lo Jehovah tu taem Satan testim olketa? Taem olketa aotem Satan from datfala hol wea deep tumas lo end blo datfala 1,000 year, each wan mas pruvim sapos hem bae faithful lo Jehovah. (Rev. 20:7) Olketa wea faithful lo datfala last test bae kamap free and kasem laef olowe. (Rome 8:21) Pipol wea bighed againstim Jehovah bae finis for olowe.—Rev. 20:​8-10. w22.05 19 ¶18-19

Profesi lo Jenesis 3:15 (SIPB) sei datfala snek bae baetem “bihaen long [foot]” blo pikinini blo datfala woman. Satan duim diswan taem hem iusim olketa Jew and olketa lo Rome for killim dae Son blo hem. (Luke 23:​13, 20-24) Taem eniwan garem garekil bihaen lo foot blo hem bae hem hard for wakabaot. Olsem tu, taem Jesus hem dae hem no savve duim eni samting for tu-thri day. (Matt. 16:21) For disfala profesi lo Jenesis 3:15 kamap tru, Jesus mas laef bak. Why nao olsem? Bikos profesi sei datfala pikinini bae brekem hed blo snek. Dastawe bihaen lo mek-thri day wea Jesus dae God resurrectim hem, and hem kamap wanfala spirit wea no savve dae moa. Lo taem wea God markem, Jesus bae finisim Satan. (Heb. 2:14) Christ and olketa wea rul witim hem bae finisim pikinini blo datfala snek, wea hem nao olketa enemy blo God.—Rev. 17:14; 20:​4, 10. w22.07 16 ¶11-12

Parents, helpem pikinini for garem olketa gudfala fren. Bible storyim hao olketa fren blo iumi savve helpem iumi or spoelem iumi. Hem important for iu savve hu nao olketa fren blo pikinini blo iu. Wat nao iu savve duim for helpem pikinini blo iu for fren witim olketa wea lovem Jehovah? (1 Cor. 15:33) Iu savve invaetem olketa lo kongregeson wea fren gud witim Jehovah for duim samfala samting tugeta witim famili blo iu. (Sams 119:​63, SIPB) Tony, wanfala dadi, hem sei: “Mi and waef blo mi savve invaetem staka difren brata and sista lo haos blo mifala nomata olketa young or olo or from difren ples. Olketa savve kaikai witim mifala and joinim famili worship tu. Diswan hem gudfala wei for olketa pikinini savve gud lo olketa wea lovem and hapi for worshipim Jehovah. . . . Olketa pikinini laek for fren gud witim Jehovah from olketa herem olketa experience blo olketa and lukim hao olketa busy and faithful for duim waka blo Jehovah.” w22.05 29-30 ¶14-15

Taem olketa elder meet witim samwan wea duim sin, goal blo olketa hem for mekem sem disison olsem Jehovah disaedem finis abaotem datfala man. Hao nao diswan helpem kongregeson? Taem olketa elder disfellowshipim brata or sista wea no repent, datwan hem protectim kongregeson. (1 Cor. 5:​6, 7, 11-13; Titus 3:​10, 11) Or maet datwan helpem samwan wea duim sin for repent and kasem forgiveness from Jehovah. (Luke 5:32) And tu, olketa elder savve prea for brata or sista wea repent and askem Jehovah for helpem hem for fren bak moa witim Hem. (Jas. 5:15) Hao sapos olketa elder luksavve samwan hem no repent taem olketa meet witim hem? Bae olketa disfellowshipim hem from kongregeson. Bat if gogo hem luksavve wanem hem duim hem no stret and hem repent and changem wei blo hem, Jehovah bae forgivim hem. (Luke 15:​17-24) And Jehovah bae forgivim hem tu nomata hem duim barava nogud samting.—Mektu Kronikols 33:​9, 12, 13, SIPB; 1 Tim. 1:15. w22.06 9 ¶5-6

Jehovah helpem staka brata and sista evriwea lo earth for deal witim olketa hard samting wea olketa feisim, and for no duim wanem Satan laekem. (1 Pet. 5:9) Iu savve duim datwan tu. Klosap nao, Jehovah bae iusim Jesus and 144,000 wea rul witim hem for “finisim evri samting wea Devil hem duim.” (1 John 3:8) Bihaen datwan, bae no eni samting mekem pipol wea worshipim God “fo fraet moa.” (Aesaea 54:14; Maeka 4:​4, SIPB) Bat go kasem datfala taem, iumi need for waka hard for no letem feeling for wari and fraet for spoelem iumi. Iumi mas barava trustim hao Jehovah lovem and bae hem lukaftarem iumi wea worshipim hem. So hem gud for ting raonem and story witim olketa brata and sista abaotem hao Jehovah lukaftarem pipol blo hem bifor. And hem gud tu for tingim wanem Jehovah duim for helpem iumi taem iumi kasem hard taem. Jehovah bae helpem iumi for no fraet!—Sams 34:​4, SIPB. w22.06 19 ¶19-20

Insaed datfala dream “tufala lek [“feet,” NWT] . . . wea olketa wakem long aean wea olketa miksim wetem red graon” hem stand for lastfala world paoa. Disfala world paoa hem start for rul lo taem blo World War I taem Britain and United States start for waka tugeta. Datfala image insaed lo dream blo Nebuchadnezzar showimaot olketa samting abaotem disfala world paoa wea difren from olketa nara world paoa wea rul firstaem lo hem. Olketa pure metal olsem gold or silver lo datfala image hem stand for olketa nara world paoa. Bat England and America World Paoa hem difren bikos iron wea mix witim graon nao stand for hem. Datfala graon hem stand for olketa ordinary pipol. (Dan. 2:​43, footnote.) Distaem iumi lukim hao tingting blo pipol savve affectim olketa election, pipol savve campaign for raet blo olketa, protest, and iusim olketa union for kasem raet lo waka blo olketa. Olketa samting hia mekem hem no isi for datfala world paoa for duim wanem hem laekem. w22.07 4-5 ¶9-10

Waswe, iu hol bak for baptaes? Maet hem gud for tingim diswan. Wat nao iu weitim? (Acts 8:36) Jesus sei for duim will blo Dadi blo hem, hem olsem kaikai. Why nao olsem? Kaikai savve helpem body blo iumi. Jesus savve evri samting wea Jehovah askem iumi for duim, hem savve helpem iumi. Jehovah no laekem iumi for duim eni samting wea bae spoelem iumi. Waswe, Jehovah laekem iu for baptaes? Yes. (Acts 2:38) So iu savve sure hao taem iu obeyim Jehovah and baptaes bae iu kasem gud samting. If iu no hol bak for kaikaim wanfala naes kaikai, why nao iu hol bak for baptaes? Staka maet sei, “Mi no redi yet.” For iu disaed for dedicatem laef blo iu lo Jehovah and for baptaes hem barava important disison for iu mekem. So hem bae tek taem and iu need for ting raonem gud and waka hard for iu qualify for baptaes. w23.03 7 ¶18-20

Taem God anointim Jesus witim holy spirit hem kamap pikinini blo datfala woman. Bihaen Jesus dae and go bak lo heven, God “mekhae long hem and givim glory long hem” and givim hem “paoa . . . ovarem evri samting long heven and earth.” And tu, God givim hem paoa for “finisim evri samting wea Devil hem duim.” (Heb. 2:7; Matt. 28:18; 1 John 3:8) Datfala pikinini piksarem olketa narawan tu. Paul showimaot hu nao olketa hia taem hem story lo olketa anointed Christian wea Jew and wea no Jew. Hem sei: “Sapos iufala bilong Christ, iufala nao pikinini bilong Abraham, wea bae kasem samting wea God promisim.” (Gal. 3:​28, 29) Taem Jehovah anointim wanfala Christian witim holy spirit, hem kamap pikinini blo datfala woman tu. So pikinini blo datfala woman hem piksarem Jesus Christ and 144,000 wea rul witim hem lo Kingdom. (Rev. 14:1) Evriwan lo olketa hia followim wei and tingting blo Dadi blo olketa, Jehovah God. w22.07 16 ¶8-9.

Iumi savve lo olketa last day bae iumi feisim olketa hard taem. (2 Tim. 3:1) Maet datwan mekem iumi wari and discourage, especially taem iumi kasem problem afta problem or tu-thri problem lo semtaem. Bat hem gud for tingim hao Jehovah hem lukim olketa hard taem blo iumi, and hem bae helpem iumi for deal witim datwan. Tingim example blo datfala faithful man Job. Hem kasem staka hard taem insaed short taem nomoa. Insaed wanday, Job herem hao samfala stealim olketa animal blo hem, staka animal and olketa wakaman blo hem tu dae, and worse samting, evri pikinini blo hem dae. (Job 1:​13-19, SIPB) Taem Job sorre yet wanfala big sik kasem hem. (Job 2:​7, SIPB) Jehovah lukim hard taem wea Job kasem. From Jehovah lovem Job, hem duim samting for helpem hem for no givap and for gohed faithful. w22.08 11 ¶8-10

Taem iumi kasem discipline, datwan savve mekem iumi feel nogud. Maet iumi start for tingse datfala discipline hem no fair, and hem ova tumas. Sapos iumi ting olsem bae iumi no luksavve hao Jehovah disciplinem iumi bikos hem lovem iumi. (Heb. 12:​5, 11) So acceptim and followim discipline. Jesus stretem Peter tu-thri taem front lo olketa nara aposol. (Mark 8:33; Luke 22:​31-34) Masbi Peter hem shame tumas! Nomata olsem, Peter no lusim Jesus, bat hem acceptim datfala discipline and lane from mistek blo hem. Bihaen datwan, Jehovah markem hem for lukaftarem samfala important responsibility lo kongregeson. (John 21:​15-17; Acts 10:​24-33; 1 Pet. 1:1) Nomata maet iumi shame taem iumi kasem discipline, no letem datwan for stopem iumi for acceptim and followim discipline, bikos iumi and olketa narawan bae kasem gud samting from datwan. And tu, iumi bae fit for duim moa samting for Jehovah and for olketa brata and sista. w22.11 21-22 ¶6-7

Abraham savve Jehovah hard for duim samting wea no stret. Aposol Paul storyim hao Abraham trustim hao Jehovah savve resurrectim son blo hem Isaac. (Heb. 11:​17-19) Hem savve tu hao Jehovah sei wanfala nation bae kam from laen blo Isaac, bat lo datfala taem Isaac no garem pikinini yet. Abraham lovem Jehovah and hem sure Jehovah evritaem duim wanem hem stret. From Abraham garem faith hem obeyim Jehovah nomata hem no isi. (Jenesis 22:​1-12, SIPB) Hao nao iumi savve followim example blo Abraham? Iumi savve gohed lane abaotem Jehovah. Datwan bae helpem iumi for fren gud witim hem and barava lovem hem. (Sams 73:​28, SIPB) And bae iumi trainim konsens blo iumi for followim tingting blo God. (Heb. 5:14) Then sapos samwan trae for switim iumi for duim samting wea no stret bae iumi no duim datwan, bikos iumi no laek duim eni samting wea bae mekem Jehovah no hapi, and wea bae spoelem hao iumi fren witim hem. w22.08 28 ¶11-12

Taem Paul and Barnabas go bak moa lo Lystra, Iconium, and Antioch, tufala “markem samfala man . . . for elder long olketa kongregeson.” (Acts 14:​21-23) Masbi olketa elder barava comfortim olketa kongregeson hia, olsem olketa elder duim distaem. Olketa elder, hem gud for lukaotem chance for talem olketa “gud toktok” lo olketa wea needim encouragement. Paul remindim olketa brata and sista blo hem hao “bigfala sekson bilong olketa witness” fit for deal witim olketa hard samting bikos Jehovah strongim olketa. (Heb. 12:1) Paul luksavve hao example blo olketa wea faithful lo bifor savve helpem olketa brata and sista hia for gohed garem faith lo Kingdom blo God. (Heb. 12:22) Distaem tu, hem barava strongim iumi taem iumi read abaotem hao Jehovah helpem Gideon, Barak, David, Samuel, and olketa narawan.—Heb. 11:​32-35. w22.08 21-22 ¶5-6

Hao nao bae Jesus judgem olketa wea bae laef bak? Waswe, bae hem judgem olketa followim “wanem olketa duim” bifor olketa dae? Nomoa! Iumi storyim finis hao Jehovah hem forgivim sin blo olketa taem olketa dae. So hem no minim olketa kasem judgment followim “wanem olketa duim” bifor olketa dae. Bat Jesus bae judgem olketa lo “wanem olketa duim” followim training wea olketa kasem lo niu world. Nomata olketa faithful man olsem Noah, Samuel, David, and Daniel bae need for lane abaotem Jesus Christ and showimaot faith lo sakrifaes blo hem. Sapos olketa hia need for lanem staka samting, pipol wea no raeteous bae need for lanem staka samting moa! Wat nao bae happen lo olketa wea no laek for followim training wea olketa kasem lo niu world? Revelation 20:15 sei: “Eniwan wea nem bilong hem no stap long datfala buk bilong laef, hem torowem hem long lake bilong fire.” Datwan minim bae olketa finis for olowe. So hem barava important for mek sure nem blo iumi no aot from datfala buk blo laef, bat stap insaed for olowe! w22.09 18-19 ¶17-19

Olketa disison wea iumi mekem abaotem health blo iumi and medical treatment wea iumi bae tekem hem base lo wanem iumi lanem lo Bible. (1 Tim. 3:9) Taem iumi mekem olketa disison and discussim witim olketa narawan, hem gud for followim principle lo Philippi 4:5 wea sei: “Showimaot long evriwan, iufala no ova tumas.” Taem iumi balance, bae iumi no ova tumas for wari abaotem health blo iumi. Iumi lovem and respectim olketa brata and sista nomata disison blo olketa difren from iumi. (Rome 14:​10-12) Iumi showimaot iumi thankiu lo Jehovah, wea givim laef lo iumi, taem iumi lukaftarem gud laef blo iumi and duim best for worshipim hem. (Rev. 4:11) Distaem iumi mas deal witim sik and olketa hard taem. Bat Jehovah no laekem iumi for garem diskaen laef. Klosap nao hem bae givim iumi laef olowe, wea bae iumi no feelim pain and dae tu. (Rev. 21:4) Go kasem datfala taem, iumi hapi tumas for gohed laef and for worshipim Dadi blo iumi lo heven, Jehovah! w23.02 25 ¶17-18

Jehovah showimaot hem garem bigfala paoa winim “pipol wea rul.” (Rome 13:1) Tingim thrifala example. Pharaoh, King blo Egypt mekem pipol blo Jehovah for kamap slave and no laek letem olketa go free. Bat God mekem olketa Israelite free and mekem Pharaoh for draon lo Red Sea. (Eksodas 14:​26-28; Sams 136:​15, SIPB) King Belshazzar blo Babylon mekem feast for mekhae lo hemseleva, and hem “preisim olketa kaving god” bat hem no praisem Jehovah. (Daniel 5:​22, 23, SIPB) Lo “sem naet” olketa killim dae Belshazzar and God givim datfala paoa for rul lo Media and Persia. (Daniel 5:​30, 31, SIPB) King Herod Agrippa I blo Palestine talem olketa soldia for killim dae aposol James, and then putim Peter lo prison and plan for killim hem dae tu. Bat Jehovah no letem datwan for happen. Bible sei “angel . . . mekem olketa worm kaikaim Herod and hem dae nao.”—Acts 12:​1-5, 21-23. w22.10 15 ¶12

Taem iumi read abaotem hao Jehovah kea for olketa wea faithful lo hem bifor, datwan bae strongim hope blo iumi. Bible sei: “Evri samting wea olketa raetem bifor hem for teachim iumi. Hem givim iumi hope bikos olketa Holy Raeting hia helpem iumi for no givap and comfortim iumi.” (Rome 15:4) Ting raonem hao Jehovah evritaem duim wanem hem promisim. Tingim wanem God duim for Abraham and Sarah. Tufala barava olo and no fit for garem pikinini. Nomata olsem, God promis hao tufala bae garem pikinini. (Gen. 18:10) Hao nao datwan helpem Abraham? Bible sei: “Abraham garem faith and barava bilivim hem bae kamap dadi bilong pipol long plande kantri.” (Rome 4:18) Nomata Abraham no savve hao nao datfala promis blo God bae kamap tru, hem trustim God bae duim wanem Hem promisim. Abraham no lus hope. (Rome 4:​19-21) Olketa story olsem savve helpem iumi for trustim olketa promis blo Jehovah. w22.10 26-27 ¶13-14

Datwan kamap tru taem olketa Jew kamap free from Babylon. Jehovah, Nambawan Teacher blo olketa, givim instruction lo olketa and datwan helpem olketa for worshipim hem moa lo stretfala wei. Iumi hapi Jehovah hem Nambawan Teacher blo iumi distaem. Isaiah storyim iumi olsem olketa student blo Jehovah. Hem sei: “Iufala bae lukim Nambawan Teacher blo iufala lo eye blo iufala.” Lo disfala tokpiksa, olketa student lukim Teacher standap lo front and hem redi for teachim olketa. Distaem, iumi garem privilege for Jehovah teachim iumi. Hao nao hem duim datwan? Hem iusim organization blo hem for givim iumi olketa kliafala instruction wea savve helpem iumi, and iumi barava tinghae lo datwan. Iumi kasem olketa instruction lo olketa meeting, olketa pablikeson blo iumi, JW Broadcasting^®, and lo staka nara wei. Datwan helpem iumi for no givap and gohed hapi nomata iumi feisim olketa hard taem. w22.11 10 ¶8-9

Jesus no storyim nomoa taem wea Jerusalem and temple bae distroe, bat hem storyim tu taem wea “world hem gogo for finis” wea hem nao iumi insaed distaem. Jesus sei: “No eniwan savve long wanem day and taem nao datwan bae happen. Nomata olketa angel long heven and Son tu bat no savve. Dadi bilong mi long heven nomoa savve.” Then hem warnim olketa disaepol for “gohed for wekap” and “gohed for lukaot.” (Mark 13:​32-37) Olketa Jew Christian lo first century mas gohed for lukaot bikos datwan savve sevem laef blo olketa. Jesus sei lo olketa disaepol: “Taem iufala lukim army hem raonem Jerusalem, iufala savve nao datfala taon hem klosap for finis.” Taem datwan happen, olketa mas obeyim warning blo Jesus and “mas ranawe go long olketa maunten.” (Luke 21:​20, 21) Olketa wea obeyim warning hia olketa sef taem army blo Rome distroem Jerusalem. Distaem iumi stap lo taem wea disfala nogud world hem klosap for finis. So gohed for garem gudfala tingting and gohed for lukaot. w23.02 14 ¶1-2; 16 ¶3

Jehovah teachim olketa pipol blo hem for honest and duim stret samting. Datwan helpem olketa for garem respect and peace lo mind. (Provebs 13:​5, 6, SIPB) Taem iu studyim Bible, iu lukim Jehovah duim datwan for iu? Iu lanem olketa wei blo Jehovah nao hem best. Hem helpem evriwan and iu tu. (Sams 77:​13, SIPB) Dastawe iu disaed strong for duim wanem God sei hem stret. (Matt. 6:33) Iu laek for defendim truth and help for pruvim Satan hem laea abaotem God blo iumi Jehovah. Hao nao iu savve duim datwan? Iu savve chus for duim samting wea showimaot iu rejectim olketa laea blo Satan and sapotim truth. Iu savve showimaot hao iu laekem Jehovah for ruler blo iu and iu laek for duim wanem hem sei hem stret. Hao nao iu savve duim datwan? Iu prea lo Jehovah and promis for worshipim hem for olowe and iu baptaes for showimaot dedication blo iu. For lovem samting wea tru and stret, hem wanfala main samting wea mekem man for laek baptaes. w23.03 3 ¶4-5

Staka pipol lo world no minim disfala “peace blo God” wea iumi kasem from iumi fren gud witim Dadi blo iumi lo heven. Taem iumi garem peace blo God, iumi savve hapi. (Phil. 4:​6, 7) Iumi hapi from iumi garem olketa gudfala fren wea lovem Jehovah, and from iumi fren gud witim datfala “God wea givim peace.” (1 Thess. 5:23) Taem iumi savve lo God, trustim, and obeyim hem, datfala peace blo hem savve mekem iumi for no wari tumas taem iumi feisim eni hard taem. Waswe, iumi savve garem peace blo God taem iumi feisim eni hard taem olsem aotbrek blo wanfala sik, natural disaster, pipol riot againstim gavman, or persecution? Iumi savve fraet taem olketa samting olsem happen. Gud samting nao, olketa brata and sista followim disfala advaes blo Jesus lo text for tuday. Jehovah helpem olketa for garem peace nomata olketa feisim hard taem. w22.12 16 ¶1-2

Iumi no savve kontrolem evri samting wea happen lo laef. So hem important for luksavve Jehovah no tinghae lo iumi bikos lo assignment blo iumi, and iumi shud no comparem assignment wea iumi garem witim assignment blo narawan. (Gal. 6:4) Hem important for tingim hao iumiseleva savve helpem olketa narawan and wanem iumi savve duim for Jehovah. Bae iu savve duim moa samting lo waka blo Jehovah sapos iu mekem laef blo iu simpol and no garem big kaon. Hem gud for markem olketa smol goal wea bae helpem iu for kasem olketa big goal. For example, sapos iu markem goal for regular pioneer, maet firstaem hem gud for iu auxiliary pioneer. Or sapos iu garem goal for Ministerial servant, maet hem gud for spendem moa taem lo ministry. Taem iu waka hard lo olketa smol goal, datwan bae helpem iu for kasem olketa big goal. So duim best blo iu lo eni waka wea iu duim for Jehovah. w22.04 26 ¶16-17.

Jehovah savve helpem iumi for deal witim olketa hard taem and for gohed hapi taem iumi worshipim hem. Taem iumi prea lo God and talem hem hard samting wea kasem iumi, maet firstaem Jehovah givim iumi strong for deal witim datwan. Bat if datfala hard taem hem no finis kwiktaem, maet iumi need for gohed askem Jehovah for strongim iumi for no givap. Hem laekem iumi for duim datwan, and toktok blo Isaiah showimaot datwan. Hem sei: “No letem [Jehovah] rest.” (Isa. 62:7) Datwan minim iumi shud gohed prea lo Jehovah, olsem iumi no letem hem for rest. Disfala toktok blo Isaiah mekem iumi tingim tokpiksa blo Jesus abaotem prea lo Luke 11:​8-10, 13. Jesus encouragem iumi for “gohed for ask” for holy spirit. Iumi savve askem Jehovah tu for teachim iumi, for iumi mekem olketa gud disison. w22.11 8 ¶1; 9 ¶6-7

Iumi and famili blo iumi savve redi distaem for persecution. No imaginim olketa nogud samting wea maet happen, bat strongim frenship blo iumi and olketa pikinini blo iumi witim Jehovah. If iumi wari samfala taem, prea lo Jehovah from heart. (Sams 62:​7, 8, SIPB) Hem gud for famili discussim tugeta olketa reason why iumi savve trustim Jehovah. If iumi redi for persecution olsem hao iumi redi for eni disaster, datwan bae helpem olketa pikinini for no fraet and wari tumas, bikos iumi teachim olketa for trustim Jehovah. Peace blo God hem mekem iumi feel sef. (Phil. 4:​6, 7) From Jehovah givim iumi datfala peace, iumi no fraet and wari nomata lo taem blo outbreak blo wanfala sik, or lo taem blo disaster and persecution. Jehovah iusim olketa elder for lukaftarem iumi, and hem givim iumi privilege for helpem each other. From iumi garem peace distaem, iumi savve redi for feisim olketa barava hard taem wea bae kam, and tu, datfala ‘big trabol.’—Matt. 24:21. w22.12 27 ¶17-18

Sapos iumi duim wanfala big sin and iumi stretem finis, iumi no laek for gohed feel guilty. Nomata olsem, iumi no laek for ting nating lo ransom sakrifaes blo Jesus and “gohed for duim sin.” (Heb. 10:​26-31) Sapos iumi repent, askem Jehovah and olketa elder for helpem iumi and stop for duim datfala sin, iumi sure Jehovah hem forgivim iumi. (Isa. 55:7; Acts 3:19) Ransom sakrifaes blo Jesus fit for kavarem evri sin blo iumi and for iumi savve laef lo Paradaes. Laef lo Paradaes bae no savve boring. Iumi bae meetim staka interesting pipol and bae iumi garem gudfala waka for duim. And best samting, evriday bae iumi lanem moa samting abaotem Jehovah and enjoyim olketa samting wea hem provaedem. Bae iumi gohed for lane abaotem hem for olowe, and bae iumi lanem staka samting abaotem creation tu. w22.12 13 ¶17, 19

Datfala “woman” wea Jenesis 3:15 storyim hem no piksarem Eve bikos profesi sei pikinini blo datfala woman bae “brekem” hed blo datfala snek. Datfala snek hem piksarem Satan, and no eni pikinini blo Eve bae garem paoa for distroem hem. So hu nao bae distroem Satan? Last buk lo Bible storyim hu nao datfala woman wea Jenesis 3:15 (SIPB) storyim. (Rev. 12:​1, 2, 5, 10) Datfala woman hem no wanfala woman lo earth. Scripture sei moon stap andanit lo leg blo hem and twelvfala star stap lo hed blo hem olsem wanfala kraon. Hem bornem wanfala spesol pikinini, wea hem nao Kingdom blo God wea stap lo heven. So datfala woman hem mas stap lo heven tu. Woman hia piksarem organization blo Jehovah lo heven wea hem nao olketa faithful angel blo Jehovah. (Gal. 4:26) Bible helpem iumi tu for luksavve hu nao pikinini blo datfala woman. Datfala pikinini mas kam from laen blo Abraham.—Jenesis 22:​15-17, SIPB. w22.07 15-16 ¶6-8

Disfala present from Jehovah, Bible, hem fulap lo wisdom blo hem. Olketa kaonsel lo Bible barava helpem pipol. Bible savve changem laef. Taem Moses raetem olketa first buk lo Bible hem talem olketa Israelite: “Olketa instruction hia barava important, and hem minim laef for iufala.” (Deut. 32:47) Olketa wea obeyim toktok hia garem gudfala laef and hapi. (Sams 1:​2, 3, SIPB) Nomata olketa raetem Bible longfala taem go finis, hem still garem paoa for changem laef. Olketa wise principle lo Bible stap for olowe and hem barava fitim pipol lo bifor and distaem tu. Taem iumi readim disfala holy buk and ting raonem wat iumi lanem, God wea givim disfala buk hem iusim holy spirit wea garem bigfala paoa for helpem iumi for luksavve hao for followim olketa kaonsel lo Bible. (Sams 119:27; Malakae 3:​16, SIPB; Heb. 4:12) Tru nao, God wea givim kam Bible hem laef and hem laekem tumas for helpem iu. Datwan mekem iumi for laek readim Bible evriday! w23.02 3 ¶5-6

Revelation chapter 13 hem sei datfala mek-seven hed, datfala England-America World Paoa, hem olsem wanfala wild animal wea “garem tufala horn olsem horn bilong wanfala pikinini sheepsheep, bat hem toktok olsem wanfala big snek.” Hem “duim olketa barava spesol saen” and “mekem fire kam daon from skae kasem earth and pipol lukim datwan.” (Rev. 13:​11-15) Revelation chapter 16 and 19 sei disfala wild animal hem wanfala “laea profet.” (Rev. 16:13; 19:20) Daniel tu sei datfala England-America World Paoa bae “spoelem plande samting.” (Daniel 8:​19, 23, 24. SIPB) Datwan nao wanem hem happen lo World War II. Samfala scientist lo England and America wakem olketa atomic bomb, and tufala lo olketa bomb hia nao army dropim lo Japan for endim war lo Pacific. From diswan, hem olsem England-America World Paoa hem mekem “fire kam daon from skae kasem earth.” w22.05 10 ¶9