May

Bihaen John lukim datfala grup wea bae go lo heven, hem lukim “wanfala big crowd.” Bible no talem hao many pipol nao insaed datfala grup. Wat nao John talem abaotem olketa hia? John sei: “Hem olketa wea no dae long datfala big trabol. Olketa wasim kaleko bilong olketa long blood bilong datfala Pikinini Sheepsheep and kaleko bilong olketa kamap white.” (Rev. 7:14) Datfala “big crowd” wea no dae lo datfala big trabol bae gohed laef lo earth and enjoyim staka nambawan blessing. (Sams 37:​9-11, 27-29, SIPB; Provebs 2:​21, 22, SIPB; Rev. 7:​16, 17) Nomata iumi garem hope for go lo heven or iumi bae gohed stap lo earth, iumi shud tingim hao olketa samting wea Revelation chapter 7 storyim hem affectim iumi. Datwan bae hem wanfala barava spesol taem for tufala grup hia. And iumi bae hapi from iumi disaed for sapotim rul blo Jehovah. w22.05 16 ¶6-7

Masbi taem iu mekem eni important disison, iu askem God for givim iu wisdom bikos iu savve iu needim datwan. (Jas. 1:5) King Solomon storyim hao hem barava important for garem wisdom. (Provebs 4:​7, SIPB) Wisdom wea Solomon storyim hem no wisdom blo man, bat hem wisdom wea kam from Jehovah God. Bat waswe, wisdom blo God savve helpem iumi for deal witim olketa difren kaen problem wea iumi feisim distaem? Yes. Wanfala samting wea savve helpem iumi for garem wisdom hem for studyim and followim advaes blo tufala man wea garem bigfala wisdom. Wanfala hem Solomon. Bible sei: “God hemi givim bikfala waes an barava gudfala tingting long King Solomon.” (Fas Kings 4:​29, SIPB) Then narawan hem Jesus wea barava wise winim eni nara man. (Matt. 12:42) Bible profesi olsem abaotem Jesus: “Bae spirit blong [Jehovah] nao hemi stap long hem. . . . Hemi mekem hem fo waes fogud an fo save fogud.”—Aesaea 11:​2, SIPB. w22.05 20 ¶1-2

Nomata iumi young or olo iumi savve markem olketa spiritual goal. Tingim example blo wanfala sista wea nem blo hem Beverley, wea 75 year. Hem garem sik wea mekem hem hard for wakabaot. Bat hem laek for duim moa samting for sapotim Memorial campaign. So hem markem samfala goal. Taem hem kasem olketa goal blo hem lo datfala campaign, datwan mekem hem hapi tumas. Example blo hem encouragem olketa narawan tu for duim moa samting lo ministry. Jehovah tinghae lo wanem olketa olo brata and sista blo iumi duim for hem, nomata olketa no savve duim staka samting bikos lo age blo olketa. (Sams 71:​17, SIPB) Hem gud for markem olketa goal wea iu savve kasem. For example, markem goal for garem olketa gudfala wei wea bae mekem Jehovah hapi lo iu. Or markem goal for lanem samfala samting wea bae helpem organization blo God. Tingim tu olketa wei wea iumi savve helpem olketa brata and sista. Taem iu garem olketa goal hia Jehovah bae blessim iu, and olsem Timothy, evriwan bae “lukim wei wea iu gohed for kamap strongfala Christian.”—1 Tim. 4:15. w22.04 27 ¶18-19

Hao sapos pikinini blo iu disaed for no worshipim Jehovah nomata iu waka hard for teachim hem for lovem Jehovah? No tingse iu no duim gud waka blo iu. Jehovah givim iumi evriwan freedom for disaed sapos iumi bae worshipim God or nomoa. No lus hope hao wanday maet hem kam bak lo Jehovah. Tingim tokpiksa abaotem datfala prodigal son. (Luke 15:​11-19, 22-24) Datfala young man duim staka nogud samting, bat gogo hem kam bak. Parents, iufala garem nambawan privilege for teachim pikinini blo iufala for worshipim Jehovah. (Sams 78:​4-6, SIPB) Datwan hem no isi, bat mifala praisem iufala from iufala waka hard for helpem pikinini blo iufala for lovem Jehovah and for teachim olketa for obeyim hem. Iufala savve sure Jehovah bae hapi lo wanem iufala duim.—Eph. 6:4. w22.05 30-31 ¶16-18

Sapos iumi duim best blo iumi and no trae for winim narawan, datwan bae helpem kongregeson for garem peace and wan mind. Tingim olketa Christian lo first century. Olketa garem difren kaen savve and waka. (1 Cor. 12:​4, 7-11) Datwan no mekem olketa for laek winim narawan or raoa witim each other. Bat Paul encouragem olketa for duim wanem olketa fit for duim for ‘strongim datfala body bilong Christ.’ Paul talem olketa lo Ephesus: “Olketa join duim gud waka bilong olketa for mekem evri part long body join gud tugeta, and taem evri part long body duim gud waka bilong olketa tu, datfala body hem grow and love strongim hem.” (Eph. 4:​1-3, 11, 12) Olketa wea duim wanem Paul talem, mekem kongregeson garem peace and wan mind, wea hem tu wanem hem happen lo olketa kongregeson distaem. Iumi no laek for comparem iumiseleva witim olketa narawan. Bat iumi laek lane from example blo Jesus, and followim olketa gudfala wei blo hem. Taem iumi gohed duim best blo iumi, iumi savve sure Jehovah bae no ‘forgetim waka wea iumi duim.’ (Heb. 6:10) Jehovah hem hapi bikos iumi duim wanem iumi fit for duim. w22.04 14 ¶15-16

Iumi hapi for savve hem no responsibility blo iumi for wakemaot sapos Jehovah bae forgivim samwan wea duim sin! Bat iumi need for disaedem wanfala samting. Taem samwan duim samting againstim iumi wea mekem iumi barava feel nogud, maet hem sei sorre and askem iumi for forgivim hem. Bat samfala taem maet hem no duim olsem. Nomata olsem, iumi savve disaed for forgivim hem wea minim iumi bae no gohed kros lo hem. Hem tru, hem savve tek taem and iumi need for waka hard for duim datwan, especially sapos samting hem duim hem barava nogud. The Watchtower blo September 15, 1994 sei: “Taem iumi forgivim samwan wea duim sin, diswan no minim wanem hem duim hem olraet nomoa. For iumi olketa Christian, taem iumi forgivim samwan, datwan minim iumi trustim Jehovah for judgem datfala situation. Hem nao Judge wea barava raeteous, and hem bae duim wanem hem stret lo raet taem.” w22.06 9 ¶6-7

Jehovah sei lo taem blo iumi hem bae hipimap pipol from evri kantri, tribe, pipol, and languis, and olketa bae wan mind for worshipim hem. Bible kolem olketa hia wanfala “big crowd.” (Rev. 7:​9, 10) Insaed disfala grup hem garem olketa man, woman, and olketa pikinini wea kam from evriwea lo world, and olketa wan mind for worshipim God. (Sams 133:​1, SIPB; John 10:16) Olketa laekem tumas for storyim hope blo olketa for wanfala niu world lo eniwan wea willing for lisin. (Matt. 28:​19, 20; Rev. 14:​6, 7; 22:17) Sapos iu insaed lo datfala big crowd, datfala hope bae hem spesol tumas lo iu. Satan no laekem iumi for garem hope. Goal blo Satan hem for mekem iumi tingse Jehovah bae no keepim olketa promis blo hem. Sapos iumi no garem hope bae iumi wikdaon, and tu, maet iumi stop for worshipim Jehovah. w22.06 20-21 ¶2-3

Hope savve helpem iumi for no wari tumas taem iumi feisim olketa problem bikos iumi savve evri samting bae kamap gud moa. Tingim, Jesus sei bae iumi kasem persecution. (John 15:20) Dastawe hem gud for ting raonem olketa promis blo Jehovah for future mekem iumi no laek givap. Tingim hao hope helpem Jesus for gohed faithful nomata hem mas safa and dae. Lo Pentecost 33 C.E., aposol Peter quotem wanfala profesi from buk blo Psalms wea storyim hope blo Jesus. Hem sei: “Mi garem hope bikos iu bae no leavim mi long grev, and iu bae no letem body bilong wakaman bilong iu wea faithful for rotten. . . . From iu hapi long mi, datwan bae mekem mi hapi tumas.” (Acts 2:​25-28; Sams 16:​8-11, SIPB) Jesus garem strongfala hope hao God bae resurrectim hem, and hem luk forward for stap moa witim Dadi blo hem lo heven.—Heb. 12:​2, 3. w22.10 24-25 ¶4-5

Wantaem, tufala aposol blo hem, James and John, talem mami blo tufala for askem Jesus for givim tufala hae position lo Kingdom. (Matt. 20:​20, 21) Wanem James and John duim showimaot tufala praod and laek for kasem bignem. (Provebs 16:​18, SIPB.) Lo datfala taem, wanem olketa nara aposol duim tu showimaot olketa garem wik point. Tingim wanem olketa duim: “Taem nara tenfala disaepol herem diswan, olketa kros long tufala brata hia.” (Matt. 20:24) Iumi savve imaginim hao James, John, and olketa nara aposol gohed argue witim each other. Hao nao Jesus deal witim wik point blo olketa aposol? Hem no kros and talem hao hem bae lusim olketa aposol and lukaotem olketa nara man wea hambol and wea bae evritaem lovem each other. Bat, Jesus patient for story witim olketa bikos hem savve olketa laek for duim stret samting. (Matt. 20:​25-28) Jesus evritaem kaen lo olketa. w23.03 28-29 ¶10-13

Tingim staka samting wea iu duim finis. Iu maet studyim Bible for samfala year. Datfala study helpem iu for bilivim hao Bible hem kam from God. And tu, datwan helpem iu for savve and lovem Jehovah wea givim kam Bible. Love blo iu for Jehovah hem kamap strong, and datwan mekem iu for dedicate and baptaes distaem. Iu mekem wanfala gud disison! Bifor iu baptaes, maet iu feisim samfala hard taem wea mekem iu laek stop for studyim Bible. Bat from iu baptaes distaem, bae iu feisim samfala niu challenge. Satan bae trae for stopem iu for lovem and worshipim Jehovah. (Eph. 4:14) Iu mas no letem datwan for happen. Wat nao bae helpem iu for gohed faithful lo Jehovah, and for keepim promis blo iu for worshipim hem? Iu mas gohed “waka hard” for kamap mature Christian.—Heb. 6:1. w22.08 2 ¶1-2

Insaed lo famili, each wan garem responsibility for no storyim samfala samting wea famili nomoa shud savve. For example, maet waef garem wanfala wei blo hem wea hasband tingim hem fani, bat hem no laekem hasband for storyim datwan lo narawan bikos hem bae mekem waef for shame. From hasband lovem waef, hem shud no duim eni samting wea bae mekem hem feel nogud. (Eph. 5:33) Olketa teenager tu laekem parents for respectim olketa. Hem gud for parents luksavve lo diswan. Parents shud no storyim mistek blo olketa pikinini lo narawan, wea bae mekem olketa shame. (Col. 3:21) And olketa pikinini need for luksavve samfala samting wea olketa shud no storyim wea maet mekem olketa nara wan lo famili for shame. Taem each wan lo famili no storyim samfala samting wea famili nomoa shud savve, bae famili stap gud tugeta. w22.09 10 ¶9

Jehovah story witim Job, hem remindim hem hao Hem garem bigfala wisdom and hao hem barava lukaftarem olketa animal. And hem storyim olketa spesol samting abaotem staka animal wea hem wakem. (Job 38:​1, 2; 39:​9, 13, 19, 27; 40:15; 41:​1, 2, SIPB) Jehovah iusim tu Elihu, wanfala faithful young man, for strongim and comfortim Job. Elihu talem hem hao Jehovah evritaem rewardim olketa wea faithful. Bat Jehovah iusim Elihu tu for kaonselem Job. Elihu helpem Job for no tingting tumas abaotem hemseleva taem hem remindim Job hao position blo Jehovah hem hae tumas winim iumi olketa man. Jehovah givim tu assignment lo Job for prea for thrifala man wea no talem tru samting lo hem. (Job 42:​8-10, SIPB) Distaem, hao nao Jehovah helpem iumi taem iumi kasem olketa hard taem? Jehovah no story witim iumi olsem hem story witim Job, bat hem givim iumi Bible.—Rome 15:4. w22.08 11 ¶10-11

Kongregeson lo Rome garem olketa Christian wea Jew and no Jew. Taem Law blo Moses hem finis, olketa Christian hia no need for followim nao law wea stopem olketa Jew for no kaikaim samfala kaikai. (Mark 7:19) So start lo datfala taem, samfala Jew Christian feel free for kaikaim evri difren kaen kaikai. Bat olketa nara Jew Christian tingse datwan no stret. Datwan mekem olketa lo kongregeson no wan mind. Paul showimaot hao hem important for keepim peace. Paul helpem olketa Christian hia for luksavve raoa savve spoelem wan mind insaed kongregeson or savve mekem wanfala Christian for no stap gud witim narawan. (Rome 14:​19, 20) Paul tu willing for changem wei blo hem mekem olketa narawan no stambol. (1 Cor. 9:​19-22) Iumi tu savve strongim olketa narawan and keepim peace sapos iumi no forcem olketa narawan for followim tingting blo iumi. w22.08 22 ¶7

Sapos iumi laek for kasem wanfala spiritual goal, iumi bae waka hard for kasem datwan. Iumi mas waka hard tu for followim olketa standard blo Jehovah. And Jehovah bae patient for helpem iumi for duim datwan. (Sams 84:​5, 7, SIPB) Jehovah sei olketa standard blo hem no hard tumas for iumi followim. (1 John 5:3) Olketa standard hia savve protectim iumi evriday. Tingim datfala tokpiksa blo aposol Paul abaotem evri samting wea God givim lo iumi for faet lo spiritual wei. (Eph. 6:​14-18) Wat nao samting wea protectim heart blo soldia? Hem nao “datfala samting wea kavarem chest” blo hem, wea piksarem “wei for raeteous,” or olketa raeteous standard blo Jehovah. Olsem datfala samting wea kavarem chest protectim heart blo soldia, taem iumi followim olketa standard hia datwan bae protectim spiritual heart blo iumi. So hem important for iumi gohed followim olketa standard blo Jehovah!—Provebs 4:​23, SIPB. w22.08 29 ¶13-14

For staka thousand year, olketa gudfala advaes lo Word blo God helpem olketa faithful man and woman. Hao nao olsem? Jehovah mek sure olketa copy blo olketa Holy Raeting hia hem stap. Nomata olketa man wea mekem olketa copy no perfect, olketa barava careful. Wanfala scholar hem sei olsem abaotem olketa Hebrew Scripture: “Iumi fit for sei no eni nara oldfala buk olketa copyim stret olsem Bible.” So iumi sure wat iumi readim lo Bible distaem hem tingting blo Jehovah wea givim kam Bible. Jehovah hem man for givim “evri gud and perfect present.” (Jas. 1:17) Bible hem wanfala lo olketa best present from Jehovah. Taem samwan givim present, datwan savve showimaot sapos man hia savve gud lo wat iumi needim. Datwan semsem witim God wea givim Bible. Taem iumi studyim gud disfala present from Jehovah, iumi savve lanem staka samting abaotem hem. Iumi luksavve hem savve gud lo iumi and wat iumi needim. w23.02 2-3 ¶3-4

Lo datfala Wan Thousand Year Rul blo Christ bae hem barava spesol, taem God start for resurrectim olketa wea dae finis! Iumi evriwan luk forward for lukim moa olketa wea iumi lovem wea dae finis. Jehovah tu luk forward for datfala taem. (Job 14:​15, SIPB) Bae iumi evriwan hapi tumas for lukim olketa moa. “Pipol wea raeteous,” wea nem blo olketa insaed lo buk blo laef, bae garem chance for “kasem laef olowe” taem olketa resurrect. (Acts 24:15; John 5:29) Maet samfala wea iumi lovem wea dae finis bae laef bak lo start blo datfala resurrection. Olketa narawan wea bae laef bak hem “pipol wea no raeteous,” wea hem olketa wea no worshipim Jehovah taem olketa laef. Olketa hia bae “kasem judgment” taem olketa laef bak. Evriwan wea laef bak lo earth bae need for lanem staka samting. (Aesaea 26:9; 61:​11, SIPB) So bigfala teaching waka wea no happen enitaem bifor mas kamap.—Aesaea 11:​10, SIPB. w22.09 20 ¶1-2

Jehovah showimaot hao hem fit for winim staka ruler. Hem helpem olketa Israelite for tekovarem bigfala part blo Promis Land. (Josua 11:​4-6, 20; 12:​1, 7, 9-24, SIPB) Staka taem Jehovah pruvim hao “hemi barava hae tumas.” Wanfala example hem taem King Nebuchadnezzar blo Babylon mekhae lo hemseleva and sei hem garem ‘bikfala paoa from hem nao king, an hem garem hae nem.’ Hem no hambol for sei Jehovah nao fit for kasem praise, so God mekem hem for kamap mentol. Bihaen Nebuchadnezzar gud bak, hem “preisim God hu hemi barava hae tumas” and hem sei “disfala God bae hemi rul olowe.” Hem sei tu: “No eniwan long wol save agensim hem.” (Daniel 4:​30, 33-35, SIPB) Man wea raetem wanfala psalm sei: ‘Olketa pipol wea God siusim fo kamap pipol blong hem, olketa nao hapi.’ (Sams 33:​12, SIPB) Datwan hem barava gud reason for iumi gohed faithful lo Jehovah! w22.10 15-16 ¶13-15

Staka Bible profesi wea kamap tru helpem iumi for trustim olketa promis blo God lo future. Iumi garem sem tingting olsem man wea raetem disfala psalm: “Mi bin weitem yu fo sevem mi . . . Mi gohed fo trastem nomoa olketa toktok blong yu.” (Sams 119:​81, SIPB) Lo Bible, Jehovah promisim iumi “gudfala future” and givim iumi “hope.” (Jer. 29:11) For iumi garem gudfala future iumi no trustim wanem olketa man trae for duim, bat iumi trustim olketa promis blo Jehovah. So iumi laek for studyim gud olketa Bible profesi, bikos datwan bae helpem iumi for trustim toktok blo God lo Bible. Olketa nara reason why iumi savve trustim Bible hem bikos hem helpem pipol wea followim olketa advaes insaed. (Sams 119:​66, 138, SIPB) For example, samfala couple wea gogo for divorce olketa hapi moa distaem from olketa followim olketa advaes lo Bible for no divorce. And olketa pikinini blo olketa hapi and feel sef bikos olketa parents hia lovem and kea for olketa.—Eph. 5:​22-29. w23.01 5 ¶12-13

Ting raonem olketa gud samting wea iuseleva kasem finis from olketa promis lo Bible wea iu lukim hem kamap tru. For example, Jesus promis hao Dadi blo hem bae provaedem olketa samting wea iumi needim. (Matt. 6:​32, 33) And tu, Jesus sei hao Jehovah bae givim holy spirit lo iu sapos iu askem hem. (Luke 11:13) Jehovah duim olketa samting hia wea hem promisim. Iuseleva savve ting raonem tu olketa nara samting wea hem duim finis for iu. For example, hem promis for comfortim iu, forgivim iu, and provaedem spiritual kaikai for iu. (Matt. 6:14; 24:45; 2 Cor. 1:3) Taem iu ting raonem olketa samting wea Jehovah duim finis for iu, datwan bae strongim hope blo iu lo olketa samting wea hem bae duim for iu lo future. Iumi barava sure hao Jehovah evritaem duim wanem hem promisim. Olsem wanfala psalm sei, ‘man wea [“hope”] long Jehovah bae hapi, bikos Jehovah gohed olowe fo kipim olketa promis blong hem.’—Sams 146:​5, 6, SIPB. w22.10 27 ¶15; 28 ¶17

Waswe, datfala profesi abaotem tru worship hem kamap tru distaem tu? Yes! Hao nao olsem? Start lo 1919 C.E., staka million pipol kamap free from Bigfala Babylon, wea hem nao evri false religion lo world. Olketa insaed wanfala spiritual paradaes wea winim datfala Promis Land wea olketa Israelite stap lo hem bifor. (Isa. 51:3; 66:8) Start lo 1919 C.E., olketa anointed wan stap insaed lo wanfala spiritual paradaes. Gogo, “olketa nara sheepsheep,” wea garem hope for stap lo earth tu stap insaed lo datfala spiritual paradaes and kasem staka blessing from Jehovah. (John 10:16; Isa. 25:6; 65:13) Datfala spiritual paradaes hem stap evriwea lo world tu. So distaem, nomata wea nao iumi stap lo world, taem iumi strong for sapotim tru worship, iumi insaed datfala spiritual paradaes nao. w22.11 11-12 ¶12-15

Waswe, iu faendem hem hard for minim hao Jehovah hem “stap for olowe”? (Isa. 40:28) Olketa narawan tu stragol for minim datwan, olsem Elihu wea sei abaotem God: “Yumi nating save kaontem olketa yia blong hem.” (Job 36:​26, SIPB) Maet samfala tingse from olketa faendem hem hard for minim hao God hem stap for olowe, masbi datwan no tru. Bat tingim disfala example. Maet iumi no minim gud hao electricity hem waka, bat datwan no minim electricity hem no stap, iaman? So nomata maet iumi no fit for minim staka samting abaotem Jehovah, datwan no minim hem no stap for olowe. Bible sei hem hard for iumi minim evri samting abaotem Jehovah and olketa wei blo hem. (Rome 11:​33-36) Jehovah nao wakem evri samting lo universe, so hem stap bifor evri samting. Tru nao, hem stap bifor hem “spredim aot skae.”—Jer. 51:15; Acts 17:24. w22.12 2-3 ¶3-4

Samfala taem iumi bae prea on behalf lo olketa narawan. For example, maet wanfala sista invaetem nara sista for kam lo Bible study blo hem and askem hem for prea. Sapos datfala sista no savve gud lo Bible study hia, maet hem laek for prea lo end blo study. Datwan bae helpem hem for savve wanem for storyim lo prea wea bae helpem datfala Bible study. Maet olketa brata prea lo meeting for field service or lo start or end blo kongregeson meeting. Olketa shud tingim datfala prea hem no for kaonselem kongregeson or for mekem announcement. Taem wea olketa markem for song and prea lo kongregeson meeting hem faev minute nomoa, so brata shud no talem “plande toktok” taem hem prea, especially lo start blo meeting.—Matt. 6:7. w22.07 24 ¶17-18

Jesus profesi abaotem hao lo olketa last day olketa barava nogud sik bae “kasem plande pipol.” (Luke 21:11) Hao datwan helpem iumi for no wari tumas? Bae iumi no seke taem outbreak blo wanfala sik kamap, bikos iumi luksavve olketa samting hia happen olsem Jesus talem. So bae iumi followim advaes wea Jesus talem for olketa wea stap lo olketa last day for “no fraet.” Taem outbreak blo wanfala sik kamap, maet iumi no savve duim evri samting wea iumi duim bifor. Nomata olsem, hem gud for gohed duim personal study and attendim olketa meeting. Iumi savve lukim lo olketa video experience blo olketa brata and sista wea gohed faithful, nomata olketa kasem semkaen hard taem, and iumi savve read abaotem tu lo olketa pablikeson blo iumi. w22.12 17 ¶4, 6

Jacob barava lovem tumas son blo hem Joseph. (Gen. 37:​3, 4) From datwan, olketa brata blo Joseph jealous lo hem. Gogo, olketa salem Joseph lo samfala Midianite bisnisman. Olketa bisnisman hia tekem Joseph go farawe lo Egypt, and lo there, olketa salem hem moa lo Potiphar, wea hem komanda blo olketa gard blo Pharaoh. Laef blo Joseph hem change kwiktaem tumas! Hem son wea dadi lovem tumas, then seknomoa hem slave blo wanfala Egyptian. (Gen. 39:1) Samfala taem iumi feisim olketa hard taem wea Bible sei hem savve “kasem olketa nara man tu,” wea minim olketa problem wea savve kasem evriwan. (1 Cor. 10:13) Or iumi maet kasem hard taem bikos iumi olketa disaepol blo Jesus. For example, maet pipol tok spoelem, againstim, or persecutim iumi bikos iumi faithful lo God. (2 Tim. 3:12) Jehovah savve gohed helpem iumi lo eni hard taem wea iumi feisim. w23.01 14-15 ¶3-4

Samfala taem maet iumi need for story witim wanfala brata or sista wea mekem iumi feel nogud. Bat firstaem, hem gud for ting raonem olketa kwestin olsem: ‘Waswe, mi savve gud lo wat hem happen?’ (Provebs 18:​13, SIPB) ‘Waswe, mi tu duim sem mistek bifor?’ (Eklesiastes 7:​21, 22, SIPB) ‘If mi go story witim hem, waswe, bae mi stretem or mekem problem worse go moa?’ Taem iumi ting raonem olketa kwestin hia, maet iumi luksavve love savve helpem iumi for forgetim go nomoa wanem hem happen. Each wan lo iumi showimaot hao iumi tru follower blo Jesus taem iumi showimaot trufala love lo olketa brata and sista nomata olketa garem wik point. Taem iumi duim datwan, maet iumi helpem olketa narawan for luksavve lo tru religion and joinim iumi for worshipim Jehovah. So iumi laek disaed strong for gohed showimaot love wea helpem pipol for luksavve lo olketa tru Christian. w23.03 31 ¶18-19

Bible showimaot barava nambawan wei blo God wea hem nao love. Bikos Jehovah lovem iumi, hem no storyim staka samting tumas winim wat iumi fit for minim. (John 21:25) Taem Jehovah story lo iumi hem duim lo wei wea showim respect, wea datwan showimaot tu hem lovem iumi. Insaed Bible, hem no givim wanfala long list blo olketa rul for kontrolem evri samting lo laef blo iumi. Bat hem laekem iumi for ting raonem olketa laef story, olketa interesting profesi, and gudfala kaonsel, for helpem iumi mekem gud disison. Datwan mekem iumi for lovem and obeyim God from heart blo iumi. Bible showim hao Jehovah barava tingim iumi. Hao nao iumi savve? Insaed Bible iumi savve read abaotem staka story wea pipol storyim feeling blo olketa. Iumi minim feeling blo olketa bikos olketa “olsem iumi nomoa.” (Jas. 5:17) And winim datwan, taem iumi lukim hao Jehovah treatim olketa pipol hia wea olsem iumi, datwan helpem iumi for luksavve ‘Jehovah hem lovem iumi and hem showimaot mercy.’—Jas. 5:11. w23.02 6 ¶13-15

Last buk lo Bible hem start witim disfala toktok: “Olketa toktok hia hem olketa samting wea Jesus Christ showimaot klia long distaem. Jesus kasem olketa samting hia from God for showim olketa wakaman bilong God olketa samting wea no longtaem nomoa mas happen.” (Rev. 1:1) So iumi barava interest lo olketa samting wea happen lo world distaem and iumi laek for savve hao olketa samting hia maet fulfillim Bible profesi. And maet iumi barava laek for storyim olketa samting hia witim olketa narawan. Taem iumi discussim wanfala Bible profesi, hem gud for iumi no trae for guessim wat bae happen. Why nao olsem? Bikos iumi no laek for talem eni samting wea bae divaedem kongregeson. For example, iumi maet herem hao olketa world leader storyim hao olketa bae finisim wanfala war and mekem peace and security for kamap. Winim wei for guessim hao diswan nao fulfillim profesi lo 1 Thessalonica 5:​3, iumi need for gohed up-to-date witim latest information lo olketa pablikeson blo iumi. Taem information wea iumi storyim hem kam from organization blo Jehovah, iumi help for mekem kongregeson for gohed wan mind and garem sem “tingting” abaotem samting.”—1 Cor. 1:10; 4:6. w23.02 16 ¶4-5

Why nao iu lovem Jesus Christ? Jesus mekhae lo hambol fasin and hem defendim truth and wanem hem stret. If iu lovem truth and wanem hem stret, iu bae lovem Jesus Christ tu, bikos hem no fraet for defendim truth and samting wea stret. (John 18:37) Bat hao nao Jesus mekhae lo wei for hambol? Jesus showimaot gudfala example lo wei for hambol. Olsem example, hem evritaem mekhae lo Dadi blo hem, no hemseleva. (Mark 10:​17, 18; John 5:19) Taem iu tingim Son blo God hem hambol olsem, masbi hem mekem iu for lovem hem and followim example blo hem. Why nao Jesus hem hambol? Bikos hem lovem and followim example blo Dadi blo hem wea hambol. (Sams 18:​35, SIPB; Heb. 1:3) Waswe, iu lovem Jesus wea followim gud olketa wei blo Jehovah? w23.03 3-4 ¶6-7

Bible storyim hao “pipol wea raeteous” and “pipol wea no raeteous” bae laef bak and garem chance for laef olowe lo earth. “Pipol wea raeteous” hem olketa wea faithful for worshipim Jehovah taem olketa laef. Bat “pipol wea no raeteous” olketa no worshipim Jehovah taem olketa laef. From evriwan hia bae resurrect, hao, iumi savve sei nem blo olketa hem stap insaed buk blo laef? Bifor “pipol wea raeteous.” olketa dae, Jehovah raetem nem blo olketa lo buk blo laef. Taem olketa dae, waswe, Jehovah aotem nem blo olketa from datfala buk? Nomoa, bikos lo tingting blo Jehovah, hem olsem olketa “laef nomoa.” Bible sei Jehovah “hem no God bilong olketa wea dae finis, bikos long tingting bilong hem, evriwan hia laef nomoa.” (Luke 20:38) Diswan minim taem olketa wea raeteous olketa laef bak lo earth, nem blo olketa bae still stap lo buk blo laef, bat hem olsem Jehovah raetem yet lo pencil.—Luke 14:14. w22.09 16 ¶9-10

Jehovah laekem first man, Adam, for enjoyim creation blo Hem. So God wakem hem and putim hem insaed wanfala beautiful paradaes and givim hem waka for lukaftarem and expandim paradaes hia. (Gen. 2:​8, 9) Adam mas hapi tumas taem hem watchim olketa seed grow and flaoa open. Hem spesol samting for Adam lukaftarem garden blo Eden! Jehovah talem Adam tu for nemim olketa animal. (Gen. 2:​19, 20) Hem isi nomoa for Jehovah chusim nem for olketa animal, bat hem givim waka hia for Adam. Bifor Adam chusim nem for each animal, hem mas studyim gud wei and lukluk blo olketa animal hia. Adam mas barava enjoyim datwan. Iumi sure datwan helpem hem for luksavve lo wisdom blo Jehovah and hao creation blo Hem interesting and barava luk naes. w23.03 15 ¶3

Feet blo datfala image hem stand for England-America World Paoa and hem last world paoa wea Bible profesi abaotem. (Daniel 2:​31-33, SIPB) No eni nara gavman blo man moa bae changem hem. Bat Kingdom blo God bae distroem England-America World Paoa and evri nara gavman blo man lo Armageddon. (Rev. 16:​13, 14, 16; 19:​19, 20) Wat nao disfala profesi helpem iumi for luksavve lo hem? Profesi blo Daniel storyim nara samting wea pruvim iumi stap lo olketa last day. Winim 2,500 year go finis, Daniel profesi abaotem hao bihaen Babylon hem rul, fofala nara world paoa bae kamap wea rul blo olketa bae affectim pipol blo God. And tu, datfala profesi showimaot last wan lo fofala world paoa hia, hem nao England-America World Paoa. Iumi kasem comfort and garem hope from klosap nao datfala Kingdom bae finisim evri gavman blo man and rul ovarem full earth. w22.07 4 ¶9; 5 ¶11-12