June

Job hem fren gud witim Jehovah, garem bigfala famili wea stap gud tugeta, and hem wanfala rich man. (Job 1:​1-5, SIPB) Bat insaed wanfala day nomoa, Job lusim klosap evri samting wea hem garem. Firstaem, hem lusim evri animal blo hem. (Job 1:​13-17, SIPB) Then, evri pikinini wea hem lovem olketa dae. Tingim feeling blo Job and waef blo hem taem tufala faendaot tenfala pikinini evriwan dae from haos hem foldaon antap lo olketa. Tufala mas barava seke and sorre fogud. Dastawe, Job brekem kaleko blo hem, and hem foldaon lo graon and krae! (Job 1:​18-20, SIPB) Next samting, Satan mekem full body blo Job for boela. Datwan mekem pipol for chikim hem. (Job 2:​6-8, SIPB) Firstaem, pipol lo community barava respectim hem and savve kam lo hem for kasem advaes. (Job 31:18) Bat bihaen hem sik, pipol no laek for kam klosap lo hem. Olketa brata blo hem, olketa fren, and olketa wakaman tu les lo hem!—Job 19:​13, 14, 16, SIPB. w22.06 21 ¶5-6

Bihaen iumi baptaes, iumi evriwan need for followim advaes wea aposol Paul givim lo olketa Christian lo Ephesus. Hem encouragem olketa for kamap olketa “mature” Christian. (Eph. 4:13) Datwan hem minim olketa need for gohed markem olketa spiritual goal. Iu lovem Jehovah finis, bat iu savve strongim datfala love. Hao nao olsem? Aposol Paul storyim wanfala wei wea iu savve duim datwan lo Philippi 1:9. Paul prea for love blo olketa Christian lo Philippi for “gohed kamap big.” So datwan showimaot iu savve strongim go moa love blo iu for Jehovah. Iu savve duim datwan taem iu kasem “stretfala savve and gudfala tingting.” Taem iu savve gud lo Jehovah bae iu barava lovem hem, tinghae lo olketa wei blo hem, and hao hem duim olketa samting. From iu lovem hem, bae iu laek for mekem hem hapi and no laek duim eni samting wea bae mekem hem no hapi. And tu, bae iu laek for waka hard for savve lo wanem hem laekem iu for duim and hao for duim datwan. w22.08 2-3 ¶3-4

Toktok insaed lo disfala buk hem for iumi wea worshipim God. And from olketa profesi lo Revelation hem kamap tru distaem, datwan mekem iumi barava interest lo disfala Bible buk. Aposol John storyim datwan taem hem sei: “Holy spirit hem mekem mi lukim olketa samting wea bae happen long day bilong Lord.” (Rev. 1:10) Taem John raetem toktok hia lo samting olsem 96 C.E., datfala “day blo Lord” hem farawe yet. (Matt. 25:​14, 19; Luke 19:12) Olketa nara profesi lo Bible showimaot datfala day hem start lo 1914, taem Jesus kamap King lo heven. Olketa profesi lo Revelation wea affectim pipol blo God, start for kamap tru lo 1914. Distaem iumi barava insaed lo “day blo Lord”!—Rev. 1:3. w22.05 2 ¶2-3

Taem datfala wild animal and laea profet laef yet, datfala man hem torowem tufala long lake bilong fire wea salfa nao mekem datfala fire gohed for laet. So taem olketa gavman gohed for rul yet, God bae finisim olketa for olowe. Hao nao diswan affectim iumi? Iumi olketa Christian mas faithful lo God and Kingdom blo hem. (John 18:36) Iumi mas gohed neutral and no teksaed lo olketa samting blo politik. Bat hem no isi for neutral bikos olketa gavman lo world expectim pipol for duim and talem olketa samting for sapotim olketa. Olketa wea sapotim olketa gavman kasem nao mark blo datfala wild animal. (Rev. 13:​16, 17) Jehovah bae no hapi lo eniwan wea kasem datfala mark, and hem bae no kasem laef olowe. (Rev. 14:​9, 10; 20:4) So hem important tumas for iumi gohed neutral, nomata maet gavman trae forcem iumi for sapotim olketa! w22.05 10-11 ¶12-13

Wanfala goal wea iu savve markem hem for kamap gud lo samting wea bae helpem organization. Datwan bae helpem iumi for duim moa samting for Jehovah. Tingim, organization needim staka wakaman for buildim olketa Bethel Office, Assembly Hall, and Kingdom Hall. Staka lo olketa hia lanem hao for duim disfala waka from olketa waka witim olketa brata and sista wea garem experience. Distaem, olketa brata and sista lanem hao for duim maintenance lo olketa Assembly Hall and olketa Kingdom Hall. Jehovah God wea hem “King for olowe” and Christ Jesus wea hem “King bilong olketa . . . king,” duim olketa nambawan samting from tufala iusim olketa brata and sista wea garem bigfala savve. (1 Tim. 1:17; 6:15) Iumi laek for waka hard and iusim savve blo iumi for mekhae lo Jehovah, and no iumiseleva.—John 8:54. w22.04 24 ¶7; 25 ¶11

Solomon hem rich tumas, hem stap lo naes haos, and hem garem evri material samting wea hem enjoyim. (Fas Kings 10:​7, 14, 15, SIPB) Bat Jesus no ownim eni haos and no garem staka material samting tu. (Matt. 8:20) Nomata olsem, tufala evriwan garem balance tingting abaotem material samting bikos tufala garem wisdom blo Jehovah God. Solomon sei iumi savve iusim selen for baem olketa samting wea iumi needim for laef, and maet samfala samting wea iumi laekem tu. Nomata Solomon hem rich and garem staka samting, hem luksavve olketa nara samting hem important winim selen. For example, hem sei: “Hem gud for man garem gudfala nem winim for hem kamap barava rich.” (Prov. 22:1) Solomon luksavve tu hao pipol wea laekem selen tumas maet olketa no hapi or no savve satisfae witim wanem olketa garem. (Eklesiastes 5:​10, 12, SIPB) And hem sei iumi shud no depend tumas lo selen, bikos nomata haomas selen iumi garem hem savve kwiktaem nomoa for finis.—Provebs 23:​4, 5, SIPB. w22.05 21 ¶4-5

Taem iumi ting raonem olketa blessing wea iumi kasem from Jehovah, datwan bae mekem iumi fren gud witim hem. And taem iumi ting raonem olketa blessing wea bae iumi kasem lo future, datwan bae strongim hope blo iumi. Evri samting hia bae mekem iumi hapi for gohed worshipim Jehovah distaem. Taem Jehovah finisim disfala nogud world, Isaiah sei hem olsem hem “getap” for sevem iumi. Iumi sure Jehovah hem “God blo justice” and hem bae finisim world blo Satan. (Isa. 25:9) Iumi patient for weit lo Jehovah for datfala day wea hem bae sevem iumi. Bat distaem iumi gohed and no givap for prea lo Jehovah, studyim Bible and followim wanem iumi lanem, and ting raonem evri blessing wea iumi kasem. Taem iumi duim olketa samting hia, Jehovah bae helpem iumi for no givap and gohed hapi lo worship blo iumi. w22.11 13 ¶18-19

Nomata Bible no storyim wanem hem happen lo day wea Timothy baptaes, masbi mami blo hem Eunice, barava hapi for lukim hem baptaes. (Provebs 23:​25, SIPB) Eunice teachim Timothy for lovem Jehovah and Son blo hem Jesus Christ. Eunice and hasband blo hem no stap lo sem religion. Hasband hem wanfala Greek man, and Eunice and mami blo hem tufala Jew. (Acts 16:1) Luk olsem Timothy hem teenager taem Eunice and Lois kamap Christian, bat dadi no kamap Christian. Which religion nao bae Timothy chusim? Olketa mami distaem tu lovem pikinini blo olketa. Olketa laekem tumas for helpem pikinini for fren gud witim Jehovah. And God tinghae tumas lo datwan. (Provebs 1:​8, 9, SIPB) Jehovah helpem staka mami taem olketa teachim pikinini for lovem and worshipim Jehovah. w22.04 16 ¶1-3

Klosap nao Jehovah bae mekem olketa gavman for “garem tingting for duim samting wea hem laekem.” Datwan bae mekem “tenfala king” wea piksarem olketa gavman, for attakim olketa false religion and distroem olketa. (Rev. 17:​1, 2, 12, 16) Hao nao iumi savve Bigfala Babylon hem klosap for distroe? Tingim hao Euphrates River protectim datfala taon blo Babylon bifor. Bible buk Revelation storyim hao “olketa wata” hem piksarem staka million pipol wea sapotim Bigfala Babylon. (Rev. 17:15) Bat hem sei tu olketa wata hia bae kamap “drae,” wea showimaot staka pipol wea sapotim olketa false religion bae lusim olketa. (Rev. 16:12) Distaem disfala profesi kamap tru, bikos staka pipol no interest lo religion and olketa depend lo olketa nara samting for mekem olketa hapi. w22.07 5-6 ¶14-15

Taem iumi forgive, iumi showimaot iumi tinghae lo mercy blo Jehovah. Jesus comparem Jehovah witim wanfala boss wea sei wanfala wakaman blo hem no need for changem bak big kaon blo hem. Bat datfala wakaman no showimaot mercy lo wanfala wakaman wea kaonem smol selen nomoa lo hem. (Matt. 18:​23-35) Wat nao iumi lanem from tokpiksa blo Jesus? Sapos iumi tinghae lo bigfala mercy blo Jehovah for iumi, bae iumi laek for forgivim narawan. (Sams 103:​9, SIPB) Wanfala Wastaoa lo bifor yet hem sei: “Nomata iumi forgivim olketa narawan staka taem, datwan bae no kasem nao hao God forgivim and showimaot mercy lo iumi bikos lo sakrifaes blo Christ.” If iumi forgivim narawan, Jehovah bae forgivim iumi. Jehovah bae showimaot mercy lo olketa wea showimaot mercy lo narawan. (Matt. 5:7) Prea wea Jesus teachim lo olketa disaepol showimaot datwan.—Matt. 6:​14, 15. w22.06 10 ¶8-9

Taem Jesus kam lo earth, hem barava followim wei blo Dadi blo hem. (John 14:9) So taem iumi lane abaotem hem, bae iumi savve lo Jehovah God and lovem hem. Iumi kasem gud samting tu from olketa teaching and direction blo Jesus from hem nao leadim kongregeson distaem. Hem teachim iumi lo wanem for duim for mekem Jehovah hapi. And, iumi evriwan kasem gud samting from dae blo Jesus. Bihaen Jehovah resurrectim Jesus, Jehovah acceptim perfect sakrifaes blo Son blo hem, wea “mekem iumi klin from evri sin bilong iumi.” (1 John 1:7) Distaem Jesus hem wanfala King wea no savve dae. And klosap nao, hem bae pisisim hed blo datfala snek. (Jenesis. 3:​15, SIPB) Iumi bae hapi tumas taem Jesus distroem Satan! Jehovah bae duim samting for mekem“evri nation lo earth” for kasem staka blessing. Go kasem datfala taem, iumi mas no givap. w22.07 18 ¶13; 19 ¶19

Taem iumi markem eni goal, iumi mas luksavve maet samfala taem iumi need for changem samfala plan blo iumi, bikos olketa samting lo laef savve change. For example, aposol Paul hem help for startim wanfala niu kongregeson lo Thessalonica. Bat samfala wea againstim Paul forcem hem for lusim Thessalonica. (Acts 17:​1-5, 10) Sapos Paul gohed for stap, bae hem putim laef blo olketa brata and sista lo danger. Nomata plan blo Paul hem change, hem still garem goal for helpem olketa brata and sista. So gogo hem sendem Timothy for helpem olketa brata and sista lo Thessalonica. (1 Thess. 3:​1, 2) Masbi olketa brata and sista hia barava hapi tumas! Iumi savve lane from wanem hem happen lo Paul lo Thessalonica. Maet iumi garem goal for duim moa samting lo waka blo Jehovah, bat samting lo laef maet change wea mekem iumi no kasem datfala goal. (Eklesiastes 9:​11, SIPB) Sapos samting olsem happen lo iu, willing for change and garem nara goal wea iu fit for kasem. w22.04 25-26 ¶14-15

Jehovah comfortim iumi from hem givim iumi hope for future. Hem gud for tingim samfala scripture lo Bible wea savve comfortim iumi taem iumi kasem olketa hard taem. Wanfala scripture sei, no eni samting, wea minim tu olketa hard taem, “savve stopem iumi for no kasem love bilong [Jehovah].” (Rome 8:​38, 39) Jehovah sei tu hem “redi nomoa fo helpem eniwan hu hemi kol go long hem” lo prea. (Sams 145:​18, SIPB) Jehovah sei sapos iumi trustim hem bae iumi savve deal witim eni hard taem, and savve gohed hapi. (1 Cor. 10:13; Jas. 1:2) And tu, Bible remindim iumi hao olketa hard taem wea iumi kasem hem for shortfala taem nomoa taem iumi markem witim laef for olowe. (2 Cor. 4:​16-18) Jehovah sei tu bae hem finisim Satan and olketa narawan wea kosim olketa samting wea mekem iumi for safa. (Sams 37:​10, SIPB) Waswe, iu memorizim samfala scripture wea bae helpem iu for deal witim eni hard taem wea bae kasem iu? w22.08 11 ¶11

Waswe, iu wari nogud iu no savve gohed for followim olketa raeteous standard blo Jehovah evriday and evri year? Jehovah sei iumi savve gohed followim stretfala wei, olsem “wev hemi gohed fo brek olowe long sanbis.” (Aesaea 48:​18, SIPB) Tingim iu standap lo saedsea and lukluk lo olketa wave wea gohed brek olowe lo sandbis. Taem iu lukim datwan, waswe, bae iu tingse wanday olketa wave hia bae stop for kam? Nomoa! Iu savve sure no enitaem bae olketa stop for kam. Olsem olketa wave lo sea wea gohed for brek olowe lo sandbis, iu savve gohed for followim olketa standard blo Jehovah! Wat nao bae helpem iu for duim datwan? Taem iu mas disaedem samting, tingim firstaem wat nao Jehovah laekem iu for duim, then duim datwan. Nomata maet iu mas mekem wanfala hard disison, iu savve sure Jehovah bae evritaem strongim and helpem iu for followim olketa standard blo hem.—Aesaea 40:​29-31, SIPB. w22.08 30 ¶15-17

Lo end blo datfala 1,000 year, Satan bae trae for mekem evriwan wea perfect for no faithful lo Jehovah. Lo datfala last test, evriwan hia bae garem chance for showimaot sapos olketa barava sapotim rul blo God and tinghae lo nem blo hem. (Rev. 20:​8-10) Wat olketa duim lo datfala taem bae mekem Jehovah for disaed sapos nem blo olketa bae stap for olowe lo buk blo laef or nomoa. Bible storyim hao samfala pipol bae rejectim rul blo Jehovah olsem Adam and Eve. Wat nao bae happen lo olketa? Revelation 20:15 sei: “Eniwan wea nem bilong hem no stap long datfala buk bilong laef, hem torowem hem long lake bilong fire.” Datwan minim olketa bighed pipol hia bae finis for olowe. Nomata olsem, staka pipol bae gohed faithful lo Jehovah. w22.09 23-24 ¶15-16

Samfala insaed kongregeson lo first century sei olketa wea no Jew wea kamap Christian mas circumcise, maet for mekem olketa Jew no tok spoelem olketa. (Gal. 6:12) Aposol Paul no agree witim datwan, bat hem no forcem olketa for followim tingting blo hem. Hem hambol for askem advaes lo olketa aposol and elder lo Jerusalem. (Acts 15:2) From Paul duim olsem, olketa Christian hia gohed hapi and keepim peace insaed kongregeson. (Acts 15:​30, 31) Sapos iumi no agree witim narawan abaotem wanfala important samting, hem gud for askem advaes from olketa elder, for keepim peace insaed kongregeson. Staka taem olketa savve faendem advaes from Bible lo olketa pablikeson or lo olketa gaedlaen wea kam from organization. Sapos iumi followim olketa advaes hia and no forcem narawan for followim tingting blo iumi, bae iumi help for keepim peace insaed kongregeson. w22.08 22 ¶8-9

Samfala taem iumi laek talem wanfala gud fren samting wea happen lo laef blo iumi, wea iumi no laekem narawan for savve. Maet datwan hem no isi for duim sapos iumi no getius for storyim feeling blo iumi lo narawan. Sapos iumi story lo hem, then iumi faendaot hao hem storyim datwan lo narawan, iumi bae feel nogud. Bat iumi barava tinghae lo samwan wea iumi savve storyim feeling blo iumi lo hem and hem bae no storyim datwan lo narawan! Olketa elder wea no storyim olketa confidential samting, olketa olsem ‘strongfala sefples fo haed from wind’ for iumi. (Aesaea 32:​2, SIPB) Iumi savve trustim olketa bikos iumi sure bae olketa no storyim confidential samting wea iumi talem lo olketa. Iumi shud no putim pressure lo olketa for storyim olketa confidential samting. And tu, iumi tinghae tumas lo waef blo olketa elder bikos olketa no trae for faendaot lo olketa confidential information abaotem olketa narawan from hasband blo olketa. And olketa waef luksavve hem blessing for no savve lo olketa confidential information abaotem olketa brata and sista. w22.09 11 ¶10-11

Iumi sure Jehovah bae rescuem olketa faithful pipol blo hem lo taem blo “bigfala trabol.” (Matt. 24:21; Daniel 12:​1, SIPB) Hem bae duim datwan taem olketa nation, wea Bible kolem Gog blo Magog, attakim olketa wea faithful lo Jehovah evriwea lo world. Nomata sapos evri 193 nation wea member blo United Nations distaem olketa part lo datfala Gog blo Magog, bae olketa no savve winim Jehovah and bigfala army blo hem lo heven! Jehovah promis olsem: “Bae mi somaot long evri kantri wea mi holi an mi garem evri paoa. From samting ya nao, bae olketa jes savegud dat mi nao [Jehovah].” (Esikiel 38:​14-16, 23, SIPB). Bihaen Gog attakim pipol blo Jehovah, war blo Armageddon bae start and Jehovah bae distroem “olketa king evriwea long earth.” (Rev. 16:​14, 16; 19:​19-21) Bat, “olketa wea raeteous bae stap long earth, and olketa wea faithful bae stap long hem.”—Prov. 2:​21, ftn. w22.10 16-17 ¶16-17

Iumi no savve lukim wat nao insaed heart blo olketa. Jehovah nomoa fit for “luksavve lo why man hem duim samting.” (Prov. 16:2) Jehovah lovem evri difren kaen man, nomata wanem nao baekgraon or culture blo olketa. And Jehovah encouragem iumi for “mas lovem” olketa. (2 Cor. 6:13) Iumi lovem evriwan lo spiritual famili blo iumi and no laek for judgem olketa. Iumi mas no judgem tu pipol wea no insaed truth. Waswe, hem stret for judgem wanfala relative wea no insaed truth and sei, “Hard tumas for man ia kam insaed lo truth”? Nomoa. Datwan bae showimaot iumi praod and tingse iumi nao raeteous. Jehovah hem still givim chance lo “olketa man long evri ples” for repent. (Acts 17:30) Tingim evritaem hao lo tingting blo Jehovah man wea tingse hem raeteous hem nao no raeteous. Taem iumi tinghae lo olketa raeteous standard blo Jehovah, iumi bae hapi and olketa narawan bae lovem iumi and lovem Jehovah from olketa lukim gudfala example wea iumi showimaot. w22.08 31 ¶20-22

Iumi expectim samfala pipol bae againstim iumi taem iumi duim preaching waka and luk olsem datwan bae worse go moa. (Daniel 11:​44, SIPB; 2 Tim. 3:12; Rev. 16:21) Nomata olsem, iumi savve sure Jehovah bae helpem iumi. Why nao iumi sure lo datwan? Bikos Jehovah evritaem helpem pipol blo hem for duim assignment blo olketa, nomata samfala taem hem no isi. Tingim profet Ezekiel taem hem preach lo olketa Jew wea stap lo Babylon. Wat kaen pipol nao Ezekiel preach lo olketa? Jehovah sei olketa “bikhed,” “nating tinghae,” and “barava againstim” hem. Olketa olsem scorpion and nila grass bikos olketa laek spoelem Ezekiel. Dastawe staka taem Jehovah talem Ezekiel for “no fraetem olketa”! (Esikiel 2:​3-6, SIPB) Ezekiel fit for duim assignment blo hem for preach bikos (1) Jehovah sendem hem, (2) holy spirit blo God helpem hem, and (3) toktok blo God strongim hem. w22.11 2 ¶1-2

Klosap evri samting wea laef gogo bae olketa dae. Jehovah wakem olketa human being nomoa for laef olowe. Nara samting, Jehovah wakem iumi witim feeling for no laek dae. Bible sei hao God “putim feeling for laek laef olowe insaed heart” blo iumi. (Eccl. 3:11) Dastawe Bible sei dae hem enemy blo iumi. (1 Cor. 15:26) If iumi kasem big sik, hard for iumi no warim datwan and weit nomoa for dae. Bae iumi go lukim doctor and maet tekem medicine for treatim datfala sik. From iumi no laek dae iumi bae duim staka samting for helpem iumi kamap gud. And taem samwan wea iumi lovem hem dae, nomata hem young or olo, iumi savve sorre tumas, iaman? (John 11:​32, 33) Sapos hem no plan blo God for iumi laef olowe, hard for hem wakem iumi witim feeling for no laek dae and for garem body and brain wea fit for gohed laef. w22.12 3 ¶5; 4 ¶7

From iumi stap lo olketa taem wea no isi, maet staka brata and sista blo iumi sik, fraet, or lonely. Taem outbreak blo wanfala sik kamap, nomata iumi stap witim olketa brata and sista maet iumi need for duim social distancing, bat hem important for gohed story witim olketa. Maet iu feel olsem aposol John wea laekem tumas for go lukim fren blo hem Gaius. (3 John 13, 14) Bat John no savve duim datwan, so hem raetem wanfala leta lo Gaius. Sapos iumi no savve go lukim olketa brata and sista, olketa nara wei stap for iumi contactim olketa. Taem iumi duim datwan, bae iumi no feel lonely and bae iumi garem peace. If iumi barava warim samting, iumi savve story witim olketa elder and olketa bae hapi for encouragem iumi.—Aesaea 32:​1, 2. w22.12 17-18 ¶6-7

Bible showimaot olketa chainim tufala leg blo hem and putim iron raonem nek blo hem. (Sams 105:​17, 18, SIPB) So situation blo Joseph hem worse go moa. Firstaem hem slave wea olketa trustim, then end ap hem insaed prison nao. Waswe, enitaem iu feisim wanfala situation wea gohed for kamap worse nomata iu gohed for prea? Datwan savve happen. Jehovah no protectim iumi from olketa hard taem insaed disfala world wea Satan rulim. (1 John 5:19) Nomata olsem, iumi sure hao Jehovah hem savve lo situation blo iumi and hem kea for iumi. (Matt. 10:​29-31; 1 Pet. 5:​6, 7) And tu, hem promis olsem: “Bae mi nating lusim iu.” (Heb. 13:5) Jehovah savve helpem iumi for no givap nomata luk olsem iumi no wei nao. w23.01 15-16 ¶7-8

Bible sei hao God bae no lusim iumi taem iumi duim olketa mistek. Olketa Israelite sin againstim Jehovah staka taem, nomata olsem, taem olketa barava repent, God forgivim olketa. Olketa Christian lo first century tu luksavve hao God barava lovem olketa. Holy spirit helpem aposol Paul for talem olketa nara Christian for “forgivim and comfortim” man wea duim serious sin bat wea hem repent. (2 Cor. 2:​6, 7; 1 Cor. 5:​1-5) Iumi barava hapi for savve hao Jehovah no rejectim olketa wea worshipim hem bikos lo mistek wea olketa duim! Bat hem laek for helpem olketa, stretem olketa, and invaetem olketa for fren bak witim hem. Hem promis for duim sem samting distaem for olketa wea repent. (Jas. 4:​8-10) Bible teachim iumi abaotem wisdom, justice, and love blo God. Datfala buk showim hao Jehovah laekem iumi for savve lo hem and for fren witim hem. w23.02 7 ¶16-17

Iumi garem gudfala reason for interest lo olketa samting wea happen lo world distaem wea gohed fulfillim Bible profesi. For example, Jesus talem samfala samting wea bae happen for helpem iumi luksavve dat klosap nao world blo Satan bae finis. (Matt. 24:​3-14) Aposol Peter encouragem iumi for ting raonem gud olketa samting wea fulfillim olketa Bible profesi mekem iumi gohed for garem strong faith. (2 Pet. 1:​20, 21) Aposol Peter helpem iumi for gohed garem balance tingting taem iumi ting raonem olketa Bible profesi. Hem encouragem iumi for “tingim evritaem datfala day bilong Jehovah.” (2 Pet. 3:​11-13) Iumi laek for duim datwan, no bikos iumi trae for savve lo “day and taem” wea Jehovah markem Armageddon for kam, bat bikos iumi laek for iusim lelebet taem wea stap for iumi “holy and duim samting wea showimaot [iumi] faithful long God.” (Matt. 24:36; Luke 12:40) Iumi laek for gohed garem gudfala wei and for mek sure evri samting wea iumi duim for Jehovah hem bikos iumi lovem hem. For duim datwan, iumi mas gohed lukluk gud lo iumiseleva. w23.02 16 ¶4, 6

“Olketa nara sheepsheep” need for duim samfala samting distaem for qualify for stap lo Paradaes. Iumi need for showimaot iumi tinghae lo Jesus. For example, iumi showimaot iumi lovem hem lo wanem iumi duim for helpem olketa anointed brata blo hem. Jesus sei bae hem judgem olketa nara sheepsheep lo hao olketa treatim olketa anointed wan. (Matt. 25:​31-40) Iumi savve helpem olketa taem iumi busy for duim preaching and teaching waka. (Matt. 28:​18-20) Bifor iumi go insaed Paradaes, iumi laek for garem olketa gudfala wei wea Jehovah laekem. So hem gud for waka lo datwan distaem, olsem for traem best for honest lo toktok blo iumi and wanem iumi duim, and no ova tumas lo olketa samting. And iumi shud faithful lo Jehovah and marit partner blo iumi, and loyal lo olketa brata and sista. Sapos iumi waka hard distaem for followim olketa standard blo God nomata iumi stap lo disfala nogud world, hem bae isi for duim datwan lo Paradaes. Iumi savve duim olketa nara samting tu for showimaot iumi redi for stap lo Paradaes. w22.12 11-12 ¶14-16

Iumi laekem Jesus for King blo iumi bikos hem nao best Ruler. Jehovah nao trainim and appointim Son blo hem for rul. (Isa. 50:​4, 5) Tingim tu hao Jesus showimaot bigfala love lo olketa narawan. (John 13:1) From Jesus hem King blo iu, hem barava fitim for iu lovem hem. Hem talem hao hem kolem olketa wea barava lovem hem, olketa fren blo hem and olketa showim datwan taem olketa obeyim olketa komand blo hem. (John 14:15; 15:​14, 15) Hem nambawan privilege for fren witim Son blo Jehovah! Iu savve Jesus hem hambol and barava followim example blo Dadi blo hem. Iu lanem hao hem feedim olketa wea hangere, comfortim olketa wea discourage, and healim tu pipol wea sik. (Matt. 14:​14-21) Iu lukim hao hem leadim kongregeson blo hem distaem. (Matt. 23:10) And iu savve hem bae duim staka samting moa lo future from hem King lo Kingdom blo God. Iu savve showim iu lovem hem taem iu followim example blo hem. Wanfala important samting wea iu savve duim hem for dedicate lo Jehovah and baptaes. w23.03 4 ¶8, 10

Jehovah wakem evri samting lo skae and lo earth and lo sea tu, wea savve teachim iumi abaotem hem. (Sams 104:​24, 25, SIPB) And tingim hao God wakem iumi. Hem wakem iumi for enjoyim creation wea luk naes tumas. And tu, hem givim iumi faevfala sense, olsem for lukim, herem, tasim, teistim, and smelem samting mekem iumi savve enjoyim olketa difren samting wea hem wakem. Bible storyim nara important reason why iumi shud lukluk lo creation. Hem teachim iumi abaotem olketa wei blo Jehovah. (Rome 1:20) For example, tingim olketa design blo creation wea spesol tumas. Olketa design hia teachim iumi abaotem wisdom blo God. Tingim tu olketa difren kaen kaikai wea iumi savve enjoyim. Datwan showimaot hao Jehovah lovem iumi tumas. Taem iumi luksavve lo olketa wei blo Jehovah from creation, iumi bae savve gud lo hem and laek for fren gud witim hem. w23.03 16 ¶4-5

From disfala world gohed for kamap worse, datwan bae testim trust wea iumi garem lo Bible. Pipol maet trae for mekem iumi daotem sapos Bible hem tru and sapos Jehovah iusim datfala wakaman wea faithful and wise for leadim iumi distaem. Bat if iumi barava sure toktok blo Jehovah lo Bible hem tru, iumi bae againstim olketa samting olsem wea testim faith blo iumi. Iumi bae disaed strong for ‘obeim olketa lo blong Jehovah, go-go kasem taem iumi dae.’ (Sams 119:​112, SIPB) Bae iumi “no save sem” for talemaot truth from Bible lo olketa narawan and for encouragem olketa for followim. (Sams 119:​46, SIPB) And iumi bae “patient and hapi” nomata iumi feisim samfala barava hard situation, or persecution. (Col. 1:11; Sams 119:​143, 157, SIPB) From iumi savve lo truth, hem helpem iumi for savve lo stret samting for duim lo laef. And tu, hem givim iumi hope for kasem gudfala laef lo future anda lo Kingdom blo God. w23.01 7 ¶16-17

Lo naet bifor Jesus dae, hem prea for olketa disaepol and askem Dadi blo hem for “lukaftarem olketa mekem Satan no spoelem olketa.” (John 17:15) Datwan showim Jesus lovem olketa tumas! Nomata Jesus savve hem klosap for dae, hem still tingim olketa disaepol blo hem. Iumi laek for followim example blo Jesus wea no tingim hemseleva nomoa. So iumi laek prea evritaem for olketa brata and sista. Datwan showimaot iumi obeyim komand blo Jesus for lovem each other, and iumi showim Jehovah iumi barava lovem olketa brata and sista. Bible sei “prea bilong man wea raeteous hem garem paoa and hem savve barava helpem pipol.” (Jas. 5:16) Olketa brata and sista needim iumi for prea for olketa bikos olketa feisim staka hard samting. w22.07 23 ¶13-15